ام درمان واسطورة ثقافة الوسط!!!.

Quote: ياو ليد شنو يافرده نمشي خطوة تقوم ترجع خطوتين ؟ ياوليد الاسباب المنعت الهجرة العكسيه تحصل أنا كنت فاكره برضو واضحه من كلامك القلتو و كلامى الاكدتو من خلال مداخلتك و ما كنت فاكر الشرح ضروري !!! لكن مالو نوضح و جهة نظرنا :- السبب المنع الهجرة هو يقين دولة الجهاد ضد (الكفار ابان عيون خضر) دا السبب الخلى الناس زى ما قلته ليك متمسكين بمهدويتهم و مشروعهم الجهادى كان فى أم درمان أو كان فى المناطق الأخرى من السودان القامت بانتفاضات مهدوية كتيره. اها النقول ليك الكلام المهم الكان بقول فيهو اخونا صهيب دا عن الافنديه و ما ادراك (دا حسب فهمي لو انا غلطان صهيب يجي كع كع فى رأسي طوالي). الإستعمار يا و ليد كان احرف من أن يفكك إيديلوجية أم درمان الإستعمار استفاد في تغذيته و تدعيمها و توظيفها لترسيخ دعائم حكمه و سعى أنو يخلق منها درجة إجتماعية مقابل أخر سوداني غير معترف به عشان كدا كان الأفندية التم تجهيزهم و مسكوهم العمل الإداري ( هنا يا ولي اشتغل وفي رأسك سايكلوجيا الإنسان المقهور عشان تعرف القصة كانت حدها وين). المهدية يا وليد ما إستمرت إي نعم لكن تصدق الشيخ يوسف البدري كان واحد من المهدويين و اهو لما انتهت المهدية اتحول لأفندي و عمل لينا الأحفاد عشان كدا عاااادى جداً لازم يكون عندنا خالد أبو الروس و دو دو و كل الرعيل الأول من الأفندية (في ورقة للمرحوم خالد الكد برضو مهمة أسمه الأفندية و مفهوم القومية قاعدة في الانتر نت دا مهمة). المهم يا ولي تصدق نصك بتاع اول مداخلة داك نص كااامل بوضح كل شئ بس لو عاينته ليهو بطرق مختلفه.

Quote: - أختلف مع الأكرم " نابرى " من أن الميكانزمات لم تكن متعسفة ، بل طبيعية التطور من خلال معطيات البنيات التحتية التي وفرها المستعمر .

Quote: دا السبب الخلى الناس زى ما قلته ليك متمسكين بمهدويتهم و مشروعهم الجهادى كان فى أم درمان أو كان فى المناطق الأخرى من السودان القامت بانتفاضات مهدوية كتيره.

Quote: ياتو ناس وياتو مشروع ؟ المهدية في اخر سنواتها كانت كما الانقاذ الآن لا مقبولة داخليا ولا مقبولة خارجيا فما كانفي زول متمسك بمشروعه الجهادي ولا حاجة والكانو متمسكين بالمشروع كان اغلبهم خارج امدرمان صحيح المهدية بدت كحركة وطنية .. وهي فعلا حركة وطنية لكن شي طبيعي انها تنحرف عن الخط فالسلطة المطلقة مفسدة مطلقة هاك اقرا http://www.google.com/url?sa=t&rct=j&q=&esrc=...aVRrxHbzenRFbNJKG19A يعني يا سفيان هسع في نظرك كل ما عمله الشيخ البدري عبارة عن وهمة من الخواجة ساكت كده بعد تجهيز عسكري سابق في المهدية عشان يقوم بالدور ده ؟ نفس الشي بنطبق على خالد ابو الروس نفس الشي بنطبق على سورو ونجرتو وتحويلو للغنا في السودان من طمبرة الى غناء في شكلة ده برضو خطة خواجة ؟ معقولة عاد !!!!!!! يعني هسع كل الافندية الاوائل والرواد ديل وهمات ساكت .. معقولة يا سفيان عشان تجردو امدرمان من ريادتها حا تنكروا حتى مجاهدات الرواد وتنسبوها لخطة خواجة !!!!!!! وتقول لي نمشى خطوة لي قدام يعني امدرمان تلصقوا فيها خبل المناطق الاخرى واشراقتها تنسبوها لي غيرها قدام لي وين يا سفيان ؟

Quote: و مرابطين فى كل الجهات.

