|
|
|
 Re: أنت غلطان (Re: ابراهيم عبدالناصر)
|
تذهب الام وبنتها ناحية المجلس ولا تستطيعان ان تخفيان بشاشتهما مما يثير الفضول عند العم اوزيد .ز
ابو زيد : اها خير بشرن يا ريا وسكينة..
الام : صاحبك استوى على الاخر .. قال لنسمة تتزوجيني ؟؟
ابو زيد : طوالي كدا من اولها .. والله صحي انتي خطيرة الله يكافينا شرك ..
الام : هسع شري الدخلو شنو في الموضوع .. يا راجل انت ما توزن كلامك ؟؟
ابو زيد : شنو يا وليه عايزة تقلبيها غم ؟؟
الام : انا ولا انت قال عاوزة اقلبها غم ..
ابو زيد : كدي خلينا في المهم هو قال ليها عديل كدا عاوز اتزوجك ؟؟
الام : ما تستلها هي هدي قدامك ..
ابو زيد موجها الحديث لبنته : يا بت صحي قاليك عاوز اتزوجك ؟؟
بنت يخمر وجهها خجلا تتبسم وتداري وجهها بيدها وهي تومئ بالايجاب فقط دون نطق ..
ابو زيد : حلو طيب دي بداية مبشرة خلونا نشوف الخطوات التانية شنو ؟؟
الام : الخطوات التالنية ما تجي منه هو عاوزنا كمان نمشي نتقدم ليه ؟؟
ابو زيد : انا قصدي نحن نعمل حركات تدفعه هو عشان يعمل الخطوة الثانية على كل حال هو زي ما اتفقنا معاه حايجي يتغدا معانا بكرة الجمعة عشان نمشي الصناعية انا وهو .
الام : شوف هنا ياراجل انا من هسع بحذرك اوعى تجيبو سيرة الحادث ولا منو الغلطان تاني .. انا عارفة الكلمة دي بتجننك وعندك منها عقد .
| |
 
|
|
|
|
|
|
|
|
Re: أنت غلطان (Re: محمد بابكر محمد)
|
Quote: معاك لمن يرمى عليها اليمين
وهالك**************************
وتانى
******************
مودتى |
سلام محمد بابكر يفنان يا دفعة
تعرف لو ما كنت صفوة مريخابي كان .. بس خليها وقت تاني
| |
|
|
|
|
|
|
|
|
|
Re: أنت غلطان (Re: درديري كباشي)
|
في يوم الجمعة ا ظهرا ارتدى عصام جلابية سودانية بيضاء وطاقية مشغولة ووضع الشال السوداني في كتفه وتعطر وهو خارج قبل الصلاة يصادفه عاطف ..
عاطف : شنو يا ابو الشباب مجلينا كدتا مالك ما ننتظر نجهز معع بعض وبعدين نمشي سوى لصلاة الجمعة ..
عصام : انا ما قلت ليك الليلة مقيل برة مع اختنا وكدا ..
عاطف : طيب على الاقل نصلي الجمعة بعدين امشي
عصام : ياخ خلينا عاوز اغشى محلات الفواكه اشيل معاي شسوية قبل ما تقفل ..
حكاية الفواكه هذه خطرت لعصام فقط ليتخارج بها من صاحبه .. لكن قال في نفسه لما لا ؟؟ اصلا هو معزوم غدا عند الجماعة ما في مانع يأخذ معه مجموعة فواكه مشكلة تفاح موز حتى لو بطيخ ..
وفعلا خرج ومر بالمحلات اشترى الفواكه تركها في السيارة وذهب حتىت ادركته صلاة الجمعة قرب ديار عبلة اقصد نسمة وصلة عنالك وبعد الصلاة بفليل ..
كان يطرق في جرس غم ابو زيد ..
وبيته الذي دبت فيه حركة استقبال النسيب اي الصهر شبه المستوى فكانت تفوح رائحة البخور المعطر السوداني من الصالون ومن كل البيت ..
استقبل عم ابو زيد عصام وبدل تبادل عبارات من نوع : ليه تكلف نفسك يابني ..
وتدخل ام العيال التي تحاول تلملم ابتسامتها حتى لا تفضحها وهي فرحة بهذا الصهر الذي يبدو عليه الكرم : يا ولدي ليه التعب دا انت معزوم يعني ضيف ..
عصام : انا فاكر نفسي بقيت سيد بيت ..
ابو زيد : سيد بيت ونص كمان والله يا ولدي نحن سعيدين بمعرفتك ..
كانت نسمة تختفي خلف ستارة الغرفة تراقب في الموقف تمد رأسها وتسحبه كالحوار الجميل بين السحاب والقمر .. عصام لاحظ لهذا المنظر وكاد ان يقف مكانه يتأمل في هذا المشهد الساحر .. لولا جره عم ابو زيد من يده وادخله الصالون .
جلس عصام في الصالون بعد ما وضع شاله على حافة الكرسي ..
ساله عم ابو زيد عن أخته فقال له عصام انه لم يتمكن امس من زيارتها لانه الليل تأخر لكن اكيد اليوم سيمر عليهاا ..
فقال له ابو زيد خليها تتعرف على ناس البيت اصلا الغربة دي هم والناس لازم تتقاسم الهموم مع بعض .
عصام قال بالتأكيد حا اطرح عليها الموضوع .. موضوع التعارف ..
عصام : بس انا عندي طلب يا عم ابو زيد لو امكن .ز
ابو زيد: تفضل يابني ..
عصام : انا عاوز اطلب يد بتك الكبيرة نسمة ..
ابو زيد : بالسرعة دي يابني نحن عرفناك وعرفتنا امس ما تدي نفسك فرصة وتسأل ..
عصام انتو اسألوا زي ما عايزين لكن انا حددت وحكمت على اختياري من امس .. على كل حال الموضوع هو اقتراح قابل للمشاورة والرفض كمان حنكون زي ما نحن اهل ما يفرقنا شي ..
ابو زيد محاولا استدراك ذلته الثانية : لا لا يابني ما تفهمنيش غلط انا قصدي اجراءات روتينية تتم بس نخلي الموضوع كتمان يعني وانت عندك اهلك اكيد ليهم راي ..
وفعلا في هذه اللحظة تذكر عصام اخته التي لا يعجبها العجب يا مى قابلت اختياراته بالتبخيس وهذه لوحدها مشكلة قائمة بذاتها او عمته التي تعيش معهم هنا في الرياض وعندها ثلاث بنات في عمر الزواج والام كما يقول ناس الكتشينة قافلة عليه بل تفكر في زواج الاثنتين الاخرتين باعتبار انهه واحدة مضمونة لعصام..كل هذه الخواطر هيجها كلام العم ابو زيد ..
ابو زيد : شنو يابني سرحت كدا مالك ؟؟
غصام : كدي يا عم انت قول خير ..
ابو زيد يابني انا من ناحيتي ما عندي اي مشكلة طبعا يمين اعرسن ليك كلهن لو يجوز وتستاهل ..
عصام : يا سلام يا عم انشاء الله انا كمان ما بخزلك ..
| |
|
|
|
|
|
|
|
|
|
Re: أنت غلطان (Re: درديري كباشي)
|
يا الدرديري ازيك -
ياخي استمتعت كما لم اضحك من قبل !!
تعرف اكتر حاجة بتخليني تعبان من المنبر العناونين المضروبة - وبقيت اتغاظ لامن ألقي العنوان ما عندو علاقة بالموضوع
ياخي الواحد يغشك عشان تعمل كليك علي بوستو قوة عين كدة !!
وكحل للغبينة بقيت ما بعمل كليك علي اي بوست لزول قبل كدة استكردني !!
المهم شايف عنوانك (انت غلطان ) لي كم يوم - وقلت في نفسي - عليك الله انساك ! حسع بجوة بكون ما عندو علاقة بالعنوان -
وقلت كدي ادي فرصة لصاحب الغلط دا !
يا زول والله بديت القراية ما وقفت الا في الصفحة الرابعة بالرغم من ضيق الزمن والحال
ياخي شكرا شكرا شكرا علي المتعة والخستكة والحكي
| |
|
|
|
|
|
|
|
|
Re: أنت غلطان (Re: هيثم طه)
|
شوف يا خينا حكاية اولاد لا يملكون قرارم دي دقة قديمة ..
شيل الدقارات الختيتا للراجل في شارع مشروعو الحضاري ..
قال أختو وعمتو ومش عارف مين ؟
:
أها؟
| |
|
|
|
|
|
|
|
|
|
Re: أنت غلطان (Re: هيثم طه)
|
Quote: ]يا الدرديري ازيك -
ياخي استمتعت كما لم اضحك من قبل !!
تعرف اكتر حاجة بتخليني تعبان من المنبر العناونين المضروبة - وبقيت اتغاظ لامن ألقي العنوان ما عندو علاقة بالموضوع
ياخي الواحد يغشك عشان تعمل كليك علي بوستو قوة عين كدة !!
وكحل للغبينة بقيت ما بعمل كليك علي اي بوست لزول قبل كدة استكردني !!
المهم شايف عنوانك (انت غلطان ) لي كم يوم - وقلت في نفسي - عليك الله انساك ! حسع بجوة بكون ما عندو علاقة بالعنوان -
وقلت كدي ادي فرصة لصاحب الغلط دا !
يا زول والله بديت القراية ما وقفت الا في الصفحة الرابعة بالرغم من ضيق الزمن والحال
ياخي شكرا شكرا شكرا علي المتعة والخستكة والحكي |
سلام يا هيثم منور
نحيك على الصبر وطولة البال
الجماعة المعانا ديل ما خدنهم بالهداوة خطوة خطوة
| |
|
|
|
|
|
|
|
|
|
Re: أنت غلطان (Re: درديري كباشي)
|
Quote: شوف يا خينا حكاية اولاد لا يملكون قرارم دي دقة قديمة ..
شيل الدقارات الختيتا للراجل في شارع مشروعو الحضاري ..
قال أختو وعمتو ومش عارف مين ؟
:
أها؟ |
يا ملك عليك الله شفت ليك عرس تم بسهولة كدا دا اخوي واخوك وعقد واستلم .. الا عند تلاميذ محمود محمد طه
| |
|
|
|
|
|
|
|
|
|
Re: أنت غلطان (Re: درديري كباشي)
|
سلام يا درديري
تعرف انا بقيت شايل هم البوست ده
وخايف يغتس وانت تزعل وما تتمو
عشان كدي انا كل يوم بديهو ليك هبشه
متابعيييييييييييييييييييييييييييييييين
| |
|
|
|
|
|
|
|
|
|
Re: أنت غلطان (Re: محمد حبيب الله)
|
| Quote: متابعيييييييييييييييييييييييييييييييين |
ياخوي حصل الحبيب دا ..
إن ماطلت أكتر من كدا ياكا الملاقيهو قدام بيت عمك ^ _ ^ .
| |
|
|
|
|
|
|
|
|
|
Re: أنت غلطان (Re: درديري كباشي)
|
الام اراحها الاقتراح الاخير وقالت ليه : خلاص روح قله عايزين فرصة نفكر ونشاور مش نقع ليه بب كدا بعدين يسترخص البت ..
ابو زيد : يذهب الى الصالون ويقول لعصام : خير باني بس الجماعة محتاجين يفكروا يدرسوا الموضوع ويتشاوروا وانت ما تنسى انه البنت ممتحنة للجامعة ما عايزة حاجة تشغلها من قرايتها لغاية آخر السنة .
عصام : طبعا طبعا يا عم اصلا انا كنت ناوي اوصل صوتي وما منتظر رد هسع لانه انا نفسي مفروض اشاور اهلي واوريهم نيتي في الزواج لكن كنت زي ما بيقولوا ناوي اخت طوبتي وكدا ..
ابو زيد ينفجر ضاحكا من التعبير : تخت طوبتك ؟؟والله ذكرتني ايام الفرن زمن نميري الله يرحمه طبعا انتو جاكم مثلل كدا تختو طوبتكم لكن ما عارفين قصتها شنو ..
عصام : قصتها شنو اخت طوبتي دي ..
ابو زيد: زمن نميري كان في ازمة في الرغيف الناس كانت تقوم قبل صلاة الصبح ويمشوا يقيفوا صف في شباك الفرن .. اها لامن يجي وقت صلاة الصبح كل واحد يخت طوبة في محله عشان يمشي يصلي ويرجع ...
عصام محاولا الاعتذار : والله انا ما كنت عارف حكاية المثل دي وبعدين انات قاصد انه البنت ما شاء الله خلقه واحلاق اكيد خطابها كتار بس ما اكتر من كدا ..
ابو زيد : وانا ما زعلت يا ابني ولا انت غلطان انت ااستخدمت المثل في مكانه تماما بس انا حبيت احكي ليك قصته كمعلومة ما اكتر من كدا ..
اخيرا شعر عصام بالارتياح ..
تدخل ام عمار على الصالون وتنادي زوجها : ابو عمار تعال .
بعد ما يصل عندها تهمس له في انهم عايزين كسرة وسلطة .. يستأذن ابو زيد من عصام ويخرج ..
تحضر العروس نسمة بصحبة كاس العصير لضيافة العريس ومعها اختها الصغرى
| |
|
|
|
|
|
|
|
|
|
Re: أنت غلطان (Re: محمد حبيب الله)
|
Quote:
سلام يا درديري
تعرف انا بقيت شايل هم البوست ده
وخايف يغتس وانت تزعل وما تتمو
عشان كدي انا كل يوم بديهو ليك هبشه
متابعيييييييييييييييييييييييييييييييين |
حبيب ايها الحبيب
خليك قريب
متشكرين كل مرة
| |
|
|
|
|
|
|
|
|
|
Re: أنت غلطان (Re: درديري كباشي)
|
تنتزع نسمة ابتسامة عصام باتسامتها المشرقة ليكمل بعبارة : اهلا اهلا اهلا بالناس الحلوين ..
لم يلحظ وجود اختها من خلفها والتي تذكره بنفسها منحنحنة : احم احم نحن هنا برضو ..
عصام يضحك مرتبكا يحاول ان يتدارك : ما انا قلت الناس الحلوين كلهم يعني ..
بسمة : ماشي يا عم قدرت تزوق ..
تسلم الاختان على عصام وتجلسان قربه ..
وبعد قليل ينطلق نداءا من الام للبنت الصغرى : يا بسمة يا بنت .تعالي .ز.
بسمة : ايوا يا ماما جايه ..
واضح انه نداء الام كان مقصودا منه ترك خلوة للخطيبين لتداول ما تم حتى الان وتوثيقه بالعواطف اكثر ..
عصام مخاطبا نسمة : نقول مبروك ؟؟
نسمه : على ايه ؟؟
عصام : على الخطوبة طبعا ..
نسمة : خطوبة مين في حد خطب هنا .. ؟؟
عصام : اها كدا طيب عن اذنكم انا ماشي متغدي مع اختنا .. ويقيف .فعلا
نسمة : لا لا لا دقيقة دقيقة .. وهي تضحك .. شنو انت هارشنا بأختك دي كل مرة .. خلاص الله يبارك فيك ..
عصام : يعني انت موافقه ...؟؟
نسمة : انا ما قلت ليك رأي من امس لكن هي عادات وتقاليد ..
