مبروك اطلاق صراح قاسم مهداوى
كمال شداد والكباتن كاريكا ومهند الطاهر وبكري المدينة يشرفون كرنفال ساسف.
منبر التجانى الطيب للحوار بواشنطن يقيم ندوة بعنوان لا للهبوط الناعم نعم للانتفاضة الجماهيرية
فعاليات دورة ساسف الكبرى سبتمبر ٢٠١٦ فرجينيا تخليداً للفقيدين الفاتح عمو و عوض شايقية
مشاهداتي في رحلتي بالبر من السودان إلي تشاد وأفريقيا الوسطي ثم السودان فيها الكثير...
منتديات سودانيزاونلاين    تحديث الصفحة    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 08-24-2016, 08:41 PM الصفحة الرئيسية

مكتبة الشاعر الراحل محمد الحسن حسن سالم حميد(حميد)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

الرجعة للبيت القديم

12-30-2002, 03:38 PM

حميد

تاريخ التسجيل: 12-29-2002
مجموع المشاركات: 0

للتواصل معنا

FaceBook
تويتر Twitter
YouTube

كيف احذف مداخلة من بوستى
الرجعة للبيت القديم

    الرجعة للبيت القديم
    ــــــــــــــــــــــــــــــــــــــــــــــــــــــ
    أنا ماشي ...
    راجِع ...
    لي بِيُوت
    تفتح لِي أدُقْ
    أو
    ما أدُق
    من غير تقول
    الزول مِنُو
    ولا حتَّى
    علّ الداعي خِير
    لا مالَك
    الجابك شِنُو
    ...
    ...
    لي بيوت بجِيهن
    في أيِّ يوم
    إن جيتا ليل
    إن جيت دغُشْ
    طوَّالي
    أدِفْرَ الباب
    وأخُشْ
    مرَّات أضِيق
    قاصر الطريق
    من بيت لبيت
    وفي بيتنا
    كُرْبُشْ
    زي نسِيمة
    معدِّي شِيمة
    لا أُش
    لا كُش
    خابراني
    كلُّوب الفريق
    زولاً رفيق
    الليل
    وونّاس الدُغش
    لا قطعت نوم
    النائمين
    لا الباري للحيشان
    تقُش
    عند شُوفتي
    تجري على هِدم
    في محلَّها
    الشوق يترسِم
    تنجَهْني
    حتَّان بالاسم
    تندَهْني
    عُقْبان تبتسم
    بسمة بِنيَّات
    ناس غُبُش


