رفقاً بناس ضواحي الدنيا .. بعض العبارات لا نفهمها

مرحبا Guest
اخر زيارك لك: 03-28-2024, 02:57 PM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف للعام 2016-2017م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
05-05-2016, 09:47 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
رفقاً بناس ضواحي الدنيا .. بعض العبارات لا نفهمها

    09:47 AM May, 05 2016

    سودانيز اون لاين
    علي عبدالوهاب عثمان-جدة
    مكتبتى
    رابط مختصر

    بعض العبارات خلال المداخلات أحياناً لا نفهم معاينها على سبيل المثال لا الحصر :
    مفنوس
    العفج
    جلكن
    وهيط
    كلوس
    المكشن بلا بصل
    والورجاغة
    الردحي والانكرابه
    فوق الدقشم
    دلوكة الورل
    البسوق مطاقيش ما بتلاحق

    وخاصة بوستات حبيبنا منصور مفتاح ..

    ولدي سجل به عشرات العبارات الاخرى .. أشعر أنه كلام منغم وجميل وناتج عن بيئة اصالة
    من أعماق هذا الوطن المترع بالتنوع والجمال ،

    ونرجو من الإخوة ( عمل حاشية أو شرح بسيط ) كما يفعل اخونا بريمة عند تناول المفردات والامثال ..

    بالمناسبة أحياناً نستخدم هذه المفردات كمسابقة بين أهلنا ولكن الكثيرين منهم لا يدركون معانيها ..

    حبيبنا أبوحسين ما كان يقصر معاي في شرح بعض المفردات .. عوداً حميداً أبوحسين .. إن شاء الله .. ومعاك باقي الاخوان ..

    مودتي للجميع ..



                  

05-05-2016, 11:22 AM

almulaomar
<aalmulaomar
تاريخ التسجيل: 07-08-2002
مجموع المشاركات: 6485

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    علي عبدالوهاب عثمان
    تحياتي
    من قال لا أعلم فقد أفتي
    ومن قال لا أعلم أقل له تعلم
    أخي هناك خلط بين ما ورد في القائمة التي أوردتها ففيها بعض العبارات التي تندرج تحت ما يعرف بكلام أهل الضهاري ناس نحن وبعضها الآخر هو لغة الشارع أو ما يعرف بالرندوك
    --
    علي عبد الوهاب شكلك يا أخوي شهادة عربي (كمية وجوه ضاحكة)
    بصراحة بعض المفردات هنا عرفت معانيها وبعضها جليتا ثابتة زي ما بقولو
    أتحرى معك حضور الأخ منصور المفتاح لوضع النقاط على الحروف أو يشيل حروفو ويفك حيرتي وحيرتك
                  

05-05-2016, 11:52 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: almulaomar)

    Quote: علي عبد الوهاب شكلك يا أخوي شهادة عربي (كمية وجوه ضاحكة)
    بصراحة بعض المفردات هنا عرفت معانيها وبعضها جليتا ثابتة زي ما بقولو
    أتحرى معك حضور الأخ منصور المفتاح لوضع النقاط على الحروف أو يشيل حروفو ويفك حيرتي وحيرتك


    حبيبنا الملا عمر .. مودتي يا جميل ,,
    معقول ده كلام ناس الضهاري .. مع التحية لحبيبنا توفيق مكي ..
    أي شهادة عربية يا الحبيب نحن على أعتاب العقد السابع من العمر ..
    الزمن الجميل لحدي بداية نميري ... ناس العربية ديل أولاد أولادنا ..

    حبيبنا الملا عمر .. صدقني أخونا منصور لو ترك بوستات المشاكل وحضر
    يكون جميل ..

    مودتي الملا ..

                  

05-05-2016, 12:44 PM

munswor almophtah
<amunswor almophtah
تاريخ التسجيل: 12-02-2004
مجموع المشاركات: 19368

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    سلام وألف سلام يا حبيبنا على عبدالوهاب عثمان أنا والمله دا ملينا البطايس والنقد والنجرمت والنون والجيم هى لنطق النون وتحتها ثلاثه نقاط فى فتاقه والرويس
    وفلخنا دوم البصل فوق بليلة اللوبه العفنه ومغينا لامن قست لنا القومه يا زول جوبقنا ومرتقنا وسلّكنا وعزقنا ورفعنا الكلتوت ورقدنا الكسبوت وصررنا أم طنوب
    وخللنا السخلان وحوينا البقر وسرفنا الكبروس وكبرنا الدهسير والحلفا وقولبنا المرطاقه وعزقنا ونجمنا وشتلنا وقلعنا وفومنا ياخ المله دا إلا يجرم لكن البخبرو أنا
    هو بخبرو والله عايشين على ذات وجئنا من ذات الأرومه وجاء منها مدهشى بلادى من أصحاب القول والشعر والفقه والذكر والعلم ونسأل الله أن نصل لمقامهم
    لكن خلنى اللنجض شيتى وبجيك،
                  

05-05-2016, 01:13 PM

محمد المسلمي
<aمحمد المسلمي
تاريخ التسجيل: 08-08-2009
مجموع المشاركات: 11831

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: munswor almophtah)

    البوست ده اشركيل




    بعد التحية ليك ياغالي وضيوفك
                  

05-05-2016, 01:16 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: munswor almophtah)

    Quote: سلام وألف سلام يا حبيبنا على عبدالوهاب عثمان أنا والمله دا ملينا البطايس والنقد والنجرمت والنون والجيم هى لنطق النون وتحتها ثلاثه نقاط فى فتاقه والرويس
    وفلخنا دوم البصل فوق بليلة اللوبه العفنه ومغينا لامن قست لنا القومه يا زول جوبقنا ومرتقنا وسلّكنا وعزقنا ورفعنا الكلتوت ورقدنا الكسبوت وصررنا أم طنوب
    وخللنا السخلان وحوينا البقر وسرفنا الكبروس وكبرنا الدهسير والحلفا وقولبنا المرطاقه وعزقنا ونجمنا وشتلنا وقلعنا وفومنا ياخ المله دا إلا يجرم لكن البخبرو أنا
    هو بخبرو والله عايشين على ذات وجئنا من ذات الأرومه وجاء منها مدهشى بلادى من أصحاب القول والشعر والفقه والذكر والعلم ونسأل الله أن نصل لمقامهم
    لكن خلنى اللنجض شيتى وبجيك،


    اهلا حبابك نورت البوست حبيبنا منصور ..
    يا أخي دي أصعب من الرطانة .. وتقولوا لينا إنتو رطانه ..
    أنا ما فهمت من كلامك إلا عبارة ( نجمنا ) ودي من مفردات الزراعية
    وما دام هي زراعية تكون نوبية ولأن النجام عندنا ما يقوم بيه إلا التربال المحترف
    وصاحب الخبرة خاصة إذا كان النجام في حوض البامية أو الخضروات وهي إزالة القش
    والطفيليات التي تعوق الزراعة .. والنجام الساهل هو النجام داخل أحواض الذرة الشامية (المكادة)
    أو الذرة العادية .. وأيام النجام هي أحلى أيام الزراعة زمان تلقى في الحوض الواحد نحن وإخواتنا
    ما في فرق بين البنت والولد والنجام كان موسمه عندما تكون الذرة ( القصب ) في طول معين ..
    والترابلة كان يقولوا خلاص وقت النجام جاء ... نعمل ترجمة من النوبية إلى العربية وكانت عبارة
    مشهورة ( عندما لا يظهر ضنب الثعلب - بعشوم - وهو داخل مزرعة القصب ) تبدو ركيكة بالترجمة
    يعني عندما يبلغ طول القصب حوالي نصف متر تقريباً ..

    من أجل هذه العبارات كنت أتابع بوستاتك دائماً ..

    شكراً حبيبنا منصور ,, والشكر موصول لملا عمر كمان ..

                  

05-05-2016, 03:16 PM

محمد البشرى الخضر
<aمحمد البشرى الخضر
تاريخ التسجيل: 11-14-2006
مجموع المشاركات: 28869

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    كدي النجتهد شوية يا علي في الأمثلة الجبتها:

    مفنوس : لغة: متني او ما واقف عديل . إصطلاحا : تطلق على الزول الخايب. اصطلاح سودانيز: المتخاذل عن موقف ما و تطلق على مؤيدي الحكومة بصفة عامة.
    العفج : اعتقد و الله اعلم زيها وزي "عنطج" و تطلق على البليد المو نافع.
    جلكن: فعل بمعنى صار جلك أو صار جلكين, و الجلك و الجلكين تطلق على الأب من اولاده أو على من بلغ من العمر عتيا بصفة عامة
    وهيط: لغة : المجلس او المقعد المريح الماهل. اصطلاحا: تطلق على الزول المريح التعامل معه ساهل و باريحيه. اصطلاح سودانيز: مناضل كيبوردي.
    كلوس: جمع "كلس" وهو الراجل الضكران المر أخو الأخوان الما بعرف للهزل و الدنية ويتبادلها في سودانيز مناضلي الكيبورد من ضمن باكج النضال السايبري مثل: نبيل, شريف, ارو, سلطان, ناظر, كنداكـ(ـة), ميرم .. إلخ
    المكشن بلا بصل: الكشنة هي البصل المشوح في الزيت ويتخدم بشكل رئيس في التقلية والسخينة, قولة أوريك المكشن بلا بصل كناية عن اوريك المستحيل مثل القول اوريك نجوم الضهر أو القايلة
    والورجاغة: الورجغة كثرة الكلام و النقة الفارغة التي لا تفيد, صاحب حقوق المصطلح حبيبنا كيكي اطلقه على الشفيع وراق ذات هرجة, ومن ثم سارت مثلا في سودانيز.
    الردحي والانكرابه: الردحي معروف وهو النبيح و تشتهر به النساء عند الشكل يقال ردح او ردحت فيني, الإنكرابة فعلها انكرب و الكرب لغة إحسان التربيط يقال كرب نصه أو كرب صلبه, وهذا كناية عن التحزم و الاستعداد للأمر الشديد بجدية
    فوق الدقشم: جزء من المثل يقول "شرك مقسم فوق الدقشم" افهم معناه لكن صراحة تفصيل الدقشم لا اعرفها بالضبط
    دلوكة الورل : الورل معروف لغة واصطلاحا تطلق على الزول الخنيتة البليد المو نافع, و الدلوكة ايضا معروفة لغة و اصطلاحا تطلق على البليد و على ضعيف الشخصية وعلى الجعجاع كثير الكلام قليل الفعل, فا لما تجمع الإتنين الدلوكة و الورل دي صعبة خلاص :)
    البسوق مطاقيش ما بتلاحق : دي غلبتني النصيحة

    ولا لعودة ابوحسين حتى يكمل المدة التي حددتها الأدارة, كلنا بكري كلنا الإدارة :)

    أها يا عمّك قصّرت معاك
                  

05-05-2016, 03:38 PM

عبدالحفيظ ابوسن
<aعبدالحفيظ ابوسن
تاريخ التسجيل: 06-24-2013
مجموع المشاركات: 22319

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: محمد البشرى الخضر)

    مرحبا علي وحبابك
    وضيوفك
    قايلك بتهظر ساي والله لانها تعابير معروفة
    ودالبشري ما قصر لكن في ملاحظات صغيرة
    دلوكة الورل ... كضب يعني
    الورل لامن يشوف زول بتنفخ زي الدلوكة شان يخوفك تمشي عليهو بقوم جاري
    الافنس او الافزر .. الزول البتني ضهرو ويظهر مؤخرته وهي حركة انثوية
    الدقشم جذع الشدرة المقطوع لا فايدة منه .. والزول الدقشم الرجرجة والدهماء
    مكشن بلا بصلة محمر بدون بصل .. والكشنة اصلا البصله المحمرة بالزيت
    هذا لا علاقة له بمصطلحات سودانيز
                  

05-05-2016, 03:48 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبدالحفيظ ابوسن)

    Quote: البوست ده اشركيل


    بعد التحية ليك ياغالي وضيوفك


    حبيبنا الغالي إنت ووو ( أشرانكيل )
    جمل الله ايامك

    مودتي
                  

05-05-2016, 03:56 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote: Š كدي النجتهد شوية يا علي في الأمثلة الجبتها:

    مفنوس : لغة: متني او ما واقف عديل . إصطلاحا : تطلق على الزول الخايب. اصطلاح سودانيز: المتخاذل عن موقف ما و تطلق على مؤيدي الحكومة بصفة عامة.
    العفج : اعتقد و الله اعلم زيها وزي "عنطج" و تطلق على البليد المو نافع.
    جلكن: فعل بمعنى صار جلك أو صار جلكين, و الجلك و الجلكين تطلق على الأب من اولاده أو على من بلغ من العمر عتيا بصفة عامة
    وهيط: لغة : المجلس او المقعد المريح الماهل. اصطلاحا: تطلق على الزول المريح التعامل معه ساهل و باريحيه. اصطلاح سودانيز: مناضل كيبوردي.
    كلوس: جمع "كلس" وهو الراجل الضكران المر أخو الأخوان الما بعرف للهزل و الدنية ويتبادلها في سودانيز مناضلي الكيبورد من ضمن باكج النضال السايبري مثل: نبيل, شريف, ارو, سلطان, ناظر, كنداكـ(ـة), ميرم .. إلخ
    المكشن بلا بصل: الكشنة هي البصل المشوح في الزيت ويتخدم بشكل رئيس في التقلية والسخينة, قولة أوريك المكشن بلا بصل كناية عن اوريك المستحيل مثل القول اوريك نجوم الضهر أو القايلة
    والورجاغة: الورجغة كثرة الكلام و النقة الفارغة التي لا تفيد, صاحب حقوق المصطلح حبيبنا كيكي اطلقه على الشفيع وراق ذات هرجة, ومن ثم سارت مثلا في سودانيز.
    الردحي والانكرابه: الردحي معروف وهو النبيح و تشتهر به النساء عند الشكل يقال ردح او ردحت فيني, الإنكرابة فعلها انكرب و الكرب لغة إحسان التربيط يقال كرب نصه أو كرب صلبه, وهذا كناية عن التحزم و الاستعداد للأمر الشديد بجدية
    فوق الدقشم: جزء من المثل يقول "شرك مقسم فوق الدقشم" افهم معناه لكن صراحة تفصيل الدقشم لا اعرفها بالضبط
    دلوكة الورل : الورل معروف لغة واصطلاحا تطلق على الزول الخنيتة البليد المو نافع, و الدلوكة ايضا معروفة لغة و اصطلاحا تطلق على البليد و على ضعيف الشخصية وعلى الجعجاع كثير الكلام قليل الفعل, فا لما تجمع الإتنين الدلوكة و الورل دي صعبة خلاص :)
    البسوق مطاقيش ما بتلاحق : دي غلبتني النصيحة

    ولا لعودة ابوحسين حتى يكمل المدة التي حددتها الأدارة, كلنا بكري كلنا الإدارة :)

    أها يا عمّك قصّرت معاك


    حبيبنا ودالبشرى ..
    صدقني إنت أخطر من ابوحسين في الشرح والتوضيح .. يا زول ذكرتني .. ايام الرائع الطيب محمد الطيب رحمه الله
    ودالبشري الحبيب .. أنا هوايتي متابعة التراث ومحاولة التأصيل خاصة ما بين النوبية واللغات الاخرى لأن هذا يولد نوع من المصالحة والقرب والتقارب
    وتحس أن أبناء الوطن جزء منك وأنت منهم ..
    لدي عشرات العبارات إلتقطها من سودانيز .. لأ أقول الشعر ( البادية والحماسة ) ولكن فقط عبارات التواصل
    والعكننة الجميلة بين الاخوان ..
    مودتي بلا حدود .. عايزك كمان تفتح بوست عشان أبوحسين .. وننتظر مكرمة سمو الشيخ بكري أبوبكر ..

