|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
هـــوي يا وليـــــد
الشاعر محمد ودبادي الغكودابي قال ود بادي نظمت هذه وكُنت في بداية أيامي في جامعة الخرطوم في حق ود بندراوي من اللذين اُطعموا بملاعق من ذهب. قال ود بادي كُنت أيامها مثل عود الطندب المحروق وكان هو كورقة الصفصاف يتقصع بين الأصابع تتدلى سليسلة ذهب على عنقه .. كان الموضوع نقاش عن أهمية الريف وتأثيره على البندر .. فبدرت من ذلك الوليد ما يحط من الريف فما كان من ود بادي ألا أن رد عليه بهذه القصيدة.
هوي يا وليد يا دلوعة يا مرنوعّة أعدل إيدك المفدوعة وأتلحلّح وأقيف دغرّي وهات صدرك معَ صدري وأتشدّع ....
وليكَ الحق شان ولدوك في إسفنج وحتىَ أول جديد سوهّو ليك بي البنج وانو هوايتك تلعب البنق بنق وليكَ الحق
عشان فطموك بعدما زدتَ في سنتين وفي سن عشرة نومك علي الإيدين غِطاك بي الشاش وفرشك بي حرير الصين والبدورّو بتلقى غاب قوسين أبوك مليان وجيبو سمين وفاتح لك حساب في البنك والتموين وليكَ الحق
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم سلام ...
خطاب للمرحوم .. محمد افندي سليمان رحمه الله .. لعكير الدامر
اهديك السلام يامركز العشمان عساك في صحه تامه وفي نعيم وامان تمام فراقه يادود كيده ابوعرمان ومشتاق الغريب لامن يموت ندمان ماتقول زينه الخرطوم ولا امدرمان ينسيني العشير الليله انا ظمان رحولي من البلد ياخال بلاوي زمان ومرضا قاسي ما بداوي الحكيم لقمان مبتول جسمي شوق اما القلب بردان ومنحرف المزاج من الانس حردان اصبح قلبي لي خيل الوله ميدان بقيت كالمحتضر جات روحه في الوردان بي حكم راضي وباليقين شبعان وبي القسمه القبيل مقسومه لي قنعان ما بضيق غير شبيه الفي الذنوب طمعان شبيه الفاجر النمرود جنى كنعان كيف حالة البلد كيف حالة الاخوان وكيف اكل ابن ادم وسائر الحيوان غلاوة العيش وعدمه الهزت الاكوان اظن لعبت كتير بي صحة البدوان ما بستاهل الدامر يكون تعبان وما بستاهل الجوع رفه العربان احبه دوام مندي وخيره لي البيبان وعربة مخرفين عرفهم سمن والبان .
( منقول ) تحياتي ...
حاتم هاشم .
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصل مع ودبادي هوي يا وليد
عشان ماخضتا في وحل المطر والطين ومن الترعة ماسويت شراب الهين وما قيلّته في ضل دومة بي فرعين وما شاقّقتّا عِرق النيل مع الوزين وما عانيت وقوف الصف ورا التموين
عشان يا أنتَ مابتدرّي سِجل أبواتك البدرّي دحين أسمع ... سماك الباكي مجدّو الزال ياما كانوا تحتو رِجال أبوخنجر وأبوشوتال والصقر البجيك خوجال صوّتن كان يمين جلجال ومكسيين كمال وجلال لكن الزمن أسرّع سيفّن بِلحس الفقرّه وكانوا بيضبحّو الشقرّه وماكان برضّو بي الحقرّه وكانوا بضوّقو العادوهو نوم الكوع وكانوا بموتّو في شان حرمة المفزوع
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم سلام ...
قال عمر البناء :
متى ارجع لى ام در واعوده ....................................
