|
|
 شكوي عاجلة للجندريات ومنهم (والشكية لبيدن قوية)..
|
سمعت عن الغيرة وعايشتها فترة من حياتي ، شيئ جميل في حدود المعقول طبعا
لكن لما تكون الحالة كحالت زوجتي فالأمر يحتاج إلي مشورة (سجيمان وأبو حراز يمتنعون)..
زوجتنا المصون لا تعرف الغيرة وطبعا الموضوع في صورته العادية جميل منو الما بيتمني زوجة ما غيورة؟؟
بس ما للدرجة دي!! أنا عندي حالة متأخرة والواجعني في الموضوع بجيني إحساس بأنها ترسل لي رسالة
(يا عجوز إنت قطرك صفر)..
أموت أنا في إيمان بنورة مذيعة قناة الجزيرة.. ولما تذيع نشرة الأخبار تتحول المآسي التي تنقلها وأخبار الحروب إلي معزوفة جميلة وسمفونية لبتهوفن أو موتزارت !! لا يهم صبرا شاتيلا أو الفلوجة المهم إيمان تذيع !!
ويدور حوار طريف هنا أحيانا (من طرف واحد كأغلب حواراتنا في البورد).. حول الموضوع تعرفي يا حاجة (ده إسم الدلع)..
لو يخلوها تذيع وهي واقفة كان الواحد أتفشي أنا عندي إحساس إنها قصيرة . ويكون الرد : أوه... طبعا أوه دي عند حرمنا المصون إختصار لي (يا راجل ما تخجل إنت قايل إيمان بتعاين للزيك)..
أتقصدها أحيانا أقول (أضيق ليها أخلاقها) -هواية يعني ما كل زول عندو هواية-.. تعرفي يا حاجة.. الشي دي (إيمان بنورة) مبالغة أسة في ذمتك أنا ما مظلوم ترد : عاجبني إنت يا راغب علامة ترميها زي البنية.
في الويك إند الفات مشينا السوق الدنيا هنا بدت تصيّف والناس قاشرة وطبعا الهدوم بتقل مع سخانة الجو وأنا كعادة كل السودانيين كاسح قدام وهي ومعاها (البطان) العيال وراي.. فجأة تجرني ليك من لياقة القميص لامن داير أقع علي قفاي
وقالت وكل البراءة في عينيها : يا خالد عليك الله عاين شوف البت دي سمحة كيف ؟؟؟ بيني وبينكم البت سمحة..سمحة جد .لكن المصيبة في محمد ولد دي يسووا ليها شنو..والأمر من كده البنيات تجي الشافعة .. يا بابا عندك شعرة بيضا هنا أقلعها؟
أقلعيها يا بتي وعادة ما تتدخل الحاجة هنا : والله بالطريقة دي إنت حا تصلع..نان يا مصيبة المابيصلع بي شنو كان ساعي لي راجل (ده تعبير شايقي ولا علاقة له بالإساءة للعنصر النسائي)..
كيف الشورة يا جماعة.
|
|
 
|
|
|
|
|
|
|
 Re: شكوي عاجلة للجندريات ومنهم (والشكية لبيدن قوية).. (Re: tmbis)
|
تعرف يا علاء خالتك أماني بتحب تحضر قناة إسمها (المنار) بتاعة الكيزان اللبنانين
مرة جابوا واحد مطموس قال شنو (زوجتك في الدنيا زوجتك في الآخرة) قامت خالتك
قالت لي أها وين ليك زوغة مافي.. قلت ليها سجم خشمك أنا غايتو بالبسوي فيهو ده جهنم عدييييل
وشايلك في ضهري دبري حالك..
