|
|
 Re: " اللمسات الاخيره " .. حفل علاج " غــــــاده نوري " (Re: خالد ماسا)
|
بهدي رائعة شاعرنا الكبير (حميد) ..
الى كل .. طوق عنقه بمشروع علاج غادة نوري ..
الى كل .. حرف كتبه .. جهد بذله .. دعاء تضرعه .. درب سلكه ..
شوك الشوق
شوك الشوق لى الشوف آ خَىْ
ضارب قطن النسج الحى
يا منقاش أحزانى إنشرت
وادى الفرح إتمدد صَى
يا راحلين عِـنْ دُغُش الليل
ما لاقيتو جناياً زى ..
تكية نخل الفجُر الجاسِر
فوق فى المتَرَة .. عَرَاجِنْ ضَى
آ رعاوة .. العرب الرُّحّل
ما لاقاكُنْ فى المطرانى ؟
فى كاويقْ الجرف الأمحل
بين أسراب الرهو الراحِل
ساند أكتاف الليل الميّل
عِنْ ساساق الغيمة عليكُن
بين رقراق الخيمة معاكُن
ما أديتوهو شِوَىْ ... بى حرجل؟
*************
آ رطّانة الليلُن ليّل
ما لاقاكُن فى ونساتكُن؟
بين الشادِى وبين كاساتكُن
فى صلواتكن .. عِنْ دعواتكن
أو .. دقساتكُن عِز خلواتكُن
.. زول .. زول الله
إن مِحِن .. آ .. بِسأل
الهبّاد لى غُلبْ أخواتو
الفرّاح عوّان الحلّىِ
الفدّاع لى الليل ظُلماتو
آ نجمات .. شقيش قولن لى
ما لاقاك طالِع .. متدلّى ؟
المطيوب من طيبة أُمّاتو
كالفجّاج .. الندّ نباتو
موج البحر اللّحَمَر هوجتو
وعِرق العِرِق .. اللاّوى ثباتو
جانا الشَدر الأخَدَر منو
ونار الشدر الأخَدَر جاتو
فات شِقيش ...
أب قولاً واحِد ..
وليش ما يرجع من غُرباتو
طوّل طُول .. ما طلّ علينا
وقاطِع مِننا جواباتو
الغابات جات تنشِد منو
والعربان راجين جياتو
أديناهم عرقو .. وعَلَقو
صورتو يقلِّب فى كِتْباتو
ضُل رشاشو .. ركيزة زولو
ساعة سِلمو .. ويوم حوباتو
سِن طوريتو ولون أبرولو
حِس طنبورو البى نغماتو
لهْلَب عِشق الناس الفقرا
وبرّد جوفُن .. بى غنواتو
... ويا غنواتو
الدخلت فينا
تمرق .. جينا على جِلاّتو
وجِيداً جينا .. طلقنا وشينا
وش الدنيا الليلة حلاتو
وش أطفالنا الليلة حلاتو
وغنى معانا غنانا هويتو
غنِّى العالم
غنى حياتو
لا ساومنا عليها قضيتو
ولا فكينا من إيدنا .. وَصَاتُو
ألف شليل يا نورة يفوتو
عشان ما يجيك شليلك زاتو
لا تنسوا غادة نوري من صالح دعواتكم !!
| |
 
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: عبد المنعم سليمان)
|
| Quote: ذكرتني موقف مركز الخصوبة الرائع من هذا العمل الانساني النبيل |
وانت ذكرتني موقف خالد ماسا ... ( وش ابو اسنان كبيرة)!!
منعم
دايرة اسال .. سعال .. يوم الاجتماع كنت مالك ؟؟
اسماعيل حميم . ياتو الجا الاجتماع دا ؟؟
حمزاوي .. برضو انا ما شفتو !!
ركز .. عشان الشامبو ينفعك !!
نادية ..
يا كنا نبيعك يا نسرق
واخترنا النار الضلها بحرق ...
تسلمي ع المجهود !!
خالد ماسا يا( وليف) .. بركة الشفناك بجاي !!
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
Quote: اسماعيل حميم . ياتو الجا الاجتماع دا ؟؟
حمزاوي .. برضو انا ما شفتو !!
ركز .. عشان الشامبو ينفعك !! |
انا ما شفتهم قايل انتو شفتوهم
ما شفتيهم ؟
انا اصلا شفت الجو حميم وقايل حميم في .. طلع مافي
وانتو تخلو الواحد يعرف يركز
ان كيدهن لعظيم
كسره : الشامبو خليتو كان هيد اند شولدر
بقيت استعمل شولدر ساااكت
وين الهيد حليل الهيد ونعيد الكااان
معا من اجل غادة
منعم
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: عبد المنعم سليمان)
|
| Quote: انا اصلا شفت الجو حميم وقايل حميم في .. طلع مافي |
فعلا كان حميم ... ( ياربي ) والبين قوسين دي ذاتها .. مستعارة من اسماعيل حميم !!
رغم انو في ناس زااغو عشان خافوا ما يتغدوا .. لكن انعام حيمورة ما قصرت بالبيتزا وكية .. لـــ ناس شارع القصر ..!!
منعم .. كدي النسألك تاني .. بما انو الهيد بقى مافي .. بس انشاء الله ما يكون مشى وشال الشعر ظاتو ؟؟
ها دا السؤال :
الاجتماع الجاي متين ؟؟!!
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
الخطوة الاولى :
جانا دكتور في الشركة .. قلت ليه عندي تذاكر اكرامية شال (4) وسالني حكيت ليه كم تكلفة العلاج (90) الف دولار .. رجع التذاكر الاكرامية وقال لي حا أعمل ليك حاجة أحسن من كدة ... اديني فرصة لحدي بعد بكرة .. أعمل اتصالتي وأرد عليك ...
الخطوة الثانية :
رد علي الآن : فرد في مجلس الامة الكويتي وافق على ارسال ورق غادة نوري له ...
الخطوة الثالثة :
الدكتور (سيف) جاي يشيل مني الورق الآن حتى يتم أرساله للكويت ...