    هادي المخالِيق
    مؤمِنا
    بسماحة الدنيا
    الِهِنِا
    كم تأمنَك
    يوم تأمَنا
    ولا فَرْقِ بين الضيف
    وأنا
    غِْير كَم كليمِة
    ملوَّنة
    بالإلفة ..
    هلِّيج ..
    اعتناء ..
    هادي البيوت
    مطمِّنا
    ودايماً قريبِِة
    من البعيد
    زي مُو غريبِِة
    على الدَنا
    ماها المُريبِِة
    ومابْ تكيد
    مفتوحه طيبِة
    محاننَة
    زولاً يجيها
    في كُل فَجُر
    ولاَّ إن يتِمْ
    كمِّين سنة
    تتلقَّى
    زي أم الجَنا
    وترشَع سحابات المُنى
    بالصِحَّة ..
    بالعِزْ ..
    بالهَناء ..
    ينجيك من أولاد الحرام
    يحفظ
    يغطِّيك ربَّنا
    ...
    ...
    هادي البيوت
    ماب تتلخِم في الحكوَة
    ماب تنضُم كُتر
    لاها البتِنْصَنَّع نَضِم
    شايلِة الفصاحة
    من الطيور
    اليُوت تغنِّي
    على التُمر
    ونور المهابة
    من النَجِم
    مطعُوم سُكاتَها
    من الصبُر
    بينا وحروف الأمنيات
    الطَيْبة
    ألفِ صلة رحِم
    على رغمِ
    آفات الزمنْ
    الصُرْمَة ..
    حافَّات الفقُر ..
    وِحش المقادير
    النَهِم ...
    سيل المضاضاة
    المدْلَهِم
    نبَرُو المواعيظ
    الجَهِم
    من ناس كُتر
    عن قِصة النار
    والقبُر
    في وضعْ أضْيَق من
    جُحُر
    والناس لُو خارجين
    لُو كُفر !
    ...
    ...
    هادي السُمُر
    سِتَّ الضُراعات
    الُخدُر
    عارفاهُو مِن وين
    جاء الفَقُر
    والحال سِجِم
    عارفاهُو ..
    عِرفَتها لي بعَض
    يا حِكمتا
    الزي كلمتا
    ال مِن خِدمتا
    واطاتَه واحدِة
    وفَدْ هِدِم
    أيَّة غَفير
    فوق الحَفِير
    حَقّاني
    قلبُو على الخدِير
    حيكومتا !
    ماها ال بِتِتكلَّف
    سُتر
    مستُورة خِلْقَِة
    ودا المهِمْ
    مفتوحه لي كل البشر
    كلَّ الخلوق
    من طينَها بَسْ
    كل البسيماتُن
    تبِقْ
    لَوْ
    وِشْ زماناتُن
    عَبَس
    مفتوحه قلباً
    كلُّه خير
    شايل حمالتُو
    بلا جُرَس
    مفتوحة كالفضاء
    للطيور
    وبيُّوضَة
    للصيد والتَبَسْ
    لا طبلة
    لا كيلون سِوِيتش
    ولا ترابيس
    لا جَرس
    لا سِلكِ شائك
    لا ترَس
    لا غفير
    تفاوضُو
    ولا حَرَس
    لا كلاب تشمَّك
    شَمْ جُراب
    فتِّيش وجَس
    لا آه لا سِب
    ... ... ...
    ... ... ...
    وناس سِتِّ نُور
    كتلُوا الكَلِب
    كتلوهُو مجبورين
    غَصِب
    ما مِن نياحتُو
    ولا سَعَر
    ظنُّو الكلب
    بين الفريق
    حامي البِطَيْنِين
    اللعِب
    آخر الليالي
    من البيوت
    قافل الطريق
    سادَّ الدرب
    لأخواتَها
    قالت ستِّ نور
    ما دام في أمان
    والناس بخير
    سَعَي الكلاب
    في الحلِة
    شَر
    هِوهيوُا
    بعْزاق للأجُر
    أحسن تعيش
    بي راحتَها
    تمشي الجنائن
    يا البحر
    إن كان تطفِّش
    للصُبار
    وأب عَفْنِة
    تشغِل للورَرْ
    الحِلِّة يكفيها
    الولاد
    يكفي البهيمات
    الجَداد
    يكفي الطيور
    الفِي الشدر
    الحلِّة يكفيها
    البشر
    كان جاها شر
    الحلِّة يكفيها
    الحَصانة الفيها
    مادارت كَجَر
    حرْسَ الزرائب ؟
    شِنْ فِضِل
    فِطْن الزرائب
    غير بَعَر !؟
