|
|
|
 Re: إنتخبوني !!!! (Re: ALZOLZATOO)
|
Quote: رشح أنت ما بترشحش ليه .
..........................
فضل اقول ليك حاجة صوتك زاتو ما دايراهو..أها شنو ليك ؟ |
داليا
انتي زعلتي وللا شنو يا دكتورة?
على كل حال رغم اني ناوي اتشرشح مع الجماعة .. لكن في صناديق الاقتراع حأديك صوتي بالصوت والصورة .. واهم شئ الصورة .. لانك لازم تطلعي لينا في التلفزيون في لقاء الاثنين (ما تقولي لي جيل الانقاذ وما بتتذكري ايام نميري) .. ولازم توفري لينا الكهرباء عشان نشوفك في التلفزيون ..
نحن عارفين انو باقي الوهج الفضل منك ينور مليون سنة ضوئية .. بس دخليها لينا في الشبكة
شايفك من هسي بقيتي تعملي حركات رئاسية .. اللبسة كيف? والقعدة كيف? يازولة مبروكة عليك
بعدين الزول المعاك في الصورة دة مرة يظهر ومرة يختفي يعني شنو?
| |
 
|
|
|
|
|
|
|
 Re: إنتخبوني !!!! (Re: ALZOLZATOO)
|
Quote: اسمعي المعاك في الصورة ده منو صبري الشريف لووووووووول يكه
|
ياهو زاااااتو ........لولين .
يا زول ملايتك الفارشم هناك ديل لمهم ...المراتب زاتا ما دايرة ملايات ..خفضوا النفقات بالله .
تحياتي برضو
| |
|
|
|
|
|
|
|
|
 Re: إنتخبوني !!!! (Re: داليا حافظ)
|
أبيــــــــــــــــــــــــــــــــــــــــــــــــــــنا
__________________________
أعظم تحية للمرأة السودانية (يا الله رئاسة جمهورية)
| |
|
|
|
|
|
|
|
|
|
Re: إنتخبوني !!!! (Re: فدوى الشريف)
|
يا داليا
سلام
رغم إنو عملت مداخلة لكن ما ظهرت ليه ما عارف والله
لكن أحسن ، أنا فتحت بوست اليوم أناشد الباشمهندس بكري
بأن يهبنا كنز غالي وهو خالتك منال محمد الحسن عشان كده
ما حا أنتخبك إلا لما تعملي تذكية للأستاذة/ منال بعدين
حا نشوف قصة إنتخابك دي رغم إنو ما وريتينا رمز المرشح
لكن بقترح عليك رمز مزدوج وهو عصاية وكمشة
على العموم ألف مليون مبروك وربنا يتم على خير
مع تحياتي ومودتي
| |
|
|
|
|
|
|
|
|
|
Re: إنتخبوني !!!! (Re: سيف الدين علي محمد الفاضل)
|
| Quote: خالتك منال محمد الحسن |
منال ما خالتي ياسيف منال عمتي لزم .
هي منال محمد الحسن وانا داليا حافظ محمد الحسن .
..........................
ما حا أنتخبك إلا لما تعملي تذكية للأستاذة/ منال
عمتي وانا حرة فيها ...ماااابذكيها .
| |
|
|
|
|
|
|
|
|
|
Re: إنتخبوني !!!! (Re: فدوى الشريف)
|
| Quote: أعظم تحية للمرأة السودانية (يا الله رئاسة جمهورية) |
يا دكتورة حقاً تحرسو ولا بجيك حقك تقاوي وتقلعو(وش جادي ) .
.....................................
كفاية جيتك .
| |
|
|
|
|
|
|
|
|
|
Re: إنتخبوني !!!! (Re: داليا حافظ)
|
برنامجكـ ده شكلو مطبق من الإستقلال كان قاصدة الإنتخاب في جمهوريتنا الفتية ....
