|
|
 Re: عن حبيبتي ( أركويت ) بحكي ليكم ... (Re: مزمل خيرى)
|
ودى مدرسة اركويت جنوب الابتدائية للبنات
واتبنت بالجهد الشعبى من ناس الحلة..
ومتذكر ان الكلام دا فى اول التمانينات كان كل جمعة
رجال الحلة كلهم يطلعوا ويشتغلوا فى البناء..
ووقت الفطور الصوانى دى كانت تطاقش ،، الحلة كلها كانت تطلع صوانى الفطور ..
مجهود جبار من اهل المربع يشكروا عليهو والله ..
| |
 
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
ودى اول محطة لتقوية المياة فى المربع.. بس للاسف بعد شغلوها
اكتشف المواطنين انو الموية فيها ريحة غريبة وطعم غريب واتضح انو مياة
الصرف الصحى دخلت فى البئر ، طوالى وقفوا المحطة وبعد شوية سلموا المبانى لناس الشرطة الشعبية .!
| |
|
|
|
|
|
|
|
|
 Re: عن حبيبتي ( أركويت ) بحكي ليكم ... (Re: مزمل خيرى)
|
تحياتى اخى مزمل،،
مشكور على هذه الصور الجميلة وهذا النقل الحى لبعض معالم مدينة اركويت ...
امل اخى مزمل ان تنقل لنا بعدستك التوثيقية هذه ، المعالم المعمارية الاخرى ، خاصة تلك التى بشارع عبيد ختم و خاصة الفندق الصينى الضخم وصورة استاد اركويت الذى لم يتسنى لنا رؤيته ,,
ولك كل الود،،،
| |
|
|
|
|
|
|
|
|
 Re: عن حبيبتي ( أركويت ) بحكي ليكم ... (Re: مزمل خيرى)
|
اخونا فى الامتدادية (ود جبريل)
تحية ودعابة،،
Quote: اركويت دي موش الفسحة الكانت بعد كوشة الجبل
واحد حاقد من الي المتفرد الامتداد |
Quote: ود خيري اعضابك ياخي
نحن بتاعين الضواحي ديل ما قاعدين نتكلم معاهم ذاتو |
| Quote: هو انتو كلكم كمكم لامن تسولوكم ايميل كمان |
Quote: كدي بتكون كملت شوارع اركويت كلهن يا ود خيري
خلاص ارشفوا البوست علي كدة |
يا مزمل ود جبريل ده مالو على بوستينا ده مداخلاته كلها حاقدة كده...؟؟؟ بعدين ياطارق معليش الحقد ما ينال منك الامتداد برضو حقتنا بالميلاد... واركويت امتداد للامتداد لانه زى ما قال ليك احد المتداخلين انه اغلب سكان اركويت قادمين من كل انحاء الخرطوم من الحلة الجديدة والقوز والصحافة والسجانة والامتداد ... عليه من الطبيعى ان تكون اركويت تجمع صفوة هذه الاحياء وفيها يتحقق مفهوم الاسرة الممتده بفهم مغاير ... وبعدين شايفك هجرت بوست الامتداد وبقيت تقلل من قيمة البوستات المثيلة ...الشكلها اثرت فى ان الامتداد حى متفرد وابانت ان كل حى متفرد ومتميز فى نظر ابنائه...
تخريمة بعدين يا ود جبريل طارق الخير من ما رحلنا من الامتداد هو جسدا فى اركويت وروحا وقلبا فى الامتداد... واخبرا احب الامتداد واموت فى اركويت...
ولك منى ولكل ابناء الامتداد كل الود والحب ،،،
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
| Quote: عبود فى المملكة ومجدى الحلبى موجود فى البلد دى .! |
تحايانا لمجدى الحريف وبالمناسبه يامزمل فريق التقدم كان النواه الحقيقيه لمنتخب الرابطه سابقا وفريق اركويت حاليا
ومن اسماء الفرق التى كانت تلعب فى رابطة اركويت
فريق الزهره
فريق الوحده
فريق التضامن
فريق النجوم
فريق سانتوس
فريق الامل
فريق التقدم
فريق الوحده
فريق المجد
فريق الميرغنى
فريق الهدف
فريق الشعله
فريق الكوكب
ومن اسماء اللعيبه البارزين الذين تخرجوا من هذه الرابطه عبدالرحمن الديرى النيل _سليمان تيه النيل _عباس جوليت النيل _بابكر عبود النيل
كمال عبد الغنى المريخ _صابون المريخ _ ادورد جلدو المريخ _خالد جوليت الهلال _نادر الاهلى _ النور الاهلى_مصطفى جندبه النيل
طبعا يامزمل الزاكره عشعش فيها العنكبوت ولكن بعونكم سننداح اكثر واكثر
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: طارق جبريل)
|
الاخ طارق جبريل
Quote:
يا احباب والله حبينا نناكفكم بس
اخوة كثر من الامتداد مشوا سكنوا في اركويت |
عارفنك بتناكفنا... وما بنخاصمك بس بنجارى طبعك يا جميييييل ... لكن بينى وبينك ياطارق ...اركويت مش بتطير العقل وتستاهل نتغزل فيها كمان وكمان...
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: معتز مقبول)
|
التحية للأخت سمرية صاحبة البوست ولضيوفها الكرام الجيران او من أتي بة الدرب ..
البوست جميل للغاية والجانب العام منة أحتوي علي ذكريات جميلة أثارت في النفس قدر عالي من الشجن وعلي الرغم من عدم سكني في أركويت لكن كنت من المداومين علي التواجد بها باستمرار وتحديدا بمربع 56 خلال الفترة من عام 73 وحتي العام 90 تقريبا وذالك لسكن اختي الكبري بها في المنزل الذي يفتح شرقاوأمامة من ناحية اليسار منزل ناس مجدي شريف وأيوب ومن ناحية اليمين يخيل لي ناس أمنة عبدالصادق وامامة من الناحية الشمالية الشرقية كان المنزل الذي شهد حادثة انتحار الغسال حيث لازلت اتزكر أسمة ولم تغب الحادثة عن ذهني منذ ذالك الوقت لأنة بمجرد العلم بها وصلنا الخبر في منزلنا الواقع بالقرب من السوق المركزي بالصحافة وحضرنا بارجلنا كالعادة في ذالك الزمان وبالفعل شاهدنا الحادثة من الباب الكبير الذي كان يفتح علي الناحية الغربية وكان الرجل معلق علي حبل ملتف حول رقبتة ويتدلي جسمة من بيم برندة لم يكتمل تشييدها ..
مربع 56 بالفعل من المربعات ذات التداخل والتعارف الأجتماعي الفريد.. وابناء شقيقتي كانوا تقريبا في مثل عمري وبحكم ترددي عليهم تعرفت علي كل شباب المربع في ذالك الوقت وكنا نتشارك في كافة المناسبات الأجتماعية وقد شاركت في عدد من الرحلات التي نظمها شباب المربع وازكر منهم عزالدين السر وحسن ادم وطارق عابدين وعاطف بشري وعادل مسلم وأيوب ومجدي شريف وجمال عازف الأيقاع وصالح محمد عبدالله وجمال الحلبي وغيرهم حتي أن فكرة الرابطة الثقافية شاركت في أجتماعات تأسيسها الأولية بحكم أن الفكرة تم أخذها من الرابطة التي كنا قد أسسناها بمربعنا بالصحافة شرق وكانت من الروابط القوية جدا في ذالك الزمان ..
الأن اركويت شهدت طفرة عمرانية عالية في التقدم وأملي أن لايؤثر ذالك علي الواقع الأجتماعي الذي كان سائدا عند السبعينات والثمانينات بحكم أنة كان فريد في كل شئ
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: محمد عيسي محمد)
|
| Quote: خلال الفترة من عام 73 وحتي العام 90 تقريبا وذالك لسكن اختي الكبري بها في المنزل الذي يفتح شرقاوأمامة من ناحية اليسار منزل ناس مجدي شريف وأيوب ومن ناحية اليمين يخيل لي ناس أمنة عبدالصادق وامامة من الناحية الشمالية الشرقية كان المنزل الذي شهد حادثة انتحار الغسال |
يا محمد عيسي .. مرحب بيك وبذكريات مربع 56 ، ودا طبعا مربعنا زي ما عارف ..
واختك دي اكيد انا بعرفها ، لان البيت الوصفتو دا انا جيت فيه كتير .
واظن البيت دا بيت ناس رفيعة ومكة مووش؟
وملاصقين بالحيطة لناس حواء خليفة ؟!
Quote: كان المنزل الذي شهد حادثة انتحار الغسال حيث لازلت اتزكر أسمة ولم تغب الحادثة عن ذهني
منذ ذالك الوقت لأنة بمجرد العلم بها وصلنا الخبر في منزلنا الواقع بالقرب من السوق المركزي بالصحافة
وحضرنا بارجلنا كالعادة في ذالك الزمان وبالفعل شاهدنا الحادثة من الباب الكبير الذي كان يفتح علي الناحية الغربية
وكان الرجل معلق علي حبل ملتف حول رقبتة ويتدلي جسمة من بيم برندة لم يكتمل تشييدها .. |
فعلا يا محمد من رأى الحادثة لن ينساها ابدا ..
المشهد كان مؤلم شديد .. واظنها كانت اول حادثة غريبة باركويت كلها .. !
المنطقة التي كانت تسكن فيها اختها ، كانت منطقة يمتاز اهلها ولغاية الآن بالترابط الاجتماعي الكبير ..
لان جميع البيوت فاتحة في بعض على شكل U
| Quote: وقد شاركت في عدد من الرحلات التي نظمها شباب المربع وازكر منهم عزالدين السر وحسن ادم وطارق عابدين وعاطف بشري وعادل مسلم وأيوب ومجدي شريف وجمال عازف الأيقاع وصالح محمد عبدالله وجمال الحلب |
ووين اولاد احمد الطيب ، ومحمد خليفة ، وعصام عبد السيد ( باسطة ) .. ؟؟
| |
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: معتز مقبول)
|
Quote: يا ناس اركويت| سلام
انتو ناسيين منوت ولا شنو...يا سيف احكي عن منوت.
الظاهر سمريه لسه صغيره عن ناس منوت............