    شكراً كثير يا رائع ..
                  

05-05-2016, 04:12 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote: مرحبا علي وحبابك
    وضيوفك
    قايلك بتهظر ساي والله لانها تعابير معروفة
    ودالبشري ما قصر لكن في ملاحظات صغيرة
    دلوكة الورل ... كضب يعني
    الورل لامن يشوف زول بتنفخ زي الدلوكة شان يخوفك تمشي عليهو بقوم جاري
    الافنس او الافزر .. الزول البتني ضهرو ويظهر مؤخرته وهي حركة انثوية
    الدقشم جذع الشدرة المقطوع لا فايدة منه .. والزول الدقشم الرجرجة والدهماء
    مكشن بلا بصلة محمر بدون بصل .. والكشنة اصلا البصله المحمرة بالزيت
    هذا لا علاقة له بمصطلحات سودانيز


    حبيبنا صاحب القلم الرائع أبوسن ..
    رغم بلوغنا من الكبر عتيا .. إلا أن السودان كمعايشة واحتكاك بالنسبة لنا قليل
    تعليمنا وعملنا في نفس بيئتنا ووسط أهلنا إلا كورسات المدرسين زمان في معهد التدريب أمدرمان
    ومن هناك للسعودية .. وفي السعودية داخل الجمعيات نفس الحلة وأهل والحديث بالعربية عند اللزوم
    كل هذه الاسباب جعلت خفايا اللغة العامية عندنا محدودة .. ومثلي كثر ..
    أما بالنسبة لك طبعاً .. أبوسن .. على الطول إلى البادية السودانية .. وعبارات التشبيه والرموز الجميلة ..
    أحياناً أقرأ قصائد البطانة أو بالاحرى أسمعها وعلى قدر فهمي ... صدقني استحضر .. ذي الرمة وتابط شراً .. اسياد الصحراء والمراعي ..
    تعرف حبيبنا ابوسن هذه البداوة والاصالة أختفت وأنقرضت في كل جزيرة العربية ..
    خاصة عندما يكون في التلفزيون واحد من أولاد البنا لا أذكر اسمه لونه فاتح وأفتكر هو من العائلة لكن من خارج أمدرمان ..

    معليش طولت شوية ..
    لك التحية وجزى الله هذه الاسافير والتكنولوجيا خيراً أن جعلنا نتواصل
    ونعرف الكثير إخواننا في هذا الوطن الجميل ..
    مودتي أبوسن ..

                  

05-05-2016, 06:09 PM

حمد إبراهيم محمد
<aحمد إبراهيم محمد
تاريخ التسجيل: 08-20-2009
مجموع المشاركات: 5198

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)


    صاحب البوست ود عبد الوهاب ...
    الإخوة المتداخلين ...
    سلام كتير

    اخونا ود البشرى واخونا حفيظ والاحباب – كتر خيرهم – يقصر الملح ...
    خليني اوسع الماعون شوية فيما تفضلوا به واقول:
    - الكلس : هو المادة الصلبة الناتجة من تسخين الجير تسخينا شديدا، فالناس يصفوا بها الشخص الصلب .

    - الورجاغة أو الورجغة: أي اللغلغة والكلام الغير مفهوم وغير مثمر. يقال الزول ده بلغلغ ساكت او الكلام ده ورجغة .

    - الردحي : هو التصايح والمكايدة بين إثنين كل منهم يأتي بمسالب الآخر، وتختص به النساء.

    - الإنكرابة : هي من كرب أو أجاد ربط وحزم شيء، ويقال للشخص الذي عزم على فعل أمر .

    - الدقشم : هو الدقشوم أي ما تبقى من الشجرة بعد قطعها، فهو ليس منه فائدة تذكر.
    - دلوكة الورل : الورل هو حيوان شبيه بالتمساح في شكله، وشعبيا يقال إنه بيضة التمساح الخايسة أو البايظة،
    وجلد الورل سميك، فالسخرية تاتي من انه لو استخدم هذا الجلد في تغطية وعاء - مجوف - ،
    يعني زي دلوكة الفنانة انصاف مديني، ونقر عليه يصدر صوت نشاذ وقبيح، وكذلك الشخص - الأجوف - المشاتر.

    - المطاقيش: جمع طقش، من طقش وضرب الشيء فصار مرتجا
    فالمطاقيش أي الذين لا تتنبأ بافعالهم، فقائد هؤلاء لا يستطيع معرفة اتجاههم أو التحكم فيهم سيرهم.

    ولك علم عليم .


    ------------
    يا ود عبد الوهاب ...
    أت في سؤالك واللا في الكلام الجديد الجابو لينا منصور ، ده برضو عاوز ليه مفتاح ..؟
    والمفتاح عند ود المفتاح ... ههههههههه

    مودتي

                  

05-05-2016, 06:20 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: حمد إبراهيم محمد)

    حبيبنا حمد لك التحية والمودة ..
    شكراً على الاضافة .. موضوع في غاية الروعة ..
    لم اكن أتصور كل هذه المعاني ..
    أخي حمد .. لدي مفردات كثيرة مخزون كبير
    ولكن وجدت أن هذا العدد المحدود له عمق ما بالك في الباقي ..
    دائماً بوستات منصور مفتاح فيها كلمات غريبة
    حتى لمن يكون معكنن مع واحد يأتي بمفردات لم نسمع بها ..

    مودتي حمد ..
                  

05-05-2016, 06:22 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    كمان يا حمد أخوي القصيدة التي أوردتها في بوست مؤتمر الشكرية
    يعني لو ما شرحتها ما كنت فهمت شيء

    تاني تحية ..
                  

05-05-2016, 06:53 PM

أيمن محمود
<aأيمن محمود
تاريخ التسجيل: 01-14-2013
مجموع المشاركات: 4940

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote: جلكن: فعل بمعنى صار جلك أو صار جلكين, و الجلك و الجلكين تطلق على الأب من اولاده أو على من بلغ من العمر عتيا بصفة عامة

    معناها الاصلي يا ود البشرى قالو كعب عديل !
                  

05-05-2016, 07:11 PM

اميرة السيد

تاريخ التسجيل: 07-09-2010
مجموع المشاركات: 5598

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: أيمن محمود)

    البوست ده اشركيل (QUOTE)
    >>>>>>>>>><<<<<<<<<<<<<>>>>>>>>>

    محمد المسلمي اظنك نوبي قشرة وما متبحر زينا.. وكدي نصلح ليك الجملة دي.. البوست ده اشرينكيل......

    ومادام طلعت نوبي نهدي ليك الاغتية دي من الرائعات البلابل



    وممكن كمان استاذنا علي عبد الوهاب يجيب لينا كلمات مرادفة لهذا المعنى..
    وفعلا كلامك صحي بوست جميل ورائع ومفيد ومن بيت الكلاوي...
    والله يديك الصحة والعافية

    (عدل بواسطة اميرة السيد on 05-05-2016, 07:19 PM)
    (عدل بواسطة اميرة السيد on 05-05-2016, 07:55 PM)

                  

05-05-2016, 07:25 PM

Abdelrahim Mohmed Salih
<aAbdelrahim Mohmed Salih
تاريخ التسجيل: 04-13-2016
مجموع المشاركات: 958

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: اميرة السيد)

    السلام يا شباب
    البوست لطيف يا اخونا على ويا ريت تجتهدوا لينا فى كلام منصور
    بعدين شايف الفقهاء اختلفوا فى دلوكه الورل
                  

05-05-2016, 08:16 PM

عبدالحفيظ ابوسن
<aعبدالحفيظ ابوسن
تاريخ التسجيل: 06-24-2013
مجموع المشاركات: 22319

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: Abdelrahim Mohmed Salih)

    سلام وألف سلام يا حبيبنا على عبدالوهاب عثمان أنا والمله دا ملينا البطايس والنقد والنجرمت والنون والجيم هى لنطق النون وتحتها ثلاثه نقاط فى فتاقه والرويس
    وفلخنا دوم البصل فوق بليلة اللوبه العفنه ومغينا لامن قست لنا القومه يا زول جوبقنا ومرتقنا وسلّكنا وعزقنا ورفعنا الكلتوت ورقدنا الكسبوت وصررنا أم طنوب
    وخللنا السخلان وحوينا البقر وسرفنا الكبروس وكبرنا الدهسير والحلفا وقولبنا المرطاقه وعزقنا ونجمنا وشتلنا وقلعنا وفومنا ياخ المله دا إلا يجرم لكن البخبرو أنا
    هو بخبرو والله عايشين على ذات وجئنا من ذات الأرومه وجاء منها مدهشى بلادى من أصحاب القول والشعر والفقه والذكر والعلم ونسأل الله أن نصل لمقامهم
    لكن خلنى اللنجض شيتى وبجيك،

    قال ليك هو والملا عمر اكلوا ملاح لوبا وشبعوا بصل لامن القومة غلبتهم . وقاموا علي زراعتهم نضفوها ومشو علي الغنم والبقر حلبوا اللبن ونضفوا الزراعة من القش الضار وزرعوا .. وهو والملا عمر بعرفوا كلام بعض لانهم من مكان واحد
    وحيجيك راجع عندو مهمة وغرض داير يقضيهم
    دة باختصار
                  

05-05-2016, 08:26 PM

Abdelrahim Mohmed Salih
<aAbdelrahim Mohmed Salih
تاريخ التسجيل: 04-13-2016
مجموع المشاركات: 958

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبدالحفيظ ابوسن)

    ههههههه
    يا عبدالحفيظ اولا شكرا للترجمة
    لكن لو فلفلتا المفردات تكون ما قصرت
    فى كلمات كتيره مرتبطه بالمكان يعنى ممكن زول يكون من بئه مشابه بين زراعه و رعى لكن من مناطق بعيده من مكان منصور و يغلبوا يفهم كلاموا لانو عندو مفردات مختلفه
    ياخى اللغه دى حاجه عجيبه
                  

05-05-2016, 08:46 PM

جلالدونا
<aجلالدونا
تاريخ التسجيل: 04-26-2014
مجموع المشاركات: 9387

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: Abdelrahim Mohmed Salih)

    سلام على و ضيوفو الكرام
    كل المداخلات و حتى مداخلة وط المفتاح بالنسبة لى واضحة زى الساسوى
    الغلبينى تب و ما وقعت لى و عملت لى شاحوطة فى نافوخى .. الحتيتة * دى
    Quote: ولا لعودة ابوحسين حتى يكمل المدة التي حددتها الأدارة, كلنا بكري كلنا الإدارة :)

    يعنى شنو كلنا بكرى كلنا الادارة
    يا ريت ابو حسين يجى يشرح لينا الحتة دى
    ابو حتحوت او اى من الزملاء .. العنذو تلفون المسخوت المغضوب عليه هذا اليجدعو فى الخاس
    ____
    * الحتيتة .. من حتحت يحت فهو محتوت
                  

05-05-2016, 08:57 PM

عبدالعزيز الفاضلابى
<aعبدالعزيز الفاضلابى
تاريخ التسجيل: 07-02-2008
مجموع المشاركات: 8199

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: Abdelrahim Mohmed Salih)

    ياخ البوست ده جاب لى صُدمَة نامن قليت لىَ قرض فوق قلشوب
    كلنا ابوحسين ,, وليذهب ودالبشرى الى زريبة العيش ولامانع ان تاخد معاك طلحة.
    ...............
    هيييييع أنا الرضعان فوق الخُلال
                  

05-06-2016, 10:27 AM

الفاتح ميرغني
<aالفاتح ميرغني
تاريخ التسجيل: 03-01-2007
مجموع المشاركات: 7488

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبدالعزيز الفاضلابى)

    عزيزنا وكبيرنا/ علي عبد الوهاب عثمان.
    تحياتي الصوادح.

    مرور على سبيل التحية والمحبة.
    انحنا زاتنا عاوزنك تعلمنا اللغة النوبية لجمال الموسيقية فيها، زي الانجليزي لمن يتكلموا بيهو الايرلنديون!


    محبتي
                  

05-06-2016, 11:03 AM

محمد البشرى الخضر
<aمحمد البشرى الخضر
تاريخ التسجيل: 11-14-2006
مجموع المشاركات: 28869

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: الفاتح ميرغني)

    مشكورين حمد و عبد الحفيظ و من قبل لعلي عبد الوهاب على فتح البوست
    طيب يا شباب عرفنا ما هو الدقشم, طيب ما المعني من المثل "شرّك مقسّم فوق الدقشّم" ؟
                  

05-06-2016, 12:00 PM

محمد على طه الملك
<aمحمد على طه الملك
تاريخ التسجيل: 03-14-2007
مجموع المشاركات: 10624

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: محمد البشرى الخضر)

    سلامات أستاذنا علي وضيوفه الكرام ..
    بوست ممتع ..
    دي محاولة لتفسير بعض لغي أخونا المنصور ..
    مرتقنا/ تقرأ مُرتقي كورو الكلمة مشتقة من مرتقاد بالنوبية يا علي أخوي..
    الكلتوت / تقرأ كولى تود جزء في الساقية
    خللنا السخلان / ربطنا فم السخلان لكي لا ترضع أمهاتها
    حوينا البقر / مشتقه من الصوت (حو ) البعض يقولها للبقر عند وروده للماء والبعض عند ادخالهم الزريبة
    الكبروس / قرعة لحفظ العجين
    كبرنا/ قطعنا
    المكرفون مع ود المنصور للتصحيح.
                  