Quote: خلال ال60 سنة التانية من الإستعمار بقي هو المركز و العاصمة الحضرية و هنا قلته ليك الإستعمار غذى و إستفاد من توظيف الوسط

Quote: صهيب أزيك ياخ !! بدءا أحي صاحب القلم الرشيق الفاضل صهيب وكل الزملاء الذين أضاءوا هذه الدراسة النقدية - أن جاز التعبير - بمداخلاتهم ثانيا : ظللت أتابع عن كثب هذا البوست بأهتمام وشغف كبيرين منذ يومه الاول ... ولا أخفي أعجابي بترتيب وحصافة صاحب البوست بأستدراجه للقارئ بأستخدام لغة جاذبة وملتزمة مع بعض التعبيرات التي لا تخلو من تبدو الاستفزاز احيانا !!!.. واحسب ان له ذلك مادام يخدم قضية رؤيته في النقاش ومادام كان خطابه ملتزم .. وذلك عين ما حدث !!!!!! رغم ما تنتاشه من سهام من حين لاخر ممن يخالفه فيما ذهب اليه من نهايات ,, عني كمتلقي أسجل أعجابي بالدراسه شكلا ومضمونا مع بعض الملاحظات .. ثالثا : من الطبيعي ان تجد اي اطروحه تمس ماهو مسلم به بالضرورة جيوش من المناهضين سيما وان تجتوزت ثوابت تكاد ترتقي لعصبية القبيلة في حدودها الدنيا وعصبية العقيدة في حدودها العليا رابعا : أحسب أن ما حرك وجدان وأستفز بعض من تداخلوا هو أختزال صاحب البوست للكل في الجزء ولاكون أكثر تحديدا فقد عنيت بالكل الثقافة التي يشير يرتكز عليها موضوع البحث وعنيت بالجزء امدرمان المدينة التي اختزلت فيها الازمه وأن حالفني التوفيق فيما يرمي اليه صاحب البوست اقول انه قصد أستهداف ثقافة المركز في مركزها !!!!!!!! بعبارة اخري (مسك الديب من ديله ) ولعل صاحب البوست يعلم منازلة هذه الثقافة تعني الدخول الي عش البور ..... واستهدافها في مركزها (ديل الديب) يعني مواجهة الدبور وجها لوجه !! وأحسبه جاء مستعدا لهذا النزال الملتزم بأدب الحوار ساعود في اول سانحة لتسجيل ملاحظاتي

Quote: ما فعله النظام السياسي حينها هو فعل سوداني وليس امدرماني عام 2008 قيل نفس الكلام مع انو السودان لا يحكم بابناء امدرمان الان !!!! فهل ستسقطه ايضا على امدرمان هذا الامر يحدث على الدوام من السودانيين في هذا المنبر يعاير ملاسي بلونه ويوصف بانه غير سوداني وانه من بقايا الاتراك من اشخاص غير امدرمانيين في هذا المنبر وصف وزير الداخلية بانه اريتري مع انو معلوم ان قبائل سودانية كثيرة مشترك بين السودان والحبشة الكبيرة وارتيريا بالخصوص خاصة البني عامر يوصف كثير من مختلف قبائل السودان بان الشماليين وافدين على السودان مع العرب وما هم بسودانيين يوصف كثير من مختلف قبائل السودان الزغاوة بانهم تشاديين وافدين على السودان يوصف كثير من مختلف قبائل السودان البني عامر بانهم احباش حتى الان في مناطق سنار ومدني وما جاورها يوصف الفلاته بانهم نيجريين مع انو استوطنوا هناك لفترة امتدت لقرابة 700 سنة Quote: طبعا لو نميري وابو القاسم وزين العابدين عبد القادر وابو القاسم هاشم ديل جايين من نيكاراغوا ا ما كنت حاسبت ام درمان .. اذن فل تحاسب السودان الان حدث نفس الشي كما تفضلت 2008 البشير مواليد حوش بانقا وسكن بحري نافع من مواليد شندي على عثمان من مواليد الشمالية الزبير بشير من مدني احمد هارون من الابيض

Quote: مين القال ليك يا وليد انو دا فعل سوداني

Quote: هو يقول امدرمان انتجتها وصدرتها للسودان ونحن نقول امدرمان ضحية اتاها السودان بكل عيوبه وانصهر فيها امدرمان عملت فلترة لكثير من تلكم العيوب وغلبها البعض يعني ما يتحدث عنه الكاتب مشكلة سودانية ما مشكلة امدرمانية ولم تنتجها امدرمان بالعكس امدرمان ساهمت بشكل كبير في تخفيف حدتها

Quote: يا سيدي محمد الفاتح انا ما محتاج اذبح ام دؤرمان لاني ما بعيد منها (انا جدي الفكي الصلحي وابراهيم الصلحي دا ببقى خالي اها رايك شنو لقيتني كيف؟) ولكن نخشى انو ام درمان تذبح نفسها وهي تسير فى هذا الدرب ..ما هو الهامش الشايل السكين ما انحنا ولكن انتو ما شايفين كويس ..ودي مشكلة منوووووووووو انو ماشايفين كويس!!!!؟؟؟. يعني انحنا الشايفين الشجر ماشي ..والزيك بغالط شجر شنو بمشي !!!!.