تحياتي |
معتز المقبول
سلامات
بالمناسبة انا ساكن فى حلة حمد باولادى جنب
بيتكم وكنت حاضر فى العزاء.. البركة فيك تانى ..
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: معتز مقبول)
|
Quote: يا ناس اركويت| سلام
انتو ناسيين منوت ولا شنو...يا سيف احكي عن منوت.
الظاهر سمريه لسه صغيره عن ناس منوت............
|
ازيك يا معتز ... وسلامات ومنور زقاقات اركويت الحميمة..
كدي احكي لينا انت عن منوت ، لاني شاعرة ببوادر حكاوي سمحة خلاص .... اها ننتظرك ؟!
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: طارق جبريل)
|
Quote: اخوة كثر من الامتداد مشوا سكنوا في اركويت
|
بالمناسبة ياود جبريل ،، نحن قبال نسكن فى اركويت كنا ساكنين فى الامتداد والوالد كان شغال يبنى
فى البيت وكنت ضغير الوقت داك والبيت الكنا ساكنين فيهو كان شمال محطة 7 ماعارفو مربع كم .؟
عشان ماتعذبنا بالامتداد حقتكم دى 
يعنى الامتداد دى سكنا فيها قبالك
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: tarig alnour)
|
Quote: ومن اسماء اللعيبه البارزين الذين تخرجوا من هذه الرابطه عبدالرحمن الديرى النيل _سليمان تيه النيل _عباس جوليت النيل _بابكر عبود النيل
كمال عبد الغنى المريخ _صابون المريخ _ ادورد جلدو المريخ _خالد جوليت الهلال _نادر الاهلى _ النور الاهلى_مصطفى جندبه النيل
|
يا طارق مالك نسيت محمد عقيد ( الهلال ) - مربع 56
ناس (مصطفى جندبة) رحلوا الكلاكلة .. وهناك توفت والدتهم ( ست البنات ) رحمة الله عليها .. !
انداح ياخي واتكلم لينا عن رابطة اركويت دي ، وخاصة المباراة الكانت مع ناس رابطة القوز ولا الرميلة لا اذكر ؟!
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: طارق جبريل)
|
Quote: كدي بتكون كملت شوارع اركويت كلهن يا ود خيري
خلاص ارشفوا البوست علي كدة |
يا ود جبرين ... يا ود مربع تلاتة ... ارعى بقيدك وهوي وتاني هووي..
انت موووش ياكا الكانن ( بنات القرى ) بغنن ليك ...
نور بيتنا وشارع بيتنا ..
يا الهليت فرحت قلوبنا ..
واطريتنا الليلة وجيتا
كنا فرشنا السكة ورود
لو كلمتنا كان بالجية
خطوة عزيزة
ويوم موعود الخلاك
تطرانا شوية
تسال فينا وتجي حارتنا
ودابا الفرحة الليلة غشتنا
الحظ الجانا
غشى سكتنا
جانا وجابك لينا
هدية
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
يا سلام يا محطة البلابل .. ويا سلام على وقفة المواصلات العجيبة ،
وفجاة تجيك حافلة فاضية وتملأ من المحطة دي .. ياسلام في اللحظة ديك الزول بحس ان الدنيا جميلة بشكل
كانو نزلت علينا لية القدر ... الزول لحظتها بنسى الوقفة الطويلة ... والشرة
تلاقى الواحد مما يلم ليه في حديدة مقعد بالحافلة يشيل نفس عميق ويفرح فرح طفولي !
اها مطعم هابي تايم دا مطعم ليهو تاريخ طوويل ..
وخاصة في رمضان المطعم الوحيد البكون شغال شغل جد خاصة قبل رمضان بيوم بكوون شغال لغاية صلاة الصبح
وتاني من المغرب لغاية السحور ..وعندهم فووول كدا عجيب ... !
الصورة دي يا مزمل شكلها كانت ايام العطلة لان مستحيل البلابل تكون فاضية كدا ، فهي زحمة في اي وقت !
وحتى معدات الصنايعية ما كتيرة زي المعتاد ..
شايفة كوريك واحد بس ..
لان المحطة دي فيها كهربجية وسباكين وبنايين ومختلف المهن العمالية وبكون راصييين معداتهم فوق الرصيف دا !
ما زلنا نريد المزيد من الصور .. يا مزمل ...
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
العزيزة سمرية..
شكري للتداعي الشاعري مع المكان..
له قصة غريبة، ولا غريب في بلدي، من حيث الطبية الفطرية..
اذكر عام 1994، وأتذكره بكأس العالم في امريكا..
ذهبت للسؤال عن قريبة لنا، اسمها سعاد، تسمى "القماية"، وهي تسكن محطة البلابل، شرق، يعني كأنك ماشى للقلب المفتوح حاليا
المهم بحثت البيت ولم اجده، ولم يكن زمنها في موبايل، أو حتى تلفون..
وتأخر الوقت، وكنت ناوي أرجع لبري، "ناصر"، لبيت اخي، وكنت ماشي لشارع الزلط، فسمعت نداء خلفي "يالودي ماشي وين بالليل ده)، ولم اكن تصور ان الليل جرى لهذه الدرجة، لأني حضرت مبارة في كافتريا، اظنها بين رومانيا، وفريق أ خر، بكأس العالم..
المهم نظرت خلفي لأجد أمرأة وأختها، وقالو لي يا ولدي تمشي كيف مع قانون الطوارئ، وهسي محطة البلابل دي كل يوم كاشين الناس والاولاد، والله ما بنخيلك تمشي، وبالفعل تعطلت حركة المرور، واحتل العسكر الشارع..
وفعلا الجيش احتل شارع الزلط، فقد كانت الطوارئ في قمة عنفها، وانا لا املك بطاقة، ولا اي شئ،
فأصرت المرأة واختها ان أمشي معهم البيت، لأنو مافي مواصلات بعد ده..
ومشيت معاهم البيت، وياله من كرم واستقبال من ابنائها، حسن وحسين، وونسة، وكأس عالم، وقزازة "ميرندا"، أذكرها ليوم الناس هذا..
وليوم الناس هذا، علاقتي بهم، أكثر من أهل..
وبيني وبينك، أحلى نومه في عراء الحوش، وونسة صباحية، كانت بأركويت، ومع أناس، كأني اعرفهم منذ الست بربكم..
هناك كتاب اسمه "كل شئ ممكن بالسودان"، وهو كذلك..
شكر للتداعي، الجميل..
....
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: عبدالغني كرم الله)
|
يا عبد الغني ..
سلامات .. والله حكايتك .. حكاية اغرب من الخيال ... !
بالله شوف كرم ونبل الاسر السودانية دي ؟
هسي والله مستحيل زول يعمل كدا ..
لانه الاحساس بالآمان اختفى خالص ..
غايتو ناس حسن وحسين ديل ...
يخيل لي انك قاصد التؤام اولاد العميد معاش عبد الحميد محمود نصر وزوجته الفاضلة نور ..
لانه بيتهم فاتح على شارع الزلط الجاي من البلال .. واظن ياهو دا وصفك ذاتو
عبد الحميد دا بيتهم الكبير في مربع 56 .. .. وانا كنت بتذكر حسن وحسين ديل شديد ..
لانه عمتهم ماما سيدة كانت عندها روضة في بيتها ..
وكنا بنجي الروضة .. وكان حسن وحسين بعملوا الاراقوز .. بعد ان يختبئا في البلاعة الموجودة في الحوش .. !
ياخي كنت بحب الاراقوز دا جنس حب .. ولما ارجع كنت بقلد الاصوات والحركات ..
ازيكم يا اسحاب .. يا حلوووين ..!
ما عارفة مرت كم سنة لا شووفت ماما سيدة لا ماما سهير .. ولا حتى حسن وحسين ؟
والله رجعتني لايام سمحة وبيضا خلاص ...
تحياتي لهم .. وان لم اكن متاكدة بعد ..
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
العزيزة سمرية
تحياتي
ودخولي لحجز مساحة خاصة بمربع 65 اركويت
وكل اركويت 68 و 50 و 54 وشلة جميلة وذكريات
لا تبارح يومي عموماً سأعود للبوست الرائع
وصدقيني كم هممت لكتابة عن مربع 65 لكنك مشكورة
وقد وسعتي المساحة لكل اركويت الجمال والروعة .
لربما اعتبر نفسي مرجع في اركويت ونشوف ... محمد ابراهيم بتاع 50 دا لا بد واكون بعرفك .
....................................................حجر.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
تحية طيبة يا سمريه
والقدال بيقول سمحه وسمرية ولفتاته غزال
اول مرة اشاهد هذا الخيط الجميل وافتكرت اركويت الشرق لاني امني النفس بزيارتها
انا سكنت بمربع 43 وكانت ايام جميلة البيت الكورنه بتاع حاجه مدينه تلك المراة المدينة والمدنية السمات
وتحاومنا في مربع 46 و45 ولي خالتي بيتها جوار مسجد ابو بكر الصديق او عمر بن الخطاب تشابه علي الاسماء زي التيمان
المهم البيت في 47 و48 اذهب اليها قليلا لانها كانت بالنسبة لنا خلا وتجلب المشاكل
43 بالقرب من المدرسة ال شرقها الكهرباء
و47 بالقرب من بيارة المويه والمسجد وزوج خالتي برضو يحتاج الكتابة فهو ليس مثل حاجه مدينه بل نقيضها وهو طبيب في تلك الحته
لكن جميل ان تنزل في اربعه او الخيمه الان اشرب فيها شاي صباح مع محاولة لتذكر الماضي البعيد بس صعبه جدا
ومعاوية ولفة جوبا سوف تكون لفة جوبا حتي ولو انفصل الوطن الجميل
والشرقي توجد في ركنه مكتبة كنت اشتري منها الجرائد
بس ضعيف في اركويت شرق الظلط من الشرقي والي لفة جوبا صلاتي بها ضعيفة
بجيك تاني لك التحية والاجلال
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: بكري عباس علي)
|
| Quote: لم اسكن اركويت ولكن احببت ناس اركويت وصادقت ناس اركويت الي ان اصابتني واحدة من بنات اركويت اصابة محكمة ادت الي زواجي منها |
ناس اركويت بتحبوا ، يخشو للزول في قلبو .. شووفت كيف يا بكري .. ؟!