عصام : المهم خلينا في حبنا عاملة كيف انا امس نمت نوم مقطع كله احلام وردية وافلام هندية ..
نسمة : افلام هندية كيف يعني ؟؟
عصام يعني قصدي غنا ومطر ورقيص وحب وموسيقى ..
نسمة : وخيانة وانتقام وخطف وبعدها نكتشف انه نحن أخوان وانت سرقوك من امي في المستشفى ..؟؟ وتضحك ..
عصام : لا لا لا ما للدرجة دي بس غنى ورقيص ومطر وحب .. الظاهر عليك مدمنة افلام هندية ..
نسمة : كيف انا من متابعب قناة زي الوان ..
يفتح باب الشارع ويدخل عم ابو زيد ..
عصام : هو ابوكي دا لقى السلطة ورا الباب ولا شنو ؟؟
يضحك الاثنان وتنصرف نسمة للداخل قبل دخول الاب للصالون..
| |
|
|
|
|
|
|
|
|
|
Re: أنت غلطان (Re: درديري كباشي)
|
يدخل عم ابو زيد الصالون وتدور ونسة عادية يحاول فيها عم ابو زيد ان يعرف اكثر عن اسرة عصام ..
ابو زيد : اها يا ولدي انت ما قلت انت ابوك من عندنا من البلد وولد ناس منو ولا من وين هو ..
عصام : لا ابوي من البلد لكن من منطقة تانية وابوي كان استاذ الله يرحمه
ابوزيد : الله يرحمه يابني ويحسن اليه ..
عصام مواصلا : امي طبعا هي نفسها مدرسة اشتغلوا سوى و تزوجوا .. كانوا منتدبين في سلطنة عمان مع بعض ونحن درسنا الابتدائي هناك ..نحن اثنين سلمى اختي الكبيرة هي دكتورة طبيبة هنا في السعودية وزوجها طبيب كمان ..
ابو زيد : يعني انتو اتنين بس ابوك خلاكم صغار ؟؟
عصام : ابوي خلانا في الابتدائي وامي كملت تعليمنا وهي الحمد لله لازالت تعمل في ادارة التعليم رفضت الزواج لغاية ما اتخرجنا نحن واشتغلنا هي لازالت ترفض الزواج ..
ابو زيد : يا سلام نعم الام والله ومثال خير للتضحيات ..
عصام مواصلا : عندي عمتي هنا في الرياض مع زوجها .. وعندي خالي في المنطقة الشرقية ..
( يريد عصام ان يمهد على استعداده لاقامة الزواج بالرياض اذ ان الامر لايتطلب سوى زيارة للوالدة .)
في هذه اللحظة تحضر ام عمار تستأذنهم للحضور الى الغداء في الصالة..
ابو زيد : عندك مشكلة يا ولدي نتغدا كلنا مع بعض ..
عصام : لا لا لا اطلاقا يا عم نحن بقينا أهل ..
ويتجمع الجميع حول مائدة الغداء
وهي مائدة سودانية بحته قوامها .. ملوخية مفروكة بكسرة سودانية وصحن سلطة خضراء وصحن سلطة بازنجان ( اسود) صحن طبيخ بامية .. ولحمة محمرة بالصاج .. وصحن شطة بالليمون ..
وقد كانت ام عمار بارعة في الطبيخ واكلها لذيذ وقد عبر عصام عن ذلك قائلا : ما شاء الله تسلم الايادي ..انشاء الله البت تطلع لامها ..
ابو زيد مخففا دمه: اكان طلعت لآمها الله معاك يا اخوي ..
تتهيج ام : عمار هوي يا راحل شايف علي شنو ؟؟
ابو زيد : خلاص خلاص خلاص أنا غلطان . انا غلطان .
يوجم الجميع متفاجئون اول مرة يقر ابو زيد بأنه هو غلطان وبعد صمت حتى الام تندهش قائلة : قلت شنو انت غلطان ..؟
ابو زيد يتلفت بدهشة وحرج كأن الكلمة خرجت من لسانه دون وعي منه .. لكنها تصبح نكته يضحك عليها الجميع من جديد ..
| |
|
|
|
|
|
|
|
|
|
Re: أنت غلطان (Re: درديري كباشي)
|
بعد الغداء والتحلية والشاي خرج ابو زيد وعصام الى المنطقة الصناعية لاستلام السيارة من ورشة السمكرة .
ومن هناك استلم ابو زيد سيارته وتوادع هو وعصام على امل اللقاء في اوقات اخرى مع مواصة الاتصال
اصبح عصام مع نفسه يريد ان يرتب الموضوع وكيف سيبدأه .
اول شئ فكر فيه هو شقيقته العنيدة التي ترى ان العروس التي تناسبه لم تخلق بعد فهي مستكثراه على كل بنات حواء اللاتي يعرفهن من زميلات الجامعة الى بنات الاهل .
اي بنت يؤشر عليها كثير ما ترد بهزة من رأسها فقط دون حتى ان تبدي اي سبب ..هو لا يريد ان يخسرها .. هو ايضا يحبها بقدر ما تحبه او اكثر .. جمعتهما ظروف قاسية هم الاثنين مع والدتهما ... تضحيات الام جعلت كل واحد فيهما يحس بأن الآخر لاثمن له .. تذكر كيف عند زواج اخته قفل عليه الغرفة وبكى .. وظل لفترة طويلة يكره دكتور علاء الدين زوجها كانه سرقها منهم .. لكن بمرور الايام وبطيبة واخلاق علاء الدين العالية تغيرت مشاعره نحوه .. بمعنى عقدة خوفه على اخته وحبه لها الشديد انحلت بزواجها من رجل يحبها ويناسبها .. لكن المشكلة الآن كيف سيعالج عفدة اخته من حبها له واستكثاره على الناس بل على كل بنات حواء ..
تحرك عصام بسيارته ناحية بيت اخته وظل طيلة الطريق يفكر في خطة تجعلها تقتنع بنسمة وتخطبها له ..
اخيرا اهتدى لفكرة اطمأن لها .. هو ان يعرض نسمة واهلها على اخته دون ان يبدي اي رغبة في اي منهن .. واكيد هي بعد ما تنفرد بالبنتين ستقتنع بهن .. اي يحاول ان يجعل المبادرة تأتي منها هي فقط ... خطة جيدة وفيها مغامرة . لان أخته ربما رشحت له الاخت الصغرى .. لكن اذا وصلت لهذه المرحلة هذا لوحده نجاح لانه من السهولة ان يقنعها بميزات الكبرى ..
اطمأن للخطة لكن ينقصه شئ واحد ما هو المدخل .. فكر قليلا ثم اهتدى ايضا للفكرة ..
وهو ان يجعل المدخل خالهم سليمان في ليبيا ..هو ان يتصل به امامها ويحكي له عن ابو زيد صديقه والصدفة التي جمعته به .. بالتأكيد سيطلب منهم الخال زيارته والتعرف بأسرته ومواصلته .. بعد ذاك سيأخذ اخته لزيارته اسرة ابو زيد تلبية لرغبة الخال والامور ستسير كما خطط لها بأذن الله ..
هكذا امن على فكرته .. اول خطوة غشى مكان لعب الاطفال واشترى لعبتين لودي اخته كما اعتاد كل ما زراهم مرة او مرتين في الشهر.. كما غشى محل للبقلاوة واشترى منها ..
وتحرك ناحية العزيزية حيث تقطن اسرة شقيقته ..
وصل وطرق الباب سرعان ما ضج البيت بضجيج الصغار الفرحين بخالهما ..
وعناق اخته المعتاد وهي تحسس جبهته كأنه مصاب بالملاريا تريد ان تطمئن عليه دون حتى ان يشكي ..
يقاطعها هو : انا كويس يا سلمى الحمد لله .. وكيفك يا دكتور .. اهلا يا باشمهندس ..
يدخل الصالة يعطي الطفلين لعبتيهما .. وتجلس اخته امامه تضع يدها على خدها وهي تنظر اليه بابتسامتها المعتادة وكأنه غاب عنها عام مع انه قبل اسبوعين كان بائن معهما خميس وجمعة .
تقول له : عصومي يا اخوي انت عيان ؟؟ مالك لونك شاحب كدا ..
عصام ك لا الحمد لله انتا صحتي زي الفل كيف انتو عاملين همس في نفسه ( معقولة اخنت زي دي تفكني لمرة تانية ؟؟)
| |
|
|
|
|
|
|
|
|
|
Re: أنت غلطان (Re: درديري كباشي)
|
ابو الدرادر
أوعه
وإياك تكون ( أنا غلطان ) الأخيرة دي نهاية القصة
تكون حرقت صليبنا ظاااااااتو
وخميسنا راح شمار في مرقة
عليك وااااااااصل
تِم لينا الويك أند دا ،،، وبعد داك يحلها الحلال
| |
|
|
|
|
|
|
|
|
|
Re: أنت غلطان (Re: سيف الدين محجوب)
|
Quote: ابو الدرادر
أوعه
وإياك تكون ( أنا غلطان ) الأخيرة دي نهاية القصة
تكون حرقت صليبنا ظاااااااتو
وخميسنا راح شمار في مرقة
عليك وااااااااصل
تِم لينا الويك أند دا ،،، وبعد داك يحلها الحلال |
لا متخافش يا ابو السيوف رحت اشرب موية واجي بس .. الظاهر اتعقبنا لانه انا ختيت صفحة ثانية قبل مداخلتك ..
| |
|
|
|
|
|
|
|
|
|
Re: أنت غلطان (Re: درديري كباشي)
|
قرر عصام ان يبدأ خطته بأن يتصل بخاله في ليبيا امام سلمى وقبل ان يتصل تحضر سلمى من المطبخ وهي تحمل صينية الشاي .. يبادر عصام بلاتصال بخاله .. قبل ما يرفع خاله الخط وقبل ان تفتح سلمى اي موضوع من مواضيع الجرجرة التي تجيدها عليه ان يضع الامور وفق ترتيبه هو .. هي نفس الاجراءات ممكن تحدث لكن لو اختلف الترتيب فقط يمكن يخرب الموضوع ...
عصام : سلمى تصوري امس لقيت واحد صاحب سليمان خالي بالصدفه كان صاحبه زمن كانوا في البلد زمان وليهم كم وعشرين سنة ما اتقابلوا وبيعرف امي وخالتي سعاد ..اها قال لي سلم علي خالك ..
سلمى محاولة المقاطعة : ولا قيتو وين دا .. يومئ لها عصام برأسه بأن الجرس يرن .
يفتح الخطأ من هناك ..
الخال: الو منو معاي .
عصام : كيفك يا خال انا عصام ؟؟
الخال: اهلا عصام كيف حالك وكيف حال اختك سلمى ..
عصام : كويسين جدا .. بس أمس بالصدفة قابلت واحد قال صاحبك من زمان اسمه ابو زيد ..
الخال : ياخي ما معقول بالله قابلت ابو زيد في الرياض ... يا سلااااااام ياخ زمن ..
عصام سعد جدا بحرارة ترحيب الخال هو خاف ان تكون الصداقة عابرة والخطة تتلف ..
عصام : اها يا خال قال مشتاق ليك شديد وسألني منك ..
الخال: ياخي دا ما كان صاحبي ..
عصام : وجم من هذه المقاطعة ..
الخال مستأنفا : ياخي دا كان اخوي عديل ويمكن اكثر من كدا كنا نبيت سوى اما في بيتنا او في بيته .. ياخي ما بنتفارق اقول ليك ..
عصام : المهم انا بلغتك وحا ارسل ليك رغمه .......ز( نظام جرجرة)
الخال : لا لا لا كلمتني شنو لازم تمشوا تزوره انت وسلمى وتتعرفوا عليه وعلى اسرته ياخ دا راجل ما ساهل ياخ ..
عصام : انا ما عندي مشمكلة ممكن امشي لكن سلمى هاك كلمها براك ..
الخال : اديني ليها ..
سلمى : ازيك يا خال كيفك كيف بثينة واولادها مشتاقين ياخال ..
الخال : اهلا يا دكتورة يا بتي .. ياخ عندي صاحبي دا امشوا زوره انتي وعصام واتعرفوا بيه ياخ دا صاحبي شديد أمك ذاتها بتعرفه اشعد المعرفة .. وين دكتور علاء نسلم عليه ..
ويسلم الخال على دكتورر علاء وتنتهي المحادثة .
اما سلمى فتعود للتحقيق كالعادة
سلمى : اها دا منو صاحب خالي اللاقيتو دا ولا قيتو وين ..
عصام : والله صدفة عجيبة حصل لينا حادث مع بعض مع التحقيق انت وانت من وين طلع بيعرفنا وبيعرف خالي وصاحبه .. المهم الآن مع الخال زي ما سمعتي ..
سلمى : اها وهو ساكن وين ..
عصام : يتخيل لي زي القال كدا ساكن في غبيرة ( كانه ماكان متغدي معهم اليوم .. اسكت اسكت )
| |
|
|
|
|
|
|
|
|
|
Re: أنت غلطان (Re: درديري كباشي)
|
قضى عصام تلك الامسية في بيت شقيقته حتى موعد العشاء .. وبعد العشاء شقيقته كعادتهاحملته كمية من الكيك والبسكيوت لاصحابه في السكن مع دعوتهم لتناول الغداء يوم الجمعة ..
خرج منها بعد ما اتفق معها بأن يأتي ليأخذهم يوم الاثنين لاسرة ابو زيد فهو اليوم الذي لا تعمل فيه مساءا ذلك لتلبية رغبة الخال برا به و بوالدتهما كما زعم لها ..
خرج من عندها وهو يعتقد بأنه انجز الجزء المهم من خطته ولكن باقي الجزء الاهم والحساس ..
قاد سيارته نحو بيته وفي الطريق فكر كيف سيطلب من اسرة ابو زيد ان لا يأتوا بسيرة معرفته السابقة ..
اول ما اتحرك من بيتها رن تلفونه رفعه ليجدها ست الحسن كأنها كانت تراقبه بكاميرا خفية هو كان خايف ان تتصل به وهو عند اخته فتخرب الخطة لانها اكيد ستتحقق وستقرره ..
عصام بما انه لايستطيع القيادةة والكلام في التلفون واي كلام ومن من ؟؟ ركن سيارته على جمب وشاهد مقهى في الشارع جلس عليه واعاد الاتصال بنسمة ..
عصام : الو كيفك يا روحي ..
نسمة : اهلا يا قلب كيفك طلعت من اختك ..؟؟
عصام الحمد لله كنت خائف تتصلي بي وانا معاها ..
نسمة : ليه تخاف من شنو ..
عصام : لا هي بس انسانة غيورة شديد وبتغير علي لو عرفت في بنت بتتكلم معاي حا تطين عيشتها ..
نسمة : وهي تضحك الحمد لله ما اتصلت بيك وهي عيشتي ما ناقصة طين ..
عصام : سلامة عيشتك .. هي ما للدرجة دي بس تعرفي نحن اتنين فقط وما عندنا غير بعض ..
نسمة : آىي ابوي شرح لينا وربنا يرحم والدك ويعطي أمك العافية تصدق بقيت متشوقة اشوفها ..
