|
فريـــــــــق زامــبل (حكاية)
|
لسبت 15 اغسطس في يوم من ايام الخريف الجميلة عندنا في السودان وفي الريف حيث تتسيد الطبيعة والكلمه لها لا اسفلت ولا بلاط والارض تكسوها الاعشاب الخضراء والطين الما خمج ( هو في طين ما خمج ... غايتو انت عليك حاجات) السماء ملبده بالسحب والمطر تنزل برزاز جميل ومنعش ... يقرع جرس المدرسة .. مدرسة ام كتر الثانوية بنين .. يتهافت الطلاب نحو فصولهم متجاوزين مرحلة الطابور بسبب المطر .... طلاب الصف الثاني مهدي يدخلون فصلهم يتزعمهم البلولة وجاد الكريم يجلسون في مكانهم يفتح الحوار خدر جزيرة الشهير بنقل الاخبار الطازجه بعد اخراجها بصوره مشوقه : خدر : هيي يابطان قالوا جابولكم استاذ انقليزي خواجه عديييييييل كدا عيونه خضر مثل الكديسه . البلوله : الله يقطعك انت المابتجيب لك خبرا زين ... يازول الكلام دا جبتو من ويين خواجه شنو كمان بالجي ام كتر ... خدر جزيره : انا مالي انا الجبتو امس قاعد مع ابوي في الدكان اشوفلك استاذ صلاح ماشي مع الخواجه اخوي ...حسن الكبير مي صاحبوا سعلوا قالوا الخواجه شنو المباريك يا استاذ صلاح ... قالوا علا دا استاذ جديد جابو لينا في المدرسه يدرس اللغة الانقليزية .. جاد كريم : عيييك هي ناقصة هو استاذ صلاح ذاتو بانقليزيه النصو عربي دا ما قعد نفهم منه يجيبولنا خواجه كمان .. البلوله : اظنه انت يا جاد الكريم ممكن تفهم منه ماك مدمن سينما وافلام الكاوبوي حد ما في فلم مثلوه انت حضرته في السينما معقولة لاعن هسع ما تعلمت كلام الخواجات على اصوله .. جاد الكريم : ها زول ها انت ما نصيح هو الكاوبويات قعد يتكلموا مع بعض مي كلمه واحده والباقي يتموا بالمسدسات .... في هذه الاثناء : فجاه يعم الفصل الهدوء بعد الهرج الذي كان يسود .. ليتلفت الثلاثي نحو السبوره بعد ان كانوا متجمعين آخر الفصل ليفاجوا بدخول الاستاذ والذي هو فعلا بريطاني السحنه بشعره الاشقر وعيونه الخضر ... البلوله :: اممممممك الجنة طلع كلامو صح دا خواجه عدييييييل علي باليمين زي بتاعين الافلام ... هي يا اخوانا دي مصيبة شنو كمان الوقعنا فيها دي الاستاذ : good morning الفصل : قوووود مورننيق يا استاذ الاستاذ: thank you sit-down البلوله: اها بدينا من اولها قال شنو الجنه دا خدر : قالك ست داون البلوله : ما سمعتها انا اطرش لكن يعني شنوداير شنو خدر : يازول انت ست داون ما عرفتها انت دخلت الثانوي بواسطة ولا شنو .قالك اقعد البلوله : يقعد نصك والله بعدين كان ما كسرتلك سنونك المسوسات ديل جابتلها لآمه كمان انا دخلت الثانوي بواسطة ....؟؟.. في هذه الاثناء يلاحظ الاستاذ الجدل الذي يحدث في آخر الصف ويتقدم نحوهم مخاطبا البلوله : الاستاذ: Hi you stand-up are you have any problem البلوله : (تبدو عليه الحيره ولايعرف ماذا يريد الاستاذ منه تحديدا لكن بصوره اليه يقف ويحاول يستخرج تعبيرا يسال به الاستاذ)... يييس يا استاذ واط اريو داير مني ؟؟؟؟ ( افتكر نفسه اخرج جمله انجليزية مفيده وشعر بالرضا عن نفسه)
|
|
|
|
|
|
|
|
|