متى ارجع لى ام در واعوده اشوف نعيم دنيتى وسعوده امتى ارجع لى ام در واعوده امتى تلمع بروق رعوده حظوظى تنجز لوعوده روحى ضاعت فى النار قعوده لى هون يا ربى عوده اشوف حبيبتى وانظر خدوده عساها ترحم تكون ودوده ومسامعى تسكر من ردوده وتطفى نارى الفاتت حدوده اشواق كتيره الدموع شهوده وللمنام العيون زهوده فى الهجر روحى ضاع مجهوده لم تزل حافظه لعهوده ما كانو يعرفو ناس بلوده الغرام من قبال ولوده من يوم وضوعها الفى الخير خلوده فاتنة طايعها و جلوده ابواب لقاها ام خدود موصوده ونار العذاب فى الفؤاد محصوده غير محاسنك مين يسودا الملوك وياسر الاسودا يا المن فراقك ايامى سودا خلاف وصالك دايما كسودا هناى ومنية روحى ومقصوده اشوف رشيم يضوى بين فصوده .
.................................... تحياتي ...
حاتم هاشم .
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصـــل مع الشاعر الجميل محمد ودبادي وهوي يا وليد
الجعلي اب شراباً حار وقالوا بعدّي يومو خنق
والشايقي البياكل النار وفوقو نحاسو متخنق
ودرفون البجا الصقار حاقب سيفو يأكل الشِق
والغرباوي عينو شرار وكضبوا القالوا عندو عِرق
والنيلي البعرفوا كُتار علي كتل الأسود جرّق
والبطحاني والشكري وغيرهم من أهل فخري
ومنهم أصلي لا بشبع ولا بقنع هوي ياوليـــــــــــــد
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
هوي يا وليــد حصل جربتّه كب السارية في الفلقة وخلا العتمور وشفته بروقها تتراقص وتتحرقص تقول مطويّه في قرقور وعاوي الزيفة ينفخ في جبال النقعة زي الصور والحصحاص يجرفّو السيل يكنسّو علي مهاوي الخور وقلب الصاقعة يطفرطق يكب النار دمار وشرور وشفتّا الحال ... عرق مقلوع ... جبل متروم ... فرع مسكور ... جمال غرقانة بي حالا وحد الموية في الغرغور ود ابن آدم المسكين نجاتو تحت قرون التور والعوتيب يجيك يجري .....( العوتيب هو اكبر مجرى وادي في بين شندي جبل جاري ) إشيلك وانت مابتدري وما بنفع .. هوي يا وليـــــد
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
هوي يا وليــــد
حصل سادرتّا بالديداب وقِدامك مراحك وراكب الخباب ودربك طولو يملا العين سحاب وغُبار ومويتو سراب وعوّى كرباجك البكاي يبكي علي ضهور الضمر الانجاب وتسري الليل وماضوق جهدّه لو كان النجم ماغاب وبعد أيام تجيك لفحّه ويلوح لك في البوادي سحاب وتكرف من دُعاش العينة تملا رئاك عطر واطياب
تلقى الوادي زي ماتقول ما كان خراب ويباب وبت ام ساق تقيل من ضُحاها علي المعالي ونسمة الهباب وتفرش ليك حزمة نال تحت سيالة تريانة وفروها قراب وتنفخ كل آهاتك مع المزمار تصوغ ألحان ملانة شباب وتنسى الدنيا كل الدنيا ماعندك معاها حِساب خِلاف برقاً يشيل حرقاص ورعداً تقول رصاص وكت إتفركع هوي يا وليـــــد
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
هوي يا وليـــــد