Quote: بالنسبة لى الايقاع الداخلى لامدرمان .. الايقاع وليس المكنيزمات !.. نستطيع وبي دقة شديدة ملاحظة الايقاع الثقافى لامدرمان كايقاع منفرد عن مؤسسات الدولة السودانية .. وهنا فى خلط كبير جدا .. فالبيان العسكرى من اذاعة امدرمان ليس أغنية حقيبه .. كما الطيب مصطفى ليس عبدالعزيز العميري .. تصرفات الدولة تجاه أمدرمان موضوع كبير جدا .. ولا يجب ان تكون وتحت أى ظروف شاهد ملك على أمدرمان .. على هذه الخلفية البديهية والبسيطة جدا يمكننا مقاربة المدينة فى علاقتها بمفهوم الهامش والمركز وجدلياتو كما شاء سفيان نابري .. وسنجيء لذلك .

Quote: يا سفيان الكلام كده مقلوب الاستعمار كان يدير السودان من المنطقة دي قبل ما تقوم المهدية المهدية نزحت الى الخرطوم لانها كانت مركز ادارة الدولة ثم اختيرت امدرمان كارض خالية لعيسكر فيها الجنود ثم تحولت الى مدينة لامدرمان ميزة جغرافية 1. ارضها المسطحة الثابته التي تصلح لتدريب الجيوش وعسكرتها 2. قربها من مصادر المياه رويدا رويدا تحولت امدرمان من معسكر الى مدينة موضوع الاسلامي ده انا متفق معاك فيه لكن العربي كما قلت ليك سابقا مختلفين يا سفيان بابكر بدري عمل خطوته دي في البداية تجاه محيطو واسرتو فقط بالتاكيد حا يعمل الكلام ده حسب ثقافته الذاتية وموروثات مجتمعه الضيق، وحا يعلم بناته ما يعلمه ويعرفه يعني كان يعمل مدرسة لتدريس بناتو وبنات اقرابائه بلغت النوير وتدريسهم المسيحية !!!! عشان يمرق من المحاكمة دي ؟ الخطوة في حد ذاتها خطوة متقدمة ورائدة ما سبقو عليها زول في بلدنا وبالتاكيد من سيبتدرها سفيعل ذلك بادوات مجاله المعرفي ومحيطه الثقافي كان بالامكان ان يحزو حزوه او يسبقه من يريد ان يفعل فعله باي ثقافة ولغة يشاء لكن احجم الناس واتبعوه ودي ما مشكلته نشكروا ولا نقول الزول مكرس وقاصد ينشر ثافتو ودينو ؟! كل ما فعله رواد امدرمان كان متاح فعله للاخرين باي ثقافة وفهم ارادو لماذا لم يفعلوه ؟ وهل مبادرة اهل امدرمان وريادتهم وتقصير الاخرين يحسب ضدهم ؟

Quote: مين القال ليك يا وليد انو دا فعل سوداني

(عدل بواسطة وليد محمد المبارك on 12-24-2011, 00:16 AM)

Quote: كذلك ابانت احداث المرتزقة فى 1976 ان الحساسية المركزية لم تحسن تصنيف الجماعات التى شاركت فى تلك الاحداث عدا انها جماعات غير سودانية لمجرد انها تتحدث لهجة مختلفة !!. فلقد نقلت الصحف السودانية الكثير من تعليقات الاهالى التى يبدو انها قد راقت لمزاج النظام السياسى انذاك فلقد نقلت صحيفة الصحافة حديثا لاهالى قرية العجيجة وهم يصفون بعض الذين شاركوا فى تلك الغزوة من الذين قبض عليهم بتلك الجهة بانهم لا يحسنون الحديث بالعربية لمجرد انهم يتحدثون لهجة مختلفة وهى الحجة التى دمغ بها هؤلاء كاجانب ،وهو الامر الذى دلل عليه بحديث لصحيفة الايام فى 6/7 /1976 لصبى عندما سؤل عن سبب مجيئه اجاب بان خاله قد اجره وقال اجى اشتخل مآهو فى امدرمان،وفيما سؤل المرتزق محمود فى نفس العدد يقول انه سال قائد مجموعته بقوله مولانا زول دا بقولى نكتلى دكتور ترا ولابس زى دا... ان اعتبار الاعلام لهذه لهذه اللهجة كلغة اجنبية وان من يتحدثونها اجانب وهي اللهجة العربية السودانية الواسعة الانتشار فى مكان ما فى السودان قد حدد رايه الواعى او غيره بشان اللهجة العربية التى ينبغى للسودانى ان يتحدث بها !!.فلقد قر فى روع الكثير من سكان الوسط ان غير المتحدثين بطريقة معينة يمكنهم بشكل قاطع ان يكونوا غير سودانيين، وهو امر سوف ينسحب على الكثير من التقييمات الاخرى وهو الامر الذى سوف يثير الكثير من الحساسيات التى تؤثر قطعا على مسالة الوحدة والهوية.

