|
|
|
 Re: والله امتحنتوا قدراتنا يا عجايز سودانيز ا (Re: Dahab Telbo)
|
نمشي قدام شوية ،اول معرفة لي بي سودانيز اون لاين كانت عام 2005 ووقتها كنت سنير " تانية ثانوي " وكانت صدفة بحتة حدثت كنتيجة لتجريب جديد العولمة حدث ذلك لامن عاطف بتاع البلي استيشهن في حي شم النسيم "نيالا" الكنا بندك المدرسة عشان نلعب لينا قيم قيمين عندو جاب ليهو ذي خمسة كمبيوترات كدة وفتح مقهى انترنت لأنو في منظمات اجنبية كتيرة أجرت جنب دكانوا الغارق في الوحشة "متلازمة التشبيه دي صعبة خلاس" المهم من باب حب الاستطلاع كدة قنا نجرب النت دا خصوصا مع طراطيش المعلومات السمعنا بيها في عنو من استاذ الحاسوب كان استاذ الحاسوب الله يدي العافية سمين ومتعجرف تقول هو الصمم اول حاسوب محمول ليحتفظ بي في شنطنو ويقدنا بيهو كل يوم اتنين، ولكن رغم حديثوا الدايم عن تطور اليابان عرفنا منو بعض المعلومات ، اول ما عرفناه من حصتو " بعد تعريف الحاسوب وملحقاتو ومعط الاجيال داك" كان السيد المبجل قوقل ، فلامن أُتيحت لينا فرصة عماد – الذهبية- طوالي اتعرفنا عليهو وهو طبعا بدوره قادنا لمعرفة حاجات كتيرة من ضمنها النخبرة والتأكد مما قرأناه من مكتبة المنزل المغبّرة ، اول ما بحثت عنه كان السيرة الذاتية لي ابونا " مابانا غانا كابيه" وهو حكيم وقاص سنغالي جعلني اؤمن بحضارة اهل وطنه قبل ان تخبرني التواريخ ان السنغال لم يدنس شرفها الوطني بوت عسكري "وسوف لن يحدث ذلك بعد التعديل الدستوري الجديد بداية هذا العام" المهم بعدها مشينا خطوة للأمام فعرفنا ان جبران خليل جبران له روائع ادبيه غير "العواصف" وان الجاحظ كتب كتابه الضجة بعد مقارعات فكرية طويلة ووووو
وعشان ما نكبر اللفه حأجي لموضوع المنبر ، في الفين وخمسة ظهرت رواية لحبيبنا ابوعسل احمد السيد كان اسمها" الرحيل ضد الازمنة الرمادية " اسعفني بيها شقيقي موسى الله يديهو العافية فور صدورها مع عدة تحف ادبية ، قرأت الرواية بنهم عالي واعدت قرأتها مرة تين كل مرة بتترك فيني نفس التساؤلات الغريبة ، خصوصا السؤال الملح عن شخصية عمك الحاج بتاع الابتسامة المسوسة البتلقاهو محل ما قبلت ، المهم وانا ببحث عن ابوعسل جراني السيد قوقل لبعض كتابات ابوعسل هني ، ومن ديك ونحن والانترنت وكتابة البورد المكربة بقينا اصحاب
تلبو
| |
 
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: Dahab Telbo)
|
المقدمة البايخة دي مدخل غير سوي لموضوع البوست اللي هو امتحان السادة البورداب لمقدراتنا وكل القيم اللقطناها من ما خلفته الحضارة البشرية من أفكار ، فالامتحانات كانت صعبة شدييييد ومدهشة ،اي والله مدهشة الدهشة او الدحشة " كما ظنها ابكر الهيلاهوبي" الواحدة دي يعني كل ما توسع مساحة رفع حواجبك والبحلقة البلهاء ديك بتلقى المساحة ضيقة ، لحدي ما خفنا الواحد يتحول من الاندحاشة اللانهائية دي ، فبقينا نقلل من عادة المتاوقة على البورد ، وبرضو المشكلة ما اتحلت
نرمي طوبة تانية
تلبو
| |
|
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: Dahab Telbo)
|
