|
Re: بس .. أدخل .. عليك الله (Re: ممدوح أبارو)
|
( الله يأذاك .. يامقطوع الطاري ) وهي دعوة مركبة ... في البداية الله يأذاك وحتى لو شالك ومت مافي زول بطراك أصلك نكرة ومنسي
بالمناسبة المنسي دي ذاتا ما اسمي ... ما تجيني ناطة هسي سلمى سلامة
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
Quote: يعلقوك من من لسانك ولا أقول ليك يعلقوك قرد من صلبك |
الله يجازي محنك يا أبارو
مرات يا أبارو تجي بكل بساطة وبراءة لواحد أسمو خلف الله أو خليفة وتقول لي السلام عليك يا خليفة يرد ليك
( إتخلفن فوقك العصي )
| |
|
|
|
|
|
|
Re: بس .. أدخل .. عليك الله (Re: الطيب شيقوق)
|
في أيام الجهل مرات تكون بتلعب براك ومزاجك رايق وتنقر في باب ولا في لوح خشب فجاءة لا يدك لا كراعك تجيك دعوة ...
( يا ولد ما تنقر ينقرك الضرس )
وأمانة ما مزعجة نقرة الضرس تخليك معلق بين السماء والأرض وما عارف تحكو كيف
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
وبسم الواحد الأحد نبدأ صفحتنا الثالثة ونصلي ونسلم على أشرف خلق الله محمد بن عبدالله صلى الله عليه وسلم أخواتي وأخوتي لكم الأحترام والتقدير أعلم أن الكثير منا قد يسمع مثل سوداني قد يفهم معاني كل مفرداته. لكن قد يستعصي عليه فهم المقصود بهذا المثل.. وأحياناً قد تستعصي على السامع معاني بعض المفردات .. وأحببت رغم أني أعلم علم اليقين أن هذا الموضوع قد تناوله بعض الأعضاء في بوستات أخرى وكثيرة. لكن أحببت هنا أن نأتي مثلاً بالمثل ونشرح ما المقصود منه؟ ومتى يقال؟ ولو رأينا أن هناك من مفرداته ما يصعب على البعض فهمها فلا ضير أن نشرحها .. أخوتي وأخوتي قد يرى البعض أن عملية الشرح هذه مثلا ( ماحلوة ) لكن والله صدقوني وأعطيكم مثال أنا من الناس المهتمين كتييييييير بكل ماهو قديم وعتيد من اللغة. سواء في أمثال .. كلام عادي .. شعر .. وغيره لكن كثيراً ما تصادفني كلمات يصعب فهم معانيها.. ومن هنا أحببت أن تعم الفائدة وكلنا يعرف ( أفتكر الفكرة واضحة صاح يا أبارو ) يلا أبدع لنا كما أبدعت في الدعا على الناس والمناصفا .....
وشكراً كتير لكل من سطر حرف في الصفحتين الأولى والثانية وبسم الله نبدأ
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
الفاضل الحبيب ودالمرتضى تحياتنا يا جميل الروح
وبالذات أبارو التقول درسها في الخلوة
وينك ما مبيّن ؟؟
........ كسرة يا أبوعلي ودالقرشي بجي متين محرقني بوست أتفقنا عليه والله كان إتأخر .............. انت محامي بتجيب خبرها النقط دي
تحياتي وتقديري
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
( الناس في شنو والحسانية في شنو )
وقد نسب هذا المثل للمك نمر مك الجعليين ( ولا علم لي بمدى صحة ذلك ) يقال أنه عندما سمع بقدوم حملة الدفتردار بدأ يستنفر بعض القبائل لنصرته .. وعندما ذهب لشيخ قبيلة الحسانية بنواحي النيل الأبيض وشرح له الأمر وقطع له اليوم الذي هم يتوقعون أن تصل فيه جيوش الدفتردار .. فرد عليه شيخ الحسانية وقال له لو قلت أي يوم غير دا كنا جيناك لكن اليوم دا بالذات عندنا فيهو سبق الحمير ... فقال قولته المشهورة وأصبحت مضرب للمثل ..
( الناس في شنو والحسانية في شنو ) ويضرب المثل الآن لما يكون هناك أمر مهم وترى شخص مهتم بأمر أخر هايف ويترك الأهم
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
( العرجا لي مراحا )
المراح هو القطيع من البهائم
ويضرب هذا المثل للإنسان الذي يفارق المجموعة( أصدقاء كانوا أو رفاق ) بطر أو تكبر أو لأي سبب أخر لكنهم يعرفون أنه بمشي وبجيهم راجع لأنه زولهم وعارفين وواعين دي كويس دي ..
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
هناك مثل أخر قريب في معناها من السابق
لكن يختلف قليلاً ... أن شخص فارقك لسبب قد يكون زعل منك مثلاً كان يتعامل معك لكن لسبب ما. تركك وذهب يتعامل مع شخص أخر فتقول له ....
