|
|
|
 Re: أُسر سودانية تغادر بريطانيا إلي السودان ف (Re: محمد الحسن حمدنالله)
|
حدث هذا لي شخصياً في إجازتي الماضية حيث حملت شنطة زنة ٢٣ كيلو جرام من المواد الغذائية للأطفال والكبار وبالمقارنة مع أسعار السلع الغذائية في السودان كان فرق السعر كبيراً لصالح أسعار بريطانيا بالإضافة إلي الجودة أسرتي لم تكن إستثناءً بل جزءاً من قاعدة عامة أصبحت متبعة بل تصرفنا كذلك بناءً علي نصيحة أسر أخري سبقتنا إلي التجربة
| |
 
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد الحسن حمدنالله)
|
اخونا محمد الحسن حرم ما شفت بوستيك دا الا بعد فتحت واحد عن تجربتي في نفس الموضوع لانه بصراحة عامل لي اشقدي في رقبتي بالجنبة اليمين
وقلت ما افتح الموضوع دا الا بعد اضمن اولادي دخلو السودان عشان ما انبه ناس الجمارك ويجمركوا الدكوة ذي ما بنسجل في تسجيل الاجانب بعد ما نأخد فيزة كسودانين من السفارة
لكن كويس مرقتني من تهمة الحنكشة ....
ما عندي مانع تستف بوستيني معاك واواصل معاك هنا
......
شيلتو معاكم شنو ؟ لتبادل الخبرات والتجارب
تحياتي
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Munir)
|
السلام عليكم . ورحمة الله .
لاتوجد ( جودة ) في السودان ..!!
فكل شئ " مضروب " . او منتجات . ( رخيصة جدا ) . بغرض الكسب المادي السريع ...!!
اؤيد كل من ( يستطيع ) تزويد اهله واهل بيته . بالمواد التمونيه . حتي ولو زاد سعرها . اضعافا ..!!
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Hasheem Karouri)
|
سلام يا كومندان لك ولضيوفك الكرام
| Quote: كم ستوفر عند شحن ٢٥ كيلو من المواد التموينية بالطائرة من الخارج للسودان؟؟ !!.. |
يا منير القصد ليس التوفير ولكن بالجد السودان الرقابة على الاغذية في العناية المكثفة بالذات الاغذية المعلبة
هناك ورش عيدل لتعديل تواريخ صلاحية المعلبات
فاحسن ليك تخسر قروش بدل تعدي اجازتك جري بين المستشفيات لانو ولدك لا سمح الله حصل ليهو تسمم
المنتجات الطازجة عموما ما فيها مشكلة لانها منتجة محليا وانت ذمة المنتج وطلقة يدو في السماد والمبيد :)
غايتو في السودان ده ما بثق في اي تاريخ صلاحية مكتوب على معلبات هههههه
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: مدثر صديق)
|
Quote: يا منير القصد ليس التوفير ولكن بالجد السودان الرقابة على الاغذية في العناية المكثفة بالذات الاغذية المعلبة
هناك ورش عيدل لتعديل تواريخ صلاحية المعلبات
فاحسن ليك تخسر قروش بدل تعدي اجازتك جري بين المستشفيات لانو ولدك لا سمح الله حصل ليهو تسمم
المنتجات الطازجة عموما ما فيها مشكلة لانها منتجة محليا وانت ذمة المنتج وطلقة يدو في السماد والمبيد :)
غايتو في السودان ده ما بثق في اي تاريخ صلاحية مكتوب على معلبات هههههه |
أهلاً أخى محمد إبراهيم علي ..
تطالع المداخلة الرئيسية تجد أن الأخ محمد الحسن حمدنالله تكلم فقط عن سعر المواد مقارنة بالسودان كما يظهر فى الإقتباس أدناه ، وعليه كان سؤالى..
الشئ التانى، البضاعة ذاتها فى تلك البلاد خشم بيوت .. تلقى عبوة مشروب الكولا الأصلى بسعر وجنبه طوالى كولا مشابهة بنصف السعر .. حليب معين بسعر وجنبه واحد بنصف السعر .. تلقى شاى ليبتون بسعر وفى نفس الرف مليون نوع شاى بنصف السعر أو أقل .. فواكه وخضر وأسماك بأسعار متفاوتة بنسبة الخمسين فى المية أو أكثر .. وكله بسبب الجودة والمنشأ ونوع البضاعة إن كانت طبيعية أو معدلة جينياً أو مزرّعة أو منبتة طبيعياً أو أو إلخ .. ففى الدول المتقدمة أيضاً ممكن تعيش بأن تقع الرخيص ولكن الحريصون على الجودة لا يشترون الرخيص ..
أخيراً، نحن نحرص عند سفر الأولاد أن يمشوا يتأقلموا على أكل الكسرة والملاح والقراصة والفول ، مش نقعد نأكلهم فى المستورد وأقرانهم يعاينوا ليهم وهم يكدوا فى الدوم ..
المهم كل زوول حر يشيل الداير يشيله طبعاً، ولكن هل ذلك يستاهل؟؟
تخيل مطارات العالم تضج بالسودانيين الشاحنين عفشهم مواد تموينية متجهة للسودان .. !!!
| Quote: من المعتاد أن يحمل المغتربون في السعودية ودول الخليج في إجازاتهم السنوية إلي السودان بعض المواد الغذائية لأنها أرخص في تلك البلاد لكن أن يحمل السودانيون المواد الغذائية من بريطانيا وهي من أغلي الدول في العالم إلي السودان سلة غذاء العالم المفترضة فتلك من عجائب الإنقاذ التي لا تنقضي |
| |
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Munir)
|
سلام الاخ محمد والضبوف
اسعاركم ما عارفها كيف لكن مقارنة ب ا سعارنا هنا وفرق العملة السودان
حاجاتا ارخص دا غير جرجرة الشنط ومنظرك قدام ضياط الجمارك
عندكم والمسافرين
وبعدين انا شايف المستهلك السوداني دايمن بيميل للمنتج الارخص
كان مواد غذائية وملابس وحتي العطور
وفي السودان كل المنتجات موجودة في الاصلية وفي المضروبة
زي كل البلدان حتي اوربا وامريكا
وشكرن
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Muhamed Hassan Abdalla)
|
العزيز Muhamed Hassan Abdalla تحياتي طبعاً في الظروف العادية حمل مواد غذائية من الخارج إلي السودان غير مريح وربما محرج لكن أحياناً لا تجد خيار خاصة بالنسبة للأطفال حكي لي صديق ذهب وأسرته إلي إجازة في السودان طلب أطفاله كورنفلكس فذهب إلي البقالة المجاورة ووجد الكورنيفلكس مستورد من بريطانيا وعليه مطبوع السعر بالجنيه الإسترليني عندما سأل عن السعر أعطاه صاحب البقالة سعر يقارب ضعف السعر الموجود علي الكرتونة طلب صديقي أن يدفع ما يعادل سعر بريطانيا لكن التاجر رفض بحجة أنه يدفع بالإضافة إلي السعر الموضّح جمارك وسوم وضرائب وترحيل بالإضافة إلي ربحه وهو محق في ذلك فدفع صديقي من سكات صديق آخر نفد حليب طفلته فذهب إلي الصيدلية ووجد سعر حليب الأطفال المجفف ما يعادل ضعف سعره في بريطانيا فاشتراه وهو صاغر! يا أخي ما تركت الإنقاذ للناس من خيار سوي ركوب الصعب وهاهم يفعلون
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Munir)
|
الاخ منير
تحياتى
انا معاك انو اولادنا يتعلموا على ثقافتنا الغذائية ( كسرة / ويكة / قراصة / تركين ..والخ ) لكن المشكلة فى الاطفال وخاصة صغار السن من عمر شهر الى سنتين وكلام اخونا محمد ابراهيم صحيح بخصوص الجودة وكلام حمدنا الله ايضا صحيح فى ما يخص الاسعار , بالنسبة للجودة عندك خيارات كثيرة فى الغرب او فى الخليج كما تفضلت بالاضافة لذلك فى رقابة على السلع من حيث الصلاحية ( تاريخ الانتاج والانتهاء ) وبالنسبة للاسعار الاسعار فى السودان اغلى من اوربا او مطابقة ليها مع الفارق فى الجودة والصلاحية وبالنسبة للوزن 22 كيلوجرام بيدخل ضمن الاوزان المسموحة للتذكرة فبالتالى ما بتحتاج تدفع للشحن
تحياتى لصاحب البوست الاخ محمد حسن حمدنا الله وضيوفه الكرام الاخوة محمد جبرة ومحمد ابراهيم
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: مدثر صديق)
|
العزيز مدثر صديق تحياتي أنا هنا أتناول وجبة الفول بزيت السمسم السوداني الأصلي مستورد من السودان في إجازتي الماضية إشتريت زيت سمسم معبأ جاهز من بقالة وغالي عند إستعماله وجدت أنه ليس زيت سمسم إنما زيت عادي! بعثت من أهل البيت من له مع معرفة بمكان وجود زيت السمسم في سوق شعبي مجاور وعندما تذوّقته وجدت أن لا علاقة له بزيت السمسم!