اي انسان في الحياة دي عندو فلسفتو الخاصة واهدافو الخاصة وحتى قيمو الخاصة اللي ماف زول بيقدر يحددها ليهو او يوري كيف يشكلها ، لكن في حاجات كدة بتكون اهداف مشتركة لكمية من الناس لأنها بتهمهم كلهم والحاجات دي ناس علم الاجتماع بيصطلحوا عليها بالقيم العليا للمجتمع لأنها مشتركة وهي مختلفة بأختلاف المكان والزمان والظروف ذاتها ، لذلك منجد حسب عصرنا الحالي التعايش السلمي والاحترام المتبادل مصنفات حسب القيم العليا، ولأنو الاول نتاج للتاني حنتحدث عن الاحترام المتبادل ولكن بعد ان نتحدث عن نظرية القطبين "المنجورة من قبل سكان المفاطعة السابعة للفاخورة الخاوية دي"
تلبو
| |
|
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: Dahab Telbo)
|
نظرية القطبين
كمتلصص للمساحة دي من سنين "انتو قايلين قصة عماد الفوق دي عبث وش اخضر" اعتقد انو بحق لي النجر وبعض الهرطقة غير المؤذية ان وجدت ،النظرية دي كانت مطبقة هنا فيما يخص بند المناتلة " لقب الحلة للسيد النقاش " وتفصيلها "كما اوحى خيالنا المريض" كالاتي في جميع نقاشات العهد القديم كانت الرؤى تتشكل في صورة قطبين مُصطلح على تسميتهما بالشرفاء والما شرفاء "افتراضا"، والحمد لله كانو الشرفاء هم الفئة الغالبة عدة وعددا وكانوا الما شرفا ذي نادي القادسية " فريق حلتنا" دايما مضروبين ستة صفر ومحترمين نفسهم ، بعداك واختصارا للمعط بدا فريق الشرفا يفقد بعض نجومو اما بالاعتزال او بالتحول للبيبن بين " والبين بين هم فئة مستحقة للتحية بحسب ادبيات مناتلي اركان النقاش في الجامعات" البين بين الهنا ديل ابلغ تشبيه ليهم بأنهم ذي بدون الخليج، لكن وكغير اخوتهم الخليجين مع مرور الزمن بدوا في بناء كينونتهم لكسر حلقة " هلال مريخ " الكانت ماشة، وكما نعلم اولاد حسن الترابي سرهم باتع ، قال ليك بعد فتح طريق لبيا طوالي اخدو بقج حاجاتهم اللزجة ديك ودخلوا سوق النضال وقعدوا يمسكو من طرف وحق الله بق الله ، طلعوا بالفيها النصيب.
كان اكبر الخاسرين من الحرب اللزجة دي معسكر الشرفاء اللي اصبح "يحنن" بعد ما انقلبت عليه الدوائر وكثرت عليه الفتن حتى جاءت القاصمة " معركة الحلفاء الشهيرة " ، بكدة الحرب القطبية شبه انتهت و اخوان الترابي كما اليهود في الفتوحات الاسلامية بدأوا بشراء الغنائم بثمن بخس.
الكيزان رسالتهم واضحة اضافة للرسالة القديمة اللي سماها ابونا قرنق بالسودان القديم طارحين الجهوية والفبيلة كأداة من ادوات السيطرة على قطعان الناس الهم " بارك الله فيهم" سايقنهن ولأجل ذلك دايما يعملون
تلبو
| |
|
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: Dahab Telbo)
|
وفيما ما يخص الامتحان ، فأنا كنت قد قررت ان احاول بقدر المستطاع النأي عن المجتمعات "الريعية ،القبل رأس مالية" بحسب وصف صحباني الشيوعيين ، يعني بعيدا عن الناس المُأطرين أنفسهم في منظومات وهمية ، فقط ليشكلو بيها مزاجهم ومشاعرهم عند التعامل مع الاخر ، ولا بأس من بعض البطولات الكاذبة، وذلك لأسباب:
اولا لأنها بتعيق مشروع المعرفة الانا ماشي فيهو
تانيا لأنهم مرميين الله وتعلمت من ما كنت صغير الحكمة البتقول " مرمي الله ما بترفع و كان حاولتو برميك"
تالتا وده الاهم اتيقنت من كذب الادعاءات دي لامن اقدمت على معمعه وجودية و صدقتني قيم العالم العليا وعدها "حين حطتني حاجاتي وحاجات جدي الشريف "فأطعمتني العلمانية خبز المساواة الدافي من فرن ما جلبت له حطب ولا اشعلت ناره .
