|
|
 Re: الغوص في نقش الحروف .. أبقى منجم (Re: خالد علي محجوب المنسي)
|
| Quote: شندي بتسلم عليك شديد |
طولنا خلاص واخبار شندي فوق ما جاتنا
طرينا الريم منه هبة عشق جاتنا
في صدرك مدافع تحتو البرينات راطنة
دا الفرقش كويلنــأوطرشق عجلاتنا
يا ابوحوة مالك داير تولع فوقي النيران
شندي وحب شندي وناس شندي
من جميل زي ناس شندي
موش حر
وكل زول بعجبو الصاري
وانا مكتول هوى شندي واهل شندي الطيبين
| |
  
|
|
|
|
|
|
|
|
Re: الغوص في نقش الحروف .. أبقى منجم (Re: خالد علي محجوب المنسي)
|
البشيل فوق الدبر ما بميل
قدل شيخي في رباعتو مهيل
غني وشكري الليلة يا بنية
ترمبيلو الملك بيتو الماهو عارية
إيدك المطر الدودرّت ورزمّت وصبت نهارية
***********************************
غني وشكر الطيب الأخلاص
إنكسر المرق وإشتت الرصاص
إنهدم الركن وينو البلم الناس
***********************************
من السُهاج لي السوح
إلآقيك الخليفة أب ضهرن سفينة نوح
سيدي الشيخ ابوي ساتر عرضو مو مفضوح
***********************************
ساقتي أبوي طنت
دروايش الطرابا والكيلا بتقنت
أنا بشرح بقول البشاقرة تصنت
**********************************
بلد الأوندرا ياسيدي شقيتا
الجُرح المغور لحقت بريتا
سيد الساقية والساقية والحيطة
سيد العجل الرباع البتاتي بي قيدا
*********************************
قالوا الدود قرقر حبس الدرب
الدود ياعيال دود الخلا القرقار
في قلبو الشطارة وعينو شرار
فرتاك لي الصفوف لكنو مو قدار
وكت الصُح يقع شيخي بخوض النار
الدود ياعيال حملو التقيل شالو
يقدل في عرينّو حارس اشبالو
مابخاف من عدو إن قصرو وإن طالو
والبكيلو بي شينة الرماد كالّو
وقالوا الدود قرقر حبس الدرب
| |
|
|
|
|
|
|
|
|
|
Re: الغوص في نقش الحروف .. أبقى منجم (Re: خالد علي محجوب المنسي)
|
Quote: البشيل فوق الدبر ما بميل
قدل شيخي في رباعتو مهيل |
قصائد الحماسة والشكر والمديح تثير في الأنفس الكثير والكثير
وقد أجاد في هذا الضرب من الغنا النساء وأبدعنَّ
وهنَّ كُثر من تصف أخاها أو اباها أو ابن الحي الفارس وتعدد محاسنه
ويوجد هذا الضرب في كل بقاع السودان شماله وغربه وجنوبه وشرقه
وفي الوسط .....
هذا الضرب من الشعر يعجبني الغوص فيه وابحبت ابحبت في معانيه وقد استعين ببعض في معرفة
المعاني الضاربة في عمق عميق
العامية السودانية فيها من البلاغة ما أن تجده في عامية اخرى وابدع شعراء العامية في ذلك
Quote: البشيل فوق الدبر ما بميل
قدل شيخي في رباعتو مهيل |
يشيل : يحمل
الدبر :- الدبرة الجرح في ظهر الدابة
يميل : اي ينثني من الألم
تشبه الممدوح بالدواب وحاشا ان يكون ممدوح دابة بل التشبيه كان
وجه الشبه في تحمل المشاق في الدفاع الذود عن الأهل والحي
الربع ( رباعتو بالعامية ) هم الأنداد المقاربين له في العمر
مهيل ومهول كلمة عامية ماهل اي يسع يقال البيت ماهل اي كبير
المهلة هنا في كل ( كرم وشهامة وفراسة وشجاعة وغيرها )
قدل : اي سار بعزة مرفوع الرأس
وزي ما قال ابوقطاطي
أقدلي وسكتي الخشامة وأ،زلي في العوازل كي
ولحين ميسرة
| |
|
|
|
|
|
|
|
|
|
Re: الغوص في نقش الحروف .. أبقى منجم (Re: خالد علي محجوب المنسي)
|
Quote: غني وشكري الليلة يا بنية
ترمبيلو الملك بيتو الماهو عارية
