|
|
 Re: عاجل لشعراء المنبر : بادروا بتسجيل شياطين شعركم ، د. معز أنت في ورطة " ألحق نفسك" (Re: انور الطيب)
|
الرائع جدا أنور الطيب لك التحايا وأنت تطوف بنا داخل عوالم الشعراء الباذخة , بهذه السياحة البهيرة..وأعجبتني جدا المداخلات من كل الرائعين , سوى أن كانوا شعراء أو كانوا نقاد أو باحثين ..مثل عجب الفيا الذي أتحف هذا المنبر بالروائع من البحوث النقدية غزيرة المعلومة ودسمة العبارة, أو أمثال البروف الشاعر الرقيق معز عمر بخيت , أو الشاعرة الندية دوما كجروف الشمال نادية عثمان,,أو العالم الجليل أبو جهينة الذي هومنا معه في رائعة أمرؤ القيس ..وغيرهم من الاحباب .
والله البوست جميل يا أنور وتشكر عليه جدا وما زلنا متابعين,,
في هذه العجالة والحديث عن شواطين الشعر ,أحب ان اؤكد ان هذا الكلام يعتقد فيه العرب جدا ,وهو صحيح في رواياتهم وذكر كثيرا ,, وهناك قصص تثبت هذا المسعى ويمكن لأستاذنا عجب الفيا أن يمدنا بها أوغيره من فطاحلة المنبر..
////////////////
دعوني أقدم لكم قصيدة للرائع عبد الله وداعة الأمين أرسلها مرة في هذا المنبر وجاراه فيها بعض شعراؤنا منهم الرقيقة نادية عثمان , وقد جاريته أنا بقصيدة أوردها في هذا البوست لتحكموا علي ,هل لدي شيطان مثل الآخرين؟...وهي دعوة للشاعر عبد الله المهاجر في مدينة الضباب أن ينضم الينا في هذا البوست .ودمتم جميعا....
////////////
عبد الله وداعة يقول:
ابداكي كيف.....؟
وانا في الارض....
لاموية لاحسا يطول
لاقدرة تديني الامل
لاحيلة تسند فيني طول
ابداكي بس بالله كيف؟
وريني يا حسي الخجول
لاهسه قادر ابتديك
لاجيتي سكتي الفضول
والغيمة ادتني الضهر
واطانشت فيني الحقول
واتشحتف روحي السهت
مشتاقة تسال كل زول
لو مرة شافك في النعاس
بتوضي بيك حسي الكسول
يا راكعة في الجوف اشتهى
تستنى في خشوعي الوصول
يتيمم البحر الحريق
والموية تغرقت في الزهول
مشروقة بيك حد السقف
والموج يكتح في السهول
***
اديني خاتر سكّتك
ببداكي منك وانتهيك
واتباهى بيك جوه الفرح
جواي وافضل اشتهيك
اعتزّا بيك زيك وهج
يا خوفي من وهجي البجيك
يتهجي بيك حرف الكلام
ويعلم الايام مشيك
قبال يتاتيها الخريف
والموية تشرب من وشيك
يا سكتي ودربي الندي
البتمنى ديمه يودي ليك
يبراكي زي ضلك تمام
ويودر الكون في يديك
يا سارقة عينين القلوب
وحنينة في بسمة عنيك
بالله كيفن اوصلك
وريني من وين ابتديك؟
لندن 2005-08-19
//////////////////
وقد رديت عليه بهذه الكلمات
تبداها كيف؟؟
وانت الفرح عم ّ الفصول
وانت العشم لما العشم
بين المحبين ناقشنو قول
تبداها كيف؟؟
وانت النجم وعلاك قريب
بس نحن ماقادرين نطول
وانت الصبابات القبيل
عاجبانا في وقت الاصيل
تبداها كيف؟؟
اصلو البداية معاك بدت
في شرقتك زمن الافول
ما انت اديت الدعاش نفس
المطر , وموية البحر
منك هطول..
يا منبع الريد الأكيد, يا
سكة الحالمين وصول
تبداها كيف؟؟
لو كان نهايتك مبتدأ
وانت العمر مغروس
على زهرة شتول
والشوق معاك غلبو الصبر
حتى الجمر حرقو الذهول
.,,,,,
..,,,,,,,,,,
....,,,,,,,,,,
...,,,,,,,,
أبداها لما الموج يداعب ضفتيك
لما الفرح لافينو بورق الهدايا
وقالو ليك..
أبداها وقتين القمر قال مشتهيك
يا مصدر الجفا والحنين,
يا مفجر الافراح أنين
أبداها قبال تنتهيك !!
أبداها يا ألق المدائن
والفنارات غايصة مابين لجتيك
أبداها في غبش الضباب والرؤيا
ما بينك اليك !!
ما إنت في مدن الضباب سهران
كتير ,,والهم يناقرك ويرتجيك
أبداها يازول من حمأ ,, خليها
تعشق مقلتيك,,
////////////////
محبكم دوما
بخاري بشير
الخرطوم
|
|
 
|
|
|
|
بخاري بشير
فيس بوك
تويتر
انستقرام
يوتيوب
بنتيريست