لكن رغم الحصافة والتجنب كنت دايما ما بدخل في امتحان وقت اشيف لي سقوط مريع لزول قدر ابوي ولسه بتاتي في بشريتو وقايل روحو بطل ماسك حاجاتو قوي ،التحدي دايما بكون في اني اطنش ولا اقول بغم ، لأنوا للأسف السقطات كلها في مفاهيم وصل ليها العالم دا قبل ما يلدوني بسنين واصبحت الان من البديهيات ، ودا نفس الامتحان الختا فيهو حسن الترابي الشعب السوداني بي تسجيلاتو الاخيرة كما اجلموه اهل العلم " لو صدقوه برأوه ، ولو كذبوه برأوا القتلة اتباعوا، ولو سكتو السكات رضا" والامتحان الاكبر لامن نفس الزول الساقط داك تلقاهو لافي بي دلقون بوست بتحسر فيهو على القيم وبدعو للفضيلة فعليكم الله ممكن زول عاقل سمع بمصطلح اسمو "الاتساق" يقدر يصمد امام اللغوسة دي
المهم امتحاناتكم كترت علينا ياخ ، فممكن لو سمحتوا تدوا العالم الوسيع دا طلة عشان تعرفوا نفسكم وين ؟ ونحن بدورنا حندخل لينا سرداب ريثما تنتهي امتحاناتكم الضاربة دي
لي العم بكري ابوبكر ياخ الحرية دي ذاتها كقيمة لو أُسيئ استخدامها بتبقى اكعب من الكبت والحاجات الشينة التانية لكل حاجة اطار ، فممكن تأطر الحاجة الاسمها حرية راي دي ياخ!
دمتم
انتهى
مودتي
| |
|
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: Kabar)
|
ياسلام على الكتابة الواعية والرشيقة .. أنا شفطت ليك مداخلاتك دى بنفس واحد يازوول ... مممتعة ..
بس ياولدنا دهب عندى سؤال ليك عامل لى شكك .. هل كنت تكتب فى نافذة الفيسبوك قبل أن تنال العضوية؟؟ ... السؤال لأنو هناك فرق كبير بين دهب المنبر ودهب الفيسبوك ..
| |
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: معاوية الزبير)
|
طبعاًً يا معاوية زمن الإستمخاخ باللكتابة الإبداعية بالنسبة إإنتهى زمان منذ الثانوى العام زمن الزول يكون خاتى روايتين تحت المخدة وشغال قراية بنهم فى ظهيرات الإجازة الصيفية ذات النهار الصن .. وفى المنبر أعاين فى بوستات الأدب ــ زى بتاعات دهب ده وحرسم وأبوذر ــ لكين مافى لياقة للخوض فيها.. فأقول أمشى وأجيها راجع . لكنها طبعاً هى لا تنتظر فسرعان ما يطويها موج الإسفاف الطافح فتغرق فى قاع المنبر ..
لكين هسه دهب فى البوست ده لمن جاب سيرة عجايز سودانيز راس السوط لحقنى ، قلت كدى النشوف .. فإستمتعت بكل سطر من هذه المقتطفات المتناثرة بعفوية وبراعة فى التعبير ..
طبعاً أنا عاينت للنصف الممتلئ من الكوب و أخدت كلمة عجايز بمعناها تسجيل قديم فى المنبر ههههه ..
| |
|
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: عثمان عووضة)
|
للاسف يا دهب
دة الحصل
الموضوع ما امتحان زي حق تجربة الحريق في المؤسسات الضخمة
دي الكتابات ..
الفرق انو انها كانت بتتخلل البوستات .. اتطورت ونمت وكبرت بقت بوستات كاملة .. ماعندك سكة تنطط منها زي ما قاعدين ننطط من حفر المطر في الشوارع . تخش الطين بس
رغم وجود عدد من البوستات التي تمس الجرح وتؤلم تلقي دي ماشة
شوف بوست ابوالريش حول هدم مدرسة .. بيت وعاين ليهو
يا دهب
الامر حقيقي
| |
|
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: Dahab Telbo)
|
لكل الذين كتبوا كلام سمح هنا أشكركم وللنَّاس الاخدت في خاطرها برضوا شكرًا مع الاعتذار الجم لأي شطط فشكراً
أ/معاوية الزبير
أ/بريمة محمد
أ/جلالدونا
د/ محمد المشرف
أ/احمد الشيخ
أ/ درديري كباشي
أ/أميرة السيد
أ/ عثمان عووضة
أ/ هيثم الهواري
وجموع المارين بصمت
وأتمنى ان نتدارك الوضع فجميعنا مسئولون عن هذا الوضع ومعنيون بتغيره
محباتي
تلبو
| |
|
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: Munir)
|
| Quote: في جميع نقاشات العهد القديم كانت الرؤى تتشكل في صورة قطبين مُصطلح على تسميتهما بالشرفاء والما شرفاء "افتراضا"، والحمد لله كانو الشرفاء هم الفئة الغالبة عدة وعددا وكانوا الما شرفا ذي نادي القادسية " فريق حلتنا" دايما مضروبين ستة صفر ومحترمين نفسهم |
معليش دهب للمداخلات السيافية دى .. الإقتباسات دى فقط مقتطفات من تعبيراتك ذات الجاذبية القاعدة فى السهلة :)..