ازيك يابكري .. ومنور بوست اركويت .. والتحية لبت اركويت الخطفتك .. ويعلم الله بنات اركويت كانوا مثال للبت السودانية الاصيلة ..!
تحياتنا ليها .. بالله .. !
Quote: ويوم حادث الطيارة بتاعت مربع 66 (بت عمي الكبيرة خوافة شديد لما سمعت بالخبر جكة واحدة من اركويت لغاية اخر الصحافة بدون توقف )
|
اليوم داك اظن في ناس كتار جروا .. اولا صوت الوقعة كان مخيف عديل كدا ، دا غير منظر النار كان مؤثر برضو ..
الله يرحم ضحايا تلك الطائرة .. !
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: tarig alnour)
|
يا طارق ..
ناس المرحوم مختار شمت ديل جيراننا عديل كدا واصحابنا .. وزوجته الست ( عائشة شرفي )
وبيتهم فاتح في شارع الردمية الفاصل بين مربع 54 و56 ... وجمبهم ناس علوية بت الجيلي !
بنات شمت ديل اشتهروا بالشطارة ... اسماء دكتورة وزينب مهندسة ... وكلهم ما شاء الله متفوقين شديد .. !
بالمناسبة زواج امال الفاضل وصديق كان يستحق ود اللمين فعلا ، وقصة خطوبتهم المشهورة ..
والتي امتدت لسنوات .. والزواج كان بعد عودة الجار والخطيب صديق من اليابان.. !
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: وجدان جمال)
|
وجدان .. سلامات ...
مرحب بيك معانا في بوست مديتنا الجميلة اركويت ..
| Quote: غايتو انا حجزت لوج ذى مابقولوا .. لوووول |
تحجزي كدا سااي بدون ما نعرف الجابك شنو بشارع اركويت دا ؟
اركويتية ولا .... ولا اعجاب ساي لله والرسول ؟؟
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: على محمد الخير)
|
Quote: واليوم اصبحت اركويت مكانا مطلوبا لمثل هذه المعالم الحضارية بل ازدادت عليها الفنادق الضخمة
والمؤسسات المالية المرموقة واضخم مطاعم العاصمة اصبحت تسعى ان يكون لها موضع قدم فى اركويت |
فعلا يا علي اركويت ، اصبحت مدينة كاملة الاهلية ، وناس اركويت صبروا .. صبر كبير لغاية ما ربنا فرجها عليهم من اوسع ابوابه ..
وبعد ان ارتفعت اسعار الاراضي والبيوت في اركويت ، باع الكثير من سكانها اصحاب الدخل المتدني بيوتهم فيها ،
وغادروها الى مناطق اخرى .. !
| Quote: ومن هذه المؤسسات مبنى الامم المتحدة بمربع 68 والذى اضاف لمسه معمارية مميزة لمدينة اركويت.. |
ومقابل لهذا المبني مباشرة مكتب الحركة الشعبية قطاع الشمال
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: tarig alnour)
|
Quote:
طبعا يا سمريه انتى مش خشيتى الحله وبس لكن خشيتى البيت عديل كده والعرس الحضرتيهو كان عرس امال الفاضل وصديق احمد شرفى
اما خالتى العينه فدى زوجة عم على وام ياسر ومحمد ودكتوره اميره وفايزه ...واستاذه مريم بله ا(لله يديها الصحه والعافيه ) دى
والدتى وبالمناسبه هى شخصيه ومعلم بارز من معالم اركويت لانها درست فى كافة مدارس اركويت حتى مدرسة اركويت جنوب الفى حلة
ناس مزمل خيرى ..اما المصريه الخياطه فهى سيده (رحمها الله )والدة غريب (رحمه الله ) وعادل وعفاف وامل وعايده |
مرحب بيك يا طارق في بوست اركويت ..
وطبعا البوست دا ملك عام .. وتعال احكي لينا كل ذكرياتك .. في اركويت وخاصة مربع 50
معقولة يا طارق انت والدتك ، أستاذة مريم ، يا سلام بالله تحياتي ليها ، ياخي انا بيتكم دا جيتو كتير خلاص ..
وبمناسبة عيد الام بلغها التهاني القلبية الصادقة وكل سنة وهي طيبة .. وربنا يحفظ جميع الامهات ، والرحمة والمغفرة لمن غادرن الى جنات الجلد !
ايوة ايوة زواج امال الفاضل .. وصديق احمد شرفي ... يا سلام زمن كان ابيض والله !
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
مزمل يا خيري .. صباحك نور وصباح اركويت الطيب..
بالمناسبة اسم _ جوان .. جميل جدا
بالله دي مدرسة خالد بن الوليد ، سبحان الله مناطق اركويت دي بتتشابه شبه جميل خلاص ..
هسي انا افتكرت انها دي مدرسة ام عطية الانصارية .. دا اسمها الحالي زمان كان اسمها مدرسة اركويت شرق الابتدائية بنات ..
ويا سلام على الميدان دا ، ياما جيت مارة بين العراضة والمدرسة ، ياما جيت ماشة وقت العصرية ازور صحبتي كانت ساكنة مربع 61 ..
وكنت بخاف من المعاكسات شديد خاصة لما اكون ماشة برااي ، وبخاف اكتر الكورة تضربني ... !
موووش بيت ناس ( سلاوي ) قريب من الحتة دي ولا انا (خلطانة ) ؟
يا مزمل .. شكرا على الصور الجميلة ... ومجهود جبار منك .. التحية ليك
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: سمرية)
|
Quote: بالمناسبة اسم _ جوان .. جميل جدا
|
شكراُ.. بالمناسبة اسم جوان بتى اختارتو زميلتنا فى البورد داليا حافظ
اتمنى انها تكون بخير ..
| Quote: موووش بيت ناس ( سلاوي ) قريب من الحتة دي ولا انا (خلطانة ) ؟ |
خلطانة طبعاُ.. لو قصدك بيت السلاوى الكبير فى مربع 61 فاتح على مربع 59 .. اما بيت عبدالرحمن
سلاوى فهو فى المعمورة فاتح فى الشارع الرئيسى مابعيد خالص من الحتة دى ..!
| |
|
|
|
|
|
|
|
|
 Re: عن حبيبتي ( أركويت ) بحكي ليكم ... (Re: مزمل خيرى)
|
شريككم يا سمرية ومزمل فى رحاب أركويت ويا سلام عليكم.
بالذات مربع 68.
بجيكم بخواطر مبعثرة فى حالة إلى لم شمل لتكوين محبة لأركويت.
____________
بالمناسبة يا ود جبرين ... ناس الإمتداد كنا بنمشى ومنصة الإنطلاق كانت أركويت
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: شول اشوانق دينق)
|
Quote: طارق جبريل ,,, سلامات.
يا أخي في زول بزعل من روحه, وانت شبه زعل
يا أخي طلتك تزين البوست وتزيده حلاوة وحاتك
المنبر من غيرك ماله طعم, ما تغيب يا جميل. |
حبيبنا استاذ سيف
الله يجبر بي خاطرك ياخي
ناس اركويت ديل ليهم معزة خاصة عندنا
يا مزمل خيري
انت ولد امبارح ساكت
انا بقول ليك انا دة اتولدت في الامتداد شفتة كيف
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: طارق جبريل)
|
Quote: يا مزمل خيري
انت ولد امبارح ساكت
انا بقول ليك انا دة اتولدت في الامتداد شفتة كيف |
هى الامتداد عملوها متين لمن تتولد فيها.؟؟
ياخ نحن زمان من اركويت كنا بنشوف البراميل مرصوصة فى الامتداد
دى كانت سهلة سااااكت ، تقول لى اتولدت فيها.؟ 
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: طارق جبريل)
|
Quote:
واختك دي اكيد انا بعرفها ، لان البيت الوصفتو دا انا جيت فيه كتير .
واظن البيت دا بيت ناس رفيعة ومكة مووش؟
وملاصقين بالحيطة لناس حواء خليفة ؟!
|
الأخوات مكة ورفيعة ديل بنات خادم اللة وهم كانوا جيران اختي بالحيطة من الناحية الشمالية وأختي كان اسمها (ليلي عيسي) دنقلاوية مشلخة واولادها طارق ومجدي ومامون وكان بناتها صغار شوية الوقت دالك رحاب ومروة وفعلا بيتهم كان فاتح في الشارع العامل U والناس كانوا في قمة الترابط
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: سيف الدولة كامل)
|
تعرفي يا سمرية سمير وصفاء عشرة طويلة جدا
سمير ود حلتنا من الخرطوم غرب ووالده عمنا
عبد اللطيف عبد الرحمن شاعر منقو قل لاعاش
من يفصلناوأمير أخوة الاكبر ثم صديقنا وزميلنا
الاستاذ عبد الرحمن شقيقهم الاكبر, أما صفاء
منذ ان كانت في الابتدائي لم تغيب عن بيتنا يوم
وصديقة أختي الصغيرة رجاء كامل. واختها انصاف
وأمهم ست البنات الان مقيمين في الازهري .
أما الولد طارق جبريل يا سمرية فهو تلميذي
درسته في الخرطوم الجديدة الثانوية وعنده
صولات وجولات مع بنات الخرطوم الجديدة يعني
من زمان بحب الجكس ود مسنووووووووووووووح.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: سيف الدولة كامل)
|
Quote: تعرفي يا سمرية سمير وصفاء عشرة طويلة جدا
سمير ود حلتنا من الخرطوم غرب ووالده عمنا
عبد اللطيف عبد الرحمن شاعر منقو قل لاعاش
من يفصلناوأمير أخوة الاكبر ثم صديقنا وزميلنا
الاستاذ عبد الرحمن شقيقهم الاكبر, أما صفاء
منذ ان كانت في الابتدائي لم تغيب عن بيتنا يوم
وصديقة أختي الصغيرة رجاء كامل. واختها انصاف
وأمهم ست البنات الان مقيمين في الازهري .
|
ما شاء الله يا سيف ، طلعتوا اهل عديل ...
انا لي زمن ما لاقيت زول منهم ...
بالله تحياتي ليهم وخاصة سمير وصفاء .. !
