|
Re: الباوقة, سحر, وجمال, ومصير مجهول ... توجد صور ... (Re: حاتم الياس)
|
Quote: يا حاتم الياس ستين مرة قلنا ليك غالبية ناس الباوقة مش ختمية انما قادرية قادرية (كدباس) |
والله يا عبد الواحد انا ما عارف ليه حاتم مكنكش في حتى الختمية دي !! قبل كدا قلت ليهو اهلنا ( الملاحة ) ديل ناس قادرية زي قولك دا ... لكن وقت صوتوا خاصة في الاستقلال صوتوا للوطني الاتحادي وليس الشعب الديمقراطي - السيد علي الميرغني - يعني من يومن ناس صفوة وكدا -- الكلام دا تلقيتو مباشرة من الجد الطيب يس والجد الفكي حسن عليهم رحمة الله جميعا والد خيلاني ناس قمر الفكي و مبارك الفكي وبرضو سمعتو من الخال عثمان الجعلي الله رحمة ونور عليه وكتير بقعد معاهم يحكوا لي عن فترة الاستقلال وتكوين وتاسيس مشروع الباوقة تلقيته مباشرة من العم المرحوم هواري الماحي الف رحمة ونور عليه ومن جدنا عبد الباقي زين العابدين وحامد زين العابدين وهرون الكندو والاستاذ بكري سعد كنت احرص شديد في اجازاتي على الجلوس مع كبار السن فاستفد منهم كثيرا ولكن للاسف الشديد لم اوثق منهم في تسجيلات صوتية املي في ان اجد من يقوم بهذا العمل قبل ان يضيع تاريخ بلدتي خاصة بعد ان حاصراها اعداء الانسانية والجمال كهنة الموت مصاصي الدماء من كل صوب وحدب ... الاستاذ قريبي عمر المكي من خيرة شباب البلد - لو ما اعترض حاتم على شباب دي - حافظ على عبقرية من سبقوه في حفظ الانساب وتاريخ البلد يا ريت لو قدرنا نشركو في البوست دا وشد حيلك معانا يا ود الياس
.
Quote: الحبيب محمد الحسن العمدة طبعا حاولت اتعرف عليك كثير لان اهلى جيران اهلك ولكنك ... مشغول
بحزب الامة والسياسية المهم يا سيدى انا جدى سليمان مكى الحسن - التكاوين - شمال جامع التكاوين
المقابر . |
قريبي عبد الواحد ازيك واخبارك غايتو اليوم الانا ابطل فيهو تفكير في حزب الامة بضبح جمل عديييييييييييييل كدا
كيف لا اعرف اهلي ناس هاشم سليمان والمزواج معتصم يا ربي لي حسع يكون عمل كم ( وجه ضاحك ) معتصم سليمان مكي على ما اعتقد انه اول من اسس بصات سفرية بين الدامر والخرطوم الرجل صاحب نضم وراسو مليان شديد ولا تكل ولا تمل منه قابلته في مدني ايام الجامعة عندما حل ضيفا على العم والخال والاخ والصديق ( الاسلاموي الكبير اوي اوي ) عبد القادر محنن ود حنونة هذا الرجل هو الاخر قمة في الوعي والفكر وكثيرا ما عقدنا المناظرات بعد كوتشينة الجمعة وانفضاض اهل البحوث اصحابه من حول الطاولة الرجل رغم كوزنته الا انه والشهادة لله رجل امة تختلف معه ولا تملك الا وان تحترمه وتجله .. هؤلاء هم ناس الباوقة الذين نعرف ...
كدي يا عبد الواحد نتمو بالماسنجر ..
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: معاوية المدير)
|
Quote: سيف النصر محى الدين..زراريق وطيباب الجرانيس قريبى لأمى المسافر أبن عمة لى بالصقورة أهل والدى وقريب للنقراب أهل أمى بجهة النواب محمد حسن العمدة منهم جدتنا حسنة بت النقر وجده الفكى حسن وهو ودعمد (التكاوين ) ومافى حاجة مزعلانه منو اٍلا أنه صوت قوى لحزب الأمة فى منطقة راسخة فى ختميتها يعنى ياناس حزب الأمة شوفوا ليكم دايره تانية نزلوا فيها ود العمدة
المدير أبراهيم محمد حمزه أبراهيم ودحمزه الكاسر (حمزياب) وهم عمد الباوقة وأظن أن زياد ومعاوية هم أحفاد العمدة عبدالله ود أبراهيم..
