أجتمعت قوائم الطرب من كلم ولحن وأداء .. فكان الميلاد أغنية عترت فيها بالصدفة.. ويا لجمالها وعذوبة لحنها .. رغم بساطة الكلمات لكن لها من الوقع بالنفس ( البقت تخاف من بكرة ) فعل النار في الهشيم بل أشد .. زاد الجمال رونق براق اللحن الذي تفردت به وما أحلاها من لحن ينساب كخرير جدول دفاق تحت شديراتنا...
من أمس يا سلامة بت الشيخ سلامة وأنا حالتي حالة ( تصعب علي الكافر ) وأصبح حالي زي القال في محنته
الحال العلي حال العدو المسكين وحال الكتفوهو وسالين علي السكين وحال الفي البحر حايشنّو تمساحين وحال الفي السجن ماقدرولّو سنين
سمعتها وخلت نفسي زي ماقال ( المسنوح ودشيقوق ) أتمايل طرباً زي سواق اللوري صوتو كوز عربتو يحاكي حنين القمري في الطلحات .. ودايس البنزين لي الصاجة في ملف حاد .. وافيق بنهايتها وأعود من تاني لي حنيني وأسمعها تسحبني زي شيمى لي اللُجة وأقلع تاني واسمعها... دحين أنت قالت عليك سوما دهب البنيات ( إياكِ الحنينة الطيبة ) قولي لي
شن أسوو آه انا الجنيت وقلتا هووو أحي ياناس أنا المرضان شن أسووو إنبهم بي الرأي والدليل النجوع والفليل
ولا أسوي شنو ؟؟؟ الدساتير هنا ( وزي داستير احمد البشير الهدندوي وتوبو توب حرير )
********************** وأغني وأقول لكل الناس أنا المكتول أنا المكتول أنا المكتول وحي بيهو
يا ابوالقاسم عليك الله وريني رأيك فيها شنو انت زول عجبو صعب وقولو صراحة ( جد تذيب الحجر ) أيمنوف جميل الجمال شن وقولك فيها ( الأغنية ما تمشي بعيد ) العم كمال مفتون الطرب هييييع قول لي ومحل رهيفة التنقد فيسلوف دا كلام ناس دُقاق ودا شعراً ماعندك لي رقبة بوبا بوبي وطل في سمانا يا قمر نهاتي بيك وقول لينا وأقلب السنسنة الحمرا تيسير المبارك دي كان فعلها اكبر وأشد من الجرحو نوسر بي سوما دهب البنيات ناغمي الريحان وأسمعنها وقولن لي المشتار في بلاد اليانكي صاحب الفضل الفاضلابي .. ساهر بيها سماح قمرنا وإدوّر إنت وين وطال غيابك
Quote: اول انجمامة بعد بعد سنه من الغياب من المنبر ابواحمد أنا قولي ليكَ عجيب شدو لي وركب في شُباحو أديب مو لُقاط طرف وقفن لي البنات وقفنلّو بي الترتيب وعشمانت الكريم رجايا فيك مايخيب مو لُقاط طرف كل سنه وانت والاسرة الكريمه بالف خير
مرحب بت البيوت المن بعيد معنيّة شاهق السماء نفوسكم وبيوتكم حنية إياك بت الرُجال والسمتا فيك محريّة قديم قالوا فال البطاحين عزّة للجعلية
مرحب حبابك عفاف أبوحريرة رتينة تضوي لي فارس البطانة الضرس ود المحرب ( خالد ) غيابك طال والله وكنّا دوماً في السؤال عنك ( لكن يبدو الأرباب ما بوصّل الوصية )
حباب عشاية الضيوف وبيتا سبيل للغاشي الماشي ودلا السيل للولد الراحل ودربو طويل عموم الناس بتشيل تعشي وتكفي باسمة ما بتحدري يا بت الرجال أهل النصيب البدري مو داب أهلك لكل اليلاد إت دُخري
فرحت بيك شديراتنا أدخلي إنجمي البيت بيتك والمقام مقامك يا كريمة أصلك ثابت ما بتغشي سوق الله الخدار فوق بويتك نابت دخر التساب والسنين المرة وناس عموم في بابك تخابت
تسلمي علي الزيارة بس طلبنا... بندورك تكوني بينا من اعمدة الإنجمامة الثابتين كالجبال وهي كلمة طيبة تجمعنا وأنتو الطيبة الحنين هولكم يا البطاحين .....
