|
|
 بالسودان فحص الايدز قبل عقد الزواج
|
استمعت لقصة محزنة جدا من صديق سعودي حسب راويته:
كان له ابن عم تخرج من الجامعه وهو معتدل السلوك لم يفارق المملكة منذ ولادته بعد أن تم توظيفه بالحكومة خلق صداقات مع بعض الزملاء وكانت دائما النقاشات عن المستقبل والحياة الزوجيه بعد العمل كما هو قرر بعد كم سنة ان يتزوج بعد ان قام بخطوبة ابنة عمه اقترح عليه الاصداقاء الذهاب معهم للبحرين للترفيه وخاصه هو مقبل علي زواج وليس له اي خبره جنسية ((منها اجرب وتكون دعم ليهو في الحياة الزوجيه بقاعدة اسأل مجرب ما تسأل طبيب)). وكانت رحلة واحده لم تتكرر فيها تعرف علي بنت روسية استمتع بليلة حمرا .
عندما قدم لانهاء مراسم الزواج وكما معتاد هنا يتم عمل كشوفات طبية لسؤ الحظ كان بالكشف الطبي اصابة بمرض الايدز.
وحسب رواية ابن عمه منذ تلك اللحظة الي الان اين هذا الرجل لا يدرون اختفي من وجه الارض ومن حياتهم في ظروف غامضة.
نجي لي تجربتي الشخصية مع الايدز
موضوع الفحوصات الطبية والتشخيص عايز كثير من النقاش اصلو الشغالين عندنا هنا في السودان بالرغم من احترامنا ليهم ماعندهم اوتوكيت التعامل المهني ،حصل معاي موقف عند اجراء الفحوصات الطبية لزوم اكمال المستندات للسفر الي المملكة العربية السعودية بعد اخذ عينات الدم بمعمل استاك وذلك بعد صفوف تبدأ من الساعه الخامسه صباحا والانتظار الممل كان عايز تطلع من الصف تحجز بي طوبه بعد موافقة من هو امامك وخلفك ثم يتم تحديد مواعيد لاستلام النتيجة بمظروف مختوم عليه لتسليمها للسفاره السعودية بالخرطوم وفي يوم استلام النتيجه هذا يوم الامتحان يكرم المرء أو يهان ...
بمجمع فتح الرحمن البشير اجيك واحد اطلع في كنبه ماسك نتيجة الفحوصات بيد واليد الاخري بها الكشف ....... اخونا يبدأ في قراءة الاسماء بالدور.......وقتين اقول فلان الفلاني تبتسم .. تفرح ... تنطط.. معناها انت نظيف دي عايزه ليها زغروده تستلم ظرف التحليل .. من هناك جري للسفاره سعيد وفرحان…
اخونا الطالع في الكنبه لنهاية الكشف ما قال اسمك واطاتك اصبحت…
كنت واقف صاحبنا شغال فلان الفلاني – انده في الاسماء انا اقول بعد ده – فلان الفلاني انا اقول يا ولد اصبر انت طوالي شفقان – اعاين للظروف في يد الراجل لما الظروف بقت شوية ... أصبحت في موقف لا يحسد عليه ...كرعي ما شالني قعدته في الواطة . الظروف انتهت !!!!!!
قلته خلاص زولك لحقني امات طه ... اقبل وين امشي وين ياربي امشي بالحدود اسمرا اقول للناس ماشي السعودية اطش مليون سؤال داير في راسي وانا قاعد في الواطه متفرشخ خاتي يدي في راسي.... كان معاي جماعة كده الظاهر برضو معاي في الفيلم واحد كان قاعد في الكنبة مع جلوسي في الواطه الراجل اقوم وإقعد بعد شوية قعد في ظهري ماحسيت بيهوا والله حقيقة ، الراجل قايلني كرسي وانا الهموم الدخلت راسي اكبر من حجم الراجل .....اعاين للزول الكان معاهو الظروف اقول ياربي اعمل فيهو شنو الح قير الما قال اسمنا الواحد لو ما الصبر والحيرة كان ارتكب جناية.....