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: سيف الدولة كامل)
|
Quote:
كوشة الجبل كانت جنوب الصحافة
المنطقة الفيها السوق المركزي
وانت ماشي جنوب تجاه الازهري .
|
بقي تعرف ياعزيزي سيف الدولة الصحافة دي حقتنا جابوا ليها خلاصة الجنس البشري لقطوا لقيط من السجانة والديم والحلة الجديدة والباقي تموا من الأمتداد..
كوشة الجبل كانت بالفعل اقصي جنوب الصحافة في المنطقة المتاخمة للسكة الحديد وجنب الحزام الأخضر
وربما كنت تقصد السوق المحلي بدلا عن السوق المركزي لان السوق المركزي في الناحية الجنوبية الشرقية من الصحافة بينما الكوشة كانت تقع في الناحية الغربية من منطقة السوق المحلي حيث يتم الوصول الية بشارع الصحافة زلط بينما السوق المركزي يتم الوصول الية بشارع الصحافةشرق( محمد نجيب) وشارع مدني
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: محمد عيسي محمد)
|
Quote: الأخوات مكة ورفيعة ديل بنات خادم اللة وهم كانوا جيران اختي بالحيطة من الناحية الشمالية وأختي كان اسمها (ليلي عيسي)
دنقلاوية مشلخة واولادها طارق ومجدي ومامون وكان بناتها صغار شوية الوقت دالك رحاب ومروة
وفعلا بيتهم كان فاتح في الشارع العامل U والناس كانوا في قمة الترابط
|
يا محمد عيسي ، سلامات والله اختك ليلى ما قدرت اتذكرها خالص ، ما عارفة ليه ؟
عموما انا ناس الحتة دي ما كنت بعرفهم كلهم .. الا بعض البيوت زي ناس محمد بشارة ..
لان زوجته الله يرحمها ( ليلي السيد ) قربيتنا وعمتنا في الحساب ..
تحياتي لاختك ليلي واولادها ولناس الصحافة كلهم ..
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
من الاشياء الخلتني اجي اركويت كتير انو قريبي عادل عرق كان عنده موتر وطبعا انا بحب الحاجات دي شديد وكنتا طوالي خميس جمعة معاهم ولف ودوران في اركويت كلها شارع شارع واذكر كنت بتعلم السواقة في الميدان المواجه لمحطة الخيمة حاليا شايف سوروه وعايزين يعملوه شنو ما عارف
ايام جميلة
مزمل تسلم علي الصورة الجميلة
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
بالضبط يا محمد عيسي نسيت اسم السوق المحلي
كنت عاوز أكتب السوق العربي سابقا لانه أساسا
السوق المحلي كان تعويض لاصحاب دكاكين السوق
العربي.. تعرف يا محمد عيسي كنا زمان نمشي
نصيد السمك من ترعة الجزام الاخضر بلطي تمام.
وفعلا الامتداد والصحافة وأركويت معظم السكان
كانوا في الخرطوم وسط وتلاتة والسكة حديد والسجانة
والديوم الشرقية والغربية. لذلك كان هنالك أنسجام تام
فيما بينهم بحكم المعرفة والعلاقة السابقة.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: سيف الدولة كامل)
|
Quote:
وصديقة أختي الصغيرة رجاء كامل. واختها انصاف
وأمهم ست البنات |
استاذ سيف يديك العافيه انا حلتكم دى معرس منها واختك رجاء هى صديقه لاسرة المدام اميره حمزه واشراقه واسراء وامهم فوزيه
ووالدهم حمزه عبيد الله وبيتهم شرق المجلس ( مدرسة البيلى على ما اعتقد ) وشرق دكان عبد المحمود طبعا هم الان رحلو الازهرى
مربع 61 هو من المربعات الكبيره يحده من ناحية الشرق مربع 59 ومن ناحية الشمال شارع الفردوس بامتداد مربع 56 و54
اما من ناحية الغرب فشارع عبيد ختم من محطة البلابل وحتى محطة معاويه على مااعتقد اما من الناحيه الجنوبيه فمربع 63
وبالمربع اقدم الافران البلديه باركويت فرن محمد المكسر ومن الاسماء التى اذكرها من شباب الحى فى الثمانينات صابر سلا وحاتم منقه
والمرحوم خضر وياسر وصلاح احمد الخضر ودكتور الصادق ومولانا طارق ابن المرحوم استاذ معتصم
وبالمناسبه لقد شاركت فى نهاية الثمانينات فى كورس لطلبة الشهاده المتوسطه والثانويه فى مدرسة البيلى ضم طلبة مربع 61 و63 و59 ومربعات
اخرى ....غايتو ايام لها ايقاع
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: tarig alnour)
|
Quote: استاذ سيف يديك العافيه انا حلتكم دى معرس منها واختك رجاء هى صديقه لاسرة المدام اميره حمزه واشراقه واسراء وامهم فوزيه
ووالدهم حمزه عبيد الله وبيتهم شرق المجلس ( مدرسة البيلى على ما اعتقد ) وشرق دكان عبد المحمود طبعا هم الان رحلو الازهرى
|
طارق بالله متزوج اخت ناس النذير ومحمد حمزة ؟؟
النذير فى الشرطة الامنية تقريباُ .. بس محمد سمعت زمان انو سافر المغرب
قبل سنوات يدرس فقه،، اخباروا شنو عليك الله .؟
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
Quote:
طارق بالله متزوج اخت ناس النذير ومحمد حمزة ؟؟
النذير فى الشرطة الامنية تقريباُ .. بس محمد سمعت زمان انو سافر المغرب
قبل سنوات يدرس فقه،، اخباروا شنو عليك الله .؟ |
مزمل يا جميل
ايوه انا متزوج من اميره ...والنزير لازال فى الامنيه اما محمد فرجع السودان قبل عامين واستقر واتزوج وهو الان يسكن
الحاج يوسف
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: سيف الدولة كامل)
|
Quote: أما الولد طارق جبريل يا سمرية فهو تلميذي
درسته في الخرطوم الجديدة الثانوية وعنده
صولات وجولات مع بنات الخرطوم الجديدة يعني
من زمان بحب الجكس ود مسنووووووووووووووح.
|
استاذ سيف ياخي اشانة السمعة دي لي شنو
بعدين يا حبيب نحن ارشفنا خمسة بوستات قبل دة
ارجع مكتبتي تلقى صور الامتداد بالكوم
| |
|
|
|
|
|
|
|
|
 Re: عن حبيبتي ( أركويت ) بحكي ليكم ... (Re: سيف الدولة كامل)
|
بسم الله الرحمن الرحيم
الأخت السمرية
الوفاء من شيم الكرام ،،، لم أكن لأنتبه للبوست إلا نبهني هشام عبدالرحيم
وقال هاتفه الباشمهندس بهاء الدين عبدالقادر ( رابطة جامعة الخرطوم )
وسألني عن البوست ، ولم أستطيع الإجابة ووعدته بدخول البوست ومعرفة كاتبة
البوست ، وسألوا حسام عدالرحيم مَنْ تكون سمرية ؟!
خلاصة الأمر هم برؤك السلام ، وتحية ملؤها التقدير ووافر الإحترام !
بهاء الدين بالمملكة العربية السعودية، وهشام موجود بالسودان ، وكذا هيثم
وحسام الجميع بخير ،،،
أركويت هي منطقة في الخاطر والفؤاد !
محبتي .....
وصال عالم
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: وصال عالم)
|
Quote:
ناس المرحوم مختار شمت ديل جيراننا عديل كدا واصحابن |
يا سمرية ناس مختار شمت ديل من افاضل الناس وابنهم شمت رحمة الله عليه زآملته فى مصر ايام الجامعه كان يسبقنى بعدة اعوام
وهم فعلا تميزوا بالشطاره والادب والزوق وحسن المعشر....
الوالده ابلغتها تحياتك وهى تغريك مثلها
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: وصال عالم)
|
هلا والله بــ وصال عالم .. ومرحب بيك في رحاب اركويت وذكرياتها العطرة ..
بالله ما عرفوني ؟
ياخي انا كنت معاهم في الرابطة دي ،
ومرات الاجتماعات كانت قاعدة تكون في بيتنا في مربع 56 جمب المدرسة حقت البنات
، او في بيت ناس بهاء الدين .. والاجتماع في حوش بيتهم العامر ..
كنت السكرتير الاعلامي للرابطة ، خريجة اسكول .. !
بالله حتى حسام ما عرفني ؟!
غريبة والله .. الظاهر ركزتو مع الصورة شديد ( قرقرقر )
للاحتياطي كدا ، اسمي هبة عثمان
تحياتي للعزيز بهاء الدين ولهشام وحسام وكل ناس الرابطة .. !
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
كدي يا مزمل وضح لي الحتة دي ، هي لفة جوبا .. دي
على جهة اليمين من عبيد ختم وانت جاي من محطة معاوية ، ولا الجهة التانية وانت داخل المعمورة ؟
لانه لفة جوبا حسب علمي هي اللفة التي كانت تدخل عبرها مواصلات اركويت وحتى المحطة الاخيرة ..
جمب جامع عمر بن الخطاب ... اي على الناحية الغربية للشارع
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: سمرية)
|
الأخوان الاعزاء اولاد اركويت
سلام
مدينتنا الجميلة اركويت نحبها من قبل دخول الكهرباء وناس اركويت الطيبين ، بدايتنا كانت في السجانة مع الاخوان اولاد الصول عوض عليه رحمة الله نزار وحافظ وشوقي وجينا لاركويت الجميلة في مربع 46 بالقرب من مسجد سيدنا عمر بن الخطاب رضى الله عنه ولدي اصدقاء من جميع المربعات ففي 63 الاخوان الجيلي عوض الان في السلمة
وخواجة واولاد السرة علاء وعصام وسعيد ايوب ، ومدرسة جنوب كنا بنعمل فيها الكورس الصيفي لرابطة طلاب اركويت بجامعة القارة الفرع
ومربع 68 الاخوان عبد السلام سليمان وجمال مصطفي ومحمد فتحي وحافظ محمود وشقيقه وليد ونادر ونصر الدين جبارة وياسر بشير ونمشي
مربع 50 الاخوان حمدي ادريس لاعب اشبال المريخ ومنير كرنديس ومجدي عبد العاطي ومحمد عثمان وشاكر الطيب وعصام عبد الوهاب ومربع 54
الاخوان بدر زيادة وطارق الباشا وطارق حبايه ومربع 66 الاخوان عادل خضر والمدني حجر وابازر الباجوري ونرجع مربع 45 شارع افريقيا
الاخوان الاعزاء جدا نصر الدين قرض وطارق حلاوة وكمال حمودة وجقود وحامد ميرف وسعادة النقيب مضوي ومربع 48 اسامة حماد واولاد عمنا الصول وخالد منتاربو وشقيقه الشيخ صلاح جيرانا حاليا ومربع 47 صديقي خالد اوشي والكثير من الاخوان يا سلام على اركويت وناس اركويت
والله الواحد مشتاق لاركويت شوق ما عادي فلكل اهل اركويت الطيبين التحية والاحترام والله دا اجمل بوست لانه بيتكلم عن مدينتنا التي نحبها
وعن ناس جيران واخوان وزملاء دراسة نحبهم ونحترمهم .
