|
|
 ربع عامود
|
حاتم الجميعابي
حكمة الأثنين : انهم يسرقون التاريخ و يشوهون الذاكرة و يخربون الاوطان و يبيعون مستقبل و طموحات و آمال الاجيال القادمة مقابل حفنة من الدولارات و بعض الكراسي الزائلة ... هكذا هم اعداء الشعوب و الراكبين على نضالاتها..
(1)
مصطفى عثمان اسماعيل: ما تبثه قناة العربية غير موجود في السودان!!
عليك الرسول .. النبي فوقك .. وحات الله .. ياراااااااجل .. أنت بتشوف ياتو عربية أوعا تكون الكامري الرئاسية حقتك .. عرفنا المظاهرات هزيلة .. قائمين بيها مرجفين .. ومحدودة .. ومافي مظاهرات .. حتى الموجودة قلتو مافي السودان عاد ده كلام يا مرسي !!! لكن ما بالغتا يا المستشار في دي .. عيني في عينك كده عليك الله الشغل الجابتو العربية ده .. ما أقنعكم وخلاكم كلكم بقيتو زي عبد الرحيم محمد حسين تلخبتو في الكلام زي الزول البنجو ما فكاا..
(2)
كلمات خاص بالمهندس لوئ:
بالنسبه للناس الزعلانين من حرق بص الوالي..
ما زعلتو من سرقه مليارات الدولارات طوال 23 سنة ؟؟؟؟
ما زعلتو على الآف الابرياء الماتو في دارفور ؟؟؟؟
مازعلتو على خسارة حلايب و لا الفشقة ؟؟؟؟؟
ما زعلتو على هجرة الكفاءات الوطنية البتعمر بلد الناس ؟؟؟
ما زعلتو على جريمة انفصال الجنوب ؟؟؟؟؟
ما زعلتو على تدهور التعليم والصحة وباقي الخدمات ؟؟؟؟
ما زعلتو على إنحطاط قيم المجتمع؟؟؟
(3)
نائب رئيس الجمهورية : التظاهرات هزيلة !!!
هذه التظاهرات ليست هزيلة إلا على المكابرين والذي أدمنو الفشل الحقيقي في إدارة شئون البلاد .. وعجزهم الواضح في إيجاد مخرج جذري لأزمة البلد ..
بالمناسبة نميري في إنتفاضة مارس أبريل كان بقول نفس كلامكم ده وفي النهاية لقى نفسو في مذبلة التاريخ .
(4)
يبدو أن الصحف العالمية والعربية أفضل من صحفنا بالداخل، فقد تناول الإعلام العربي والعالمي خبر التظاهرات والمسيرات التي تعرضت للقمع من قبل الأجهزة الأمنية والشرطية من جوانب عدة ، وتناول كتاب عرب وعالميين هذا التوجه نحو الحرية بكثير من الحيادية التي أفتقدتها صحفنا السيارة والتي تعمل وفق قانون الصحافة والمطبوعات سيئ السيط والرقابة القبلية على الصحف، بالتالي علينا أن لا نلتفت إلى صحفنا هذه الأيام فهي تعمل بإمرة الحكومة.
(5)
وزير المالية: أكد عدم وجود أية زيادات جديدة على المحروقات قريباً!!
ختو تحت قريباً دي خطين .. وأهم شئ يكونوا كباااااااااار .. حقوا الناس تعرف بأنو القادم دوماً أسواء مع سياسات هذه الحكومة، فهنا إعتراف ضمني بأن هناك زيادة ولكن حسب التواريخ والمواقيت الحكومية ليست الآن، بالتالي المواطن موعود بزيادة أخرى على الأسعار، حسب وزير المالية.
بالله عليكم في إستهتار أكتر من كده ..
(6)
والي الخرطوم يعلن بدء العام الدراسي الأحد في موعده .
الكلام ده سمح ... ودي دفعة جديدة لحركة التظاهرات في السودان ينضموا ليها طلاب المدارس ..
يلا يا اولاد المدارس في ربى السودان وسهله يلا شخبطو في الكراريس .. وأطلعوا المظاهرات!!
(7)
نفذ العاملون بمصنع اسمنت عطبرة امس اضراباً عن العمل احتجاجا على عدم ايفاء ادارة المصنع بزيادة المرتبات بجانب فصلها لاحد الموظفين المطالبين بالزيادة قبل ثلاثة ايام.
عطبرة الحديد والنار مثلما كان دورها واضح في مارس أبريل 1985م .. توقع على دفتر حضور إنتفاضة العام 2012م ..
(8)
الشرطة: نرصد كافة العناصر التي تزعزع الأمن والاستقرار!!
أرصدوا .. سااااااااااي وشوف شغلتك .. لو عندك القدرة أنك ترصد كل الشعب السوداني .. أعمل ساي بس حقو تعرف أنو الشرطة في خدمة الشعب وليس الحكومة !!
موقف بايخ جداً :
تكلفة الحج هذا العام تفوق ال (15) مليون جنيه (قديم) .. يا سبحان الله !!!
موقف بائخ .. اكتر من الفات:
الدكتور الحاج آدم يوسف ينضم إلى أصوات الحكومة: الشعب استجاب للاجراءات الاقتصادية بروح وطنية عالية، يا سيدي .. بي كلامك ده غايتو أنتا يوم بتكتل زول ..
|
|
 
|
|
|
|
حاتم عبدالباقي
فيس بوك
تويتر
انستقرام
يوتيوب
بنتيريست