( الفولة بتتملي والبقارة بجو )
والفولة هي مكان تجمع الماء.
والبقارة هم القبائل المعروفة في غرب السودان التي تحترف مهنة تربية الأبقار وقد أطلق أسم البقارة على قبائل كثيرة وهي قبائل توجد في جنوب كردفان ودارفور . فهي مثل لفظ الأبالة وهي القبائل التي تهتم بتربية الأبل مثل قبائل شمال كردفان ودارفور.
ولا يا شيقوق عندك رأي تاني
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
( دا أمير ودا أمير .. ومنو البركب ليكم الحمير )
يضرب هذا المثل لما يكون في مجموعة من الناس قد جمعهم شئ معين ( اي شئ ) وكل واحد ينظر ويعطي الأوامر ويعمل هو القائد وطبعاً البركب الحمير دا هو الوحيد الرعية ( المسكين ) وهو البقول ليهم المثل حتى يفرض نهجهم هذا
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
قالوا أهل المثل
( العريبي كان إتفلهم بسوي في تِكت سروالو لمبة )
ودي مابقدر اجيب ليها مثل إلا اخوي ودشيقوق
أول ما تخرج وأشتغل محامي من أول راتب وتمّا من أبو أشترى لي لاندروفر ( فيهو جركانات بي الجنبة واحدة لي الموية والتانية لي البنزين ... أصلو اللاندروفر بشرب تقول بقرة ) وبقى حايم بي في البردانة والبلد كلها لواري وأجمل لوري تيمس وبقوم دفرة مركبين لي ريشة نعام في الكبوت..
( عاد مافاكي الحرف ولابد أن يميز نفسو) .. ( فلهمة ) وبعدها سافر للخليج وقوم سوي الكبيرة أشترى لي كرويلا موديل 2000 مكندشا ونزل بيها البردانة وهي البلد أساسا مافيها عربية حايمة لواري تراب من الساعة 12 بقرشو... من السوق بجي ماشي بالخلف وما بعاين ورا ويصل بدون حادث ( أها دي ياها زي زولنا السوا في تكت سروالو لمبة داك )
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
Quote: بالمناسبة المنسي دي ذاتا ما اسمي ... ما تجيني ناطة هسي سلمى سلامة |
انت يا الحبيب قايل يعنى سلامة دا اسم جدى؟ النحكى ليك القصة جدى الله يرحمو سالتو مرة ـ انت يا ابوى سلامة دا اسم جدنا الكبير؟
قال لى ـ سلامةداما اسمه دا(لغم ساكت ) يقصد لقب قال ـ فى الخلوة بلعبو ، قام ابوه الاسمومحمد احمد وقع قال الفكى قال ليهو ـ قوم يا زول سلامةسلامة وبقى اسمه سلامة
اها كان زول قال ليك سلامة قول ليهو السلب الطوال تعرف السلب ؟ يسلم عمرك والزمان ما يدمرك
سالب فؤادى وما عليك
| |
|
|
|
|
|
|
Re: بس .. أدخل .. عليك الله (Re: خالد العبيد)
|
Quote: أول ما تخرج وأشتغل محامي من أول راتب وتمّا من أبو أشترى لي لاندروفر ( فيهو جركانات بي الجنبة واحدة لي الموية والتانية لي البنزين ... أصلو اللاندروفر بشرب تقول بقرة ) وبقى حايم بي في البردانة والبلد كلها لواري وأجمل لوري تيمس وبقوم دفرة مركبين لي ريشة نعام في الكبوت.. |
والله يا المنسي فعلا كلامك صاح ومن يوم اشتريتو كل يوم ماشي السوق لمكتبي اها وكل يوم شكلة نسوان مع الصباح في المقعد القدامي . ومن يوم اشتريتو عيني ما غمضت اجي راجع من الشغل تعبان بعد شوية يجيك الوليد يقول ليك في ناس منتظرك في الديوان وامشى الديوان القاهم عندهم مرة دافرة للولادة عايزين يودوها الدكتور .
| |
|
|
|
|
|
|
Re: بس .. أدخل .. عليك الله (Re: الطيب شيقوق)
|
( الكلب بحذر لي مكان ضرب ضنبو )
اي الإنسان الشئ الذي فيه مصلحته بكون مهتم به شديد ويحاسب عليه
( بحذر لمكان ضرب ضنبو ) .. أن أول شئ يفعله الكلب عندي يتمدد منبسط فوق ضليل بشوف المكان الذي لما يحرك ضنبة بتلك الحركة المنظمة ما يكون فيه زجاجة أو شوك أو اي شئ أخر قد يؤذيه مثلاً فهو حذر شديد في ذلك
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
Quote: انت يا الحبيب قايل يعنى سلامة دا اسم جدى؟ النحكى ليك القصة |
يعني الحال من بعضو تعرفي في واحد صديق أبن عمي القردابي ( عمر ) درس معه في مصر أسمه ( عوض علوب ) واخوانه يحملون ( اسم الوالد علي ) وعوض علوب دي أسم في كل أرواقه الرسمية لآن الداية كانت تعرف فقط أسم الشهرة لوالده ( علوب ) ولما ولد عوض طلعت له الداية الشهادة بأسم ( علوب والده وليست علي كما يحمل بقية أخوانه ) قومي يا الأم من يوم جابو ليها شهادة الميلاد ( وهي طبعاً ما فاكا الحرف .. شيليها بي صمتها وأديها البكما ( دفنتا في الواطا ) مع الدهيبات في علبة وبقية الأروراق المهمة ( عقد الزواج أوراق قطعة الأرض ) أها لما أحتاج عوض لشهادة ميلاده لقى أسمو مخالف لأسم أخونه ( عوض علوب ) ولي هسي ماشي بالاسم دا ....