عموماً أنا ضد (حرمة ) تحكمنا ... إلا إذا أعتبرتينا من التيم ويركـ المفترض معاكـ ( يمكن نقدر نبلع براحتنا بعدين ) ..
وعلى طاري التيم ويركـ ( البروفايل جميل ) .. بس هم من التيم ويركـ ولا لا ؟؟؟؟
| |
|
|
|
|
|
|
|
|
|
Re: إنتخبوني !!!! (Re: عمران حسن صالح)
|
يا داليا
سلام
ما عندنا تب مانع ننتخبك لكن قبل كده لازم نعرف
رمز المرشح
بقترح يكون رمز الترشيح مزدوج
عصايا وكمشة
على العموم ألف مبروك وربنا يتم على خير إن شاء الله
مع تحياتي ومودتي
| |
|
|
|
|
|
|
|
|
|
Re: إنتخبوني !!!! (Re: سيف الدين علي محمد الفاضل)
|
| Quote: من قلبك ؟...يعني خلاص ما حتترشح ! |
من ناحية حأترشح حأترشح .. لكن برضو حأديك صوتي .. لانو انا شعاري الانتخابي (لا تنتخبوني .. لست خير من يمثلكم)
ولو سألوني عن خير من يمثلهم ما حألقى اجدع منك ..
| |
|
|
|
|
|
|
|
|
 Re: إنتخبوني !!!! (Re: داليا حافظ)
|
..
.
طولت من البيت دا
جيت خاشى .. حسيت بدوخه
ولفه رأس ..
ممكن اسال سؤال
بس ما تتحسوا كلاكما
________
غايتو مع الوجاهة دى
انا وحمور تانى نضاير ساااى
عينى باردة للاتنين
| |
|
|
|
|
|
|
|
|
|
Re: إنتخبوني !!!! (Re: Tabaldina)
|
دلّوش:
Quote: حقوق الطبع محفوظة لأماني الأمين .
حنوديها سفيرة في بجين أو بكين البتختارا هي . |
تصدقي يادوب شفت البوست ده ..
بعد هدة الحيل الفي بيجينق دي .. أعفيني سعادتك من البلد دي ..
يا تشوفي لي سفاره في حته تانيه مافيها شغل كتير ..
يا تخليني أتقاعد بمرتب وزاري طبعا ..
لقيتيني كيف وأنا بتشرّط ههههههههه
| |
|
|
|
|
|
|
|
|
 Re: إنتخبوني !!!! (Re: Tabaldina)
|
Quote: ممكن اسال سؤال
بس ما تتحسوا كلاكما
|
وينو السؤال ؟
.......................................
الصورة دي ما فيها زول بتعرفو ؟
| |
|
|
|
|
|
|
|
|
|
Re: إنتخبوني !!!! (Re: داليا حافظ)
|
الجابرية
كان ضحوية ... وكنّا نسنّد في المحروت
فجأة يدوي مكبر صوت
قال الريس مار بي فوقنا
من شغلتنا قلعنا عروقنا
إن شغلتنا بلا ماروقنا
فكّينالو حبل واسوقنا
وإنماسكنا يطمّن روقنا
قمنا جميع الحلة مرقنا .. البيشوفنا يقول وا شوقنا
كان ضحوية .. وكانت عين شمش الله قوية
وكان الريس في عربية .. واقف طولو تحت شمشية
هللنالو وهلجنالو .. ولوحنالن بالطورية
فرّ عبايتو وهزّ عصايتو .. وهزّو بنادقن الضابطية
صفقنالن صفقة قوية
زغردنالن .. وهّدن عندنا خمسة دقائق
قدمنالو كتاب الله درقة وسيف .. تبروقة هدية
قفة تمودة .. وفاس دهبية
وكنا قبل بيّتنا النية
وبين بنتين علّينا اليافطة .. اليافطة ام زيق الدمورية
وانعبينا هتافاً واحد :
( الجابرية تحي الثورة ..