بعدين يا جماعة براحة على اخونا طارق جبريل برضو ناس الامتداد جيران عزاز علينا وطارق دا بيشبه اركويت لذلك حا نعمل ليهو انتساب
اكيد الان انت مبسوط يا طارق انتساب في اركويت حظك .
بوست جميل وياريت يتواصل
أبو كريم
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الفاتح خليل الفكي)
|
اخونا فى الله ابو كريم
شفتا اركويت دى جميلة كيف وبتلم كل الناس - وبتلقى انك بتعرف الناس حتى لو ماقابلتهم
اها بالنسبة لناسنا وحبايبنا فى اركويت - فااولاد كرنديس ماشاء الله عليهم - اغتربو كلهم خارج البلد ومن زمن كمان - ووالدهم عمك كرنديس راجل فاضل وزول كريم.
مجدى عبدالعاطى جارى بالحيطة لزم - اتوفت زوجتو منذ فترة فليها الرحمة والمغفرة - لكنو تمام وشاقى طريقو مية المية.
لو داير بلز ليكم تلفونات الاخوة الطيبين ديل فى المسنجر الداخلى.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الفاتح خليل الفكي)
|
ابوكريم ..
Quote: الاخوان الجيلي عوض الان في السلمة
|
الجيلى عوض مرسال المحامى الراجل دا اتربينا سوا فى اركويت وفعلاً رحلوا السلمة قبل سنوات ..
| Quote: واولاد السرة علاء وعصام وسعيد ايوب |
علاء الدين محمد يوسف المشهور بعلاء ود السرة موجود فى الخرطوم وطبعا اتزوج قبل فترة
وعصام فى المملكة السعودية..
وسعيد ايوب الرجل الفنان ايضا موجود فى الخرطوم ،، تتخيل سعيد اخد شهادتو بتاعت الحقوق
وختاها فى الدولاب ومشى اشتغل شغل حر .!
دا طبعا بتكون عارف هو وين .!
الاستاذ محمد فتحى حلفاوى ايضا مازال يدرس فى المدارس الخاصة وهو لسع ساكن فى المربع ..
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
..
مدرسة اركويت القديمة المتوسطة بنين ( مدرسة البيلى ) ..
والله المدرسة دى بنيناها طوبة طوبة ، وناظرنا استاذ البيلى
كان يجبر الطلبة انهم كل سبت قبل الطابور الواحد يجيب معاهو طوبة .!!
ايوة والله طوبة .!
دا كلو عشان نقدر نتم باقى الفصول والسور الخارجى ..
هسع بقت مدرسة اساس للبنات والجزء الشمالى من المدرسة قاعدين
فيهو ناس المحلية (وحدة اركويت الادارية)..
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
(13)
كانت امي تهتم كثيرا، باقامة حفلات العيد ميلاد لي ولاخواني في حوشنا الكبير ،
واذكر من خلال الصور التي لا زلنا نحتفظ بها ان امي كانت بتعزم الحلة كلها لعيد الميلاد ،
لانني كنت ارى في الصور جيران وشخصيات حاليأ ، ما متذكرة آخر مرة شوفتهم متين ؟
اها العيد ميلاد كان بكون العصر ولا شنو ما بعرف ؟
لانه طبعا ما كان في كهربا خالص ، معليش رجعتكم تاني للعصر الحجري حق اركويت ،
بس اسوي شنو ادي ذاكرتي وادي حكمها ، اها بتذكر امي كانت بتخت تربيزا طويلة كدا ،
وبتفرش عليها مفرش جديد وبترص الحاجات في التربيزا موز وبرتكان وجوافة ومنقة ،
وكيك .. ولغاية هسي بتذكر صيينة الكيك حقت امي العندها غطاء ،
كانت مدورة ومخرومة من النص وكانت بتختها في الكانون وتخت فوق الغطاء
حقها شوية جمر عشان تستوي فوق وتحت !
الكيك كان بطلع رهيب ولونو اصفر ، يا سلاااااااام !
اها الجيران ديل كانوا بتلمو حتى الما معزومين كانوا بجو ،
وبتذكر مرة ابوي جاب فنان بعزف بالاروغن والناس دي رقصت وهيصت شديد !
التورتة حقت العيد ميلاد ، طبعا جمبنا ما كان في محل تورتات لا حاجة ولا حتى الخرطوم
كلها ما اظن في ولا حصل يوم شووفت دكان قاعد يبيع تورتات ،
قام ابوي جابا لينا من الفندق الكبير وانا كنت قايلة التورتات دي ما بجيبوها الا من الفنادق ..
ومرة كمان قال كلم ناس فندق الهيلتون يعملوها لينا ،
قام مشي دفع القروش وقالوا ليه تعال بعدين شيلها ..
لما ابوي جاب التورتة .. طلعت احلى من حقت الفندق الكبير ،
و كانت كبيرة ، بس ما عارفها كفت الناس دي كلها كيف ؟
ولا اتذكرت ما كانوا بقطعوها ، عشان يمشوا بيها الصورة تاني يوم !
وتاني بعد كبرنا شووية كان في حفلة بصيوان في الشارع وجابوا فنان كبير ما بعرفو منو ،
وكراسي كتيرة .. وشغلو الجنرتير عشان اللمبات تنور ..
وجابوا ناس كدا راكبين حصين رقصوا بالحصين حقاتهم ..
واخوي كان راكب معاهو فوق .. الحصان طوووويل ما زي الحصان بتاع الكارو ..
كرعينو كانت طووال والناس الراكبين فيه قاعدين فوق ..
والحصان ذاتوو لونو أحمممر ونضيف ،
بعد داااك جوا بواليس لكن ما زي البواليس البجيبوهم في التلفزيون ..
بس ديل شايلين حاجات زي حقات الفنانين .. وبعملوا الموسيقى ..
وكان صوتها كبير .. الناس كلها جات بيتنا .. وناس امي عملوا اكل كتير ..
اخوي كان شايل سيف زي حق ناس
مسلسل ( حمدة وفواز ) .. ولابس الجلابية الجديدة ..
والشبشب الاسود الجديد .. ورابطين ليهو حاجة حمرا في رأسو .. وحننو ليه كرعينو !
اها الحفلات دي كانت كتيرة خلاص عندنا ، العجب حفلات رأس السنة ..
ناس بيتنا كانوا طوالي بعملوا الحفلة حقت رأس السنة في الصالون حقنا ،
وابوي بشغل المسجل الكبير ابو سماعات ، وبس ما كان كل الناس بجوا عندنا ،
شوية الوقت داك بعد دخول الكهربا الناس اتلمت في بيوتها ،
وصوت التلفزيونات خلاهم ما بسمعوا اصوات الحفلات الصغيرة الزي دي !
اها الحفلة كانت بتكون فيها اصحاب امي وابوي وبعض الجيران وبنات اهلنا اولادهم ، ناس بالعدد !
وكنا نحن قاعدين وسط الناس دي ، لغاية ما نطفيء الشمعة حقت رأس السنة بعدين نمشي ننوم !
انا كنت بحب صباح اليوم دا ، لانه بكون اجازة طوالي ،
وبنلقى في التلاجة حاجات حلوة كتيرة .. وبنقعد ناكل ونأكل لغاية ما امي تصحا وتشالكنا !
ناس حلتنا كانوا بحبو يعملوا رحلات في اليوم دا ،
واتخيل لي الخرطوم كلها كانت بتطلع رحلات برضو ..
ودائما بسأل نفسي ، انه ليه نحنا السودانيين بتحب الرحلات دي بس ؟
ليه مافي برامج تانية غير الرحلات دي ..
السؤال دا طبعا خطر على بالي بتوقيت اللحظة دي ، يعني ما من زمان ،
ليه ما قاعدين نعرف نعمل برامج ولا مشاريع ترفييهة غير الرحلات دي .. !
( يتبع )
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: سمرية)
|
(14)
- ماعارفة متين تم انشاء زلط اركويت القاعدين يقولوا عليه عبيد ختم دا ،
اها شارع عبيد ختم دا فجاة بقى شارع عريض مليان عربات ،
اما شارع اركويت الحقيقي فهو الشارع الممتد من تقاطع المول حق عفراء ،
شفتو الهنا البقت فيهو اركويت ، اها الشارع دا في الناحية الشمالية منو تقع الساحة الخضراء ،
ودي موضوع حديثنا الليلة ، لاسباب كتيرة جدا ، ان الساحة دي جابت لينا الهوا ،
مما جاءت وبقت واقفة لينا زي الشوكة ، كيان اركويت اتشقلب ،
المواصلات كانت على قلتها مكفيانا ، بنط بالشبابيك ،
بنحجز بالشنط ، نمشي المحطة الاخيرة وتاني نرجع ..
المهم كنا نحمد الله ونشكره ، بعد الساحة دي جات ، المواصلات بقت زحمة شديدة ،
والرجلين كترت علينا ، اها فجاة كدي ناس الحكومة قالوا دايرين يعملوا الحتة دي ( شمال مدينة الطفل وعفرا مول )
حديقة ولا شنو كدي ما بعرفوا ، المهم قبال اي حاجة علقوا لافتة كبيرة مكتوب فيها الساحة الخضراء ..