| |
|
|
|
|
|
|
Re: بس .. أدخل .. عليك الله (Re: خالد العبيد)
|
Quote: اكيد ودالمنسي بعرف السلب بكون نشل من البير لمن ضهرو انقطع
ويقولوا ليك فلان روحو سلبة يعني روحو طويلة بالو طويل |
والله يا ودالعبيد حقيقة العرق دساس ناس قدو وزارعين بصل سالب بس طوالي جريت علي السلب والبير ودرب الوادي يا أخي البنية بت بندر وقاصدة سالب فؤادي وماعليك اي سارق فوادي عنوة
سويتا لي سلب وعاشميق
___________________ بتعرف حبل العاشميق يا شيقوق
| |
|
|
|
|
|
|
Re: بس .. أدخل .. عليك الله (Re: خالد العبيد)
|
Quote: ابوي الله يرحمه كان بناديني يا خالد يا خالد يا خالد
نعم
نعامة تزازي بيك اطرش !! |
نفس الشعور تصدق أبوي كان بناديني برضو خالد خالد خالد في النهاية لما أرد يقول لي ( أخلت دمك ) اي يخلط
| |
|
|
|
|
|
|
Re: بس .. أدخل .. عليك الله (Re: خالد العبيد)
|
قالوا أهل المثل
( يلمهّا النمل .. وياطاها الفيك ) المعنى أي النمل يلم قوته من هنا وهناك ويتعب ويكد ويجتهد .. مرور بس للفيل يكون نازل البحر يشرب موية يعفص القوت ويودي في داهية ( يذهب تعبه هبا )
ويضرب المثل للشخص يتعب ويحتهد ويوفر من المال. وفجاءة يقدر الله أن يحدث شئ سواء فرح أو غيره لاهل أو قريب ويضع فيه جل ما جمع أو يجي حرامي ويسرقها مثلا .. أو اي شئ أخر
| |
|
|
|
|
|
|
Re: بس .. أدخل .. عليك الله (Re: Seif Elyazal Burae)
|
Quote: ان شاء الله تبقي في الارض عرق وفي السماء مرق
وتكون غابة والناس حطابة
قول امين |
سيف اليزل والسيف دُكرَّري تحية طيبة سلام هاشت سعدتنا شبرين لي فوق بزيارتك ومرورك الرائع والله لك من الدعاء أن يناك خير الجزاء من رب العزة ( خير وخيل وصحة وعافية وعقباك الجنة ) قول آمين خليك قريب ونشوفك يا الضو
تحياتي ومودتي
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
( محنّة كُت بلا لبن )
كُت يقصد بها الدجاجة .. ويضرب هذا المثل لما في زول يكون عليك حنين شديد لكن ما بتلقى من ورا شئ ( يعني ما بطلع من عندو يتيم ممسح ) وفيقول ليك دا محنة كُت بلا لبن ... فلو لاحظنا نجد أن الدجاجة وبالذات لما يكون عندها صغار تلقاها سايقاهم وتكتكت تشير لهم لمكان وجود حبوب يقتاتون منها فتراها في فعلها هذا مليئة بالحنية على صغارها .. وبما أن المحنة والعطف تكون مقرونة مع رضاعة اللبن فيقال ..
( محنّة كُت بلا لبن )
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
( جنى الوز عوام )
اي المولود عادة يحمل من أبوه وأمه الكثير من الصفات فلو أبو شجاع كريم هميم شهم تجده حمل منه الصفات. وكذلك من من الأم ____________________________
ماشفتو أولاد شيقوق واحد فيهم فتح محل كمبيوترات بالقرب من كلية الأحفاد الجامعية ( طبعاً الكلية كلها ......