عصام : اكيد حاتشوفيها قريب .. كويس انك اتصلتي .. انا واختي اتفقنا حانزوركم يوم الاثنين في المسا للتعارف فقط ..
نسمة : تشرفوا والله ..
عصام : بس عندي طلب انا ما ورتيها انه زرتكم وتعرفت بيكم نحن فقط جايين على رغبة خالنا وهو صاحب زي ما عارفة ..
نسمة : انا من ناحيتي ما عنديي مشكلة وامي بكلمها لكن ابوي دا تكلمه انت لانك عارفه بتاع عنقدة شوية ..
عصام ضاحكا : ما في مشكلة كدا انتي حليتي لي نص المشوار ..
يلا بعد كدا تصبحي على خير عشان انا حا اسوق ..
نسمة : وانت من اهله .
| |
|
|
|
|
|
|
|
|
|
Re: أنت غلطان (Re: درديري كباشي)
|
يواصل عصام قيادة سيارته نحو بيته
ولا زال عقله مشغول رغم ان الامور بدأت تضح وتترتب بالتدريج
تذكر مناول اولوياته ان ينقل وجهة نظره في زيارة اخته بالطريقة التي خطط لها واقناع عمه ابو زيد ..
هو يعلم انه قادر على ان يفرض خياره على اهله ويتزوج البنت التي تعجبه ..
لكن هذه حياه طويله يجب ان تبد
ا برضى وحب الا تحولت لجحيم ..
وصل عصام بيته وقدم الكيك والحلويات لاصحابه ودخل لينام ..
| |
|
|
|
|
|
|
|
|
|
Re: أنت غلطان (Re: درديري كباشي)
|
طيب يا الدرديري
هو مشا ينوم نحن ننتظر لي بكره
ولا تتمها
تحت السطور
ــــــــــــــــــــــــــ
قمه في الشحتفه
وعمليه رايعه (الشحتفه)
والله انت احسن كاتب سيناريو في السودان
| |
|
|
|
|
|
|
|
|
|
Re: أنت غلطان (Re: درديري كباشي)
|
عصام وضع الكيك والمخبوزات التي ارسلتها معه شقيقته لاصحابه في الصالة ودخل على غرفته لينام ..
عاطف لم يساله او يتدخل كالعادة يبدو انه شعر انه عصام اصبح عنده خصوصية لا يريد اشراكهم فيها في الوقت الحالي على الاقل لذلك انكمش عن ملاحقته والهزار معه كالعادة
في هذه المرة تدخلل خالد قائلا : شنو يا ابو الشباب انت اليومين ديل بقينا ما بنشوفك تجي من برة وتدخل غرفتك على طول .. بقيتت تحب ولا شنو ؟؟
عصام : متبسما حب شنو يا ابو وليد هو البلد دي فيها طريقة حب ..
خالد : يعني الحب داير ليه بلد ما بقى بالنت وشئ فيس بوك وشات وتقدر تحب ليك واحدة في استراليا وانت في عد الغنم ..
عصام يكتفي بالضحك ويقول له شوية صداع بس يا خالد .. يلا تصبحوا على خير ..
دخل عصام غرفته وغير ملابسه ..
رقد رن تلفونه صوت رسالة مكتوب بها ( وصلت سالم يا حبيبي ؟؟) نسمه ..
قال في نفسه : هذه البنت كتفته بحبال وردية لو كانت كبيرة في السن كان قال عليها متمرسة ولها خبرة في ايقاع الرجال في شباك حبها .. لكنها بنت صغيرة وواضح انه هذه اول تجاربها وتصرفاتها عفوية مما يدل على صدق مشاعرها .. لحسن الحظ هو يبادلها نفس الشعور .. شرط نجاح اي علاقة ان يكون هناك توازن في المشاعر لايحب احد اكثر حتى لا تفشل ..والآن هل يرد الرسالة برسالة ام يتصل .. هو شعر بأنه اشتاق لصوتها رغم من انه كان يحادثها قبل اقل من ساعة ..
واخيرا تناول التلفون ورن :
| |
|
|
|
|
|
|
|
|
|
Re: أنت غلطان (Re: درديري كباشي)
|
عصام : الو كيفك يا نسمتي ..
نسمة : اهلا يا قلب كيف وصلت خايفاك تكون مشغول بالكلام يحصل ليك حادث ..
عصام : مدام ابوك نايم في البيت حا اعمل حادث مع منو ؟؟
ينفجر الاثنان ضاحكان ..
نسمة : الليلة كان سمعك كان طين عيشتك ..
عصام بس المرة دي لو لاقاني وعمل معاي حادث انا معترف مقدما انه انا الغلطان ..
نسمه : ليه هرشت منه ولا شنو ؟؟
عصام : لا المرة دي عندي ما يشغلني ويخليني اعمل حادث اول ما كان فيه .شئ يشغلني.
نسمه : هوي ركز في سواقتك ما تفكر كتير تاني لو حصل ليك حادث انا راح اموت قبل ما اعرف الحصل عليك شنو ؟
عصام : الله يخليك لي .. انشاء الله ما يحصل لينا اي شئ قبل ما ندخل جنتنا.
نسمه : وحتى بعد ما ندخلها انشاء الله .
عصام : المهم كلمتي امك بحكاية انه انا ما زرتكم قبل كدا ..
نسمه : ايوا كلمتها هي ما رضت قالت نحن عملنا شئ غلط ؟؟ شاب ابوك تعرف عليه عزمه غدا وين المشكله ؟.. لكن انا قلت ليها بس لانه هو ما قال لاخته انه بيعرفنا وزارنا .ز وراح تزعل منه لو عرفت ..
المهم في النهاية اقتنعت رغما عن انها قالت ما مرتاحة للموضوع .. وقالت انا ما راح اقول جانا او ما جانا لكن لو اختك فتحت الموضوع هي ما راح تكذب ..
تبسم عصام وارتاح لاصالة الام وقال لنسمة : انشاء الله ما راح تجيب سيرة الموضوع لانه ما في حسابها اصلا ..
المهم تصبحي على خير يا روحي سلمي على الجماعة ..
نسمة : وانت من اهله بس ما تنسى انت تكلم ابوي .ز وماا تطول من الاتصال .
| |
|
|
|
|
|
|
|
|
|
Re: أنت غلطان (Re: درديري كباشي)
|
عد يوم جميل من ايام عصام وسلمى ايضا وبعد ان تعلقت اسرة ابوزيد بسلمى وعيالها .. وبعد الحاح واصرار انتهى بأن تتعشى سلمى وااولادها وعصام معهم .
سلمى كانت تتلقى اتصال على رأس كل نص ساعة من زوجها يطمئن على سبب التأخير وهي تطمئنه بأن الامور بخير وبعد تصل راح تحكي له .. اختلطت المشاعر عنده بين قلق وفضول وتشوق .
اما عصام أخيرا يطلق سراحهم ويخرجوا من اسرة ابو زيد .. تلقى نظرات عتاب من نسمة على استعجاله للخروج فهي لم تفهم سبب استعجاله .
حتى انها صرحت وهي تودعهم مع اهلها قائلة : الظاهر عصام مل مننا .. هذه العبارة كانت خطأ استراتيجي ارتكبته في حقها وبمعايير سلمى طبعا ..
في الطريق بادرت سلمى بالتعليق لعصام : رأيك شنو في العائلة دي يا عصام ؟
عصام : ناس طيبين ويتحبوا .
سلمى : يعني فكرت في الانا فكرت فيه ؟
عصام : انتي فكرتي في شنو ؟؟
سلمى : انا عجبتني البت الصغيرة ..
عصام في نفسه : افا؟؟ دا الكلام الكنت خايف منه وقال :.الصغيره ؟ الصغيرة كيف يعني .
سلمى : ياخي حلوة وعسولة وحنينة شفت الاولاد حبوها كيف واتعلقوا بيها ؟؟
عصام اتعلقوا بيها لانها اهتمت بيهم ولعبتهم ..والكبيرة مالها .؟
سلمى : ما عجبتني لانها طول اليوم ما غمدت عيونها منك عينها قوية وحاسة انها خفيفة ..
عصام متغاظ : خيفية شنو يا بت الناس .؟
سلمى : خيفية وشوف بكل جراءه ونحن طالعين قالت عصام مستعجل الظاهر مل مننا .
عصام : وفيها شنو ما دا كلام عادي لانه انا كل مرة بقول ليك ارح ؟؟
سلمى : طيب كيف تقول كلام زي دا وهي اول مرة تشوفك كان ما خفيفة ..
عصام : يا بنت الناس انا عايزها خفيفة ..
سلمى : شنو هو انت عايزها خفيفة شوربة هي ؟؟
عصام : سلمى والله انا عا########ي الكبيرة ويمكن تكون عاينت لي لانه لاحظت انا اهتميت بيها ..
سلمى : يا اخوي ما في بنت رزينة وتقيلة تقعد تركز نظرها على شاب كدا اول مرة تشوفه وما في شي يربطها بيها .
عصام : يعني يا سلمى لو قلت ليك اخطبيها لي ما راح تخطبيها ..
سلى : طبعا الخيار هو خيارك لكن انتا لو اخترت ليك واحدة من الاثنين راح اهخار الصغيرة .
عصام : طيب انا لو كنت عاوز الكبيرة عجبتني ..
في هذه اللحظة تكون السيارة قد وصلت بيت سلمى .. ينام الولدان في المقعد الخلفي . يحمل عصام الولد الكبير كما تحمل سلمى ولدها الاصغر وهم يدخلان ناحية البيت
سلمى شوف هنا يا عصام يا اخوي واحد من اتنين البت ما بتنظر بجرأة لولد الا واحد من اتنين اما يكون في علاقة تربطهم مع بعض او تكون البنت خفيفة ..
عصام : نفسي اعرف يعني شنو خفيفة ..
سلمى : خفيفة يعني عندها علاقات سابقة وتجارب غارامية واتخطت حاجز الخجل من زمان ..
شعر عصام ان تبرير سلمى قوي وسيطير منه نسمه وهو شئ من الصاح اذا ليس امامه سوى الاعتراف بعلاقته ..
فقال يا سلمى طيب انا ممكن اعترف بشئ :
سلمى اتفضل :
عصام : نعم في علاقة تربطني بنسمة وانا اعترف انه انا غلطان اكثر من مرة .. والله انتي انجح دكتورة نفسية في العالم .. نقتنيني زنقة . ما عادية ..
سلمى : طيب طالما قلت كدا وانا بقول ليك مبروك عليك نسمة لانه البنت واضح انها تحبك حب ما عادي ..
عصام بفرح دون ارادة منه يحضن اخته بحب ويشكرها ..
| |
|
|
|
|
|
|
|
|
|
Re: أنت غلطان (Re: درديري كباشي)
|
وقف كتور علاء زوج سلمى مندهشا من منظر الاخوين يتسالما بالاحضان وبفرح من عصام ويعلق
علاء : شنو يا جماعة ما تدخلونا معاكم الفلم السعيد دا ..
سلمى : صاحبك دا تقريبا وقع على وشه بارك ليه ..
علاء : الف مبروك وقع وين ؟؟ ياهو عند صاحب خالكم ؟؟
سلمىى : ياهو ذاتو صاحب خالنا طلع عندو نجفتين وعصام وقع في واحدة منهن .
علاء : حلو طيب ما تشوفو لينا التانية ..
سلمى بغيظ حقيقي : هوي عايزني اكرهم ليه بعد ما حبيتهم ..
عصام: هوي يا دكتور ابعد بعيد من حاجاتني نحن ما صدقناهم عجبوا سلمى .
سلمى : يعني انا ما في حاجة بتعجبني ؟
عصام : لا لا لا انا قصدي ما بيعجبك الا الشى السمح ونادر .
سلمى : كدا معليش اها خلونا في المهم الخطوة الجاية شنو .
عصام نورونا انتو انا غايتو ما عرست قبل كدا ؟؟
سلمى : حدد لينا معاهم مواعيد نمشي ليهم يوم الخميس مثلا نطلب البنت رسميا .. بعداك نتصل بعمتي وبناتها وخالي من الدمام واولاده نمشي نعمل خطوبة ؟؟
عصام : وعمتك حا تعملي معاها كيف ؟؟
سلمى : كيف في شنو يعني ؟؟
عصام : حا تكلميها كيف وهي طول عمرها مسمياني عريس سناء عريس سناء ..
سلمى : ما عندها معانا حاجة وخليها علي ولا بيهمك .. واصلها كارهاني بدون سبب خليها تكرهني بسبب المرة دي ..
شكر عصام شقيقته سلمى التي سهلت له الامور بأكثر مما كان متوقعا واهم شئ تولت عبئ عمته المرأه الصعبة .
| |
|
|
|
|
|
|
|
|
|
Re: أنت غلطان (Re: درديري كباشي)
|
العريس المنتشي عصام شكر شقيقته وودعها وخرج ناحية بيته سعيد بانجازات اليوم
هنالك شخص آخر كان في شوق جارف ليعرف نتيجة هذه الزيارة وما هو الانطباع الذي تركته.
بالطبع كانت نسمة بدرجة أعلى ثم باقي عائلتها وقبل ما تتحرك سيارىة عصام من امام بيت شقيقته يرن تلفونه ..
عصام : الو نسمه كيفك يا حبنا ؟؟
لهجة عصام الفرحة المنتشية وكلمة حبنا بدلا عن حبي كانت كافيه لتنقل لها الانطباع من اللقاء .. لكنها كانت في شوق للتفاصيل ..
نسمه : اها كيف يا عزيز .. رأي اختك فينا شنو ؟
عصام : اختي خطبتكم لي قبل ما اسألها انا فرحانه بيكم فرح شديد ..
نسمه : خطبتنا ليك ؟؟
صيغة الجملة اربكت نسمة واثارت غيرتها .. عرف عصام خطأه وحاول ان يتدارك ..
عصام : بصراحة اختي معجبة بيكم انتو الاثنين وقالت لي لازم تختار عروسة واحدة من الاثنين .. وطبعا انا اخترك انتي بدون تردد والامور انشاء الله راح تمشي ويمكن يوم الخميس راح نجي اختي مع زوجها عشان نتقدم ليك رسمي ..
نسه : الحمد لله الامور مشت تمام ..
عصام : الله يخليك لي يا احلى نسمة في الوجود .. خلينا اسوق بتصل بيك بعد ما اصل ..
نسمه : خلاص باي يا حب ..
بينما نسمة تتحدث معه كانت امه تلف خارج غرفتها تمد رأسها في كل مرة هي نفسها تريد ان تعرف نتيجة الزيارة وانطباع اخت عصام عنهم واخيرا تدخل بعد ان تأكدت انه بنتها قفلت التلفون ..
ام عمار : اها شنو يا بنتي ؟ كيف ؟؟
نسمة : اسكتي ساي يا امي قال اخته معجبة بينا اعجاب ما عادي بيك وانتي وبي ابوي وببسمة و قالت لعصام لازم نخطب ليك ....................... نسمة دي ..