قال لوج قال
| |
|
|
|
|
|
|
|
|
 Re: شكوي عاجلة للجندريات ومنهم (والشكية لبيدن قوية).. (Re: Raja)
|
خالد الحبيب
تحياتي
كويس انو المدام بتقول ليك شوف البت دي سمحة كبف
دا بيعني انو عندها روح رياضية
| Quote: أموت أنا في إيمان بنورة مذيعة قناة الجزيرة.. ولما تذيع نشرة الأخبار تتحول المآسي التي تنقلها وأخبار الحروب إلي معزوفة جميلة وسمفونية لبتهوفن أو موتزارت !! لا يهم صبرا شاتيلا أو الفلوجة المهم إيمان تذيع !! |
ايمان بنورة ؟؟
عندي صديق عزيز معانا هنا في البورد
كان مرة بعاين في الجزيرة وجات ايمان بنورة
وبدا يبحلق واندمج معاها للآخر
زوجتو كانت بتصور في المشهد ومغيوظة جدا
مشت المطبخ
سخنت الملعقة وجات وضعتها ليهو على يدو لمن نط
اها قام بعد كدا اعدم كل الملاعق الحديدة في المطبخ
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: Raja)
|
تعرفي يا رجاء
ناس مانشستر ونابولي ديل أخير منهم حمد والديبة بي فلسهم وقجتهم الطايرة دي
ديل مصايب ..القانون عندنا هنا البينفصل من زوجتو بتشيل نص العدة وهي عدة نصاح ملاييين
يا رجاء وبعد ده العين طايرة (قوليت) زوجتو السابقة مرقت منو بي خمسة مليون يرو
وهو فرحان بالتسجيل الجديدة بنية زي الفس فس..( ريكارد) زوجتو السابقة طلعت منو بي حسبة
تجي سبعة مليون وإياكي و ناس التنس (بورس بيكر) عندو زوجة أمريكية مرقت منو بي 15 مليون دولار
برضو تقولي لي صلاح كرار.. أخير نحنا بي فلسنا ده
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: Rawia)
|
يا خال حاصل الحاصل ؟؟
جاى تشتكى كمان
ما تحمد لله انو اداك شريكة حياة ذى دة ؟؟؟؟؟؟؟؟
وهاك النص دة هدية لامانى واولاد امانى ... انت لا
Quote:
شكرا - مرغني الماحي
مشتاقة لي كل التفاصيل المعاي
و الذكريات الماتعة
كل الاماسي الكنت فيها
بيك صارت فارعة
طولنا قامة الحب سوي
ما جاي اقول اه يا هوي
شكرا لكل القلنا عن باكر سوي
شكرا لكل خاطر سقي الحاضر روي
شكرا لخط الاستواء
الحرر كلامك ساعة يكون زي النسيم
لطف مسامك واندلق صدقك عميم
شكرا مناجاتك وكت همسك حميم
شوفي كيف بيناتنا ازهرت الجروح
وشوفيني كيفن يوم نهلتك ابتهلتي
صبيني من حُقِك نفوح
عابق عطر غيمة ودعاش
ختيني فيك جواي نبوح
قاصدين زمن وردة وفراش
كان نلحق العمر البروح
قبال ملاقاة الرشاش
ياخيمة في الزمن النزوح
ياواضحة في الزمن الطشاش
|
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: ASAAD IBRAHIM)
|
salam
wallhi ya akhwana ana mosjela men zaman fe al board da wa bajy bagra wa b3yen bs , laken bel jed keda konta mstgraba fe khaled aba al motjed3 fe al bord wa al((( 7aja))) still very cool
a raja intow ag3dow 3aynow wa n7na bnakhtkm 3ly gador 3golkom
ya zol a7med allh 3ndak malk , bs inta gader
wa domtom
noon
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: noon)
|
نون..
أولآ ألف مرحب بيكي..
والإسم جميل بحق..
تعرفي يا نون في الأول بيجيك إنطباع إني مجدع
لكن صدقيني الحاجة بتعرف تقريبا كل الجنس اللطيف في البورد
وكمان بتتونس معاهم ولما بقت لي في رقبتي والكمبيوتر بقي
في غضب الله سويناهم إتنين وبقي عندنا( نت وورك) أها كل واحد
فينا حاضن كمبيوتر. وبقت لغة مشتركة بينا ونقطة تلاقي..
أما الجنس الخشن فبرضو بتتونس معاهم.. تمبس ، عادل إسحق، عثمان تراث،طارق أبوعبيدة، عزيز خطاب.
وتبدأ يومها بقراية موضوعات سجيمان وبتحب أم الخير جدا وشفقانة عليها من الزول الكلو إضنين
وتقول لي سمح الله الأداني راجل قيافة زيك أسي كان بقيت لي زي سجيمان كنت أسوي شنو
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: ali othman)
|
والله عرفت ليك اماني ، وذكرتني جارتنا وراجلها(عجزوحسي) ممصوخ وبريد البنات -الكلام دا زمان قبال الفضائيات- ولمن تجيهم مرة اقول ليها الرسول عليك يا ست البنات غطيني بتوبك النعاين للمرة السمحة دي وهي تضحك وتغطيه بتوبه وهو يعاين ويبلحط ويضحكوا الاتنين . والغريبة احبو بعض موت .
| |
|
|
|
|
|
|
|
|
 Re: شكوي عاجلة للجندريات ومنهم (والشكية لبيدن قوية).. (Re: خالد الحاج)
|
ندى
انتى فى كلمه حاجه ولا حكايه هو ماشى قدام وهى والاولاد وراء?