لقيتونى كيف (نسابة فى عصر الأنترنت) مالم يصصحح المسافر المعلومات.. |
يا حاتم الياس مالك داير تسوي "النسابة" بدعة في عهد الانترنت..يعني ما بتلموا و للا شنو؟
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: معاوية المدير)
|
Quote: معاوية الحبيب اهلنا فى بربر شايلين الهم انه حالهم يميل والبيوت السيل يشيلا من واقع سد الشريك يعنى السدود دى محلها الا فى الشمالية ؟ وليه المناطق الاثرية المناطق المنتجة ؟ من المشاهد الشفناها فى البوست دا تحس انه فى حاجة غريبة بتحصل فى البلد فى استهداف للتاريخ والجغرافيا وفى استهداف للبنية الديمغرافيه للسكان استغرب لماذا الان كل هذه الهجمة على مناطق الشمالية؟
فى حاجة ما قادرة ولا دايرة تدخل راسى
مع ذلك اقول بدلا عن السدود والباوقة اكثر ما تحتاجه مصنع لتعليب الفواكه وليس سدا يشيل خيرها |
أختنا الحبيبة سلمى... أوَل حاجة مرحب بيك وسط أهلك ناس الباوقة... الحكاية ما واقفة علي بربر بس, إتصلت بعمدة الباوقة تاج السر إبراهيم, وقام بتوضيح نقاط هامة ساصيغها وأقوم بإضافتها, أبقي قريبة... ياسلمي حكاية كهرباء السدود دي إنتهت, وبمناسبة السدود في منطقة السدود أعشاب النيل مآصة النيل مص, يعني مافي طريقة يتم التخلص منها وتتولد كهربا من هناك؟؟؟ يا سلمي بتتذكري مطار دنقلا؟ السيد الرئيس في الإفتتاح قال لناس دنقلا: عشان أولادكم المغتربين ينزلوا في دنقلا طوالي؟؟؟ يعني المغتربين ديل في دنقلا بس؟ ماكان ممكن يكون في عطبرة أو أي مدينة أخري؟؟؟!!! الباوقة محتاجة للكثير, لكن في محاولة للضغط علي الأهالي حتي يرحلوا مرغمين... القضية ليست قضية سد ولا كهرباء. السؤال: لمصلحة من يعمل هاؤلا؟؟؟
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: nourelhadi awad)
|
Quote: " ... برضو اسأل عن خريجين معهد امدرمان ..ووثق ليهم لانهم كانوا بمشوا الى شندي بالارجل عشان يطلبوا العلم... " . |
الأخ الحبيب منوت... بعد السلام... ياريت لو كان في زمن كنت فتشت الجماعة ديل , وجيتكم بالخبر اليقين, لكن الإجازة كملت, وياريت يستلم الراية واحد من الداخل...
تقبل سلام أهل الباوقة...
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: معاوية المدير)
|
Quote: هل هى صدفة أن تنجب هذه البلد الجميلة
الشاعر الحسين الحسن الشاعر تاج السر الحسن الشاعر والصحفى فضل لله محمد والأديب على المك (نصفه أمدرمانى لأمة وأبوه هيلنا ) والصحفى عبدالواحد أبراهيم..(خاتيك معاهم ساى ياعبد الواحد ماتصدق) |
معقول يا حاتم تنسى الفنان الاستاذ العم صديق الكحلاوي ؟؟!!! وتنسى مرشح رئاسة حزب الامة محمد حسن العمدة ؟؟! ( صدور منفوخ ويد متضرعة )
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: محمد حسن العمدة)
|
Quote: وتنسى مرشح رئاسة حزب الامة محمد حسن العمدة ؟؟! ( صدور منفوخ ويد متضرعة ) |
إضرَع سآكت يا ود العمدة, وما تنسي: المرحوم أحمد عثمان المكي, ومحمد يوسف محمد, وعجيب عثمان عجيب, والأساتذةالأجلاء عليهم رحمة الله عمنا هواري, وأحمد عبده. رحم الله خالنا حسن مصطفي المدير, الوقَف قطر الرئيس عبود في حادثة فريدة من نوعها...
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: حاتم الياس)
|
حاتم الياس:
Quote: المدير أبراهيم محمد حمزه أبراهيم ودحمزه الكاسر (حمزياب) وهم عمد الباوقة وأظن أن زياد ومعاوية هم أحفاد العمدة عبدالله ود أبراهيم..