الخطوة الرابعة:
قولوا معاي ياااااااااااااااااااااااااااااااااارب
حتى يجي الرد الكبير انشاء الله
معا من أجل غادة نوري
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
| Quote: رد علي الآن : فرد في مجلس الامة الكويتي وافق على ارسال ورق غادة نوري له |
| Quote: الدكتور (سيف) جاي يشيل مني الورق الآن حتى يتم أرساله للكويت |
انعام
والله قدرها
قلت لي مجلس الامة ظاتووووو
اشكر الاخوة بمجلس الامة الكويتي ويا انعام ان في الصمت كلاما
والله اقول ليكم حاجة الحفلة بتاعة نادي الضباط دب الا نقلبها اعراس
غايتو بالشايفو ده وما شاء الله غادة حتكون سافرت زماااان والعملية نجحت يا رب ..اميين
غايتو انا كلموني بدري عشان عاوز العروس تتعلم الرقيص
اصلها شترة
يا جماعة بيت قسمة البتعلم العروس وووين ؟
ويا غادة منتظرك الليله
معا من اجل غادة
منعم
نسيت
اشكر مركز الخصوبة
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
| Quote: منعم يا (ماستر بيس )اجهل الكتابة بالراندوك او بالاندونسية انىهاو اى لف يوووو سوووووو متش |
نادية
بعد ده غيرنا وبقينا لبناني
حبيبت البي كتيير مشتااا ليك
شو تجنووو وبتاخدو العايل(العقل)
اقولك ايشي
شو بحبكم كلكم وخاصة هايدي الاموري غادة
يسلمولي هاالايديات
يسلموا
انا كتيير بحب يلي ميركز الخصوبي
كتييير بحبو
وبحب غادي كمان
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
Quote: نادية
بعد ده غيرنا وبقينا لبناني
حبيبت البي كتيير مشتااا ليك
شو تجنووو وبتاخدو العايل(العقل)
اقولك ايشي
شو بحبكم كلكم وخاصة هايدي الاموري غادة
يسلمولي هاالايديات
يسلموا
انا كتيير بحب يلي ميركز الخصوبي
كتييير بحبو
وبحب غادي كمان |
منعم .. بالنضم حقك دا ما قادرة افارق البورد ..
بدور امرق آجنا .. شان اصلكم بدري !!
منعم ..
دايرة اقول ليك حاجة بدون ما اي زول يسمع :
انا بريدك من جوة قلبي .. عشان روحك الجميلة دي !!
وربنا ما يحرمنا منك .. الكلام دا جادي .. سمح ؟؟!!
بس اوعى تقول عشان قت داير تعرس .. البت كسرت لي تلج !!
( وش خجلان )
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
| Quote: انا بريدك من جوة قلبي .. عشان روحك الجميلة دي !! |
انعام ونادية
الموضوع انتهي فتشوا بيت قسمة وييين
( وش شايل شيلة عديييييييل كده)
اي لف يو اوووووووول
سعيدا بالعمل مع هذه المجموعة الرائعة
ربنا يديني الجنا انشاء الله
برضة بشكر مركز الخصوبة
انا مااااشي هووووي وراي شغل
معا من اجل غادة
منعم
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: كمال علي الزين)
|
العزيز كمال ,
انتهزها سانحة لتقديم لك التحايا و التهانى بالعيد
و قبل هذا كله آيات الامتنان و التقدير نرسلها لاسهامك الرائع فى تصميم و طباعة التذاكر الاكرامية و كما نخطط فان لها النصيب الاعظم من مدخول الحفل .
و كلى ثقى ان و فى كل مسعى كنا نتنسم ما صغته من تعبير حميم و صادق :
Quote: من أجل أن يعود الوطن كما كان
بيتاً واحداً
وحوشاً كبيراً
|
الود لك ,
نادية السر
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
يا سودانيين
انتوا تعملوا الخير و تفضحوا متلقيه
يعني في داعي تعلنوا للعالم كلو عبر
المنبر دا عن سخيكم و منكم علي المنكوبة المسكينه
ما كان تعملوا في خفاء و بصدق في العمل مش تجريح
وتقريح علي اسرة المنكوبة
طبعا كلامي دا حايكون عزف في بحر جميقه المتجمد
المقاصد تفهم بالمسلك
واتمني للمنكوبة الشفاء و الإستشفاء من هوان الضعف
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
كرفس
عمل الخير ليس مدعي للشفافية والتخبط دون مراعاة لشعور المحتاج
وحسرة ذويه لضيق ذات اليد.
يكون العمل نقي خال من الرياء اذا بعد عن الجهر و التكلف وفتح
بيت الاسرة وكرامتها علي مصرعيه امام اعين خلق الله. واكيد بيتم دا
عملتوا مسرح لقلءات و وكالة أنباء سارة لكل ساذج لعمل الخير.
يا كرفس ياخي افهم شعور ولي هذه الاسرة وانت تلقي عليه بكاهل ذي
دا " كاهل فاعل خير" وليس له سوي القبول لنفس سبب ضيق ذات اليد!!
يا كرفس اجتماعاتكم دي سوي كانت في نادي الضباط او حوش النادي الالماني
شارع واحد اوعلي ضفة حوض سباحة النادي الامريكي يمكن ان تتم دون حوجة
لإطلاع جمهور السودان في الداخل و الخارج ودون ان تصبح ونسة بورد و مشارييع
زواج لعبدالمنعم و مغازلات نسائية لمجتمعين من جنس الرجال. ودا كلو يحدث تحت غطاء " فاعل خير". !! مشروعكم دا اصبح ذي " باقة العوض".
يا كرفس وانت واضع الكرفس الموضوع دا بتحكوا فيهوا ليكم شهور ولجنتكم دي
معروفه بقت للبنتاغون و الاف بي آي نفسه. لم يدخل في بالكم الظلال السلبية لهذا العمل علي هذه اللاسرة من الناحية السيسيولوجيا!! ما فيكم زول ود قبائل يضع نفسه موضع المحتاج و يستشفي بعض من التأملات ليصحح و يتحقق من احكام المشروع دا.
يا كرفس استر عورات البيوت حتي لو كانت غاده ذاتا فردتك و كفاية سذاجة
وعقلوا الموضوع ولا تخلطوا امركم بامر هذه الفتاة و اسرتها و تجعلوا الموضوع
متكأ و اريحية مطلقة و معا من اجل غادة.
دا يا كرفس نقد اتمني ان تقبلوه و تهتموا به وليس موضوع نقه وردود وهيصة
| |
|
|
|
|
|
|
|
|
|
Re: حمل الخير هو أصلاً مدعي للشفافية غض النظر عن المقصود منه (Re: معاوية كرفس)
|
eyes of liberty
اولا يا اخى لك تحياتى واحترامى وانت تراعى وتفكر فى مشاعر غاده الانسانه واسرتها الكريمة..
كل عام وانت بخير وغادة بالف خير وكل مريض يكتسى من العافية اثوابا...
المبلغ المطلوب اخى الفاضل يفوق مقدرة الاسر العادية متوسطة الدخل فى السودان .. بمعنى اذا كان المبلغ المطلوب فى حدود الاستطاعة لاى اسرة سودانية عادية ولكن عجزت اسرة غادة عن توفيره.. هنا يحق القول بان المساله ضيق ذات يد ولا يجب الاعلان عنها ... اما حينما يكون المبلغ بهذا الحجم ويعجز عن تغطيته السواد الاعظم من السودانيين متوسطى الدخل فلا حرج ولا غضاضة من وجهة نظرى ان يعلن عن الامر ويتكاتف الجميع من اجل توفيره ...