بعد شوية اشوف ليك واحد جاء عليهو شايل ظروف قلت ديل ظروف الناس العندهم الايدز ذاتم انا المقعدني شنو ما ازوغ اصلو وقت ما بدونا ليهو ظرف السجم امشي خلاص حارس شنو بعد كده…. سمعنا اشاعة قالو ناس الامن بجو إسوقو الناس معاهم بي ظروف كشف الحال.... بعدين قول ادوني ليهو ناس الامن خلوني أقع بيهو وين؟؟؟
شويه كده اشوف الراجل البنده في الاسماء طلع الكنبه تاني بدون أي مقدمات طوالي دخل في الموضوع عباس الشريف قال اسمي الوساويس اشتغلت ود أم زقده عايز ابشع بينا ناس ما عندها رحمة ...تاني قال الاسم ما قدرته اقوم من الواطة كرعي اترجرجن راسي لفه يدي بردن.
كان معاي زولا رفقة سفر واجراءات اتعرفنا علي بعض من أهلنا ناس الحاج عبدالله برضو مسافر السعودية.... استلم ظرفو من بدري الراجل سعيد وعلامات السعادة قنطر سفتو في الشفة العليا ولإكمال مرحلة السعادة اتناول ليهو علبة برنجي ختاها في جيبو القدام . الصباح كنا متواعدين نتقابل نشيل فحوصاتنا نمشي السفارة .
من قابلتو قال لي (( ها زول مالك قميصك زرارة تحت او زرارة فوق زي دراويش النوبه))
الراجل قاعد معاي متحير في موضوعي راسو ضارب من عدم استلام شهادة فحص الايدز وقتين شاف الراجل بقول في اسمي ثلاثة مرات وأنا ساكت قاعد في الواطه ونيابة عني عشان اخلص من الموضوع كورك ايوه ايوه ايوه بصوت عالي التفت ناحيتي لقي واحد منتكل في ظهري بصورة غريبه ما باقي ليهو كان اخت البردعه اركبني حمار دفرو بطريقة غبينه الراجل لو ما ايدو لحقت الواطه كان خشمو ادشدش قال ليهو القاعد فيهو ده حيطة جالوص ما بتشوف انت..... شالني من ضراعي استغفرتك يا مالك روحي شديت حيلي وقفت عاينت للراجل !!!
لقيتو واقف مبتسم ..
تاريهو يا قلبي الحنين ..
راجيني بي شوق السنين..
ياربي واقف من متين ؟ عشان نخلص الموضوع................
عاينت ليهو في وشو كبر الإبتسامة استعدل سجارة البرنجي في زاوية خشمو ... حسدتو في حالو ...وقلته هع هع ناس الجزيرة ديل نجيضين والله غير البول هرسيا ما تجيهم الحبه .
راح صاحبنا قال لي (( ها زول ها انت تليفة مالك مصنقر كده زي العندك جنازه والعره ده تخلي اقعد في ظهرك ما تقول ليهوا توور لي غادي وقتين جاء عليك...... كدي قوم الزول ده بقول في اسمك أهجم عليهو شوف لينا نجاح و ل ساقط) .
في هذه اللحظات اصبحت مثل الطفل الصغير يمين شمال صديقي جرجرني نص المسافة ربع المسافة تميته تتكل والباقي غلبني قعدته في الواطه وواصل هو ناحية بتاع الكنبه شايفو اتكلم معاهو الموضوع كلو اصبح لي حلم حلم بعد شويه زولنا قعد كورك . (( ها عباس ها عباس تعال اصل هنا الناس ديل قالوا تقاريركم اتاخرت كانت مع مراسلة تاني تعال شيل ظرفك ها زول ها نضيفه انت وقت بتخاف بتهابش مالك )) .
دار فتح الرحمن البشير كلها اتلفتت تعاين للزول البهابش....
الراجل قال كلام كثير فارغ مع دوشة الراس ما قدرته اركز ومضمون الكلام الطلع منو اصبح غير مهم جاني نشاط قوي نطيت من الواطه زي حمل الخريف وقت وقفت لقيت ما عندي جزمة في رجلي حفيان قلته ما مشكلة جريت لي صاحبي والراجل الشايل الظرف....
اول كلمه قلته ليهو يا خوي الحاصل شنو بتهذيب وانكساره….
قال لي استلم ظرفك خلينا نشوف شغلنا......
قلته اولا نستلم ظرفي من الزول اللئيم ده كان عايز اجيب لينا جلطه… بعد استلمت ظرفي والله العظيم الراجل ده اديتوا كف بي يدي الشمال لانو اليمين كان فيها الظرف قلبته تاني اديتو ليك بيدي اليمين بعد استعدلت الظرف بي الشمال أعتقد لي حسي الراجل بكون مدور من الكف.