05-06-2016, 12:23 PM

عبدالحفيظ ابوسن
<aعبدالحفيظ ابوسن
تاريخ التسجيل: 06-24-2013
مجموع المشاركات: 22319

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: محمد على طه الملك)

    يعني يا ود البشري الشر الجاك يتزوع علي الناس الرجرجة والدهماء
    زي ما بنقول
    سلامتك وناس ...... كرامتك
                  

05-06-2016, 12:36 PM

جلالدونا
<aجلالدونا
تاريخ التسجيل: 04-26-2014
مجموع المشاركات: 9387

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبدالحفيظ ابوسن)

    شرّك
    الكعب الجاييك من القدر
    مقسّم
    موزّع
    فوق جزوع الشدر
    بصرف النظر هو جايى من وين
    المهم ما يصيب بشر
    هسى اقوم افتح ليك بوست عن الشر و البشر
    يكفيك البشير نموذجا
                  

05-07-2016, 00:10 AM

حمد إبراهيم محمد
<aحمد إبراهيم محمد
تاريخ التسجيل: 08-20-2009
مجموع المشاركات: 5198

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: جلالدونا)


    الحبيب ود عبد الوهاب – تتبارك ...

    إت عارف يا علي أخوي، طيلة الوقت الذي انفقته مع قلته في مجادلات السياسة بين الثوريين العلمانيين وبين المناضلين والمؤيدين للحكومة

    الى جانب المستقلين وغيرهم، والتعارك اللفظي الشخصي والمشاححة بدون هدى.

    أقول ما نابني شيء من المعرفة والمعلومة المفيدة التي تحوي قيمة إنسانية، قدر ما تحقق لي من طرحك لفكرة هذا البوست إلى جانب مداخلات الإخوة والأخت "أميرة" فقط ؟!.

    أكرر أميرة مش لانها هي (الوحيدة) المشاركة في هذا البوست، حتى الان، بل لأنك تجدها في انفتاح ثقافي، تقريبا في جل البوستات صرف النظر عن خط صاحبه

    تجدها (شمال ، يمين، وسط، ووسط الوسط)، قدر ما أدركته من متابعة.

    عكس انكفاء بعض المناضلين/ت، على بوستات بعضهم البعض، والمناصرة العمشى،

    وإن تداخلت في واحد من بوستات هؤلاء، وادليت برأي غير ما يوافق خطهم العام، فإن مصيرك إما "أستكة" او غبن التهميش عن عمد وترصد.

    فهذا البوست الثقافي جمع طيف من السودانيين كثر أم قل أكن مودة خاصة، فهو انجاز ثقافي. لك الشكر اوفره والتقدير اكمله،،،

    (أسف لهذه الفقرة الاعتراضية )...

    وليواصل البوست مهمته الاجتماعية الثقافية.

    مودتي

    +++
                  

05-07-2016, 04:43 AM

اميرة السيد

تاريخ التسجيل: 07-09-2010
مجموع المشاركات: 5598

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: حمد إبراهيم محمد)

    ان شاء الله يوم شكرك ما يجي يا حمد ابراهيم..
    وده كله من ذوقك بس..
    والله يديك الصحة والعافية..

    ..ويا جلالدونا..عليك الله افتح بوست الشر والبشر...
    والله يديك الصحة والعافية
                  

05-08-2016, 07:39 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: اميرة السيد)

    شديد آسفي بأنني لم استطيع الدخول إلى النت منذ يوم الخميس ( في البيت مقطوع ) والجوال من نوع أبوكشاف للمكالمات فقط ؟؟
    ليلة الخميس كانت ليلة تراثية بإمتياز في جمعية أبناء بنا بالبغدادية بجدة عن التراث النوبي .. وكنت من المتحدثين

    الجمعة طبعاً ضيوف في البيت ( قراصة وتركجين ) وفي المساء جولة على الجمعيات عزاء ومأتم ..
    يوم السبت إستقبال للمعتمرين ..
    دا برنامج ناس جدة .. تحياتي للجميع ..

    استاذنا عبدالحفيظ أبوسن / مداخلتك كمان عايزة شرح وتوضيح شوية / هل هناك لغة خاصة يتحدث بها أهل العربية مع بعضهم
    لأنني عندما أتحدث مع أي من إخوة لا ألاحظ مثل هذه المفردات .. أم هي مفردات تأتي في مناسبات أو مواقف معينة
    ==============
    حبيبنا عبدالرحيم محمد / مودتي وشكراً .. منصور لم يحضر إلى البوست مرة اخرى
    ==============
    الحبيب جلادونا / لقد اضفت مفردات أخرى غير معروفة ( شاطوحة والساسوي )
    ==========
    الفاضلابي الحبيب / ( الرضعان فوق الخلال ) أنا بعرف الخلال لتسرحية الشعر عند أهلنا في الشرق ( مزيد من المشرح )
    =============
    الفنان الصحفي الرائع الفاتح ميرغني : أقرب الأغاني النوبية للعربية هي ( أسمرنا اللونا ) لوردي وهي واحدة من أجمل ما تغنى بها البشر
    ==============
    ود ملوك ارقو ( الملك ) : مرتقاد وكبروس ممكن يكون ليها مراجع نوعية .. ( مرتقاد يعني بونية أو لكمة )
    ===============
    الاميرة : كنت أتمنى أن يسمع السودان البلابل بالنوبية .. إبداع بلا حدود نغم وطرب .. لو بيدي كنت سوف أحصر وردي والبلابل بالنوبية فقط
    لأنهم يرتقوا فوق مستوى الفن البشري .. خاصة عند البلابل مناحة حلفا ( بابور كوسونا ) ووردي ( مسونكيل )..
    ===================
                  

05-08-2016, 07:48 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote: أنا والمله دا ملينا البطايس والنقد والنجرمت والنون والجيم هى لنطق النون وتحتها ثلاثه نقاط فى فتاقه والرويس
    وفلخنا دوم البصل فوق بليلة اللوبه العفنه ومغينا لامن قست لنا القومه يا زول جوبقنا ومرتقنا وسلّكنا وعزقنا ورفعنا الكلتوت ورقدنا الكسبوت وصررنا أم طنوب
    وخللنا السخلان وحوينا البقر وسرفنا الكبروس وكبرنا الدهسير والحلفا وقولبنا المرطاقه وعزقنا ونجمنا وشتلنا وقلعنا وفومنا ياخ المله دا إلا يجرم لكن البخبرو أنا
    هو بخبرو والله عايشين على ذات وجئنا من ذات الأرومه وجاء منها مدهشى بلادى من أصحاب القول والشعر والفقه والذكر والعلم ونسأل الله أن نصل لمقامهم
    لكن خلنى اللنجض شيتى وبجيك،


    يا جماعة ... عووووك ... المروة .. ألحقوني ..

    بالغت استاذنا عبدالحفيظ ده كلام العرب العاربة اللغة التي انقترضت ( ههه )
    يا اخي إنت خطير جداً .. المزيد من الشرح .. أجزم لك 90% من السودان لا يفهم هذا الكلام ..
    التحية لك وأنت تزيدنا معرفة بهذا الوطن الجميل ..
    مودتي بلا حدود ..

    ليهم الحق أهلنا في الضواحي الدنيا كان يسموا الاخبار من الاذاعة الموجهة للجنوب ( ركن الجنوب)

    مودتي ..
                  

05-08-2016, 11:29 AM

محمد على طه الملك
<aمحمد على طه الملك
تاريخ التسجيل: 03-14-2007
مجموع المشاركات: 10624

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote: ( مرتقاد يعني بونية أو لكمة )
    صحيح يا أستاذ برضو بتعني العقدة الناتجة عن الربط بين حبلين ..
    اسعدتني بإثراء ك نشاط ابناء بنا التحايا لهم ولك ..
    ؤ ياريت لو طرحت لينا الندوة في بوست منفرد .

    تصحيح خطأ إملائي

    (عدل بواسطة محمد على طه الملك on 05-08-2016, 12:27 PM)

                  

05-08-2016, 12:19 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: محمد على طه الملك)

    ود ملوك أرقو .. حاضر ..
    عندي محاضرات في جمعية تبو وإرتدي كمان
    وعندنا كتيبات صدرت لكل محاضرة في الجمعية ..
    نشاطنا بقى كثيف جدة .. سوف أفتح إن شاء الله ومنتظرين منك أضافات
    مودتي .. مولانا أمبس ..
                  

05-08-2016, 12:25 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    كامل مودتي .. للآحباب جلادونا والقاضلابي
    لقد إزداد لهفي لمعرفة ما ورد في مداخلاتكم :

    لحبيب جلادونا / لقد اضفت مفردات أخرى غير معروفة ( شاطوحة والساسوي )


    الفاضلابي الحبيب / ( الرضعان فوق الخلال ) أنا بعرف الخلال لتسريحة الشعر عند أهلنا في الشرق ( مزيد من الشرح )

    مودتي بلا حدود .. صدقوني هذا الوطن جميل كل يوم نكتشف فيه أصالة وجمال ..
                  

05-08-2016, 12:36 PM

محمد على طه الملك
<aمحمد على طه الملك
تاريخ التسجيل: 03-14-2007
مجموع المشاركات: 10624

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    مشكور علي أمبس وفي انتظار ك تلك الفتوحات المعرفية ..
    صحي يا جلال شنو معنى ( الساسوى ) ؟
    هل تعني الحجر الرملي ؟ لأننا بنسمي الحجر الرملي بـ ( سويا ).
                  

05-08-2016, 02:52 PM

almulaomar
<aalmulaomar
تاريخ التسجيل: 07-08-2002
مجموع المشاركات: 6485

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: محمد على طه الملك)

    حباينا أهل الشمال الجغرافي أظن في لهجاتكم في حاجه إسمها كوتي أي البهم الصغير ونحن عندنا قرية إسمها أم كتي وهي كائنة وما أنفكت أها صححو لي قولي أو حقوهو زي ما قال الفنان وبرضو أقول نسيبة البجري. وبس ما أكون غلطت غلط فظيع في التفسير يقوم ينط لي سوركتي ولو كلامي صحيح أها سور كتي دي فسروها لينا
    منصور سويتا ودفنت دقت يا زول تعال الكلام بقى غلاد وأنت أفضل من يفسر
                  

05-08-2016, 03:24 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: almulaomar)

    Quote: أظن في لهجاتكم في حاجه إسمها كوتي أي البهم الصغير ونحن عندنا قرية إسمها أم كتي وهي كائنة


    حبيبنا الجميل .. الملا عمر ..
    صدقني السودان ده واحد ثقافياً وإذا أصلنا المناطق والاسماء والعادات والتقاليد
    نعم ( كوتي Kooti ) هي المنطقة المرتفعة وفي جزيرتنا في شمال دنقلا الجزء الجنوبي منها نسميه ( كوتي )
    ولا ذلك لما جرى النيل من الجنوب إلى الشمال ..
    أما ( كتي Katti ) فهو الحمل الصغير ( بنت لبون ) ليس الخروف ولكن الحمل ( أثني)
    عندما تكون مرحلة الرضاعة وما بعدها قليلاً ..
    مودتي .. بلا حدود
                  

05-09-2016, 09:42 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 14411

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote: الردحي والانكرابه: الردحي معروف وهو النبيح و تشتهر به النساء عند الشكل يقال ردح او ردحت فيني,

    Quote: - الردحي : هو التصايح والمكايدة بين إثنين كل منهم يأتي بمسالب الآخر، وتختص به النساء.

    سلآم يا كرام .
    الشرح الذي اورده الأخوين الكريمين ود البشرى وحمد ابراهيم يعني معني الردحي في
    اللهجة المصرية، اما معني الردحي في عاميتنا السودانية فهو عادة قديمة منقرضة كانن
    يقومن بها النساء في بيت البكاء . زمان لآمن يموت زول بيجيبو الرماد والنسوان بيبدن
    يتكتحن بالرماد ويلطمن الخدود ويضربن الصدور ؤ يردحن اي مع إيقاع هذا اللطم
    والضرب يتحركن حركة شبيهة بالرقص وهذا هو الردحي في عاميتنا .
    في الكِتيح بالرماد قالت الشاعرة،
    ما دايرالك الِميّتة ام رماداً شح،
    اي ما دايرالك بكاء هامد بل بكاء يكثرن فيه النساء الكندكة بالرماد .
    وفي العربية الفصحى,
    ردُحت المرأة رَدَاحَة، ضخُم ردفها وسمنت اوراكها، يعني بِقت جقة،
    ويسمون المرأة رداح، قال قيثارة الوطنية خليل فرح في رائعته
    في الضواحي،
    دا دلآل معجّن محّن اللُمات يا ردآح .
    العرب كانوا يحبون المرأة الفارعة ذات الأرداف الضخمة،
    قال عمرو بن كلثوم في معلقته،
    ومتنى لدنة سمقت وطالت
    روادفها تنوء بما ولينا
    ومأكمة يضيق الباب عنها
    وكشحا قد جننت به جنونا

    سبحان الله، في زمنا دا المرا كان ما بقت معصعِصة ؤ مِتل المسواك
    زول دايرا مافي !!!...
                  

05-09-2016, 09:57 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 14411

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: معاوية المدير)

    Quote: خللنا السخلان / ربطنا فم السخلان لكي لا ترضع أمهاتها

    يا ملك،
    السخلة بتصل مرحلة معيّنة بتترك فيها الرضاعة، اي بتفطُم نفِسا لكن في وحدات
    بكترنها، أها ديّل بيسوُلهن خُلآل وهو عود مبري من الجنبتين بيعارضوهو في
    خشم السخلة بيحميها ترضع، وسُمي خُلآل لأنه يتخلل خشم السخلة ويكون
    واصل بين خديها، وخُلآل الأدروبات سُمي خُلآل لأنه يتخلل الشعر ؤ ينفُشو .