| |
|
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: Dahab Telbo)
|
| Quote: الاستاذ السمين " ليه من الشكر اجزله "دا يا أستاذ عبداللطيف حسن لسخرية القدر لازال في سمنتو ديك ومرحوا واعجابه باليابان شفت كيف |
كان كدا معليش ، كنت قايلك تلميذ عاق هههه
المابشكر اليابان كافر بنعمة الشاشة التي يكتب عليها ، تحياتي لاستاذك السمين المستنير هههه
| |
|
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: Dahab Telbo)
|
عارف يا صديقي..
يوما ما..كنا نجأر بالشكوي باننا جيل يتيم.. جيل فاقدة الأبوة والقدوة الحسنة..تستلف من جكسويتك حق المواصلات.. ومرات بعد تعب تقدر تقنعها تمشي معاك ليلة شعرية للكتيابي..عاطف..الصادق..ابكر..امين..عثمان البشرى..عبد الله الزين.. او قراءات لزهاء طاهر.. او يحي فضل الله.. او مساهمات لمحمد الربيع محمد صالح البقاري..كنا نلهث وليس في بالنا الإ العطش المعرفي العميق..الحياة وقتها ، كنا نظنها تقسو علينا وتحرمنا البراءة والعيش السوي الذي يلبي رغباتنا.. من ينشد ان يكون رياضي..فنان ..تشكيلي..ناقد..روائي..شاعر..كل ذلك الحياة لم تمنحنا اياه.. وانما كنا نحفر الصخر لكي نكون.. لأننا جيل يتيم يفتقد الأبوة والقدوة المفارقة..!
ثم دارت السنين..دارت السنين يا دهب.. وسهلت الأشياء.. اولها التواصل المفتوح بلا حدود.. فماذا فعلنا..!
في البدء عدنا نجتر المسامرات والمشتركات القديمة.. ثم اطل السياسي بوجهه البشع.. ولم نكن ننتبه..لم نكن ننتبه.. فظننا ان اولى اولوياتنا هي السياسي.. وشطحنا.. شطحنا كثيرا يا صديقي.. عارف الحصل شنو؟..
كررنا نفس تجربة السبقونا.. وانشغلنا بتاراتنا القبائلية والإثنية والسياسية الما جايبه همها..ونسينا ان من خلفنا جيل من حقه علينا ان لا يحس باليتم وغياب الأبوة الخلاقة والقدوة المبدعة التي تعرف التسامح ألإنسان وتبتكر الوجود بمظنة تعبيد الطريق على اساس ان لم نصنع الأفضل فلنجعل الطريق سالكا لمن يأتي بعدنا ليضع اساس الأفضل.. ولكن حسرة..!
لقينا انفسنا نكرر حسادة من سبقونا فينا ، ونرسمها بهتانا وغبارا في عيون من ياتون بعدنا..!
جدودنا الأنصار ..يا دهب..عندهم مبدأ جميل وعميق (سدوا الفرقة)..وهو المبدأ الذي قامت عليه افكار ابو علم السيوسيولوجيا الحديثة ، الفرنسي اميل دوركايم..القام قعد الكلام كويس وجاب مبدأ (تقسيم العمل)..فقدنا هذه القيمة.. وحينما جئنا لأول مرة في هذا المنبر كانت حاضرة في الأذهان.. ان نسد الفرقة.. ونثق في بعضنا البعض.. السياسي يسد فرقتو.. الأديب يسد فرقتو.. المتكلم يسد فرقتو..الفيلسوف يسد فرقتو..الخ..!