تحياتي ومودتي للأسرة أم أحمد والسلام موصول للأرباب ( خالد )
11-18-2008, 12:45 PM
جعفر محي الدين جعفر محي الدين
تاريخ التسجيل: 11-12-2008
مجموع المشاركات: 3649
ود المنسي وكل قبيلة الانجماماب سلام طبعا الواحد في مثل حالة الشديرات بتاعنكم ديل لا بدق الباب ولا حاجة يدخل وأقرب عنقريب يطلق ضهره ويا ولد جيب ليك جك موية ربنا يديم هذه الانجمامة ويديم عليها أقلامها يمكن الواحد يفضل يقعد في اللوج ويشاهد وما يرفع صوته صدقوني فتشت لروح جميلة أكتب بيها ما لقيتها ... الحكاية شنو ؟
تعرف يا أبارو لما كتبت ( تحياتي بت النوراني ) ظنيتو سر بينك وبين المستشار أبوالقاسم وعلقت عليه لكن يظهر ما لاحظت ولا يهمك فلو فرضت عليك 20 من الضأن أنا مفروض يكون الفرض علي 100 من الأبل
زمان في الإنجمامة في عددها الثاني تداخلت الأخت الفاضلة وأنا أشيل وأكيل ( الأخ الفاضل تيسير ) فردت ( والله يا خالد أنا بنت أرجع لبروفايلي ) حتى فكت الدقسة وأغرب شئ برضو أبوالقاسم دقس فيها وأعطاها أسم ( ام فلان لا أذكر )
والما بدقس ما بتعدل مشيّو هون عليك يا الحبيب تحياتي ومودتي
10-09-2008, 05:57 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ابارو يباريك عطية ,, انت مالك داير تبقى زى صاحبك بتاع البردانة ,, راميك جمل زى صاحبك والله شنو.??
الحبيب الفاضلابي يا أهل الفضل والخير والله صاحبك بتاع البردانة أنجض مني ومنك عللا بالحيل بعرف ويرقد بالخطة بنات المنبر ديل لي حدهن يشكك الناس فيهن ( قال أولاد ) يشتت في الكورة حتى ينفرد ( أب عِصيبات عنقريب العدة الهلهل )
بعدين عطية دا منو
بس ما يكون ياهو
10-09-2008, 06:41 PM
عبدالعزيز الفاضلابى عبدالعزيز الفاضلابى
تاريخ التسجيل: 07-02-2008
مجموع المشاركات: 8199
إهداء خاص جداً جداً لقمر سبعتين ( سمـــــــاح ) وإهداء خاص جداً للقمر بوبا وإهداء خاص جداً للجعلي المتررطّن العم كمال وإهداء خاص وبس لفيسل هليل يا فيسل غنيها لي بتاتك وقول ليهن هقيت للنجعة وكما هقينا نحن
وإهداء لكل رطاني يجينا زائر
وتحياتي ومودتي لغير الناطقين بها
10-09-2008, 08:47 PM
عبدالعزيز الفاضلابى عبدالعزيز الفاضلابى
تاريخ التسجيل: 07-02-2008
مجموع المشاركات: 8199
ابارو ,, تبارى مع الطيانة وشايل ليك جوز نامن تقوم لك كومه فى كتفك ,, انت مالك بقيت تكوجن كتابتك زى واحدة فى بالى معانا فى البورد ده ,, انت متربى فى ثاوليل البرته,,? وبعدين ياخى عواطف انا مازغت من بوستيها بس هى ختتو معاى قرض وزاغت من البوست وفكت فينا واحدة اسمها محسية يعنى الرطانة وين ما تقبل ,, البورد بقا زى الشارع القايمة فيه ضريسا..
10-10-2008, 07:58 AM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
ربنا يديكم الفي مرادكم ويجعل أيامك كلها أفراح ويفرحكم بالحلم الأكبر استقرار البلد وراحة عباده اللذين شقو كثير ( يصبح في متناولهم المأكل والمشرب والدواء والدابة ) وهم والله لا يتطلعون لإكثر من كدي ربنا يفرجها ونشوفهم فوق يضاهوا النجوم في سماها
آميـــــــن
10-10-2008, 03:44 PM
ممدوح أبارو ممدوح أبارو
تاريخ التسجيل: 02-27-2008
مجموع المشاركات: 3162
والله ضحكت لمن أبّارو غلط مثلى فى إسمك وحمدت الله إنو الشغلانة دى ما ممن الكُبُر ... واضح إنو عندك علاقة بالحصاحيصا
ورداً على تساؤلك:
Quote: البيت ده ما غريب علي في الحلة الجديدة و الا الإمتداد ... عموماً الحصاحيصا
بالنسبة لينا لا يمكن تبديلها ...
البيت المعنى لجدى لوالدتى ( عبدالقادر أحمد سليمان ( خرومى) وهو بالحلة التحت ( الحى الشرقى ) إلتقطت فى 25/8/2008
وهاك بقية الصور ومن ضمنها صورة من على البعد للحلة الجديدة:
الحلة الجديدة تبدو فى أقصى اليمين
القديم ( البنطون والجديد ( الكبرى)
الضفة الشرقية للنيل والبحر دميرة
لقطة أخرى للضفة الشرقية
Quote: شنو يا أبوالقاسم الصور ما حمضهّم
تعرف يا أبو أحمد قصدت أجيب كل هذه الصور عشان أثبت ليك إنو الحصاحيصا بتشبه شندى بكثرة شجر النيم رغم تغول الكودة عليه.
سأرجع مرة أخرى لقصص البنطون .
الموقف من الجانب الغربى للحى الشرقى
أول شجرة نيم من الجهة الغربية تجاور منزل المرحوم الطاهر حسن عثمان
وظلّت صامدة رغم جناية ( الكودة) عليها حيث قام بضقلمتها ( وليس بربحتها) هى وبقية عقد النيم عندما مارس هواياته بفرتقة المواقف وترحيل مواقف المواصلات فى كل مكان حطّ فيه ( الحصاحيصا- سنار- وأخيراً الخرطوم )
Quote: تعرف يا أبو أحمد قصدت أجيب كل هذه الصور عشان أثبت ليك إنو الحصاحيصا بتشبه شندى بكثرة شجر النيم رغم تغول الكودة عليه.