    الشافع وكِت ما يتفطِم بيسولو الشطة والحنضل، وهذا بدلاً عن الخُلآل ...
                  

05-09-2016, 01:28 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: معاوية المدير)

    Quote: اما معني الردحي في عاميتنا السودانية فهو عادة قديمة منقرضة كانن
    يقومن بها النساء في بيت البكاء . زمان لآمن يموت زول بيجيبو الرماد والنسوان بيبدن
    يتكتحن بالرماد ويلطمن الخدود ويضربن الصدور ؤ يردحن اي مع إيقاع هذا اللطم
    والضرب يتحركن حركة شبيهة بالرقص وهذا هو الردحي في عاميتنا .



    حبيبنا معاوية ودالمدير .. أيها الرائع لقد فتحت لي نافذة لم أكن أتوقعها ..
    معاوية الحبيب .. هل إنت زينا كده من ( ضواحي الدنيا ) أو (الضهاري) كما قال حبيبنا الجميل توفيق مكي
    الصورة التي أوردتها يا معاوية .. كانت من الممارسات الاصيلة في المجتمع النوبي لدينا وخاصة عند موت عزيز
    أو شاب أو راعي الاسرة وسندها .. لم يكن يمارس لكل الموتى .. وهذه الممارسة بالنوبية ( هيوهي ) وكانت تجد مقاومة من الرجال لدرجة تصل الجلد
    والضرب بسوط من جريد النخل .. لأن المرأة كانت تخرج من وقارها وتكون حاسرة الرأس بدون توب أو طرحة .. وتأتي
    بالرماد وتنثرها على رأسها وتقبح منظرها .. وتركض في كل الاتجاهات .. وقد حضرت مثل هذه الوقائع وسط أهلنا قبل سنوات طويلة
    وأحسب أن هذا موروث من الدولة فاطمية لأنها أقرب إلى السلوك الشيعي ( اللطم ) وشدة الحزن عند الموت .. كما ورثنا العشوراء (هيوب)
    وطقوسها ..

    مودتي الحبيب معاوية .. ما قصرت ..


    مولانا الملك خليك قريب .. معاوية سافر بينا لقبل 40 سنة في قرى دنقلا


                  

05-09-2016, 02:06 PM

محمد على طه الملك
<aمحمد على طه الملك
تاريخ التسجيل: 03-14-2007
مجموع المشاركات: 10624

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    عليّ أمبس سرن آقمن..
    ود المدير دا ما بنصاقع قاموس في العامية وعنده زخيرة حية مؤكد لو فضى لينا بثري البوست ..
    Quote: وأحسب أن هذا موروث من الدولة فاطمية

    يمكن لإنو في عادات أخرى كتيرة جاتنا من الوقت داك ..
    منها احتفالات (الهيوب ) والكلمة ذاتها اختصار لـ ( حي ووب) ..كنا بنتعمعم بحبل (الألس ) ونلوع في طرفه شعلة نار ..
    بس كمان أخونا ( شم ) ) في بوست سابق ما قدرت أجيبو ختا رسم أثري لنساء كوشيات يمارسن هذه العادة ..:

    يا ود المدير وكتين جلالدونا فتح لينا ورينا الساسوي اللتو دي ؟

    (عدل بواسطة محمد على طه الملك on 05-09-2016, 02:09 PM)

                  

05-09-2016, 05:50 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: محمد على طه الملك)

    Quote: لسخلة بتصل مرحلة معيّنة بتترك فيها الرضاعة، اي بتفطُم نفِسا لكن في وحدات
    بكترنها، أها ديّل بيسوُلهن خُلآل وهو عود مبري من الجنبتين بيعارضوهو في
    خشم السخلة بيحميها ترضع، وسُمي خُلآل لأنه يتخلل خشم السخلة ويكون
    واصل بين خديها، وخُلآل الأدروبات سُمي خُلآل لأنه يتخلل الشعر ؤ ينفُشو


    شكراً كثير معاوية على هذا الشرح ..
    نعم في المقابل لدينا في السواقي كنا نربط شوك السنط
    بجريد النخل في مكان رضاعة السخلة لأمها .. ولكن عند
    حلب الغنماية كانت السخلة تأخذ دورها لكي تدر أم باللبن
    وعملية الربط هذه تسمى بالنوبية ( شير sheer )

    مودتي .. أكيد إنت زول ضواحي الدنيا ..

    شكراً كثير على الاثراء
                  

05-09-2016, 10:10 PM

munswor almophtah
<amunswor almophtah
تاريخ التسجيل: 12-02-2004
مجموع المشاركات: 19368

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    يا ود الملك الهيوب واللّس من ظواهر التشيع وذلك هو عين الأثر الفاطمى فالوثنيات والمسيحيه والتشيع ظالت حتى بعد الإسلام فى الشمال النيلى
    حتى جنوب الخرطوم فتجد الشيخ يشبرك ويرشك بالماء فذلك هو التعميد وتجد السيره للبحر وجريد النخل وتجد عند خروج المحبوسه كذلك
    وحديثات الوضوع لا يستقبلن الراجع من جنازه وبلاوى فى عبادة الشمس كقلع السن وفنها والسؤال عن سن الغزال ففى شمالكم مازالت اللغه
    المتأثره وفى الجنوب العربيه المتأثره بالنوبيه ويزداد التأثير كلما زحف شمالا عن الشوايقه والرباطاب والجعليين ويقل كلما إبتعد جنوبا من
    الخرطوم ليظهر عند الفونج والشلك ويؤثر فى ما جاورهم وللكل السلام. ويا المله ليس أم كتى فقط بل قرى والجيلى والسبلوقه وإسلانج
    وكترانج وكل ما نستخدمه فى الزراعه كله نوبى فالعرب ناس محويت وكسعه وسرحه ومده وقنيص ودمره وسدير وشوقاره ونشوق،
    وين إنت ياخ.


    منصور
                  

05-10-2016, 05:09 AM

محمد البشرى الخضر
<aمحمد البشرى الخضر
تاريخ التسجيل: 11-14-2006
مجموع المشاركات: 28869

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: munswor almophtah)

    Quote: يعني بِقت جقة
    هههههههههههه
    علي اليمين يا ود المدير كندا دي ما اضافت ليك ولا شالت منك اي حاجة
    التكّنك لابس عراقيك وسروالك وشايل عصاك على عاتقك وسفتّك دقار لوري
                  

05-10-2016, 05:21 AM

munswor almophtah
<amunswor almophtah
تاريخ التسجيل: 12-02-2004
مجموع المشاركات: 19368

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: محمد البشرى الخضر)

    ياود البشرى بعد أن فرغ الحجاج من الحج قال المطوف خلاس بعد دا إتحللتو وتحل لكم النساء وبعضهم
    جاء بزوجاته واحد جاء كلاله وجاءت عابرة مجموعه من الحريم اللواتى يمشين الهوينا وفى ذات اللحظه جاءه
    بتاع رادى أمدرمان فجأه فقال الرجل نحن فى جقه ومتوجهين المدينه!! سنه يا الحيطه والجزازير بنادو
    الجقاجق واللحمه طازه (طازجه) وما فيش جق أحسن من جق
                  

05-10-2016, 07:23 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: محمد البشرى الخضر)

    الحبيب ودالبشرى ..
    ود المدير خطير .. أنا متأكد هو من ناس ضواحي الدنيا ..
    أو كما قال حبيبنا الرائع توفيق مكي من ضهاري الضهاري ..
    مودتي ودالبشرى

                  

05-10-2016, 06:04 AM

عوض جاه الرسول

تاريخ التسجيل: 01-24-2013
مجموع المشاركات: 913

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    حبيبنا/
    علي عبدالوهاب عثمان
    يومكـ سعيد
    Quote: والورجاغة

    دي من تأليف (كيكي) والله أعلم.
                  

05-10-2016, 07:20 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عوض جاه الرسول)

    Quote: المتأثره وفى الجنوب العربيه المتأثره بالنوبيه ويزداد التأثير كلما زحف شمالا عن الشوايقه والرباطاب والجعليين ويقل كلما إبتعد جنوبا من
    الخرطوم ليظهر عند الفونج والشلك ويؤثر فى ما جاورهم وللكل السلام. ويا المله ليس أم كتى فقط بل قرى والجيلى والسبلوقه وإسلانج


    حبيبنا الاديب منصور ..
    في برنامج الشروق مرت من هنا قبل فترة .. الكاميرا كانت في منطقة الجزيرة إسلانج
    وأسال المذيع عن أصل كلمة الاسلانج .. كنت جالس مع العائلة وهم يجيدون الدنقلاوية مثلي
    فقلت لهم أن ( إسلانج ) هي كلمة ( إسلانق) وهي الخشبة التي توضع على ظهر الثور لجر المحراث
    وكانت عبارة ( أنج ) من التنغيم اللغوي الاساسي في النوبية الدنقلاوية ولكن تم تخفيفيها وعدم نقطها
    إلا عند الضرورة واليوم ينطقها البعض ( إسلايم) والبعض ( إسلانق ) وكبار السن ( إسلانج )
    فجاءت الاجابة من المذيع مطابقة للمسمى ولكن بدون شرح منه

    أما السبلوقة فواضحة لا تحتاج إلى شرح ففي السواقي ولعدم تآكل التربة وجرف الجدول يوضع ( سبلو sablow ) ممر للماء
    وبالعربية ( السبلوقة ) ومنطقة السبلوقة مع الشلال والمضيق الحجري تمثل نفس مهمة ( سبلو ) في الساقية
    أو المواسير التي تصرف الماء من سقف المنازل في موسم الامطار ..
    شكراً الحبيب منصور ..
                  

05-10-2016, 08:06 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 14411

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote:
    يا ود المدير وكتين جلالدونا فتح لينا ورينا الساسوي اللتو دي ؟

    تعرف يا ملك،
    عندنا قريباً لينا مطموس جداً ودوهو بعثة المانيا، والزمن دآك هجرة السودانيين لاوروبا
    ما بدأت وعددهم كان قليل . أها، قريبنا دا ماري بالشارع لقى عربيتين عاملآت حادث
    والخواجات متلمين وقزاز شبابيك العربات مالي الظلط، فجأة صاح بالعربي، الكترااابة
    جِنِس ساسوي !، وآحد طوالي كورك، اوووو، اللخو من وين في السودان ؟. طلع في
    سوداني وسط الزحمة .
    الساسوي مفرده ساسوية وهو الشظايا التي تتناثر من تحطم جسم زجاجي .
    زمان كنا دايماً نقع ضحية للساسوي لأننا كنا نمشي حفيانين ونتعرض
    لأطرافه الحادة خاصةً في البحر، متطلبات الناس كانت بسيطة ؤ عادي
    جداً ما يكون عندك نعلآت، برضو كنا لآمن تشتدّ علينا الهجيرة نقطّع
    صفق العُشر ؤ نطبقو فوق بعض ؤ نربطو علي كرعينا بي سعف النخل،
    وكنا نستفيد من كور العُشر ونتخذها (عنبج)، ما تسعلني تاني ...
                  

05-10-2016, 07:26 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عوض جاه الرسول)

    حبيبنا عوض امبس .. سيراناقمي ..
    صدقني يا عوض العامية العربية فيها أشياء تفوق الوصف
    رغم أننا لا نعرف خفياها .. ولكن لا تخلو من الجمال والابداع
    هي لغة إستفادات من لغات المحلية المتعددة
    واصبحت ثرية .. ومترعة بالجمال .

    مودتي عوض أمبس
                  

05-10-2016, 08:18 AM

جلالدونا
<aجلالدونا
تاريخ التسجيل: 04-26-2014
مجموع المشاركات: 9387

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    يمين الله يا الملك ما فتحت ليكم
    لكن لى يومين بفكر فى الشاطوحة السألنى منّها سيد البوست دى
    و بسأل فى نفسى شاطوحة دى شنو و انا جبتها من وين
    الليلة يا دوب وقعت لى
    الكلمة شاحوطة و ليست شاطوحة و هى بت عم السافوتة
    الساسوى زى ما قال ود المدير
    لكن .. احبلك لى الدونكّه العامرة بى كبابى الشاي
    لو اتكسرت كبّاية القِلم الكبيرة ما مشكلة كعبة الساسويات
                  

05-10-2016, 08:33 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 14411

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: جلالدونا)

    Quote: لو اتكسرت كبّاية القِلم الكبيرة ما مشكلة كعبة الساسويات


    القِلم مُفردها قِلمة، وفي روآية قُلمة، وهي مثل القِحِف ...
                  

05-10-2016, 08:36 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 14411

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: معاوية المدير)

    Quote: علي اليمين يا ود المدير كندا دي ما اضافت ليك ولا شالت منك اي حاجة
    التكّنك لابس عراقيك وسروالك وشايل عصاك على عاتقك وسفتّك دقار لوري

    القالك مِنو ما شالت مِنّي ؟،
    هسّع المفردات دي ما فيها إثراء لثقافة البجم اللنا عايش وسِطُن ديل .

    يا حليل ابو حسين ...
                  