    صنَّت شِويتين
    ستِّ نُور
    شالت حَجر
    وجدَعَت حجر
    جدعت حجر
    وشالت حجر
    وقالت :-
    قرايبَها ذات ليل
    يمكِن يجُوها
    من السفر
    أو زول غريب
    حار بُو الدليل
    عابِر سبيل
    زَنقُو المطر
    يقصُد رواكيبهم
    جَوّر
    أول شي
    يتلقَّى الكلب
    اللابْ يرحِّب
    لاب يبِش
    ولِْيشَن يتوِّرنا
    الكلب
    وليش الكلب
    يبقالنا وِش
    ؟؟ ؟؟
    وكان الكلب
    لازم يموت
    الطفَّشوهُو حلَف
    يطِش
    وكان الكلب
    لازم يموت
    شـان المَحنَّة
    ال في القلِب
    تحيا
    وخيوط زمن الوصال
    لا تنسلِب
    لا تنقلِب
    ومات الكلب
    ...
    ...
    ...
    وين يابيوت
    عِز البِرُود
    ضمَّتنا كُونِية دِفِي
    ومن لدغة الصيف
    الغريب
    قامت حِواية
    همْبَرِيب
    وتحت القمر
    حيشانَها
    قِيزان السمر
    تدِّينا
    لمَّن نكتفي
    يا بيوت من الخاطر
    قُراب
    ورِهاب
    رِهابات تختفي
    الإعتذارات
    مابْ تفي
    وجِيت ما لقِيتكُم
    ماها في
    أبوابنا
    مُو صاجات حديد
    يغسِل
    درابزِينا الرزاز ؟!
    حيطانَّا
    مُو أسمنتِ
    وحجر ؟!؟
    شباكنا
    لا سيخ لا قزاز
    ؟!؟
    يا ضَوْ جماعاتاً
    عُزاز
    زي ماك بشر
    ما منِّو شر
    لِزَّ الخشِم باب
    ما اندفَر
    فوق الدُقُل
    قُصَّ الكُشر
    يا شيل حِطيبة
    من الأرض
    لا خوف
    ولفِّيت
    لا حذَر
    لي كلبةْ الكبِد
    أبقى هاز
    مفتاحنا
    مُو أكتر
    من كُشر
    ما أبوابنا
    من شدر الحَراز
    والحيطة أقصَر
    من وَصَا
    قالوها
    عند ساعة السفر
    وكان القطر قام
    صوتُو راز
    البيت دا بيتك
    يا حبيب
    أدخًل مخيَّر
    وماك غريب
    اتمدَّا في أقرب
    عَنْقِريب
    مبهُول في حوضُو
    الهمبْريب
    النِيمة
    يا العنَّابة
    ضُل
    أغشى التُكُل
    خرْمان
    في شاي
    جيعان أُكل
    وداك التمُر
    والزِير قريب
    بايِت من البارح
    ملآن
    راقِد في صدر
    الهمبريب
    دُرْ تقرأ
    ديك كتب الولاد
    قلَّقت
    أو طال الرِجِي
    كُورِكْ
    نقولَّك
    .. هُويْ ..
    بُعـــــــــــــــــاد
    رسِّل لنا
    المُرسال
    نجي
    يا
    رُوق
    بإحساس المُحِب
    سيد بيت
    وعننا ما ضِهِبْ
    الهِيلنا .. هِيلَك
    شِن ندِس
    ماطالَ
    عُمرا ًيتحسِبْ
    في ياتو بنكِ
    وياتو عِبْ ؟
    يات خزنة ؟
    غير
    خِزَن النفوس
    الماهلِة
    مفتاحها القلب ؟!
    ...
    ...
    قول لأبن آدم
    في بلد
    طــــالت معاناتُو
    وتٍعِب
    سكَّانو
    دايشِين بالشرق
    وحكَُّامو
    باشِّين بالغرب
    إحـنا
    اللي فاقدين
    أيِّ شِي
    في الدنيا
    مالكين كلِّ شي
    بالفينا
    بالحيل
    ودا الدرِب
    والتابَع الصاح
    ما ضِهِب
    شِنْ الأفندية
    الكبار ؟؟
    خدم المرابين
    التجار ؟؟
    حشم المبارين
    الكِجار ؟؟
    الأرزقِية ؟؟
    كِضِب كضِب
    أحــنا التعابة
    ال بإختيار
    صُرمتنا
    ترتاح الديار
    ينجمَّ بال بلدا
    تِـعب
    نحنا الطيابة
    الصِحْ كُتار
    نحنا الغلابة
    أكبر حزب
    لاب نتغلب