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد إبراهيم علي)
|
العزيز الباشمهندس محمد إبراهيم علي حمدلله علي سلامة العودة بعد الإستمتاع بإجازتك في السودان قبل أن أطلع علي مداخلتك كان ردي علي الأخ هاشم إنو في السودان من الصعوبة التأكد من جدية تاريخ إنتهاء الصلاحية بالنسبة للمواد الغذائية نسبةً للتلاعب الذي تحدثت عنه وسائل الإعلام وشهادتك شهادة عائد قريباً من السودان تؤكد صحة هذا الزعم أما المواصفات والمقاييس فموجودة لأغراض القشرة وكده تحجز مخالفة احدة وتمرر عشرة مودتي
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Munir)
|
العزيز منير تحياتي بخصوص سؤالك كم توفِّر عند شحن ٢٥ كيلو للسودان فأنت لا تدفع للوزن وهذا الشحن ضمن المتاح لك مثلاً إذا كنتم أسرة من خمسة أشخاص لدي الفرد عادة ٤٦ كيلو يعني عشرة شنطة زنة كل واحدة ٢٣ كيلو تخصص ٩ شنط للملابس والهدايا وشنطة للمواد الغذائية دون أن تدفع جنيه زيادة وزن هذا بالإضافة للعفش المحمول في اليد كل شخص مسموح له في حدود ٧ كيلو
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Munir)
|
Quote: كدى خلى ناس السودان والخليج يقارنوا لينا أسعار المنتجات فى صفحة DELHAIZE هذه وقريناتها عندهم .. حتى ناخد صورة إسفيرية مكتملة عن مناطق الضغط المنخفض والضغط المرتفع فى هذا العالم ..
|
يا منير
بريطانيا بتعتبر اغلى دول اوربا ومع ذلك بالنسبة للسودان رحمة
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Munir)
|
السلام عليكم أخي محمد الحسن,,Quote: الحليب المجفف للصغار والكبار والأرز والعدس والسكر والدقيق والزيت والبسكويت للأطفال والكبار والتونة والساردين وجبنة بوك ولاڤاشكري والجبنة الصفراء والشكولاتة الحشوة
والمكرونة والإسبجاتي والمعلبات عموماً والتانق وكورنيفلكس وصابون الحمام ومعجون الأسنان وأشياء أخري طبعاً لو ما الوزن الناس بشيلوا كميات كبيرة ليهم ولأسرهم |
رغم كل شئ سئ يحدث هناك لكن في أعتقادى لم نصل لمرحلة جلب كل الذى ذكرته من الخارج والله العظيم تدخل بقالة واحدة كبيرة تشترى منها كل المواد
المذكورة أعلاه بربع قيمة شحنها من الخارج وبأجود المواصفات رغم غلاء سعرها النسبى بالمقارنة مع أسعارها في الخارج ومنتج مضروب أو مقلد أو مشكوك
فيه ابعد عنو,,,
يعنى لا يمكن الآن أن اشحن لبن بودرة وصابون حمام وغسيل ومعجون أسنان من الخارج رغم تكاليف الشحن العالية !!!!!
هناك الكاش يقلل النقاش وما يكلفك خارجا في المجمل حوالى ال300 دولار قطعا سيكلفك داخل البلد اقل من ذلك بكثير!!!
لبن البودرة كمثال المصنع محليا افضل من المستورد وسعره رخيص مقارنة بالمستورد!!!
المعجون والصابون ومواد التنضيف ستجد نفس المنتج العالمى باسعار قد تكون غالية
للمستهلك المحلي ولكن في حالة كون المشترى مغترب ستكون رخيصة جدا و هي أصلية!!!!
في رايي البسيط أننا في أحوال سيئة جدا لكن ليست لهذه الدرجة وإذا توفر الكاش فلن نحتاج أن نشحن موادنا الغذائية الشخصية من خارج البلد ...
ونتمنى ألا نحتاج ابدا وربنا يصلح الحال...
تحياتى
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: حاتم الياس)
|
Quote: ياخ ده والله أجمل بوست اشوفو ويمكن أيضاً أن نصنف به (الفصام) كمرض صديق , طبعاً الخوف على الأبناء مشروع وكلنا أباء لكن مايصل كمان لمرحله هوس واصلاً أنتو وكت القصة دى قاعد تتعبكم قدر ده الشوق ليكم شنو والحنين للكوشه دى.. ..قصة تحكى عن أمرأه بجهاتنا سكنت المدن وتبع ذلك حدوث تحول أقتصادى لها ولأسرتها فى المأكل والمشرب واللبس أها يوم جات أجازه البلد لقت أولادها مدفسين مع حبوبتهم فى المطبخ وخاتى ليهم كسره بملاح ورق والشفع يضربوا فى أمان الله..وقفت فوقهم وقالت ليهم الللللليله كان ابوكم شافكم بتاكلوا فى الحاجات دي...
|
الموضوع ما كده ابدا ..
انا عشت ال3 سنوات الفاتو في السودان وبصراحة مشكلة الجودة والمواصفات وصلت مرحلة خطيرة جدا في اي منتج ، بالمناسبة انا من الناس المتكلين على الله وما قاعد ادقق كتير ، تدقق في شنو اصلا اذا كان في معامل لتغيير تاريخ الصلاحية ؟
السوق كلو بقا في الشمس ، خضار ، لحمة ، مواد غذائية اي حاجة .. وذمة بي تعريفة مافي ، والله يوم "حاولت " اشرب شعير طلع بودرة كاسترد كاملة الدسم ، قلت لبتاع الكافتريا ده شنو يا بوي ، قال لي دي نكهة ! قلت ليهو ده كاسترد بنكهة الشعير ، ما شربتها ختيت ليهو كبايتو مشيت ، واكيد صلاحيتو منتهية لانو عاملو مركز شديد ورخيص !
العايز يعرف موضوع الجودة والمواصفات وصل وين يمشي بس برج الامل بتاع مستشفى الذرة في شارع الحوادث .. يدخل بس ياخد لفة صغيرة كده ويطلع ..
سيبك من الاسعار والحاجات دي ، مافي هوس ولا حاجة اي زول بقدر يتفادى مشكلة محتملة ليه ما يتفاداها ؟
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Munir)
|
يااخوانا خلوكم من الاكل والشراب ..اصلا دا موضوع منتهي ...نحن بنشيل معانا مياة صحية من السعودية ونجي ...لانو الموية الصحية في السودان كلها ضاربة وشكلها معباة من الماسورة
الملاحظة حصلت لينا في اجازة الاولاد... اسهالات شديدة ...الاجازة بعدها جينا بي مويتنا ...وللامانة في ماركة واحدة بس في السودان ماغيرت معانا اسمها صافية من انتاج اسامة داؤود ...
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Mohd Ibrahim)
|
| Quote: ماركة واحدة بس في السودان ماغيرت معانا اسمها صافية من انتاج اسامة داؤود ... |
نعم بالمجمل منتجات اسامة داؤود هي اكثر منتجات جديرة بالثقة في السوق وغالبا هو يمارس رقابة ذاتية لانو رقابة الدولة صفر كبير ..
يا خوانا الناس القاعدة في السودان بطونهم متعودة على تلوث المياه ، انا ولدي عمرو ست سنة بشرب من موية الجدول ايام الفيضان وما بتعمل ليهو اي حاجة ، لكن شفت الموية بتاعة الحنفية بتعمل شنو في اسر المغتربين ، فما ممكن الواحد عندو اجازة شهر يجي يقضيها في المستشفيات ، ده غير الصورة السلبية الحاياخدوها الاولاد معاهم !
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Mohd Ibrahim)
|
التحية لك اخي حمجنا الله .. ولضيوفك الكرام ..
يا المنير سلام من جوووة قلبي ..
اما بعد : !!!!!!!!!
Quote: الشئ التانى، البضاعة ذاتها فى تلك البلاد خشم بيوت ..
تلقى عبوة مشروب الكولا الأصلى بسعر وجنبه طوالى كولا مشابهة
بنصف السعر .. حليب معين بسعر وجنبه واحد بنصف السعر .. تلقى
شاى ليبتون بسعر وفى نفس الرف مليون نوع شاى بنصف السعر أو أقل
.. فواكه وخضر وأسماك بأسعار متفاوتة بنسبة الخمسين فى المية أو أكثر ..