الام : مشاء الله يابتي انت ما نجمة معقولة في زول ما يشوفك ويتعلق بيك ..
| |
|
|
|
|
|
|
|
|
|
Re: أنت غلطان (Re: درديري كباشي)
|
مرت الايام التالية سريعا
بالتأكيد تخللتها اتصالات بين الاسرتين
ويبدو ان الاسرتين أخذتا على بعضهما البعض
اصبحت سلمى تتصل على ام عمار كأتها خالتها الحقيقية تشاورها في الامور النسائية
كان عصام ونسمة اكثر سعادة بذوبان الحواجز وانقتاح الاسرتين على بعض
اتصل عصام وشقيقته على والدتهما وبشروها بالخبر السعيد .. فرخت ام عصام يما فرحا بهذا النبأ .. لايسعد الام سوى خبرين نجاح وابنائها وزواجهم ..
تذكرت تماما عم ابو زيد صديق شقيقها سليمان وفرحت بنسبه .
كانت ام عصام تخاف ان يرضخ لضغوطات عمته التي معهما بالرياض فيخطب واحدة من بناتها ..
هي لن تستطيع ان تمنع ذاك الزواج ان تم بناءا على رغبة عصام . لكن عليها ان تقول على ولدها السلام .
فهي تعرف عمته سعاد .. يامى ذاقت منها الويل منذ كان كانت عروس لشقيقها أبو عصام .. بل لم تتوانى سعاد في كثير من المناسبات ان تصرح في ان ام عصام هي من تسببت في قتل شقيقها .. بنقتها الكثيرة جابت له امراض القلب وقصرت عمره حسب زعمها ..
كظمت ام عصام غيظها واخرصت تلك العمة السوداية بصمتها وصبرها وهي تربي ولديها لتجعل منهما بشر يتمنى الجميع ويتشرف بنسبهما ..
هل بعد كل هذا الجهد والصبر والتحمل تقدم ولدها المهندس الناجح على طبق من ذهب لعدوتها الازلية سعاد ... حمدت الله كثيرا وتحمست لهذه الخطبة ورقص قلبها طربا وفرحا وتشوقت لزيارة الرياض لتكمل زواج ابنها عصام .
جاء الخميس المتفق عليه .. اشترت الدكتورة سلمى بعض الهدايا الصغيرة مع شبكة مؤقته .
اخبرت ام عمار بعض جاراتها المقربات .
وحضر عصام واخذ احته وزوجها الى بيت ابو زيد للخطوبه..
تمت الخطوبة فرح الجمع اتصلت سلمى بأمها لتخبرها بتمام الخطوبه ....طلبت منها امها ان تفتح مكبر الصوت في الجوال .. تفعل سلمى ذلك ولا تفهم السبب .. الا بعد ان انطلقت زغرودة من السودان عبر الاثير من ام عصام .. انفجرت دموع سلمى مزيجا من الفرح والحزن .. هللت أم عمار بهذه البادرة الجميلة من ام عصام وردت لها بزغرودة مثلها ..وكانت بادرة جديدة ان تنطلق زغرودات بين الخرطوم والرياض في ذات اللحظة لذات المناسبة
انفجر الجميع فرحين بهذا الفرح المعدي المشع .
في الصالون قوبلت الاصوات في مجمع الرجال بالابتسامات ..
استرق عصام النظر نحو عروسته اكثر من مرة .. كانت في آية الجمال وهي ترتدي ثوبا ورديا من فساتين الخطوبة الفخمة وكانت تسريحتها رائعة ابرزت جمال شعرها الناعم الحالك السواد .. وقليل من المكياج دل على براءتها وجمالها الطبيعي أخذت بلب كل الحضور ..
علقت له اخته بعد ذلك وقالت له صدقت يا عصام نسمة اجمل من اختها بكثير بل يمكن اجمل بنت من بين كل معارفنا وما فيها اي كلام ..
قال دكتور علاء .. والله يا عصام ماك هين صمت دهرا وعزل بدرا ..
سلمى : شنو المثل دا قاطعوا من راسك ..؟
د علاء .. وانا قلت دا مثل ؟؟ وانفجروا ضاحكين .
دار هذا الحوار وهم يعودون ناحية البيت ..
غصام : اها هسع باقي عقبة واحدة .. عمتك كيف ؟؟
سلمى : قلت ليك سيبها علي ما تشيل هم ؟
| |
|
|
|
|
|
|
|
|
|
Re: أنت غلطان (Re: درديري كباشي)
|
وصل الوفد الصغير الى بيت سلمى ..
قالت سلمى بعد كدا ممكن نتصل بالجماعة نكلمهم او نكلم خالنا سليمان في ليبيا دا اهم واحد لانه هو سبب العلاقة وبعدين نكلم خالنا عثمان بالدمام بعدين نكلم عمتي سعاد ..
عصام مقاطعا : لا لا لا عليك الله اول نبدا بعمتي ..
سلمى : انت مالك شايل ليها هم كدا ياخ ..؟
عصام : مش عارف عاملة لي قلق شديد .
سلمى : خلاص اول خلينا نبشر خالنا سليمان اولا ..
ويتم الاتصال ..
سليمان : الو من و معاي .. سلمى اهلااان ازيك يا بنتي كيف عاملين انتي والاولادك ودكتور علاء ..
سلمى : كويسين الحمد لله وكيف بثينة والاولاد ..
سليمان : الحمد لله ..
سلمى : طبعا يا خال عملنا بوصيتك وزرنا صاحبك ابو زيد في بيته واتعرفنا باسرته ..
سليمان مقاطعا : بالله زرتوه الله يخليكم هو اصيل ودا معروف عمري ما حا انساه اليكم .. بالله شفتو الراجل دا طيب كيف ؟؟
سلمى : راجل طيب واسرته احلى ما يكون ..
سلمىان : اكيد هو متزوج بنت عمه واكيد حتكون مرة فاضله مثله ..
سلمى : المهم نحن كلنا كدا عجبتنا اسرته والله ..
سليمان : لازم تعجبكم عشان كدا انا كنت مصر تزوروه .
سلمى : المهم اعجابنا باسرته فات حد الاعجاب واتطور اكثر من كدا ..
سكت سليمان برهة ثم : تقصدي شنو .؟
سلمى : عصام اخوي عجبتو بنت صاحبك ابو زيد وخطبها .
سليمان : شنو ؟؟؟؟؟؟؟؟؟؟؟؟؟؟؟؟؟
قال عبارة شنو بحدة واستنكار واندهاش ..
سلمى : ابو زيد صاحبك عندو بنات جميلات جدا وعصام اخوي اعجب بواحدة وقال دايرها ..
سليمان لازال مرتبكا : دايرها .. ؟؟ يعمل بيها شنو؟ .. اقصد كيف يعني ..؟
سلمى : عصام اخوي بنت ابو زيد عاوز يتزوجها ..
سليمان : غاضبا : انتوا تعملوا حاجات ساكت من راسكم ما بتشاوروا الناس ؟؟
قبل هذه الجملة كانت سلمى قد فتحت مكبر الصوت ليسمع الجميع رد فعل خالهم ( الما ياهو) الغريب .
سلمى : انت بنفسك ما قلت روحوا ادخلوا واتعرفوا بالراجل واسرته وهو راجل فاضل ؟؟
سليمان : لكن ما قلت روحو عرسوا بناتو .
سلمى بدأت تضايق من رد خالها الغريب : على كل حال يا خال الزواج قسمة ونصيب ونحن ما رحنا عنده عشان نعرس بناته نحن رحنا نتعرف بيه ونعمل معه علاقات عشان نبرك انت ونبر امي في شخصك بس ما اكتر من كدا .. عصام شاف البنت واعجب بيها وقال هي تتناسب معه خلقا واخلاقا .. ونحن قلنا عشان علاقة الاب معاك ما راح نحتاج نسأل .. واضيف حاجة يا خال .. انا وعصام ما هم الطفلين الصغيرين الكنت بتفسحهم بالموتر وتاخدهم معاك للمولد .. انا مرة ناضجة ببيتي واولادي وشغلي .. وعصام بقى مهندس مسؤول ويعمل تحت ادارته عدد من الموظفيين والفنيين...
سليمان افحمته هذه المحاضرة التي لم يكن متوقعها وحاول ان يتدارك غلطه ..
سليمان : معليش يا بنتي انا غلطان كان مفروض افرح وابارك ليكم انتي وعصام لكن الشيطان شاطر كدي اديني عصام ابارك ليه .
عصام : ايوا معاك يا خال انا سامعك ..
سليمان : الف مبروك يابني وربنا يتمم على خير بالله رسل لي رقم ابو زيد عشان ابارك ليه ..
عصام : ابشر يا خال انشاء الله يصلك الرقم بعد شوية ..
وقفل الخط ..
عصام : الله هو ماله الخال اتصرف كدا وزعل مفروض يفرح ..؟
سلمى : الظاهر هو كان خاتي باله عليك لواحدة من بناته كمان ..
علاء الدين : يعني الخال برضه كان قافل عليك ..
عصام : شنو هو الدنيا كلها قافلة علي بقيت جوكر ؟؟
سلمى : هوي ما تفكها في نفسك ساي بس عمتك وخالك هم القافلين عليك ..
عصام : لمن نشوف لسع الاتصالات باقية ؟؟
| |
|
|
|
|
|
|
|
|
|
Re: أنت غلطان (Re: درديري كباشي)
|
| Quote: انت في عمتك ولا الخال ذاتو سيد الجلد والراس كب الجرسة |
صراحة الخال بالغ
مااااااكنت متوقع منو كدا
الله يستر مايسوط علينا قصتنا دى
والله مندمج
| |
|
|
|
|
|
|
|
|
|
Re: أنت غلطان (Re: درديري كباشي)
|
سلمى : عايزاك تباركي لعصام .
العمة : مالو ؟ نجح؟؟
سلمى : نجح في شنو هو كان ممتحن ؟؟
العمة : طيب نبارك له شنو ؟؟ اشترى عربية جديدة ؟؟
سلمى : لا عصام خطب ..
العمة : شنو ؟؟ قلتي شنو ؟؟
سلمى : قلت ليك عصام خطب ...
يعم صمت قصير ويسمعع صوت هرج وضجه في الطرف الثاني من التلفون ..
وهنا يظل الثلاثي المكون من عصام وسلمى وعلاء الدين ينظرون الى التلفون بترقب وتوجس ينتظرون رد فعل العمة التي لازالت صامته من ناحيتهم ولكن من الناحية الثانية يبدو انها فتحت حوارا احتجاجيا مع بناتها ..
وتاتيهم جمل عابرة فالتها من نوع ( انا عارفاه ما بتخليه ليكم ام عيونا منطات ديل ..في ستين ... )
العمة : معليش يا بتي عندي حلة في النار لحقتا ما تحرق قلتي شنو انت ؟ عصام خطب وين ؟؟
سلمى : خطب واحدة .....
العمة : ماعارفاه خطب واحدة يعني حا يكون خطب واحد .
سلمى : يا عمتي ما تصبري اكمل ليك الكلام . خطب بت واحد صاحب سلميان خالي .
العمة : وسليمان خالي في ليبيا ما كدا ؟
سلمى : ايوا في ليبيا لكن صاحبه هنا في الرياض
العمة : ولميتو فيها وين دي كمان..
سلمى : خالي اتصل علينا قال روحوا اتعرفوا عليه .. رحنا اتعرفنا اها عصام شاف البت واتعلق بها ..
العمة : ودي بت شنو البتعلقزا بيها الناس من اول مرة كدا .. اكيد دا شغل شعوذة ولا عمل ..
سلمى بنهرة : يا عمتي عصام يا هدا معاي عايزة تباركيه ولا اقفل الخط ؟؟
العمة مرتبكه يبدو انه الشر تدخل في حديثها وكاد ان يفلت منها زمام الامور ..: لا لا يا بتي معليش الشيطان شاطر ..
عصام : والله بديت اتعاطف مع الشيطان دا .. اي واحد يعمل مصيبة يقول ليك الشيطان شاطر ..
العمة : اديني ليه .. مبروك يا عصام ياولدي انشاء نفرح بيك نشوف جديدك ونشيل وليدك .
عصام : الله يبارك فيك يا عمتي ..وعقبال اخواتي ناس سناء ..
العمة : أخواتك ؟؟؟؟ ها تأخذ تنهيدة طويلة تعقبها بعبارة ربنا يهنيكم يا اولادي ..
| |
|
|
|
|
|
|
|
|
|
Re: أنت غلطان (Re: درديري كباشي)
|
سلمى مواصلة في الاتصال مع عمتها : الله يبارك فيك يا عمتي وعقبال ما نفرح بسناء واخواتها
العمة : اهااا بحياتك وانتي طيبة يا بتي .. اها اتقدمتو رسمي ولا اتكلمتو ساي ...؟؟
سلمى محاولة كسب عمتها : اتكلمنا بس والله يا عمتي نتقدم رسمي ونفوتك معقولة دي ؟ انتي كبيرتنا في البلد دي والما عندو كبير ما عندو صغير ..
العمة : آاااااااه الله يجبر بخاطرك يا بتي .
سلمى : اها مع السلامة يا عمتي سلمي على البنات .ز
العمة : الله يسلمك يا بنتي .
سلمى بعد ما تقفل الخط : اها كيف ما خارجتك من كابوس عمتك ؟؟
عصام : الله يبارك فيك ياسلمي والله يا دوب حسيت انه انا خطبت فعلا ..
د علاء : لكن فعلا كانت ولادة متعثرة جدا عشان تقبل الخبر ما مسألة ساهلة .ز
سلمى : على فكرة انا متاكدة انه هي ما يئست بتكون عندها محاولات كتيرة تفركش به الموضوع ..
علاء الدين : معقولة للدرجة دي ؟؟
سلمى : أكد ليك انه خطوتها التانية هي راح تسأل من ناس ابو زيد واولاده ومرته وتتحرى من اخبارهم عشان تجد فيهم اي انة او ثغرة..
عصام : سلمى مالك عاوزة تخوفينا انتي كمان ..
سلمى : لا انا ما عاوزة اخوفك انا بحاول اخليك مهيأ للاشياء الجديدة والتصرفات الغريبة .وانا بكلمك من ناحية التخصص ومن ناحية معرفتي بعمتك
| |
|
|
|
|
|
|
|
|
|
Re: أنت غلطان (Re: درديري كباشي)
|
ما تكاد سلمى تقول جملتها الاخيرة الا ويرن تلفونها فعلا كما توقعت .
سلمى : الو اهلا يا عمتي .
العمة : قلتي لي يا سلمى النت الخطبها عصام اهلها يقولوا ليهم ناس منو ؟؟
سلمى : قلت ليك الراجل صاحب سليمان خالي اسمه ابو زيد عبد الرحمن ..
العمة : ومرتو اسمها منو ؟
سلمى : المرة والله ما عارفة اسمها ؟
العمة : رايحة تخطبي لاخوك بنت ما عارفة اسم امها ؟؟
سلمى تبدأ تتنرفذ : وانا حا اعمل بأسم الام شنو ؟؟ ونحن عايزين البنت ؟؟
العمة : ما اتونستي معاها كنت قعد تقولي ليها يا منو ؟
سلمى : بقول ليها يا ام عمار زي ما كانوا بيقولوا ليها ناس عصام وزوجها ..
العمة : طيب هم ساكنين وين ..
سلمى : في غبيرة .