ولكنا اكتشفنا الخيانات في حق بعضنا البعض.. اكتشفنا اننا لا نستطيع ان نثق في بعضنا البعض.. اكتشفنا قدرتنا على مجوبكة الحاجات بصورة نحسد عليها.. فانشغلنا باصلاح الحال المايل.. ولكن الحال ميل بينا.. اتشبحنا في كل الحاجات بصبر يفوق صبر ايوب..وكل لحظة الحال يميل اكتر واكتر.. فطغى السياسي.. وبعد شوية السياسي ذاتو نسى قيمة (سد الفرقة كما يقول جدودنا الأنصار ، او مبدأ تقسيم العمل كما يقول دوركايم).. فكان هذا المسخ الذي تراه..كان هذا المسخ وكنا..المسخ الذي يمتحنك وامثالك من شباب من حقه ان يجد القدوة المبدعة الخلاقة..!
هل تصدق يا دهب.. كثر في هذا المنبر قرأوا اجمل الكتب والأفكار ..ولكن للأسف يقرأون من باب التسلية وتمضية الوقت.. عكس انسان الغرب الحضاري ، الذي يقرأ بحثا عن فكرة ليجعلها واقع.. ونحن نقرأ ونظن أن الواقع لا يحتاج اضافة..!
بعدت الشقة.. بعدت الشقة كثيرا يا صاحب..!
اهل الرواية والأدب والشعر.. صابهم غبار التكتل..والشللية وشغل اصحاب اصحاب..لا يشتغلون او يذكرون أي منتج الإ اذا تعرفوا على هوية صاحبه.. وبعد التعرف هناك كلام..وكلام.. لا رؤية حقيقية تحاكم الأشياء كما هي اشياء.. وانما رؤى تغلب عليها الأيدولوجيا.. تغلب عليها المعايير المعوجة.. تغلب عليها ذهنية الشللية والصحوبية والتكتل..حتى صار القانون.. ان العوج هو الطبيعي الصاح.. واضحت فكرة التمرد نوع من الجنون والإنتحار الإبداعي والإجتماعي والثقافي..!!
هذا ما اكتشفه بعض عجائز المنبر.. فآثروا الإنسحاب باقل الخسائر.. وفاتهم ان لهم دور وجودي وحضاري يقوم على مبدأ تثبيت حق الجمال.. وهو عندي حق لايقل شأوا عن حق الحرية في التعبير او التجمع السياسي او الإعتقاد..حق مهم ومرتبط بجوهر الإنسان ليكون انسان ويخلق الفرق..!
نعم يا صديقي..نجح الغرب الحضاري.. ببساطة .. لأنو بيعرف كيف يوظف مبدأ (سد الفرقة) .. تبقى روائي وانت واثق انو في سياسي بيسد الفرقة.. وهو بيكون واثق انك بتسد الفرقة..مافيش حاجة تخلي واحد يتعدى الحدود..لأنو مافي سبب..!
امتحان الهين يادهب..!!
ياخي نحن بنكتل الإنسان فينا وفي الآخر..!
تحياتي للعمدة..اظنه دخل المنبر غريبا متلصصا ثم خرج غريبا..!
وكأحد العجايز في المنبر..لم افقد الأمل بعد.. لذلك انا هنا..ومعي بعض الأصدقاء العجايز..كل ثانية نحلم أن الثانية الجاية ح تكون اجمل..ليس بالضرورة ان تكون اجمل بمعاييرنا..ولكن يكفي ان يحدث اجماع بسيط بانها اجمل..!
ودمت..
كبر
| |
|
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: Kabar)
|
استاذنا كَبّر اول بالتبادي شكرا للاجترار الجميل والسياحة التاريخية السقتني ليها اصلي مولع fالتلصص على التواريخ شكرا كثيفا ياصاحب " و حأخلي البساط احمدي احتفاء بهدية صداقتك الفوق دي"
كلامك دة زول ما بلقاه والله ، خاصة مع القدرة الهائلة على الانكار البتمتع بيها الشعب السوداني الفضل ، عارف يا استاذنا انو الحال الان بقى اسوأ مما كان عليه والله صحي الان اصبحت الخرطوم يتسيدها رواد الفكر الاحادي للدرجة الخلت عقد الجلاد بقت زي الحربوية بتغير فنانيها كل ستة شهور اي والله حتى العقد الفريد بقى ما فريد ووقت سألنا بأعتبارنا الملاك الحقيقيين للعقد كعشاق ابديين جاتنا اجابات لزجة عن اختلافات تخص مواعيد البروفات شفت كيف!
