ول ابا محمد النور kabar

كتب حزنك يا وطني حزني (عبر الفيس بووك):

Quote: حزنك ياوطنى احزنى كبر ده الزيييييييييييت ذاتو بلغة شباب بلدنا , زول كده يخليك تقرا ليهو وانت متشوق للسطر التانى وتتمنى مايكون اخر سطر. كتاباتو تنم عن معرفه مهوله وفهم ثاقب ومواقف شجاعه وطبعا الذين فى قلوبهم مرض ذى كتاباتو دى مابتقع ليهم لانو دايرنو يبقى خاوى زيهم الواحد يعمل السبعه وزمتا ويجى لى كيبوردو بالليل يشبكنا ثورة الشرفاء ويقعد ينبح فينا اطلعو الشارع اطلعو الشارع وهو يضرب شارع الشانزلزيه وديل تجار وارزقية الحرب والمستنفعين منها وماهماهم الميت فيها منو والمهموم بيها منو عشان كده اى حطبه تذيدا نار بمشو برا خجله يجيبوها ويختوها. كلنا مع كبر فى انو الحرب دى لازم تقيف باى شكل وبعديها يسقط النظام ولا يطير فى 60 داهيه مايهمنا بس كفااااايه جهل وكفاية متاجره بدماء ناس مساكين لاهمهم مال ولاهمهم سلطه وفقط همهم رويحتهم ورويحة بهايمهم ومادايرين شى غيرا. التحيه للعلاّمه كبر وكامل احتراماتنا لقلمو الصادق وياريت يفتح بلف كيبوردو شويه لانو لسه دايرين منو المذيد حتى يذيل التغبيش الحاصل ده وربنا يسهل ليهو ويحفظ ليهو عيالو.

حزنك..حبابك يا صديقي..

كتر خيرك علي هذه المطايبة اللطيفة..

السياسة في امسودان مرات امرها عجيب يا صديقي..وفيها كتير من السطحية.. عشان كده البلد لسع ما قادرة تمرق من المطبات..الديموقراطية زمان كنا بنقراها وبنشوفها طشاش طشاش..لكن لمن جينا عشنا في مجتمعاتها عرفنا قيمتها الحقيقية..واهم القيم أنو المواطن ما يخاف عن التعبير عن ذاتو..وفي نفس الوكت ما يخاف يثير القضايا المفروضت تلفت ليها النخبة..عشان كده نحن بنتكلم باولويات واجندة قد تختلف كتير عن ناس النخبة في امسودان..

عارف اكتر حاجة محزنة شنو يا صديقي؟..ناس السياسة في امسودان لمن يلاقوك وجها لوجه.. بيقولوا ليك كل البتقول سليم وصحيح ..ولكن..!

اها اللكنة دي بتعني انك قدام الرأي العام تخفي تهجساتك تجاه الواقع وتدعمهم وحتى ولو انتا غير مقتنع بالقضايا التي يعتبرونها اولويات..كلهم يا حبيب قلنا ليهم شنو البيضمن لي قدام بعد ما تسقطوا النظام انو مناطق الحرب تحظى بمعالجات خاصة ..وشنو البيمنع انو ظاهرة الحرب تاني ما تتكرر في السودان؟..كلهم ما عندهم تصور..لأنهم يعملون بفكرة رزق اليوم باليوم..!

المعارضة السودانية تفتقد الإتساق ..وتفتقد الثقة في نفسها ..وما بتقدر تخلق علاقة واضحة مع الجماهير لأنو تعريفها للجماهير مختل وبالتالي تعريفها للقضايا السودانية مختل..عشان كده ما بتقدر تقدم كتير..!

الحرب سوف تقف..وسوف يفهم اهل امسودان بان اهم حاجة انو الناس تشوف صرفة انو الحرب تاني ما ترجع..والسلاح ح يتجمع من الناس..وبعد داك الناس تشوف صراعها وتقودوا بصورة حضارية وسلمية..!

النية حاصلة يا صديقي لفتح البلف اكتر واكتر.. لكن الأشياء كثيرا ما تصادرنا..وسوف نحاول نقدم افضل ما عندنا..ونشكر كل القراء والقارئات ممن يتابعون اشياءنا الصغيرة هنا..ونشكر هذا المنبر الذي اعطاني فرصة للتفاعل والتواصل..

اهديتك حاجة صغنونة في بوست (في حماك ربنا)..طبعا صحيح العنوان فيهو استهبال واثارة ..لكن فيهو حاجات سميناها (اشياء اخرى)..ويا ريت تعجبك الهدية..

كتر خيرك..واتمنى يوم اشوف الماتو بتاعك (فرحك يا وطني فرحي)..!

كبر