05-10-2016, 08:52 AM

جلالدونا
<aجلالدونا
تاريخ التسجيل: 04-26-2014
مجموع المشاركات: 9387

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: معاوية المدير)

    القحف و القحوف ديل الّلات الجر اب كرشة داير ما يدور
    و الرقبة مخنصرة و متحكّر فوق شيّالة الحديد تحت ضل النيمة او دليبة
    و الغطا صفيح من فوق ليهو قرعة .. اوعاك من كوز خاسّتن اب اضان ..
    شن جات لى قليمات الكبابى
    باقيلى كندا دى دودرتبك
    و الساسوى بقالك وند شيلد عربات
                  

05-10-2016, 08:52 AM

عبدالحفيظ ابوسن
<aعبدالحفيظ ابوسن
تاريخ التسجيل: 06-24-2013
مجموع المشاركات: 22319

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: معاوية المدير)

    الساسوية قطع الزجاج المكسر .. قالد القدال
    كانت راقدة بين حجرين وضل ساسوية
    السافوتة شرحتها مرة وهي القشة البدخلوها في الاضان للمشاغلة
    في البكاء كانوا بختو القرعة في الموية ويدقو ويردحن
                  

05-10-2016, 09:01 AM

جلالدونا
<aجلالدونا
تاريخ التسجيل: 04-26-2014
مجموع المشاركات: 9387

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبدالحفيظ ابوسن)

    و فى البنا يا عبد الحفيض
    مرق و امينة
    و الامينة بالنسبة لى الاوضة تشبه المِشِّق فى الساقية
    حاولت اخت الكسرة فى الشين تحت الشّدة لكن غلبتنى
    اقروها بى كسر الميم و التشديد المكسور فوق الشين و تسكين القاف
    السطر الاخير ده عربى فصيح يا اخونا على
                  

05-10-2016, 09:03 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: جلالدونا)

    Quote: يمين الله يا الملك ما فتحت ليكم
    لكن لى يومين بفكر فى الشاطوحة السألنى منّها سيد البوست دى
    و بسأل فى نفسى شاطوحة دى شنو و انا جبتها من وين
    الليلة يا دوب وقعت لى
    الكلمة شاحوطة و ليست شاطوحة و هى بت عم السافوتة
    الساسوى زى ما قال ود المدير
    لكن .. احبلك لى الدونكّه العامرة بى كبابى الشاي
    لو اتكسرت كبّاية القِلم الكبيرة ما مشكلة كعبة الساسويات


    الحبيب جلالدونا ..
    صدقني ما فهمت من مداخلتك إلا ( الدونكا ) دي نوبية عندنا هي ( ديوكا )
    الديو هو الصاج .. (كا) بمعنى الغرقة او البيت (بيت الدوكا ) .. المطبخ
    أجزم أن هذا الوطن جميل وفيه كل ألوان الطيف ..
    مودتي واصلوا في هذا الجمال ..
    مودتي جلالدونا ..
    إسمك ذكرني لعبة نوبية إسمها ( ألا دونا ) وهي النقش بالاصابع على الرمل
    نوع من الفن كنا نمارسه ونحن صغار مع إخواتنا .. هي خاصة بالبنات ..
    مودتي بلا حدود ..
                  

05-10-2016, 09:12 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote: لساسوية قطع الزجاج المكسر .. قالد القدال
    كانت راقدة بين حجرين وضل ساسوية
    السافوتة شرحتها مرة وهي القشة البدخلوها في الاضان للمشاغلة
    في البكاء كانوا بختو القرعة في الموية ويدقو ويردحن


    حبيبنا أبوسن .. صدقوني أنا مندهش وفي ذهول ..
    هذه المفردات لها عمق ودلالات ونحن لم نكن نعلم عنها شيء
    أكرر هذا الوطن في ثراء بلا حدود .. وأجزم أن العامية السودانية
    تم إثرائها من مختلف مكونات هذا الوطن الجميل وقد أضافت اللغات والالسنة
    المتعدد والمتنوعة للعامية الكثير والكثير جداً حتى اصبحت مشبعة بكل هذه المفردات
    أين الباحثين والمنقبين عن هذا الجمال ..
    رحم الله الطيب محمد الطيب هو الوحيد الذي كنا نتابعه زمان لنعرف عن مكونات هذا الوطن
    مودتي أبوسن .. واصلوا
                  

05-10-2016, 09:24 AM

عبدالحفيظ ابوسن
<aعبدالحفيظ ابوسن
تاريخ التسجيل: 06-24-2013
مجموع المشاركات: 22319

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    اللمينة يا جلادونا .. الامينة دي لاحقة بعد العيال كبرت واتعلمت
    بتكون عرق ولا مرق ضخم في نصة اللوضة وبشيل السقف
    الرصاص دة في العرش قنا مرصوص وراء بعض
    قال حميد
    اصابعين الرجال رصاص
    شعر راس البنية سقف
                  

05-10-2016, 09:29 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 14411

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبدالحفيظ ابوسن)

    Quote: اللمينة يا جلادونا .. الامينة دي لاحقة بعد العيال كبرت واتعلمت
    بتكون عرق ولا مرق ضخم في نصة اللوضة وبشيل السقف

    عندنا تالآ السافل بنسميها الشِعبة ؤ بتكون ساندة المِرِق .

    عبد الحفيض،
    حبابو ...
                  

05-10-2016, 09:38 AM

جلالدونا
<aجلالدونا
تاريخ التسجيل: 04-26-2014
مجموع المشاركات: 9387

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبدالحفيظ ابوسن)

    Quote: اصابعين الرجال رصاص
    شعر راس البنية سقف

    القنا المرضوص عندنا فى الشمال جريد النخل و سعف الجريد الناشف يختوهو بى فوقو
    من فوق ليهو غطا الطين و بعد ينشف يتوالو بالزبالة
    .. يعيرات الغنم مع لخوخ البقر بالتخميرة ام ريحتن صندل ..
    و مع الخفجى موية المطر حلّها السبلوقى
    اها حمّيد شال منّكم القنا و خلّا السعف شعر
    الوطن ياهو حمّيد
    ____
    بالمناسبة يا عبد الحفيض
    عندى مجموعة مطبوعة لى معظم قصايدو و كت داير افتحلها بوست فى ذكرى الرحيل
    بس ربّنا ما سهذل
                  

05-10-2016, 09:30 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote: برضو كنا لآمن تشتدّ علينا الهجيرة نقطّع
    صفق العُشر ؤ نطبقو فوق بعض ؤ نربطو علي كرعينا بي سعف النخل،


    حبيبنا ود المدير .. إنت عميق في العامية السودانية ..
    المداخلة ( فوق ) أتخيلك كنت معانا في البلد زمان في الشمال
    كنا نمارس نفس العملية عندما يشتد الحر ونحن وسط النخيل
    وعندما نريد الرجوع إلى الحلة مع سخانة الجو كنا نمارس نفس الحكاية
    الواحد كنا يجي الصباح وسط النخيل ويرجع عند ظهيرة
    طبعاً بدون أحذية .. الحذاء الجديد في العيد .. والحذاء للمدرسة فقط

    لن يوحد هذا الوطن إلا الجانب الثقافي ..
    يا جماعة نحن عبارة عن نسخ متكررة في هذا الوطن
    نفس البيت ، نفس الاكل ، الزواج ، الولادة ، السماية ، المأتم ... ألخ
    نفس الحبوبة والوالدة والخالة والعمة والفطور والغداء ربما نفس الوجبة 85% من هذا الوطن

    يخرب بيت السياسة والسياسيين ومن لف لفهم ..

    واصل ودالمدير .. إنت موسوعة ..

                  

05-10-2016, 10:30 AM

عبدالحفيظ ابوسن
<aعبدالحفيظ ابوسن
تاريخ التسجيل: 06-24-2013
مجموع المشاركات: 22319

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    الشعبة تقرأ شيعبا .. يبدو شكل العود ولا العرق بكون فوق فيهو مسافة قريب لي ربع متر عاملة زي الرقم 7 العربي او الحرف V ودة بدي فرصة يتخت في فتحتو بي مداد .. الشعبة اكتر حاجة بتتعمل في الرواكيب اربعة شعب نظام عمدان صبة .
    الصريف هو السور .. بكون بالطرور ولا الحصير او النال
    وفي الغالب بي قليبة الشوك
    ميزة النال بطلع ريحة جميلة بعد يبتل
                  

05-10-2016, 10:42 AM

جلالدونا
<aجلالدونا
تاريخ التسجيل: 04-26-2014
مجموع المشاركات: 9387

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبدالحفيظ ابوسن)

    الصريف غالبا ما يكون بالقصب
    كم حفرو بى طول الحوش يغزّو فوقا الشِعب و تتربط مع بعض بالقنا
    و يترص عليها القصب و تتم نساجته بالحبال .. الله يستر طلحة ما يهل عليكم ..
    او بالعدم الشرقانى و بعد داك يتكلو عليهو اغصان الشوك حماية من الغنم عشان حكحكتا الكتيرة ديك
    الشرقانى شغلتو الاصلية الضُلّالة و فى رواية اخرى الراكوبة
                  

05-10-2016, 12:08 PM

حامد محمد حامد
<aحامد محمد حامد
تاريخ التسجيل: 11-19-2008
مجموع المشاركات: 3085

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: جلالدونا)

    السلام عليكم جميعا
    الاخ الحبيب على عبد الوهاب ...ياخى مسكاقمى
    طبعا انا فى الضياع وبصراحة معظم المفردات جديدة على
    بوست رائع الى ابعد الحدود ....شكرا للجميع

    الحاج لاكن ما بالغ يا منصور مفتاح ( من جقة متوجهين للمدينة ) هههههههههههههههههه
                  

05-10-2016, 12:17 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: حامد محمد حامد)

    Quote: لاخ الحبيب على عبد الوهاب ...ياخى مسكاقمى
    طبعا انا فى الضياع وبصراحة معظم المفردات جديدة على
    بوست رائع الى ابعد الحدود ....شكرا للجميع

    الحاج لاكن ما بالغ يا منصور مفتاح ( من جقة متوجهين للمدينة )


    حامد أننقا .. مسكاقمي ..
    يا حامد الحبيب شوف الناس ديل حلوين كيف .. أحلى من ناس ضواحي الدنيا
    أنا يا حامد العاجبني في موضوع إن كل هذه المفردات لها مقابل في النوبية
    أو أصلها نوبية ومن التراث الزراعي .. لكن طريقة التنغيم وإستخدام مبالغة
    جزاهم الله خير ..
    ودالبشرى ، جلادونا ، حمد ، الملك ، ودالمدير ، أبوسن ، منصور .. إن شاء الله ما أكون نسيت زول
    فاقدين أبوحسين ..

    مودتي حامد أننقا
                  

05-10-2016, 12:10 PM

محمد على طه الملك
<aمحمد على طه الملك
تاريخ التسجيل: 03-14-2007
مجموع المشاركات: 10624

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: جلالدونا)

    Quote: كنا نستفيد من كور العُشر ونتخذها (عنبج)

    يعنبجولك رويسك دا تعال مارق ..

    Quote: لو اتكسرت كبّاية القِلم الكبيرة ما مشكلة كعبة الساسويات

    يعني دراش القزاز ..
    طيب ما ياهو الاستلاف اللغوي التشبيهي ذاتو ..
    حجر السويا ( الحجر الرملي ) لما ينكسر بتفتت لساسوي ..
    عاينو لى كلام القدال الجابو ود اب سن :
    (كانت راقدة بين حجرين وضل ساسوية )
    الدونكا / فسرا اخونا علي ..
    بعد أماتنا يكملن عواسة الكسرة ..
    كنا بنجي نشرّك للزرازير بالطبق جنب الدوكة .

                  

05-10-2016, 12:30 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: محمد على طه الملك)

    الحبيب ود ملوك ارقو ..
    كما تعلم أنا مغرم بالترث النوبي وأبعاده على إمتداد هذا الوطن الجميل ..
    شكراً لهؤلاء الاخوة الاصلاء ..
    يا سلام ديل ناس عندهم عمق .. بس كانوا مشغولين بالسياسة والمناكفات
    أنا جمعت معلومات كثيفة جداً سوف تفيدني في محاضراتي في الجمعيات النوبية
    شكراً الملك .. شايفك ما هين في العمق العامي ..
    مودتي ..
                  

05-10-2016, 12:39 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote: القنا المرضوص عندنا فى الشمال جريد النخل و سعف الجريد الناشف يختوهو بى فوقو
    من فوق ليهو غطا الطين و بعد ينشف يتوالو بالزبالة
    .. يعيرات الغنم مع لخوخ البقر بالتخميرة ام ريحتن صندل ..
    و مع الخفجى موية المطر حلّها السبلوقى
    اها حمّيد شال منّكم القنا و خلّا السعف شعر
    الوطن ياهو حمّيد


    الحبيب جلالدونا .. نعم بالضبط ..
    الرصاص طولي والمرق بعرض ( الغرفة )
    الرصاص من سيقان النخيل ( الفلق )
    والمرق من السنط
    والعرش من الجريد ويتم النسج بالسلك الناعم ..
    ثم يتم فرش السعف الناشف .. وبعدين الزبالة ..

    سمعت مرة في واحدة يغني :
    إنكسر المرق واتشتت الرصاص .. ( كلام بليغ )

    مودتي واصلوا في البوست .. فيه إثراء وتأصيل ..
                  

05-10-2016, 12:50 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote: الشعبة تقرأ شيعبا .. يبدو شكل العود ولا العرق بكون فوق فيهو مسافة قريب لي ربع متر عاملة زي الرقم 7 العربي او الحرف V ودة بدي فرصة يتخت في فتحتو بي مداد .. الشعبة اكتر حاجة بتتعمل في الرواكيب اربعة شعب نظام عمدان صبة .
    الصريف هو السور .. بكون بالطرور ولا الحصير او النال
    وفي الغالب بي قليبة الشوك
    ميزة النال بطلع ريحة جميلة بعد يبتل


    أبوسن حبيبنا .. يا زول يا أصيل ..
    إسمها بالدنقلاوية ( ديمر) في السواقي والبيوت ( شيبيه ) هي الشعبة ولكن بالتنغيم النوبي
    نعم تنصب في منتصف الغرفة أحياناً إذا كان المرق أو الرصاص ضعيف لا يتحمل ..
    ويطلق مجازاً على الرجل الذي يتحمل متاعب أهله ( فلان ديمر)

    الشكر لكم كثيراً على هذا الابداع والاصالة ..
    لقد جمعت الكثير من المفردات وأعمل على التوثيق بالنوبية لأعرف أبعاد تأثيرات العربية والنوبية
    صدقني إنتو أجمل ناس .. وأنا مستمتع لأن هاجسي الأول التأصيل للرموز والمصطلحات والاسماء .

    صدقوني .. نحن دواخلنا واحدة أشكالنا متشابهة ، عائلاتنا وبيوتنا وعاداتنا وأكلنا ( ما في خلاف بيننا في الثوابت)
    بس السياسية والتحزب ..

    مودتي عبدالحفيظ أبوسن .. وشكراً لهذا الحضور الباهر ..