عارفه انا لو راجلى عمل لى كده حأعمل شنو؟ اسيبو ماشى واركب تاكسى ارجع البيت 
قال حاجه قال
الخال العذيذ خالد
معليش ما دايره احرش ليك المدام, انت تحمد الله انو بقت بارده وماكسرت ليك التلفذون
مرتك ده ماممكن تكون جعليه, ولا شنو يا رجويه؟
لكن عجبتنى بناخدهم على قد عقلهم ده
وبالمناسبه ده احكى ليكم القصه ده, اصلى الليله فتحت للمذاكره عشان عندى بكره امتحان سواقه, دعواتكم معاى
اها فى راجل كل مره يقول لمرتو انا عايذ اتزوج تقول ليهو عليك الله انت البتدورك منو, شوف صلعتك وشناتك ده, غيرى انا المسكينه مافى واحده بتدورك
اها الراجل كل يوم يقول ليها كده وهى ولا هاميها وتقول ليهو عرس كان داير تعرس لكن مافى واحده بتدورك
فى يوم من الايام سافر الرجل بره ورجع وفى ايدو حسناء جميله تبدو من شكلها والحنه ورائحتها انها عروس جديده, الراجل دق الباب واول ما فتحت المرا الباب وشافت الفتاه معاهو الا اطلقت صرخه وقالت ليهو عملتها ياراجل واغمى عليها
الراجل بعد ما شممها بصل وكلونيا واللاذى منو وبعد مافاقت قال ليها ياوليه استهدى بالله, ده مرت صحبى وموصينى اسلمها لذوجها, اهى المره بدت فى الضحك ومن ا اليوم داك بطلت تقول ليهو انت البدورك منو
يلا فى امان الله
لا اله الا الله
| |
|
|
|
|
|
|
|
|
 Re: شكوي عاجلة للجندريات ومنهم (والشكية لبيدن قوية).. (Re: bint_alahfad)
|
تعرف ياخال ..
عندي عمي .. كان لما يجي من البلد .. عندو غرام مع برنامج مشوار المساء
يكون قاعد كويس .. من ما فلانه القصيرونة ديك يجيبوها ..
لا صلاة مغرب
لا بيتكلم مع زول
وتلقاهو يوزع في البسمات .. وانا متابعو ليك..
مرات اجي قاطع قدام التلفزيون واخد لي وقفه .. وحيات خوتك بينزل من السرير عديل كده .. عشان ما يضيع ليهو لقطه
اها بعد ما البرنامج ينتهي يناديني
ياولد
تعال شيل صندوقكم ده
الاغنية دي اماني ماليك اي علاقة بيها
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: bint_alahfad)
|
| Quote: الراجل بعد ما شممها بصل وكلونيا واللاذى منو وبعد مافاقت قال ليها ياوليه استهدى بالله, ده مرت صحبى وموصينى اسلمها لذوجها, اهى المره بدت فى الضحك ومن ا اليوم داك بطلت تقول ليهو انت البدورك منو |
بت الأحفاد..
أتاريكي مصيبة يا بت أخوي والله ضحكتيني أها نبقي في جنس ده
من الأول ما تنعدلوا.
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: خالد الحاج)
|
الاستاذ خالد الحاج
والله انت في نعمة ، حسب مراحل سيجمان في الزواج مرحلة الغيرة دي عندها ملامح كده النسوان بعرفوها براااهم
بمناسبة ايمان بنورة ، الوالد ( ابوي) معجب جدا بمذيعة الجزيرة ليلى الشايب ، كلما نجي نقعد في الاكل والاخبار تكون شغالة يقول والله المذيعة دي ممتازة خلاص وبنفهم منها انه قاصد امتياز السماحة عديل ..
وبعدين والله ابدعت في كلمة ( ياحاجة) دي في اعتقادي قمة الرومانسية
اها نانسي عجرم كيف معاكم .. لووووول
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: maia)
|
يا خال
كيفك ؟
تعرف
يبدو انها من النوع البيتحاوم جوّه الشوارع الجوّانيه لقلب الحبيب .
و اكيد هي كل ما تاخد ليها مشوار طاعم بي هناك بتلقاها قاعده جوّاك ، عشان كدا مطّامنه و ضاربه الطناش من جنس هضربات الريده الخفيفه اليوماتي دي .
بختك يا خال
والادّاك الرحيق انشالله بس يجدعنا بي لون نفس الورده .
و
سلام حتي مطلع الامر
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: عاصم الحزين)
|
عاصم الحزين..
عاصم يا عاصم..