وكله بسبب الجودة والمنشأ ونوع البضاعة إن كانت طبيعية أو معدلة جينياً
أو مزرّعة أو منبتة طبيعياً أو أو إلخ .. ففى الدول المتقدمة أيضاً ممكن تعيش
بأن تقع الرخيص ولكن الحريصون على |
يا المنير يعني داير تقارن لينا الكلام دا بالحاصل في السودان ؟
يا المنير تفاوت الاسعار في اوربا لو غالية او رخيصة في النهاية حسب الدخل
يعني ما فارقة معانا لانو الدخل بتناسب مع الاسعار اما غالية ولارخيصة ولاجودتها
شنو دا بتحددو انت بنفسك . لكن في النهاية حتي الرخيص مدته ما منتهي ولاضار
بالصحة زي بلدنا المنكوب ! عشان كدا ما تقارن في الاسعار في النهاية النسبة محفوظة
بما انه مافي اي نسبة للمقارنة بالمرتبات هنا والمرتبات هناك لكن نقول محفوظة .
ولك الشكر يا صديق .
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: مني عمسيب)
|
العزيزة مني عمسيب التحية والإحترام سعيد بمرورك أشرتي في ردِّك علي الأخ منير إلي نقطة غاية في الأهمية وهي إنخفاض أسعار السلع الغذائية في أوربا لا يعني عدم جودتها أو إنتهاء صلاحيتهاو نقطة أخري لا تِقل أهمية وهي أنه لا مقارنة للمرتبات والأجور بين أوربا والسودان والطبيعي أن لا تكون هناك مقارنة بين أسعار المواد الغذائية لأن العادي هو أن يكون سعرها في أوربا أضعاف ما هو عليه في السودان لكن أن يحدث العكس فذلك أمر خارج عن نطاق المألوف تقديري
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: حاتم الياس)
|
Quote: ياخ ده والله أجمل بوست اشوفو ويمكن أيضاً أن نصنف به (الفصام) كمرض صديق , طبعاً الخوف على الأبناء مشروع وكلنا أباء لكن مايصل كمان لمرحله هوس واصلاً أنتو وكت القصة دى قاعد تتعبكم قدر ده الشوق ليكم شنو والحنين للكوشه دى.. .. هناك قصة تحكى عن أمرأه بجهاتنا سكنت المدن وتبع ذلك حدوث تحول أقتصادى لها ولأسرتها فى المأكل والمشرب واللبس أها يوم جات أجازه البلد لقت أولادها مدفسين مع حبوبتهم فى المطبخ وخاتى ليهم كسره بملاح ورق والشفع يضربوا فى أمان الله..وقفت فوقهم وقالت ليهم الللللليله كان ابوكم شافكم بتاكلوا فى الحاجات دي...المره دى بتشبهكم شديد والله
تحياتى وأحترامي للجميع....وشكر الله سعيكم |
اخونا حاتم ...تحياتي
انا فتحت بوست بنفس المعني واولادي سافروا من بريطانيا وشالو معاهم دكوة كمان .... شفت الانفصام دا كيف
يا حاتم الموضوع ما انفصام ولا عاجبنا ولا نحن اقل وطنية منكم ....والبوستات دي هي مناحة لحال البلد الوصل ليهو
اولادنا يا حاتم ما منفصمين ....هنا بياكلوا القراصة والتقلية و النعيمية والعصيدة بل بالعكس منفتحين على ثقافة الغير اكثر مننا نحن ابائهم
بياكلو كل اكل الدنيا بعرفوا الانجيرا و الزقني و الكراهي و الكاري و الفجتا المكسيكية والسوشي وغيره ...ودي ثقافة الانجليز عموما لان مطبخهم فقير جدا
عكسنا نحن البنشيل حياتنا كلها معانا وين ما نمشي .
تبقى المشكلة وين يا حاتم !! ليه الاكل في السودان بدخلهم مستشفى من اول يومين ؟ وتغضي اجازتك تعزل في الدكاترة الشاطرين البقدروا يوقفوا الاسهلات
ما كنا بنشيل اكل معانا وذي ما قلت في البوست الآخر المغترب زمان ما كان بشيل غير معجون سغنل و شاي ليبتون لكن حال البلد خلانا نشيل كل حاجة لانه ارحم اقتصاديا على الاقل
يا حاتم الريف الانجليزي من اجمل الاماكن في العالم للسياحة وقضاء اجازات الصيف ودي سياحة ما بتكلفنا جالونين بنزين ...لا فيها دربات و لا املاح تروية
لكن بنمشي السودان رغم التكاليف المرهقة ...لاننا (مهوسين ) بسودانيتنا وهوية اولادنا ودا خوف و هاجس الناس العايشين في الغرب . وتعبانين نجمل ليهم في السودان بالكذب والصاح
وبصراحة شديدة اولادنا بجاملونا و نحن بنحاول نهون عليهم
تحياتي
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد جبره)
|
الحبيب محمد جبرة لك التحية والإحترام لقد قلت وعبرت في ردّك علي الأخ حاتم الياس عني وعن حال آلاف السودانيين المقيمين في بريطانيا في كلمات موجزة ومعبِّرة وفي صلب الموضوع لم يكن ما يفعله السودانيون بحمل الأغذية معهم إلي السودان إختياراً بل إضطراراً
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Abdullah Idrees)
|
العزيز Abdullah Idrees التحية والإحترام وأنا مثلك متوكل أخي عبدالله عند ذهابي الإجازة أعلم أن تغيير الماء يسبب الإسهالات ولكني لا أبالي أشرب الموية العادية المليانة كدراً وطينا دي لكن الأطفال أحرص ما أمكن أن يشربوا موية صحة لضعف مقاومتهم ولأن مرضهم يعني إنشغالك بذلك والحافظ هو الله لكن ما وجدنا فرصة للوقاية فهي من باب الأخذ بالأسباب أوافقك علي علاقة الأغذية غير الصحية بالأمراض الفاشية عندنا في السودان تقديري
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: حاتم الياس)
|
العزيز حاتم الياس تحياتي غرض البوست أصلاً هو التعرّض لمفارقة الأسعار بين أغلي دولة في العالم والسودان سلة غذاء العالم كيف للأسعار تصل هذه الأرقام الفلكية السبب بسيط وهو أن أسعار السلع الغذائية حتي وصولها بورتسودان معقولة جداً لكن بإضافة الجمارك والرسوم والضرائب والجبايات والأتاوات تصل أسعار السلع الغذائية لهذه الأرقام الفلكية لك أن تتخيل أن جمارك حليب الأطفال ٣٥٪ كما ذكر الصحفي الطاهر ساتي! السودان بلدنا ونعتز به لكن هذا لا يمنعنا من نقد الحال المائل أمر آخر أنا من نيالا فطوري عصيدة وغداي كسرة وأفتخر بذلك لكن إذا كان ممكناً أن أوفر لأطفالي ما يطلبونه ما العيب في ذلك؟
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: أيمن الطيب)
|
العزيز أيمن الطيب تحياتي واضح أنك لم تطالع المداخلات أعلاه ففيها الإجابة عن كثير من الأسئلة التي طرحتها علي أية حال أنا أتحدث عن تجربة شخصية وأذهب إلي السودان بإنتظام وإجازتي عادة ما تكون شهرين كاملين وعادةً ما أقضي إجازتي السنوية في مدينة نيالا التي تكون فيها أسعار السلع الغذائية ثلاثة أضعاف سعرها في الخرطوم وربما زيادة لكن إجازتي الأخيرة أمضيتها في الخرطوم وكنت أحرص علي الذهاب إلي البقالات بنفسي لشراء الأغراض فوجدت أسعار المواد الغذائية أغلي من بريطانيا وبجودة أقل ليس هذا إنطباعي وحدي بل كل أصدقائي الذين ذهبوا من هنا لقضاء الإجازة وقد إستشهدت في مداخلة سابقة بإثنين من هؤلاء الأصدقاء أحدهم وجد سعر الكورنيفلكس بضعف سعره هنا وآخر وجد سعر حليب الأطفال المجفف بما يقارب ضعف سعره هنا أما تكلفة الشحن كما ذكرت سابقاً ليس هناك أصلاً تكلفة شحن لأن شحن المواد الغذائية يأتي ضمن المتاح من الوزن المجاني للعفش
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: مني عمسيب)
|
يابت عمسيب تحايا معطرة..
بالتأكيد مافى مقارنة بين دخل الفرد فى السودان مع الدخل بالخارج .. لكن البوست عن مقارنة الأسعار البتخلى الزول يشيل معاهو مواد تموينية من الخارج، وهو برضو دخله عالى وممكن يشتريها أرخص من السودان بدل التلتلة والوضع الشاذ بين المطارات .. فطالما الزول دخله عالى ــ مغترب ــ فإذن مافارقة معاهو ، وأخير يشتريها من السودان ..