Quote: يا صهيب ممكن طلب؟ إتخيلني شغال عربجي كارو بين سوق العناقريب وسوق العيش وقمت طلبت متك جنس نضمك ده تقولو بالدارجي البسيط ممكن؟ يلا الحكي لي بي الدارجي وبإختصار أمدرمان مالا؟؟

Quote: يظهر انو معرفتك بالتاريخ محدودة يا صهيب عشان كده بديت محاكمتك من سنة 1885 وجليت القبليها

(عدل بواسطة Ibrahim Mehaisi on 12-24-2011, 03:04 PM)

Quote: دعني اختلف معك مرة اخري فأن كان نعوم شقير مثلا تناول حقبة معينة من تاريخ السودان قل مثلا من عام 1800 حتي 1956 واسهب فيها.

Quote: وانا جيت قلتا ليك انو دا فعل ام درماني بامتياز ..ما هي واضحة انو ناس من ام درمان بتعتقدوا انو اللهجة البتكلموها ما سموا بالمرتزقة ديل لغة ناس ما سودانيين ،رغم انو رغم انىهذه اللهجة بتكلما ثلث سكان السودان !!!!!. يعني يا وليد فييييييي ذمتك دي المسالة دي عادية ؟؟ وبرضو تقول لي فعل سوداني ..سوداني شنو يا وليد حرررررررام عديل كدة !!!!. ياخ ناس العجيجة على صفحات جريدة الصحافة القاعدة لليلة في دار الوثائق (محل لقيتا) قالوا الكلام دا وعلى لسان ناس معروفين منها ..ناس العجيجة ديل من البوسنة والهرسك يا وليد!!!!؟؟؟. طيب دا ما غلط ناس العجيجة ..لا لا ..دا غلط الاعلام الفهمن انو السوداني بتكلم زي ما هم بتكلموا والسودان دا ما فيهو غيرهم!!!. وبعدين كلامك الاخير دا والله ما عندو اي علاقة بدحض حجتي اعلاه

Quote: كلام الاخير زي كلام الطير في الباقير شعر عجبني خالص وحاشيلو في جهازي بس عليك الله وريني حيدعم حجتك كيف اما بخصوص الفزلكة التاريخية للمسالة دي برجع ليك عشان تعريف كيف مع تحياتي

اها بس ده القاصدو انا
كلام انو اختلف معاك تحقر كلامي وتمرقني بره دائرة البوست
زي ناس العجيجة القلت عنهم مرقو من تحدث خلاف حديثهم مرقوه بره دائرة السودانوية

يا حبيب كلامي ما كلام طير في باقر

كلامي بقول ليك انو رفض الاخر فعل سودانوي قديم
لكن نسوي شنو نضارتك بتشوف لون واحد

ودي مشكلتك ما مشكلتي

خالص الود

(عدل بواسطة وليد محمد المبارك on 12-24-2011, 06:05 PM)

Quote: الاخ صهيب بتكلم في الاجتماع والمشكلة انو بستنتج وبخلص فالمفروض شنو في حالة زي دي نسلم وخلاص ولا كيف ؟

(عدل بواسطة Ibrahim Mehaisi on 12-24-2011, 08:07 PM)

Quote: يا و ليد و الله بالطريقة دى البامية ما ياهو ياخ

Quote: نعود لإعادة هيكلة عنوان الملف ، ونرى فيه إلصاق ما اصطلح على تسميته " ثقافة الوسط " على ثقافة أم درمان . وليتأكد الجميع أن لكل بيئة مكانية هنالك خليط سكاني أنتج ثقافة ما .