دي حالة يا عاصم بتجي بعد دردرة (ومجاهدات) الكلمة دي قاعدة تلبش خالك
لكن بيني وبينك الله يديك بنية سمحة وسمرية تونسك بالزين وإنت بتستاهل كل الخير
ويا عاصم خالك مبسوط يحمد الله.
لكن كدي أديني أضانك .... الخرطوم يا عاصم الخرطوم .. والباقي بتمو ليك
في المسنجر أصلي كايس ليك لي زمن.
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: maia)
|
العزيزة مايا
| Quote: وبعدين والله ابدعت في كلمة ( ياحاجة) دي في اعتقادي قمة الرومانسية |
دي محولة لي ندا أمين العزيزة
| Quote: بمناسبة ايمان بنورة ، الوالد ( ابوي) معجب جدا بمذيعة الجزيرة ليلى الشايب ، كلما نجي نقعد في الاكل والاخبار تكون شغالة يقول والله المذيعة دي ممتازة خلاص وبنفهم منها انه قاصد امتياز السماحة عديل .. |
أبوكي حريف الله يديه الصحة العافية و شنو عزال
سلمي لي عليه وقولي ليه شوف إيمان بنورة يا دفعة دي ممتازة جدا جدأ
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: خالد الحاج)
|
شقيقي خالد
والله ما عجبنى ليك
!!!!!!!!!!!!
لاكين اخيتى شاطرة وواثقة من روحها
ويا خالد
فى مسلسل سورى اسمو
يوميات جميل و هناء
جميل ايمن زيدان و هناء نورمان اسعد
جميل روحو مرقت يثير غيرة هناء كيف ؟؟؟
وشاور الاصحاب
والجيران
وهات يا تكتيك و تخطيط
لاكين هناء
صااااااااااااامدة
وبقول لى هناء حقتنا الفى هولندا
عجبتينى و الله
وعجبنى ليك يا خالد
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: Tumadir)
|
العزيز خالد..
بالمناسبة اسمك دا علي لساني كل دقيقة بنادي وبلعلع.. وبكورك بيه ..حتي بالليل بهذئ بيه .." دي اديها بخرة للمدام" عشان تدور ليك فرمالة غيرة يحلك منها الحلا بله ..بله دا منو الله اعلم ..اها نواصل ليك مسلسل اسم خالد ..فاسمك يطابق اسم ابني الحبيب ..المشاغب جدا ..والذي ربطني مع كرسي الكمبيوتر دون ان اشعر ..ولم يحلني الا الأستاذ زوجنا الذي يغيييييييييير من البورد وقعدته " الإغماءة" حيث لا تحس بأحد ولا تنطق ببنث شفه حينما تنادي لانك ببساطة لا تسمع شيئاَ !!..ولم ينقذني من هذه الغيرة التي تهدد مستقبلي فيه الا العزيز سجيمان الذي عرفته ببوستاته ومن ديك وعييك " بالله اطبعي لي معاك كتابات سي جي ..او الليلة سي جي ما عنده حاجة" دا كلامه ..ومن ديك ما سألوني تاني شفت الدفعات دي حربية كيف!!
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: Tumadir)
|
بت الشيخ العزيزة بحق..
| Quote: قنعانة من مواقفك لانها ما بتفوت طرف اللسان البتلغلغ بيه ومسند الكنبة الراقد فيه وعين الله البتعاين بيها. |
تعرفي يا تماضر ده شكر سمح يعلم الله..
وأسأل الله أن أنو ما أنوم وغل في نفسي تجاه زول
المصريين يا بت العم قالوا (الكفن ما لوش جيوب)..
لكن أسة برضو ما وريتني أسوي شنو مع المصيبة حقتي دي
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: خالد الحاج)
|
قيل :
التسوى كريت بالعرس...تلقى فى غيرتا
وقيل : المره بحاربوها بى عدم الshopping
وقيل : الصقر كان وقع...كتر البوستات عيب
ايضا : الشعراء يتبعهم الغيم
عاصم كويس ما قابلناك زمان كان غتست حجرنا بالكلام العجيب البتقول فيهو ده، خف علينا شويه ترمومتر القلب وصل فوق خالص
بعدين يا خالد فى زول عاوز يناقش موضوع زى ده ويعنونو للجندريات...فعلا قلة عقل رجال
مافى زول(ه) تجى تقول لى stereotyping ولا sexism و لا عباس اب حنك
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: خالد الحاج)
|
الاخ خالد
تحياتي واحتراماتي
اقول وما فينا من زعل انت قلت داير الشوره
هي طبعاً عايشتك وعرفتك وثقة دي نابعه من
انه مافي مراه بتتحملك وبتقبل بيك غيره
عشان كده خاته في بطنها بطيخه صيفي فعلق
وعلق عمرك كله علق واهو المقلب حصل عليها
فما هاميها دايراها تجي منك وهي قاعده علي
الهبشه فنصيحه اقبض قبيضك واحمد سيدك
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: خالد الحاج)
|
الأخ خالد الحاج ،
تحيه طيبه،
Quote: زوجتنا المصون لا تعرف الغيرة وطبعا الموضوع في صورته العادية جميل منو الما بيتمني زوجة ما غيورة؟؟
بس ما للدرجة دي!! أنا عندي حالة متأخرة والواجعني في الموضوع بجيني إحساس بأنها ترسل لي رسالة
(يا عجوز إنت قطرك صفر).. |
أرجو أن تشكر زوجتك عنى لأنها تعاملت معك بمنتهى الصراحه و الصدق. لذا يا عزيزى و لأنك طلبت النصح، لا أدرى أنته زعلان ليية فكلامها موضوعى وواضح .