العمة : وين لسوق التياب ؟
سلمى : يا عمتي انت عارفاني انا ما بعرف البلد دي بيسوقوني ويجيبوني ..
العمة : خلاص خلاص كدا كفاية .. كدا بصل .
سلمى : انتي عايزة تصلي لي شنو يا عمتي ..؟
العمة : انتي مالك دا شغل الناس الكبار انتي مش قلتو انا كبيرتكم في البلد دي ؟؟ اها مع السلامة .
عصام طبعا كان سامع الحوار عن طريق الاسبيكر : ياخي انتي مسمعاها شنو كبيرتنا هسع راح تعمل لخبطة انا عارف ..
سلمى : انا ما قلت ليك هي ما راح تستسلم بالساهل ..
عصام : طيب الحل شنو خايف تقوم تحرجنا مع الناس ديل ..
| |
|
|
|
|
|
|
|
|
|
Re: أنت غلطان (Re: درديري كباشي)
|
بانتظار: انتهى
وتجميع كل القصة بربطة واحدة
وأخذها إلى مكان قصي
لإطلاع متصل
لا تقطعه
يتبع
أو إنشغالاتنا المتتالية
خلص يا شاب...
| |
|
|
|
|
|
|
|
|
|
Re: أنت غلطان (Re: بله محمد الفاضل)
|
Quote: بانتظار: انتهى
وتجميع كل القصة بربطة واحدة
وأخذها إلى مكان قصي
لإطلاع متصل
لا تقطعه
يتبع
أو إنشغالاتنا المتتالية
خلص يا شاب... |
طبت مكانا وزمانا ايها البلبل الغريد
| |
|
|
|
|
|
|
|
|
|
Re: أنت غلطان (Re: درديري كباشي)
|
سلمى : هي راح تحاول تسأل من الجيران عن حال ناس عمك ابو زيد سلوكه وسلوك بناته تحاول تجد خلل او مشكله عشان تعرقل الخطوبة وتثبت انه البنت ما لايغة مع مكانة الاسرة العظيمة ..
علاء الدين : طيب دا ما شئ كويس ما بطال ولصالحك ..
عصام : كيف يعني شئ كويس ولصالحي ؟ ..
علاء الدين : صحيح يمكن تكون عائلة ابو زيد ما فيها ان لكن يمكن تكون خالة العروس منحرفة مثلا والعياذ بالله عمها مسجون مجرم او اي شئ لا سمح الله ..
عصام : طيب انا مالي ومال الحاجات دي وهي ذنبها شنو ؟ونحن اخذنا شهادة الخال وهو واثق من صاحبه ..
علاء الدين : ماتنسى انه خالك وابو زيد اتفارقوا من قبل عشرين سنة ما اتقابلوا ..
عصام : مهما حصل انا استخرت واخترت البنت دي ومرتاح لاختياري جدا وواثق من سلوكها وسلوك والديها بعداك ما يهمني أحد ..
سلمى : نحن ما بنقول كدا يا عصام برضو احترام المجتمع ومكانة العائلة مهمة في اختيارات الزواج ..
عصام : يعني انتو خلاص اقتنعتوا انه اهل نسمة كلهم مجرمين ؟؟
سلمى : نحن ما قلنا كدا بس بنهيئك لكل الاحتمالات عشان ما تنصدم ..
عصام : والله ما عارف انا في اليوم المفروض اكون فيه اسعد انسان بقيت اتعس انسان .
علاء الدين محاولا اعادة الجو الى الطرافة : انا عندي ليك اقتراح يا عصام عشان تتخارج من شر عمتك دي لازم تجيب ليها عرسان لبناتها من اصحابك مثلا ..
عصام انت بصحك يا دكتور ... انا لامن اكون متغدي معاهم اترجى اي واحد من اصحابي يروح معاي الغدا يقول لي يازول غتي قداحتك دي براك ..
علاء الدين ضاحكا .. ليه عملت فيهم شنو احكوا لينا بالله ..
| |
|
|
|
|
|
|
|
|
|
Re: أنت غلطان (Re: درديري كباشي)
|
| Quote: لله يالدرديري ويعلم الله كاني بشاهد مسلسل الشهد والدموع او ليالي الحلمية حبكه في الحكي ..والله انت يااولاد كسلا كل شي عندكم طاعم ههه ..ياخي كب القصه كلها ورانا اشغال هههههههه |
مشكور يا اشرف سيد يا رائع
ما تبالغ دا حكي سوداني بسيط بنكهة ام رقيقة والكسرة والحلومر
| |
|
|
|
|
|
|
|
|
|
Re: أنت غلطان (Re: درديري كباشي)
|
باقي شخص واحد هنا في السعودية نكلمة
قالتها سلمى لتغيير مود التركيز على العمة الشريرة ..
عصام : صحي باقي خالنا عثمان ..
علاء الدين : تفتكروا خالكم عثمان راح يتصدم زي الجماعة ديل انا عارف هو كمان عنده بنات ..
سلمى : لا يا اخوي خالنا عثمان واثق في نفسه وفي بناته بعدين هو زوجته مصرية وبناته خلطة عجيبة هو عصام لاقي بعرس واحدة منهن ..؟؟
عصام : ليه يعني انا لو كان اتقدمت للخال كان رفض لي ..
سلمى : جرب نشوف ؟
علاء الدين : دا نظام جرجرة من اختك لا ىتجرب ولا محتاج تجرب لكن انا قصدي لا يزعل وينفعل زي خالكم سليمان .
سلمى : ابدا ولا يكون مفكر في الموضوع بعدين خالنا عثمان رجل متعلم ومثقف ودرس في الدول الاروبية وعاش فترة في الغرب ويعتقد هو نوع من التخلف اذا تدخل اتحد الوالدين في اختيارات الابناء ..
علاء الدين : يعني هو ماراح يخطب لبناته او يهيء جو لعرسهم زي ما عمل نسيب عصام ؟؟
عصام بضحك " تقصد شنو يا دكتور ..؟
علاء الدين : كل الحصل معاك لغاية ما انت اتقدمت لبنت عمك ابو زيد تفتكر انه صدفة .. باستثناء الحادث طبعا ؟
سلمى تضحك بشدة : على كل حال طالما الحادث صدفه الباقي كله يعتبر صدفه يعني ما بني على صدفه فهو صدفة ..
علاء الدين : نظرية جديدة مابطال ..
سلمى : المهم كدي خلونا نتصل بالخال عشان ما نساهر بكرة ورانا شغل ..
| |
|
|
|
|
|
|
|
|
|
Re: أنت غلطان (Re: درديري كباشي)
|
سلمى اتصلت بخالهم عثمان : الو كيفك يا خال مشتاقين والله كيف فوزية والاولاد .
عثمان : اهلا اهلا بالدكتورة سلمى كيف يا عزيزة مالكم قاطعين مننا الاخبار كل مرة نتوقع جيتكم وما تجو ..
سلمى : معليش يا خال القدم ليه رافع وكل ما نقرر تلاقي واحد من العيال محموم ولا عندو لوز اها نتكاسل .. كيف انتو وكيف الدكتورة كوثر اتخرجت ولا لسع ...
عثمان كوثر في السنة الاخيرة لكن حاتواصل الامتياز والخدمة الالزامية في السودان اها وعصام اخباره شنو ..
سلمى : ما انا اصلا اتصلت بيك عشان عصام .
عثمان :مالو خير انشاء الله؟
سلمى : لا لا لا خير يا خال بس هو خطب ؟؟
عثمان : حطب ؟ ماشاء الله ربنا يهنيه ..وخطب وين ؟؟
سلمى : خطب بنت واحد صاحب خالي سليمان ..
عثمان : منو في اصحاب سليمان ؟؟
سلمى : بنت ابو زيد
عثمان : بالله ما شاء الله ابو زيد راجل ممتاز جدا بالله عنده اولاد بقوا للعرس
في هذه اللحظة كان عصام وعلاء يتبسمون تعبيرا عن الرضا.
سلمى : كيف يا خال وهي التالته في اخوانها .. اديك عصام تبارك ليه ..
عثمان : جدا جدا هو عصام معاك بالله .
عصام : كيفك يا خال ..
عثمان : اهلا يا باشمهندس ما شاء الله الف مبروك ربنا يتم ليك على خير .
عصام : الله يبارك فيك يا خال .. سلمنا على الاولاد وامهم .
عثمان الله يخليك يابني يلا خلونا على اتصال وتعالوا قضوا معانا خميس وجمعة كم مرة نعزمكم ماتجو ..
عصام : انشاء الله راح نجي دكتور علاء راح يشتري عربية جديدة وراح نجي كلنا .
عثمان : وين هو دكتور علاء ادينا نسلم عليه ...
علاء : كيفك يا باشمهندس اخبارك واخبار اولادك ز
عثمان : اهلا يا دكتورلا وينك من دين وعيك مشفناكم تاني .
علاء : والله يا خال زي ما قالت سلمى انشغلنا بمرض الاولاد .. لكن قريب اسبوعين كدا ممكن نجيكم .. كيف الاولاد مع جو البحر والرطوبة .
عثمان : نحن اتعودنا يا دكتور على الجو هنا بقى ما في مشكلة ..
علاء : طيب يا باشمهندس تصبح على خير ..
علاء : والله خالك دا راجل راقي ما كان تفوته ..
عصام : ما خلاص القسمة قالت نسمة ..
| |
|
|
|
|
|
|
|
|
|
Re: أنت غلطان (Re: درديري كباشي)
|
عد ذاك اليوم الجميل بخيره وشره وتوجه عصام ناحية مسكنه . وجلس مع اصحابه وبفرحته اخبر اصدقائه بانه خطب بنت الراجل بتاع الحادث والذي طلع زوجته خالتهم كما زعم من قبل حتى يقفل باب التريقه ( المكاواة )..
عاطف : تفتكر عمتك الانا بعرفها دي حا تفكك كدا بالساهل .. ياخي دي كان قافلة عليك يا انت يا تحرق ..
عصام : انا وعدتها بجديب ليها اصحابي عاطف وعماد ..
عاطف : عاطف منو يا حبيب .. انت تخلي مواعينك كاشفه وعايزنها نحن نغطيها ليك مع منو مع عمتك اياها .. انا لهسع لامن اتذكر الصينية الطايرة ديك رقبتي تنتح ..
عماد : يا عصام والله بالجد كيف قدرتو تقنعوا عمتك ديك.. ياخي فعلا هي متسمكه بيك شديد ..
عصام : حاتعمل شنو في النهاية الحكاية قسمة ونصيب .. على كل حال انا تعبان اليوم ماشي للنوم بدري تصبحوا على خير ..
يدخل عصام غرفته وكالعادة يتصل بالعروسه . ويتبادل معها كلمات الغرام والغزل قليلا ثم ينام ..
عد اسبوع كامل على الخطوبة كان كل شئ يمر على ما يرام
يتصل عصام بخطيبته واهلها ويتحدث معهم بالساعات ..فجاه في يوم الخميس التالي انقطع الاتصال ..
اتصل عصام على نسمه يرن جرس ولا حد يفتح الخط او يتحول الى مشغول ..
انشغل عصام : اتصل بابو زيد كذلك لاحظ نفس هذا التجاهل انشغل جدا في الاخير اتصل بشقيقته سلمى .
استغربت سلمى من الامر واتصلت هي بدورها بام عمار لم تجد جوابا ..
قلق عصام من الامر وركب سيارته الى بيت اخته لتناقش معها في الامر ..
عصام : سلمى الحاصل شنو الناس ديل مالهم معانا ؟؟ تكون عمتي خلقت لينا مشكلة معاهم ؟؟
سلمى : جائز عمتك عملت مصيبة... المصيبة خشم بيوت تكون عملت معاهم شنو هي كانت حريصة تعرف البيت واسم الام ؟؟
| |
|
|
|
|
|
|
|
|
|
Re: أنت غلطان (Re: درديري كباشي)
|
عد عصام يوم الخميس في بيت اخته وهم يحاولون بعد كل فترة الاتصال بىل ابو زيد دون جدوى ..
تدخل دكتور علاء الدين : انتو في كم الناس ديل ما قاعدين في بلد تاني بكرة امشوا بعربيتكم دي روحوا شوفوهم مالهم ؟؟
وفعلا بات عصام في ذلك اليوم عند اخته ليلة الخميس .
قضى معهم يوم الجمعة ..
بعد صلاة الجمعة حاول عصام الاتصال بابو زيد مرة أخرى ..
هذه المرة رد عليه ابو زيد
ابو زيد : الو منه معاي اهلا يابني عصام ؟؟
عصام : سلام يا عم ابو زيد اخباركم شنو خير انشاء الله ..
ابو زيد : خير يابني انا كنت راح اتصل عليكم اليوم ..
عصام في شنو يا عم انا قلقت عليكم لي ثلاثة ايام ما قادر اتصل عليكم
ابو زيد : ممكن تمروا علينا اليوم في المسا انت وشقيقتك لو سمح وقتكم .
عصام: خير انشاء الله بس ممكمن تدينا فكرة عن الموضوع ..
ابو زيد : ما تستعجلوا تعالوا راح تعرفوا السبب ..
عصام : طيب ممكن اعرف سبب عدم الرد شنو ؟؟
ابو زيد : كل شئ راح تعرفوه بس بعد ما تجو ..
| |
|
|
|
|
|
|
|
|
|
Re: أنت غلطان (Re: درديري كباشي)
|
وبعد العصر تحرك عصام وسلمى وتركوا الطفلين مع والدهما وفي الطريق كانا يتبادلا الحديث بتوتر .
عصام : تفتكري يكون في شنو انا ما مرتاح للموضوع ..
سلمى حاولت تهدئ من عصام وتطمئنه على على القول ان فاقد الشئ لا يعطيه اذ انها هي ذات نفسها لم تكن مطمئنة لذلك كان ردها يدل على ذلك .
سلمى : عصام مهما كان الحاصل انت ما مفروض تقلق لانه الحكاية هي في النهاية قسمة ونصيب .. وعندك ما شاء الله خيارات كثيرة ..
عصام : يعني نحن خلاص نقنع من نسمة دي ..
تأثرت سلمى برده وقالت : لا انا ما قصدي تقنع وانشاء الله ما يكون في شئ يخليك تقنع لكن الواحد يخت اسوأ الاحتملات ويبني عليها عشان ما يتصدم ..
يلفهم صمت طويل كل واحد منهماا بدأ يدور كل الاحتمالات في رأسه دون ان يناقش الآخر ..
هل يا ترى ان حدث شئ تكون تسببت فيه العمة سعاد ..
سلمى : انا يتخيل لو في مصيبة حاصلة ما تكون بعيدة من عمتك سعاد ..
عصام : ياخ ما اظن للدرجة دي كمان انت بس شايلة منها زي أمي .
سلمى : عصام يات اخوي انت من زمان زي عادتك ما عاوز تصدق انه عمتك دي تحير ابليس ذاتو .
عصام : خلاص وصلنا ربنا يكذب الشينة ..
وقف الاثنان امام باب الشقة وقالت سلمى جملة مبتورة
يا رب ..
| |
|
|
|
|
|
|
|
|
|
Re: أنت غلطان (Re: درديري كباشي)
|
يطرق عصام باب ابو زيد ..