أتفهم حكاية حساسية الأطفال أقل من سنتين ، بس ما منطقية تشيل مؤونة مياه لمدة ٣ أو ٤ أسابيع للسودان !!..
جبت ليكم مثالين فوق لعينة من أسعار السلع للمقارنة بالسودان ـــ سلعة برجوازية وسلعة بلدية ــ ..أها رأيكم شنو؟؟ !! قارنوا..
النعجة الإسمه Ashgar Taiba ــ فيسبوك ــ عاوز تستعرض معلوماتك ولقيت كلمة coffee قلت تتفسح؟؟ يالك من ساذج ..
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: مني عمسيب)
|
| Quote: فى مشاكل كثيره جداً فى الضبط والمقاييس ونوع المنتج لكن زى البوست ده فيه تجنى على الصناعة السودانية والمنتج السوداني وكأن حالة عدم الأخلاق والفوضى هى الأصل , بجانب كده انتو قايلين المواطن السودانى ده ماعندو وعي أستهلاكي.. |
سلام يا حاتم
نعم يا حاتم عدم الاخلاق و الفوضى هي الاصل في كل شيء واصبحت اذمة حقيقية و ما دونها فروع
بالنسبة لموضوع الوعي الاستهلاكي .....اجازتي الفاتت دخلنا مطعم فول مزدحم في السوق العربي لاحظت انه البائع بعد ما يصلح الفول بمسح اطراف الصحن باصبعه و يلحسه و يكرر نفس العميلة في الصحن البعده
نبهته بصوت عالي وانا قاصد وقلت ليهو ما تلحس اصبعك و تاكلنا بزاقك ....شفت الدهشة من كلامي في عيونه و عيون الزبائن
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد جبره)
|
سلام وتحية وتقدير صاحب البوست وزواره الكرام ..
هذا البوست جانا في وقته ونحن نستعد لاجازتنا السنوية في ربوع الوطن الغالي ..
أهم نقطة لفتت انتباهي .. وأصبحت مجال نقاش كبير في الأسرة ..
Quote: يااخوانا خلوكم من الاكل والشراب ..اصلا دا موضوع منتهي ...نحن بنشيل معانا مياة صحية من السعودية ونجي ...لانو الموية الصحية في السودان كلها ضاربة وشكلها معباة من الماسورة
الملاحظة حصلت لينا في اجازة الاولاد... اسهالات شديدة ...الاجازة بعدها جينا بي مويتنا ...وللامانة في ماركة واحدة بس في السودان ماغيرت معانا اسمها صافية من انتاج اسامة داؤود ... |
موضوع المياه ... سالت بعض المقيمين في السودان ونصحونا بالمياه الصحية من مصدرين فقط ..
سوبا .. وصافية والبعض اضاف كريستال ..
بس والله ما عارف ومحتار أعمل شنو لو زرنا ناس في بيتهم وقدموا لينا عصير عادي ؟ نسالهم من مصدر الماء ؟؟ ههههههههههه
والله دي ورطة ....وما عارف كيف نتصرف فيها ..
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Dr. Ahmed Amin)
|
ياجماعه مع تقديري لمخاوفكم المدفوعة بعاطفة ومخاوف الأبوه وهو أمر نجتمع فيه كلنا وأحيانا بشكل مُفرط اتكلم عن شخصى هنا..لكن تجهيزاتكم لرحلة السودان هذه بدت لى وكأنها عملية تشوين لمركبه ستطلقها ناسا بأتجاه المريخ لذا أجد أنه من الأفضل بدلاً من تحملوا ابنائكم هذه الصور والذاكرة السيئة عن بلد ووطن موبؤ بهذا القدر وذاكرتهم حتماً تسجل جيداً أعتقد من الأفضل أنو تخلوهم فى بلدانهم وتجو السودان فرادي كده أو تخلوا الجيه نهائى...معقوله والله شككتونى فى الأقاشي الأكلتو قبيل ده :)
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: حاتم الياس)
|
| Quote: معقوله والله شككتونى فى الأقاشي الأكلتو قبيل ده |
يااخوي مابتجيك عوجة انت مصفح طالما قاعد السودان ....الشغل دا زي راي الميكانيكية.. دي مكنات سنة ناعمة وطالما بدت بالسليم خليها تواصل فيو ..انحنا الابوات ديل بندوس مع الدايسين ..لكن اقعد الاجازة كلها من مستشفي لي مستشفي دي مابتخارج احسن نواصل في السليم ...........ماتنسي كمان البعوض والضبان دا ماراجيهم يصلحو بيهم الدفاعات حقتهم ........
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Mohd Ibrahim)
|
والله ياجماعة هذا البوست أعادنى لحادث مؤسف حدث فى منتصف التسعينات لأقربائى أحضروا للسودان طفلهم الرضيع الكلام ده قبل مصانه تعبئة المويه وتعقيمها..للأسف توفي هذا الطفل ودخلت الأسرة حسره وأعتقد أن السبب كان بسبب المياه...فى مثل فى السودان بقولوا للزول المتحجر (انت ماوالد ولاشنو) وهذا لايعنى بالطبع أن الأبوة وحدها هى مدخل الرافة للقلب , لكن المثل يقال فى حال أنعدامها تماماً..اعتقد أن مخاوف الأباء والأمهات هنا مشروعه جداً وحقيقية نحن فعلاً نعيش فى بيئه كارثية....تقبلوا أعتذاري جميعكم
| |
|
|
|
|
|
|
|
|
 Re: أُسر سودانية تغادر بريطانيا إلي السودان ف (Re: Munir)
|
| Quote: ...معقوله والله شككتونى فى الأقاشي الأكلتو قبيل ده :) |
ابقدوم حاتم المانجلك ود الياس مشتاقين وتحياتي
اخر اجازة جيتا الفطور زبادي او مش بتاع كابو ووجبة واحدة قوية المغرب سمك او لحم من اولاد امدرمان او دجاج بلدي والحبة ماجاتنا بالليل كن جاعو بنرمي ليهم زلابيا بي شاهي حليب كلو وطني في وطني حتى الحلويات والبسكويت من عفرا بس جلابية على الله من الهند والصين دي الماوقعت لي ومالقيت واحدة قدر كرشتي شفتا ليك صيني ولا هندي بلبس خمسة اكس ال المهم لامن انضويقتا مشيت سعد قشرة وتفصيل الغريبة يقولو ليك سوق ماف تعرف ياصديقي ايو شئ في البلد داك مابتفهم
سنة تمنية وتمنين السيول الفول المدمس وقراصة النبق والبسكوت انعدم من السوق واختلطت مياه الخريف بمياه الصرف الصحي والله يكرمكم الادبخانات البلدية وعينا لي بتاعين الشاي والحليب في لفة القبة بغسلو الكبابي وعدة الشغل من موية الخريف والغريبة ماحصل وباء ونزلات معوية وكوليرا ودي عناية الاهية زي نكتة اللغز بتاع الله كريم مع المرتب في الاجازة الاخيرة دي ظاتا انفجرت الماصورة الرئيسية بتاعت الصرف الصحي جنوب الخرطوم جنب السوق المركزي والمينا البري ومحلات السفسفة والاكل فاتحة عادي وشغالين كانو مافي شئ
جدنا زمان كان عندو حكمة يقوليك اتعرض للبرد والحر والغبار واكل من الملاح الضارب عشان تشغل المضادات بتاعت الجسم ويكون نوع من التطعيمات الذاتية ولامن ترجعو من الاجازة تشيلو معاكم حبة لغاويس من هناك عشان ينسحب مفعول اللغوسة تدريجيا من الجسم
من ناحية تانية مع شحنة المواد الغذائية دي في بمبرز :)
مغتربي اوربا لقيتكم خوافين 
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: حامد بدري)
|
يا جماعة كل شئ متوفر في السودان المهم جيبك يكون مليان (ضحاكات)..كل شئ موجود و بمختلف درجات الجودة و شخصيا قمت بشحن بعض احتياجات الاسرة الكبيرة في رمضان و من ضمنها لبن بودرة (انكور) 2.25 كيلو و الكيس كان بي 57 ريال سعودي و قمت بقضاء العيد مع الاسرة في السودان و بدخول سيوبر ماركت وجدت نفس العبوة من نفس الشركة و بنفس الجودة بما يعادل 43 ريال!!
ركزوا بالاستمتاع بالاجازة و بالحجات الجديدة علي الاولاد و خلوهم يجروا في الشارع و يستمتعوا و ان شاء الله ربنا يحفظهم..صحيح التغيير بالنسبة ليهم كبير لكن في النهاية ح ياخدوا علي الوضع الجديد..الموية فعلا قد تسبب بعض المشاكل و لكن الموية الصحية متوفرة و رخيصة أو يمكن استخدام فلتر.