Quote: انا معاك إنو في أفراد في المنبر دا ما خدين الموضوع بي طبيعتهم
لكنهم ما خرجوا من الهدف العام ( علاج غادة نوري ) |
هذا الامر كما ذكر معاوية لا يزيد عن هذا الحد ...
غادة يا اخى اصبحت الان صديقه للكل ... هى ليست مجرد حاله مطروحة فى المنبر نحاول مساعدتها .. اقسم لك ان فى هذا المنبر من اصبحو الان يتواصلون مع غادة واسرتها بشكل يومى من داخل السودان وخارجه... اسرة غادة متفهمه لهذا الامر لسبب واحد فقط .. لاننا السودانيين شهمين بطبيعتنا ولا نعرف المن والاذى وان اعلنا وضربنا الطبول والابواق ليعلم الكل ان هناك من يحتاج المساعده فهذا فى قاموسنا وبالفطره لدينا لا يندرج تحت بند المن والاذى واسرة غادة تعلم هذا الامر...
لك مجددا التحيه على مشاعرك النبيله ولك تقديرى واحترامى ...
وكل عام وانت بخير ....
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
صباحك جميل يا معاوية ..
فقدناك امبارح في تكريم الاستاذة عواطف .. !!
الاخبار يا سيدي .. اتصلنا بالاخ محمد الامين .. بخصوص طباعة البوسترات وتذاكر الحفل .. حصل تنسيق بينه وبين الاخ خالد ماسا لعمل اللازم .. ساوافيك بالجديد اول باول ..
بالمناسبة .. غادة نوري جات امبارح التكريم بس جات متاخرة معظم الناس كانوا مشوا ... كانت مبسوطة جدا ومتألقة بابتسامتها المعهودة !!
وبرضو العروس رشا سالم كانت معانا .. وبتسلم عليكم كلكم !!
خليك قريب !!
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
Quote: يا سودانيين
انتوا تعملوا الخير و تفضحوا متلقيه
يعني في داعي تعلنوا للعالم كلو عبر
المنبر دا عن سخيكم و منكم علي المنكوبة المسكينه
ما كان تعملوا في خفاء و بصدق في العمل مش تجريح
وتقريح علي اسرة المنكوبة
طبعا كلامي دا حايكون عزف في بحر جميقه المتجمد
المقاصد تفهم بالمسلك
واتمني للمنكوبة الشفاء و الإستشفاء من هوان الضعف |
يا eyes of liberty
عوير امه انت
اهبل ولا شنو يا زول الناس فى شنو وانت فى شنو
اذا كنت من الرجال الذين يحبون المواجهة فتفضل وتجدنى اول من يقول لك تق على وجهك الحقير ايها الديوث واذا كنت من يحتشمون خلف الخمرات فاذهب فهذا البوست من اجل الامل ...
نحن نفعل المستحيل وانت تمارس سياسة اللعب بالاحرف ...
فلا تكن من الذين يتوارون خلف الأحراش لتنقض على فريستها وتهرب بين الأجحار.
وبالمناسبة لم يستنفد غرضك فمازلنا فى السكة نمد
اعزائى اصدقاء القلم والكلمة فى حملة غادة نورى دعونى اتخلص من بعض اليرقات والديدان وهذا اولهم ...
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: عاصم ابوبكر حامد)
|
يا عاصم
المذكور اعلاه اذا كان محتاج لى توضيح ادينا وضحنا ليهو بمنتهى الذوق والاحترام اما اذا كان المساله تعطيل عمل ومهاترات وتشتيت جهود فحقو والله الناس تعمل زى ما عمل معاوية
نرجع لى موضوعنا ...
وفوق خالص من اجل غاده ومن اجل حماية الامل العام ...
قلوبنا معاكم يا بورداب الخرطوم .. منكم يبدا الامل وبيكم باذن الله تنتهى كل المحن..
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
الاجتماع الجاي بخصوص ترتيبات الحفل الخيري
يوم الاثنين الجاي الموافق 15 يناير 2007
الساعة 5:30م .. عند ناس علي عجب !!
خالد ماسا
عبد المنعم سليمان
انعام حيمورة
انعام عبد الحفيظ
خالد بحر
نادية السر
اشراقة حيمورة
دينق
ناجي الملك
ملكة سبأ
اسماعيل حميم
سمؤل
عاصم ابوبكر
علي عجب
طلال عفيفي
سمرية
خضر خليل
معاوية كرفس
معا من اجل علاج غاده نوري سرا وجهرا ..
معا من اجل فتاة تطرق فينا باب الامل ..
معا من اجلنا نحن حتي ننام مطمئنين بان الخير باق فينا ..
معا للتمسك بقيم المجتمع السوداني ما حيينا ..
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
شكرا للكاتب الصحفي قرشي عوض والذي فهم جيدا طريقة عملنا وانسجامنا الرائع
هذا وهذة دعوة مني لقراءة ثانية لمقالة المنشور بصحيفة الصحافة يوم 24 ديسمبر:
ركن المجتمع نحن والردى إلى جسارة غادة نوري قرشي عوض ü كانت البداية حينما حل المرض ضيفاً ثقيلاً على ال نوري• وكعادة الضيوف (الثقلاء) الذين عرفتهم البيوت السودانية في السنين المنصرمة، اقتحم هذا (المسنوح) المنزل وقبض على جواهره المختبئة، احلى زهرات جناين نوري، كانت رسالة الردى واضحة وهى سحب رحيق الحياة والحكم على الخدود النائرات بالذبول• عزيزي القاريء قبل ان تطلق لدموعك العنان، عليك ان تعلم حقيقتين، الاولى ان لا احد يحتاج الى دموعك فغادة ليست في وضع يرثى له كما ستعلم من خلال هذه السطور (بس شيل الصبر) والحقيقة الثانية ان هذه فقط هي البداية، لكن كيف سارت تلك الملحمة الانسانية الفريدة في منازلة الرداء، فهذا متن الحكاية وما عداه مجرد هوامش بما في ذلك الحزن، والاخير هذا بالذات (حكايته حكاية) مع فريق الحياة المكون من بنات حيمورة وعبد المنعم سلمان وسجيمان وحيدر قاسم, ناذر الخليفه،والدينموالمحرك ناديه السر وحتى لا اظلم احدا اقول ان القائمة طويلة، وسوف اختار من البقية خالد ماسة لا لمصلحة معالجة الموضوع من الناحية الفنية كما سنرى• هؤلاء الفتية والفتيات (عقدوا) الحزن بروح الشباب المقبلين على الحياة، ولذلك يبحثون عن الابتسامة اكثر من الدموع• وكانت المشكلة هى المنضمين الجدد للمجموعة والذين بتخيرهم الحزن لا لشيء سوى انهم لم يتشبعوا بروح المجموعة، فتكتشف إنعام حيمورة انه لا بد