    ولاب نتقلب
    والتابع الصاح
    ما ضِهب
    يا ....
    هرْشَة
    نفخة زيف
    كِضب
    نحيا وتموت
    عرْشَك
    خيوط العنكبوت
    قبَّال دا
    هزِّينا
    و
    و
    ق
    ع
    الأعتى منُّو
    بَنِي وثبوت
    لا بوت شفع
    لا أجدى توت
    لا غربِ
    لا شرقاً نفَع
    لا رمِّي حرّاسة
    ولَبُوت
    لا أحلام شمولية
    زلوط
    فطّيس شيوعية
    وفزع
    من حتَّى
    صُوت شُفَّع
    كَعُوت
    يا مَن قَلَع
    للسلطة
    لع
    تنجَى الغلابة
    من الخزي
    وشرع الله
    يبرى
    من الشِفوت
    ؟!؟ ؟!؟
    ؟!؟
    *** ***
    يا واقفة
    بين كهنوت
    وبؤس
    خلَّى القلوب العامرة
    بُوص
    يا الديمِة حاضرِة
    كما السَمِح
    مشدُوهة
    زي أمَّ العروس
    الجايي لي خلقِك
    قمح
    والما دخَل حلقِك
    دا رُوس
    وأنا ما شي باكر
    لى نفوس
    ناس
    زي بعَض
    طوَّالي نحنا
    معا بعض
    ماب نرجى
    عيدين الله عَد
    لا الطارقِة
    من عافي ومَرض
    طوَّالي في
    ندِّي التميرات
    العرَق
    تدِّينا خير
    غير العَرق
    قفَّازا عاد يطلَع
    حِفي
    ويرجَع زمان الحَش
    حَفي
    نكرَع شرابنا
    أكَّان عكار
    وأكان صِفي
    ومن ها البلد
    نقضي الغَرد
    جرى بالحراجِل
    دمَّنا
    وشاهقين دخاخين
    القرَض
    عاركين بصارات
    أمَّنا
    أسْراع رِضي
    وأسراع حرَد
    نحرد
    أكان غبَّ المطر
    وعاب البحر
    ما أسقى الجروف
    ومِن و مِيسنا
    نرضى عن المطر
    من و ميسنا
    نحترم الظروف
    ونقلع عراياك
    يا بحر
    وأمَّاتنا جن
    واردات صفوف
    ربَّتنا العصي
    والسيوف
    بالسوط
    وخبط الواطة
    بالأرجل سَوا
    وطقَّ الهواء
    بين الكفوف
    لَو غاب ولد
    فَدْ حُول
    ومارجع البلد
    فينا الخِفيِّف
    يقفرُو
    ويجي بالجَنا
    العُوعى وقلَد
    دمّاعُو
    والحزن اليلُوج
    في عينيه
    تُرعة ودامْبَرُو
    عٌقب الجنا
    ال مِن طبَّ
    حار لفَّ البلد
    قصَّ وفقد
    أول برَد
    بوّغ كَرُو
    حاحى وحصد
    جيَّه بنى
    سوَّا السَعد
    تم المُنى
    وضوّا الفريق
    لآخر البلد
    أسراع رضي
    وأسراع حرد
    حِردت سعيدِة
    عشان حِرد
    في الليل سعد
    صدّ الصباح
    صيَّاحو صاح
    ما الحوش بلد
    هـ ــ ـوي يا قصيفي
    الطانجي وِينا
    الكور قبَض !
    كانت سعيدِة
    وراء المُراح
    قابضاله غُرّة
    وقانقَرَد
    كانت في كِيم
    المُسْتَراح
    كانت قَعَد
    تبدِي وترايي
    في قَصْ جناح
    الغُرَّة
    مَعْطَ القانقرََد
    كانت مَلعْوَتة
    في صراع ما ليهُو حَد
    فكْ فكَّتن
    ساعة سماعَه
    الكِيكْ قَبَض
    حسَّت بِراحة
    وبارتياح
    ومعا بَعَض
    الغُرة مجروحة
    الجناح
    في سماها
    سابقِة القانقَرد
    قالت :-
    سعيدِة دي
    كان زمان
    وسط البُطان
    "حُمد ولد" !!
    وطارن
    على تمر البلد
    وطارت قصيفي
    على الصياح
    كانت خفيفي
    في لهفة جَد
    جِيدَن قبَض
    الطير براحُو
    الصاح
    يغنِّي
    في أمان
    بلا نفَس انقبض
    جيت آسعد
    همست بعد
    رمت الشَرَك
    فوق كُوم
    قرَض
    الزول بلا