أما مسألة (الممسلات) فهى من أعراض (المراهقة) الثانيه، فلاتخاف أو ترتبك يا أخى ، و أنصحك فى هذا الوقت بالتركيز على الأهتمام بأكمال أوراق الضمان الأجتماعى، و طبعا الضمان الصحى و مراجعة الطبيب بصوره أكثر أنتظاما، و ياريت حبه أسبريمن يوميا مع كل حبوبك الصباحيه، هذا طبعا ان لم تكن لديك قرحه.
كما ارجوا الأهتمام ب...و لا كفاك لغايه هنا، أنته فاكر النصائح دى مجانا.
لك و لزوجتك الود.
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: Roada)
|
قلت لي ياخـال (كبع) صباح وعشيي
ماكفاية علينا الفيهو اسع دا 
قال كمونية قال قال
احلى البيتزا ولا الكمونية ؟ 
| Quote: ربنا يخليهو ليكي يا بت يا نيل |
اركز ياخال اركز 
وإتعلم من الحكم الفوق دي
يامانـي حاجزة ليك جنبي هنا تعالى قوااام
اتشلت انا ياخال 
صاراها ليك ..
وانت ماشفت (إستراتيجيات) الدفاع الجنبك دي كيف ؟
ولا ماسمعت بالبحر البكو في صرتو ؟؟
| |
|
|
|
|
|
|
|
|
|
Re: شكوي عاجلة للجندريات ومنهم (والشكية لبيدن قوية).. (Re: ملكة سبأ)
|
Quote: وانت ماشفت (إستراتيجيات) الدفاع الجنبك دي كيف ؟
ولا ماسمعت بالبحر البكو في صرتو ؟؟ |
الملكي...
شقي البيقع في يدك
قلتي لي الكي في الصرة لا حولة ولا قوة إلا بالله
يا زولة إنتي شنو؟؟ جولدمائير
أما حكاية يا بت يا نيل دي ما تمسكيها لي خالك
إنتي أقعدي بحتي كده لامن تلدغي يعني الواحد ما يغلط
وبعدين خالك كبر وده علي قول أختنا روضا خرّف
النمش نبلع الحبة
| |
|
|
|
|
|
|
|
|
 Re: شكوي عاجلة للجندريات ومنهم (والشكية لبيدن قوية).. (Re: مريم بنت الحسين)
|
بت الحسين شكرا يا زوق
ويا خالد جيتك تاني
تصدق ما خايف عليك من الحاجة
لكن خايف عليك بالجد من "عمنا" بشاشا حين يعلم اعجابك بهذه "العربية"
وغايتو ربك يستر وما يشوف البوست وكان شافو ما يدخل يقراهو
تعرف امس كنا بسمع في الاخبار بالجزيرة وكانت ايمان بالنورة متألقة كالعادة
" الحاجة" بتاعتي قالت لي امشي قول لصاحبك ايمان في التلفزيون
بقلبي قلت ليها "صاحبي" ولا عاوزة توزعيني من التلفزيون
وبعدين تعرف البتعمل فيهو دة انت " العديل ود أدم"
وتاني قشة ما تعتر ليك
| |
|
|
|
|
|
|
| |
tmbis
khider
فتحي البحيري
haneena
Raja
Rawia
hanouf56
ASAAD IBRAHIM
noon
عشة بت فاطنة
bint_alahfad
عاصم الحزين
lana mahdi
Tumadir
ملكة سبأ
Yasir Elsharif
nada ali
بدرالدين شنا
NGABY AJOOZ
مريم بنت الحسين
فيس بوك
تويتر
انستقرام
يوتيوب
بنتيريست