إيدك المطر الدودرّت ورزمّت وصبت نهارية |
الترميبل : هي العربة الملاكي
ترمبيلو ملك اي يملكها
بيتو ماهو عارية اي ايضاً البيت ملك وليس متأجر او عاره من احد
اعارني ألف درهم اي سلفني او اعطاني
طبعاً ودشيقوق بس بفهم بي المصاري
وهنا تقول الشاعرة انَّلممدوح كان من العز بمكان يملك السيارة والبيت
وفوق دا كان كريم ويده زي المطر للناس
ايدك المطر وما مطراً ساكت مطر غزيزة
وقد اشارت لذلك انها المطر الدودرت ورزمت اي سبقها رعد شديد
وصبا نهارية
وعادة مطر النهارية يحبها الخلق والعين تشوف بفقدو ويضايروا
واكسرو الحوش عشان الساس ما يتحل وينماص
| |
|
|
|
|
|
|
|
|
|
Re: الغوص في نقش الحروف .. أبقى منجم (Re: خالد علي محجوب المنسي)
|
Quote: غني وشكر الطيب الأخلاص
إنكسر المرق وإشتت الرصاص
إنهدم الركن وينو البلم الناس |
جرت عادة الشعراء ان يبدؤ في كل اشعارهم
بكلمات تكاد تكون متشابه
جري النم
وغني وشكري
جريت بقول قولي
وغنيت بجيب قولو وكضبو القالوا بدنولّو
وا لومي انا انا الليلة
وغيرها من بدايات المدح والمناحة
ولها في النفس وقع جم
طيب الأخلاص اي جميل المعشر
المرق وهو عمود البيت وعادة يكون من السنط وبعدها دخل الكمر ( من الحديد )
إنكسر المرق تعني انها فقدته ( بموته )
اتشتت الرصاص
الرصاص هو خشب السقف وعادة يشيله او يحمله المرق
وعندما ينكسر المرق بتشتت الرصاص ( اي الخشب الصغار )
وتعني بقولها هذا انه بموت الممدوح فقد عوله رشادهم
إنهدم الركن والركن اساس بيت الجالوص لانه لايوجد فيه اعمدة مسلحة الركن يدعم في البناء
وعليه احمال السقف
وينو البلم الناس اي في حياته كانت جمعتهم
| |
|
|
|
|
|
|
|
|
|
Re: الغوص في نقش الحروف .. أبقى منجم (Re: خالد علي محجوب المنسي)
|
كنا قالين بي ورانا
أنت زينا طاري ديمة
كنا قالين نحن عندك
زي عيونك لينا قيمة
قلنا تترجانا أنت
الزهور تحضن نسيما
إلا ريدك تاري روح
وعدَّ فات زي كل غيمة
ونظل واقفين نحمل الحب ودا
ونظل صامدين نعصر القلب من الألم على الفلااق والرفيق
وشن أسوو
آه أنا الجنيت وقتَّ هوو
حي أنا المرضان شن أسوو
ولحين ميسرة
| |
|
|
|
|
|
|
|
|
|
Re: الغوص في نقش الحروف .. أبقى منجم (Re: خالد علي محجوب المنسي)
|
Quote: بلد الأوندرا ياسيدي شقيتا
الجُرح المغور لحقت بريتا
سيد الساقية والساقية والحيطة
سيد العجل الرباع البتاتي بي قيدا |
بلد الأوندرا / على ما أظن والله اعلم ...هي بلد الفرنج وتعني بها الخرتوم
الجرح المغور اي الذي لايبرأ وطال نزفه ينخر في اللحم الحي
وتعني ان الممدوح حتى الجرح المغور عنده له الدواء والعلاج
ثم تعرج تفخر بما يملك
الساقية الأولى تعني ان له من الزرع ما استوجب ان تكون له ساقية وعادة الساقية تكون إما لمجموعة مزارع ان كانت صغيرة
مشاركة أو لارض زراعية لفرد واحد ان كانت مزرعته كبيرة ( الممدوح له ساقية خاصة به )
والساقية الثانية هي بئر الشرب حفرها لري البشر والحيوان ( صدقة جارية )
الحيطة تعني بها ان له من البيوت أملاك
اي طين وعز ورضاعة وز
لم تكتفي بل عددت امالكه انه يملك من السعية واشارت لها بالعجل الرباع البتاتي بي قيدا
| |
|
|
|
|
|
|
|
|
|
Re: الغوص في نقش الحروف .. أبقى منجم (Re: الطيب شيقوق)
|
Quote: الشوم الفقر سجم الرماد كان قاطعتني بجيك
عاين خليقتو الغشيم |