لقيتونى كيف (نسابة فى عصر الأنترنت) مالم يصصحح المسافر المعلومات.. |
لقيتك كدا لكين ياحاتم بالحيل ... جدودنا كانوا عمد و ملوك...و نحنا هسع نتفرج على بلدنا بغرقوها .... المخير الله!
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: معاوية المدير)
|
Quote: الأخ زياد, إعتقد إنك في السودان ووالله أنا من الأول لو كنت عارفك كنت وصلت لعندك, |
هو أنا يا معاوية كان كنتا في السودان ... عليك أمان الله ..كنت بخليك تفوت فوقنا ساااااكت كدي!!!!... ياريت...والله ياريت لو كنتا في السودان...ترانا...نطفي نار الشوق بي جنس صوركم دي...البركة في سودانيزاونلاين دي! ناوي يا معاوية...و النية نية الله...ناوي انزل السودان نهاية السنة دي بأذن الله..
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: محمد حسن العمدة)
|
معقول ياود العمدة ماعارف الكارب وين..تجى وتقعد مع ناس ودلول ووالجعلى ود السيد وجون والراجل قاعد فى الكيايه جنب ناسكم..الكارب متزوج بت عثمان النقر..خلى اليرجع ليك هديماتك ونعلاتك..وأنا محمود ودالبرعى طالبه (غرقه) غرقنى ليها فى بدايات تعليمى العوم وبديت (أطلق الطين) أخدت ليه شقه صغيره وجيت فتران داير اقيف فى الحجره..دفرنى رجعنى تانى..وجمبلغ غرته وبقيت أرفس فى المويه وأدافر للطلعة وهو يضحك ويعاين لى..وتانى قام جبدنى للحجرة وهاك ياسب دين وشتيمة منى...(الوكت داك سادسه أبتدائى يعنى مرفوع عنى)..المهم دى كانت مبادئى تعليم السباحة وكورس مجانى على طريقة (جون) محمود ود البرعى...
والجمال والذوق فى المخازن فوق..
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: حاتم الياس)
|
Quote: تمرت الدرب حتت والضريسا ملت البوغة والقرتي وأم سيسي وخشم البنات والبياض بقت حراويل ساااااااي والدوم بقى مر ضانقيل لعب جوهال إماراسك واللا البلي راس الجزيرة زي قعرا والسدر جحور صبرة وعشوش القمري سكنا البوم |
دغشا بدرى فوق المشرع المصيوب لقيتها هناك واقفه تصارع الآلام قلت سلام قالت لى مرحب بيك كسر دفارتى عاتى الموج وقصر أجلى عرقا خاوى والهدام بقيت يا الله أمسك...فى بعضى وأتلملم أكان أقدر أشابى وأقوم يا ولدى الزمن ماراح زمنكم هادى شوم وغشوم خلونى الصبين راحوا شالوا البقعه والخرتوم خرابات تمرى تسمع فيها خاوى الريح وصوت البوم حليل الكانوا ناس همه ويقينهم تام حليل الكانوا بصدورهم بصدوا الشيمه والهدام حليل الكانوا فى درك الظلام يتبنوا ويفقدوا الأيتام حليل الكان تقاويهم مصوبره قبله للعدام آه أه يا ولدى إيدك جاى كان أقدر أقوم لى فوق ترابة جسمى من زمنا بعيد نشفت وعدمت الماروق وتمرى الكان زمان شامخ وعاتى مواسى روق فى روق صبح ميت نشف يا ولدى عدم التمره والكروق عميرى كمل بعد ما حاسه إنو خلاص نشف دمى حليل زمنى والغناى أغنيلى يجر نمى يا خالى ويا عمى النروح الباوقه اليروق دمى ومن نخيلى إشيلو طرحه ومن لذيذ تفاحى أرمى حليل زمنى هجرونى ولفظونى منو البقدر يشيل همى ومنو الداير يشيل همى
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: معاوية المدير)
|
كدى قول لى إنت منو وجيت من وين جنايا ليك كت فى الغربه لى سنين وجيت الليله أكرف ريحتك وأحضن جرفك الراسى ورزين وحنين أقالد أهلنا الطيبين وأنشد جملة الغايبين يرجعو للديار سالمين يشدوا الساعد المليان يمرقوك يمه من وحل المطر والطين يا ولدى...السواى مو حداث منو البقدر يشق بحرا متسب وطين منو البقدر على الواسوق والسلوكه والكاردين منو البقدر يساسق يوت بين الجول وسام اللمين خلاص أدمنتو عيشة اللين بقيتوا سراب وسجمانين ورمدانين أرقدو عوافى قوموا عوافى نحن ترانا مستورين أقولك قول كدى أسدر فوق وعقب أغشانى لا تنسى