وعاد تتحزم الجِنيات وتتنظّم تقيف في روق وكل واحد يهز ضِرعاتو والحِجبات تزح لا فوق جفير الخوسة فايت الكوع وسريو مع العضل مطبوق والطاقية تحت الحاجب المعقود هديْت ام زين ... وما مشرية من السوق ويتقدم عريس السمحة رافع صوتو كانوا بسوقو بيهو النوق والعنجاوي ينزل في ضهورن بس تقول منشحطة فيها بروق ويبدأ مجرو بي الترقوة ويتحدّر مع الضلع القُصار ملصوق وأحمر عين يشم الدم بعدما يرش بنات عمّو ويزيدن شوق وثابت حيطة لا بتهز ولا بتلز وصاري جبينو كلو عروق وقال بعد العقد طلقانة مايحجزوهو ... ألا يخلو ضهرو شقوق هناك الحال مغيّر جد وهيجة الناس تفوت الحد وكان حجازّو مدَّ اليد بتسمع كـــــــع هوي يا وليـــــــــد
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
هوي ياوليـــــد
هوي يا وليد حصل شارفته دغشّن بدري فوق حجرة مخانق النيل وفي سنة تساب وحزم القيف وطفح الكيل وشفته الهيبة فوق اسيادها والشخري البكتل الحيل وشفتها الجاري يحفر في طرف كوكبنّا بس داير يشقّو عديل إجيك بي صدرو متحزم ومتلفّلف صفوف في صفوف يحاكي الخيل ومويتو الهايجا تبلع جــــب وتجقم فوق مدالق السيل وفوق الرمله منشري العشاري طويل معشعش بين نوايبو الطير حليلو جزايرو جاها النيل وحالف مايخلي فيها شبير حزم اطرافها يكسر فيها بي الهدام وينخر فيها بي القرقير وبكرة يموصها يشرب طينها ويزرع فيها شلالات هدير وهدير
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
وتكسح مركب النواتّه عايمي علي قرون الموج جناحها كسير ورواسيها مالي أصابعو في المقداف يقوم لا فوق وأجي من تاني فوق الدفّه رافع إيدو ينده جملة الصُلاح وأهل الخير هناك الموت .... يمين شافوهو شوف العين ومافي شفيع ومافي مجير تقول الزول أعرف أجلّو ومكان موتو لولا إنو ماكشفو الآله لي غير عاد مادام رُقاب الموج تمد لسناتّه .. وفوق لي القيف تكب الصير شن فضل بلا الغرق البدور ناعي
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
هوي يا وليــــد
وفعلاً كان وياهو مصير ومشت المركب الغرقانة بين موجتين ... وطفروا منها النواتّه قلب اللُجة قالوا أخْيِر تماسيحاً يقالدّو الموج يصارعوا عتاوة العرق الكِتالو مرير .. ساعة يعوموا بي الضرعات وساعةً فج ... صدورن ضُمه ما اتبلت ولو قُطير ... ديل يا وليد ولاد النيل ... رضعوا الهيجة من صدرو ومنو الطيبة رضعوا كتير الواحد فعاليو كُتر ونضمو دُقاق نهرتّو يمين تسوي الفاق ومراً لا ضاقوا لا بنضاق كفاك آ وليد بلاش فاقاق خلاص انا تهتَّ في الأشواق ومابرجع .. وهسع ضُمه لا شايفك ولا بسمع ...
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
ألف صلاة وسلام عليك ياحبيب الله محمد
ياعـديــلة الرحـمن للعـقــّاد حـصـن وأمان سـيّـرو للرشــا والغزلان
عِـزّة وجاه وهيـبـة كمان عريسنا الكله ذوق وأحسان
مابخـيـب رجـاء العـشـمان جونـا يـبـاركــو لى الحبّان
البـدر النـوّر الأكـــوان أنا قـلبــي ليــك فـرحــان
مليـون مبـروك كمان وكمان بالمـال والبـنــون تــزدان
سمية الحسن محمد طلحة الصفحة الجديدة دي نكهتا زي بيت العرس منو الناوي يعرس ياخالد ؟ عشان نعمل ليهو عديلة
دمتم ودام عليكم الهنا والسرور
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
العديل والزين
العديل والزين أنا منايا لي فال الحسن والحسين مرقوا وشــــــــــــدو لي
شدّو لي الجواد أنا منايا لي نهمّو لي القواد أنا منايا لي يا رب العِباد أنا منايا لي تمْ لي المراد أنا منايا لي
شدّو لي البتاتي أنا منايا لي الأسد العاتي أنا منايا لي يا نعمة حياتي أنا منايا لي تسلم يا ثباتي أنا منايا لي