مع اندهاشة رفيقي وهجمة العسكري وجوطة الناس حصلت دوشة.
نواصل
|
|
 
|
|
|
|
|
| العنوان |
الكاتب |
Date |
| بالسودان فحص الايدز قبل عقد الزواج | عباس الدسيس | 02-19-13, 07:17 AM |
| Re: بالسودان فحص الايدز قبل عقد الزواج | ود الباوقة | 02-19-13, 07:24 AM |
| Re: بالسودان فحص الايدز قبل عقد الزواج | الامين موسى البشاري | 02-19-13, 07:42 AM |
| Re: بالسودان فحص الايدز قبل عقد الزواج | درديري كباشي | 02-19-13, 07:52 AM |
| Re: بالسودان فحص الايدز قبل عقد الزواج | محمد عبد الله الامين | 02-19-13, 08:39 AM |
| Re: بالسودان فحص الايدز قبل عقد الزواج | عباس الدسيس | 02-19-13, 08:56 AM |
| Re: بالسودان فحص الايدز قبل عقد الزواج | عباس الدسيس | 02-19-13, 09:14 AM |
| Re: بالسودان فحص الايدز قبل عقد الزواج | عباس الدسيس | 02-19-13, 09:25 AM |
| Re: بالسودان فحص الايدز قبل عقد الزواج | مجاهد محمد الهادي | 02-19-13, 09:38 AM |
| Re: بالسودان فحص الايدز قبل عقد الزواج | عباس الدسيس | 02-19-13, 10:13 AM |
| Re: بالسودان فحص الايدز قبل عقد الزواج | جمال ود القوز | 02-19-13, 10:18 AM |
| Re: بالسودان فحص الايدز قبل عقد الزواج | عباس الدسيس | 02-19-13, 02:06 PM |
| Re: بالسودان فحص الايدز قبل عقد الزواج | د.نجاة محمود | 02-19-13, 02:20 PM |
| Re: بالسودان فحص الايدز قبل عقد الزواج | د.نجاة محمود | 02-19-13, 02:21 PM |
| Re: بالسودان فحص الايدز قبل عقد الزواج | مجاهد محمد الهادي | 02-19-13, 02:50 PM |
| Re: بالسودان فحص الايدز قبل عقد الزواج | عوض أبو عيش | 02-19-13, 02:40 PM |
| Re: بالسودان فحص الايدز قبل عقد الزواج | عباس الدسيس | 02-19-13, 03:15 PM |
| Re: بالسودان فحص الايدز قبل عقد الزواج | ناصر حسين محمد | 02-19-13, 03:31 PM |
| Re: بالسودان فحص الايدز قبل عقد الزواج | عباس الدسيس | 02-20-13, 06:17 AM |
| Re: بالسودان فحص الايدز قبل عقد الزواج | عباس الدسيس | 02-20-13, 06:32 AM |
| Re: بالسودان فحص الايدز قبل عقد الزواج | محمد عوض السيد | 02-20-13, 10:01 AM |
| Re: بالسودان فحص الايدز قبل عقد الزواج | Mohamed E. Seliaman | 02-20-13, 10:17 AM |
| Re: بالسودان فحص الايدز قبل عقد الزواج | الامين موسى البشاري | 02-20-13, 10:29 AM |
| Re: بالسودان فحص الايدز قبل عقد الزواج | عباس الدسيس | 02-20-13, 10:53 AM |
 Re: بالسودان فحص الايدز قبل عقد الزواج | Mohamed E. Seliaman | 02-20-13, 11:26 AM |
| Re: بالسودان فحص الايدز قبل عقد الزواج | عباس الدسيس | 02-20-13, 03:18 PM |
| Re: بالسودان فحص الايدز قبل عقد الزواج | عباس الدسيس | 02-21-13, 06:26 AM |
| Re: بالسودان فحص الايدز قبل عقد الزواج | عباس الدسيس | 02-21-13, 08:12 AM |
| Re: بالسودان فحص الايدز قبل عقد الزواج | Mohamed E. Seliaman | 02-24-13, 07:56 AM |
| Re: بالسودان فحص الايدز قبل عقد الزواج | عباس الدسيس | 02-26-13, 07:01 AM |
|
| |
عباس الدسيس
فيس بوك
تويتر
انستقرام
يوتيوب
بنتيريست