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: معاوية المدير)
|
ودعتك الله يا يمه قليبى عليك من تبيت لا بنساك ولا بقسى وبالدرب التحت شاققت كان فى المدرا إتمسى مشيت ومشيت مشيت وفتر لا حس طير ولا صوت زول ولا فى الواطه شفت أتر يقيت فى شقوقا إتعتر وحاصرنى الغبار والحر وقفت أناشد الفضل من الشرام جناينا بالتمور والمنقه كانت زاخره طول العام دى كانت قبله للعدام وكانت ملجأ للأيتام وناسا كانوا فوق عزا مكمل وتام يخلفو الساق فوق الساق يرقدوا ويكرفوا النسام حواشاتم حواها المشرق الرويان ود لقاى وللعاقو الزمان وجفاهو صوت قمريها كان هداى وطيت قدمو لى ديارا ينادوا الناس هوى يازول تعال بى جاى وقرب جاي هى كانت للبطش هداى وكانت للحزين واساى
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: معاوية المدير)
|
لعرب...من الضهارى بجوها بالنغم الطروب يملوا بالأموال جيويبهم وأغنو من تمر الهبوب بى مرح تقدل جمالهم والسعون مليانه روب ينسوا لفحات السمايم والمعاناة والكروب طيف خيالهم فوقى حايم طفت فى كل الدروب طفت أنشد جملة العابرين وناسا فى السراب داقسين هوى يا ناس وين المتره والحاجاب وسام اللمين وين تنقوره والبيضه وين الكانوا...بعزو التراب والطين وين الكانوا ناسا خلقه مسرورين هوى يا ناس هوى يا ناس ما سامعين لقيتهم فى لا سالين ولا ناشدين وقفت حزين وحزنى حزين وصدى صوتها الحنين ورزين تسرب فى دواخلى أنساب وداعب كل أوتارى وخدر لى أحاسيسى وعزف نغمات بمزمارى حزينه تقول عقب أغشانى ما تنسى كان بتعز صحيح دارى بدور الرجعه ليك يا يمه أدوبيك شوق فى مسدارى لكنى لقيت دروب الرجعه فى عينى ما واضحات وما دارى جرف الخدره فى ربوعك بقى صحارى وحسيت إنو دمع الحسره فى عينى متضارى وسموم الحرقه يوقد فى لهيب نارى ومشيت هايم ألملم من هجير الصى...فى أوزارى وما دارى وما دارى وما داري
اخي نور الهادي عوض... السلام يغشاك وما تطول مننا...
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: nourelhadi awad)
|
Quote: ود المدير عوافي اريت حالك زين شهاني نضمك شيتاتن كتار بالحيل |
بسط تب. نحمد الله...
الكاوياني بنارا باظ عثمان الشيخ شالا...
شديرة المحنة وبليلة البادرابي... وناس الصبرة والباحصين راكبين فوق جمال الطين شالوا البقعة شن دايرين وبهدل رايهن ابراهيم... (ابراهيم ود الكاسر)...
حبك زايد الامنا وجننتينا يا امنة حرام تنسيها ايامنا...
لقيتك قلبك حنين قلت اسرح بيك شوية يا نور الهادي اخوي...
عليك الله شفت البانطون ده كاشح الموية دي كيفن!!!
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: معاوية المدير)
|
اوضح لي احد اهالي الباوقة الاتي:
اولا: ناس السدود قرروا الالتزام بكلام السيد الرئيس. في حين ان ناس الباوقة قرروا تعيين تيم مهندسي مساحة يقوموا بتوضيح الكنتور الذي يخرج الباوقة من نطاق الغرق نهائيا, ويقوموا بتقديمه لهيئة السدود( يعني مستندات دامغة ), واذا رفضت هيئة السدود الالتزام بالكنتور الذي يخرج الباوقة, سوف نرجع للمربع الاول, وهو معارضة السد. علما بان قيام اي سد في الشريق سيطيل الباوقة بالغرق...