شدو لي الثمين أنا منايا لي حقبّو لي التنين أنا منايا لي شبا ماسك الدين أنا منايا لي تسلم يا الخزين أنا منايا لي
شدّو لي الأغر أنا منايا لي يا تور البقر أنا منايا لي يا ود النقر أنا منايا لي الدود النتر أنا منايا لي
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الليلة سار يا عشايّا يا عديلة لي وشُيم شال الجدايّا البندورّه لي
حننو وفرحت أمو الجنيات في بيتو إتلمّو ساير لي بت أعمّو البندوره لي
سيد الحيشان التلاته عريسنا جالس بي إنبساطه كسّى الجيل الفي السباتّه رقصت لو ومسك حِجباتّه نتف الكيس قطع الرحاطّه وختّا المية لي المشاطه يا عديله لي
باكر نركب البابور وعريسنا حالف إضبح تور نمشي لي البقعة ونزور
بت العز والعجن نبيه داسة لكل فن سوّت ليهو القيد حرن وخلّت الأبكم رطن
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
وعاد تتحزم الجِنيات وتتنظّم تقيف في روق وكل واحد يهز ضِرعاتو والحِجبات تزح لا فوق جفير الخوسة فايت الكوع وسريو مع العضل مطبوق والطاقية تحت الحاجب المعقود هديْت ام زين ... وما مشرية من السوق ويتقدم عريس السمحة رافع صوتو كانوا بسوقو بيهو النوق والعنجاوي ينزل في ضهورن بس تقول منشحطة فيها بروق ويبدأ مجرو بي الترقوة ويتحدّر مع الضلع القُصار ملصوق وأحمر عين يشم الدم بعدما يرش بنات عمّو ويزيدن شوق وثابت حيطة لا بتهز ولا بتلز وصاري جبينو كلو عروق وقال بعد العقد طلقانة مايحجزوهو ... ألا يخلو ضهرو شقوق هناك الحال مغيّر جد وهيجة الناس تفوت الحد وكان حجازّو مدَّ اليد بتسمع كـــــــع هوي يا وليـــــــــد
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
دلاليك العرس قاجات وريحة المحلب المخلوط مع الصندّل وحنّه مخلوطة في طاسات وضريرة ماليّه خشم الحُق وأم العريس مشغولة بي الدخلّه والمرقّه وبنات عم العريس واقفات يسالمن ديل ... يعزمن ديك ... يجاملن ديل ... شايلات جِرتق مو غِش خرز منضوم مع اللولّي وهلال زي هلال شوال عريس بي الفرحة داير إنشق مِحصن نفسو بي ياسين وجايبين ليهو عضم الحوت ومالي ضراعو بي الحِجبات حِجاب قلاد أحمر حجاب جلاد ودفراج وهاك يا زيطة وجوطه وناس داخلين ونا مارقين وضيف جا وضيف فات
الأبيات من قصيدة ( الدخري يا ود أختي عزالدين ) أجهل من جهلي اسم شاعرها بس نقول له التحية والتقدير على هذه الأبيات الجميلة المعبرة )
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الصلاة علي النبي ريحة اللبان وبخور التيمان أها العرسان يتبخروا ببخرة و7 قرضات حمارات الصباح والعشية ويتحصنوا من عين الأنسان والشيطان ( دقر ياعين ) قل هو الله أحد من عين كل حد من عين العجوز العنطروز من عين العروس التقد التروس من عين الصبي داياً غبي من عين الفتاة التقد الوطا من عين السغير التقد البير من عين الضيف الأحر من السيف من عين الجار الأحر من النار من عين الوالد الشر المتقالد من عين المزاح الأحر من السلاح ياعين ياعنية ياكافرة يانصرانية أخرجي بقدرة نبيا ناقة النبي سليمان عرجت ودرجت .
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم سلام ...
قال عمر البناء :
هجد الانام ................