| |
|
|
|
|
|
|
Re: بس .. أدخل .. عليك الله (Re: ممدوح أبارو)
|
Quote: ينتك ولي نعمتك يا سنيح أنا شغال في مقهي إنترنت لكن الليله سحرتني الكهربا عندنا تتقطع اليوم كلو |
أبارو عليك الله خلي المداقرا مع الدبيب دا وشوف موضوع البوست هسي قلبنا أمثال وزي ما أبدعت في الدعاء ورينا فنونك في الأمثال ومعانيها
ولي قدام ومحل رهيفة التنقد .. هييييع
تحياتي ومودتي
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
شكرا ود المنسي علي البوست التوثيقي
هنا بعض الاضافات
لما الواحد يزهجو منو :
تطير ما ترك
المره(المرأة) ام كفوت(ذات الكفل) لاتديك مقوت(ما بتديك تاكل)ولاتخليك تفوت
سوات التابا واليابا(اي الحاجة الحصلت دي يعملها الزول البياباك)
تحبك الشكلوتا(يعني يحبك الشيطان)
يضربك الضريب شقاق العناقريب (الضريب هو الثعبان فيما اعتقد ولاادري ماعلاقته بالعناقريب)
| |
|
|
|
|
|
|
Re: بس .. أدخل .. عليك الله (Re: ممدوح أبارو)
|
Quote: أبارو عليك الله خلي المداقرا مع الدبيب دا وشوف موضوع البوست هسي قلبنا أمثال وزي ما أبدعت في الدعاء ورينا فنونك في الأمثال ومعانيها |
الامثال ال ................ اهلك انت وابارو سجم الرماد بتاعك ده
| |
|
|
|
|
|
|
Re: بس .. أدخل .. عليك الله (Re: عبداللطيف حسن علي)
|
Quote: يضربك الضريب شقاق العناقريب (الضريب هو الثعبان فيما اعتقد ولاادري ماعلاقته بالعناقريب) |
الأخ الفاضل / عبداللطيف حسن لك مني التحايا الطيبة ممزوجة بطعم رائحة مطيرة صابه هسي عندنا هنا ( في كوسوفا ) شكراً كتير على الإضافات المميزة
تعرف كلمة الضريب دي جننتني شديد وتب ما لقيت من يشفي تلهفي لمعرفة معناها هي وكلمة ( الكِشا ) ( تعال يا ولد تجيك الكِشا )
ماعارف لكن مازلت أعتقد حسب مجرى الكلام أنها أفة الخشب ( الأرضة أو السوسة ) وقد تكون الثعبان كما قلت لكن ما علاقة الثعبان بشق العناقريب ... أهلنا ديل ما بقولوا كلام وبس فيه كلامهم حكم وفيه بلاغة وربط شديد بين الأشياء المذكورة وأيضاً قد يكن غائب علينا شئ أن الثعبان له علاقة بالعناقريب والله أعلم
المهم يا سيدي حتى نجد من يأتي بالخبر اليقين نظل منتظرين
ولك مني أجمل التحايا والمودة
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
Quote: Quote: : أبارو عليك الله خلي المداقرا مع الدبيب دا وشوف موضوع البوست هسي قلبنا أمثال وزي ما أبدعت في الدعاء ورينا فنونك في الأمثال ومعانيها
|
حاضرين |
أبارو نحضر يوم عديلك قول آمين يوم تهلل مدني ويزهو سمائها بتقديم ود العزا والمهلا لأحلى صبية عين في الأرض ويد تتناول من خالاتها الضيق رواب لي الخلوة البتعزم وتعزم باشا الضاقو الصي الهاجرو فوق رقاب الضي
تحياتي ومودتي ومنتظرين
| |
|
|
|
|
|
|
Re: بس .. أدخل .. عليك الله (Re: ممدوح أبارو)
|
Quote: اربط مصرانك ولا تشمشم عن جيرانك |
( أربطك مصرانك ولا تشمشم جيرانك )
والمعنى القريب هو أن تصبر على كل شئ ولا تعلمه حتى أقرب الناس إليك وهو الجار وحتى فقرك لا تعلمه خلق الله وأصبر عليه والله يفرج الكرب وهو طاعم الطير تروح خماص وتعود بطان
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
( صيام شهر ولا عزومة اب كشر )
أب كشر هو الشخص السنونو كبار وبارزة
ولكن المعني بها هنا هو الإنسان الغير بشوش ومرحب بالضيوف
ويضرب المثل عندما تريد أن تعبر أنك لا ترجى خير من فلان فلذا خير لك أن تقنع من الأمر ولاترجى مساعدته لك فيه
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
ود المنسي
اها تعال احكي ليك بالحلّ بلة
عاش بلة في زمن الخليفة عبدالله التعايشي بامدرمان و في تلك الفترة كان الخليفة في قمة سطوته وقد سجن معظم شيوخ الطرق الصوفية بامدرمان مثل الشيخ حمد النيل وغيره و كان بلة يعيش في احدى ضواحي امدرمان و كان يسمى بعوير المنطقة وقد كان كثير التردد على مجالس الخليفة عبدالله وفي يوم من الايام حرضه بعض من اهالي امدرمان للحديث مع الخليفة بشأن الافراج عن الشيخ حمد النيل وطوالي بلة زولك و بسزاجته المعهودة قرر مطالبة الخليفه باطلاق سراح شيخو حمد النيل و في احدى مجالس الخليفه بادر بلة بسؤال الخليفه عن مصير شيخه حمد النيل فالتفت اليه الخليفة قائلا بنهرة حادة: قلت شنو يا ولد ؟ فارتجف بلة و فتشعن البحلو من غضب الخليفلة ثم رد عليه بله :و قال "امي بتسلم عليك ثم قال له مكررا امي بتسلم عليك) . فضحك الخليفة - ودى الحلت بلة الله يحلك انت يا الرطاني
