|
|
 منك كيفن أتوب ؟؟ هترشات بالعامية
|
منك كيفن اتوب ؟؟
وانت الحلم المن زمان سكيته في دروب الصحو ..
داريت عليهو من العيون ..
رسمته لوحة فيها لونين سمرتك .. وحمار خدودي ...
وسميتها شوقي ...
كونتّك حزمة لهفة مربوطة بحكاوينا ...أسرارنا وغناوينا ...
بقيت سهري ... ومعاك ودرّت طعم النوم ...
لو جاتك خاطرة عنيدة باني بعيدة ...
فكّر تاني..
أحرق وهمك السارح .. وعاين فيك ...
شوف جواك ...
ما حسيتني في بلعة ريقك ؟؟..
في شيلة نفسّك وجوة شهقيك ؟؟..
أنا ساكنة في عصبّك وفي تنهيدتك ..
مرات باتوسد إنسان عينك ...
وكتير باسرح جوة حنينك ...
ما تفتشني كتير ولا تتعب ...
لما تدورني ..
تاوق جواك ..
تلقاني هناك ...
جنب نفاج مسارب الروح ..
شايلة خرايطك ارسم فيها خط سيري ..
أريتني أتوه و ألقى مكان ورا ضلوعك اسكن فيه أتمدد ..
باقول ليك يا مدار كوني ...
لو ريدك بقى ذنبي .. حأعيش بيه ..
وارفض منه استغفر ...
ولو شوقك بقى أثمي ...
حاقول ما عاوزة أتطهر ...
|
|
 
|
|
|
|
|
|
|
 Re: منك كيفن أتوب ؟؟ هترشات بالعامية (Re: abubakr)
|
ابوبكر ...
تحياتي يا صديقي العزيز...
الرسم بالكلمات هواية امارسها سراً عندما يخلو البال من الهموم ...
وتنزاح عن الروح غشاوة الاحزان ...
اشكر لك تشجيعك ودعمك ...
سؤال : وهل استطيع التوبة ؟؟!!
| |
|
|
|
|
|
|
|
|
|
Re: منك كيفن أتوب ؟؟ هترشات بالعامية (Re: ود عقاب)
|
الاخ ود عقاب
ريدتي ليهو...
شوكة مغروسة في حشاي...
أبت الطلوع ..وأدمنت طعم النزيف...
شوقي ليهو...
جيوش فرح مدت خيوطها ودمدمت...
حلمي بيهو..
لهفة وجموح ..وليل يطول..
أملي فيهو..
راحة من بعد التعب ...وكله لي ..
| |
|
|
|
|
|
|
|
|
|
Re: منك كيفن أتوب ؟؟ هترشات بالعامية (Re: sanaa gaffer)
|
Quote: ما حسيتني في بلعة ريقك ؟؟..
في شيلة نفسّك وجوة شهقيك ؟؟..
أنا ساكنة في عصبّك وفي تنهيدتك ..
مرات بتوسد إنسان عينك ...
وكتير بسرح جوة حنينك .. |
اتخيلي من شقت الفجر
زول يتعطن في جمال لامحدود
وحرف مغروف من خلية نحل متغذي من الجمال
تقترب السماء منه رويدا رويدا
يعانق الخيال بعبق وطن الجمال
يازوله يا وطن وفقريه
ومنسوجه من المحبه والنسيم
اتخيلي الدهشه المالكاني
وساكنه في جواي
نور في نور
عاطر امنياتي
وحب كتير
| |
|
|
|
|
|
|
|
|
|
Re: منك كيفن أتوب ؟؟ هترشات بالعامية (Re: احمد العربي)
|
أحمد العربي ..
سلام وتحية ... وينك ؟؟
دي سياحة دبي ولا السياحة جوة الروح الخلتك تختفي ؟؟
ابعدتنا ظروف ومشاغل الحياة برغم القرب المكاني ..
اذن لسودانيز اون لاين شكري لانه تكفل بتقريب المسافات ...
اتابعك عن كثب ...
لك عميق الود ..
سناء
| |
|
|
|
|
|
|
| |
abubakr
الطيب شيقوق
احمد العربي
أبوذر بابكر
فيس بوك
تويتر
انستقرام
يوتيوب
بنتيريست