    تُكل الفزَع
    فُورَن زَبد
    ويرجع
    بلا صاج الشتاء
    ال حالاًّ هبد
    همست سعيدِة
    سعيدي جد
    همست سعيدِة
    مع الصباح
    خايفِة
    الَحَرَدْ
    أُومَت عيونن
    لي بعض
    أُومت عيونُن
    بي وئام
    ما ليهُو حد
    أقوى السلام
    الدون كلام
    لا إيد لا خد
    والمنقد
    المخدوم
    وقَد
    ...
    ...
    وأنا جايي
    جيتك
    يا سعد
    لا طانجة
    لا كوراً قبض
    من قلدة دافي
    ودمعتين
    فوق شوق
    خرافي
    وبسمتين
    من كلمة واحدِة
    وكلمتين
    نعدِل عَوَجْنا
    ونتصلِح
    نتصافَى
    زي الوردِ
    زين
    أصْلُو العَوَج
    كانت فِطين
    ود خالَه
    جاب لها
    توب زَراق
    وأنا قلتَّ شين
    توبِك يذكِّر
    بالفراق
    توبك دا
    حدَّت بُه
    الرضية
    على الحسين
    وانذكرت
    ذاك الهدم
    هدم الملمات
    القراب
    هدم الزراعي
    من القراعي
    إلى الضراعي
    جري التراب
    الماب يجم
    هدم العقاب
    هدم القضيِّة
    ويا صَنَب
    ساس الصواب
    ماب ينهدم
    وانذكرت
    حِجج الرضيِّة
    مع كمندان القِسم
    تطراها
    بي ذات الهدم
    الحِجِّة
    في جِد الحسين
    سِر الختِم
    ولاّ الختم ؟
    سر الختم
    ولاَّ الختم ؟
    ولاَّ الختم ؟
    حرَّ النضِم
    مدت صُباعه
    غُصن جريح
    هزّ إيدا
    سوط عَنَج الحسين
    رعشة ضُراعه
    جُضُل في ريح
    رفعت أباطه
    إلى النجم
    "الزول
    على قرش
    العباد
    ليش ما يهم
    وليشاً على نتش
    البلاد
    ديشاً نهم
    لو بالمتاجرة
    في الجهاد
    من دون جهاد
    لو بالمكاجرة
    والعناد
    أجر البلاد
    ما تنحكم"
    كانت دي
    كلمات الحسين
    ذات مرة
    في ذات القسم
    وكانت في اسم
    وكان الكمندان
    نُص خصِم
    نفس الشي
    قام خنس الكمندان
    منقَهِم
    لو قال بِغِم ؟!
    في نُقط نُقط
    من عينها أُش
    مرقت تقُش
    مرقت تلِم
    دمَّاعه
    بي طَرَف الهدم
    كانت
    وكِت
    دقّ الختم
    لمحت
    طرف حِبرايتو
    فوق كتف الحسين
    المنهزم
    وانذكرت
    ركزاتو
    حين في الدارة
    يدمي
    ومبتسم
    شباله كان
    بي شرُّو
    ترجابو
    الحسين
    يا شالو صم
    يا بين نسمتين
    ينقسم
    يا فوق كتيفات
    النجم
    والقمرة
    زي ليل
    يتردم
    انذكرت ذلك
    فطين
    وإنو الرضية
    الفد سفر
    رسمت لنا الخرطوم
    رسِم
    زي النعاين في
    فيلم
    أو بين حِلم
    إنو الرضية
    العد تعد
    فوق اللدين
    غيبة الحسين
    المن متين
    وآب تتلخم
    حاشاها
    تورط
    في حديث
    حاشاها
    تغلط
    في اسم
    بين الرضية
    وبين فطين
    غير الأسية
    صلة رحم
    وفي الحلة
    كَمِّين
    من رضية
    بلا الرضية الواحدِة
    عندها فد هدم
    مارقابو
    ما قالت تخين
    داخلابو ما نقّت
    قِدم
    قادلابو قبلي
    ومغربه
    ماكي اليفكرولك
    حريم
    لاكي المفكِّري
    في الرجال
    الآخرين
    هُوي يا الرضية
    بت ود مرين
    التوب رفيق توبين
    عقاب
    شيلة الحسين
    الجابه
    بي عرق الجبين
    اللا تزال
    قاضي الورود
    والمرقة
    والقش