من فعل شيء فتعبث بخصلة شعرها فتسري روح التحدي، لتنتظم الدائرة مثل تيار كهربائي اثر تعليق من عبد المنعم سلمان او تعليق احدى بنات حيمورة على طريقة سجيمان في اخراج (السفة) فينفجر الجميع بالضحك كأنهم يقومون بالتحضير لانجاح رحلة او حفلة نجاح لا علاج صديقة عزيزة على الجميع، فيعرف القادم الجديد انه المقصود (فينهر باله) بضحكة سودانية سمراء، حينها يقبل الجميع على مناقشة الامر من جديد، فيعرض القادم الجديد امكانياته في فعل شيء، ليكتشف انه قد تحول من حزين الى فاعلي شيء لمواجهة الردى• لكن دعونا نعود لبداية المواجهة التي بدأت برفض غادة نوري لاستلام الرسالة• وأعلنت التعبئة العامة داخل جسدها النحيل• يقول خالد ماسة انه حينما زارهم بالمنزل وكان مهموماً وحزيناً فوجدها في ختمة قرآن مع بعض صديقاتها، كانت مثل فراشة تطير بالبهجة والمرح والاقبال على الحياة بين الجميع• وكانت المفردات لا تسعف خالد لتوصيف ذلك المشهد البطولي الجسور، فأخذ يصف لنا المعاني بيديه وعينيه وهو يغالب الدموع، لكنها هذه المرة ليست دموع الحزن بقدر ما هى تعبير عن خليط من المشاعر الانسانية من ذلك النوع الذي يدفع الانسان إلى الاحساس بأنه يريد ان يفعل أشياءً كثيرة، لكن خالد ماسة لأنه يحسها ولا يدركها، فإنه يغمض عينيه كأنه يغالب الماً ويردد (يا أخي دي إنسانة عجيبة، تصور كانت تعاملنا كأننا نحن المرضانين وهى السليمة)• رحت انا الذي لم اتشرف برؤيتها من قبل أرسم لها صوراً شتى، لكنني حين رأيتها تبخرت كل تلك الصور، فانتصبت في مخيلتي هيئتها القادمة من مدارات تراها هى وتأخذنا اليها دون أن ندري• كان الوقت قبيل المغيب حينما انتظم عقد المجموعة تحت الشجرة امام جريدة >الصحافة< بالخرطوم شرق، اول الحضور كان عبد المنعم ثم جاء د• أنس وشبشة وعلاء الدين وصباح احمد وخضر حسين، وأخيراً جاء خالد ماسة، فسأل الحضور الم تحضر بعد؟ لم يستفسر أحد عن من تكون ليرن جرس الهاتف في جوال خضر حسين، وبعد ان يغلقه يتوجه للجميع بالخبر اليقين (يا شباب الزولة دي انهت مقابلة الطبيب وهى الآن بشارع السيد عبد الرحمن ومتوجهة الى هنا،) اتصل بها عبد المنعم ليصف لها المكان بالضبط• بعد اقل من ثلث ساعة جاءت فتاة سمراء تمشي في خفة النمر ورشاقته، ولها مع كل من الحضور قصص وحكايات، كانت أكثرهم ضحكاً واستجلاباً للدعابة وروح المرح، لكن هذه الفتاة التي تقف امامي وشاركتنا العشاء بالفول المصلح بالطعمية والجبنة (وطبعاً الزيت بره) مصرور في الكيس ومنطبح فوق صحن الألمنيوم• هذه الفتاة تقول سيرتها الذاتية التي امدنا بها خالد ماسة أنها خريجة جامعة السودان للعلوم والتكنولوجيا، وتبلغ من العمر 23 سنة وتسكن في الكلاكلة القبة• وتعرضت لحادث حركة مما ادى لاصابتها اصابات بليغة بكسور وانسداد في الاوردة المغذية للكبد، الشيء الذي ادى لتليف كامل للكبد، وقد اجريت لها مقابلة بالمملكة الاردنية، واوصى الاطباء باجراء زراعة كبد عاجلة تبلغ تكاليفها الكلية 09 الف دولار، اضافة للعلاج والادوية• حينما قرأت هذه السيرة رجعت بذاكرتي الى عصر ذلك اليوم حين التقيت بها، حيث كانت في شغل شاغل عن حالتها، فبعد ان (ضربت الفول) قامت باجراء فحوصات دم لبعض الاصدقاء عبر جهاز مخصوص تحمله في حقيبة يدها، ثم انها كانت حريصة ان تجمع ادوات الفحص داخل اكياس صغيرة حتى تتمكن من معالجتها بطريقة معينة حينما تعود للمنزل• فقلت بيني وبين نفسي (دي جاية من وين)، ثم التفت الى حزني لاجده قد عبر الشارع وهو يولي الإدبار• إذن غادة نوري ليست مريضة حتى نجمع لها التبرعات، ولكنها مدرسة سودانوية نتعلم فيها مواجهة الصعاب دون ان نفقد رباطة جأشنا، حتى يقضي الله امراً كان مفعولا• وحينما ننتظم في حملة وردية لصالح علاجها، فإننا لا نطلب التصدق علينا من احد، ولكننا فقط نضع الجميع امام مسؤولياتهم في حماية الامل العام، وقدرة غمار الناس على منازلة الصعاب والتحديات، لأن هذه الروح التي تتصدى بها غادة نوري للمرض، هى نفس الروح التي نحتاجها لنحيل هذه الخرائب الى اماكن تليق بحياة البشر، وان هزمناها فانما نهزم أنفسنا• وانا عبر هذه المساحة اتوجه لكل السودانيين في بلاد الله الواسعة، بأن اعادة غادة نوري مهرة في صفوف الخيل المسروجة هو خير إعداد للعدة والعتاد لامة تحتاج الى ان تنازل مصائب عديدة، حتى يقال عنها انها تستحق الحياة• واخص بالمناشدة او دعني اقول التنبيه، منظمات المجتمع المدني ان تنظر الى اهمية الصرف خارج البنود المحددة، فالمانح الذي لا ينظر الى ارواحنا اظنه لا يعنينا، فنحن بالروح لا بالجسد بشر• واخص اكثر بهذه الدعوة مركز الجندر للبحوث والتدريب، ان يكون له القدح المعلى في هذه الحملة، لأن امثال غادة نوري لم يخلقهم الله عبثاً، ولذلك لن نسمح مهما تكن (لأمة) المرض، ان تكون خسارة للمرأة والوطن، كما أتوجه بالدعوة لمنظمة >زينب< لتنمية وتطوير المرأة، لكي تعلم أن نصيب رسالتها من النجاح سوف يكون أكبر إذا كانت بين من يتصدين للمهمة أمثال غادة نوري• وإلى الجميع أن يساعدونا لاحياء الامل لكي نحيا جميعاً•
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
Quote: باب الامل
ترى كيف ارسم بالكلمات هنا .. احساسي الذي لازمني منذ مساء البارحة بعد ان قمت مع الاخت نادية السر بزيارة غاليتنا الاخت / غادة محمد عثمان نوري - والتي تقطن الكلاكلة القبة .