اليل والنهار واحد علي العميان
والزم والشكر واحد علي السجمان
إت طير واصل السما وحتى القمر دليهو
ويوم نتلاقى كل واحد بعرف الليهو
ندمت اني اني درست هذه الأحرف ( حتى ) ولو لي يد بلغيها من الأبجدية
ش ي ق و ق
| |
|
|
|
|
|
|
|
|
|
Re: الغوص في نقش الحروف .. أبقى منجم (Re: خالد علي محجوب المنسي)
|
قالوا الدود قرقر حبس الدرب
الدود هو اسم الأسد باللهجة السودانية
وأيضاً عرف باسم الدب
كما قال الشاعر في مرثية العمدة أب جديري عمدة كلي غرب شندي
الدُب أب هرش الضارب الوكرة
تمساح دار كلي البمرق مع الهجعة
والهجعة هي وقت السحر والناس نيام وهاجدة
وأيضا يطلق عليه أب عاجات
قرقر اي سمع له صوت زئيره
وحبس الدرب
منع السارحة والراتعة والسايمة والماري من البشر
وهناك قول
والأسد تغيان لما يشبع برقد في الدرب والقلبو محدثو أجي ماري بي هناك
يحضرني قول لي صديق قال لي: هناك بطن من بطون الجعليين قرب الدامر ناس شر
ووكتين يدوروا الشر ما بفتشوا
الرجل منهم عندما ينوي الشر يتمسح بي زيت سمسم ويجر عنقريبو ويرقد في الدرب
كان يجيت ماري بالقرب منه ينشبك فيك ويقول ليك كتحتني بي تراب مشيك
وكان عوجت دربك وبعدت منو يلحقك ويقول ليك بتمشي من بي بعيد مالي مجرب وبرضو ينشبك فيك
يعني ماك منفك من شرو
ولحين ميسرة
| |
|
|
|
|
|
|
|
|
|
Re: الغوص في نقش الحروف .. أبقى منجم (Re: خالد علي محجوب المنسي)
|
الناحر فؤادي ومولع جوفي حر
أضرم نار وجدي نسام السحر
دامع لجَّ طرفي يا باو طرفاً سحر
والبسم المفلّج لي الأكباد سحر
ماببرد حميمي لو أحسي البحر
داري وماكا داري يلسمح النحر
ولع جسمي ناراً وحاكا دمعي المطر
قلبي كأنو طير .. خافق وإنفطر
أحذروا يا أحبّا.. حب الريم خطر
يكفي البيّا حاصل .. ياحالي انفطر
كل أذاي ياطبيبي في جوفي أنحصر
حبك خلا قلبي عظمي يانور البصر
مالي ليس إلا ....... قولاً مختصر
العند الله أقرب من لمح البصر
ما أطراك حبيبي إلا ودمعي فر
أتلظى واكتم لي الغيظ الوفر
ينعش ورحي طيبك لو محيك سفر
زي ما بيا أفعل ذنبك مغتفر
لآح لي عيني شخصك والنوم إنحجر
المايك تملّى ودون خاطري إنفجر
من فولاذ قليبك وكبدك من حجر
ما أحلاك حبيبي إن زر أو هجر
شادي الحفلا طنّا والأكليل سفر
والنشاب توتر لي الفاتر غفر
ظبي الريم تبختر وبي الأساد ظفر
ومعنى الفلة كاين علي واحد نفر
الكتف المهدّل والجسم أنتبر
والصاد والمزمزم والغيم والمطر
والضهر المتنّى والتيه الأبر
دا الخلاني ساهر فوق عيني دبر
لآحم كتفو كفلو وماتجد العفر
أمم ديسو درعو وفي بعضو إنضفر
هاتي الغيم تعرجل يا سمح النفر
قول لي الوزة عومي الفي عينيك ظفر
| |
|
|
|
|
|
|
|
|
|
Re: الغوص في نقش الحروف .. أبقى منجم (Re: خالد علي محجوب المنسي)
|
الناحر فؤادي ومولع جوفي حر
أضرم نار وجدي نسام السحر
دامع لجَّ طرفي يا باو طرفاً سحر
والبسم المفلّج لي الأكباد سحر
ماببرد حميمي لو أحسي البحر
داري وماكا داري يلسمح النحر
في يوم النحر ينحر المسلمون يضحو بضحياهم ويسيل دمائها
والناحر فؤادي اي الذي أسال دم فؤادي بحبه
والغريبة ما كان ايامها (اعني ايام نظم ) هذه القصائد حب كما نعرفه الآن
يبوح فيه كل محبوب لحبيبته ما يكنه قلبه لها وتبوح له سرها وحبها في حياء وخجل
كان المحبوب ايامها مرامه ان يلفت فقط نظر البنية التي يهواها قلبه وكفى ...