تفتح لهم البنت الصغرى الباب وتستقبلهم بفتور بعبارة : اهلا
مما يجعل سلمى تسألها: بسمة مالكم في شنو ؟؟
بسمة : مالنا شفتي علينا شنو .. اتفضلوا ..
وفي مدخل الصالة تظهر ام عمار بوجه مكتئب تربط رأسها بشارب اسود ويخلو وجهها من المحسنات كأنها في حالة حداد ..
ام عمار : اهلا يا بتي اهلا يا ولدي عصام ..
سلمى : في شنو يا خالتي ام عمار مالكم ما بتردوا على التلفونات ..
ام عمار اقعدوا بنشرح ليكم كل حاجة ..
.. من جديد تتجمع الاسرة في الصالة هذه المرة ولكن من غير ظهور نسمة الخطيبة ..
مما جعل عصام يتلفت بصورة ظاهرة تكاد حركاته تنطقق وتقول اين هي ..
سلمى : ونسمة وينها لعلها ما عيانة ولا حاجة ..
ام عمار : تقول ما هي دي المصيبة وتبدأ تدخل في نوبة بكاء يا حليلك يا بتي ...عصام: مالها بسمة مالها بسمة مالها .؟؟
وقبل ما تأتيه الاجابة . تصدر صرخة من داخل احدى الغرف : تعقبها كلام من نوع خلاص يا سعاد ما عايزة اعرسه خلاااص واااااي ما عايزاه توبة توبة ..
أم عمار : عرفتو السبب ؟؟ تقدروا تقولوا لينا مين سعاد دي ؟؟ وعلاقتها بيكم شنو ..
سلمى : عمتي سعاد ؟؟
ام عمار : عمتك ؟؟؟؟؟؟؟؟؟؟
| |
|
|
|
|
|
|
|
|
|
Re: أنت غلطان (Re: درديري كباشي)
|
ام عمار : ما عارفين نحن بس نسمة دي من ثلاثة ايام قامت باليل تصرخ وتقول في الكلام الانتو سمعتوه دا .. ابت الاكل بعد تحنيس يمكن تشرب ليها كباية حليب..
سلمى :مسكينة ...يمكن تكون صابتها عين ما شاء الله يوم الخطوبة داك كانت طالعة حلوة تتأكل أكل .( محاولة تشتيت الانتباه عن اسم العمة سعاد )
أم عمار : :بس طيب ما عرفنا اسم سعاد الماسكة فيه دا شنو؟؟
عصام مقاطعا حتى يشتت التركيز ايضا : ومال وين عم ابو زيد ..؟؟
ام عمار : والله يا ولدي عمك دا وصفوا ليه شيخ يرقي بالقرآن في حي النسيم ما شي يشوف نظامه كيف بيجي معاه البيت ولا يودو ليه البنت ..؟؟
سلمى : ممكن ندخل نشوفها انا بصفتي دكتورة نفسية ما اي سبب تاني ..
أم عمار بعد سكات قصيرا : معليش يا بتي بس البنت بقت فجأة كارهة سيرتكم وكان جيبنا سيرة عصام و لا اسمهه تتهيج وتصرخ .. لكن يمكن معاك انتي ما يكون عندها مشكلة.
وبعد قليل يفتح الباب عم ابو زيد : اهلا السلام عليكم كيف يا دكتورة وكيفك يا عصام ؟؟
عصام الحمد لله وكفارة للبنت ..
ام عمار مقاطعةاها خير عرفت محل الشيخ ؟؟وقال شنو .؟
ابو زيد : الشيخ قال نجيبها ليه هناك عنده زي عيادة كدا بيجو فيها الناس ..
أم عمار : اخاف تتهيج في العربية وتصرخ نفضحنا كمان ..
ابو زيد : معانا دكتورة سلمى ممكن تديها حقنة او حبوب مهدئة ..
عصام : ارتاح لاقتراح العم ابو زيد وشعر بأن الامر لم يأخذ طابع العداوة او الكره من العائلة ... والحمد لله لم يدركوا ان لهم عمة شريرة اسمها سعاد ممكن تعمل بلاوي كثيرة تمنع حسنة قليلة ..
قال : غصام حلاص يا سلمى انتي اركبي معاهم .. ولو محتاجة حاجة من الصيدلية او من البيت ممكن يكون بيناتنا اتصال انا حا امشي وراكم بعربيتي ..
نزل عصام فعلا ..
دخلت سلمى مع ام عمار ناحية البنت نسمة .
وجدت حالتها مزرية فعلا شعرها منكش عيونها جاحظة وحمراء تحيط بها هالات سوداء دليلا على السهر والتعرب ..
تدخل عليها دكتوره سلمى مستخدمة خبرتها في الطب النفسي اضافة الى عاطفتها كانثي متعاطفة مع هذه البنت البريئة التي لم تتجاوز الطفولة بكثير تمر بتجربة اكبر من عمرها ..
تجاوبت نسمة مع الدكتورة وحاولت ان تبتسم معها بوجهها المجهد ..
تولت سلمى في الاول تسريح شعرها والكلام معها بحنية ورقة من نوع : مالك يا نسمة يا حبييتي .. اكيد سحروك ادوك عين عشان انتي بنت حلوة .. تبسمت نسمة لهذا الاطراء .. ساعدتها سلمى في لبس عبائتها ..
النظرة الحنينية بين سلمى ونسمة اثرت في الوالدين وزرعت في وجهيهما ابتسامة الامل .
وتحرك الوفد بسيارة عم ابو زيد ناحية الشيخ ..
| |
|
|
|
|
|
|
|
|
|
Re: أنت غلطان (Re: محمد بابكر محمد)
|
Quote: كيف امسيتو
لكن اصلا مامتوقع القصة تمشى لى (فُقرا)
بس ماتكون جلساتها كتيره
اها واصل يا راقى
ارقد عافية |
نحن في السعودية يا معلم الدجال بيقطعوا رأسوا
لكن هي دراما اجتماعية بتناقش حياتنا كسودانيين مغتربين .. اصبحنا كيان اجتماعي سوداني له طابعه الخاص لا يشبه طابع اهل البلد وفي ذات الوقت لا يتسطيع ان يلتزم تماما بنفس طابع اهلنا في السودان ..فهذه القصة تعكس هذا التميز في قالب ساخر نوعا ما وجادا احيانا اكثر لكن هي في النهاية هي قصاصات من واقع نعيشه ونتعايش معه كل يوم يحتاج لوقفة تأمل وتململ وتلملم في قفة واحدة ...
| |
|
|
|
|
|
|
|
|
|
Re: أنت غلطان (Re: درديري كباشي)
|
امام بيت الشيخ او عيادته ان جازت التسمية كان هنالك عدد مقدر من السيارات والحوش له مدخلان مدخل للرجال ومدخل للنساء .
ادخلت نسمة بصحبة امها وصحبة سلمى الى جانب النساء وظل عم ابو زيد وعصام في حوش الرجال ..
وبعد قليل بدأ الشيخ يقرأ في ايات القرآن ويتردد بين مقر الرجال ومقر النساء وهو كل ما قرأ ايات الرقيا مر على المرض وهو يتفل على رؤوسهم .. بدأ انين المرضى ثم تحول الى صراخ ..
بعد قليل بدا الصراخ ينطلق من هنا وهناك وكذلك التشنج .. وسمع صوت نسمة تصرخ وبعد قليل اصبح صوتها أجش اقرب لصوت الرجال .. وهي تصرخ .. بعبارة .. خلاص خلاص حا اطلع انا حا اطلع .. خلاص تبت حا
اطلع ,, وبدأت تصدر منها شتائم ناحية الشيخ . لكن بعد ها تدخل في ثبات عميق .. وتستيقظ يتصبب منها العرق ...
تفتح عينيها وتتلفت تنظر للناس باستغراب كأنها تستنكر وجودها في هذا المكان ..
يتحدث ابو زيد مع الشيخ ويستفسر عن السبب فيقول له الشيخ .. كان بها مس دخل حديثا ربما نتيجة عن عين او عمل سحر .. لكنه خرج بسهوله لانه دخل فيها حديثا لم يتجاوز الثلاثة ايام ..
ابو زيد : طيب ياشيخنا الوقاية والعلاج ..كيف ؟
الشيخ : قال انه هنا عنده دكانه فيها علاجات يلتزموا بها ولا زم تتحصن كل صباح ومساء ..
ابو زيد : ماهو العلاج .
الشيخ : زيت زيتون ورق سدر تحله بالماء وتغتسل به .. وعسل نحل مخلوط بمسحوق الحبة السوداء تأخذ منه ملعقة على الريق كل صباح ..
خرج الجميغ من عيادة الشيخ .. وحتى يتأكدوا ان الامر عد على خير تعرض عصام لنسمة .. لكن هي ابتسمت له بخجل ودرات وجهها عنه بسرعة .
عرف الجميع ان الشفاء قد تم بحمد الله ..
وتحركوا عائدين ناحية بيت ابو زيد ..
غشى عصام محل اجهزة كهربائية اشترى جهاز مسجل صغير .. وكذلك من محل تسجيلات اشترى اشرطة الرقيا واخذها معه لبيت خطيبته ..
سعد ابو زيد واسرته بهذا الاهتمام وهذه اللفته ..
ومن هناك غادر ا لاخوين الى بيتهما وفي الطريق دار الحوار بينهما .
عصام : سلمى تفتكري عمتي سعاد ليها دخل بالموضوع ؟؟
سلمى : انت براك ما سمعت بأضانك كيف البنت كانت تصرخ وتقول خلاص يا سعاد ..
عصام : انا يتخيل الشيطان عاوز يوقع بيننا ويكرهنا ليها عشان كدا خلاها تجيب سيرة سعاد ..
سلمى : على كل حال زي ما انت سمعت نحن ما خلينا الامور تمشي في الاتجاه دا ولو كانت عمتك متورطة او بعيدة نحن ابعدنا عنها الشبهة .. لكن نفسها لو متورطة ما راح تصبر راح تتصل ..
عصام : الله يكذب الشينة .ز انا ما عاوز شر عمتي يصل لدرجة انها تعمل سحر وتأذى فيه بت ناس وتعذب اهلها بس عشان انا خطبتها ..
وصل الثنائي الى بيت سلمى وسالهما دكتور علاء الدين عن القصة .. وعندما رويت له الحكاية .. وبحكم انه طبيب ودائما يستنكر الاطباء مثل هذه الامور .. بعكس زوجته الطبيبة النفسية التي شاهدت حالات مماثلة كثيرا .ز
وكثيرا ايضا ما نجح الشيخ في علاجها بالقرآن ..
علاء الدين : معقولة كانت كرهانة سيرة وشكل عصام وفي النهاية رجعت عادية تضحك وتتبسم ؟؟
د سلمى : هذا شئ نحن شفناه بعيننا ما حد حكاه لنا وانا شفت حالات اصعب من كدا واتعالجت بنفس الطريقة .
د علا: لكن تفتكروا عمتكم فعلا عندها يد في الموضوع ..
| |
|
|
|
|
|
|
|
|
|
Re: أنت غلطان (Re: درديري كباشي)
|
عصام : والله انا مستبعد تكون عمتي عندها يد في الموضوع . زاولا هي ما بتعرفهم وبعيدة منهم .ز والسحر يتخيل لي يحتاج لاثر من المسحور قماش او اي شئ يخصه او خصلات من شعره ..
سلمى : لكن ما تنسى تتذكر لامن كلمتها رجعت اتصلت مرة ثانية تسأل من ام العروس ودائما السحرة بيستعينوا باسم الام ما اسم الاب .. وهي زعلت واتغاظت لامن قلت ليها انا ما عارفة اسم الام .ز قالت لي تخطبي لاخوك واحدة وانتي ما عارفة اسم امها ..
عصام : ماهي لكن سألت من الاسامى عشان تتحرى عن الاسرة وسلوكها زي ما قال علاء..
سلمى : انت ما تفتكر انا بحاجج فيك عشان عاوزة الصق فيها التهمة .. انا زيك اتمنى انها ما هي تكون عملت ليهم السحر .. لكن لو طلع هي العملته وعرفت انها اتعالجت المرة الجاية حا تعمل مصيبة اكبر يمكن الشيخ الرحنا عنده دا ما يقدر يحلها ..
عصام بدأ متخوفا : اعوذ باللله تقولي شنو انتي ؟
د علاء : يا زولة استغفري ونحن ما عندنا رب يحمي عباده ؟؟
سلمى : ونعم بالله لكن ما تنسى انه الله الخلقنا خلق الداء والابتلاءات والاسباب والدواء وحتى الوقاية نفسها ربنا هو الخلقها ..
بدءا عصام جاحظ العينين واهما ..
سلمى تلاحظ له وتحاول ان تعالج الموقف : يا زول خليها على الله الحمد لله جات على كدا
واخيرا يهتدي عصام الى تلفونه ويبداعليه القلق .. ويتصل بنسمة : اها نسمة كيفك يا عزيزة كل شئ تمام ..
نسمة : الحمد لله بس شاعرة بصداع شديد ..
عصام : التزمي بكل علاجات الشيخ .. استحمي بالسدر اتمسحي بزيت الزيتون والتزمي بالصلاة والتحصين ..
نسمة : انشاء الله ..\\
عصام : يلا تصبحي على خير ..
| |
|
|
|
|
|
|
|
|
|
Re: أنت غلطان (Re: درديري كباشي)
|
عاد عصام الى بيته بعد ان عادت الامور الى نصابها كما ظن ..
كان طيلة الطريق يفكر .. ويقول الانسان يعيش في امان وفرح وهو لا يدري انه يخوض في بحر من المصائب الغير مرئية .. لانه نعمة كبيرة من الخالق انه خلانا محدودي البصر .. لانه لو كنا نستطيع ان نرى كل شئ حولنا لمتنا
من الرعب والخوف .. جراثيم وشواطين وفيروسات وامراض واحقاد وحسد من حولنا يحيط بنا والحمد لله اننا لا نراه ..
وصل عصام بيته منهكا جدا فضلا عن التركيز والتوتر فهو له اكثر من يومين كان نومه مقطع .. سلم على اصحابه ودخل غرفته لينام .. شكله المرهق كان واقيا له من ملاحقة الاصحاب بالاسئلة والفضول ..
غير ملابسه واستوى على سريره لينام منذ الساعة العاشرة مساءا فقط لولا ان رن تلفونه ..
بطبيعةة الحال توقع ان يكون المتصل هو خطيبته بعد ان عادت الامور الى نصابها او احد من أهلها الا انها كانت مفاجأه اذ ان المتصل كان ..
عمته سعــــــــــاد
| |
|
|
|
|
|
|
|
|
|
Re: أنت غلطان (Re: درديري كباشي)
|
عاصم مندهشا وقلبه اصبح يدق بشدة وهو يرد على التلفون الو . اهلا عمتي ..
العمة : كيفك يا عصام ولدي اها اخباركم شنو اسبوع كامل ما سمعنا صوتكم ..
عصام : لا الحمد لله كل شئ تمام ..
العمة : اها والعروس اخبارها شنو شديدة هي واهلها ..
عصام : لا كويسين الحمد لله وكيف ناس سناء واخواتها انشاء الله كويسين ؟؟
العمة : لا هم كويسين لكن العروس انت متاكد كويسة آخر مرة شفتها متين ..