    والطحين
    والشي المهم
    التوب رفيق توبين
    عقاب شيلة الحسين
    ...
    ...
    ...
    وانذكرت
    نزلة حسين
    قدلة حسين
    حس الزغاريد
    وين ووين
    بِلِّيل حسونة
    عديل وزين
    السوط
    وعرضات الرجال
    وكيف الحسين
    في الدارة جال
    يضحك يمين
    يبسم شمال
    وطير الرهو
    راحل جنوب
    وقعت رهيوة
    من الرهو
    بين الرضية
    وبين حسين
    وطار ريشا
    فوق عِمَّة حسين
    اللسِه توب
    دارعه الرضية
    ومن متين
    خلق الله
    عينن في الجنا
    لا حولة
    من عين الرجال
    الحارَّة
    لا يدُّوهو
    عين
    شر يا الحسين
    العمرو في يوم
    ما انحنى
    غير للصلاة
    وقطع الرحط
    ونقح التراب
    الزي ظلط
    العمرو ما دنقر
    خلاف
    يرفعلو درفون
    كيف حِمش
    لاحق أمو
    حرقتو الشمش
    رفعو الحسين
    رفس الحسين
    لبَّ الحسين
    ناتق
    شرط جيب الحسين
    قام الحسين
    أدّا الشبط
    فنَّا الشبط
    أدا القرش
    شنّا القرش
    قهَم الحسين
    درفون وحِش
    تحت الشمش
    فوق الشمش
    هارا ويمش
    بكى في القرش
    بكى في الشبط
    شوفة أمُّو
    قرقر
    وانبسط
    طرَّى الرضية
    أيام متين
    الساقي هكعت
    - يا الحسين
    بنبونة وقعت
    - يا الحسين
    أمّونة ولدت
    - يا الحسين
    بونا أمو حردت
    - يا الحسين
    تالا الشرق
    حدراتو وين
    شافع غرق
    مرقو الحسين
    في صريف حرق
    - رش يا الحسين
    رفعة مرق
    يرجو الكرين
    مو برا الجدع
    لكين متين ؟
    قدح الفزع
    خلا منو وين ؟
    أول جراب
    فاقش ضمان
    قطعوا الحسين
    آخر تراب
    راقش زمان
    زرعو الحسين
    داير لي جنزير
    الحسين-
    داير دلو بير
    الحسين -
    منشار فرش جير
    الحسين -
    داير لي زول خير
    الحسين
    داير لبن طير
    ألقى وين
    - عند الحسين
    هفّالو مشوار
    للضعين
    ما كان في بالو
    لو مستعد
    الناس قبلنا
    لقوا الخبر
    زي المطر
    من دون وعد
    من وين ووين
    وينو الحسين ؟
    مصروف
    فردجواب
    طِرد
    برَّا الوصايا
    مع البرد
    يحفض حفض
    لا عد يسجِّل
    لا يعد
    لا حولَ من
    سفر الحسين
    العاقبو مافي
    تقول سفر
    في القَمَرَة
    أول من يخش
    وآخر المغادرين
    القطر
    ما شفت زول
    في الدنيا
    يفرح بالكلف
    فرح الحسين
    المستبد بي طيبتو
    زي برق المطر
    مع إنو يتعاين
    رزين
    من شبَّ
    في خير
    ولاّ شر
    طوّالي
    في راس العوين
    فِسراعو
    حاضر
    أيِّي
    زين
    الناس يلوجوا
    شمال يمين
    أما الحسين
    دغريتو دين
    من قمنا
    شفنا الشفنا
    يوم ما شفنا
    واقف بينَ بين
    كُر يا الحسين
    راجل العَقاب
    يا الطيِّب
    المؤمن مُصاب
    والعين هي عين
    وانذكرت
    خلق الله
    كيف مَلَت الدرِب
    تبكي التلِب
    زولَه الخزين
    وبكت فِطين
    بكت ...
    الحسين
    من قلبُو
    ما دار الحرب
    لكن شغلة الديش
    كمان
    جُوَّاك
    جِنِس حِرَّة قَلِب
    وانذكرت
    ...
    ..
    .......... يتبع
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