أغنى اغنياء السودان بمكنهم ان يستجلبوا ما يريدون من اي مكان في العالم و لكنهم يجدون كل ما يحتاجون في السودان و ما دام جيبك مليان كل شئ في في السودان!..حمل المواد الغذائية بين المطارات في حد زاتو صداع نعاني منه و طريقتنا السودانية في السفر و حمل العفش في حد زاتها تحتاج لتغيير.
منير قلت لي الحمامات كيف هههههههههههههههههه
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: الحاج حمد الحاج)
|
سلامات ياالحاج .. ياخى الغربة دى عملت للناس هلع مااعتيادى .. شايف حاتم الياس إندهش شديد من الهلع الحاصل، لكنه فى الآخر استسلم للأمر الواقع ..
وبأمانة أعزو ذلك الهلع للفارق الكبير فى البيئة والناس ونمط الحياة حيث ننتقل من صفوف العيش والبنزين والمواصلات والحر والغبار و الزهج الشديد والكتمة والجفاف والتصحر والكهرباء والمياه لبلاد فيها المعدوم كله موجود ــ ده من حيث ماديات الحياة ــ.. فى الدول العربية طبعاً الجفاف ياهو الجفاف والتصحر ياهو التصحر .. لكين فى بلاد أولاد جون بالجد هناك الماء والخضرة ومعاها الوجه الحسن ــ هوادة ساى ــ ولذلك تجد إنطباعات السودانيين عن السودان تصبح سلبية لأقصى درجة وهو مانراهو منعكس فى هذا المنبر .. تفتح موضوع إستثمار يهبوا ليك فى حلقك يقولوا ليك أختا السودان وأقع أثيوبيا أو نيوزلندا .. تقول السودان سمح يقولوا ليك لأ بل جحيم .. تقول وسخان يقولوا إزدراء للوطن العاجبنا .. إضطراب نفسى ظاهر بسب الغربة التى جهجهت باكات الناس ..
ده كله خليهو .. أها شفع الغربة بيتصرفوا كيف مع الحمامات البلدية ؟؟ .. ههه
الشفع خلهم الكبار ذاتهم عاملين كيف مع قعاد السُنة ، بعدما الحوض بقى مابيستحمل غير الزاوية القائمة فى القعاد .؟؟ أى عنكبة تتفنقل لـ وراء .. :)
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: الحاج حمد الحاج)
|
العزيز الحاج حمد الحاج التحية والإحترام شاكر مرورك ونقل خبراتك ونصحائك القيِّمة وهذا هو غرض البوست أن نتبادل خبراتنا وتجاربنا لنستفيد نحن والقراء الكرام نأخذ بالمفيد ونطرح ما لا يفيد أنا علي المستوي الشخصي حريص علي إرتباط أطفالي بالسودان لما في ذلك من فوائد يصعب حصرها وفي سبيل ذلك لا بأس من المعاناة هنا وهناك لكن ما وجدت سبيلاً إلي تخفيف تلك المعاناة سلكته حمل المواد الغذائية في المطارات أو حمل العفش أو حتي السفر نفسه بالنسبة لي غير مريح آمل أن تساعد ظروف السودان في أن نحط عصا الترحال ونترك كل ذلك خلف ظهورنا تقديري
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد جبره)
|
Quote: ياريت تورينا انطباعات الناس الجوه السودان عن السودان وقارن درجة السلبية بين الانطباعين
|
الجوة السودان يامحمد جبرة أسأل منهم حاتم الياس المندهش من جنس سواتكم دى ..
المقارنة من البوست ده ذاته بين مداخلات حاتم وأيمن الطيب من جهة وبينكم من جهة ..
إن شاءالله أكون جاوبتك سؤالك العضم ده 
وليك ألف تحية ..
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد الحسن حمدنالله)
|
Quote:
يااخوانا خلوكم من الاكل والشراب ..اصلا دا موضوع منتهي ...نحن بنشيل معانا مياة صحية من السعودية
ونجي ...لانو الموية الصحية في السودان كلها ضاربة وشكلها معباة من الماسورة
الملاحظة حصلت لينا في اجازة الاولاد... اسهالات شديدة ...الاجازة بعدها جينا بي مويتنا ...وللامانة في
ماركة واحدة بس في السودان ماغيرت معانا اسمها صافية من انتاج اسامة داؤود ... |
التحايا لصاحب البوست وزواره الكرام
الإقتباس أعلاه للأخ محمد إبراهيم
التعليق :-
نعم ليس هنالك ثقه في منتجات المياه الصحيه مثلها مثل الكثير من المنتجات الغذائيه
المحليه
ولكن بلد مثل السودان حباه الله بثروه من كل شيء وخاصه المياه الجيده الطبيعيه
التي لا تحتاج للكثير من المجهود لجعلها مياه صحيه نقيه
ولكن بعد التعبئه في قوارير البلاستك ألاحظ وتلاحظون معي وجود أكوام من المياه
الصحيه والمشروبات الغازيه أمام محلات البقاله والسوبرماركت لأسابيع وشهور
في العراء تماماً تحت أشعة الشمس الحارقه التي تتفاعل مع البلاستك وتنتج الكثير
من التفاعلات الكيمائيه المضره بصحة الإنسان والتي تصيب القادمين من خارج السودان
وحتي للموجودين فيه بإضطرابات في المعده وامراض في الجهاز الهضمي
المشكله الأساسيه اراها انا في سوء التخزين
مع التحيات الزاكيات
.
.
.
.
..
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد اسماعيل موسي)
|
Quote: بالتأكيد مافى مقارنة بين دخل الفرد فى السودان مع الدخل بالخارج .. لكن البوست عن مقارنة الأسعار البتخلى الزول يشيل معاهو مواد تموينية من الخارج، وهو برضو دخله عالى وممكن يشتريها أرخص من السودان بدل التلتلة والوضع الشاذ بين المطارات .. فطالما الزول دخله عالى ــ مغترب ــ فإذن مافارقة معاهو ، وأخير يشتريها من السودان ..
أتفهم حكاية حساسية الأطفال أقل من سنتين ، بس ما منطقية تشيل مؤونة مياه لمدة ٣ أو ٤ أسابيع للسودان !!..
جبت ليكم مثالين فوق لعينة من أسعار السلع للمقارنة بالسودان ـــ سلعة برجوازية وسلعة بلدية ــ ..أها رأيكم شنو؟؟ !! قارنوا.. |
تماما كما ذكرت استاذ منير
لو تقارن سعر البضاعة في السودان مع سعر صرف الجنيه تجد كل شيئ أرخص من المستورد ، نتفهم ان يطلب اهل السودان هذه الأشياء من الخارج لأنها تأتيهم مجانا وغالبا ما يتججون بالجودة ولكن كل الذي ترومه موجود ، كدا زور الواحة او عفراء مول او اي بقالة كبيرة تجد كل شيئ حتى الكليجة القصيمية والبلح السكري موجود في الخرطوم .
وبالمقايل هناك ايضا معاناة في الغرب يجب ذكرها فأنا شخصيا كنت اعاني جدا في اوروبا لأجد مطعم حلال ، ولأجد مسجد أصلي فيه ، ممكن تركب هنا تاكسي بأخبس الأسعار ، صحيح مش مكيف ، وفي الغرب ركبت تاكسي من مطار اوسلوا لوسط المدينة ب 500 ريال عدا ونقدا !!!
وفي لندن دي عشان تمشي من بيتك وتركب المترو ركبك تسيح طالع ونازل ويتلصق فيك 100 واحد ما بين سكران وعرقان وعريانة !!!
يا زول في لندن انا شفت شقق وبيوت ما يسكن فيها ابليس من ضيقها ورداءة العفش الفيها ، فنادق لندن نفسها تثير الشفقة ، بريطانيا تاريخ فقط ، ولكنها في عالم اليوم كوم قرف !!!
كل بلد فيها الزين والشين ، صحي بلادنا وساخة وشينة لكن عندنا قيم لا تجد منها الذرة في بلاد الغرب !!
بعدين ما عندك الضأن الطازج يعني شنو لو تشتري ليك 10 خرفان وثلاجة ومولد كهرباء طالما عندك قروش ، يا زول تطلع دولار تجيك الخدمات في بيتك .
ومنظر قبيح جدا وغير حضاري ان نحمل أطنان من الحقائب ونعطل الركب والركاب في مطارات العالم .
بلادنا بخير ولكن قلوبنا اصبحت رهيفة !!
تحياتي
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد الزبير محمود)
|
Quote: ومنظر قبيح جدا وغير حضاري ان نحمل أطنان من الحقائب ونعطل الركب والركاب في مطارات العالم .