| |
|
|
|
|
|
|
Re: بس .. أدخل .. عليك الله (Re: الطيب شيقوق)
|
Quote: اها تعال احكي ليك بالحلّ بلة |
الأخ الفاضل شيقوق شكراً كتير على المعلومة الطيبة
وليتك تبهجنا بجميل الأمثال في منطقة الصعيد
ونكون لك شاكرين والله الموضوع دا بهمني شديد لكن اريد المثل مع شرح بعض معاني كلماته لو كان هناك ما تراه قد يكون صعب فهمها وكذلك ان تعطينا مثال متي يضرب ذلك المثل اي ( الحالة )
وأكون لك شاكر ومقدر
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
( البجيك متشمر .. قابلوا عريان )
متشمر : اي رافع من ثوبه فوق الركبة حتى لا يعيق عليه في الحركة
ويضرب المثل لحالة إذا شخص قصد معك الشر تب ما تلين وتمو معا ( ومحل رهيفة التنقد )
وهذا أيضاً مثل ويقال لما تحول ان تعالج أمر وترى الطرف الثاني تب ما داير يقتنع بي رأيك وفي النهاية تزهج وتقول له يا زول سوي الفي رأسك .. ومحل رهيفة التنقد
والمعنى العام للجملة اي المكان البلي ودائب من الثوب ان شاءالله ينقد ( ينشرط )
| |
|
|
|
|
|
|
Re: بس .. أدخل .. عليك الله (Re: الطيب شيقوق)
|
Quote: أبارو نحضر يوم عديلك قول آمين يوم تهلل مدني ويزهو سمائها بتقديم ود العزا والمهلا لأحلى صبية عين في الأرض ويد تتناول من خالاتها الضيق رواب لي الخلوة البتعزم وتعزم باشا الضاقو الصي الهاجرو فوق رقاب الضي
تحياتي ومودتي ومنتظرين |
إنت إنشاءالله يوم شكرك ما يجي
| |
|
|
|
|
|
|
Re: بس .. أدخل .. عليك الله (Re: ممدوح أبارو)
|
Quote: أبارو نحضر يوم عديلك قول آمين يوم تهلل مدني ويزهو سمائها بتقديم ود العزا والمهلا لأحلى صبية عين في الأرض ويد تتناول من خالاتها الضيق رواب لي الخلوة البتعزم وتعزم باشا الضاقو الصي الهاجرو فوق رقاب الضي
تحياتي ومودتي ومنتظرين |
حنانتا شكارتا
| |
|
|
|
|
|
|
Re: بس .. أدخل .. عليك الله (Re: الطيب شيقوق)
|
المثل هو ( شكارتا دلاكتا )
اي البتشكر البنية هي المرأة البتدلكها وشاهدتها مطعون فيها ...
ويضرب هذا المثل لما واحد يشكر زول بحبو فيكون شكره له مطعون فيه
لأنو البتحبو دا مهما كان بتشوفو قمر والقمر قريب وهو أبعد
___________________ ياودشيقوق سوف أنزل ليك كلام طيب دار بين شما زوجة المك نمر داهية العرب ودالنعيسان عندما أستنجدت به شما حتى يصلح بين نمر والشكرية لآن الشكرية هم أهلها وهي اي شما بنت ( شيخ العرب ممد وددكين شيخ قبيلة الشكرية في ذاك الزمان )
| |
|
|
|
|
|
|
Re: بس .. أدخل .. عليك الله (Re: ممدوح أبارو)
|
Quote: أكل حامدك أقنع ضرساً ياخد علي طعام الرجال أقلع |
Quote: اربط مصرانك ولا تشمشم عن جيرانك |
يراد به الرضي بالمقسوم وعدم الاعتماد علي موائد الغير
Quote: صيام شهر ولا عزومة اب كشر |
يرادفو بليلة مباشر ولا ضبيحة مكاشر
Quote: ناس الاقربين ربو الجرو النباح والعاقل طبيب نفسو يكون مرتاح |
يحكي أن رجل مسكين لا يملك طعامة بينما جارة ميسور الحال وقد كان عند الجار الغني وليمة فذهب المسكين لستطعم فهاجت فيه الكلاب وقطعت ما تبقي من ثيابه الرثه ، فقال هذا المثل
ونواصل
| |
|
|
|
|
|
|
Re: بس .. أدخل .. عليك الله (Re: ممدوح أبارو)
|
Quote: ياودشيقوق سوف أنزل ليك كلام طيب دار بين شما زوجة المك نمر داهية العرب ودالنعيسان عندما أستنجدت به شما حتى يصلح بين نمر والشكرية لآن الشكرية هم أهلها وهي اي شما بنت ( شيخ العرب ممد وددكين شيخ قبيلة الشكرية في ذاك الزمان ) |
في انتظارك
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
ود شيقوق والأخرين بدون فرز دي إستراحة .... خارج الموضوع
حديث دار بين شما زوجة المك نمر وودالنعيسان ( داهية البلدان في ذاك الزمان ) ( شيقوق أعرف أنك تمل من قراءة الكلام عندما يطول لكن بالله أقرأ هذا الحديث الطيب وما حا تندم )
عندما خربت الحكاية بين الجعليين والشكرية وأعلنوا الحرب .. هنا شما همت واصبحت تمنح وقالت أشعار وهذه الأبيات تحكي صراحة عن حالها وعن حزنها لما صار ...