12-30-2002, 03:43 PM

ود شاموق
<aود شاموق
تاريخ التسجيل: 11-17-2002
مجموع المشاركات: 3605

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: الرجعة للبيت القديم (Re: حميد)

    أسفرت وأنورت
    واستهلت وامطرت

    زارنا الخير
    أبوي الخير

    ياتو نسمة طيبة
    الجابتك حدانا هنا

    عمر دارنا والله
    وحمد الله على السلامة

    البيت بيتك
    ونحنا كلنا ضيفانك


    كدي الأرجع للقصيدة أقراها
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

12-30-2002, 03:44 PM

azza

تاريخ التسجيل: 12-16-2002
مجموع المشاركات: 606

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: الرجعة للبيت القديم (Re: حميد)


    احييك اولا يارائع
    من العنوان بس بكيت
    و الدموع حجيت الروئية
    في انتظار البقية
    و لي عودة


    لك الانحناء و الزمرد
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

12-30-2002, 05:21 PM

singawi
<asingawi
تاريخ التسجيل: 02-18-2002
مجموع المشاركات: 2177

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: الرجعة للبيت القديم (Re: حميد)


    حباب حميد
    شاعرنا الضخـم
    حبابك بلا عدد
    أروينا فالنفوس عطشى لعطر الكلام
    وعبق المشاعر
    وصدق الحروف

    تحياتي
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

12-30-2002, 05:45 PM

altahir_2
<aaltahir_2
تاريخ التسجيل: 11-17-2002
مجموع المشاركات: 3949

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: الرجعة للبيت القديم (Re: حميد)

    اللــــــــــــــــــــــــــــــــــــــه يا حميد كنت فاكر الخبر إشاعة لكن الأن إطمنت اقول شنو غير مليون مرحب يا استاذ
    الحمدلله انك بيننا الان والبركة الجيت صاد لينا
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

12-30-2002, 06:46 PM

عاطف عبدالله
<aعاطف عبدالله
تاريخ التسجيل: 08-19-2002
مجموع المشاركات: 2101

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: الرجعة للبيت القديم (Re: altahir_2)

    حميد
    ياحبيب
    ياغالي
    ياحب كل أهل السودان
    لأنك حبيت كل السودان
    مكانك في الفؤاد ترعاه العناية
    فأقدل يا مولاي حافي حالق في البورد وسط الزحام
    يا أشعر شعراء بلادي
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

12-31-2002, 05:31 AM

ديامي
<aديامي
تاريخ التسجيل: 02-05-2002
مجموع المشاركات: 1635

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: الرجعة للبيت القديم (Re: عاطف عبدالله)

    العمرو في يوم
    ما انحنى
    غير للصلاة
    وقطع الرحط
    ونقح التراب
    الزي ظلط

    تحياتي حميد والتحايا موصولة للأخ أسامة
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

01-02-2003, 10:53 AM

nadus2000
<anadus2000
تاريخ التسجيل: 02-05-2002
مجموع المشاركات: 4755

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: الرجعة للبيت القديم (Re: ديامي)

    لا يجوز إلا أن تتصدر قصائدك هذا المحفل

    ومن أحق بذلك ايها الجميل
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

01-27-2003, 01:36 PM

azza

تاريخ التسجيل: 12-16-2002
مجموع المشاركات: 606

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: الرجعة للبيت القديم (Re: حميد)

    و برضو فوووووووووووووق
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

03-02-2003, 03:29 PM

هدهد

تاريخ التسجيل: 02-19-2003
مجموع المشاركات: 0

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: الرجعة للبيت القديم (Re: حميد)










    Up
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

03-02-2003, 03:36 PM

فتحي البحيري
<aفتحي البحيري
تاريخ التسجيل: 02-14-2003
مجموع المشاركات: 19109

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: الرجعة للبيت القديم (Re: هدهد)

    انضر كلام
    واجدع رجال
    واحسن تقيف اللحظة فيك
    وتعقر الدنيا واللغة
    يا
    ي
    ا
    يا

    ملك
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

03-06-2003, 05:23 PM

وليد

تاريخ التسجيل: 02-23-2003
مجموع المشاركات: 0

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: الرجعة للبيت القديم (Re: حميد)




    حميد يا ايها الصديق افتنا في هذا الوطن ,
    ويا خي انت كيف بتقول الكلام دا .. قصدي الحكم .. قصدي النزيف .. قصدي ال..

    شكرا يا زول يا راقي يا زين


                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

03-25-2003, 00:12 AM

طارق اسماعيل
<aطارق اسماعيل
تاريخ التسجيل: 01-20-2003
مجموع المشاركات: 423

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: الرجعة للبيت القديم (Re: حميد)

    فوق فوق سودانا فوق
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

03-25-2003, 00:20 AM

rani
<arani
تاريخ التسجيل: 06-06-2002
مجموع المشاركات: 4473

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: الرجعة للبيت القديم (Re: طارق اسماعيل)

    وليكم حميد بالصوت كمان
    مع فائق اعتذاري لعدم وضوح الصوت


                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

[رد على الموضوع] صفحة 1 „‰ 1:   <<  1  >>

· دخول · ابحث · ملفك ·

اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia
تعليقات قراء سودانيزاونلاين دوت كم على هذا الموضوع:
فى FaceBook
فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de