العزيز أبوالقاسم فعلاً هناك تشابه كبير بين شندي والحصاحيصا وكثرة شجر النيم تعرف في مرة من المرات كان إنعدم الشاي في المحلات التجارية لقيت ناس شندي بقو يغلو صفق النيم ويشربو شاي ( قريفا بس لكن مافيه اي طعم شاي ) لكن نفع ليهم بطونهم ونظفها بس تقعد تقرقر فيهم قرقراب سماح هي ما تسمع كلامنا دا تجي تقول متخلفين
_________________________ أبارو مالك سمعتو ولا جابو ليك بقيت تحاي مني غادي غادي زي التقول أنا داير منك دين يا أخوي مافيها الدنيا خير هي كلمة طيبة ( كان الدبيب ملى ليك رويسك بي شئ )
Quote: أبارو مالك سمعتو ولا جابو ليك بقيت تحاي مني غادي غادي زي التقول أنا داير منك دين يا أخوي مافيها الدنيا خير هي كلمة طيبة ( كان الدبيب ملى ليك رويسك بي شئ )
ماني سماع كلام ولاني من جلاسو
وماني البزوغ من دين ويغلبو خلاسو
وماني الاضينة حتي الدبيب يملالو راسو
هييييع
أخوك والله مزنوق ساي
وإحتمال اليومين الجايات ياخدلو غيبة
10-12-2008, 04:55 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ودالمنسي صححت العنوان الحمد لله الله بريدني قلت ( حمده في بطنه )؟ عجبتني قولة ( ناغمي )
جات كدي والله يا ريحانة وزي ماقلتي الله بريدك ويومها والله بعدما كتبت العنوان راجعته كويس مافيه أي شئ أول مداخلة من المسينيح أبارو مفنقل عويناتو زي ضب الجُبال قال ( قبل الندانة يا ريس )
اي حمدو في بطنو .. ودقرتا عيني .. وداكي الليلة وناغمي وعمنوّل .. إتزاخر .. والله جنس النضمي دا بعجبني عجب شديد يا الريحانة
عجبنا بالحيل عودة الحبيب ودالمحرب وزوجه الفاضلة عفاف أبوحريرة لكن ماني عارف جب زاغو زي وليد الموية من بين الإديات
علهما عافية درت
تحياتي يا بت الخلفا وأهل الرأي البعقدو الدم
10-12-2008, 05:00 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: لا خلفية لي عن كلماتها وملحنها لكن الشبه باين الشاعر شبيكة الألحان السني الضوي والأداء معروف توأم النغم والصوت الشجي بنات الفنان خيري
عاد يا خالد التومات ديل نحكى ليك قصتهن زمان لمن كنا فى الاذاعة بجى عم محمد خيرى عليه الرحمة سايق التومات معاهو ويدخلن يسوطن فى الاستديو حلاتن وانقطنا من بعض زمن طويل ولسه كنت متخيلاهن الصغار ديلاك قوم يا خالد مشيت البلد القى ليك التومات فى الرادى وبغنن وفى التلفزيون هيا التومات ؟ حلاتن واتصور انه غنا كتير رجعوه لمصبه خاصة الغنا المخاطب فيه ذكر لانه لمن يغنوه الرجال يبقى لى اشتر اشتر الله يديهن العافية
خرمجة صغيرونة
يوم كنت فى الصيدلية فى السوق العربى والتومات بغنن فى مسجل القهوة المجاورة للصيدلية واحد اظنه زهج من التومات لانهن اى حته تمشى تلاقيهن بغنن المهم جا داخل الصيدلية وفجاة التسجيل بقى صوته عالى الساعة الهاج ليك ـ كرهتونا الغنا ياخ ، ادينا حبوب للضغط زاتو
10-12-2008, 06:10 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
يا أبوالقاسم زمان قالو في مدرس رطاني بدرس في التلاميذ تلاوة قرآن .. وكانوا يقراْْون من المححف ومرَّ التلميذ يقرأ الأية ( بالبيت العتيق ببكة ) .. فقال له المعلم يا ولد أقرأ كويس .. فرد التلميذ مكتوبة ببكة .. فقال له الاستاذ وريني كدي .. فقام التلميذ وأعطاه المصحف فوجدها فعلا مكتوبة ( بكة ) فأمر التلانيذ ان يصلحوها قائلاً : طلعو الاقلام وصلحوها ( مكة )
قر قر قر قر قر قر سماحية
10-12-2008, 08:55 PM
ممدوح أبارو ممدوح أبارو
تاريخ التسجيل: 02-27-2008
مجموع المشاركات: 3162
_________________________ والله كما قلت السؤال عن حمامة سلامنا سلمى صبحي نظل نهاتي حتى يبح الصوت وترجع لنا حمامة السلام ومساحتها في إنجمامتنا محفوظة بين شديراتها مغردة وهيا تعالي وأصدحي يا حمامة وزيدي في هديلك
10-12-2008, 11:03 PM
عمر صديق عمر صديق
تاريخ التسجيل: 06-06-2008
مجموع المشاركات: 14776
Quote: فى مسرحية خطوبة سهير ترنم خليل و- وهو يترنح من السكر- بأغنية تقول كلماتها:
عشة أم رشيرش *** عشة أم رشيرش
والبوستة قامت *** لخط الروصيرص
أعيد إجابتى : عشة " عشوشة " رفيقة ود أبرق.