دايرين بوسطة ومدرسة وسطى
والشفخانة وسوق منضبطة )
روح باسم .. قام خاطبنا بنهج الثورة الصارم وحازم
أمّن لازم من شفخانة والتعمير بالعون الذاتي
أمّن لازم من شفخانة ومدرسة وسطى
والتعمير بالعون الذاتي .. إلا البوسطة دي ينظر فيها
اما السوق .. السوق منضبطة
وبالتأكيد .. للتجار الأسعار واضحة
للمستهلك باينة وواضحة .. وإن جاملتوهن تبقى الغلطة
إنكيفنا .. رفعنا إيدينا وهزيناهن بالتأييد :
( لا تفريط في قوت الشعب ..
سحقاً سحقاً للرجعية
الجابرية ضراع الثورة ..
بالإنتاج حا نبني بلدنا )
وكانوا في جيهة ونحنا في جيهة
هُن إنهببو بالكابات .. وما همانا الصيف وعرقنا
فات الريس وانفرتقنا
انفرقنا على الجابرية .. كلنا ننضم وما صدقنا
بالجابرية تجيها البوسطة
الشفخانة ومدرسة وسطى
قلنا يا ريت لو زارنا فطور
وانحزمنا ضبحنا التور
كنا اقلاّ ضمنّا النور
أو ياريت لو زدنا الصفقة وعاش .. ويسقط ويوية اليوية
كنا أقلاّ ضمنا الموية
كنا بننضم بي إيدينا .. ( ده أحسن ريس مرّ علينا )
من الله خلقنا وشُفنا خلقنا .. ده أول ريس ذاتو يجينا
وكونه يجينا يقنّب بيننا .. يشوف البينا .. كفاية علينا
آ الجابرية يجوكي الحكماء
آ الجابرية تواصلي البرة
آ الجابرية ولادك تقرا
نمشي الليلة نصاقر الرادي
نمشي الليلي نحضر النشرة
كنا نرجع في كلماتو
إلا في ستة من الجابرية .. قالوا تعبكم خارم بارم
يذهب حاكم خلف الحاكم
والجابرية تظل في حالا .. حلة حياتها تسر الظالم
صدفة تموِّت وتحيا اطفالا
لا جلكوز لا تقرا رسالة .. لا راح يطلع منها عالم
ما بينصفكن إلاّ ضراعكن .. عبّو ضراعكم يا رجّالة
وخلو بصركن دغري وسالم
حكم العسكر ما بينشكّر
كلّه درادر .. كلّو مظالم
ما هو قدركن تحيو همالة
مقصودين والقاصد فاهم
وقاطعناهن .. حاربناهن
تمّيناها البينا شتائم
حالَتُن احسن ناس في الحلة
إيدا نزيهة .. عقولا نبيهة
وقلنا يفرزوا وقلنا فواهم
يطلعوا فالصو وقطاع رحمة
عينة شماتة وخارم بارم
وإحنا القصّر واثقين فيها
وقطعناها معاهم جملة وقاطعناهن
وصاروا في جيهة ونحنا في جيهة
مرّ اليوم .. الشهر .. الحول .. والجابرية بلد في حالا
قواسي شيوخا .. مآسي أطفالا
عذابات ناسا .. حلة تعافر ومقطوع راسا
من القُرّاصة ولي قَرّاصا .. حلة تعافر ومقطوع راسا
عشرين كيلو من الجابرية .. صبية تساسق بي كرّاسا
آ الجابرية عذابك فينا .. لاكي القرية ولا كي مدينة
وفد في وفد يقوم ويجينا