اها بقينا كل مرة نجي مارين بالحتة دي نعاين في السور القاعدين يبنوا فيهو ..
وفي اللواري الواقفة وتنقل في التراب ، وفي الناس الشغالين ، وفي الزراعة القاعدة تنزرع !
- بعد ايام كدي ، شفنا العربات ملت الشوراع والضباط والعساكر ..
وخلق الله والرسول .. التقول القيامة دار تقوم .. اها ناس مربع 65 بختهم ..
يتفرجوا سااااي .. وقالوا يعلم الله ربحوا جنس ربح من الناس القاعدة تجي دي ..
واحدين ببيعوا الموية وواحدين الاسكريم .. قصدي الداندرمة ..
وواحدين عصير الكركدي بالجرادل .. وفي نسوان جهزن الساندويشات ..
وجرن بيها ... والحافلات دي تخم في الناس وتجيب ... والشارع اتقفل ..
وناس المرور ذاتهم احتاروا ... والعجب مواصلات اركويت في السوق العربي ..
انعدمت عديل ... الحافلة تجي مليانة فل تصل الساحة الخضرا ... وتقيف قبلها ..
لا قادرة ترجع لا قادرة تدخل لجوة !
- اليوم داااك فتحنا التلفزيون ، من الصباح .. بدري ..
عشان نشوف الخلق دي .. ونشوف معاهم الساحة الخضرا .. لغاية هسي انا ما عارفة كان في شنو ؟
- اها الساحة دي بقت طوالي بتكون مليانة بالناس وخاصة ناس الدفاع الشعبي ..
ومرات طلبة ومرات عساكر .. وبقى اي احتفال قاعد يكون في الساحة دي ..
ونفس البرنامج .. بيع الموية والعصير والساندويشات .. !
- استمر الحال دا فترة طويلة لغاية ما النجيلة حقت الساحة دي ..
حلفت تاني ما تقوم .. كل ما تجي تقوم .. يجوا يعفصوووها .. !
ونحنا ناس اركويت المساكين ديل ، ذنبنا شنو ؟
المواصلات بقت صعبة شديدة والتقاطع بتاع شارع افريقيا ( زلط مدني )
مع الشارع الداخل لغاية محطة الشرقي .. !
ودا برضو ما كفى ، لغاية ما فجاة بقى كمان عندنا حاجة اسمها مول عفرا ..
اها اليوم داك الناس جات من كل فج عميق عشان يشهدوا الحدث التاريخي دا ،
وصادف اني كنت جاية من مشوار في ناحية الديم ..
وفجاة نشوف ليك الناس جارية علينا والدخان حق البمبان وجنس جوطة عجيبة ..
سألنا في شنو ؟ قالوا دي مظاهرات ! سجمنا المظاهرات شنو بالليل دا ؟
قالوا عشان افتتاح المول ، وطيب الافتتاح بسوا ليهو مظاهرات ، قالوا الناس عشان حمووهم يدخلوا ويحضروا الافتتاح ..عملوا المظاهرات دي !
انا غايتو استغربت شديد واصلا كنت مستغربة من قصة المول دي ؟!
وليه يعني الناس مهتمة بالمول دا كدا ؟ ماهو في النهاية محل بيع وشراء ..
يعني القصص السمعتها قاعدة تحصل كدي بعد ما افتتحوا المول ..
قصص اصلو ما عادية .. البنات والمكياج الغريب .. والاولاد واللبس الاشتر ..
غايتو ما فهمت دا لبس حفلات ولا المول دا فيهو party ما عارفة ..
غايتو جنس رقيش وسكر سكر .. والشعور الملونة ... ياخي انا مرة مشيت ..
ما عرفت اتفرج على الناس ولا على المحلات !
اها الغريبة الحتة حقت المول دي كانت جزء من مدينة الطفل ،
فجأة كدا قاموا شالوا جزء من مدينة الطفل دي وادوها لناس المول ..
وتاني قطعوا منو حتة وادوها لناس فندق السلام روتانا ..
اها مدينة الطفل دي اول ما علموها ، طفل واحد كان بجي فيها مافي ...
ما بعرف سووها كيف كيف ؟؟
شيء جبال عالية .. وشيء هضاب .. وشيء بحيرة مليانة صفق شجر .. وشيء رملة ناعمة وشيء خيمة وشيء عنقاريب معلقة .. ..
وكل الناس اتنين اتنين .. لا في مرجيحة لا في مزلقانية .. غير حبال طويلة كدي ما بعرفها لشنو ؟
وحاجة طوووووووووووووويلة كدا قالوا بتسلقوووها ..
اها مدينة الطفل دي صمدت صممود غريب لغاية ما قدرت تطرد الاطفال الكبار ..
قصدي الكبار الما اطفال ديل .. وتغير برنامجها بما يناسب اطفالنا ..
ايوة فكرة الالعاب حقت الحبال والحاجات البتديك احساس ريفي دا ،
اظنو ما راق لناس كتيرة جابت اطفالها ، او ما فهمت القصد من الفكرة ..
عشان كدا طفشوا واصبح المكان مناسب .. ( للخلط )
طبعا نحن ديل ناس اركويت ما كنا بنقدر نخلط في الحتة دي لاسباب اظنها واضحة ،
لكن تعال شووف الناس الكانوا بجوا يخلطوا فيها .. من (سقط لقط ) !
شوية شوية شفنا حاجة قاعدين يبنوا فيها ، ناس قالوا مستشفى وناس قالوا جامعة وناس قالوا مدرسة ...
واصلوا مافي زول فكر انه دا ممكن يكون فندق ..
المهم فجأة لقينا حاجة كدا طوويلة مالية الفجة وقالوا اسمو فندق السلام روتانا ..
الفندق دا ذكرني بالفنادق القاعدة تكون مطلة على البحر في المصايف ،
عشان كدا بكون البناء حق الفندق يكون افقي عشان معظم الغرف يكون عندها view مع البحر ..
بس كونوا التصميم حق السلام روتانا يكون بالمنظر دا رغم انه المنطقة من حول الفندق ما جميلة عشان تتعمل للغرف view
عريض قدر دا ، غايتو السودان دا محير ، طيب ما دام كدا ما كان الفندق دا يكوون في شارع النيل محل الفيلل الرئاسية ديك ..
حتة هادئة والمنظر على النيل جميل اكيد بلا شك !
غايتو نحنا ناس اركويت ما استفدنا اي حاجة من الفندق دا غير الوجاهة بس ،
ومرات مرات كنا بنتمشى في الحتة دي قدام الفندق ..
نظام رياضة وكدا لغاية ما ظهر حرامي وخطف مطبقة صحبتنا الكانت ماشة معانا ... ومن ديك وعيييك !
( يتبع )
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
الاخوان / محمد ابراهيم ومزمل خيري
سلام
نعم اخي محمد لقد سمعت بوفاة زوجة الاخ مجدي فلها الرحمة والمغفرة وياريت لو عندك تلفون منير كرنديس سمعته قالوا سافر فرنسا
اخي مزمل خيري
الاخ الجيلاني عوض مرسال من اعز الاصدقاء وكنا دائما مع بعض وقبل الاغتراب دائما كنا نتقابل في دار المحامين وعندما انزل اجازة
طوالي بنتقابل وبمشي ليهم في منزلهم في السلمة وهم ناس طيبين طيبة ما عادية وعلاقتي بهم جميلة جدا واحبهم جدا بالله لو قابلت الزول دا
سلم عليهو ، وعصام ود السرة قابلته هنا في السعوية مرة عن طريق الصدفة بالله تحياتي للاخ الفنان سعيد ايوب فنان رابطة اركويت بالفرع
وتحيه لكل الاخوان بمربع 63 وياريت نتقابل في اجازتي سوف اسال عنك الجيلاني ونتقابل باذن الله .
عبد السلام اعرف اين هو الان واختار طريق صعب معانا لكن رغم كل شي هو صديق واخ عزيز جدا واهله ناس طيبين جدا اتمنى له دائما الخير
يا سلام والله حقيقة بوست رجع الواحد لايام وسنين جميلة جدا
والشكر للاخت سمرية على هذا البوست عن مدينتنا الجميلة اركويت
اخونا طارق بالله عليك اركويت موش جميلة وناس اركويت مش طيبين بيني وبينك ناس مزمل ديل ما يسمعوك
أبو كريم
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الفاتح خليل الفكي)
|
Quote:
ومربع 68 الاخوان عبد السلام سليمان وجمال مصطفي ومحمد فتحي وحافظ محمود وشقيقه وليد ونادر ونصر الدين جبارة وياسر بشير ونمشي
مربع 50 الاخوان حمدي ادريس لاعب اشبال المريخ ومنير كرنديس ومجدي عبد العاطي ومحمد عثمان وشاكر الطيب وعصام عبد الوهاب ومربع 54
الاخوان بدر زيادة وطارق الباشا وطارق حبايه ومربع 66 الاخوان عادل خضر والمدني حجر وابازر الباجوري ونرجع مربع 45 شارع افريقيا
الاخوان الاعزاء جدا نصر الدين قرض وطارق حلاوة وكمال حمودة وجقود وحامد ميرف وسعادة النقيب مضوي ومربع 48 |
يا سلام يا الفاتح اركويت كان بها الفه غريبه ومحبه عجيبه وكل البيوت فى كل المربعات بيوتك ومستحيل تركب بص المواصلات ما يقطعو
ليك التزكره او تقطع لغيرك ....انا بتذكر فى مربع 50 بين محطة اربعه والخيمه كان فى بص عمك محمد سعيد الشايقى رحمة الله عليه
ابص عمك ده كان كل موظفى وطلبة مربع 50 و54 و 66 و68 و65 بنتظروهو فدام الباب.. وقبل ما يدور البص دفره ..كان بدفسو البص
لمن ما يلقى زول يدفرو طبعا نص البص بركب ملح والنص التانى بقطع تزاكرهم الزول الراكب قدام وسبحان الله كل مره بدفع زول مختلف
هسى يالفاتح اخوى كل الذكرتهم ديل كانو معارف واصدقاء طبعا اولاد 68 ديل كان بلمهم فريق التضامن العريق وطبعا هذا الفريق من اقدم الفرق وكان
بضم نجوم لامعه ناس شاكر لاعب المورده ولؤى ونادر ونصر الدين جباره وود البنان وعصمت بابور ...واشتهر هذا الفريق بدق الحكام والفرق
المنافسه خاصة انو ميدان الرابطه كان فى حلتهم جنوب ميدانهم
اما اولاد 50 ديل فهم اولاد مربعنا ناس شاكر الطيب اخو التيمان ومجدى عبد العاطى وحمدى الحريف وطارق مختار وسيكا والخلوق المرحوم مرتضى
الحلفاوى وديل كان بلمهم فريق الهدف
اما اولاد 54 فريق الشفاته ناس طارق حبايه وجنابو عامر واستاذ عمر وطارق وعادل محمود وبرعى الكوتش واولاد الباشا وعصام الحارس ومجدى الحبشى
فديل كان بلمهم فريق المجد وطبعا ما حاانسى النصير واخوهو محمد عقيد لاعب الهلال
اما اولاد 66 ناس المدنى والاخوان طارق وياسر وحسن سليقه وعوض جاكوته فديل كان بلمهم فريق الوحده
اما اولاد 45 اهل الكفر ناس فريق سانتوس ناس حلاوه وقرض ووهبه ومجذوب على احمد واخرين لا اذكر اسمائهم
طبعا يالفاتح اكيد مادام صادقته وعاصرته هؤلاء فاكيد بكون بعرفك
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: tarig alnour)
|
| Quote: هسى يالفاتح اخوى كل الذكرتهم ديل كانو معارف واصدقاء طبعا اولاد 68 ديل كان بلمهم فريق التضامن العريق وطبعا هذا الفريق من اقدم الفرق وكان |
التضامن و لا النجوم يا طارق ؟؟ أعتقد النجوم
طبعاً الصور دي بالنسبة لي كأنها من كوكب تاني !!