صاحبة الدقة صاحبة الإسم.
عارفك يا خالد إتضايرت .
ختيت الدرب تــب يا سيادة المستشار
وصلت لعند القلوبية والشبكة وجيت ونتفتَّ ريش الطير
ذكرتني صاحبن لي من أولاد الدويم حكي لي كيف كان جهلهم قال : قشت عينا من النوم نشرب كبايتين شاي لبن مع الزلابية وبعدها نشيل القلوبية أو الشبكة ونختر .. سروال وفنيلة داخلية تشربت من العرق .. ورقبتها ( الفنيلة ) قرب الصرة ... والفنيلة في الخشم يمص الواحد ( الملح المترسب من العرق ) قال نقج الشرك ونلبت وراء شجرة ظليلة قرب الشرك نغني للطير
القِديل القِديل يا أبوحوا القِديل القديل شن سوّا القِديل تعال شب شب القِديل بجيبلك حب القِديل القِديل يا أبوحوا
إنجماماب سلااام وتحية طيبة إتشلهتنا في اليومين الماضيين وبقى شغلنا ماسنجرات ( لحدي فيسل هليل ما طمم بطني من كترت الكلام )
تعرف يا أبوالقاسم بقينا ندخل المنبر بعدما يرجع وماسكين يدنا في قلبنا من الهكر ( بقى شغلنا زي صلاة الفلاتية ست التسالي تصلي تحت النيمة وعينها في صحن التسالي والفول المررو )
تحياتي انجماماب
وربنا يستوي بطائرتنا
10-20-2008, 01:40 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
شغالين ياخالد كورس تدريبي في الحاسوب تحت برنامج يسمي تنمية المجتمع
برعاية وزارة الصحة الاتحادية وبتمويل من منظمة الإغاثة الاسلامية السعودية
البرنامج بيستمر لمدة شهر في كل منطقة انا نصيبي فيه 15 يوم عشان كده
يا أبارو صحة وعافية بس بيني وبينك مافيها حبة جمكسين كدي ولا قزازة رش بالوعات والله بتخيل فيك لابس الرداء الكاكي وقميص أبيض وطاقية نسج مشغل ومركوب قطع الجنينة ونضاراتك قر قر قر قر قر قر قر قلت لي يا حليل ستها ستها معانا ما قلنا ليكم زمان دعموا الدفاعيات يعني إيمل .. ماسنجر خارجي .. تلفون .. وصف بيت .. وصف مكتب عشان تمشي تتلبت زي الكديس الناوي نية سيئة لي لحمات مقلقات في مشلعيب
_____________________ ما لميت في الدبيب
10-20-2008, 10:38 PM
أبوبكر أبوالقاسم أبوبكر أبوالقاسم
تاريخ التسجيل: 11-27-2007
مجموع المشاركات: 2805
الحديث الشريف يذكر أن! آدم حين دخل الجنة استوحش وحدته في جنة الله والتي كل منا يعمل لينال رضى الله فتكون هذه سكنه وجزاء عمله ... ورغم ذلك الا انا آدم لم يهنا بالعيش وحيدا شعر أنه محتاج لحواء،وهذا الكلام ليس من الخيال لكنه من حديث النبي صلى الله عليه وسلم فبينما هو نائم اذ خلق الله من ضلعه حواء. فاستيقظ فرآها بجواره
قال: من أنت؟؟.. قالت: امرأة قال: ما اسمك؟؟ قالت: حواء قال: ولما خلقت؟؟ قالت: لتسكن الي..
وروي ان الملائكة سألت آدم عليه السلام :
قالت : أتحبها ياآدم ؟ قال : نعم قالوا لحواء: أتحبينه ياحواء قالت : لا وكان في قلبها اضعاف مافي قلبه من حبه. فقالوا : فلو صدقت أمرأة في حبها لزوجها لصدقت حواء..
وتحكي الآثار وقصص السابقين..أن آدم نزل بالهند وحواء بجده.. ويقال أن آدم ظل يبحث عن حواء حتى التقيا عند جبل عرفات ولو انتبهتم أن عرفات أقرب الى جده وبعيده جداً عن الهند , فسبحان الله آدم هو الذي تعب جداً وظل يبحث عن حواء كثيراً حتى وصل إليها وكانت هذه اولى قصص الحب في التاريخ .
