|
|
 هل ستنجح الثورة في السودان
|
وانا اتابع الشأن العربي وكيف ثار الشعب التونسي الذي كان يدخل المسجد ببطاقة للصلاة وكيف ثار الشعب المصري الذي زلته اجهزة امن الدولة لدرجة الركوع وكيف ثار الشعب الليبي الذي علقت له المشانق داخل الحرم الجامعي
لكن لماذا لم يثور شعب السودان الذي جوعته الانقاذ لدرجة الشحدة وسحبت منه الكرامة والعزة التي طالما تفاخر بها
المواطن السوداني الذي اذا سافر للخارج لايستطيع كفيله ان يشخط في وجهه لانه يعلم تماماً انه سينال علقة معتبرة
لم يأتي السوداني كبقية الشعوب بحثا عن لقمة العيش
وانما اتي للبحث عن وضع افضل
لكن ماحدث في عهد الانقاذ جعل السوداني من يعامل في بعض دول المهجر كعبد لكفيله او مخدمه يحكي لي احد الشباب انه لا يستطيع الا ان يصمت علي اساءات كفيله له فلو تحدث بكلمة او رد اساءة لكفيله طرده واخرجه من العمل وهو الذي تعتمد عليه اسرته كلها في المعيش فجميع اخوته عاطلون عن العمل والذي وجد منهم وظيفة حكومية لايكفي مرتبها للبقاء اول يومين من الشهر لسد رمق الأسرة الكبيرة هكذا حال معظم الأسر الآن عبارة شخص واحد يجر خلفه ترلة من الأخوة والأخوات والام المريضة والأب المعاشي او العاطل عن العمل
-كان هذا سؤال طالما ارقني وكل ما التقي بشخص اساله لماذا تبقون في اماكنكم لماذا لم تخرجوا للمطالبة بوضع افضل طالماانكم تعانون الأمرين كانت هذه هي اجاباتهم:
-الحكومة دي مافي احسن منها
-نطلع عشان يمسك البلد منو فلان والأحزاب الحرامية ديل
- يجو ناس جداد يبدو ياكلو من الاول اخير لينا الناس الشبعو ديل اهو مرة مرة كدا بدونا معاهم
- ياخي حالنا بقيف وكان مبارك اخد ليه طمتاشر يوم البشير دا بياخد ليهو سنة وانا صراحة وليداتي ديل لو مرقتة ماف زووول بياكلهم لي
- السودان ظريف بس عايز مصاريف
- والله لو في زول بطلع انا اول واحدة راجلي في المعاش والمدارس القالو مجانية هدت حيلي وبعتا الوراي والقدامي عشان اقري وليداتي واسي تراهم اتخرجو واحداً فيهم اشتغل جا مسكني مرتبو ماف مساكين من ضل لي ضل ومن قدح مونة لي باب حافلة شغالين الشغلات الهامشية دي ترا اريتني لو وفرتا قروشي عندي
- اسي قول طلعنا والبشير استقال اها البمسك دا عايز ليهو كم سنة عشان يفهم الحاصل شنو ويصرف لي معلمين ام دافوق مرتباتهم الماتصرفت من شهر سبعمية دي
- المية جنية القالة البشير طلعت كلام بشير ساكت اصلو متعود علي الكلام الساكت لي يوم الليلة ما ادونا ليها لكن لي شهر اربعة لو ماذادو المرتبات دي انا طالع طالع
- انا مع البشير دا ولا بطلع ولا بشيلي حجر ضدو
- البشير دا عدو امريكا واسرائيل الاول وراجل مسلم بحق وحقيقة ولي امر المسلمين لو عايز تغيرو تجيب من بدلو مثلا ياسر عرمان
-البشير منتخب وانا بذات نفسي مشيت صوت ليهو وللشجرة يعني لو في زول مفكر يغيرو يصبر للأنتخابات الجاية
-والله انا مفكر اطلع مع ناس الحايطلعو ديل
-البشير دا زول كويس ونيتو بيضا بس الناس المعاو ديل حرامية اولاد.......
-والله كدي الناس تتطلع انا زاتي بطلع
-عليك الله شوف مصر وتونس واسي كمان ليبيا وحالت الفوضي الفيهم دي دحين نطلع ونملا البلد حرامية ومجرمين ونخربة علينا بعد الأمن النحنا فوقو
- الحكومة الايامات دي قايمة علي الفساد والمفسدين والحكومة فهمت حاجة والسعيد البشوف الشقاوة في غيرو
وكل ما القة اجابة جديدة بضيفة هنا
|
|
 
|
|
|
|
الطيب رحمه قريمان
فيس بوك
تويتر
انستقرام
يوتيوب
بنتيريست