بلادنا بخير ولكن قلوبنا اصبحت رهيفة !! |
تحياتي ود الزبير
خلاص بقت في قباحة المنظر ؟
اطنان شنو يا ود الزبير !!! مافي زول بشحن حاجة زيادة عن وزنه المسموح بيه في التذكرة مع العلم انه الوزن في التذكرة 46 كيلو
البوست دا ما للمقارنة بين لندن و الخرطوم ولا قشرة و فلهمه ....صاحبو وضح هدف وغرض البوست اكتر من مرة
بعدين ياخ ما قاعدين نأخر الناس ...لانه اصلا ما في تاخير في المطار .بنعمل ال check- in online و نطبع البوردن كارت من البيت قبل يوم من السفر ...في المطار بنسلم الشنط بس .
موضوع حمل الاغذية للسودان دا ما جديد ...سودانين الخليج شغالين به من زمان . بقى قبيح بعد .جاء من كوم القرف !!!.
وناس اروبا ما كانوا بشيلوا معاهم اغذية وما في زول بريد التلتلة في السفر لكن التجربة علمتهم احسن اشيل حاجة مضمونة وبعرف جودتها
تحياتي
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد اسماعيل موسي)
|
Quote: ده كله خليهو .. أها شفع الغربة بيتصرفوا كيف مع الحمامات البلدية ؟؟ .. ههه
الشفع خلهم الكبار ذاتهم عاملين كيف مع قعاد السُنة ، بعدما الحوض بقى مابيستحمل غير الزاوية القائمة فى القعاد .؟؟ أى عنكبة تتفنقل لـ وراء .. :) |
ههههههههههههههههه
منير انت في دي و الله واحد من الاقاليم قال عندهم شافع جاي من بره يلعب مع الشفع و زنقتو بولة (لا مؤاخذة) قال عندنا زير أمشي افتح الزبير و اخد راحتك.
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: الحاج حمد الحاج)
|
| Quote: العزيز الحاج حمد الحاج التحية والإحترام شاكر مرورك ونقل خبراتك ونصحائك القيِّمة وهذا هو غرض البوست أن نتبادل خبراتنا وتجاربنا لنستفيد نحن والقراء الكرام نأخذ بالمفيد ونطرح ما لا يفيد |
الأخ الآستاذ محمد حسن حمدنا الله
البوست رائع و اكيد النقاش يعود بفائدة للجميع..شكرا لك يا راقي.
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: الحاج حمد الحاج)
|
مرحبتين أخ محمد الزبير محمود .. طبعاً ممكن نطبِّق قانون النسب والتناسب فى الحتة دى .. فإزدياد الدخول طوالى يقابله إزدياد تكاليف المعيشة .. الناس غالباً بتعمل مقارنات بين أسعار السودان والخارج بطريقة حوصاء جداً .. منو البيتوقع إنو سلعة مستوردة تكون أرخص ؟؟ يعنى عايزين المستورد يشترى السلعة بـ١٠٠ دولار ويبيعها بـ٩٠؟؟ ههه .. معليش ممكن الويكة والبامية والملوخية والتبش تكون رخيصة والتمر نوعاً ما .. لأنها منتجات محلية وممكن تطبيق نظرية نأكل مما نزرع .. وإن كان دى ذاتها المنتجين أصبحوا يعانوا لأنو إنتهى زمن الساقية واالشادوف وارتبطت الزراعة بالوقود المستورد .. أها ..
طبعاً السعودية ودول الخليج ديل ما تقارنهم بالسودان لأنو هناك الدولة بتدعم المواطن وتدعم السوق دعم خيالى .. ياخ قاليك فاتورة الكهرباء لعائلة متوسطة فى السعودية لا تتعدى الـ٢٠ يورو مع تشغيل المكيفات ٢٤ساعة .. فى حين إنو أنا مثلاً فاتورة كهرباء وغاز ـ تدفئة ـ أدفع ٣٢٠يورو ــ شهرياً ــ وقيس على كده .. فالإقتصاد العالمى مرتبط ببعضه بالدولار ولذلك تتساوى أسعار البضائع عالمياً مع الفروقات الناتجة عن اللوجستيكات ..
زمان طبعاً يقولوا ليك البلد بى خيرها ومرتب الموظف يكفيهو ويفضّل... ولكن الناس تتعامى عن حقيقة هامة وهى أن السودان منذ الإستقلال عايش على المعونات ـــ واخد فى بالك من شارع المعونة دا 😏؟؟ ــ وكانت الدولة تهتم براحة الموظف الحكومى .. يعنى المعونات الخارجية ــ الـ أساساً بتجى ثمناً لمواقف سياسية خارجية ، تقوم دول الخليج تمنح الدولة سفينة بترول، وأمريكا ترسل باخرة قمح ووو إلخ .. كنا عايشين كده .. وعوائد الصادرات البتقوم براها ديك (صمغ، كركدى، سنمكة، سمسم، حب بطيخ.. إلخ) تذهب لراحة الطواقم الوزارية ومدراء وموظفى الخدمة المدنية، وخدمات الجامعات القليلة حيث الطالب يسكن ويأكل ويشرب ويترفه (عدد محدود من الطلاب المحظوظين، لغاية ما طفح عدد العايدين بمتوالية هندسية .. كل سنة عدد الجالسين للشهادة يتضاعف ، نصهم عايدين😕،عشان يخشوا عنق الزجاجة الجميلة ومستحيلة وأخواتها)..
المهم فى كلامى ده إنو لابد من إستحضار الصورة الكاملة تاريخياً، والتى جعلتنا فى هذه الحالة البائسة البتخلينا نجيب موية الشراب محمولة جواً بالطيارات ، ونحن عندنا أطول أنهار العالم.. صورة كاريكاتيرية بحق والله ..
بالمناسبة يامحمدالزبير قالوا عيدى أمين فى يوغندا كان قبّل على الهنود الذين كانت عندهم إقطاعيات ومزارع وفلل وثراء فاحش بينما المواطنين كانوا يعانون من الفقر والفاقة .. فقام خيرهم بين الرجوع للهند أو بريطانيا ــ بحكم إنهم بقايا إستعمار وكانوا عندهم جوازات بريطانية ــــ فقاموا طبعاً إختاروا الرحيل لبريطانيا .. فقال ليك الهنود ديك تفاجأوا وأصيبوا بالصدمة لمن مشوا شافوا الإنجليز ساكنين فى شقق متكدسة لا تساوى غرف الخدم عندهم فى أوغندا .. فقالوا معقول الشعب الإنجليزى الذى احتل العالم وكانت إمبراطوريته لا تغيب عنها الشمس ساكن فى الجحور دى؟؟ ..
وهكذا الحياة ياخ ..
ياخى شكراً ياودحمدنالله على هذا البوست ..
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Munir)
|
دي مجرد زلعة فقط
نحن نذهب للسودان دورياً ونشتري في السودان ما لذ وطاب بأق الأسعار
وحكاية الجودة والكلام الفارغ دا مجرد هوس ليس إلا
الواحد في لندن يشتري بضاعته كلها من الباكستاني ولا التركي ويجي يتكلم ليك عن الجودة وما يشتري ملابسه إلا في الsale
بالجد الواحد السودان بدون أي تردد بيأكل أحسن وانظف من أي ركن في أوربا
كل السلع الأوربية موجودة وبجودة عالية والمولات الموجودة في السودان لا تضاهيا تلك التي في أوربا لأن فيها منتجات من دول عدة وليس منتجات الدولة الأوروبية الواحدة
أما الأكل الجاهز فمتعة ما بعدها متعة وبسعر لما تقارنه باليورو كأنك تأكل وجبة في مطعم فاخر في أوربا ولكن لخمسة أو ستة أشخاص في داخل الخرطوم ومعاملة راقية جداً
اما الملابس الجاهزة فكلام أخر
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Frankly)
|
الأخ محمد اسماعيل موسي سلامات .. ياخى أنا لقيت إسمى مقشوط فى نص مداخلتك وشفته بعد تعب ☺..
ياخى كلامك صاح .. بس الجودة تجى بى وين إذا كان القيامة قايمة هناك وكل شئ ضربه رماه ..