هجد الانام وانا وحدي مساهر والنحول علي جسمي ياحبايب ظاهر اسبابي الحب الطاهر اسباب سقامي وبكاء طرفي الساهر لااذاي بعادك مضي سيفه وشاهر مره اندب حظي ومره اهتف اظاهر اشكو دهري واناجي النجم الزاهر انت عادل وظالم انت ناهي وآمر يتمني البدر ليك يبقي مسامر كونك دواما في نور اليه مخامر امتيازك عنه انت هادل وضامر بالبان والاسي مال قوامك ظافر علي صدرك .. قنبل.. كم اسلم كافر العيون والضمره والوريد الوافر من محاسنك عارن الغزال النافر كل ما اكتم حبك دمعي بيه يجاهر مابفيدني طبيب مهما يكون ماهر طبي مابين كوثر فاك وبين جواه سنك اللماعه والخديد الزاهر عار صفاه التبري من صفاك الناضر ياخلاصة الحسن في العصر الحاضر الملوك ليك تخضع لنداك تقول حاضر تخشي سطوة حسنك وفيك يتلو محاضر بي وصالك جاحد وبي جفاك مبادر كاليزيد في الجبره وفي بخاله مادر بجمالك وحسنك يالفي عصرك نادر لي ارحم حلمك راعي لاتكون غادر . ............................................
تحياتي ... حاتم هاشم .
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
Quote: الكلمة التي أول مرة أسمع العنطروز |
ياخوي العنطروز دي أنا كنت فاكراها صفة للعجور .. ولكن برجوعي للقرائن : عين الضيف أحر من السيف ، عين الجار أحر من النار .. يبقى العنطروز صفة للعين ( دى تكون خترية خلاس .. عنترية ) وهي علي غير الأوزان العربية ، عنطروز : فعللول ! وهذا مايدل علي ثقافة حبوباتنا الواسعة وشاملة لكل لهجة ولغة .
تحية خاصة للأخ / حاتم هاشم واصل لينا في دربك دا .
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
جرت العادة زمان أن تخر السيرة عصر، وعادة تكون بالأرجل مازالت صورة السيرة ترتسم في مخيلتي، بت عم العريس تحمل الدلوكة في كتفها وتعقبها الغناية تضرب على الدلوكة وتغني يتقدمهم أخوان وابناء عم العريس وأصدقائه والعرضة والصقير فالهم وتعلو أصواتهم أبشر بالخير يا عريس.
السيرة مرقت عصر شايلة الشيخ ابكُر ................
أم العروس جينا ليكي وجبنا العريس وجينا نباركو ليكي ................
السوا سوا سوا والقادر إسوّي .............
الليلة جينا وكيّه لي المابينا ...............
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
النخلـــــة
النخلة ... الصمود ... التحدّي رغم الظروف القاهرة ... العمق الضارب في الأرض جزور راسية ... الإصرار .. متطاولة مقبلة لعنان السماء عزة وأعتزاز بنفسها. تحاكي البان طولا فيهي الصمود والتحدي والعمق والإصرار .. تاركة الرقة والميسان للبان.
النخلة للشاعر المرهف الجميل محمد الحسن حميد
عز الرِياح والنخلة تجاسر تصون عُش الطيور البْينَا تفرد لي الجناح ترقص تميل ما الساق خطيط والجو براح
من الأرض ماشي عرق بعيد هو عرق نصاح يبس جريد ينحت سبيط والنخلة تجدع بالجريد النخلة تتعب في اللقيط النخلة ياها النخلة لا بتعرف تخاف قل المطر سبل الجفاف لا فتوة الريح العنيف طوالي في أجمل وشاح وكل الرياح فوقها بتمر ومن كُل أصناف الرياح النخلة مابتعرف خِلاف ريح اللقاح والهمبريب ريح الصلاح
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصــــل والنخلة شامخة