وا وجعي الشديد أنا جمري زاد في وقيدو أبوي بي قبيلتو جا داير إستجير في فقيدو الديش كلو أهلي وراسو أخوي وعقيدو وطه المك حمى والشر صِعب ترقيدو
نادت لي المروق أنا روحي جات مطابقا صعب الحال خلاص والعقدة مي مجاردا الشكرية أمس .. لحقوها حارا وباردا خلو المك زِعل وحالف يعقر الواردا
ديل ناس وجعا كان عملوا زي مايعملو مالو المك لو فوت كلامن وحملّو قالوا عطاشا والرهد بينزلو يملّو وكان إنسلا سيف تاني القبيلتين كملّو
ضاق صدري الوسيع ياهمومي وين تنجمعي فارقني المنام من عيني فارق سمعي طال اليوم بُكاك ياعيوني جودي أهمعي أصبح جسمي جاف والوحّا حرقت دمعي
أها بعد ما منحت وبكت زين وكوركت لي خادمها : صافيات .. يا صافيات
قالت ليها : ( صافيات ) : هوي يا الملكة جاياك ....
قامت الملكة شما قالت ليها : لي ود النعيسان روحي ما تجيني من غيرو أحي ..فاضل لي أخنق روحي
أها خادمها مشت نادت ودالنعيسان وجات وهو معاها ....
ود النعيسان قال ليها :
سلام ياملكة الدار يا أم عمارة سلام عليك مالت جسارة وصدري فيهو كلام وكتين إنتِ سوت بيك كدي الألآم معذورة الدروب مظلومة كان تتلام
لفخر الجدود ياملكة ليه متناسيا تروس الحافلة أبواتك بدور الماسيّا تلوب الحارا وجبال الثبات الراسيّا إنتِ تجبري ما بصبروك في القاسيّا
قامت شما قالت لي : صدقتّ علي المتلي الثبات مفروض وكمل توب الصبر واليوم لبسنا عِروض عليّ الهم كِتر وأنا صدري مملي غروض ودا الخلاني ما قدمت ليكّ عَروض التحت الطبق دا شيلو مسحة شارب مو قدر المقام يختا وشوية يقارب
ود النعيسان فتح الطبق لقا ملان دهب ....
قام قال ليها : ديل خروز يا ملكة ولا عقارب الجهرن عيوني الدنيا باقي مغارب جود كفك طمح ياملكة سيل غرقنا خدر عودنا راشّا بعد المحل ورقنّا ياصاحبي الفقر أنا إنتَ ماتفارقنّا أختر ماتعود غرب خلاس شرقنا
شما قالت لي : أنت فرحتي والهم دخيل عاصيني ولي العبرات أبلع والدمع عاصيني
بس بدورك تعالج لي صدر المك نمر وابوي ... والحرب ما تقع
قام ودالنعيسان قال ليها : يا ملكة العليك ما بخصك براك يمين خاصيني وختي حِملتو فوقي وتاني ما توصيني الساس الرموهو عُقب مابتقدم قبل مايختو طوف يلقو القديم إتهدم كل واحد أخلي علي السبب يتندّم تب ماتخافي شئ همك رقد وإتدمدم مافي نيتي شئ غير أقنع أبوك في محلو وبي شيش أدخلّو بي كلامن حلّو إزيل الفي الصدور وكلامي أنشر حلّو بعدين الكلام بعرف طريقة إحلّو بعدما يرضى أبوك المك بعالج صدرو
قامت شما قالت لي : نضراً فوق دكين العالي راسو وقدرو التحت الطبق ليكا خمسة كيمان قدرو
ود النعيسان : الوصلت كفاي ياملكة ماها قليلة خليني النمش هسي وقفتي مليلة بدور السفر وفي ظني إبقى الليلة الجمرة إنطفت في إيدي تاني بشيلا
بدور لي بنية مأمونة توصل لي أإراضي ديل ....