على أى حال أنا ماشايف إنو الشغلانة تحتاج إنو نصل درجة نجيب موية الشراب بالطيارة .. على الأقل مراعاة لناسنا هناك.. زمان ونحن صغار أول ما إجازة المدارس تبدأ طوالى بالقطر والشمالية راس .. أها الرحلة ممكن تقارنها زى الفرق بين لندن والخرطوم .. الأنوار فوانيس ورتاين، المواصلات حمير وبصات سفنجة .. الموية موية آبار وبحر.. الرغيف رفاهية .. كسرة وقراصة بس 😋.. الأردية والقمصان بتاعة العاصمة ترميها بعيد، عراريق وجلاليب بس .. عقارب ودوابى فى طرف العنقريب .. بيستى كوليا نهى .. شربات اللت ليمون بالكتير .. بحر وعوم ومجازفات شديدة .. مستشفيات ومراكز صحية ماف .. جردقة وحرجل بس .. تلفزيون وسينما مافف .. لعب خيران وبث .. أها .. 😕
ياجماعة صديقتى اللدودة بت عمسيب غطست وين؟🖐
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Frankly)
|
العزيز فرانكلي التحية والإحترام شاكر مرورك وإضافتك الواقع حاجة والأحلام حاجة تانية خالص وإنت مُصِر علي إنك تحلم طبعاً ناس المؤتمر الوطني جنّهم غلاط وينكرون ضوء الشمس من رمد يا رجل مولات شنو البتتكلم عنها في السودان؟ عفراء والواحة؟ ياخي دي دكاكين عادية وحرام تقارنها بمولات مصر والخليج خليك من أوربا بعدين وقت السودان فيهو كل الكلام القلتو عليهو دا مالك قاعد في ألمانيا محل البرد والشلهتة ما تمشي تستمع بالحياة والمطايب والجودة في السودان؟
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد الحسن حمدنالله)
|
العزيز محمد
تحياتي الطيبة
والله يا محمد الحسن الغلاط عندك
أنا قاعدذ هسع دي في وسط الخرطوم وأي حاجة دايرة بلقاها عفراء والاحدة والله ما دكاكين عادية ولا حاجة وأنا شفت سنسبوري وتسكو ودي هي العادية
وأغلب السودانيين يفضلون الشراء سواء كان لحمة أوخضر أو ملابس أو بهارات من محل العربي والتركي والباكساتاني واحد فيهم بيسأل عن جودة ولا تاريخ صلاحية مافي.
أيوة بتتقارن بمولات مصر والخليج وفيها منتجات كل من مصر والخليج ولبنان وتركيا وأوروبا في مول واحد
أنت بس خلي الزلعة الواقع فيها دي وتعال داخل بقروشك وأطلب أي حاجة لو ما لقيتها تعال أكتب في البوست دا أنا الحاجة دي ما لقيتها وما في ليها بديل
بعدين مؤونة شنطة واحدة لخمسة أشخاص ح تكفي منو؟
يعني ح تدخل شققتك وتقفلها عليك وتاكل من المؤون بتاعة الشنطة وأهلك لو جوك تشتري ليهم من الدكان
بصراحة دا كلام سخيف جداً مع الإعتذار
لكن بالجد ما عندوا أي معنى ولا منطق ويا زول كل مرة تعال بشنطتك دي وقشة ما تعتر ليبك
لكن نحن بندخل بالكاش وبنستوق من السودان ونرجع بيها مهاجرنا
أحلم بعالم سعيد يا حمدنالله لكن حتماً ليس كما تفعل فلا أنت وفرت فلوس ولا وفرت جهد ولا استمتعت بخيرات السودان
اطلع أكل برا وشوف الطيبات دي كيف في السودان تققول لي معلبات وتاريخ صلاحية؟؟؟
لو على الموية بسيطة أعمل ليك فلتر في بيتكم ما بيكلفك ميتين جنيه استرليني تشرب منه وتخلي أهلك يشربه منه لحدي السنة الجاية ما تجيه مرة تانية
بس فك عققدة الزلعة أولاً
فأنت كبرت في هذا السودان بالتأكيد مثلنا بأمكانيات وحوائج أقل بكثير مما أنت ونحن فيه الأن
القضية كلها قناعة
الغريبة الإحتجاجت دي ما بتسمعها من أوروبي أصلي لكلن بتسمعها بس من بعض السودانيين الذين أسميهم أنا منفصمين مع الإعتذار
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Frankly)
|
الوجيه فرانكلي إجازة ممتعة بين الأهل والأصحاب أنا لولا ظروف خاصة لكنت معك الآن أستمتع بإجازتي في السودان وليس في هذه الدنيا عندي مكان أحب إلي نفسي من السودان بخصوص شنط المواد الغذائية أطمئنك أنا لا أتذوّق منها شئ ولا أراهاإطلاقاً عند وصولها السودان فأنا يا رجل من نيالا يعني زول عصيدة وكسرة ساي وحتي نصيب أطفالي من هذه الشنط محدود للغاية حيث أن المحتويات مشاعة لأطفال الأسرة والجيران غرض البوست ليس إستعراض المواد الغذائية التي نحملها ولولا طلب أحد الأصدقاء ذكر الأصناف لما تطرّقت إليها أصلاً لكن الغرض هو رسم المفارقة بين السودان الذي يفترض أن يكون الأرخص في بلاد العالم من حيث الموارد المتاحة وبين بريطانيا وهي من أغلي بلاد العالم حيث مجرد المقارنة ترفع حاجب الدهشة لدي الشخص العادي شاكر مداخلاتك ونقل تجربتك هنا أخي فرانكلي لفائدتي والقراء الكرام دوماً مداخلاتك محل ترحيب فلا تبخل علينا بها تقديري
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Munir)
|
العزيز Munir التحية والإحترام أنا شاكر ومقدِّر لك إسهامك الهام برفد البوست بهذه الآراء والخبرات فأنا فقط بادرت بالطرح وأنت والأخوة المتداخلين الكرام تعرضم للموضوع من جوانبه المختلفة وكنت أكثركم فائدة مما طرحتموه من أراء نيّرة وأفكار ثاقبة أنا معك في ضرورة إستلهام ماضينا في التعامل مع حاضرنا وإستشراف مستقبلنا لعدم تكرار تجاربنا الفاشلة في مختلف مناحي الحياة وبالمناسبة وعلي ذكر الهنود الذين طردهم عيدي أمين الناس ديل نجحوا نجاح باهر في بريطانيا في مجال البزنس ولو عيدي أمين عرف ما جرَّه عليهم طرده لهم من نعيم لكان فضّل بقاءهم في يوغندا تقديري
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد اسماعيل موسي)
|
العزيز محمد إسماعيل موسي التحية والإحترام سعيد بمرورك وإضافتك وإطراءك نعم ما كان الناس سيلجأون إلي حمل مواد غذائية إلي السودان لولا فقدانهم الثقة في فاعلية هيئة المواصفات والمقاييس وإلي أن ينصلح الحال سيستمر الناس في ركوب الصعب أتمني أن تعود الأمور في السودان علي ما أعتاد عليه الناس في السابق من سلع غذائية ذات جودة معقولة وبأسعار مناسبة تسلم
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد الحسن حمدنالله)
|
سلام مطبوق أخى محمدالحسن حمدنالله ... ياخى نحن من نشكرك على فتح هذا الموضوع ذو الشجون و قيادتك للدفة بحنكة وصبر .. وأعفى لينا إن كان تناولنا لاذع أحياناً وفيه نقد ــ وصراحة ماتظنوا إنتقادى للشخصية السودانية بالخارج هو فقط موجه للغير، بل هو للأنا ذاتو ، ولولا أنى شايف عوجة رقبتى ما كنت شفت العوجة النحن فيها دى ـــ فعذراً لو إتفسحت ليك على السجية فى االبوست وقعدت أداقش فى مواضيع متفرقة زى العميان ومسكوه عكاز .. أصلو الزوول لو ماأخد راحته مع أولاد بلده السودانيين أون لاين حيأخد راحته مع منو؟؟ مصريين أون لاين مثلاً؟☺☺☺..
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Munir)
|
حمدنا الله يا جميل
لك التحية والود
ما وودت ان اشير اليه ضمنيا هو ان تصرفاتنا تنبع من عدم القناعة اكثر من الحوجة والندرة ، بدليل اننا كسودانيين نحمل لنفس تلك الدول ( خبرتي خليجية ) كميات من الدكوة وزيت السمسم والفول السوداني والمصري والبلح والتسالي بل والخرفان المجمدة والكثير المثير من كرور السودان بنفس الحجة ، الجودة والسعر !!!
تخيل الفول المصري في السعودية مش كويش ، وانواع البهارات المستوردة مش كويسة !!
وحق السودان من سوق الجمعة كويس وطاعم ورخيص وسوبر !!!
أها دا تبريره شنو ؟؟
ما حكيته عن لندن مشاهدات رأيتها بنفسي في مطار هيثرو حيث السجاد القديم والطرق المهشمة عبره ، مقارنة بمدن مثل طوكيو وبكين ، لندن تاريخ ، زحمة ، قدم وأيضا في ناس نتشيل ويكة ودلكة وحطب الى لندن ، فهل الحاجات دي احسن مما في لندن من عطور ومحسنات ؟؟؟
الشغلة قناعات واعتقادات وأمزجة ، وأقول لاخواننا الشايلين موية صحة كان ممكن ببساطة تغلوا موية النيل ويطلح اكثر عذوبة وصحة من المياه المغلفة ، فمياه النيل حتما هي الأفضل كيميائيا اما التلوث الأحيائي فالغليان كاف بمعالجته ، وعموما هي قناعات وتصرفات كلها في باب المتاح والجائز .