عايزة دراسة واجراءات
عون امريكي قرض ألماني وحاحاءات
وحد ما نشوفلنا مسعولين .. مسعولين أو خواجات
نجري نلم قدحاتنا عليها .. ترطن ترجع زي ما جات
الشفخانة وعايزة دراسة .. ومدرسة وسطى وإجراءات
لما المطوحة طالت بينا .. إنذكرنا العون الذاتي
إنحزمنا وقلنا برانا .. نبني نقوم لي الشفخانة
طوبة في طوبة .. وقومناها
ويوما التمت جات السلطة عربي وعجمي ومرة رطانة
الشفخانة ده ما هو بُكانا
هاك يا تلتلة هاك يا ورطة
وغصباً عنك يا الجابرية .. غصباً عنك يا أحوالا
وحمياتا وموت أطفالا
وحمرة عينكن يا رجالة
قوة إنشكت بيننا النقطة
وفي الجابرية تحوم الشرطة
هووا كلاب الحلة وصنّوا
ومن يوم داك ما شفنا الستة
وفد الحلة السافر جانا .. قال إنأكد شاف الخرطة
ونحن بدل نبني الشفخانة .. إنسرعنا بنينا النقطة
الشفخانة ده ماهو بُكانا .. وكانت غلطة إنقلبت ورطة
إنفاهمتو مع المسعول ؟؟؟ إنفاهمنا مع المسعول
وقال حا يقوِّم للشفخانة ؟؟؟ أو يدفع لنا حق الطين
مع إنو النقطة وكت بُنيانا قومتوها بلا زنزانة
في تقديرنا كلام معقول .. كون يقوِّم لي الشفخانة
حاجة تضحك .. محرقة ... هانة
انتو تقيفو مع المسعول
واللا الكنتو تقيفوا معانا
وقلنا وخفنا نصد الجاي .. خفنا نفشل باقي الخطة
فضلت جايي .. هي فضلت خطة
وانفرقنا على الجابرية .. وانعلقنا تجينا البوسطة
ومدرسة وسطى والشفخانة قصاد النقطة
تجينا .. تجينا .. تجينا ... تجينا
وما إنيقنّا ..
ناس إنولدوا وواحدين ماتو
لمّا الريس ودوشتو فاتو
فاتو العسكر .. وجو الأحزاب
ونفس الحلم إنجدد تاني
نفس الوجع الراح تحتاني
حتّلناهو جمعنا رفاتو
نفس اليافطة في نفس الحتة :
( الجابرية تحيي الشعب
دايرين بوسطة ومدرسة وسطى
والشفخانة بديل النقطة )
فينا إنكلم شيخ الحلة
صنقع .. دنقر .. سلم وصلّى
وكانوا كلاب الحلة بهووا
وقال كلمتنا تكون فد واحدي .. شان ننقوى ما ننزلا
شان مشهادنا وعدل الحلة .. نحن نفوِّز حاج البلة
وزاد هوهيو كلُّوب الحلة
وبعضنا عارض .. ردّ وفاوض
شيخ الحلة القام حمسنا .. بلة الحمش الزول ما دلة
أول فاهم وقبلوا ولدنا .. وراح يحكملنا بي شرع الله
هو .. هو .. هووا كلابنا .. لمّا استغرب شيخ الحلة
وانفرقنا على الجابرية
انفرقنا ويوم الليلة إنجمعنا عموم الحلة
شيخ الحلة قرا القرآن .. صنّوا كلاب الحلة وهووا
وبلة إنقدم سمّ وصلّى .. صنّوا شوية .. وهو هو هووا
وقام إنكلم .. وعند إنكلم كان بينقسم