ما ليها غير تطرح تمور تملى الشواويل والقفاف إنتمّا زين أنحلا دين إطلق ضهر زولاً بسيط واقف علي حد الكفاف ومن ركّة الرزق المُتاح رزقو المعلق في السبيط ينزل كما الطير الخُفاف يقدل نشيط ويحضرا زي شتل الصفاف كل ما النشاف بدأ في السبيط والنخلة لو عنف الرياح الصاقعة أهوال الفصول البعدي آفات الزبول قدرن علي ساق الهطيط تقع وما بتموت روحها المدردحة ما بتفوت في صدر معمر بالخلود
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصـــل والنحلة ترتع في العطاء
تلقاها خشّت في البيوت وبكل فراح مِنْعم مُشاط من شوكها كان وشقّت مسايرك يا ام سماح أو حتى ويقودّن تقيدبّو الطيبة في نار بي رتياح ليوم عزيز يطلع خبيز دكاي فُصاح يطلع ملاح برّبو ناساتن ضيوف أو زول وراهو شُغل بعيد جابرا الظروف يمرق بي هيتو وشاي الصباح وآخر المطاف والموت بأشرق نسمة في كف الصباح الموت بأسرق بسمة من شال الصباوتوب الزفاف النخلة تربايتْ العباد وجلاله تتحول رماد ورماده يتحول سماد
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
النخلـــــة
ورماده يتحول سماد وسماده يدخل كم بلاد وديان تخدّر والبقاع شوف كيف كِفاح النخلة يوت تعبر على مُر الحياة من بعدما مَلتْ البلد تمراً معمر بالإلوف شايل مِخلف بي رتياح طول المصير والنخلة حوت الصحرا أو جدي الجروف تلقاها مرتاحتْ الضمير
النخلة تحت الواطه سر والنخلة فوق جهرة نصاح والدنيا أوسع ماتكون والجو براح وكل الرياح فوقا بتمر ومن كل أصناف الرياح النخلة ما بتخبر خلاف ريح اللِقاح والهمبريب ريح الصلاح يا معوض الليل بي الصباح ومعود النار اللهيب روض نخلتنا علي الرياح في لُجة البحر الغريق وأدي الرواويس الصلاح
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
ملقّطه ... وكلك إسبيرات متل فضية العدي ضفورك من صنع باريس رموش عينيك هولندي مساحيق وبدرة مصرية بي صابونة بتهدّي كدي أسكني أقلعي الباروكة كان ماتشبهي الكودّي ولا تعالي بي فستان قصير ركبّي كان ماأحلف عليك سُقدّي أنا إن وديتّك أرقي هناك بتشيلي الصفيح تردّي وان كان مالقيتي الباسطة من الدومة بتكدّي وان قُتا ليك مراحنا جعان تعرفي تمعّطي السِعدي وحات الله من نص حوض علا تمسكك الوردّي
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
انتِ قايله السماح في الشارلّي أنا زولي سماحتّو بي الفردي ( الفردة توب نسائي قطني ) وكان قايلي أنتِ جميلة زولي في الجمال هندي وكان قايله زيك مافي عايني وفي النجوم عدّي وكان قايله أنتِ براكي أخجلي وماتقولي كدي أمانة الدنيا ما مليانة بي الحور وحوا كم والدي واحدات في رفاعة اب سن وحدات في غرب شندي وعاد عليكم الله يا اخوان وماتشوفّو المطرطشة دي أقول ليها لا تسوي كدي وأخير لِك لا تسوي كدي تقول لي No أسفه sorry زوقك لسَّا زوق بلدي علي انجلات كليمك دا وعلي انجلات خِلقتّك دي وقبال مني ماتعدّي عندي ليكي وصية بقولا واخير تاخديها من عندي عشان عرس البلد عندي عشان عرس المدن شهدي أنا بهرب من البندر وأروّح لبنات بلدي
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
Quote: كاتلاني الطريفية البريدا قريني .. |
سقط هذا البيت سهواً يا ريحانة البطانة.. أصلو العقل بي أحفظ من هنا ويفرغ من هناك. هناك بيت آخر طشَّ مرة واحدة وماقدرت أنحت المخ أطلعو
فيها يقول في بيت زي برق السواري اتقرّن
مالك نفسي مطعونة وتملي زنيني مالك عيني لي الغميده أبيتي تلينّي عطشان وطفح الموية مابرويني وكاتلاني الطريفية البريدا قريني