                  

05-10-2016, 02:23 PM

اميرة السيد

تاريخ التسجيل: 07-09-2010
مجموع المشاركات: 5598

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    علي
    ابوننقا
    إر مسكاقمي
    بوست جامع شامل كامل...
    وهكذا دائما البوستات البتكتبها دسمة ومفيدة وكأننا بناكل في قراصة 2 بوصة ومعجونة
    بالسمن البلدي ومرشوش فوقها شوية سكر او عسل... شهر رمضان قرب.. واذا ما صمنا
    في السودان حتى هنا في نيويورك بنشتاق للقراصة والحلو مر.....
    ويا ريت تواصلوا في هذا الحديث الشيق الممتع,,,,,
    وانتو معطونين بغبار الملائكة..( وهذه العبارة تعلمناها من ود ابو سن)...
    والله يديك الصحة والعافية
                  

05-10-2016, 03:17 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: اميرة السيد)

    الأميرة
    بروو .. أووو ني ..
    لم اكن أتخيل أن تأتي كل هذه الاشراقات والجمال من الاخوان
    هناك مصطلح أدبي نحن نعد له في التجمعات النوبية وهو ( الادب النوبي )
    ليس شرطاً ان تكون الكتابة بالنوبية .. ولكن بالعربية والجغرافيا وديموغرافيا والعمق يكون نوبي
    كما في كتابات الاديب الرائع النوبي ( إدريس علي )
    وشاء القدر أن يأتي هؤلاء النفر الكريم لاثراء البوست بالكثير من العبارات والرموز ..
    ونريد منهم المزيد

    هيروو قو .. أميرة .. أوووو ني
                  

05-10-2016, 04:34 PM

عبدالعزيز الفاضلابى
<aعبدالعزيز الفاضلابى
تاريخ التسجيل: 07-02-2008
مجموع المشاركات: 8199

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    الشايقية قالت فى رثاء اخيهن (سبعة بنات)
    الأَرْنِيق هَدمتَ الضُّل ,, عَاد تَانى وين ندخُل
                  

05-10-2016, 04:47 PM

احمد حمودى
<aاحمد حمودى
تاريخ التسجيل: 01-11-2013
مجموع المشاركات: 4364

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبدالعزيز الفاضلابى)

    Quote:
    الشايقية قالت فى رثاء اخيهن (سبعة بنات)
    الأَرْنِيق هَدمتَ الضُّل ,, عَاد تَانى وين ندخُل

    حبوبتنا قالت فى مناحة اخوها كان عمدة كان ماشى يجيب حلقة الساقية من البركل ومروى الشايقية
    الحلقة حلقت الشوم
    ما خلت غير العدار والبوم
    يعنى العدار عندها اخوها كان سفيه واخوها التانى كان زول مسيكين
                  

05-10-2016, 05:02 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: احمد حمودى)

    Quote: ما خلت غير العدار والبوم


    مودتي احمد حمودي ..
    (( العدار )) هل نوع من النبات ؟
    صدقني أنا زول تربال لكن الموضوع بالعربي
    لنعرف المقصود من رمزية ( العدار )
    شكراً يا الحبيب

                  

05-10-2016, 04:59 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبدالعزيز الفاضلابى)


    Quote: „الشايقية قالت فى رثاء اخيهن (سبعة بنات)
    الأَرْنِيق هَدمتَ الضُّل ,, عَاد تَانى وين ندخُل



    أبوسن حبيبنا .. يا زول يا أصيل ..
    نفس المعني المقصود ( بالشعبة ) والأرنيق في اصل ( قوائم الساقية ) ومنغمة من النوبية ( أرني)

    وكانت مداخلتي مع الحبيب أبوسن كما يلي :

    إسمها بالدنقلاوية ( ديمر) في السواقي والبيوت ( شيبيه ) هي الشعبة ولكن بالتنغيم النوبي
    نعم تنصب في منتصف الغرفة أحياناً إذا كان المرق أو الرصاص ضعيف لا يتحمل ..
    ويطلق مجازاً على الرجل الذي يتحمل متاعب أهله ( فلان ديمر)

    مودتي الفاضلابي ..
                  

05-10-2016, 06:39 PM

عبدالحفيظ ابوسن
<aعبدالحفيظ ابوسن
تاريخ التسجيل: 06-24-2013
مجموع المشاركات: 22319

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    ود المدير
    الفاضلابي
    حبابكم والله نعلكم طيبين اتو وعيالكم
    وين ود المنسي والعبيد
    حميد بشعره حافظ ونشر التراث السوداني
    يا علي
    برضو بشكرو الزول انو لمينة البيت
    بقلبو الالف لام .. زي الامين اللمين
    الامينة اللمينة
                  

05-11-2016, 07:28 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبدالحفيظ ابوسن)


    Quote: حميد بشعره حافظ ونشر التراث السوداني


    أستاذنا أبوسن .. حميد .. الله يرحمه كان متفرد ..
    وأنا لدي كتاب تحت طبع بعنوان (( قراءة نوبية في شعر حميد ))
    عن المفردات الزراعية في شعر حميد ..

    Quote: ود المدير
    الفاضلابي
    حبابكم والله نعلكم طيبين اتو وعيالكم
    وين ود المنسي والعبيد


    أرجو أن يحضر الاخوان ود المنسي والعبيد

    مودتي للجميع ..

                  

05-11-2016, 08:25 AM

جلالدونا
<aجلالدونا
تاريخ التسجيل: 04-26-2014
مجموع المشاركات: 9387

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    حباب الاميرة
    Quote: ..ويا جلالدونا..عليك الله افتح بوست الشر والبشر...والله يديك الصحة والعافية

    و يمتّعك بالصحة و العافية ..
    و من حكمة ربنا الشر فى البشر موجود من زمن هابيل و قابيل
    ما علينا يا بت الناس
    و من مخلوقاتو الموسومة بالشر الدعت و اخفّها شراً الكدنداية
    و زى ما قال على .. نحنا فى الشمال الناقل الوطنى ياهو عزيزنا الحمار
    الا مرات من شرورو علينا خلاف الرفسى .. السلايك
    و كمان من صنقرتنا فى ضل العصارى برضو ممكن تصيبنا هذه السلايك
    بفعل .. البُقُل.. الحركات الفوق دى مقصود بيها الضمّة فوق الباء و القاف
    اها الصنقرة فوق البقل دى دايما مربوطة بى تحذير رسمى من كبارنا
    زى التدخين ضار بالصحة
    ما تركب الحمار بدون لبدى .. لبدة ..
    و ما تقعد فق البقل
    و الاتنين بعملو السلايك
    بتعرفو المطموطى !؟

    (عدل بواسطة جلالدونا on 05-11-2016, 08:33 AM)

                  

05-11-2016, 08:43 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: جلالدونا)

    Quote: Ÿما تركب الحمار بدون لبدى .. لبدة ..
    و ما تقعد فق البقل
    و الاتنين بعملو السلايك
    بتعرفو المطموطى !؟


    حبيبنا جلالدونا .. روعة ومنتهى الروعة كمان ..

    ركوب الحمار بدون لبدة .. نعم .. تعمل جروح ومضاعفات في المؤخرة ..
    عشان كده الواحد كان لمن يركب الحمار ( يورك )

    أنا قصتي هنا مع عبارة ( البقل) .. هل تقصد الواطة الحارة .. بالنوبية ( بوبول)

    حبيبنا جلالدونا .. واصل هذا الجمال ..

                  

05-11-2016, 08:46 AM

عبيد الطيب
<aعبيد الطيب
تاريخ التسجيل: 08-31-2012
مجموع المشاركات: 1800

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: جلالدونا)

    تحياتي ومحبتي الأستاذ علي عبدالوهاب
    وتحيات زاكيات للأخوة المتداخلين جميعا، وجميعهم قوم وأخوة
    ترايمهم الروح.
    حضرت من إجازة مدتها شهرين قضيتها مابين البقعة وعتامير كردفان الغرَّة، وجيت "وجهي دِلدِمِّي"، كوووولو صارو قدامي
    ولولا بوستكم الجميل وأريحيتكم لما مرقنا من خلوتنا ، شكرا ودصُرَّة المنبر صديقي ودأب سن علي السؤال.
    مفردة الموروث وجمالها ودلالاتها يا لها من مفردة، أهل الريف أرَّخوا بها لأفراحهم وأحزانهم والشاهد مُداخلاتكم أعلاه مثلا
    "إنكسر المرق" دليل علي رحيل عامر من عُمار الريف وهكذا..الخ
    حوت البقرة بفتح الحاء والواء ومدلول فعل ماضي
    أيضا يقولون: (حَوَتْ البقرة) أي وضعت علي رجليها الخلف وتحديدا "المحويت" وهو حبل قصير إن كان من لحاء اوصوف او سيور...الخ،
    تحوت بها البقرة عند حلبها، ومن أشعارهم ومن فن "توية"
    (سيد الهبْرب أم محويت
    جيد ليك بي بناية البيت)
    *الكبروس عندنا إناء من جذوع الشجر تُحلب به الإبل والبقر، وغالبا ما يُشبل علي حافته في الأعلي خُرس ويُعلق في سرج الجمل وخاصة في سرج الإنقيب وهو الشاب الذي يرعي الإبل ويقوم بحلبها أيضا ، ومن أشعارهم:
    إنقيبك لفح كبروسو والمُخباط
    نَهَر زامُلو في القوز الملان خرَّاط
    *الإنقيب قلنا الشاب الصغير الذي يرعي الإبل، ولفح كبروسو أي حمل إناء حليب الإبل، والمُخباط مطرق من الشجر يشبه السوط،تُحثُّ به الإبل علي السير ،
    فهو كالسوط"الكُرباج" ولكن المُخباط لسعته باردة ، لذا يستعمل لرعي الإبل،حتي لا يصيبها بأذي عند التُخمة
    *الدَّوكة
    عندنا في كردفان هي صاج العُواسة ومن أمثالهم
    (شقيَّا الدوكة)
    ومن أشهر ملوك أهلنا بجبال النوبة ، الملك"دوكة" وقد كان مضرب مثل في العدل والكرم، ولقد ورد في أمداح الشيخ البرعي،وفي مدحته التي صلاتها:
    (جدد وضوك خالف هوى نفسك
    أبليس عدوك واظب صلاة الليل)
    في هذا المقطع الشيخ البرعي وضح الكثير من معني "دوكا"
    السلفو دوكه
    الأصلحوا البلاد لملكنا دوكا
    النوّرو الارض لي فاس ودوكا
    للجائعين شادين طاجن ودوكة
    يقول شاعر دوبيت عن الطاجِن:
    "سماكي زُرقتو زي الطَّاجِن الممسوح
    وبتكَّل سحابِك زي سطور اللَّوح
    إتحلّيتي بي مِسكا عطور تفوح
    وفيك ريحة دعاشاتأً ترُدْ الرُّوح"
    وبمناسبة القِلم والقُلم
    أيضا المُقلم آلة من الحديد، تستعمل في قطع الزائد من حوافر الخيل
    وفي التراث "أخويا مُقلااام الحِجج"
    أيضا القُلم نبات ينبت في باطن الأودية، تأكله الإبل ولكنه يقتلها سريعا، يعني أحيانا في ساعات يقتل العشرات من الإبل.
    الورجاغة من الورجغة وهي العَوَّة اي الهرجلة وكووولها تعني أن يتحدث ثلّة من الناس بصوت مرتفع وكل واحد بموضوع يختلف عن الآخر،
    ومن أقوالهم تندرا"دي ورجغة ساكت" ولقد شاهدت رجلا معمرا إسمه
    "سعيد ورجغيت"
    وبمناسبة"جقَّة" قالت حسناء من البادية،تهجو أحدهم،وهي تتندر من الذين أطلقوا علية كنية "المرغوب"ومن غنا الجراري:
    ما إسَّمعو المرغوب
    ودجقَّة وماسكو القُوب /بالكاء
    ينُق نقَّة المكلوب
    ويِرْدْ أُم عجيجة أقروب
    والجَق أيضا هو الجمل التِلْب
    وياودالمدير شرحك للردحي رائع جدا،أيضا شرح الأخوة للردحي، بعض أهل الريف يقولون"الردعي" "ماتردع ساكت"
    وأهديك مربوعة للشاعر الفحل ودالسميري، تجد فيها طعم للردحي:
    من الغيبة تَرْدَح لا طلوع الفجري
    لاهسَّاع بشوف اللَّرض معاقباك تَجْرِي
    فرقان أم نفايلا سمحة جيتهِن بَدْرِي
    شيشَك ياهجين أم دُرعة فكَّيت سَدْرِي
    معزتي وتحياتي القلبية لكم جميعا
    ومازال القلب يتلفت ..! و"بتحرَّف عليها وبمشي صادْ"
    والحال يا المفتاح أخوي صورها عبدالوهاب ودالسميتاوي:
    شيكة البِزيد في مباعو
    رُقابْة الزَّريبتو حديد وبي قرَّاعو
    الوادعنا كيف دهِن السِّراج دمَّاعو
    بدني بلودو خمَّاج النقع بي ضراعو
    *شفت يا ودالمدير أخوي الربع الثالث:
    (الوادعنا كيف دهِن السِّراج دمَّاعو)
    عجبني جدا، تشبيه الشَّاعر لدمَّاع الوادعهم،ب
    "دِهن السَّراج"
    والسِّراج
    قُماش يفتَل في ،أو يُضفر ، أو يُنسع ،في شكل ضفايرأو مساير، ويُعطن في (الزيت/السمن/الودك) حتي
    "يتسقَّي" تماما، ثم تُشعل فيه النَّار، وتكون له بُهرة وإضاءة لامعة جدا،وينقِّط الزيت المحروق" نتِّف"
    شُفتوا كيف دموع الوادعو دي صادقة ب حُرقة.....
    وبعدين وجه الموادع كالسَّراج يضوي....!
    أها أزيدكم تاني.... السَّراج، عندنا في سيرة العريس، أي زفَّة العريس من بيته إلي بيت زوجته، تكون بالليل، بعد نجم الرَّيدة مايغيب...!
    ايييي بعد ما نجم الرَّيدة المدمَّس، يتضاري من الرّيدة الجديدة..!
    أها بشعلوا السِّراج، وبعد أن يشبله في عود طويل ، وفي رأسه، قد تكون حربة،أو "كوكاب "ويحمله رجلا كبيرا وعامر قبايل،
    وقد يكون عم العريس أو خاله، ويمشي رافعا السراج، أمام الحصان التي يمتطيها العريس.
                  

