التحية لرائدات الكتابة بأسمائهن الحقيقية ... منا الفكرة ومنكم الأسماء

Quote: والعادات اللي رسخّت في أذهان المجتمع إنه المرأة أقل شأناً من الرجل وبالتالي كلمتها محسوبة وضحكتها محسوبة وحتى مشيتها في الارض محسوبة

ما عارفه اوصل الفكرة كيف..لكن ممكن اديك مثال. ابوى -عليه رحمة الله- كان زول علم و دين. شروطه كانت واضحة تقرى القراية الى عاوزة تقريها. تشتغلى ذى ما عاوزة. ممكن تتاخرى فى الرجوع للبيت لو كان عندك محاضرات. لكن ما تتاخرى بس للونسة فى الجامعة و كان بيتوقع انى ما ح اكضب عليه من غير ما يسال عن جدول او غيره. اخوى الولد لما يرجع البيت متاخر بدون سبب كان بيتهزا برضو
ما ممكن اكون عايشه فى الخرطوم و ارجع كل يوم نص الليل و اقول انى ما شغالة بالجيران!!! لكن ممكن اعلن ان الطهور و دق الشفاة و الشلوخ عادات ضاراة و مفروض تحارب. و ممكن اشاكل اى زول مانع بناته من دخول الجامعات.
اللى عاوزه اقوله انى فى عادات ضارة -فعلا- لازم نقيف ضددها. و فى عادات و تقاليد بتاعة مجتمعات لو عاوز تعيش فيه بسلام لازم تتبعها. اكيد ح تسالنى...طيب...وين الخط بين الحجات دى ? ح اقول ليك: ما عارفة. و ده هو الفرق بين الناس. ناس تقدمية و ناس محافظة و ناس رجعية (ديل ناس الطهور و فطور العريس. ايوه, فطور العريس عدم موضوع. فى نظرى).
لكن انا مصرة ان الموضوع ده ما ليه دخل بموضوع الكتابة باسم حقيقى. على الاقل لى انا. و مصرة برضو انى حتى لو كنت dude ما اظن كنت اكتب اسمى. برضو لانه اصحابى و صحباتى ما ح يتغيروا . هم نفس الناس اللى بلسانات طويلة. و ح يبرمجوا بى ذى ما الان بيبرمجوا باى واحد/ واحدة يكتب كلام (نص نص) فى الفيسبوك.
و اظن لو كان عندى زوجة فى حالها و ما بتعرف اصلا الفرق بين منبر بكرى و الراكوبة كنت ح اكون ما عاوزه الناس فى الحتات دى تجيب سيرتها بخير او بشر.
فى الدنيا انا ما بخاف اقول رايي فى اى مجتمع. مرات بسكت عشان عيب (لو كنت رجل او امراة) تقول للناس كلامكم ده كلام فارغ (لو الكلام فعلا فارغ). او بحاول اتكلم بصورة لطيفة.

(عدل بواسطة smart_ana2001 on 02-27-2013, 08:35 AM)