ما في ممثلين في السودان نهائي للأسف وحقو يبطلو عوارة ويقيفو لحدي هنا!

Quote: ماسورة ساكت

Quote: زمان قلنا ليكم الكلام ده .................... إنه فى حاجتين غلبن شعب السودان الكورة و التمثيل وبرضهم مصرين أكيد فى حاجات تانى كتيرة حيكونو فيها كويسين وأحسن من الباقين لكين نسوى شنو عاد مع العوارة وعدم العرفة والفاقد التربوى

Quote: ظل الإبداع السوداني حبيس قمقم المحلية لزمان طويل،ولا يزال يعاني من انقطاعه عن المجالين العربي والدولي، وتمت مناقشة هذا الأمر كثيراً واتفق الناس على أن أول أسباب هذه العزلة هو ضعف إعلامنا لأن الغناء في السودان جيد ويحمل قيماً مفقودة في الغناء العربي خارج السودان ولدينا أصوات نادرة وتوشح الموسيقيون السودانيون بالعلم والدراسة مما أعطى الأغنية السودانية أبعاداً جديدة، وينطبق الكلام على الدراما في السودان والتي لا ينقصها سوى تعوّد الآخرين عليها وتفاصيل أخرى يمكن تعديلها وعلى رأسها الخبرة التراكمية،ولدينا في مجال الشعر أفذاذ لا يعرفهم أحد إلا بقدر ضئيل،فمتى ينطلق الإبداع السوداني في فضاءات العالمية؟؟

Quote: البوابة » قائمة المنتديات » الشبكة المريخية » الـقـسـم العــام حال الدراما في السودان..لا يوجد تمثيل.. نجم صاعد مكان: امدرمان إذا كان كبار الممثلين زي علي مهدي وفرمالتة الوحيدة (مبروك عليك الليلة يا نعوما).. لازم يبقى صغار الممثلين لازم يبقوا زي العبر البنشوف فيهم ديل.. معقولة لا موهبة لا قصة لا سناريو لا إخراج لا سجم رماد.. اي مواطن سوداني ما درس تمثيل ولا يحزنون ممكن يقدم أرقى من العوارة البتتقدم دي.. اي شي اشتر من التاني .. الممثل اشتر من الممثلة وموقع التصوير زي الخرابة وبعد دا تلقاهم مخلوعين زي المامكلمين سيد المكان وعاوزين ينتهو سرعة سرعة ويقومو جارين... واي لقطة لازم يصحبها كمية من التفكير العميق تلقى الواحد ولا الواحدة عامل فيها سرحان وهو يكشف للكاميرا بطرف عيونو (المقضيات ومحمرات) وبعد شوية يشيل نفس ويتكلم بصوت عالي مع نفسة (معقولة امشي اقوليها واوريها شنو كدا ما عارف) دي براها نص القصة والباقي جملتين واحدة فيها (بالمناسبة) (بالمناسبة دي) عبارة ضرورية في كل الدراما السودانية يعني اتنين ساكتين مجرد ما ينطقو يقولوا بالمناسبة ولو بيتكلمو من غير مناسبة يقولو بالمناسبة.. قصص كلها خيال مسروق واريتا لو مسروقة كاملة وكلهاما عندها علاقة بواقعنا العايشين فيه.. لا وكمان جابت ليها ظرافة الايام دي.. تمثيلية ولا حاجة كدا اشبة بالتمثيلية اسمها الحوش ولا الحوش الكبير لقيتا بالصدفة قلت اشوف ايه اخر التطورات.. في نهاية القصة اللامعروفة تراجيدي ولا كوميدي اولاد الخالات وبنات الخالات بيتهاظروا وجنس عباطة لو ما صايم وخايف اجوع زيادة كان طلعت الباقي في بطني من حلو مر السحور.. لكن بعد دا لمن سمعت حوار واحد من العاملين (عليها) يعني العاملين في مهنة الانتاج الدرامي وأنا قاعد بالصدفة اشرب شاي في وقت متأخر قبالة قناة الخرطوم الدولية عرفت السبب وبطل العجب... بالموبايل واحد منتج بصوت عالي قال يا اخي انتاج ساي كلفتنا (مليون جنيه) طبعا بالقديم .. صراحةأنا ماسألته لكن كل الجو الحاصل بيوحي ان كل الانتاج الدرامي السوداني من خراب سوبا للان ما كلف مليون جنيه بالجديد... نسيت كمان دا كلو كوم والبودره كوم.. يعني ما معقولة زول لونو زي حلاتي يضربوه بدرة (بيجي) موبالغة لكن يعني مفروض بعد داك يدوه معجون وصنفرة ويركبو ليه جرايد ويرشوه بوهية ويدخلوه فرن..حتى يسلمونا ياهو في الشاشة وبعد دا ممكن نقبل وممكن نفتشو ونقول يفتح الله دا عامل حادث قبل كدا!! وكمان مالين الجرايد قال ايه قال ما حيمثلو في مهرجان شنو كدا ما عارف في مصر لانهم عندهم مشاكل شنو كدا ما عارف.. غايتو يا ممثلين السودان عايشين الوهم ساكت وحقو تركزو علينا نحن وتنسوا المهرجانات لاننا مجبورين على المغسة لكن الناس التانين ذنبهم شنو؟ كويس ديل كوم والارقوزات الطلعو لينا موضة وبقوا يسترزقوا من السخافة والتقليل من شان البشر.. ناس واحد رباطابي وواحد هدندوي وتقليد اصوات الشفع باصوات زي اصوات الحشرات والعوارة الكرهتنا العوازيم دي.. لكن ديل على الاقل عندهم الناس البيضحكو ليهم..سبحان الله. ما في مشكلة يا شبابنا الممثلين والناوين يمثلو والحاسين باي موهبة يعني لو حانين على حالنا وكيف حا نعيش من غير تمثيل ..كتر الله خيركم انسونا كدا نحن باقي عمرنا دا بنتمو مطالعة.. عشان ما الواحد فيكم يكبر (في السن) ويجو يقدموا لينا (الممثل الكبير فلان) ويا استاذ فلان ويا استاذ فلان احكي لينا عن تجربتك والله نخش جوة الشاشة ونحكي ليكم عن تجربتنا نحن بلد كلها خبراء وممثلين كبار ساي