05-11-2016, 09:14 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبيد الطيب)

    حبيبنا عبيد .. عوداً حميداً .. ورائعاً كما عهدناك
    محبتي وأعجابي وانت تنقل إلينا حروف ذلك الجزء العزيز من الوطن
    الله .. الله .. على هذا الابداع والعمق والتأصيل ..
    يا سلام .. إستشهاد من أقوال فتاة .. إلى راعي إبل .. إلى الشيخ البرعي .. وكأنك تريد
    أن تنقل لنا إحساس كل افراد المجتمع ..
    يعجز قلمي المتواضع عن التعبير ..
    أستاذنا عبيد .. رغم أن كثير من المفردات غريبة علي إلا أنني في هذا البوست
    شعرت بأنني أنتمي إلى ذرات هذه الارض وهذا الوطن الجميل ..
    مودتي حبيبنا الاديب الطيب

    Quote: نَهَر زامُلو في القوز الملان خرَّاط


    هذه العبارة ( خراط ) اسمعها يومياً هنا في السعودية
    ومعناه ( كذاب) يقول الخليجي ( ها دا خراط ) يعني كذاب
                  

05-11-2016, 09:33 AM

عباس محمود
<aعباس محمود
تاريخ التسجيل: 11-26-2004
مجموع المشاركات: 1441

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبيد الطيب)

    أخي الفاضل علي عبد الوهاب عثمان .علي أمبس ... سرن آقمي ياخي والله بوست ممتع للغاية وبالنسبة لي حتي مفيد في مراجعة بعض الكلمات النوبية ولا شك ان الأضافات المقدرة للزملاء ود المدير وحفيظ ابو سن وجلالدونا والفاضلابي وود البشري والأضافة الثرية للزميل عبيد الطيب وغيرهم.أضفت ألقا علي بهاء هذا البوست .تتخيل ياعلي رغم مولدي في السير ومفارقتي لبلدتنا في سن باكرة وانتقالنا لوسط السودان وتقريبا التوقف عن أستعمال اللغة النوبية الا ما ندر الا ان فهم الكثير من المفردات وفهم أغاني الحماسة وحتي بعض أغنيات الحقيبة كان مشكلة بالنسبة لي..... أري البو ست مفيد جدا. أخي الفاضل في تطوافك هذا اتوقع ان تمر علي أسماء بعض المناطق والأحياء في السودان والتي تحمل أسماء نوبية ( مارنجان ..الكدرو .. أسلانج ..ود أرو .... وغيرها ) لك كل الشكر علي هذا الأمتاع.

    (عدل بواسطة عباس محمود on 05-11-2016, 09:37 AM)
    (عدل بواسطة عباس محمود on 05-11-2016, 09:39 AM)

                  

05-11-2016, 09:49 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عباس محمود)

    Quote: أخي الفاضل علي عبد الوهاب عثمانعلي أمبس ... سرن آقميياخي والله بوست ممتع للغاية وبالنسبة لي حتي مفيد في مراجعة بعض الكلمات النوبيةولا شك ان الأضافات المقدرة للزملاء ود المدير وحفيظ ابو سن وجلالدونا والفاضلابي وود البشري والأضافة الثرية للزميل عبيد الطيب وغيرهم.أضفت ألقا علي بهاء هذا البوست .تتخيل ياعلي رغم مولدي في السير ومفارقتي لبلدتنا في سن باكرة وانتقالنا لوسط السودان وتقريبا التوقف عن أستعمال اللغة النوبية الا ما ندر الا ان فهم الكثير من المفردات وفهم أغاني الحماسة وحتي بعض أغنيات الحقيبة كان مشكلة بالنسبة لي..... أري البو ست مفيد جدا. أخي الفاضل في تطوافك هذا اتوقع ان تمر علي أسماء بعض المناطق والأحياء في السودان والتي تحمل أسماء نوبية ( مارنجان ..الكدرو .. أسلانج ..ود أرو .... وغيرها ) لك كل الشكر علي هذا الأمتاع.


    عباس أمبس ..
    لك التحية والتجلة .. صدقني يا عباس هؤلاء الاخوة الكرام ومن خلال قراءاتي لمداخلاتهم .. آمنت عديل إننا وطن واحد
    كلما تحدث أحدهم وشرح مفردة تتقرب إليه أكثر إلى درجة أن يكون أحد أفراد اسرتك ولا تشعر بأي غربة أو إختلاف معه
    نعم عباس أمبس .. السودان الحالي تكون نتيجة لهجرات كبيرة جداً خاصة من أهلنا في الشمال ( الميناء والوابورات وخاصة بحري وكوستي ومشروع الجزيرة .. إلخ)
    وكما تعرف دنقلا العجوز كان مركز إسلامي بعد سقوط الدولة المسيحية ومعظم الدعاة والعرب الذين أتوا عبر مصر كانت إستراحتهم لدى الشيخ ودعيسى
    وتزوجوا من هناك وتفرقوا في أرجاء السودان .. أخي عباس نحن أهل وأحباب ..
    السير بلدكم وأنا على بعد 20 كلم تقريباً من السير .. كانت عاصمة الملك زبير حمد الملك وقد حكمت السير منطقة دنقلا لسنين طويلة
    ومازال قصر الملك الزبير موجود في ( إيماني ) بالقرب من السير ..
    مودتي عباس أمبس ..
    وشكري لهؤلاء الاخوان الاصلاء مرتادي البوست ..

                  

05-11-2016, 01:47 PM

اميرة السيد

تاريخ التسجيل: 07-09-2010
مجموع المشاركات: 5598

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    والسِّراج
    قُماش يفتَل في ،أو يُضفر ، أو يُنسع ،في شكل ضفايرأو مساير، ويُعطن في (الزيت/السمن/الودك) حتي
    "يتسقَّي" تماما، ثم تُشعل فيه النَّار، وتكون له بُهرة وإضاءة لامعة جدا،وينقِّط الزيت المحروق" نتِّف"
    شُفتوا كيف دموع الوادعو دي صادقة ب حُرقة.....
    وبعدين وجه الموادع كالسَّراج يضوي....!
    أها أزيدكم تاني.... السَّراج، عندنا في سيرة العريس، أي زفَّة العريس من بيته إلي بيت زوجته، تكون بالليل، بعد نجم الرَّيدة مايغيب...!
    ايييي بعد ما نجم الرَّيدة المدمَّس، يتضاري من الرّيدة الجديدة..!
    أها بشعلوا السِّراج، وبعد أن يشبله في عود طويل ، وفي رأسه، قد تكون حربة،أو "كوكاب "ويحمله رجلا كبيرا وعامر قبايل،
    وقد يكون عم العريس أو خاله، ويمشي رافعا السراج، أمام الحصان التي يمتطيها العريس.
    QUOTE)
    >>>>>>>>>><<<<<<<<<<<<<<>>>>>>>>>>>>>>>>

    ما دام جاكم عبيد ود الطيب ، ترانا الجبنا بنبرنا واتحكرنا هنا ... وهو ضليع بهذه الأمور ...واستفدنا منه كثير جدا قبال كده..
    وانا في كثير من البوستات كنت بنادي عليه هو واسحق ود بلة يجونا ولكنهم بيغيبوا كثير من المنبر العام..
    والله يديهم الصحة والعافية..
    والله يديكم الصحة والعافية
                  

05-11-2016, 02:41 PM

عبدالحفيظ ابوسن
<aعبدالحفيظ ابوسن
تاريخ التسجيل: 06-24-2013
مجموع المشاركات: 22319

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: اميرة السيد)

    حباب العبيد
    نحن بنقول المحويب .. وهو قطعة من الحبل لا تتجاوز المتر .. تربط بها اقدام البقرة الخلفية من الاعلي بربطة سهلة الحل للحليب
    شايفك قلت المحويت
                  

05-11-2016, 04:37 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبدالحفيظ ابوسن)

    الأميرة .. تحياتي ..
    يا سلام على هؤلاء الاحباب لديهم مقدرة على الاثراء ..
    أسفاً على الاعلام السوداني كل القنوات .. تفتح أي قناة تجد
    شباب وشابات دون الثلاثين بدون اي خبرة في الحياة ..
    لان الحياة خبرة وممارسة وتجارب ومعرفة ..
    هم برئيين لكن السبب هو المسئولين .. ما في مخطط للاعلام
    والثقافة عشان نعرف بعضنا أكثر ..

    التحية لهم ومتابعين معاهم ..
                  

05-11-2016, 04:42 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبدالحفيظ ابوسن)

    Quote: حن بنقول المحويب .. وهو قطعة من الحبل لا تتجاوز المتر .. تربط بها اقدام البقرة الخلفية من الاعلي بربطة سهلة الحل للحليب
    شايفك قلت المحويت


    استاذذنا الجليل أبوسن ..
    ( المحويب ) حسب وصفك نحن في النوبية نسميها ( أورييه oraih )

    مودتي يا أصيل ..

                  

05-11-2016, 04:47 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote: وبمناسبة"جقَّة" قالت حسناء من البادية،تهجو أحدهم،وهي تتندر من الذين أطلقوا علية كنية "المرغوب"ومن غنا الجراري:
    ما إسَّمعو المرغوب
    ودجقَّة وماسكو القُوب /بالكاء
    ينُق نقَّة المكلوب
    ويِرْدْ أُم عجيجة أقروب
    والجَق أيضا هو الجمل التِلْب


    أستاذنا عبيد الطيب ..
    بعض المفردات نحن نطلقها بدون أن نعرف معناها ورمزيتها
    أنا في غاية الاندهاش ..
    يا سلام يا عبيد واصل هذا الابداع والجمال

    مودتي استاذنا عبيد
                  

05-11-2016, 09:32 PM

Abdullah Idrees
<aAbdullah Idrees
تاريخ التسجيل: 12-05-2010
مجموع المشاركات: 3692

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    بوست جميل يا علي والشباب ..
    اسلانج = اسلانق ، ممكن لانو من المقرن وانت ماشي شمالا مرورا بالسبلوقة بتقابلك اسماء غير عربية كتيرة جدا خاصة في الجزر النيلية كلها اساميها غير عربية ، مثلا شمال السبلوقة تلقى جزر سنقى ، مركي ، مرنات ، كجوج ، نقزو ، امجركي ، نسري ، وهذه طبعا بداية مناطق الجعليين ، يعني كل الجزر اسماءها غير عربية ،بينما القرى شرق وغرب النيل اسماءها عربية غالبا وبنسبة كبيرة لان عمر اغلبها لا يتجاوز المائة عام حيث كان الناس يعيشون في الجزر او في السواقي ..
    الاسلانق بالنوبية تم تعريبها في منطقتنا الاسناج وواضح الصلة الصوتية بينها وبين اسلانق واسلانج ، هناك ايضا الأرص ، القصبة ، القرمدي وهي ايضا من اجزاء المحرات البلدي ..

    * الامينة تختلف قليلا عن الشعبة ، فهي شعبة ضخمة ومتينة جدا تستخدم في تأمين المرق ، داخل اوضة او صالون او مخزن ، اذا حدثت اي مشكلة في السقف مثل شق او تآكل المرق لكي لا ينهار السقف و لذا هي ليست من اصل البناء وانما معالجة تالية لعيب في السقف، الشعبة طبعا صغيرة وتستخدم في الرواكيب والكشاشات والقطاطي وهي اصغر واقل متانة لان حمولة السقف اقل ..

    سلامي جميعا
                  

05-11-2016, 10:05 PM

محمد على طه الملك
<aمحمد على طه الملك
تاريخ التسجيل: 03-14-2007
مجموع المشاركات: 10624

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    سلامات ود الطيب ..
    عفيت منك ماك طالي علينا من أم خيرا بره ؤجوا ..
    قعدت النضم ومليت البكان ..
    طبعا اهل البادية أغلب كلماتم التي تبدو غريبة هي من الفصحى ..
    العامية السودانية خاصة الريفية كما ذهب دكتور عون الشريف وآخرين ..
    خليط بين الفصحى واللغات والتعابير وتراكيب الجمل في اللغات المحلية ..
    ولهذا دعوت من قبل هنا أن يتبنى كتاب سودانيز عمل قاموس بالمفردات العامية المستخدمة وشرحها ..
    وقد تبنى الاخ حاتم أيضا ذات الفكرة وله جهد مبذول ليته يستفيد من هذا البوست أيضا ..
    مداخلتك حوت مفردات لسه محتاجة لشرح مثلا (سيد الهبْرب أم محويت )..
    عرفنا المحويت طيب الهبرب كناية لى شنو ؟ وهل المفردة مشتقة من (هبر ) ؟
    هَبِر البعيرُ : كثُر لحمُه ..
    برضو دي (رُقابْة ) ..
    مشكور مقدما.
                  