قامت شما كوركت لي خادمها ... تعالي يا ليمونة
قام ود النعيسان قال ليها : شن سموها دي ليمونة ولا أمونة تفتحو في الشرور وإن قلنا شي تلومنا
قامت شما قالت لي : شن داير بيها دي ماتشيل توصل ليكَ
قام ودالنعيسان قال ليها : توصل لي بنية الملكة هيل دليكا ....
قامت شما قالت لي : شن رأس مالا مو شيتن كتيرا عليك سوقا مع الهدية خلاس دفعتها ليك
قام ودالنعيسان قال ليها ...... مقبولة الهدية الكل شئ جامعاهو فيها غناي وفيها البغني والبسعاهو طبقي ملان دهب وهادي بتي ماشا معاهو يجزيك الكريم بالخير حِماك يرعاهو ودعناك الله نومي عاد مطامنّا تصحي تلقي كل شئ تما ودارك أمانا
| |
|
|
|
|
|
|
Re: بس .. أدخل .. عليك الله (Re: خالد العبيد)
|
Quote: سلمى ياخ ما تجي
تجييك الكشة!! |
خالد جابت ليها شتيمة ؟ سمح حبوبة ودى واحدة صعبة خلاس اها كان نادتك وما جيت فسراع تقول ليك ـ ما تجى تجيك الجاتنى فى ابوى او تجيك بوليداتا عارفا دى ؟ ناقة الفقر حماكم الله
يجيك الخير ياالعشا اب لبن
هسى عليك الله يا خالد اخوى العشا اب لبن دى اخر مرة سمعتها متين؟ يا ودحشاى يجيك السمح والزين
لكين اطرف دعوة سجلتها الوالدة عليها الرحمة كنت مسافرة فى مرة (طبعا اخوك ابن بطوطة ) مشيت بورتسودان اتذكر رحلة تعليمية المهم جبت لى (برنيطة لاخوى البحبه جدا المغيرة ) عندى اخوى الصغير اخر العنقود احمد برضو بحبه لكين المغيرة حبه براهو والحكمة لغاية الان كل يوم حبى ليهو بزيد هو ووليداتو وامهن كمان المهم يا حبة احمد مسك فى البرنيطة زى ما سمتها امى والشكلة دورت الخبر وصل لامى كانت قاعدة تعوس وما قادرة تقوم تفض الاشتباك من محلتها ديك كوركت للمغيرة ـ يا ولد اديهو البرنيطة يبرنط قلبك لغاية الان نحنا بنضحك فى الدعوة دى قبل كم يوم كنت بتكلم مع خنساء اختى الله يخليها قالت لى الحكاية دى وضحكنا وبكينا لانه امى عليها كل الرحمة ما كانت بتعرف تشاكل او تداعى
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
كانت فاجعة حزنت يومها كل شندي ليلة غرق مركب كان فيها أسرة الزنين في شندي وهم قادمين لشندي من غرب شندي .. لا أذكر القصة بالضبط لكن الأخ كمال زميل معنا هم أهله وأكيد يعرف تفاصيل القصة جيد ولو وقعت عينو في البوست بجي يحكيها لينا ... ( موتا زي دي الناس بقول إختّفو ما بقولو ماتو ) المهم بعدها القصة صبحت مثل
يقولوا ( لحقو أو لحقها الزينين )
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
Quote: يقال ياود شيقوق أن شما كانت زولة الله ومسكينة وما عندها شدايد المرأة التي توزن رجال كانت بنونة بت نمر وهي بنية كانت فوق وليدات وكانت فارسة وخاضت كم معارك |
والله يا المنسي السمحة ام ولدى اسمها شما واسم شمة ده اصلا ما بخيب وحاة الرسول الضيوف بجوها رقل رقل من الدندر النهار كلو في المطبخ شغالة وتضحك وحرم اخوك من شدة ميلو هي بتكسر العود وانا بعاين حت عود ال ..........