ثانيا: هنالك ثلاث كناتير: 34, 45, و49... اذا تم تنفيذ الكنتور 49 سوف يغمر الماء مدينة عطبرة ويمتد حتي منطقة سيدون على نهر اتبرا...
ثالثا: اذا تم غمر الباوقة, والعبيدية, وكدباس, حد السلمة, غمر شامل للباوقة, الكهرباء المنتجة ستكون في حدود ( 420) ميقاواط, علما بانه هنالك مهندسين مشككين في هذه الكمية, واوضحوا بانها لن تتعدى ال ( 315 ) برغم كل الغمر. اما في حالة استثناء الباوقة فسيتم غمر ( 161 ) الف فدان من اخصب الاراضي لتوليد ( 250) ميقاواط...
رابعا: اذا تم الالتزام بالكنتور ( 43 ) ونفذ, سوف يغمر الباوقة جزءيا ويصل الغمر حتى منطقة السوق, يعني الباوقة الاصل غتست تب...
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: معاوية المدير)
|
البوست سرب الى أحساس غريب ومحزن...(لكأننا ننعى الباوقة قبل ان تغمرها المياه وتصبح نسياً منسيا)
افو يا ود الياس, ده كلام شنو ده ???
انا غردي من البوست, انو اولا بالتبادي يكون ديوان لينا نحن ناس الباوقة نستقبل فيهو ضيوفنا, ونجتر فيهو الذكريات, ونناقش فيهو قضايا منطقتنا...
وكمان نناقش فيهو موضوع الغراق زاتو, ونقيف مع اهلنا الكلهم تقريبا رافضين الغراق, والحمد لله الذي انعم علينا بهذا المنبر حتي نتصدى من خلاله لاي سهام غدر توجه صوب امنا الحبيبة باوقة حمد والامين...
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: معاوية المدير)
|
والله حكوا لي في مشيتي الباوقة الفاتت دي, طفلة من اطفال الباوقة امها قالت لها: الباوقة دايرين يغرقوها! الطفلة سالت: ونحن حايعملولنا شنو?. امها قالت لها: حايطلعونا منها!. الطفلة قالت لامها, لكن يمه نمرق نخلي جدي يغرق?... ( جدها مات ومدفون في مقابر الباوقة )...
البنطون ده داخل الباوقة. يا اخوي ود الياس اطرد الشيطان من قلبك وابقى راكب...
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: معاوية المدير)
|
Quote: البوست سرب الى أحساس غريب ومحزن...(لكأننا ننعى الباوقة قبل ان تغمرها المياه وتصبح نسياً منسيا) |
أعترف انو والله جاني نفس الأحساس مشيت للحاجة..ربنا يديا العافية..و قلتا ليها:(عايني يا أمي صور الباوقة..يمكن تكون دي صور توثيقية قبال ما يغرقوها) والحاجة من بربر لاكين حزينة جدا لأهل الباوقة و أراضيهم و نخيلم.. ... بالمناسبة يا معاوية..أبوي قال رايح الباوقة في اليومين ديل...يمكن تلاقيو
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: زياد جعفر عبدالله)
|
Quote: بالمناسبة يا معاوية..أبوي قال رايح الباوقة في اليومين ديل...يمكن تلاقيو
يا زياد, ان شاء الله ربنا يجمعنا في ساعات الخير, وفي الباوقة.
اذا انهزمنا نفسيا تبقي مصيبة كبيرة, عشان كده نحن ما دايرين اي جهة تهزمنا نفسيا او على ارض الواقع, وزي ما قلت ليكم البوست ديوان نتونس فيهو ونناقش فيهو هموم منطقتنا واهلنا. امسح دموعك يا زياد, ونحن ما عاش راجل يخلي دموعنا تسيل فوق خدودنا, والداير دمانا تخضب نحورنا اليجي...
كنت اتمنى اقابل الوالد, لكن انا الان في كندا مدينة كالقري...
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: معاوية المدير)
|
سلام يا أهل الباوقة سلام..
شفت بالحيل خضرتكم و تموركم و زراعتكم و بلدتكم السمحة..
وجاني سئوال إيه الأهم .. الكهربه ولا البلاد العامرة بي خيراتها..!