عصام : هسع انا جايي من عندهم قبل شوية ..
االعمة : أجي دا كلام شنو ؟؟
عصام بنهره : الا ؟؟؟ في شنو يا عمتي ؟؟
العمة : لا ما في حاجة يا ولدي تصبح على خير ..
وقفلت العمة الخط .. بينما تركت رأس عصام يغلي بالقلق والتفكير .. بعد ما كان نعسان يوشك على النوم اصبح كأنه كان نائما له اسبوعا وليست لديه ادنى رغبة في النوم ..
قرر عصام ان يشرك شقيقته في هذا الهاجس واتصل بها ..
عصام : الو سلمى معليش ما تكونوا نمتوا .
سلمى : لا لسع والله خير مالك في شنو .
عصام : اتصلت علي عمتي قبل شويه ..
سلمى : اها خير مالها ؟
عصام : قي الاول سألتي منكم تاني من اهل العروسة والعروسة نفسها لامن قلت ليهم كويسين قالت لي انت آخر مرة شفتهم متين قلت ليها جيت منهم قبل شوية قالت بالحرف الواحد (أجي دا كلام شنو ؟) لامن نهرتها قلت ليها في شنو يا عمتي . قالت لي ما في حاجة تصبح على خير ..
سلمى : انا اصلي من اول شكي فيها ما مخاب ... الموضوع ظاهر انه عندها يد فيه .. لكن انت ما تخاف وخليك مؤمن بالله والحمد لله الموضوع انكشف من اوله وعالجناه بالشرع .. وخليك متوكل على الله .. يا زول اتحصن ونوم نومك وكن مؤمن ان الله في شايف وعارف وكل زول راح ياخد قدر نيته ...
عصام : والله كثر خبرك ريحتنيني جدا بكلامك دا ..
سلمى : واقول ليك حاجة يا عصام نحن اصلا ما نظهر ليها انه نحن كشفناها واشتغلنا ضدها او زعلانين منها خليك معاها عادي هي تعمل على مكانتها ونحن نعمل على مكانتنا وفي النهاية لا يصح الا الصحيح ولا يحق الا الحق ..
عصام : يعني انا تاني ازورهم عادي وآكل في بيتهم ..
سلمى : زي ما قلت ليك خليك متوكل على الله اذا عزمتك روح سمي وأكل انشاء الله ما حاتجيك عوجك ولو جاتك كن مؤمن انه الله كتبها ليك .
عصام : كثر خيرك يا سلمى يا اختي تصبحي على خير ..
| |
|
|
|
|
|
|
|
|
|
Re: أنت غلطان (Re: درديري كباشي)
|
يازول مايمشي ياكل عندها ولا اي حاجة!
انتو المسكنة دي حدها وين يعني ؟!
شوف يا ابوالدر .. عشان نكون واضحين
قول لي عصام واختو ديل لو مابلغتو ناس الهيئة للمرة دي انا ببلغ فيكم انتو ذاتكم واقول ليهم بتمشو للساحر الفي حي النسيم
ولا عذر لمن انذر !
| |
|
|
|
|
|
|
|
|
|
Re: أنت غلطان (Re: خالد عبدالوهاب)
|
Quote: قول لي عصام واختو ديل لو مابلغتو ناس الهيئة للمرة دي انا ببلغ فيكم انتو ذاتكم واقول ليهم بتمشو للساحر الفي حي النسيم
ولا عذر لمن انذر ! |
قصة قصة قصة يا ابو الخلد
شنو تبلغ وهيئة وساحر
تجيب لينا كفوة معشر القراء
استهدي بالله
| |
|
|
|
|
|
|
|
|
|
Re: أنت غلطان (Re: ابراهيم عبدالناصر)
|
Quote: يازول مايمشي ياكل عندها ولا اي حاجة!
انتو المسكنة دي حدها وين يعني ؟!
شوف يا ابوالدر .. عشان نكون واضحين
قول لي عصام واختو ديل لو مابلغتو ناس الهيئة للمرة دي انا ببلغ فيكم انتو ذاتكم واقول ليهم بتمشو للساحر الفي حي النسيم
ولا عذر لمن انذر ! |
والله يا خالد موتنا بالضحك
قلت ما ياكل عندها ولا حاجة ..
ياخي عمتو والضفر وا بيطلع من اللحم والدم ما يبيقى موية .. والكلام دا كله عاوز تلغيه بجرة قلم ..
ابراهيم لاوز قاليك .. قصة قصة الحكاية قصة ..
| |
|
|
|
|
|
|
|
|
|
Re: أنت غلطان (Re: درديري كباشي)
|
هههههههههه
والله ابراهيم خاف خوفة ههههههه يكون حاضر ليهو قص رقبة قريب ولا حاجة :)
شكرا ياخي على الحكي الواقعي جدا .. وفعلا عشنا جو القصة بالكامل
نفرح اذا فرحوا .. ونزعل اذا حصل البزعل رغم انهم ماقاعدين يزعلو :)
واصل ياجميل ..
| |
|
|
|
|
|
|
|
|
|
Re: أنت غلطان (Re: درديري كباشي)
|
في المساء يذهب عصام عند بيت اخته من جديد يتشاور معها في الخطوة التالية ويناقشها في وصية أمه ..
وهو عندها تتصل عليهما الام وتطلب منهما بعد ذلك التحرك وكسب الوقت بشراء ( الشيلة) وقالت انه عصام لو ماكان جاهز ماديا هي ستبيع ذهبها وتحول له الاموال من السودان .. لكن عصام وسلمى تصديا لهذه التضحية رغما عن اصرارها .. وقالت انها لم تعد تحتاجه ولا توجد مناسبة اعظم من زواج ابنها لتبذلها فيه .. وقالت لها سلمى خليه احتياطي ضد الزمن والدنيا ما معروفه .. كلام عام بصيغة سودانية يعني الكثير .. وهو ان الذهب له وظائف استرتيجيه اكثر من كونه زينة وجمال ..
وقالت سلمى لعصام بأنهم سيشترون الثياب في الاول ثم يطبقون عليها الطقوم .. بمعنى شراء اللبسات وشنط اليد والاحذيه التي تتلاءم مع لون وشكل الثوب حتى تصبح طقما موحدا .. فيما يعرف بشيلة العريس .. وشيلة العريس في السودان حكاية بذاتها اولا هي تكاد تكلفتها تعادل نصف تكلفة الزواج او تزيد .. وتتكون من الثياب والعطور والذهب .. وتختلف في قيمتها ونوعها وعدد قطعها من عريس لآخر حسب قدرته وامكاناته المادية ..ولكن المكون الرئيسي لها هو الثوب السوداني .. وهو اغلى شئ ويكاد يتفوق على الذهب غير ان الذهب سلعة يمكن تسييلها اي اعادتها الى مال عند الحوجة .. لكن الثوب السوداني يفقد قيمته يمكن بعد لبسه او حتى قبل ذلك ..
وللثوب السوداني حكاية قائمة بذاتها ايضا .. فهو يكتسب شهرنه وقيمته من اسم يطلق عليه لايدري احد ما هو مصدره . ولكن غالبا هذا الاسم يشتق من احداث ممكن تكون سياسية او علمية او رياضيه او حتى حرب يعني مثلا ( دقة كندا .الراجمه .. هجليج .. سد مروي .. الكمبيوتر .. الصاروخ .. برشلونة .. جلاكسي ... ابفون ايباد .. اوكامبو .. الى اخ ) تنتشر هذه الاسماء اوساط النساء في المناسبات والتي تكون عادة مسرح للتنافس بين النساء في قيمة الثوب ونوعه والتباهي به ..
واضيفت كذلك ظاهره جديدة بتدخل طلاب وخريجي كليات الفنون الجميلة في نقش وتلوين انواع اخرى من الثياب تصبح اشبه باللوحات الجدارية .. ميزة هذا الثوب لانه صنع يد لن تجد له مثيلا ابدا .. تضمن صاحبة الثوب انها تلبس ثوبا لن يقلدها فيه أحد ..
وتتجدد موضة هذه الثياب سنويا . وهذا التجدد لا علاقه له باعجاب الرجل بالثوب .. قد يعجب رجل بثوب جميل في السوق فيشتريه بناءا على اعجابه لزوجته ولكنه سيصدم عندما تقول له ان موضته انتهت قبل ثلاث سنوات ولو تذكر كانت تلبسه فلانه في زواج اخيها ... وهكذا ..
بناءا على كل ما ذكر اعلاه يتم شراء شيلة العريس .. والتي غالبا ما تنتدب اليها امرأه من اهل العريس في الغالب شقيقته .. والاطرف والادهى والامر انه بعد كل هذا الجهد والانتقائية نادرا ما تقتنع العروسة بالشيلة وغالبا ما تذهب الى تبديلها او جزء منها في السوق قبل او حتى بعد الزواج لو لم يسعفها الوقت .. لانها تنظر اليها باعتبار انها ذوق من ستصبح حماتها بعد ذلك فهي تريد ان تتمرد على هذا الذوق من الآن ..
نعود لقصة عصام واخته ..
| |
|
|
|
|
|
|
|
|
|
Re: أنت غلطان (Re: درديري كباشي)
|
كذلك تتصل سلمى بام عمار تسألها عن صحة نسمة اليوم .. وتبشرها ام عمار بتحسنها . وتقول لها سلمى بأنه سيزوروهم اليوم ليطمئنوا على صحة نسمة .. وترحب أم عمار بالزيارة ..
عصام مستفسرا : حا نمشي نزورهم اليوم ؟؟
سلمى : طبعا امس خلينا البنت حالتها صعبة لازم نطمئن عليها .. وبعدين حننبدأ نشتري الشيلة ونحن للان ما تناقشنا مع اهل العروس في مواعيد العرس كيف ومتى ..
عصام : صدقتي انا ما انتبهت للحكاية دي .. افتكرت موافقتهم تعني بعد ذاك نحن نمشي في الموضوع متى ما نكون جاهزين اقرب خميس وجمعة يتم الزواج ..
سلمى : لا يا حبيب لسع في خطوات كثيرة .. ثم انت لامن نصل المرحلة دي تكون انت جهزت شقتك وفرشتها .. ومال عاوز تسكن وين مع نسابتك في شقتهم الضيقة دي ؟؟
عصام : ابدا معقولة هي .. ناحية السكن ما في مشكلة .. الشركة متفقه معاي راح يعدلوا عقدي لمتزوج بعد الزواج وراح اصرف بدل تأثيث وبدل سكن عائلي ..
سلمى : اكان كدا الحمد لله طمنتني ..يلا خلينا اولا نزور الجماعة نطمئن على البنت ولو لقينا الجو طريف وصحي ممكن نمشي في الخطوة الثانية .. مثلا نطلب انه نسمة واختها يروحوا معانا في نهاية كل اسبوع لشراء الشيلة .. وقبل كدا لازم نحدد موعد الزواج في اجازة المدارس يعني بعد شهرين .. عشان ما نشغل البنت من قرايتها ..
ويتحرك عصام واخته مع طفليها مرة اخرى ناحية بيت ابو زيد ..
يطرقوا الباب ويفتح لهم عم ابو زيد : اهلا يا اولادي مرحبا شرفتا .. وكما يرحب بالطفلين ويحمل الصغير منهم ويقبله ويبدأ يداعب فيه كان له به علاقة من زمن طويلة ..
هذه الروح تذيب الانكماش الذي بدأ في البداية عند دخول عصام وسلمى ..
تظهر البنتين وامهما مرحبات بالحضور .. وتهرع الصغيرة ناحية الطفلين وكذلك نسمة .. والتي لازال هنالك شحوب واصفرار في وجهها .. ورغما عن انها حاولت ان تحتفظ بابتسامتها الا انها ابتسامة تدل على مريض في طور نقاهة اكثر منه صحة .. سلمت على الحضور ..
تجمع الحضور على الصالة وتوزعوا على الكنبات ... جلست نسمة بالقرب من امها صامته لاتعلق .. وكل ما وقعت عينها على عصام تبسمت وطأطأت رأسها .. كأنه فقدت جرأتها السابقة في تثبيت عينيها في عينيه .. لدرجة انه كثيرا ما كان يستحي هو ويغض طرفه عنها .. اما الآن النظرات وان كانت لازالت بريئة وممزوجة بخجل الا انها اصبحت نادره ... قلق عصام من هذا الوضع ... هل يمكن ان يكون السحر او اي شئ كان نجح في ان يزيل عصام من قلبها .. اذا كان المس الشيطاني قد دخل جسمها وخرج منها سريعا لانه لم يعش معها فترة طويلة .. وهو ايضا حبه دخل قلبها من فترة قصيرة .. ربما يكون خرج ايضا سريعا ربما مع المس ..
على كل حال الايام ستثبت او تنفي ظنونه ..
سلمى محاولة كسر الصمت : اها كيفك يا نسمة صحتك تمام ؟؟
نسمة باختصار : الحمد لله ..
سلمى : مشيتي المدرسة اليوم ..
نسمة : ايوا مشيت ..
سلمى : اوعى يكون جاك صداع ولا حاجة ..
نسمة : لا لا لا كويسة ..
شعرت سلمى انه عصام في عينيه تساؤلات كثيرة اهمها هو يريد ان يختبر مشاعرها بعد التغيرات الحديثة .. حاولت ان تخلق له جو منفردا فقالت لام عمار : كدي يا ام عمار ويني الفرش الكان عملتيه عاوزة اعمل زيه ..
ام عمار : جدا يا بتي تعالي شوفيه .. دخلت أم عمار الغرفة بصحبة سلمى .. واخذت بسمة الطفلين ناحية الصالون .. لم يبقى في الصالة سوى عم ابو زيد والذي بدوره استأذن في الخروج وفتح الباب ..
اخيرا أنفرد عصام بعروسته وحاول ان يجرها في حديث : كبفك يا روحي ..
نسمة : الحمد لله . قالتها ورأسها لازال ناحية الارض ..
عصام : تعبانة حاسة بشئ صداع او اي شئ ..؟
نسمة : لا لا الحمد لله ..
عصام : مواصلة في علاج الشيخ ؟ الزيت والسدر ...
نسمة ترد بإماءه فقط ..
عصام : قعد تسمعي شريط الرقية ؟
وكذلك ترد بأماءه فقط ..
عصام شعر بفتورها ناحيته وردودها الصامته هذه ازعجته فقال لها : انتي زهجانة مني ؟... مليتيني كرهتيني ..؟
ردت نفيا بهز الرأس ايضا
عصام : طيب ليه تتكلمي معاي بالطريقة دي ..؟
نسمة فجأة انفجرت : تعبانة ياخ .. تعبانة ياخ .. ياخ انا تعبانة انت ما بتفهم .. وبدأ صوتها يعلو ...كل مرة وهي تردد في عبارة ..... تعبااااانة ياخ قلت ليك انتا تعبااانة ياخ ..
تسمع سلمى وامها صوتها ويأتوا جارين ليجدوها قد دفنت رأسها في ساعدها ودخلت في نوبة بكاء..
سلمى : مالها مالها . قلت ليها شنو ؟؟
عصام بغيظ : حا اقول ليها شنو يعني ؟
أم عمار تمسك بنتها : مالك يا نسمة بسم الله الرحمن الرحيم مالك يا بتي ..