خليك من العقد يا خ من شدة ما سيطر فكر (اقنع ولا تقتنع) على الساحة حتى ابونا عاطف خيري ترجل وصبأ عن "سيناريو اليابسة" قريت كلامه عن سبب التعديلات ثم قلت القول قول مجاهد ، ومجاهد القائل هو ود الدومة زول من عالم تاني، سمح وضحّاك رغم انو في نهاية عقده الثاني الا انو يجب عليك مراعاة فارق الفكر وقت تقعد معاه ، كتب مجاهد من بين مجاهدات المحاضرات والشيتات مقال يخص الموضوع الزييت حقو" فليعدل خيري ما اراد لأن ذلك امر يخصه ولكن حب خيري وحب السيناريو ملك لي لذلك سأظل احب خيري واليابسة كما أُنزلت" والعجب عثمان البشرى بقى كائن خلوي كما اسميتوه انتم هايم بين صحاري الكلاكلة وذكريات كوستي الامر بقى معقد هناك يا استاذ انت عارف 2012 ونحن خريجين كان عندنا اسبوع مهندس ومن فعالياتو يوم ثقافي فمشينا جرجنا الكائن وحنسناهو عشان يجي يقول لينا حاجة ، وهو ما قصر تتخيل الحصل شنو! ، مفروض نخليه بالنية ولكن نقول عشان نمغسك اكتر وهو بقرى في نص ملولو كدة كان نسمع ليك الجمهور يتذمر وبطريقة تليق بيهو مشى خلانا غرقانين في اندهاشنا! .
لكن نسوي شنو ياهي متلازمة الانتكاس المعروفة ديك وجبروت عسكر حسن الترابي ، فالاهباط اصبح من المسلمات تتخيل انو حسن الترابي واخوانه قدرو يخترقو عقول حتى المستنيرين من الشعب عبر الخطاب اللزج كما يسمية عثمان البشرى ودي طبعاً حقيقة مرة جدا فمثلا معظم المثقفين السودانيين في الوسط الان بعتبرو انو الأزمة في أطراف الوطن تخص ناس بعينهم ومنظومات محددة بإعتبار انو النهاية حتكون حل ثنائي بين المنظومات دي والحكومة اللي اصبحو قنعانين من اسقاطها او بصورة ادق عاجزين عن ذلك بعد ان اثبت الكيزان للعالم انهم أكتر قدرة على المراوغة من دنينسون ظاتوو " تيكي تاكا الشعبي - وطني" اها يا ولضم بعض من الجماعة ديل قالو احسن نركز في خرطومنا دي ونباصر لينا مخاطبات وندوات كنوع من إثبات الوجود ولكن حتى الندوات والمخاطبات الجماهيرية بتكون فاقدة للوعي الجماهيري كرسالة وبناء الأمة وتشجيع الجماهير على نزع حريتهم المسلوبة فهي - اي المخاطبات - للأسف عبارة عن مناحات وتباكي وتحسر اي والله تباكي فقط فيعني بدل الأحزاب المستنيرة دي تشتغل في توعية المواطنيين بخطر الجهل والعنصرية وتحثهم على توطيد روح الاخاء بينهم ومساعدة المنكوبين الفارين من جحيم الحروب مع اعلاء قيم الحرية والدمقراطية والتسامح فيهم لا بنلقى السادة المستنيرين ندواتهم كلها عبارة عن انصرافية فما ممكن كل الكلام يبقى في الوالي سرق والوزير الفلاني كضب وحوا الطقطاقة وووو اي فضح جرم النظام وبيان فساده شيء مهم كمحرك للثورة ولكن الوعي بالذات والقيم العليا أولى واهم لانو الثورة لو ما اتحققت شروطها كاملة حتكون بلا هدف ذي الحصلت في لبيا ، لكن منو البسمع ! الجميع بعاين للسلطة فقط عشان كدة الثورة أصبحت حلم عصي علينا لأننا كافيين الكوب وبندفق في الموية.