Quote: وندلف أيضاً للغة هذا الوسط ، أي لغة عامية أو عامية فصيحة تحمل تلك المنعوتة بثقافة الوسط ؟! وذلك ملف يتعين فصله وهو حول اللغة وصراع اللغات ، وبروز بعضها والتلاقُح بين الألسنة وقدرة النمو والتطور لدى اللغة ، وذلك صراع ثقافي يمضي ببطء في بلورة لغة لتسود . أما مسألة اللغة والدراسات حولها فأرى أن يتم فتح ملف خاص عن اللغة ، فهو يتطلب استدعاء التاريخ والمكان والزمان وطبيعة الشرائح السكانية التي تشاركت الحياة قبل البدء . هذا بغض النظر عن الهجرات القديمة والحديثة للسكان والتعامل مع الثقافات في ظل حياة اقتصادية واجتماعية تتطلب مشاركة أصحاب الثقافات المتجاورة ، وغلبة الثقافة الأقوى بعدد من يحملونها وبحمولاتها في تناول حياة المجتمعات المتجاورة . كما أنه من الضروري الحديث عن الطبقات وتشريحها .

Quote: لاخ صهيب تحياتى كتابة جيدة فى موضوع مهم وحساس ارجو ان تسمح لى بالتعبير عن حزنى بعد سماعى خبر وفاة الاخ خليل تقبله الله تقبلا حسنا ربما يختلف الناس فى رؤاهم حول موضوع البوست فكرت كثيرا فى تسجيل عزاء فى قائد منظمة العدل والمساواة ، واخيرا اهتديت الى ان بوستك هذا افضل مكان فاسمح لى بذلك ربما لن يختلف الناس حول ان اختيار هذا المكان يعد اختيارا مناسبا!!!

Quote: ثالثا وكما نعلم جميعا فان الاتهامات والارهاب اللفظي لا يؤدي سوى الى تفاقم الموضوع المعني ، ومثالي هنا هو الطريقة الفجة التي تم بها التعامل مع الكتاب الاسود ..فبدلا من التعامل مع موضوعه من قبل الاجهزة الاعلامية والرسمية تم نعته بالعنصري (برضو اتهام) ومنع نشره او مناقشته بموضوعية في كافة الاجهزة المعنية والنتيجة هي تفاقم الحالة التي ناقشها هذا الكتاب الى ما نحن عليه الان!!.

Quote: ياخي انت بتتكلم عن امدرمان ... يعني ما ممكن تتعرف على هويتها من "علي أوليل" مثلاً ... لأنو رغم انو فنان السودان الأول والوحيد في ربع مساحة السودان ... إلاّ انو امدرمان ما سمعت بيهو ولا بيعبّر عنها ... الكتيابي مستوطن وشاكر مهاجر ... لاكين القاسم المشترك بيناتهم هو البيوريك امدرمان شنو ... وانا اخترت الحدث دا (وهو بقصر الشباب والأطفال حيث كانت قبة الشيخ بر أبو البتول) لأنو ممكن تحضروا ... ولأنو ما بيعبر عن الثقافة المركزية وهنا أمدرمان .. بل يعبّر عن امدرمان بصورة محلّية بتاعة حلة وكدا ...

Quote: وليد كيفك سؤال ثقافة الوسط اتكونت متين وعلاقة ام درمان بيها شنو؟؟ هل ام درمان تعتبر مصدر ثقافة الوسط السائدة الآن فى السودان بعد الفلتره التى ذكرتها فى مجمل حديثك السابق؟ اذا كنت بتعتبر ان ام درمان لاعلاقة لها بثقافة الوسط المعنية فماهو مصدرها الاصلي ومتين بدأت تظهر فى تقديرك يا وليد؟؟ بهمني رأيك بوضوح فى الحتة دي يا وليد تحياتي

(عدل بواسطة وليد محمد المبارك on 12-26-2011, 10:09 AM)
(عدل بواسطة وليد محمد المبارك on 12-26-2011, 10:23 AM)

Quote: سفيان مركز على الديانة

Quote: أتمنى أنها تعفىنى من الشرح لانو و الله و الله و الله بتعب من شرح البدىهىات

المودة التي تعلم

Quote: يا وليد كدي خلينا من الكلام الخارم بارم دا..

Quote: و الغريبة شرحته و وضحته مفهومي لثقافة الوسط و قلته ليك انها بتعني ثقافة الوسط المركزي منذ تاريخ تحالف العبدلاب و الفونج صح ؟ قلته ليك بتعني المركز بكل قوته اللغوية و الدينية و الاقتصادية و العرقية و ... و ... الخ . تاني المافي شنو ؟