10-21-2008, 09:03 AM
فيصل محمد خليل فيصل محمد خليل
تاريخ التسجيل: 12-15-2005
مجموع المشاركات: 26041
أللهم أستر وأحفظ إنجمامتنا من هكروز الأرجوز أللهم ألهي ولجّن مخيخو كان نوا علينا
.................... يا جماعة المصيبة دا شايل شنو؟؟ فش مبيض .. ( كش ) يكشحو في البوست يبقى ناصع البياض يلمع
والله عيب عليك يا حمامة السلام وحتى في زخم المصائب هذه ماتعودي من رجلة الصيف يا حمامة وتكوني بين أهلك تحت الشديرات تغني وتمرحي ساكنيها عودي عودي يا حمامة
10-22-2008, 05:22 PM
فيصل محمد خليل فيصل محمد خليل
تاريخ التسجيل: 12-15-2005
مجموع المشاركات: 26041
الى كل الانجماباب والبورداب ..كفارة والجاتكم فى بوردكم سامحتكم قال الشاعر فى قديم الزمان:ـ كلمــا انبت الزمــان قنــاة ركب المرء فى القناة سنانا وقال الآخر:ـ ومن تـك نفسـة بغير جمال لا يرى فى الوجود شيئا جميلا وذلك كلة للاسف ينطبق على واقعنا المعاش حاليا..فهناك من البشرمن يحاول ان يحول كل ابتكارات وانجازات الانسلنية الى ادوات هدموتدمير وهناك من يسعى ليحول كل ما هو جميل الى قبح فتصبح الكراهية مكان الحب والفرقة مكان الالفة والظلمة مكان النور وسقط القول مكان الكلمة الطيبة لقد كانت بالجد ايام عصيبة ..كان عزائى الوحيد تلك (الانجمامة) التى فتحتها عبر المسنجر مع الاعزاء ود المنسـى وفيسـل ....المهم تعالو نواصل مشوار الكلمة الطيبة ولو كرة المهكرون...وملعون ابو التهكير
عمكــم المتيم بكم كمــال
10-22-2008, 06:42 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: لقد كانت بالجد ايام عصيبة ..كان عزائى الوحيد تلك (الانجمامة) التى فتحتها عبر المسنجر مع الاعزاء ود المنسـى وفيسـل ....المهم تعالو نواصل مشوار الكلمة الطيبة ولو كرة المهكرون...وملعون ابو التهكير
عمكــم المتيم بكم كمــال
متين متين يا الله إجينا أجمل ريد ويطل بنورو علينا طلة بشائر العيد
العم الجميل كمال عطاء لك التحية الطيبة رغم الفأس المرفوعة فوق رؤوسنا لكن سوف نظل كما قال الحبيب أبوالقاسم صامدين عليها كلمة طيبة تجمعنا وفعل حسن يظلنا تحت شديراتنا
نطلقها من فوهة البوق لحنا عذب تطوف به زهرات الإنجمامة
تعالي يا ريحانة البطانة تعالي يا حمامة سلامنا تعالي يا قمر سبعتين تعالي يا الشبلة أسيا تعالي يا مزمار الشعر سوما تعالي يا المبروكة تيسير تعالي يا سلمة سلامة الحنون
يشدوا الحيل أخوان البنات واقفين يتلوا الضرعات لي فوق .. والطواقي تحت الحاجب المقرون وجفير الخوسا فايت الكوع بها نحمي إنجمامتنا وبنقولها إن درتا العديل والزين تعال آزووول وإن كُست الكعب والشين أرح آ زووول
سلمى بت الشيخ سلامة فوقنا أنكعي هزّي وكان زحينا يوم الحارة قرنك جزّي
تحياتي العم كمال وهييييع ومحل رهيفة التنقد وإن شاءالله ما تتلتق
جميع الإنجماماب سلام كثيييييير ... مشتاقة للإنجمامة و الضل و الهمبريب ... جد فقدتها شديد رغم انو ما بقدر أدخل بشكل دائم لكن فكرة الهكر و فقدان اللمة الجميلة دي كانت مخيفة .... حمد لله على السلامة و ربنا يجمعنا دايماً على الخير و الكلمة الطيبة ....
كنت عايزة أهديكم أغنية لكن الرابط أبى يشتغل معاي (في أي هكر عندو فكرة أحلها كيف)
10-23-2008, 08:54 PM
فيصل محمد خليل فيصل محمد خليل
تاريخ التسجيل: 12-15-2005
مجموع المشاركات: 26041
هذة المداخلة( لحســة) الهكر انشاء اللة ماتنفعـو وكبتا ليهو نعيد انزالها...وهى من اروع ماكتب من شعر الشاعر الكبير عبد الرحمن الريح......انصـاف
عمكم كمــال
يا روحي أنصفني في حكمك لأنه قاسي علي أنا يا حبيبي ظلمك *** تظلمني والأيام قد تنصف الإنسان يشاهد المحبوب عفواً عيان وبيان بالنسبة للطفك والرقة يا فتان ما كنت تظلم من أضحى بيك ولهان تتركني في الماضي مع إنه في الإمكان تجدد الذكرى وتنسي كل الكان *** هيامي بيك يا فاتن مصدره الإنصاف أنصفت حسنك حب وأنصفت حبي عفاف ذوبت قلبي معاني رقيقة في الأوصاف هومت نفسي خيال في معبدك طواف وسكبت روحي على كاس المحبة سلاف هل بعد هذا أكون لسهام نواك أهداف
*** أنا يا حبيبي غرامي تركته للأيام تركت حب ودموع وتركت شوق وهيام عودت نفسي إذا ما اشتدت الآلام أصبر على الحرمان وأضحى بالأحلام جنة هواي العذري ندية كالأنسام تخلي نار الشوق برداً علي وسلام ***
Quote: جميع الإنجماماب سلام كثيييييير ... مشتاقة للإنجمامة و الضل و الهمبريب ... جد فقدتها شديد رغم انو ما بقدر أدخل بشكل دائم لكن فكرة الهكر و فقدان اللمة الجميلة دي كانت مخيفة .... حمد لله على السلامة و ربنا يجمعنا دايماً على الخير و الكلمة الطيبة ....