بعدين ياخ في حقيقة الناس دي بتتحاشاها عن قصد واللي هي :
في السودان في قوتين رئيستين يمكن وصفهن بدقة اكثر لو استخدمنا رؤية ابونا دكتور جون للصراع لتكون كالآتي قوة السودان القديم وقوة السودان الجديد
فالاولى قوة ضخمة جدا وعشاقها كثر بسبب غسل الدماغ اللي قاموا بيه الكيزان وتحوي الى جانب الكيزان بشقيهم والأحزاب الدينية والعرقية بعض من المعارضة الحديثة والقديمة، بل حتى داخل الحركات المسلحة وعلى رأسها "الحركة الشعبية طبعا حقت عقار وسلفا ذاتو" يوجد من هم يحملون فكر السودان القديم ( دكتاتورية الحزب الواحد / الدين الواحد/ الثقافة الواحدة/ العرق الواحد)
والبقية الباقية في الجهة المقابلة ماكلين نار السودان الجديد " ديمقراطية الأحزاب المتعددة والحريات / التعددية الثقافية والدينية والعرقية ، مع المساواة التامة للمواطنيين"
فشفت المسألة عويصة كيف يا فردة
تنوبه: ارجو ان لا يأخذ الاخوة المستنيرين تحليلاتي "الضحلة " محمل الجد فأنا زول طيب او "صديق" حسب تسمية صحباني الشيوعيين لعلاقتي بيهم اضف الى انو انا زول علماني واضح وبالتالي ضرب الحبيب ذي اكل الزبيب ولاشنو ياحبيب ولأنو الاحبة المستنيرين حساسين شديد ياهو الواحد خاشي في سرداب الحكي دا لأنو الحاجات هناك اكثر بساطة وحب ايضا الى ان يطلع الوطن من الـ"هلم" اي والله هلم بذات التضخيم الاداهو ابونا درويش للكلمة في لاعب النرد
سعيد بمرورك استاذي وياخ عايز انتهز الجلسة الاحمدية دي واهديك نسخة بي دي اف من مدارج السلسيون تشيف لي لوحي شية
مودتي
| |
|
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: Dahab Telbo)
|
استاذن الاستاذ الاديب دهب كي نرد على كبر...
استاذنا الكبير كبر...
ما عرفنا نقول ليك شنو...
ولكن قدرنا نقول ليك ان كل سطر سطرته هنا يوزن
بميزان الذهب الاصفر الرنان...وكل حرف فيه يدل
على معنى عميق ..
وكتر خيرك ول ابا محمد نور كبر..
والله يديك الصحة والعافية
اميرة مصطفى السيد
| |
|
|
|
|
|
|
|
|
|
Re: والله امتحنتوا قدراتنا يا عجايز سودانيز ا (Re: اساسي)
|
الاستاذ اساسي مرحب بيك
ذي ما قلنا طبعا الامر كلو افتراضي لأنو جلباب الشرف في بلدنا دي فضفاض شدييييد وساهل المنال والتجريد برضو
ياخ انا شخصيا في موقف معين كدة خلاني ما ادقق على مواقف المستنيرين السودانيين كلهم ، لأني اتخدعت في زول
والله كنت اقول يلين الحجر ولا يلين هذا المقدام والكلام دا ابان معارك الجمعات " جمعة الكنداكة - لحس الكوع - الكتاحة...الخ"
والزول كان الاستاذ حسن اسماعيل وزير الحكم المحلي في حكومة عبدرالحيم حسين الحالية والله يا استاذ تشوف الزول دا وهو
بخطب في جماهير شعبنا تقول هو ومارتن لوثر كن اولاد بطن واحدة وخصوصا في الندوات وهو بردد اسفه الشهير " عندما يحيض الرجال"
عند المواقف المايعة لبعض مناصري الحكومة وبعد دا كلو اصطف جنبا الى جنب مع من كان يسميه "ابو ريالة" عشان كدة الموازين مايعة شديد عندان
والتحية لفريق القادسية ولي نجمه التاريخي زكريا جني
مودتي
تلبو
| |
|
|
|
|
|
|
| |
Dahab Telbo
Kabar
Munir
معاوية الزبير
بريمة محمد
جلالدونا
محمد حيدر المشرف
احمد الشيخ
HAIDER ALZAIN
عثمان عووضة
عبدالحفيظ ابوسن
Hatim Alhwary
Mohd Ibrahim
عبداللطيف حسن علي
د.محمد حسن
اساسي
فيس بوك
تويتر
انستقرام
يوتيوب
بنتيريست