وصلنا منزلها وطرقناالباب .
انتظرنا بضع لحظات وسرعان ما ظهرت فتاة شابة تبتسم بحفاوة بالغة قالت وهي تفتح لنا الباب : انا غادة
وتستقبلنا بأشواقها كأنها تعرفنا من قبل.
دخلنا منزلها العامر واستضافتنا بغرفتها والتي عايشت معها المرض لحظة بلحظة .. غرفتها والتي قالت لي غادة عنها بأنها حفظت الخطوط على سقفها عن ظهر قلب بعد ان لازمت الفراش لمدة ثلاثة سنوات بعد الحادث التي تعرضت له.
لا ادرى كيف اصف لكم لحظاتنا الاولى ونحن معها .. خاصة وان عمر معرفتنا بها لم يطل ولكنها فتاة رائعة حقا .. لم تسمح لاي احساس دخيل ان يفصل بيننا وبينها .
ابتدرت الونسة بدون تكلف وكانت بسيطة في كل شيء.
ثم غادرتنا لبضع وقت لتعود بكأسين من العصير اللذيذ ، حكت لنا عن انشغالها في الايام الفائتة عن مشروعها المنزلي الصغير الذي كانت تقوم به بعد ان تركت العمل بسبب المرض.
ثم عرفتنا بوالدتها اللطيفة قائلة : ديل يا امي المتضامين معاي والتي اضاف وجودها معنا جو اسري رقيق.
اثناء وجودنا اتصل الاخ النذير حجازي من امريكا بخصوص تحويل مبلغ لحساب غادة .. وحين عرف اننا معها طلب ان يسلم عليها ويطمئن على صحتها.
شرحت لغادة اسباب زيارتها لنا الى جانب الاطمئنان الى صحتها اننا اردنا ان نعرف وضعها الصحي بالكامل والعلاجات التي تحتاجها لحين التوفيق باجراء العملية باذن الله تعالى. وماهي الادوية التي تحتاجها بصفة مستمرة وكيف تتحصل عليها ؟ وما هي الصعوبات التي تواجهها للحصول على الادوية ؟ وايها متوفر او غير متوفر ؟
عندها فتحت غادة باب دولابها لتخرج لنا منه مجموعة من الاكياس المليئة بالادوية الفارغة والممتلئة .
سالت غادة عن العملية المرتقبة وكيف يؤثر التاخير على صحتها ؟
قالت ان الاطباء في الاردن كانوا قد حددوا لها اجراء العملية خلال ثلاثة اشهر كحد اقصى وكان ذلك قبل عام واكثر ولكن نسبة لتكاليف العملية الباهظة هاهي تنتظر ان تعبر باب الامل الى باب السلامة والصحة التامة.
وقالت بعد ان اصبحت الكبد لا تقوم بوظائفها اصبحت تعاني من امراض عديدة منها هشاشة العظام وامراض الدم والكلى .
هذا الى جانب التاثيرات الجانبية للعقاقير التي تاخذها والتداخلات الدوائية العديدة.
اخذت منها روشتات من عينات من الادوية التي يصعب عليها الحصول عليها حتى نحاول ان نوفر لها بعض الادوية ممن يستطيعوا ارسالها لها من خارج السودان .
سألت غادة ونحن على وشك مغادرة منزلها : عندك اي رسالة تحبي توصليها للمتضامين معاك من البورداب .
قالت لي : ما عارفة اقول شنو ؟ لكن انا عندي قصة عاوزة احكيها ليكم .. قالت لي انا حاحكي وانت صيغيها .. رغم اني يا هبة بعرف اكتب كويس بس ما بقدر امشي النت واقعد مدة طويلة والنت في الكلاكلة عندنا سيء شديد الا امشى الخرطوم .
بدت تحكي قصتها وقالت :
وانا صغيرة كان اليوم يصادف عيد ميلادي وكان اهلي محتفلين بهذه المناسبة فقد كنت البكر ، من تورتات وجاتوهات وعصائر والاطفال من اقاربنا ينتظرون اطفاء الشمعة لينهالوا على الكيك والحلويات .. نادوني لاطفاء الشمعة .. وسألوا اها يا غادة تتمنى شنو قبل ما نطفى الشمعة ؟ يلا قولي يا غادة .. تتمنى شنو ؟؟
قلت لهم : انا عاوزة كل الناس تحبني !!
ضحكوا مني وسخروا .. ولكني اصريت انني لن اطفيء الشمعة حتى يحبوني كلهم .. قالوا لي بسخرية بالغة اطفيها .. يا غادة .. الناس دي كلها حتحبك .. يلا يلا .. اطفيها ..!!
اطفأت الشمعة وضحكاتهم الساخرة مازالت ترن في اذني .. !!
ويا هبة .. انا دايما ما كنت اشعر انني احتاج ان يحبني كل الناس منذ ان كنت في المدرسة كنت كلما شعرت انني محبوبة .. كلما شعرت انني احتاج لحبهم اكثر !!
انتهت قصة غادة !!
وانتهت زيارتنا لها ... وعند الباب .. اصرت غادة ان ترافقنا للشارع حتى نجد المواصلات .. خوفنا على صحتها ولكن امام فرحتها بنا ومعنوياتها العالية لم نستطيع ان نقنعها وخرجت معنا .
اقتربت من والدتها واصبحت تحدثني بخوف الام عن مصير غادة والايام التي مرت عليهم وكيف كانت هي عندما يشتد المرض بغادة تختبيء بالحمام وتبكي بحرقة !
وقالت لي ان غادة تردد دوما لوالدها .. يا ابوي الشجر بموت واقف .. عشان كدا انا ذاتي حأموت واقفة !!
وقالت الام ان غادة صبورة جدا وتحتمل المرض بدرجة كبيرة .. وطلبت مني ان ندعو لها كما تفعل هي ووالدها الذي تعرفنا عليهو ايضا اثناء وجودنا هناك والذي اصبح يخصص بعد صلاة الصبح وقت طويل للتوسل لله سبحانه وتعالى اللطف بابنته .
ثم ... جاءت حافلة المواصلات وودعنا غادة .. بعد ان وعدناها بالعودة مرة اخرى .. واننا سنبذل قصارى جهدنا للوقوف معها ..
وغادرت بنا الحافلة .. وشعرنا بالمسؤولية والحزن والامل والخوف !! |
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
هية .. نادية .. سمرية
والاصفياء
اشوفكم غدا في ام درمان مع الراجل العجوز الظريف كرضمه الظرافتو تجيب الحمى
ابـــــــــــــــــو سانــــــــــــــــــــــــــــدرا
ونلتقي بحبكم وحب غادة وحب هذا الكهل الجميل
هاتفني دينق وقال ضروري الجيه
الراجل ده دايرني اعوقو ولا شنو !!