لندن نعم هي قبلة للسواح ولكنها ليست حتما الأفضل ، وبها أيضا الكثير من المتاعب ولكن كما قال الأخوة البوست موضوعه محدد .
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد الزبير محمود)
|
الوجيه محمد الزبير محمود التحية والإحترام أنا سعيد للغاية بمرورك من هنا للمرة الثانية لتوضيح ما خفي علي من مداخلتك الأولي وأنا ممنون وشاكر نعم صدقت لندن كغيرها من المدن لديها سلبيات وإيجابيات وهي بأية حال ليست فوق مستوي النقد خاصةً إذا قارنت مشاهداتك التي ذكرتها بإسم لندن الرنان وشاكر إضافة خبرتك الخليجية في مجال السودانيين وما يحملون من مواد غذائية هم في غنيً عنها لكن ياخي الولف كتّال😀 سعيد بمداخلاتك وأرجو أن لا تحرمنا ملاحظاتك الناقدة قبل المادحة لك المودة والتقدير
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Munir)
|
الوجيه Munir يا مراحب البوست بوستيك والدار دارك تاخد راحتك علي الآخر وأنت والأخوان والأخوات مرحب بيكم وعلي الدوام وجودك والأصدقاء والصديقات هنا مصدر سعادة وفخر بالنسبة لي سواء إتفقنا أو إختلفنا في وجهات النظر وذلك أمر طبيعي تسلم
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد الحسن حمدنالله)
|
صاحب البوست والمارين إزاي الحال
ما امشى ليكم بعيد من الموضوع
أنا فى إجازة قررت أشتري حليب رُضّع من السودان وقد كان لكن والله لقيت العلبة ناقصة قرابة الربع مقارنة مع نفس النوع البشتريهو من السعودية!!!!
فحصت قرع العلبة فلربما كانت جملة (صُنع خصيصاً للسودان) حاضرة ، كما كان يكتب على علب البرنجي/ البحاري فى زمنا مضى !!!!
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: walid taha)
|
العزيز Walid Taha التحية والإحترام سعيد بزيارتك وإضافتك ما قلته يضيف مصداقية إلي زعمنا العريض بغياب المواصفات والمقاييس ليس في مجال الأغذية وحده ولكن يشمل الكثير من المجالات الأخري أتمني أن ينهض فينا كسودانيين وعي حماية المستهلك عبر الجمعية المتخصصة في ذلك الغرض وغيرها من منظمات المجتمع المدني ليطالب الناس بحقوقهم فيما يلي الجودة والمواصفات تقديري
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد الحسن حمدنالله)
|
تسلم العزيز منير لانك رجعتنا ايام زمان ايام الواحد ينتظر الاجازة عشان يسافر البلد بالقطر ويطلع الشجر ياكل من الفواكه الطازج ويمشي المزرع ويشرب من اللبن مباشر من الغنم والبقر ولكن تعال شوف اليومين ديل تخاف تشتري اللبن من بتاع اللبن لانو مش مغشوش بل مدعوم بمواد كيميائية وخليك من الفاكهة الله يستر اهلنا بالذات في العاصمة.
بخصوص تربية الاولاد في المهجر نحن مواظبين علي اكلنا والوطني من عصايد وقراصة ومعظم الاكلات السودانية لدرجة هم البيطلبوها لامن يطولوا منها.
نسال الله نرجع ببلدنا علي الاقل الي ما كان عليه في الزمن الطيب والناس تسيب الجشع والطمع ايام سماحة السودانيين من اقصي شمالنا لجنوبنا ومن شرقنا لغربنا
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: محمد اسماعيل موسي)
|
غايتو ياشباب نحن بنشيل من السودان ونطلع لا فوق .. نمشى بشنط نضييييفة تلمع ونجى راجعين بيها مكتحة بتراب بلدى😍 ومليانة منتجات بلدية جافة ـ مما خف وزنه وخف ثمنه 😜ـ .. كركدى ونبق وقنقليز وحلومر وتركين وويكة ووو .. أهم حاجة الويكة .. تجيب مؤنة سنة .. لكين طبعاً ويكة البلد بسبب عدم الجودة وإنتهاء الصلاحية ــ إحم إحم ــ تجى يظبطوها ليك فى عمق البلاد الباردة تقوم تلاقيك وسط اللقمة حصاصة تقرب تطير ليك الحشوة .. لكين برضو عاجبانا ــ أوعوا تشنفوا وتزدروا منتجات الوطن ، نقوم نطبق فيكم قانون ودالمشرف وكمال عباس الجديد بتاع إزدراء الوطن (جارى الصياغة برعاية سودانيزون لاين 😉) .. فهذه المنتجات التعبانة دى نقعد نتونس بيها بعد الإجازة ونستمطق بيها طعم البلد لعدة أسابيع بعد العودة .. الوالد الله يديهو العافية مرة زارنا فى السويد وجاء شايل معاه تمر بركاوى أصلى ناشف نشاف صاح محصولنا من أول عمنوَّل .. يعنى التمرة عشان تكسرها فى خشمك إلاّ تغمِّض .. قامت واحدة صديقة المدام لبنانية شالت حفنة من التمر .. وبهناك عندها جارهم سويدى على التعترها أعطته تمرتين تلاتة وقالت ليهو ده إنتاج السودان .. الراجل شال البلحة قال يقرشها قامت كككج سِنّه إتكسرت 😠 .. شوف الأقدار .. يعنى البلحة من زمن كانت رُطَبة كانت منتظرة سن المسكين ده ..
محمداسماعيل موسى ياعزيز .. الزمن جارى سريع وحياة الروقة الزمان زمانها ولّى .. المواطن شايف الدنيا تتسارع بصخب شديد ، فلابد من اللهاث بنفس السرعة للحاق بالإيقاع .. وذلك ما جعل المواطن شفقان يصارع أمواج الدنيا عشان ما يغرق ويبتلعه الزمن الصاخب .. وهو ما أنتج الهلع الحاصل ده فى الداخل والخارج .. هسه لو عملت فلترة لمتوسط الشعور المعكوس فى هذا المنبر تجد المحصلة أغلبها آراء سالبة وإحباط ، وانعدمت النسمة والبسمة .. طبعاً حسب ملاحظتى إنو البنى آدم ميَّال دائماً للتعبير السالب ، وشحيح فى إبداء المشاعر الإيجابية .. لكننا برضو معذورين .. جوّنا وبيئتنا سيئة .. تلاحظ أنو فى الأجواء الخريفية الغائمة والنسيم لمن يكون ضارب تلقى الناس مبسوطة ويقولوا ليك جو أوروبى وهم آخر سعادة بالرغم من أنو الواحد تلقى جيبه معلِّم الله من التعريفة ..😕
| |
|
|
|
|
|
|
|
|
|
Re: أُسر سودانية تغادر بريطانيا إلي السودان ف (Re: Munir)
|
شكراً محمد الحسن حمدنالله على الرد الجميل الهادئ
السودان جميل جداً بأهله وبترابه وغباره وبلفحات حره ونسمات الدعاش وبالنسبة للمغتربين والمهاجرين جد رخيص وبقروشك ممكن تشتري تقريباً كل شيء تتمناه فقط قد يتطلب الأمر بعض سؤال واستفسار ورحلة قد تطول او تقصر حسب مكان السكن
أعزم أهلك على منتجع السمك في شارع المشتل الخرطوم ستأكل مالذ وطاب من السمك البحري والنهري بخدمات ممتازة جداً وجو أريحي وأطفالك يلعبون على قريباً منك وبسعر لكل الأسرة بالكاد يكفي لوجبة واحدة في لندن في مطعم متوسط.
ودع جانباً تاريخ الصلاحية والمعلبات وكل ما لذ وطاب من الخيرات الطازجات
دي دعاية مجانية من مستهلك وك Review for the Fish Resort Khartoum
| |
|
|
|
|
|
|
| |
محمد الحسن حمدنالله
محمد جبره
MOHAMMED ELSHEIKH
Munir
Hasheem Karouri
محمد إبراهيم علي
مدثر صديق
Muhamed Hassan Abdalla
خالد حاكم
أيمن الطيب
حاتم الياس
Abdullah Idrees
Mohd Ibrahim
مني عمسيب
Mirghani Taitawi
حامد بدري
الحاج حمد الحاج
بشير حسـن بشـير
Frankly
فيس بوك
تويتر
انستقرام
يوتيوب
بنتيريست