أنا غايب من أركويت لي زي خمسة أو ست سنوات و ما عرفت أي حاجة بالذات محطة البلابل .. ياخ أنا لسه قايل الرواسي موجودة ؟؟
* عايز أترحم على روح صديقي و أخي و أفضل من أنجبته أركويت و مربع 68 الشهيد عمار أنور الحميدي ربنا يجعل الجنة مثواه
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: خالد عبد الله محمود)
|
Quote:
وتاني بعد كبرنا شووية كان في حفلة بصيوان في الشارع وجابوا فنان كبير ما بعرفو منو ،
وكراسي كتيرة .. وشغلو الجنرتير عشان اللمبات تنور ..
وجابوا ناس كدا راكبين حصين رقصوا بالحصين حقاتهم ..
واخوي كان راكب معاهو فوق .. الحصان طوووويل ما زي الحصان بتاع الكارو ..
|
دا كلوا في عيد الميلاد ياسمرية؟ فاتنا لكن مافي طريقة تعيديهوا لينا تاني؟
بالمناسبة البوست دا شايفوا حايم في سودانيز التانية ديك! من هسة بديتي تبيعي ولة شنو ؟
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: محمد عيسي محمد)
|
خالد عبدالله يديك العافيه ويرجعك لركويت بعد طول هذا الغياب طبعا اركويت اتغيرت كتير فى الفتره الاخيره
| Quote: التضامن و لا النجوم يا طارق ؟؟ أعتقد النجوم |
مربع 68 يضم الفريقين التضامن من الناحيه الشماليه والنجوم من الناحيه الجنوبيه بس التضامن اقدم
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: tarig alnour)
|
الاخ شول دينق
تحية اركويتية الهوى ،،
Quote: شريككم يا سمرية ومزمل فى رحاب أركويت ويا سلام عليكم.
بالذات مربع 68.
بجيكم بخواطر مبعثرة فى حالة إلى لم شمل لتكوين محبة لأركويت. |
اخى دينق ... كان فى حلتنا بقالة شهيرة عرفت باسم بقالة (دينق) بمربع 68 ... فهل لكم ارتباط بهذه البقالة؟؟ والتى على ما اذكر كانت فى فيلا سفير السودان برومانيا فى ذلك الوقت... ان لم تخنى ذاكرتى... وعلى سبيل ذكرى السفراء فقد احتضنت اركويت العديد من سفراء بلادى... وايضا يسكن بمربعنا البروفسير محمد احمد الشيخ مدير جامعة الخرطوم وذلك على بعد خطوات من بقالة دينق التى اشرت اليها .. وتحتضن اركويت كثير من علماء وافذاذ السودان والذين سناتى على ذكرهم كل ما سنحت المناسبة ...
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مزمل خيرى)
|
Quote: والله المدرسة دى بنيناها طوبة طوبة ، وناظرنا استاذ البيلى
كان يجبر الطلبة انهم كل سبت قبل الطابور الواحد يجيب معاهو طوبة .!!
ايوة والله طوبة .!
دا كلو عشان نقدر نتم باقى الفصول والسور الخارجى . |
حنبنيهو..
البنحلم بيهو يوماتى
وطن حدّادى مدّادى
ما بنبنيهو فرّادى
ولا بالضجه فى الرادى
يا مزمل ، الحتة دي مؤثرة شديد .. وفيها معاني عظيمة خلاص !
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الفاتح خليل الفكي)
|
Quote: يا سلام على اركويت وناس اركويت
والله الواحد مشتاق لاركويت شوق ما عادي فلكل اهل اركويت الطيبين التحية والاحترام والله دا اجمل بوست لانه بيتكلم عن مدينتنا التي نحبها
وعن ناس جيران واخوان وزملاء دراسة نحبهم ونحترمهم . |
ابو كريم .. مرحب بذكرياتك ومشاركتك الجميلة ..
ومربع 46 مربع اشتهر بالعلاقات المراتبطة بين سكان المربع ..
اظنك بيتكم حيكون قريب من بيت الاخت / سوسن نافع ..؟!
وحقو تطلب من مزمل يجيب ليك صورة لبيتكم .. كدي انت اديو الوصف ؟
| Quote: ومدرسة جنوب كنا بنعمل فيها الكورس الصيفي لرابطة طلاب اركويت بجامعة القاهرة الفرع |
ايوة صحي والله ، وكمان رابطة طلاب جامعة الخرطوم كانوا بعملوا كورس في نفس المدرسة دي ..
وكمان مدرسة اركويت شرق الابتدائية بنات .. مربع 56
والتحية للاستاذ / وليد عبد السلام ..
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: على محمد الخير)
|
يا سلااااااااام على أركويت وناس أركويت
رحلنا من الفاشر على الخرطوم عام 98 .. ولما ما كان عندنا بيت في الخرطوم ..
بقينا نفتش على بيت إيجار .. وكنا قاعدين مع خالتي في الصحافة ..
(مليون) بيت في الصحافة والإمتداد مرينا عيلهم .. وما دخلوا في راسنا كلو كلو
وقعدنا نقنق لأمي البيت دة شين .. البيت دة ضيق .. البيت دة ما بعرف شنو
أها باقي يومين وأسافر مدني عشان ألحق الجامعة الفاتحة ليها أسبوعين ..
جانا زول قال في بيت في حتة اسمها أركويت قريبة من الصحافة .. طبعا ماما عاوزة تسكن قريب من أختها
مشينا بالليل والكهربا قاطعة .. أول ما نزلنا قدام البيت حسينا بإلفة ما عادية
وبعد خشينا وعملنا (Check) على البيت والذي منو .. قلنا لماما بس .. دة البيت .. رغم الكهربا القاطعة والشوف كان ببطارية
سريع سريع أجرنا البيت بتذكر بـ (250).. طبعا أغلب اهلنا ساكنين في ام درمان .. قعدوا يقولوا لينا
البيت غالي .. وبعيد وانتو براكم ابوكم مافي .. ومافي زول جنمبكم وما بتعرفو ا زول .. والجرسة بدت
لكن أصرينا انو نسكن هناك .. وحتى هذه اللحظة مازلنا نسكن في أركويت
كان من حسن حظنا .. أن يكون البيت الذي إستأجرناه في مربع 61
وكان جارنا بالحيطة الأستاذ المعلم المربي القدير (رحمة الله عليه) عبد الرحمن عبد اللطيف
صاحب منقو زمبيري .. كان رجلاً فاضلاً .. وحين كان أبي يأتينا في زيارات من الفاشر التي لم يكن يريد تركها
يقضي جل وقته مع أستاذ عبد الرحمن باعتبارهما أصحاب مهنة واحدة .. ولهما هوايات مشتركة كثيرة
قضينا في ذلك المربع قرابة الأحد عشر عاما .. رغم ان الكثيرين فيه لا يعرفونني ولا أعرفهم بحكم أن دراستي كانت في مدني
لكن الرباط الذي جمع أسرتي خاصة والدتي وإخوتي.. كان قويا جدا ومازال حتى الآن ..
الآن نسكن في مربع 59 ليس بعيدا عن 61 .. ونحن في سعي ان نمتلك بيتاً في أركويت بإذن الله
ولأركويت في القلب منازل ومنازل ..
شكراً سمرية على البوست الجميل الأنيق .. قرأته حرفاً حرفاً
Quote: ولا انسى سمير وزوجتو صفاء واخو أمير
وناس خالتي جارة .. وابنائها حلفاويين
وناس مواهب وماجدة الدناقلة واخوهم معتصم |
من ذكرتيهمم أعلاه .. كانوا نعم الجيران والأحباب
سمير وصفاء اللطيفة (رحلوا من أركويت ويسكنون الأزهري حالياً)
خالتو جارة وأبناءها وبنتها .. كانوا نعم الأهل
ماجدة ما زالت في أركويت وهي وأخوانها ومعتصم كذلك
مواهب تسكن في بيت زوجها .. أيضاً في أركويت
وكثيرون من أهالي 61 الذين قضينا بينهم فترة جميلة جدا
وللحكي بقية
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: نهلة محكر)
|
سلام سمرية وشباب اركويت
حقيقة اركويت جميلة باهلها وشبابها. رحلنا منها قبل اعوم
تربينا فيها ودرست الابتدائي فى مدرسة اركويت شرق الابتدائية طبعا دة قبل الاساس والمتوسطة فى اركويت الجديدة قبل الانتقال للخرطوم القديمة الوكت داك مافى مدرسة ثانوى باركويت وكان منزلنا فى 54 يفتح فى ميدان المجد وطبعا لا انسى خلوة مولانا محمداحمدعلى حامد الفقير امام مسجد سيداحمد قريش اول مسجد باركويت.طبعا زرتها حديثا وجدت تغيرات كثيرة حدثت بها
سوف نرجع لذكريات مربعات اركويت شرق وخصوصا 54 رغم طول المدة.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: AttaAli)
|
Quote: الاخ شول دينق
تحية اركويتية الهوى ،،
Quote: شريككم يا سمرية ومزمل فى رحاب أركويت ويا سلام عليكم.