الاخبار الجميله عن غاده بقولها هنااااك
اراكم
هبه ما تتاخري كويس
كويس
منعم
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
خالد ماسا ..
حاسال عن بلد غاطس
لحد الليلة في الوجعة
انط فوق سرجي واتحزم
اقوم من وقعة لوقعه
اخت يدي البتوجعني
علي السام البراجعني
واسال
ياوطن يابيتنا
ليه شوقك مواجهني
ليه حبك مجهجهني
وليه تاريخ زمن خسران
موكر لسه في شجني؟
Quote: سلام شباب
سلام لغادة
مرت اسرتى بظرف مشابه،المرض اللعين لم بشقيقي الوحيد، باصرت الاسرة ما تستطيع للعلاج... فى مرحلة ما نضبت كل المصادر، بدا نفير مثل هذا، اصدقاء..اهل ..اقارب..زملاء...جيران،سودانيين و اجانب،بيض و حمر و سود.. كل بقدر ما استطاع و كل بالطريقة التى يعرفها..
لم يسال احد لماذا يرتدى عبيد قميصه في رجليه..
لم يهتم احد ان كانت زيدة تغازل x ام لا..
لم يبحث احد في التاريخ الاخلاقي للمتطوعين و نواياهم...
لم يفكر احد في انه يكشف عورات البيوت (يا لقبح الكلمة) وان كان من كشف فقد فعله الفقر و الحوجة اللعينة...
لم يذهب احد ليتحقق من براءة المغازلات التى ربما تحدث هنا و هناك في اطار النفير...
لم و لم ولم...
بمعجزات كبيرة و صغيرة صنعها رجال و نساء في شتى بقاع الارض تواصل العلاج ..لكن المعجزة الامنية لم تحدث... هزم المرض اخى..
لكن... اعلم الان ان لى اخوة و اخوات على وجه هذه الارض... اعرفهم بالاسماء و النجوم التى في قلوبهم...
ماسا..منعم...اشراقة..انعام..سمرية..الاخرين والاخريات..
لن يري البعض في ما تفعلون الا وساويسهم و امراضهم...
اتمنى ان لا تروا الا غادة و حياة غادة...
...ان لا تستمعوا الا لصوت امنياتها و دعوات امها ... اما مثل هؤلاء ... دعوهم لهواجسهم و وساويسهم الخاصة
سلام لكم و محبة
سلام لغادة
عصام جبر الله
|
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خضر حسين خليل)
|
حيدر قاسم يكتب عن سودانيزاونلاين وعن غادة بصحيفة الصحافة اليوم
Quote: تسلمي..غادة نوري
حيدر قاسم
وأنا القي بنفسي على ارض الوطن وصعيده الاعفر الميمون ،بعد انقطاع شاق أستولد في حواشي محصولا وفيرا من الأشواق والدموع ،لم تكن افراحي بهذا الظفر الحميد والعود الأحمد لتلتئم إلا على خطوط الحزن بمصاب غادة ومع ان هنا تتشكل ملامح مأساة تصنع إنسانا جميلا في لجاج الخطر ومضارب الردى لكن غادة ما تزال هي الطرف الاقوى في هذا الصراع تقاوم زحزحات المرض بالثبات ،عقاقيرها الصبر والابتسام والمحبة مضاداتها الحيوية الأمل واستنباط المزيد من شئون الحياة ،ساترها عبوات القة من الود ودفاعاتها الإستراتيجية في الاحتماء بين الناس والانغماس في زاخم مشاعرهم وحنوهم ..
اذن..فهو حزن كما الفرح وهي معاناة كما الرأفة حتى تنميت أن أكون أنا المريض ،فغادة بخصائصها الذاتية وقوتها المعنوية تنسحب من سرير المرض لتلبس معطف الطبيب ولتضع على صدورنا سماعة للبحث عن امتن أواصر الأمل،فنحن الآن نستشفى بثباتها وتذيب عللنا في محاليل عزمها ونصاحتها فما أعظمك ايتها الإنسانة..كوني فينا على الدوام مصلا مضادا للانهزام والاستسلام ،دوزني على ضلوعنا أنغام الحياة حتى نراها أجمل.
غادة نوري.. القيادة،وحادية مشروع (العافية بالالفة)،لن تكتمل قصتها الا بعد ان ننظر من حولها ،فما اجلهم رجالا ونساء،رأيتهم يتحلقون حول غادة وكأنهم روح واحدة هبطت على جسوم متعددة أو كأنما هناك مرجعية جينية تؤكد وحدتهم العضوض،شالوا عنها الالم واقتسموه بينهم بصدق وأريحية فخفت أحمال المركز(الغادي) وهشت روافده صوب تيار الحياة ومحيطها الإنساني الدفوق ،رأيت في حراكهم هذا قيمة رمزية عالية المستوى والمحتوى فأيقنت ان مجتمعنا ما يزال بخير ومايزال متننا يؤتجر،فلو إننا علي صعيدنا المجتمعي نقتسم همومنا ومواردنا وأحلامنا كما هم فاعلون لكنا اسعد الأمم..
فخالد ماسا وكأنه نصف اله يكتب لأجل غادة ويسعى لسلامتها بكل ما أؤتي من بيان وبأس يحبس أنفاسه ولا يطلقها الا عندما يتقدم (فاعل خير) بيد مساعدة..تتدحرج من ربوة ذهنه الأجندات الصغيرة والكبيرة مفسحة المجال لـ(بند غادة)..متنزها في رحاب الأولويات القصوى..ما كان في ظنه مطار الخرطوم جميلا إلا لكونه مهبطا لمواطن كريم كان يحمل معه تذاكر الحفل المخصص دخلها لغادة..مع ذلك فما سقته حول الرجل ماهو الا النذر اليسير اذ تحتضن صحائف البر الانساني واللوح المحفوظ بقية التفاصيل،وله باذن الله اجر عظيم.
اما نادية السر فكأنها تتنزه عن عالمنا البشري الخطاء لتلتحق بملائكة الرحمة وهم يفردون اجنحتهم لتجنيب غادة زخات الالم ومضاضته،فنادية الآن تتحكم في المنحنى المعنوي لغادة وتحرسه بثبات كما في اعلى قمة.
اما صديقي عبد المنعم سليمان ،فهذا شأن آخر فغير انه(اخو بنات) وتكفي مجالسته لتفريق الكثير من الهموم والاحتباس لكنه يضطلع بدور مفصلي في تنظيم الحملة وتعظيم منافعها لما يتمتع به من قدرة على الحركة ولما له من رصيد عال في مجال العلاقات العامة والانسانية فله التجلة.