بت المبارك المبروكة تيسير كيفك وأريت حالك زين غيابك شفقنا أن تكوني إتهكرتي حمداً على سلامتك والعود لضل شديراتنا ننعم بها ونشدو بها ونتعشقها كلمة طيبة لك التحايا
Quote: تظلمني والأيام قد تنصف الإنسان يشاهد المحبوب عفواً عيان وبيان بالنسبة للطفك والرقة يا فتان ما كنت تظلم من أضحى بيك ولهان تتركني في الماضي مع إنه في الإمكان تجدد الذكرى وتنسي كل الكان
ما سمعت حديث المستشار حسنا إتقرش ماتورينا صورتك بي القجا
Quote: تعرف فتحت الإنجمامة بعد الصلاة وفرحت بمرورك ، وما عارف نعمل " بوست فزعة" لأبو أحمد ولا مافى داعى.
إسأل منك الخير يا وجه الخير والله بس زحمة في العمل وعندي أخيِّ محجوب دخل عالم التكنولوجيا والفضاء الأسفيري حد ما أدخل بلقى ويبل شوقي للبلد وناس البلد وهو الصديق والأخ بالدم شغلني من المنبر المولع دا الله يكفينا شر المصائب ودخليل والله لو ما لحقتو بجيبها ليكم ضقلها يكركب
10-25-2008, 01:55 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
وأنت طيبة الفاضلو إنعام عبدالحفيظ الختيتيها رقدت أمانة ما إتلومتي لوم الجُبال بتجي بعد العيد بي شهر لو قلنا قصدك معيادة ( بكل سنة وأنت طيبة ) ولو قصدك الإنجمامة في عددها الجديد ( طبقتي اللوم يا بت الرُجال )
ينزل عليك برداً وسلام لومنا هذا
تحياتي ومودتي
10-25-2008, 08:53 PM
انعام عبد الحفيظ انعام عبد الحفيظ
تاريخ التسجيل: 12-07-2005
مجموع المشاركات: 8738
Quote: الختيتيها رقدت أمانة ما إتلومتي لوم الجُبال بتجي بعد العيد بي شهر لو قلنا قصدك معيادة ( بكل سنة وأنت طيبة ) ولو قصدك الإنجمامة في عددها الجديد ( طبقتي اللوم يا بت الرُجال )
ينزل عليك برداً وسلام لومنا هذا
يا ود المنسي معقول لكن!!!
كل د لوم ماكويس ياخي اللوم دا بجيب الجفا ولا شنو؟
10-27-2008, 07:18 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
ياجماعة أولن حاجة مداخلاتي البكتبا ليكم دي بتمش وين؟ تانين حاجة ودشيقوق شوهد اليوم في قندهار ياعم كمال تالتن شيء بت عبد الحفيظ دي وراها شي دحين حاحيها ياخالد ما تطيرا آخرن شي ياود أبو القاسم أنا ذاتي راسي دايش ومحننانة في البحر الحفرو وترابو وين ودو ! وفاقدين ممدوح وناس سلمى وسماح وبقية العقد الفريد ( حقت ودالمنسي )
وسلام لكل زول أكان الله قدر والمداخلة دي وصلت .
10-25-2008, 11:20 PM
سلمى الشيخ سلامة سلمى الشيخ سلامة
تاريخ التسجيل: 12-14-2003
مجموع المشاركات: 10754
Quote: سلمى سلااامة فتحي عينك قدر الريال أب عشرة ماتجيني هسي خاتفا توبك ونصو جاري بي الواطا
( صدقت في حبها )
معناها أي صدقت بالبوح بما تكن من حب للحبيب المرأة تكتم مشاعرها وإن أظهرتها تظهر القليل منها وهي تكون ممكونة وصابرة
والله يا سلمى سلامة تجيني إلا اشلخك عارض
الحبان من جم سلام اولن شى يا خالد اخوى قال المثل كان نضمنا اتقلمنا وكان سكتنا اتحتحتنا هو زاتو المشتهى الحنيطير اليطير يعنى هسى زعلان منى مقدما شان كلامك الفوق دا ؟ وحات ابوى ولا ساءلة فى البنا ولا البناول الطوب يعنى وكتين الله فتحا على البنيات ودارن يقولن الجواهن تجى انت وشايل ليك عكاز وموس داير تشلخ وعارض كمان؟ اها دا طرفى ياخالد اخوى عارف مرة قلت لزول زميلى انى بحبه عهد الله خلى الشغل (ظاتو)كما يقول صديقى هشام هبانى من الزمن داااااك وبقيت ما بقول لزول التكتح حب ايه ياعم وبطيخ ايه ؟ حد فاضى للكلام دا ؟ دحين يعنى الفيك انعرفت
10-26-2008, 12:06 PM
فيصل محمد خليل فيصل محمد خليل
تاريخ التسجيل: 12-15-2005
مجموع المشاركات: 26041
Quote: الحبان من جم سلام اولن شى يا خالد اخوى قال المثل كان نضمنا اتقلمنا وكان سكتنا اتحتحتنا هو زاتو المشتهى الحنيطير اليطير
سلمى سلااامة الحنينة سلاااام طيب ومحنة يا الحنية ( حنطير شنو ويطير شنو ) أنتِ ما سمعتي الحب الشقي بطريقك بجي حبيبي سافر عن طريق أبوظبي ( يعني الجهة التي قصدها الحبيب سلطنة عمان ) الحمد لله جيتي رايقة كت خايف تجيني فايرا زي زي الشربوت
تحياتي ومودتي
10-27-2008, 08:19 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
أبارو بجي البيت مهدد وحيلو مبتوت من شيل طلمبة الجمكسين سلمى والله حيرتنا هي إتهكرت قبل الهكر ما يهكر الناس أمرها بالحيل خلااس همانا بس بنقول إن الله عافية وخير
ياجماعة غلبت حيلة مداخلاتي دي لازم أخلبتا وأجيب فوزية جمب عطا دحين شوفوا التاريخ الجديد وأقروا
بسم الله نبدأ :
ود المنسي مافقدتك شينة يابو أحمد لو عارفين الحبيب متوجه مسقط عن طريق أبوظبي ، كنا أستقبلناه ليك جوًا و برًا وبحرًا.
