انا في سرحنى ونظراتي المشتته بين شاشة مواعيد الطائرات وونسات السودانيين من حولي .. اشعر بان احد يهز كتفي والتفت له .. وقبل ان اتمكن من تبين ملامحه يدخل فيني سلام حار جدا وتعقبه ( لبعات ) الظهر السودانية الشهيرة .. ومعها عبارة ( معقولة يا عمر وين انت الزمن الطويل دا كله وصحي الدنيا ضيقة معقول اصلا ما متخيل الاقيك مرة ثانية ) وانا اتمنى من انتهاء موجة السلام الحار سريعا حتى اعرف من هذا الذي ناداني باسم عمر .. ورفع راسه .. وقدر ما ركزت ونحت ذاكرتي واستحضرت كل الشخصيات التي رافقتني في منذ المرحلة الابتدائية مسحا سريعا لم اجد شخص بهذه الملامح .. وقلت ربما الصلعة والشيب غيرت الملامح ..وقلت له عفوا يا اخ ...انا حتى الان ما عرفتك .. قال مصرا معقولة يا عمر اضغط ذاكرتك شوية ولا انت لسع في استهبالك داك عاوز تعمل لي فيها كامرا خفية .. قلت له : وعلى فكرة كمان انا ما اسمي عمر يمكن انت مشبهني .. قال : كيف ما عمر ومال حيدر اخباره شنو ( دخل في موضوع ثاني بمعنى انه انه عمر هذه مفروغ منها .. لدرجة شككتني في هويني حتى فكرت استخرج البطاقة او الاقامة واتاكد من نفسي ) قلت : له مين حيدر دا كمان ( ماشي رضيت انا عمر لكن مين حيدر ؟؟ ) قال : لي حيدر يا راجل ( على وزن شفيق يا راجل) حيدر السمين ياخي صاحبك الجنو ضحك داك .. كنت ما ما تتفارقوا ايام مدرسة البحر الاحمر الثانوية ببورتسودان .. ونسيت الكورة ودوري الروابط في ديم شاطي .؟؟ قلت في نفسي : بس خلاص فرجت لانه انا في حياتي ما عشت في بورتسودان سوى اسبوعين فقط ايام شهر العسل وهي حتى ما كانت كافية لاعرف اسم الشارع الذي فيه الفندق .قلت جالك الفرج يا ابو حميد . قلت : بس انا في حياتي ما عشت في بورتسودان . قال : ياخي ياعمر انت فقدت الذاكرة ولا حصل ليك غسيل مخ ما عارف .. كدي تعال على الكافتريا تشرب ليك كابتشينو يعدل دماغك ويذكرك ايامنا الحلوة .. ( دي مصيبة شنو الوقعنا فيها دي )
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيس بوك
تويتر
انستقرام
يوتيوب
بنتيريست