يعني إيه ينتجو 315 ولا 415 ميغا ويغرقوا كل المناطق الجميلة بي تاريخها و خيرها.. هذه ليست تنمية بل تدمير ...! لو كان الغرض أصلآ كهربة فما أسهل و أرخص من إقامة المحطات الكهربائية الجاهزة.. وثانياالناس ديل عايزين ينتجوا 400 ميغا لشنو ولمنو.. دي كمية كبيرة خلاس إلا إذا قرروا عمل مفاعلات نووية في الشمالية.. اللهم لا تتم مرادهم بجاه نبيك محمد لا تتم مرادهم ..
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: malamih)
|
Quote: اللهم لا تتم مرادهم بجاه نبيك محمد لا تتم مرادهم .. |
اللهم آآآآآآآآآآمييييييييييييييييييييييييييييييين اللهم آآآآآآآآآآمييييييييييييييييييييييييييييييين اللهم آآآآآآآآآآمييييييييييييييييييييييييييييييين اللهم آآآآآآآآآآمييييييييييييييييييييييييييييييين اللهم آآآآآآآآآآمييييييييييييييييييييييييييييييين اللهم آآآآآآآآآآمييييييييييييييييييييييييييييييين
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: ود الباوقة)
|
Quote: Quote: اللهم لا تتم مرادهم بجاه نبيك محمد لا تتم مرادهم ..
اللهم آآآآآآآآآآمييييييييييييييييييييييييييييييين اللهم آآآآآآآآآآمييييييييييييييييييييييييييييييين اللهم آآآآآآآآآآمييييييييييييييييييييييييييييييين اللهم آآآآآآآآآآمييييييييييييييييييييييييييييييين اللهم آآآآآآآآآآمييييييييييييييييييييييييييييييين اللهم آآآآآآآآآآمييييييييييييييييييييييييييييييين |
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: Osman Musa)
|
Quote: وجاني سئوال إيه الأهم .. الكهربه ولا البلاد العامرة بي خيراتها..!
|
اخيmalamih...
الناس ديل عاملين بمبداء, البلاد بخيراتها تطير, والمقصود ليست منطقة الباوقة وحسب, انما يجب اخلاء الشمالية برمتها, هنالك مؤامرة تحاك. لمصلحة من? الله اعلم...
اهلا بيك في ربوع الباوقة اخي malamih...
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: حاتم الياس)
|
Quote: طبعا دى معلومات من زول ود الباوقة صاح لكن مولود فى الدايات أمدرمان (لاسقنا) قبل كده لاجاتنا (سلكه) لكن السبيرتو جربناهو هههههههههه يعنى زى ود العمده ده ود مدن .. (عدل بواسطة حاتم الياس on 23-07-2009, 02:21 م) (عدل بواسطة حاتم الياس on 23-07-2009, 02:26 م
|
والله يا ود الياس, السبيرتو ده كان يلصق الرقعة في اللستك ما يفكها الا الجليل الرحيم, الكان جابرك عليهو شنو??...
شايفك عدلت مرتين, غايتو الاولى دي تبقا لي سنر, علا التانية دي ما عرفتها?. بعدين (السلكة) بفتح السين طبعا, مالك ما شرحتها, والا راجي ود الباوقة يجي يشرحها??...
قعدت تضحك يا المطموس مو كدي??...
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: طارق جبريل)
|
بالمناسبة يامعاوية المدير (ودالمدره) حقو تخت أيميلك أو اى أيميل خاص لمشاركة المتابعين من خارج الموقع..
ياود العمدة يقول ليك الزول ده (سايق البوغه) ومنها سواقة ويسوق اى يزرع ده اٍذا ماصححنى أيضاً المسافر..
السلكة بفتح السين أوربما كانت (الصلخة) ..ودى ماعاتق ود الباوقة من شرحها تب.
| |
|
|
|
|
|
|
Re: الباوقة, سحر, وجمال, ومصير مجهول ... توجد صور ... (Re: معاوية المدير)
|
Quote: والله كانت سعادتى كبيرة بالتعرف عليك . أنشاءالله تكون وصلت الى البرتا شديد . |
اخي عثمان, بمجرد قعدتي جنبك حسيت كاني بعرفك من زمان بعيد يمكن عشان منطقتكم قريبة من اتبرا, ويمكن نكون اتقابلنا في سوقها العامر...
بحمد الله انا الان في البرتا. اذا كنت وصلت الى نيويورك, تلفوني في البروفايل عليك الله اتصل خلينا نتواصل...
| |
|
|
|
|
|
|
|
| |