عم كمال كلك زوق هدية من عندك مقبولة صدقت والله أم عبدالله ماخسّاها في الخت المعلق كتبت ليك رد على سعالك عن ودالمنسي والمداخلة طارت بركة الماقراهو تراهو رجع بقصائد سراييفو
ود أبو القاسم قندهار ؟ عند بت عبدالحفيظ الخبر اليقين
أيمن الطيب لعلك بخير./B]
10-27-2008, 08:06 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: عزيزنا ود المنسى...سلامات انتة قايل صورتى بالقجة..دى ياولدى بالدودار حق الفكى حامد والحمد للة المارسلتها كانت اتهكرت وبعدين ام العول تقولى:ـ يـا الهـكـروك عـلييييييييا
تعال شوف ناس صاحبك فيسـل جو زارونا فى البجراويــة
خلااااس هسي يا عم كمال الهكرز وراحوا نزل لينا الصورة ( ما شفتا قجة ودشيوق مساعد حلة بس ) أنت كان فوقك دودار الشيخ حامد أب عصا .. هكرز شنو البقربك أنت نزلها بعد دا وأم العول بتقول ( سنة يا ولد ) تحياتي ومودتي العم الفاضل
10-27-2008, 07:49 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: تالتن شيء بت عبد الحفيظ دي وراها شي دحين حاحيها ياخالد ما تطيرا آخرن شي ياود أبو القاسم أنا ذاتي راسي دايش ومحننانة في البحر الحفرو وترابو وين ودو !
أبا أحمد شوف نحن ممكن نخرمج جاى ولا جاى لكن راعى الإنجمامة لا؟
راجعت هجيمتك السابقة للأخت سلمى الشيخ سلامة ، الظاهر عليك لسه مواصل الصيام ، كنت دايرك تمشى لينا لمعرض ( الكورسيملك) ولا شنو ما
عارف وتجيب لينا الصور الموجودة فى المعرض بسراييفو الممزوجة بالمسحة الصوفية كما ورد فى الجزيرة اليوم.
إنعام عبدالحفيظ من الكتاب الدائمين فى بوست الحصاحيصا ومن الأسر العريقة بالحصاحيصا ، ولديها كتابات كثيرة لمبدعى الحصاحيصا
وأولهم الفنان المقيم فى دواخلنا مصطفى سيدأحمد... ألحقها برضو يا خالد أخوى.
ريحانة البطانة: قدرما حاولت الدخول فى بوست ( العلو) الداهى دا بعدما يفتح البوست يحولنى لموقعه العجيب.
تراب البحر من أمس العصر بدأ يظهر وأعتقد ممكن نقول ( ذهب الظمأ وابتلّت العروق وثبت الأجر إنشاء الله).
العم كمال كيف الحال غايتو سعالك دا فيهو قولان .. رسالة لأم عبدالله : ياأم عبدالله ودشيقوق حكايتو حكاية في هادا الزمن بقى ربط اللسان ماكفاية أقبضي أبو جناك و وهِطي في التاية دقي البربندي ومتنيلو الشاية ... والله ياعم كمال قبيل هفة لي أغنية قلت أطلب منك تجيبا لي مكتوبة عِلا هسع مرقت من بالي ! ...
ود أبوالقاسم
Quote: قدرما حاولت الدخول فى بوست ( العلو) الداهى دا بعدما يفتح البوست يحولنى لموقعه العجيب
بفضل الله وجهود الباشمهندس بكري وتنويهك في ذلك البوست أصبح الآن السبيل مستطاع رأيك يهمنا وكل رواد الإنجمامة
عزيزتنا سمية بت طلحــة....سلامات المشكلة انو الرسالة ماحتصل لام عبد اللة لانو حسب اعتراف ود شيقوق انها ماليها علاقة باونلايناتنا دى بس مشغولة مع عربا سااااكت عشان كدة هو شغال..هيييع
اما عن الاغنية فانا حأختار واحدة على ذوقى وانشاء اللة تعجبك بس مسعولة من الخير ود المنسى برضو مشى قندهــار
عمك كمــال
10-27-2008, 08:44 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: أبا أحمد شوف نحن ممكن نخرمج جاى ولا جاى لكن راعى الإنجمامة لا؟
والله نحن الرعية
Quote: راجعت هجيمتك السابقة للأخت سلمى الشيخ سلامة ، الظاهر عليك لسه مواصل الصيام ، كنت دايرك تمشى لينا لمعرض ( الكورسيملك) ولا شنو ما
سلمى قول الأسد والله كتبت كلامي وخايف تلخمني أم كف واحد تجيب خبري أنتَ ما شفتها في أغنية عيال الجوير جاتني هايجا كيف كان ما بيني وبينها فضاء كان فطستني
Quote: عارف وتجيب لينا الصور الموجودة فى المعرض بسراييفو الممزوجة بالمسحة الصوفية كما ورد فى الجزيرة اليوم.