| |
|
|
|
|
|
|
Re: بس .. أدخل .. عليك الله (Re: الطيب شيقوق)
|
عفيت منك يا ابو الطيب عفويا يخدر ضراعك عل يعنى ما تزعل منى شان مااقول ليك زعل ام العروس الدقت طيبا ومات نسيبا
ولا اقول ليك ياقول حبوبة فراغ مين متلا الباعت امها وكست راجلا
متاكدة حتقول لى
يتروجلن كرعيك
ما بقول امين
واوعك تبقى معاى ظريف لانى حاقول ليك ظرف (بضم الظاء ) مطيرة الغسلت كتاب نسيبا
لكين بقول ليك تتعلى ما تتدلى ويحووك اهل الله او يحوطوك اهل الله
لكن ما تقول لى الله يطوطحك النعمنى مطوطحة خلقة
| |
|
|
|
|
|
|
Re: بس .. أدخل .. عليك الله (Re: سلمى الشيخ سلامة)
|
بت الشيخ
Quote: عفيت منك يا ابو الطيب عفويا يخدر ضراعك |
وعفوا منى ليك يلزمك الجابرة
Quote: فراغ مين متلا الباعت امها وكست راجلا |
Quote: متاكدة حتقول لى
يتروجلن كرعيك
ما بقول امين |
حاشاك ما بتشبهك كلوجة الكرحين يا ام عزة
Quote: واوعك تبقى معاى ظريف لانى حاقول ليك ظرف (بضم الظاء ) مطيرة الغسلت كتاب نسيبا |
Quote: لكين بقول ليك تتعلى ما تتدلى ويحووك اهل الله او يحوطوك اهل الله |
يحلقوك ويفزعوك
| |
|
|
|
|
|
|
Re: بس .. أدخل .. عليك الله (Re: سلمى الشيخ سلامة)
|
سلمى سلامة وإن شاء الله سلامة لي جدك فوق الخلوة وبنقول سلام يا بت سلامة والله يسلمنا من ناس قدو ( ودالعبيد ) ديل بطششو المطر كان شالت وبركو ليها بي الفقرا ( اصلهم نا زراعة بصل .. والبصل المطر بتضرو )
Quote: [Quote: B]زعل ام العروس الدقت طيبا ومات نسيبا |
Quote: فراغ مين متلا الباعت امها وكست راجلا |
Quote: ظرف (بضم الظاء ) مطيرة الغسلت كتاب نسيبا |
Quote: النعمنى مطوطحة خلقة |
|
ليتنا نحظى ببعض الشرح يا بت الشيخ سلامة
لكن كلمة ( النعمنو والنعمني ) دي بتعجبني عجب لما أسمعها وكذلك كلمة ( عمنوّل ) ( وداكي الليلة )
تحياتي سلمى
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
غايتو يا خالد دى تخريجاتى براى نعمنى اتخيل لى معناها نعم اننى بمعنى تم تحريف وادغام لبعض الحروف نعم انه صارت نعمنو ونعم اننى صارت نعمنى والله اعلم اما فيما يتعلق بظرف مطيرة يحكى انها امراة تحب النظافة لذلك قامت بغسل كتاب نسيبها وهوربما كان المصحف مخطوطا رات الحبر مسودا الصفحات فابدت انزعاجا فقامت بغسله وبرضو الله اعلم فيما خص زعل ام العروس الشر برة وبعيد لانى حاكون ام عروس قريب فما اظن فى اسوا من ان يموت ابو العريس يوم العرس
| |
|
|
|
|
|
|
Re: بس .. أدخل .. عليك الله (Re: خالد العبيد)
|
يا ود المنسى ياخوى ...انتة عارف الحمد الدعوات دى كلها ما كانت
بتصيب لانو النيات كانت طيبة ..لكين انا متأكد فى واحدة صابت وهى:ـ
( يا ولد ما تنقر ينقرك الضرس )
واللبيب بالاشارة يفهم!!!!!!!!!!!!!!وبالمناسبة هاك دى:ـ
الدبيبة التمتغ كبدتـك
عمك كمــال
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
سلام ناس النضم الزين
*يقول ليك لًمه في الشي ذي النعجة في شوال الدقيق!(النعجة أنثي الضان ) *ولمِه فيها ذي الشاه القابه(الماعز التي لم تأكل ليوم كامل) *ولمِه فيها ذي القبور في التقاه (الجراد والتقاه هي مكان تجمع في الغلال ) *ولمِه فيها ذي العنتد في الشجرة (حشرة تعيش في الاشجار)
كناية عن الشعاتة أظن الشعاتة زاتا دايرة تفسير يقول ليك فلان شعيت يعني قوي الشكيمة إذا أصر علي شئ فعله
| |
|
|
|
|
|
|
Re: بس .. أدخل .. عليك الله (Re: ممدوح أبارو)
|
في ناس كدي كل ماتساعده برضو يظل في حالو تدخلو في شغل مافي يومين وتلقى خلا تدي رأس مال يشتغل في تجارة يأكل رأس المال ويقعد تب مو ناجح لو في شئ
فيقولوا لك
خلي ( مرمي الله مابترفع )
____________________ أبارو سلام يا طيب
| |
|
|
|
|
|
|
Re: بس .. أدخل .. عليك الله (Re: خالد علي محجوب المنسي)
|
الليلة يا ود المنسى..عأمل ليك تشكيلة ومعذرة اذا فى واحدة مكررة
الجـايـاك مـا بتختــاك
اصلــو مارق للربا والتلاف
دخانكم يدخن وجوعكم يمحن
راحت شمار فى مرقة
سجمــان ورمــدان
بلد غاب فيها التمساح يقدل فيها الورل
اسم زى اسمك يا علمك الهبالة يا علمك الندالة
البتريدو تديو حلاوة حربة والما بتريدو تحرش علي الكلبه
ومحل الرهيفة التنقد
عمـك كمــال (عما كباســة)....دى ملحق
| |
|
|
|
|
|
|
|