النسوان الجاي تنهامز
الصبيان الجاي تنغامز
وكان بينبسّم
وكانو كلاب الحلة بهووا
شكّر وشتّم .. هو هو هووا
حلّل وحرّم .. هو هو هووا
هود سابنا .. وفات ودانا الآخرة وجابنا
قاطعناهو وصوتو إنوطّا
اصلاً واطي وتاني إنوطّا
دايرين بوسطة ومدرسة وسطى .. والشفخانة بديل النقطة
التموين وزيادة الحصة .. كهربا موية وسوق منضبطة
بلة انبرع وقال ببنيهن .. هو هو هووا كلابنا واستغربنا قبل بالمرة
لامن نهتف ترسى كلابنا .. لامن ينضم بلة يهووا
بلة انحمس وقال بسقينا .. وبي إذن الله يضوّى الحلة
هتف الشيخ وهتفنا وراهو :
لا تبديل لشرع الله .. هو هو هو
ولا ولاء لغير الله .. طاء طاء طاء
عاش الفارس امل الحلة .. بلة الطاهر علي حسب الله
بلة الطاهر علي حسب الله
كبر فينا وقام إندلّى
ولسة كلاب الحلة بهووا .. وزاد هوهيون
كبشاً ضاع .. من مرحاتو وفاقع باع
بلة الطاهر على بلاّع
كانت أول مرة نشوفو .. يومنا الشفنا اللاندكروزر
اللونا مخطط .. والبنوت الراسا مربط .. التنبوبر
لوري مكوش أقمشة .. سكر .. حتى الفوفو
وعتِّل تؤجر .. وامحى المنكر بي معروفو
بلة الطاهر علي بلاع .. اكرمناهو .. اكرمنا ضيوفو
يشبة مَرَتْ الشيخ في وشيو .. لولا الدقن الدشدش صوفو
بلة خبارك ما بتشبهنا وعامل زولنا
تاني نقول الزول برّانا نغير قولنا
إلا كبار الحلة بقولوا .. بلة ده هولنا .. بلة ده أصلاً من ها الحلة
إلا إنربّى وقرا في الخارج .. ورافق جدو الفتح التركي
وسيرتو انقطعت في المهدية
ومرة سمعنا استوطن برة .. وقام إنزوج من مصرية
جابت علي .. علي جاب الطاهر .. حتى الطاهر خلّف بلة
جدو اشيطن اخير ما لانا
وبلة انسركن جاء وبرانا
أقرب واحد لي حاج بلة .. أقرب واحد شيخ الحلة
بلة الطاهر علي حسب الله
أول مرة يصلي معانا .. قدمناهو وقام أمانا
صوتو مرخرخ لمن يقرا
يقرا ويقطع زي البطرا
لامن يركع جسمو متختخ
عند السجدة سجودو ممخمخ
شيخ الحلة يقول عن امرو
زول غرقان في الدين من عمرو
ستة سنين قابض في جمرو
ما فكاهو طريق الله .. صوتو وِدِرْ من كترة ذكرو
وجسمو التختخو شدة صبرو
قلنا حقيقة .. الزول بي عذرو
وفتنا قناعة .. ومانا قناعة
إلا الستة الصارو جماعة
قالوا ده زول ترباتو مياعة
ما بيشبهنا ورفعو وضاعة
زول زول دنيا ودنيا صياعة
قصة دينة ودقنو بضاعة
واحنا اصواتنا .. يا إما مضاعة
يا إما جهالة وناس متباعة
وفي الحالتين آمالنا مضاعة
وخارم بارم
كونها بوسطة ومدرسة وسطى ..