تعرف يا أبوالقاسم أنا طبعا ما مقيم في البوسنة لكن زرتها مرتين أنا مقيم في كوسوفا نعم هي برضو كانت ضمن يوغسلافيا الإتحادية لكن تبعد من البوسنة حوالي 550 كيلومتر .. كوسوفا سكانها الغالبية من الألبان بنسبة 90% والبقية أقليات ( صرب .. بوسنوين .. أتراك .. غجر .. قوران .. هشكال ) البوسنة سكانها هم البوسنويين وعاصمتها سرايفو والتي قال فيها الشاعر عند حصار الأصراب لها ( دام الحصار اربعة سنين ) وهو أطول حصار في التاريخ الحديث..
يا سرايفو سألنا فأجيبي عن غِمار الموت والكرب العصيبِ عن بحار الدم جياش النزيف عن فِجاج الموت والدمع الصليبِ عن شحوبِ وعذابِ وأغتصابِ ومجاعات ويُتم وهروبِ عن صباح يشعل الأفق لظى فإذا الأرض بساط من لهيبِ عن مساء ينشر الرعب وقد زاغت الأبصار عن هول النحيبِ ياسرايفو سألنا وأنتظرنا فأجيبي ياسرايفو ألا معتصم أو صلاح الدين في العصرالكئيبي عصر من ألقوا إلى الخصم يداً وأستطالوا فوق أوجاع الشعوبِ
وللقصيدة بقية
فعلاً سرايفو من العواصم الأروبية التي تجذب الزائر بجمالها الطبيعي ( الماء والخضرة والوجه الحسن ) الحديث قد يطول ويطول عن سرايفو يا أبوالقاسم كانت لنا أيام فيها ونظل نذكرها دوام
تحياتي أبوالقاسم
10-27-2008, 07:30 PM
أبوبكر أبوالقاسم أبوبكر أبوالقاسم
تاريخ التسجيل: 11-27-2007
مجموع المشاركات: 2805
ودشيقوق أرسل رسالة نصية قبل شوية يتحمدل فيها السلامة على عودة المنبر العام ، ومعناها متابع
وكان الأتصال البديع بي السجمان الرمدان ودشيقوق يسكت يضحك ضيع لي 4 دقائق من المكالمة وبعدها نبذ ضيع لي 5 دقائق ثم بدأ الحكي قال والله كل هتش محي الدين الجابو من مايرنو لقى عند أم عبدالله
قلت لي : أحفر أركان الأوض في اتجاه المغارب بتلقى أي عمل مكتوب ليك وأحرقو ( أصلي داير ألحقو الصح )
بكرة معزوم مع بعض بورداب الخرتوم أذكر من الأسماء التي قالها لي أشراقة حيمورة العزيومة في سوق الناقة ( قندهار ) وقال جيايكم يوم 6 /11 فضو الدارة
10-27-2008, 09:08 PM
فيصل محمد خليل فيصل محمد خليل
تاريخ التسجيل: 12-15-2005
مجموع المشاركات: 26041
الاخوان خالد علي محجوب المنسي / فيصل محمد خليل سعدت جداً بسماع اصواتكما وكم كنت اتمني ان التقي بكما ولكن لو شاء الله سنلتقي قريباً اخوكم النذير - سلوفاكيا
10-27-2008, 11:01 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: الاخوان خالد علي محجوب المنسي / فيصل محمد خليل سعدت جداً بسماع اصواتكما وكم كنت اتمني ان التقي بكما ولكن لو شاء الله سنلتقي قريباً اخوكم النذير - سلوفاكيا
الجار بالحيطة وليد سلوفاكيا .. الحبيب النذير ودالطاهر تحية طيبة سلاااام نحن والله السعداء بسماع صوتك يا أخي وليتها تكرر عادة يوم سبت بنكون على الهواء المجري مع فيسل هليل وليتنا نتشرف بسماع صوتك مرات ومرات ونمني النفس أن يطيب لك المقام بيننا تحت الشديرات منجمين ومرحب بك في إنجمامتنا يا غالي
كررها يا رائع في الماسنجر وكون بيننا في الإنجمامة
مكان لمتنا وسمرنا
تحياتي وموتي
10-28-2008, 07:46 AM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
خالد علي محجوب المنسي
عفاف أبو حريرة
GamarBoBa
عمر صديق
جعفر محي الدين
ممدوح أبارو
أبوبكر أبوالقاسم
عبدالعزيز الفاضلابى
سلمى الشيخ سلامة
فيصل محمد خليل
ALGARADABI
انعام عبد الحفيظ
فيس بوك
تويتر
انستقرام
يوتيوب
بنتيريست