05-11-2016, 10:30 PM

Abdullah Idrees
<aAbdullah Idrees
تاريخ التسجيل: 12-05-2010
مجموع المشاركات: 3692

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: محمد على طه الملك)
                  

05-12-2016, 06:34 AM

عبيد الطيب
<aعبيد الطيب
تاريخ التسجيل: 08-31-2012
مجموع المشاركات: 1800

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: Abdullah Idrees)

    تحياتي الجميلين عُشاق الخندريس جميعا
    أخي الضُّل الرهين أستاذ علي، نعم ضُل رهين لأنك تجمع الأحباب
    (نَهر زاملو في القوز الملان خرَّاط)
    نهر أي خاطب الجمال"الزامول" بلغة تعرفها هي مثلا"ها/هج"
    حتي تتوقف من السير"تتّقل"، ب القوز "التلّة" المملوء بعشب "الخرَّاط"، لكي ترعي...
    تحياتي أخي عباس محمود، ياخ عاميتنا السودانية دي عجيبة جدا، وبها ثراء تواصلي جميل، ولكن الإعلام أفسدها جدا، بل البعض من الشعراء والمغنيين شوّهوها بإضافات غير مدروسة
    مثلا المبدعة شادن بصوتها الشَّجي الطروب لكنها، أفسدت معني أصيل بالبادية وتحديدا الأبالة وحميمية ومعزة الإبل عندهم، أفسدتها بأغنية ركيكة غنتها شادن"إلبِل عملا جوطة"
    تحياتي أم نَفَل العزيزة أميرة بت السيد
    (السِّراج)
    والله يا أميرة إذا شاهدتي عريس "ساير" من منزل أسرته إلي بيت "نسابته"، وحوله الفتية وهم يمتطون الأينُق القود،وحوله العذاري، ينشدن ويغنين، وبعضهن "يلفحن" فوقه،
    تأتي الحسناء، وهي تميس كما الخيزران، برقصة علي إيقاع أيدي العذاري وحمحمة حناجر الصبيان، ثم تقف خلف العريس، وترقص لوحدها بإيقاع سريع،
    ثم تمسك علي حدوة سرج الفرس التي يمتطيها العريس، وتلفح فيه أكثر من خمس
    "شبالات" متتالية، مع زغرودات من العذاري، ووجهها "يبهُر" مع ضوء السراج، والسيرة تستمر إلي أن يصل، "الحجيل" وهو بيت من طقاق الدمورية،
    بني خصيصا للعريس، يمكث به وزوجته، إلي أربعين يوما ،بمثابة شهر العسل،ودي موضوع آخر.......
    قالـت إحداهن وهي تغني في سيرة شقيقها:
    "البنات جيد لي أني
    الحنين بيتو أمبني"
    شوفي كنيتها لإخيها ب"الحِنين" وفرحتها بزواجه ، وهي تردَد مع صويحباتها "جيد لَيْ أني....!
    تحياتي صديقي الجميل ودأب سن
    نعم هو كذلك ولكننا في البادية الغربية نسميه "المحويت"
    ونقول حوت البقرة/الناقة
    تحياتي ومحبتي الأستاذ محمد علي طه الملك
    ولك من أهل كردفان معزة صادقة
    نعم أخي ودالملك،أكثر مفردات البادية من الفصحي،
    ايَّام السعد، وانا بالبادية،سمعت الشاعرة الرائعة آمنة بت أبوريدة، تُغني بصوتٍ شجي، وهي تتذكر وحيدها الذي ذهب، إلي رحلة "الجزو" ،مع إبله في الشمال الغربي، تشدو من غنا الجراري
    قرين قلبي البوالسا
    قال طيبين هو وعانسا
    اللّي خلط عقصة مآنسا
    بِتْرُد دار الفرانسا
    توالس القرين وتقصد قرين الشعر، العانس هي الناقة، دار الفرانسة تقصد بها دولة تشاد لأنها كانت مستعمرة فرنشية ، وحصلت بين الفرنسيين والبدو منواشات،
    ايَّام المفتش الإنجليزي "مور" طاغية كُتُم ، وحاول أن يمنع الكبابيش مع رحلة الجزو، ولكنه لم يستطع ، قالت شاعرة كباشية:
    الدّرمة إن مالقيتيها
    قجيجة مور أرعيها
    الدرمة نبات من نباتات الجزو، أي إذا لم تجد الدرمة ، فأرعي قُجة"شعر" رأس المفتش مور، دي موضوع آخر يا ودالملك أخوي
    الشاهد*
    وقفت في مفردة عقصة/عكصة كثيرا،
    وهنا عقصة، أهل البادية يطلقونها علي بقر الوحش، وتحديدا ذات القرون الطويلة الممتدة للوراء، وفي مراعي الجزو"الجزء" وهي ايضا فصيحة، تختلط الجآذر والمها وسائر بقر الوحش مع الإبل
    وبحثت عن مفردة "عق/ك صة"، فوجدتها في شعر أمرئ القيس:
    "غدائرُه مستشزراتٌ إلى العُلَى تَضِلُّ العِقاصُ في مُثنَّى ومُرسَلِ"
    وفي القواميس اللغة
    (عِقْصَةُ
    خُصْلَة من الشَّعر مضفَّرة باستدارة على الرَّأس أو في القفا ، ضفيرةجديلة في شعرها
    أعقص
    ) تيس التوى قرناه على أذنيه من خلفه (
    "الهبْرَب" هي الناقة التي يُستعصي حلبها أي ماها طايعة للحلب، فيسمونها الهبرب، بفتح الهاء وسكون الباءوفتح الراء
    قالت شاعرة بدوية ومن غنا الجراي، وهي تمدح خالها الذي ذهب بإبله إلي رحلة الجنوب ، حتي وصل غرب مدينة الضعين
    لِقحن لي الهبرَّب
    وهاجَن لي البررَّب
    حسين بي أُمَّات شررَّب
    من الضعين غرَّب
    *لقحن لها معنيين ، لقحن أي تزاوج الإبل، يقولون:
    "الناقة لقحت، لقح الجمل الناقة"،يقالبها في سائر البهائم
    "عِشرت"
    وأيضا الناقة الوالد يقولون لقحة
    والهبرَّب كناية للبكُر التي ولدت لتوها وهي صعبة الحلب، وتكون نكور....!
    والبرّرب من برروبة وهي الغزال التي بذغ قرنها لتوه"شابة"، وهنا الشاعرة تصف جمال جِماله
    والشرّرب من شُرابة وهي مُقدمة خشم الجمل، وهنا كناية لوسم خالها حسين"الشُّرابة" ووسم البهائم هو"شفرة" اهلها كما يقول والد صديقنا "بلّة البكري"
    تحياتي الأخ عبدالله عباس
    كتلتو ساااااكت
    قصة صديقي المرغوب ، أنه وصل البئر، ولأنه في عجله رد السلام ، وصافح بعض العذاري، ونسي واحدة فقالت:
    يا الرَّقيتا حزامك
    ويا الصوبَن هدَّامك
    المرغوب سلامك
    الجيل الواقِف لامك
    معزتي وسوف نعود إن سمح زمننا الممحوق، أوكما شبهه الشيخ البرعي :(أصبح زمنا قصير
    وبقت شمسنا عصير)
                  

05-12-2016, 08:54 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: عبيد الطيب)

    Quote: بوست جميل يا علي والشباب ..
    اسلانج = اسلانق ، ممكن لانو من المقرن وانت ماشي شمالا مرورا بالسبلوقة بتقابلك اسماء غير عربية كتيرة جدا خاصة في الجزر النيلية كلها اساميها غير عربية ، مثلا شمال السبلوقة تلقى جزر سنقى ، مركي ، مرنات ، كجوج ، نقزو ، امجركي ، نسري ، وهذه طبعا بداية مناطق الجعليين ، يعني كل الجزر اسماءها غير عربية ،بينما القرى شرق وغرب النيل اسماءها عربية غالبا وبنسبة كبيرة لان عمر اغلبها لا يتجاوز المائة عام حيث كان الناس يعيشون في الجزر او في السواقي ..
    الاسلانق بالنوبية تم تعريبها في منطقتنا الاسناج وواضح الصلة الصوتية بينها وبين اسلانق واسلانج ، هناك ايضا الأرص ، القصبة ، القرمدي وهي ايضا من اجزاء المحرات البلدي ..


    التحية لك أيها الحبيب :
    نعم هذه المناطق من تخوم الخرطوم إلى حلفا لديها تواصل عرقي ومكاني ..
    قبل فترة كنت أقرأ للشاعر الحسين الحسن .. ووجدت أنه من مواليد جزيرة ( آرتوللي )
    وهي بالنوبية الجزيرة الظليلة أو ذات الاشجار والنخيل .. آرتي بالنوبية ( جزيرة ) وللي ( ظل)
    لا فرق بيننا أبداً من حيث الشكل والسلوك ... إلخ فقط لغة التخاطب وهي إما مستعربة أو مستنوبة
    مودتي بلا حدود ..
                  

05-12-2016, 10:28 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote: تحياتي الجميلين عُشاق الخندريس جميعا
    أخي الضُّل الرهين أستاذ علي، نعم ضُل رهين لأنك تجمع الأحباب
    (نَهر زاملو في القوز الملان خرَّاط)
    نهر أي خاطب الجمال"الزامول" بلغة تعرفها هي مثلا"ها/هج"
    حتي تتوقف من السير"تتّقل"، ب القوز "التلّة" المملوء بعشب "الخرَّاط"، لكي ترعي...
    تحياتي أخي عباس محمود، ياخ عاميتنا السودانية دي عجيبة جدا، وبها ثراء تواصلي جميل، ولكن الإعلام أفسدها جدا، بل البعض من الشعراء والمغنيين شوّهوها بإضافات غير مدروسة
    مثلا المبدعة شادن بصوتها الشَّجي الطروب لكنها، أفسدت معني أصيل بالبادية وتحديدا الأبالة وحميمية ومعزة الإبل عندهم، أفسدتها بأغنية ركيكة غنتها شادن"إلبِل عملا جوطة"


    حبيبنا عبيد ودالطيب .. مودتي يا رائع ..
    حرام ... حرام .. أمثالكم يكون عبر هذا المنبر .. يا سلام يا عبيد والباقي الاخوان في البوست
    تخيل أنكم جميعاً في حلقات تلفزيونية في برنامج عن هذا الوطن الرائع ..
    بنفس الشرح والعمق .. أجزم أن هذا الوطن لصار ظلاً ظليلاً للجميع ..
    مشكلتنا ثقافية .. رغم إننا نسخ مكررة لكن لا نعرف بعضنا .. النخب من قبل إستقلال
    نتظير والبدل وسفر وليالي وجلسات وفرنجة .. فكانت النتيجة هؤلاء القابعون في القصر
    بدون فائدة ..
    واصل هذا الجمال ومعك الاخوان ..
    إنكم تبلغون رسالة في غالية الأهمية ..
    شكراً يا رائع .. وننتظر المزيد .. وأسمح لي أنقل مداخلتك إلى منتديات قرى دنقلا
    مودتي وإعجابي ..
                  

05-17-2016, 08:39 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    مودتي للجميع .. أيها الاحباب
    أنا رفعت البوست ده الصفحة الثانية
    من أجل معرفة عبارة تتكرر يومياً أو أكثر ..

    (( مديدة حرقتني ))

    معليش كلفت عليكم .. ولكن لا بأس من المعرفة والادراك

    مودتي بلا حدود
                  

05-17-2016, 05:29 PM

اميرة السيد

تاريخ التسجيل: 07-09-2010
مجموع المشاركات: 5598

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    تخيل أنكم جميعاً في حلقات تلفزيونية في برنامج عن هذا الوطن الرائع ..
    بنفس الشرح والعمق .. أجزم أن هذا الوطن لصار ظلاً ظليلاً للجميع ..
    مشكلتنا ثقافية .. رغم إننا نسخ مكررة لكن لا نعرف بعضنا .. النخب من قبل إستقلال
    نتظير والبدل وسفر وليالي وجلسات وفرنجة .. فكانت النتيجة هؤلاء القابعون في القصر
    بدون فائدة ..
    واصل هذا الجمال ومعك الاخوان ..
    إنكم تبلغون رسالة في غالية الأهمية ..(QUOTE)
    >>>>>><<<<<<>>>>>>>>>>>>

    استاذنا علي عبد الوهاب
    كلام عين المنطق .. وبالفعل هؤلاء الناس الانيقين بيحتاجوا الى حلقات تلفزيونية لنقل
    هذه الحكاوي الرائعة للكل....وبالفعل كمان بنستفيد غاية الاستفادة من هذه التعبيرات
    وهذه الثقافات الاصيلة لسوداننا الحبيب...
    وقد سمحت لنفسي ان انقل، وبدون أن استأذنك ، قبسات من هذا البوست الى بوست
    خالد ود المنسي عن نفاج النغم....
    والله يديك الصحة والعافية
                  

05-17-2016, 05:57 PM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: اميرة السيد)

    الاستاذة أميرة .. مسكاقمي ... وووو أمبرة ... أوووني .. والاميرات كمان ..

    الشكر والامتنان لكل المشاركين في هذا البوست .. على الاثراء والتأصيل
    يا سلام أميرة .. تقضلي البيت بيتك إبنتنا العزيزة ..

    مع الشكر ..
                  

05-17-2016, 09:26 PM

Abdullah Idrees
<aAbdullah Idrees
تاريخ التسجيل: 12-05-2010
مجموع المشاركات: 3692

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    يا استاذنا علي عبدالوهاب ومولانا الملك
    ورينا الاسماء دي معناها شنو في اللغات النوبية ؟
    Quote: مثلا شمال السبلوقة تلقى جزر سنقى ، مركي ، مرنات ، كجوج ، نقزو ، امجركي ، نسري


    ا
                  

05-18-2016, 08:47 AM

علي عبدالوهاب عثمان
<aعلي عبدالوهاب عثمان
تاريخ التسجيل: 01-17-2013
مجموع المشاركات: 12466

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: Abdullah Idrees)

    Quote: سنقى ، مركي ، مرنات ، كجوج ، نقزو ، امجركي ، نسري


    الحبيب عبدالله .. مودتي يا جميل ..
    صدقني شوقتني لمعرفة أصول هذه الاسماء ..
    ولكن لابد من معرفة الامالة والتنغيم في النطق ..
    يستحسن كتابة هذه الاسماء بالانجليزية لنعرف نطقها بالضبط ..
    لأنني أول مرة اسمع بها ..
    كلها تبدو من أصول نوبية ما عدا ( نقزو)

    مودتي الحبيب عبدالله .. وشكراً كثير على الاهتمام ..

    كمان ود الملك خطير جداً في التأصيل النوبي .. نرجو حضوره
                  

05-18-2016, 10:00 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 14411

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: رفقاً بناس ضواحي الدنيا .. بعض العبارات لا (Re: علي عبدالوهاب عثمان)

    Quote: مودتي احمد حمودي ..(( العدار )) هل نوع من النبات ؟
    صدقني أنا زول تربال لكن الموضوع بالعربي لنعرف المقصود من
    رمزية ( العدار )شكراً يا الحبيب

    يا أُستاذ علي،العدار نوع من النباتات الطفيلية ؤ ليهو تأثير شديد علي المحاصيل
    خاصة الذرةبأنواعها، وهو زي نبات البُوّدة، والبُوّدة نبات عبارة عن خيوط رفيعة
    مِتِل خيوط العنكبوت يلتفَ حول البرسيم ويحد من نموه .
    أغرب شي عندنا في البلد ناس لقبهم ناس العدار !،يمكن عشان زهرتو الجميلة ...

    (عدل بواسطة معاوية المدير on 05-18-2016, 11:30 AM)

                  


[رد على الموضوع] صفحة 1 „‰ 2:   <<  1 2  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de