والشفخانة وموية نور
كونو يجينا ده ما منظور
وزيادة الحصة .. الزول زول سوق .. زول من جدو يلف ويدور
ويا الجابرية ده مطلب عادل كونو تطيبي تكاتبي وتقري
ضوك يشلع .. دشك يرشع .. واحنا دفعنا ضرائب بدري
ولسه بندفع .. لسع .. لسع
بس يا جماعة .. إن قضينا حياتنا تباعة .. وصنّيت رادي
وقول في الفاضي .. خوفنا نقوم ما نلقى أراضي
ونحنا أساسنا وراسنا زراعة
والجابرية إن دايرة شفاعة
ما بيشفع لها إلا ضراعا
عبو ضراعكن يا رجالة .. وخلو بصركم دغري وسالم
عبو ضراعكن يا رجالة
شيخ الحلة أضلّ وضلّ
واسألوا بُرّة وحاجة السُّرة
عن التيبان وحكاية الصُّرة
اللمّ البلة وشيخ الحلة مع شرع الله
والناس ديل العارضين برة
جرّبناهن كمين مرة
تاني نجرب شان ننضرّ
ويا الجابرية معاكي سلامة .. كان الفوقك ما فات مرة
كان كلماتن ناشف ريقا .. وكانت مرة
إلا حقيقة .. غلبنا نطيقا .. وين في الصرمة وقل القدرة
سكتناهن بس ما صنّوا .. وقاطعناهن تاني المرة
وبلة طريق الناس وخيارا
فوزناهو وجانا زيارة
كرمنالو التور وعرضنا .. وخليناهن برة الدارة
دايرين بوسطة ومدرسة وسطى
موية وكهربا والشفخانة .. زيادة الحصة وسوق منضبطة
وصدوا كلاب الحلة يهووا .. ينضم بلة يهووا معاهو
نهتف نحنا يزيد هوهيوا
مافي شهر جاتنا الخرسانة .. جان السيخ .. الطوب .. الرملة
جا الأسمنتى شكارة شكارة
عديناهن ألف شكارة
كرمنالن خيراً جانا
وكل كلاب الحلة الهوّن .. طفشنالن بالجبخانة
وفي صنانة تدودي الزانة
انغالطنا كتير في بعضنا .. أولى المدرسة ؟ واللا البوسطة
أولى المدرسة والشفخانة .. الشفخانة محل النقطة
ونان النقطة .. نحنا أهالي .. وودنا صافي
بينا معزة جرائم مافي
وما بنحتاج لي شرطة ونقطة
تحصل علة .. في شيخ الحلة وناس السلطة
نحنا الإيدنا بنت لي النقطة .. والجيرنا زبالة اطيانا
ناس السلطة إن دارو النقطة .. شي بُكان أرض الشفخانة
وما طالبانا خلاف زنزانة
مدرسة بوسطة
ستين طلبة وعشرين اوسطى .. شغالين ما ملو سخانة
مدرسة بوسطة .. وقلنا غُنانا
يا الجابرية .. الله أدانا
حاج البلة المبروك جانا
جاب المدرسة .. جاب البوسطة .. وبكرة يرجع للشفخانة
نصحى نصابح موية الدُّش .. نمسى نلاقي الضو عمانا
مدرسة بوسطة .. مدرسة بوسطة
وتاوق .. تاوق .. تاوق ..تاوق .. تخ
وفجأة تبين في السطح الخرطة .. وكب تنتصب الميضنة أخ
أخ من حظك يا الجابرية
سابع جامع بالجابرية
وصدوا كلاب الحلة يهووا .. أخ يا الناس الحالُن قطّ
هو .. هو .. هو .. هووووا
في البلدان الحظها فاجع
بق يا الصاح الماك متراجع
حرِّق دبش الدنيا الغلطة
بق وانفرق في الجابرية .. بق في ارحامنا في شافع نافع
ترفعوا امو في حيطة الجامع
يكتب يسقط دجل السلطة .. يسقط بلة وشيخنا التابع
وكشفناك وكشفنا الخطة ..
تحيا كلابك يا الجابرية .. يحيا ضراع الزيتُن طالع
غُلب يصارع مر الواقع
يحيا ترابك والطورية .. الجابرية تحيي الشارع
دايرين كهرباء دايرين موية .. دايرين سلطة وسوف منضبطة
دايرين هسة زيادة الحصة .. الشفخانة بديل النقطة
دايرين بوسطة ومدرسة وسطى .
محمد الحسن حسن سالم (حميد )
........................................
أهداء لكل المرو من هنا والحيمرو من هنا ..
| |
|
|
|
|
|
|
| |
ممدوح عثمان
داليا حافظ
elfadl abdellatif
فدوى الشريف
عمر الفاروق
عمران حسن صالح
omer osman
Yasir Aloob
فيس بوك
تويتر
انستقرام
يوتيوب
بنتيريست