بالذات مربع 68.
بجيكم بخواطر مبعثرة فى حالة إلى لم شمل لتكوين محبة لأركويت.
اخى دينق ... كان فى حلتنا بقالة شهيرة عرفت باسم بقالة (دينق) بمربع 68 ... فهل لكم ارتباط بهذه البقالة؟؟ والتى على ما اذكر كانت فى فيلا سفير السودان برومانيا فى ذلك الوقت... ان لم تخنى ذاكرتى... وعلى سبيل ذكرى السفراء فقد احتضنت اركويت العديد من سفراء بلادى... وايضا يسكن بمربعنا البروفسير محمد احمد الشيخ مدير جامعة الخرطوم وذلك على بعد خطوات من بقالة دينق التى اشرت اليها .. وتحتضن اركويت كثير من علماء وافذاذ السودان والذين سناتى على ذكرهم كل ما سنحت المناسبة ... |
يديك العافية يا على.
ليس لى إرتباط بذلك البقالة وبمنزل السفير الذى ما زال موجوداً الآن وأولاده كذلك.
مربع 68 سكنت فيه حديثاً عام 2004 وقضيت فيها 3 سنين قبل أن اشد الرحال إلى حى آخر.
يستحضرنى وأنا أتحدث عن مربع 68 صديقى المشاغب عصام شلاقة أتمنى له دوام الصحة والعافية وكل شباب مربع 68 الذين ما زالوا فى الخاطر.
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الرفاعي عبدالعاطي حجر)
|
الاخ / طارق
سلام ،،،،
كل هؤلاء الاخوان تربطني بهم صداقة اعتز بها وعندما انزل اجازة للسودان بقابل بعضهم خاصة الاخوان الجيلاني عوض ونصر الدين قرض والحريف حمدي ادريس ودائما بيكونوا معاي في البيت والبعض الاخر بنتقابل بالصدفة وذلك لمشغوليات بعض الاخوان وضيق الاجازة . واحتمال نكون اتقابلنا في اركويت ولكن الذاكرة اصبحت تعبانة وصلاحيتها انتهت .
الاخت سمرية :
اولا شكر اً على هذا البوست الجميل عن مدينتنا الجميلة اركويت ولكن في معلومة بسيطة اريد تصحيحها وهي ان محاضرة الدكتور / الطاهر خاطر عن التنويم المغنطيسي احضرته رابطة طلاب اركويت بجامعة القاهرة فرع الخرطوم ( وليس رابطة طلاب اركويت بجامعة الخرطوم ) وذلك في الاسبوع الثقافي الذي اقامته رابطة طلاب اركويت بجامعة القاهرة الفرع بنادي اركويت الرياضى وكنا من ضمن القائمين على امر هذا الاسبوع ، فالتحية للرئيس الفخري للرابطة مولانا / تاج السر محمد حامد و لكل الاخوان الاعزاء برابطة طلاب اركويت بجامعة القاهرة الفرع ونترحم على روح بعض الاخوان الاعزاء الذين كانوا معانا ورحلوا عن هذه الدنيا الفانية وهم ( الرائد الشهيد ابرهيم سر الختم – نادر محمد ادريس – مرتضى ابرهيم ( بيبو ) – الشيخ النعمان الشهير بجكسا – زهير حسين ) عليهم جميعا رحمة الله ونسأل الله ان يدخلهم الجنة .
وقد قدمت رابطة طلاب اركويت بجامعة القاهرة الفرع الكثير من النشاطات من ضمنها الاسابيع الثقافية والدورات الرمضانية والكورسات الصيفية واغلب هذه النشاطات كانت تقام في منتزه 68 العائلي .
فالتحية لكل اهل اركويت الطيبين ،،،،،،
أبو كريم
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: الفاتح خليل الفكي)
|
Quote: يا سلااااااااام على أركويت وناس أركويت
رحلنا من الفاشر على الخرطوم عام 98 .. ولما ما كان عندنا بيت في الخرطوم ..
بقينا نفتش على بيت إيجار .. وكنا قاعدين مع خالتي في الصحافة ..
(مليون) بيت في الصحافة والإمتداد مرينا عيلهم .. وما دخلوا في راسنا كلو كلو
وقعدنا نقنق لأمي البيت دة شين .. البيت دة ضيق .. البيت دة ما بعرف شنو
أها باقي يومين وأسافر مدني عشان ألحق الجامعة الفاتحة ليها أسبوعين ..
جانا زول قال في بيت في حتة اسمها أركويت قريبة من الصحافة .. طبعا ماما عاوزة تسكن قريب من أختها
مشينا بالليل والكهربا قاطعة .. أول ما نزلنا قدام البيت حسينا بإلفة ما عادية
وبعد خشينا وعملنا (Check) على البيت والذي منو .. قلنا لماما بس .. دة البيت .. رغم الكهربا القاطعة والشوف كان ببطارية
سريع سريع أجرنا البيت بتذكر بـ (250).. طبعا أغلب اهلنا ساكنين في ام درمان .. قعدوا يقولوا لينا
البيت غالي .. وبعيد وانتو براكم ابوكم مافي .. ومافي زول جنمبكم وما بتعرفو ا زول .. والجرسة بدت
لكن أصرينا انو نسكن هناك .. وحتى هذه اللحظة مازلنا نسكن في أركويت |
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: AttaAli)
|
AttaAli
| Quote: ودرست الابتدائي فى مدرسة اركويت شرق الابتدائية |
انا برضو درست فى المدرسة دى ونحن تقريباُ تانى دفعة
ومتذكر الوقت داك الفصول ما كانت معروشة ..!
وانتقلت لمدرسة البيلى سنة 86 تقريباً .
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: نهلة محكر)
|
نهلة ..
بت اركويت .. ازيك وسلامات ، منورة اركويت كلها انت واهلك .. وانا اقول ليه الحضارة والرقي وصلت اركويت سنة 98 ،
لانو في السنة دي بالذات نحنا ركبنا الدش .. اب لستك دااااك ومصنوع في المنطقة الصناعية .. والقنوات كانن 22 قناة لا غير ..
والله كنا فرحانين بيه جنس فرح !
كان جونا ضيوف اول شيء بنجري نشغلو ، حتى نولع النور .. حتى المروحة .. وبعدين كان في عصير خلاص .. !
يا نهلة انتي سكنتي في اكتر شارع ، حركة وحيوية .. في مربع 61
هنادي اختي كانت صديقة مواهب اخت ناس ماجدة .. وطوالي هي في شارعكم دا !
من خلال هنادي اختي عرفت ناس كتار في الحتة دي .. والتحية عبرك لكل سكان مربع 61 .. !
مربع 59 في ناس لغاية هي ما بفرقوا بين مربع 61 وبينه وبرضو في ناس بقولوا عليه تابع للفردوس ....
وانا كنت واحدة من الناس ديل ..
لغاية ما عندي اصحابي سكنوا هناك .. حتى عرفته كويس
ناس عفراء واسماء واخوكم محمد احمد محمود الشهير (بكوستي ) وهو عضو معانا بالمنبر !
والله مرحب بيك يا نهلة في بوست اركويت ... وعاوزين نسمع ذكرياتك عنها ..
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: مرتضي عباس)
|
Quote: علي هل تعرف الزعيم
وحجوج وعادل احمدفضل المولي
عاطف الخير
وعلي كديس
كلهم من 68 |
مرتضي
ممكن أجاوب ليكـ أنا ( شلاقة مني ساي )
أنت قصدك مرتضي الزعيم مش ؟ ياخ ده زول علم في أركويت و كذلكـ حجوج أما عادل ده لحدي ما أنا جيت هنا كان في أمريكا ما عارفو رجع و لا لسه ..
عاطف الخير هو أخو على ده زاتو و علي كديس ده ما عرفتو لكن لو قصدك خالد كديس هو برضو أخو على و عاطف ديل
| |
|
|
|
|
|
|
|
|
|
Re: عن حبيبتي ( أركويت ) بحكي ليكم ... (Re: خالد عبد الله محمود)
|
الحبيب خالد
ازيك يا قريبى ،،
Quote: مرتضي
ممكن أجاوب ليكـ أنا ( شلاقة مني ساي )
أنت قصدك مرتضي الزعيم مش ؟ ياخ ده زول علم في أركويت و كذلكـ حجوج أما عادل ده لحدي ما أنا جيت هنا كان في أمريكا ما عارفو رجع و لا لسه ..
عاطف الخير هو أخو على ده زاتو و علي كديس ده ما عرفتو لكن لو قصدك خالد كديس هو برضو أخو على و عاطف ديل |
والله ما قصرت ربنا يديك العافية،،، بالله كيف اخونا عادل ؟ واخونا حمدالنور؟ وعايزين يا خالد بقدر الامكان نوثق لمربع 68 خاصة فريق النجوم الذى يتولى ادارته حاليا الاخوان مزمل الامين ومنير فتحى الذى حسب علمى انتقل مؤخرا للسعودية .. وتحياتى العميقة عزيزى خالد ومشكور على الشلاقة هاهاها
| |
|
|
|
|
|
|
| |
مزمل خيرى
طارق جبريل
سيف الدولة كامل
سمرية
عبدالغني كرم الله
الرفاعي عبدالعاطي حجر
امير بشير حمد
شول اشوانق دينق
بكري عباس علي
وصال عالم
الفاتح خليل الفكي
خالد عبد الله محمود
مرتضي عباس
نهلة محكر
AttaAli
فيس بوك
تويتر
انستقرام
يوتيوب
بنتيريست