اما بنات حيمورة(انعام واشراقة) فهن يستحقن (القومة) مع التصفيق الممتد والثناء العاطر لأنهن من القلائل الذين يقبلون(التكليف) بشره وفرح يؤدين ما يليهن من مسؤولية في صمت لا ينتظرن حمدا ولا مدحا .
تطول القائمة احبتي ويعجز راداري الضعيف عن تغطية كل الحدث بكل حوامله البشرية فهناك بورداب الخرطوم يتقدمون الركب وهناك فاعلو خير لدرجة يعفون فيها عن ذكر اسمائهم ويعتمدون ذلك شرطا لتقديمهم/هن المساعدة وهناك صحفيون نسجوا للمجتمع قصة غادة وسعوا بها بين الناس وهناك اصدقاء وزملاء غادة في (سودانيز اون لاين) لما انهالت تبرعاتهم وتركاتهم بسخاء لا يمكن مقابلته الا بالفرح الاثيل,وهناك المرابضون في الحقل الطبي يحيطون غادة بكل عنايتهم وادويتهم وارشاداتهم وهناك المنظمات والافراد الذين آلوا علي انفسهم الاسهام في هذا المشروع الانساني النبيل وهناك عقد الجلاد وهي تطوع انغامها وحبالها الصوتية لمصلحة غادة ولوجه المولى سبحانه وتعالى.
اذن..فخاصية الذكر بالاسم هنا كانت على سبيل المثال لي الا فاللوحة اجمل واغذر مما اشرت ولهم جميعا خالص التقدير والعرفان.
ودعوني اقول ان غادة نوري من بنات السودان الصافيات،خرجت بعناية الله من موت محقق اثر حادث حركة لكنها مازالت تدفع اكلاف عمرها الجديد خصما على صحتها فكبدها ومحيطاته الحيوية يتعرضان للتلف والضمور اثر الارتطام وما نجم عنه من انغراز بعض العظام الصغيرة في الكبد وهي غير مأذونة بالحياة ان استمر حالها كذلك ..غير ان التقرير الطبي يشير لامكانية تدارك هذا الوضع بعملية جراحية اختيرت لها الاردن وبتكلفة تعجز الاخت غادة عن توفيرها من تلقاء ذاتها لهذا اختار اصدقاؤها ان يطرقوا ابواب الخير وان يستنطقوا الضمير السوداني وهو الوثاب ..
اسألوهم في اللجنة المنظمة عن التفاصيل المالية والطبية واللوجيستية فسوف يجيبون..
عندما تقرأون هذا المقال اكون غادرت السودان الى كندا لكني اترك غادة امانة في اعناقكم.. طيبوها وعافوها،انزعوا عن حياتها وعن دورتها الدموية كل معيق تالف،ارخوا سدول الامل على من هي في مقتبل العمر .هذا العمر الذي كان نصفه للابتسام ونصفه الآخر لكل الناس..
الآن اتوخى دور الناس ولما لهم من نجدة ورواد نفير لان غادة هي ابنة او شقيقة كل سوداني مازالت تعتمر فؤاده روابط الدم والنخوة والايثار.
اتمنى ان اسمع عن غادة كل خير،
فهي تستحق |
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
طوبي للاحزان !
إذ نشاركها ذات احتفاء بعض رهقها !!
لا شيء يعدل الوطن !!
وصباح جديد ..
فيما يتعلق بالإبنة غادة نوري ... شكر واعتذار وترحاب
الاستاذ فتحي البحيري والبنت (الحياة) !!
Quote: كنت أمني النفس برؤية هذه البنت (الحياة) ... بعيداعن كل مادار ويدور هنا من خير وحب بخصوص مسألة التنادي لعلاجها ... كنت أريد أن أتحقق من صدق نظرية ظللت عمري أؤمن بها أن الذين يختارهم الخالق سبحانه وتعالى لابتلاءات أكبر يتمتعون بروح أسمى وقابلية أكثر منا للحياة
ظللت أداري هذه الأمنية مثل أشياء كثيرة وأتحاشى الحديث عنها لأحد إلى أن أكرمني الله الليلة (ببعض شوف)
تاريخ اليوم هو الذي ألتقي فيه لأول مرة بالأخ الوطني المثابر الإنسان عبد المنعم سليمان وجها لوجه
كنا خططنا كلانا ، عبد المنعم وأنا ، لهذا اللقاء أكثر من مرة ولكن اراد الله أن يكون اليوم واليوم فقط
مدين أنا بحياء العالمين جميعهم واعتذار جم لهؤلاء الشباب من غادة يمينا وانتهاءا بمنعم ... يمينا أيضا
أنهم يصنعون حياة خارج هذا القبح أندى مما يتخيل المرء
واستطعت دردقة الولد السليقي الفطن إلى أن أهاتف البنت الحياة على حسابه لبضعة دقائق
مثلما توقعت .. لا توجد في نبرات الصوت سوى أصرار واختيار عميق لتجاوز المحنة والألم وكل ما يتعلق بهما إلى رحاب الحياة بكل الثقة والأمل والصدق
ابنتي غادة موجودة خارج الموضوع الذي يعرفها كثيرون به فلا تحبسوها فيه
وأتمنى أن يتفهم الجميع وغادة عمق ما بيننا جميعا بغض النظر عما حدث ويحدث
وإلى أن تعودي يا بنتي من هذا الامتحان الذي اثق أنك توشكين على اجتيازه بامتياز
نظل في انتظار وترقب ودعاء
شكرا منعم أنك ممكن وأنك وغادة الاخرين صغتم وصنعتم هذا التواجد الإنساني الراقي
محبتي
فتحي البحيري |
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
Quote: إيها الحالمون بعودة عالمنا الذي أختطف
ماتقومون به
فعلاً , مخيف , رهيب , مرعب
فمن يعمل لرتق ثوب أخته غادة
من يعمل لإرجاع كبدها , بيضاء من غير سوء
لاشك أنه , يستطيع إعادة
الوطن
إلى أهله
وعزه
وقيمه
ودينه المختطف
أنتم فعلون مخيفون
منعم
عرس
وعرسوا لي غادة نوري كمان بعد ماتعالجوها
وغازلوا بعض
وغنوا
هكذا نحبكم
محبتي
كمال على الزين |
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: عبد المنعم سليمان)
|
منعم
تحياتي
عارف الزيكم , إي حاجة بتعملوها بتوجع
عمل الخير , المحبة , جمالكم , وبراءة غزلكم
وتعريتكم لواقع , الدولة الفكت المواطن عكس الهوا
لما تكون بالعمل وفتح نوافذ الأمل
أكيد , محسودين
وحا تلاقو , قدامكم عراقيل كتيرة
دعوات حق كتيرة
سوف يراد بها باطلاً
دعوة للعمل في سرية
دعوة للحب في سرية
دعوة لممارسة كل شء بسرية
خلاصته :
موتوا في صمت
وقفوا مكتوفي الإيدي
وتفرجوا على وطنكم وأهلكم وأحبابكم
يموتون في صمت
لأن علانية أفعالكم , لا تصب في صالح المشروع الحضاري
الذي إنفجر , وأصابت شظاياه كل بيت سوداني
منعم :
عليكم الله , حبوا وعرسو وغنو ومدوا أياديكم لكل أخ وأخت بحاجة إلى إليكم
ونحن من خلفكم
والزارعنا غير الله
اليجي يقلعنا
وأعلنوا عن حفلة غادة نوري
وأرقصوا , وراقصوها
وبعد شفاءها أيضاً (إنشاء الله)
أعملوا حفلة تاني
حتى الفرح عايزين يمنعوه
ياخي مع السلامة
محبتي
(عدل بواسطة كمال علي الزين on 01-13-2007, 01:45 PM)
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
خطوات جادة .. في امل استفرنا فيه جل قوانا !!