نسمة لازالت داخلة في نوبة نحيب وبكاء ..
عصام جلس مقطب الجبين واضعا يده اسفل فكه وينظر الى هذا المنظر بحيرة وعجب ..
| |
|
|
|
|
|
|
|
|
|
Re: أنت غلطان (Re: درديري كباشي)
|
| Quote: شعر بالاهانة كانه هو مندفع والبنت هي التي تنفر منه .. |
ياخ عصام دا ما يروق المنقة شوية
نحنا صابرين هو مايمسك نفسو شوية
الامور بتمشى
| |
|
|
|
|
|
|
|
|
|
Re: أنت غلطان (Re: محمد بابكر محمد)
|
في طريق العودة عاتبت سلمها اخيها في انه كان قاسيا مع نسمة ولم يقدر حالتها المرضية والتي بصورة ما نحن في الاساس من كنا سببا فيها ..
قال عصام هو ما فعل معها شئ بالعكس هو حاول ان يكون رقيقا معها ويتحدث معها برفق .. الا انها هي كانت نافرة وبدت كأنها لا تطيقه ..
سلمى : لكن يا عصام انت مفروض تكون عارف انه دا ما نفور حقيقي هي حالة عابرة نتيجة للمرض .. شئ اشبه بحالات الوحم عند الحوامل التتي تجعل المرأه تكره زوجها .. لكنه كره عابر وغير دائم يدعوهم للطلاق مثلا ..
عصام : خلاص طيب انا انسحب من حياتها لغاية ماتزول حالة الكره هذه ..
سلمى : انا ما قلت هي الآن تكرهك انما قلت هي حالة كره عابر ناتجة من المرض او الحالة التي تمر بها وقد لاتصل لدرجة الكره .. بمعنى عقلها الباطن يجعلها تكره من كان سببا في الامها في الفترة السابقة لكن اكيد عقلها
الواعي وقلبوها لازالت تحبك انت ..
عصام : على كل حال افضل شئ انه انا ابتعد منها مدة اسبوع على الاقل هي تأخذ فرصة تتأكد من مشاعرها وانا كمان ..
سلمى : تقصد شنو بأنا كمان ... تقصد انه مشاعرك فترت ؟؟
عصام : والله مش عارف امس منظري كان بايخ وهي تنهرني بعبارة ( قلت ليك تعبانة ياخ .انت ما بتفهم ؟) قلبت العبارة كثير في رأسي شكلها بقى لي هي طفلة صغيرة كان عندها لعبة اسمها عصام وبعد اسبوع ملت منها ..
سلمى : غصام خلاص انا موافقة شيل الموضوع من رأسك .. على شرط مدة اسبوع كامل ما تتصل تسألني من نفس الموضوع او تتصل عليها هي او حتى على اهلها .. اتفقنا ؟؟
عصام : وهو كذلك ..
ودع عصام اخته وتحرك ناحية بيته مقررا الا يتذكر الامر لمدة اسبوع .. ويعيد تقييم الموقف من جديد ..
| |
|
|
|
|
|
|
|
|
|
Re: أنت غلطان (Re: محمد على طه الملك)
|
أحلى ناس والله محمد بابكر ومحمد الملك ..
معليش اهدوا شوية بتنحل ..
وماتنسوا انه الراجل مسحور ومعمول له عمل عشان يطفش ..
تعرف اسهل عمل عند السحرة والدجالين وهو تفريق الازواج .
وقد ذذكرت في القرآن سورة البقرة ( ...... ويتعلمون منهما ما يفرقون به بين المرء وزوجه وماهم بضارين به من احد الا باذن الله ......)
| |
|
|
|
|
|
|
|
|
|
Re: أنت غلطان (Re: درديري كباشي)
|
مرت ثلاثة ايام من الاسبوع والذي فيه حاول عصام ان يتناسى الامر ..
انشغل بالعمل وباصحابه وبمباريات كرة القدم . وبلعب الكتشينة .. متظاهرا باللامبالاه .
شغل نفسه فعلا لكنه لم يستطيع ان يمنع صورة نسمة من ان تتسلل كل مرة الى غفلته فأما تحل محل صور الكتشينة . او تحتل شاشة التلفزيون . كثيرا ما تسببت في هزيمته ..
تظاهر لنفسه وامام الآخرين بأن الامر لم يعد يهمه .. لكن يعرف في قرارة نفسه انها لم تكن حقيقة ..
كثيرا ما يسمع نغمة الرسالة في جواله فيجري نحوه متفائلا وفرحا ليصدم بأنها رسالة من شركة الاتصالات تعلن عن شئ ما على حساب اعصابه ومشاعره تبا لشركات الاتصالات التي لا تراعي مشاعر الزبائن ..هكذا همس في نفسه وهو يرمي تلفونه في السرير ..
كم مرة حاول او قرر ان يتصل لكن على قول المغني ( عزة نفسي مابيا علي اسلم قلبي ليك تاني )
وفي بيت آل نسمه اصبح الحال مقاربا ... تضع نسمه جوالها امام عينيها وتنتظر بقلق..وتتظاهر بالمذاكره ..
كل مرة تطل امها واختها تسأل .. ما اتصل؟؟
تهز رأسها بالنفي..
الام لم ترد الامر ان يشغل بنتها اكثر من اللازم ويؤثر في دراستها .. بل هي ندمت ان استعجلت ار الخطوبة وخرجت بنتها من مود الدراسة والتعليم ..
تدخلت محاولة ان تعالج الامر من جديد ..
ام عمار : نسمه يابتي ارجعي لدراستك وذاكري ركزي على شهادتك الزواج لو عندك فيه نصيب نصيبك ما بيفوتك ..
نسمه : ما انا كنت كدا كان همي اتفوق واجيب شهادة وادخل الكلية البحلم بيها .. لكن نقول شنو ..
بعد قليل يرن التلفون تتصل دكتورة سلمى : ازيك يا خالتي أم عمار كيفكم ..
تتفاءل ام عمار بهذا الاتصال وتسعد : اهلا يا بتي ياسلمى .
سلمى : كيفك سلمى انشاء الله اتحسنت ..
أم عمار : الحمد لله اتحسنت ورجعت لمذاكرتها ومدرستها ( محاولة الاشارة الا انهم لم يتوقفوا في أمر الخطوبة والعرس كثيرا ولم يعد يعنيهم ) .. وكيف عصام ؟؟
سلمى : عصام كويس بس قال انه ما راح يتصل على نسمة يزعجها لامن تتحسن حالتها تماما ...( محاولة ترك الباب نصف مفتوح أي متاقى كما نقول في الدارجية)
أم: عمار كثر خيره .. لكن نسمة الحمد لله صحتها بقت كويسة ورجعت تاكل وتذاكر ورجعت مدرستها ..
سلمى : الحمد لله وانا راح ابشر عصام بالخبر السعيد دا .. اها اديني نسمة اسلم عليها ..
نسمة : اهلا يا دكتورة ..
سلمى : كيفك يا عروستنا الحلوة . الصداع خلاك ؟
نسمة : الحمد لله يا دكتوره انا بخير . وكيف عصام طولنا ما سمعنا صوته ..
سلمى : حاتسمعيه لو ما كان بيزعجك ..
نسمه : يزعجني ؟؟ معقولة بس ؟؟
سلمى : تصبحي على خير يا حبيبتي .. وعصام اكيد راح يتصل .
| |
|
|
|
|
|
|
|
|
|
Re: أنت غلطان (Re: رانيه محمد الشيخ)
|
اااااااااااااااااااااااااااااخ انا
غايتو رويحتى اتحرقت عدددددددددددددددددددددددديل يا درديرى
:(((((((((((
معليش يا رانيا .. الحياة ماشة كدا نسوي شنو ... بس سوي صبر ..
| |
|
|
|
|
|
|
|
|
|
Re: أنت غلطان (Re: درديري كباشي)
|
سلمى بعد ما تقفل الخط مع آل نسمة تتصل بأخيها عصام ..
سلمى : الو يا عصام شنو حكايتك انت قاطعتني مع الجماعة ولا شنو ؟
عصام : اهلا يا سلمى كيفك وكيف علاء والاولاد ..
سلمى : كويسين شنو عرفنا خطتك قلت ما عاوز تتصل بنسمة واهلها لمدة اسبوع لغاية ما تديها فرصة تتأكد من مشاعرها وهي كمان .. انا مالي ما بتتصل علي قاطعتني معاهم ؟
عصام يضحك : معليش يا سلمى والله انشغلت اقاطعك كيف كمان ؟؟
سلمى : اها مصر تكمل الاسبوع كله ولا عاوز اخبار حلوة ؟؟
عصام : عند\ك اخبار حلوة قوليها والله انا لي كم يوم ما قادر استعدل ؟؟
سلمى : طيب ما كان تسيب قوة رأسك دي وتتصل ..؟ البت خاته تلفونها قدامها ومنتظراك لا قادرة تذاكر ولا قادرة تنساك ..
عصام : معقولة ؟؟ انا كمان .. وانتي عرفتي الكلام دا من وين ؟؟
سلمى : هسع كنت بتكلم معاهم هي وامها ..
عصام : معقولة وقالوا شنو .. والاخبار شنو ؟؟
سلمى . والله سألوا منك ؟؟
عصام : البنت ولا أمها ؟؟
سلمى : الاثنين ..سألوا منك ..
عصام : ونسمة قالت شنو ..؟؟
سلمى : سألت منك وقالت لعلك ما عيان .. وهي ليها كم يوم ما سمعت صوتك ؟؟ طبعا هي ما قالت كلام مباشر بسبب الخجل لكن صوتها ونبرتها كانت تقول اكثر وتنبض بالحب .. ياخي حرا عليمك ظلمت البت ..
عصام " ظلمتها كيف ؟؟ انا قلت اديها فرصة تتأكد من مشاعرها . بدون ضغط مني ..
سلمى : انا ما قلت ليك هي كانت في حالة مرض وصداع وهو حالة ما عندها علاقة بالمشاعر زي الزول يكون عنده صداع وزكام وما قادر يتنفس ما عنده طريقه لحب او مشاعر ولا علاقه للموضوع بالحب ..
عصام : انتي ما فهمتنيني كدا ؟؟
سلمى : كيف ما فهمتك انا حتى ضربت ليك مثل بحالة الوحم عند النساء الحوامل قلت ليك بيسبب نوع من الكره الغير حقيقي تجاه الزوج ومؤقت كمان ..
عصام : خلاص انا هسع بتصل بيها .
| |
|
|
|
|
|
|
|
|
|
Re: أنت غلطان (Re: درديري كباشي)
|
سلمى : كيف ما فهمتك انا حتى ضربت ليك مثل بحالة الوحم عند النساء الحوامل قلت ليك بيسبب نوع من الكره الغير حقيقي تجاه الزوج ومؤقت كمان ..
عصام : خلاص انا هسع بتصل بيها .
درديرى ماتقعد ليها قعدة واحدة وتفكنا من الشبكة دى .....
| |
|
|
|
|
|
|
|
|
|
Re: أنت غلطان (Re: انصاف ابراهيم عبدالعزيز)
|
درديرى ماتقعد ليها قعدة واحدة وتفكنا من الشبكة دى .....
بس لكن يا انصاف القعدة تالواحدة دي يلقوها كيف ... بين شغل وبيت وعيال وشرح وتسميع وتوصيل ونوم ودوامة من جديد.. البركة في الفرص القصية دي
| |
|
|
|
|
|
|
|
|
|
Re: أنت غلطان (Re: درديري كباشي)
|
عصام يقفل خط الاتصال مع سلمى ويتصل على الفور على نسمة ..
نسمة بالرغم من انها كانت متلهفة لهذا الاتصال .. الا انها ظلت متردده تنظر للجوال يرن ويهتز بل يكاد يضع نفسه في كفها كأنه كان ينتظر تلك المكالمة اكثر منها .. بعد الرنة الرابعة .. وبعد ان اصبحت حالة عصام صعبة
وبدأت سحابة من الاحباط تتجمع حول قلبه .. يفتح الخط ..
نسمه : الو ؟؟
عصام : اهلا نسمة كيفك مشتاقين ..
نسمة بنغمة عتاب : تثلاتة يوم ما تتصل بي بي وتسيبني عيانة .. وتقول لي مشتاقين ..
عصام : معليش انشغلت والله لكن بيك ما منك ... ؟؟
نسمة : عايزة تفسير دي ..
عصام : هي شنو العاوزة تفسير ؟؟
نسمة : حكاية مشغول بيك ما منك . دي ..
عصام : يعني كنت مشغول بصحتك وخفت اتصل بيك تتهيجي زي المرة الفاتت ..
نسمة : معقولة انت لسع ما سك في قلبك .. انا كنت مصدعة وقلت ليك تعبانة انت عاوز تقيمني كلي بموقف واحد وانا كنت مريضة ؟
عصام : لا ابدا ما مسالة تقييم وانت ما تكبري الموضوع .. انا كنت منتظر اتاكد انك طبتي بعدين اتصل عليك ؟؟
نسمة : حا تتأكد كيف اني انا طبت وبعدين تتصل ؟
عصام : انا اصلا كنت مقرر اتصل بيك في نهاية الاسبوع ..
نسمة : كنت حا تقاطعني اسبوع كامل ؟؟؟ والخلاك اتصلت هسع شنو ؟؟
عصام : ما قدرت اصبر اكمل الاسبوع ..
نسمة : ماا قدرت تصبر ولا حركتك سلمى ..؟
عصام : انتي لهجتك وطريقتك بقت غريبة .. انا اتصلت الآن بشوق عاوز اسمع صوتك لقيت نفسي في حالة تحقيق الحاصل شنو بالظبط ؟؟
نسمة : لا يا اخوي انا بهزر معاك ساي وبعاتبك لا تحقيق ولا يحزنون ..
عصام خلينا من كلام اللوم والشكل اديني فرصة عشان اقول ليك انا بحبك شديد ومشتاق اسمع صوتك واشوفك .
نسمة : ما انا كمان بحبك اكثر ومشتاقه اكثر .. الظاهر نحن اتحسدنا فعلا او اتسحرنا ..
عصام : طيب خلينا نمشي لقدام يوم الخميس نحن راح نجيكم انا وسلمى عشان نرتب مع اهلكم مواعيد الزواج بعد انتهاء امتحاناتكم ..وعلى فكرة ما عايزة اي دروس خاصة رياضيات فيزيا كيميا نحن جاهزين ..
نسمة تضحك : بلاش حركات يعني قول انت قدرت تشرح لي انا حا اقدر افهم منك كيف ؟؟
عصام : لا انا جادي والله ؟؟
نسمة : وانا جادة اكثر منك ..
ويضحك الاثنان ..
| |
|
|
|
|
|
|
| |
ابراهيم عبدالناصر
Nader Abu Kadouk
محمد حبيب الله
محمد بابكر محمد
هيثم طه
محمد على طه الملك
سيف الدين محجوب
بكري عباس علي
بله محمد الفاضل
انصاف ابراهيم عبدالعزيز
فيس بوك
تويتر
انستقرام
يوتيوب
بنتيريست