تترصد هي مروره وطلته وفقط تراه هذا زادها ليلالي تجافي الرموش والعين تأبا الغميض
وتظل سهرانة تهاتي النجيمات البعاد وتناجي قمر اربعتاشر
يا القمرا
يا القمرا
أقلبي السنسنة الحمرا
وشوفي حبيبي
ليه ماجا
الليلة وين
البي العصر مرورو
ونسام السحر والناس نيام هاجعين من تعب يوم طويل تجافي جنوب العشاق مضاجعهم
والرشرش يصبح مفروق ( وهي الساعة التي يطلق فيها ابليس جنده يتفرجخو في صدور
البشر يزيدون علي النومة تعسيلة حتى تفوتهم صلاة الصبح ) والغريبة هي الوقت الذي
تجافي جنوب العشاق رقدتهم وفهل لأبليس يد في ذلك شكيتو علي الله
| |
|
|
|
|
|
|
|
|
|
Re: الغوص في نقش الحروف .. أبقى منجم (Re: خالد علي محجوب المنسي)
|
أحذروا يا أحبّا.. حب الريم خطر
يكفي البيّا حاصل .. ياحالي انفطر
وقيل أسأل مجرب وما تسأل طبيب
زمني كلو كنت بقول
لا تملك الحسناء قلبي كله
وإن شملتها رقة وشبابُ
أجري ولا أعطي الهوى
حق مقودي
أهفو ولا يخفَ عليَّ صوابُ
وأنا الكنتا بنم واجر
جني جن الزول يقول عاشق فلان وينقسم نصين
وجني جن عاشق مباغت يبكي بي فرد عين
لكن حب الريم خطر
يسوقك لي البحر وتجي عطشان
وبعدها السهر والسهراجة حمي تهرس فوقك
وتجد نفسك سابح في الضياع والحسرة
والسنين تمر
وهو المحبوب في دلالو ساهي ولاهي ( جبروت الجبابرة )
ومين بقول البغلة في الأبريق
وحب الريم خطر
| |
|
|
|
|
|
|
|
|
|
Re: الغوص في نقش الحروف .. أبقى منجم (Re: خالد علي محجوب المنسي)
|
شادي الحفلا طنّا والأكليل سفر
والنشاب توتر لي الفاتر غفر
ظبي الريم تبختر وبي الأساد ظفر
ومعنى الفلة كاين علي واحد نفر
القصيدة نظمت وكانت ردة فعل لأحساس جميل غمر الشاعر
عندما أنبرت جميلة في حفل لترقص
وايامها كان الرقيص رقبة تحاكي فيه المرأة عوم الوز
شادي الحفلة طنّا
اي المطرب بدأ يشدو بغنائه
ظبي الريم تبختر
ايامها كانت مافي بنت بتقوم ترقص براها تقدم لها الدعوة من أخوات العريس
أو من الشباب اصحاب العريس وعادة تكون العملية منتظمة اي كل اغنية برقصو اتنين
وكانت المرأة بتقوم من مجلسها حتى تصل السبات وتكشف عن مقنع رأسها ( التوب )
وتبدأ في الرقيص
وهذه الفتاة عندما تبخترت متجهة إلى السباتا ويا بخت السباتا البتلامس قديماتا
ظفرت بقلوب الأسود الوقفة وصرعتها
وكانت وكأنها الفتاة الوحيدة في الحفل اي جذبت كل الأنظار لها وفازت بقلوب الحضور من الشباب والشيبة والجمال جذاب ولا يقاوم
| |
|
|
|
|
|
|
| |
خالد علي محجوب المنسي
الطيب شيقوق
فيصل محمد خليل
أبوبكر أبوالقاسم
حاتم هاشم
فيس بوك
تويتر
انستقرام
يوتيوب
بنتيريست