غادة نوري .. تقود هذا الامل .. وتطرق الباب !!
عبد المنعم خليك .. متابع !!
نادية ، خالد ماسا ... اكتفوا بابتلاع ريقكم .. !!
الاجتماع الاثنين القادم ... الموافق 15 يناير 2007
الساعة 5:30م ... العمارات شارع 59
الحاضر يكلم الغايب .... !!
وسلامات
هبة
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: Randa Hatim)
|
Quote: نحلم ... نقرا ... نداوى
نحلم ... نقرا ... نداوى
نحلم ... نقرا ... نداوى
اتصالحت مع اقدارى فى اى جرعة الم سقتنى ليها... كفايه انها جادت بيكم .... |
رندا حاتم ..
يا صباحات الموانيء
حتى لو دربك ترنح في مشاوير الاغاني .. والجرح ارتد بينا لزمان الاهة تاني
يانا لا بنتحاشا صدك .. لا بتموت فينا الاماني !!
والاجتماع بكرة يا رندا ... واتمنيت لو كنتي معانا !!
بلغي السلام .. للاخوان ود رملية ، وبكري الامين ، قولي ليهم الغياب لزومو شنو ؟؟!
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: سمرية)
|
بكره يا الحبيبه .. كان الله مد فى عمرنا .. تلقونا معاكم بالتلفون ..
وارواحنا بقت زى طيور الجنة يا هبه .. لا بتحدها المسافة ولا بصدها الزمن ..
اجسامنا فى الغربه لكن الله عالم الروح تهاتى بيكم لمان عصب الوجع ينتح ...
سلامك ح يصل والوصيه كمان يا بت النيل ...
كونو بخير ...
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
خالد ماسا ، انعام حيمورة .. بالتوفيق انشاء الله في مشوار اليوم !!
انعام عبد الحفيظ ... اتصلي بي لامر هام !!
عبد المنعم ... منتظرين منك .. بس اشارة .. ( كلمة ) تدينا البشارة !!
ويا غادة نوري ... صباح الامل !!
معاوية كرفس .. اتمنى تكون اصبحت افضل بعد الحادث !!
ويا بت السر .... صباحك نور !!
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: سمرية)
|
الاعزاء ,
على عجب
خالد ماسا
سمرية
انعام حيمورة
انعام عبدالحفيظ
الفاتح وديدى
عبير خيرى
اشراقة حيمورة
سمؤال
غادة نورى
عثمان المهندس
د.انس
طارق الامين
نادية السر
اجتماع يوم غدا الاثنين الموافق 15 يناير 2007 لمعرفة موقف بيع التذاكر الاكرامية و عليه الرجاء مراجعة الموقف و اجراء كل ما يلزم حتى تكون بكرة الصورة اوضح
فى حال عدم تمكن اى فرد من الحضور للاجتماع عليه الاتصال بنادية السر او خالد ماسا لموافاتنا بالموقف
! اتفقنا !
نادية السر
| |
|
|
|
|
|
|
|
|
 Re: " اللمسات الاخيره " .. حفل علاج " غــــــاده نوري " (Re: خالد ماسا)
|
ليكم كلكم
أجمل سلام وكل المحبة
يا سمرية
تلفونك ما ردّ
مشيت للمشوار القلتو ليك بخصوص الرعاية للحفل
لقيت باب أمل تاني إتفتح
لقيت ممكن يكون في دعم مباشر ومساهمة في العلاج
بس عايزة صورة من كل الأوراق والشهادات الطبية
بس بقدر الإمكان سريع لأنو وعدتهم اجيب ليهم نسخة من الورق بكره
منتظرة تلفون منك
وكلنا مع غادة
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
اختى نادية
Quote: الاعزاء ,
على عجب
خالد ماسا
سمرية
انعام حيمورة
انعام عبدالحفيظ
الفاتح وديدى
عبير خيرى
اشراقة حيمورة
سمؤال
غادة نورى
عثمان المهندس
د.انس
طارق الامين
نادية السر
اجتماع يوم غدا الاثنين الموافق 15 يناير 2007 لمعرفة موقف بيع التذاكر الاكرامية و عليه الرجاء مراجعة الموقف و اجراء كل ما يلزم حتى تكون بكرة الصورة اوضح
فى حال عدم تمكن اى فرد من الحضور للاجتماع عليه الاتصال بنادية السر او خالد ماسا لموافاتنا بالموقف
! اتفقنا !
نادية السر |
عاصم ابوبكر فى اجازة من الاحتماع ولا شنو
| |
|
|
|
|
|
|
|
|
|
Re: " اللمسات الاخيره " .. حفل علاج " غــــــاده نوري " (Re: خالد ماسا)
|
سلام لكل الاحباب
Quote: الاعزاء ,
على عجب
خالد ماسا
سمرية
انعام حيمورة
انعام عبدالحفيظ
الفاتح وديدى
عبير خيرى
اشراقة حيمورة
سمؤال
غادة نورى
عثمان المهندس
د.انس
طارق الامين
نادية السر
اجتماع يوم غدا الاثنين الموافق 15 يناير 2007 لمعرفة موقف بيع التذاكر الاكرامية و عليه الرجاء مراجعة الموقف و اجراء كل ما يلزم حتى تكون بكرة الصورة اوضح
فى حال عدم تمكن اى فرد من الحضور للاجتماع عليه الاتصال بنادية السر او خالد ماسا لموافاتنا بالموقف
|
اتفقنا.
| |
|
|
|
|
|
|
| |
سمرية
عبد المنعم سليمان
انعام حيمورة
خضر حسين خليل
كمال علي الزين
عاصم ابوبكر حامد
shazaly gafar
فاروق حامد محمد
معاوية كرفس
انعام عبد الحفيظ
خالد ماسا
معتز القريش
Ishraga Haimoura
ملكة سبأ
سفيان بشير نابرى
فيس بوك
تويتر
انستقرام
يوتيوب
بنتيريست