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصــل مع محمد بادي يرثي سماعين ودحسن
وفجأة إجينا من طرف السما مِرِسيل يَنعْي فوق كلنكاكول غراب هابيل ويبقى رحيــــــل رحيل كُل الغيوم الهامعة متواترات رحيل كُل الشهور العامرة بي الخيرات رحيل الطينة من طرف الجزر يومات رحيل الخُدرة قِدام منجل الهدام جفـــاف وممـــــات رحيل البادية فوق برقّن ورا نجيمات رحيلك مو رحيل أفراد رحيل بِلدان تمام وكمال ياالعرشتّه فوق نخل السواقي الشال وإتمددت فوق النيل من الشلال ولي الشلال ويا هاجرتّه فوق ريش الرهو رحال تظل مرسوم علي باب الليالي سؤال بعد عشعشتّه في خاتر الغُبش موال وإتبلبلتّه من الموية بين السعفة والبلال بعد عِرقّك برق في ترابنا حد ماشال وإتمددت غادي وجاي يمين وشمال
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
مشوارنا الطويل مع د/ ودبادي العكودابي يرثي سماعين ودحسن
بعد الحال منو البقدر إجيب غُربال يغربّل روحك المدسوسة في الأجيال وفي نفس الدُغش مبثوثة وفي الشتله وناداها السال بعد الحال منو البقدر يطاول حرفّك المعقود علي برقاً حرير وهلال مسطر فوق رُقاب البرد فوق الصخرة والتِمثال بعد الحال رحيلك ياالمشرشر في مداخل الدنيا كالأجيــــــــــــــل رحيلك هزّه في العقدة ومجامع الروح كما الزلزال أرمي الدمعّه فوق الدمعتين يا عين وبعد الليلة حابساها الدموع لي مين كتير من شاف ديارو العامرة هاجت فوق درب وادي كتير من عدّا فوق دربن بلا يوادع بلا يناشد كُبار القوم ياخد الراي كتير ياعين كتير الفاتّو ماحضرو وكتير الراحو ماعادّو ألأ الناعي عمرو ماطاف البلاد من جم
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
مشوارنا مازال في أوله مع دميعات ودبادي تخلد ذكرى سماعين ودحسن
وتبكّي طويرة الأحزان سنين وسنين مصيرها تساسّق المسكينة بين الباسّا والباساي ترفرف من سخاي لي سخاي وتسأل عن صدور مغسولة بي الدوباي وتنزل فوق حلقات مجالس الشاي وفوق حلقات ابوي الشيخ وفي الشاشـــــــاي تبل الريق من الدمع البيوشّل من ارامل الحي .... وتمرق من محاري الناس تول وِل فيها جرس الصي وتصرخ فايقة ياجلابة أقيفو لي وتسعل ضايقة ماشفتوهو زولاً لي تضيع فرحاتها في المجهول ويرحل من دريبها الضي
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
منو البقدر إجيب ليكم خباراتّو رقصة موجو في الشاطي رواويسّو وحكاياتّو رقاد القمرة جنب النجمه فوق رملاً مراياتّو ولما تغيب ينوم النيل موشّح بي عباياتّو وزي ماالنيل يضيع في الدلتّا يتلاشى ويموت مشلول إحنّا كمان تفيض آمالنا تضيـــــــــــــــــع تنشرّه في ساحل المجهول وا أسفــــــاي وا أسفاي علي حرفن شمخ في الطول وكيف الليلة في بطن التراب مسبول حرام تبلينا يا أيام حرام تملينا شوق وهيام
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
تارينا بنشيل من حرفك الجواني يا ُسَماعـــــــين ونقعد في حواشي الحضرة وانتَ تكب علينا غمام وماعارفين حروفك نازفة من شريان ومن دم القليب الأصلّو مابريان لما شربنا لما طربنا إتلفتنا ما لقيناك يا إنسان وشفنا رويحتك الشفافة ركبت هودج الأحزان محمل فوق جناح ملكين ودربو علي مشارف الواحد الديان قوايمّو شقايق النخل الوقع حزنان مضفور بي سعف يابس مفرّش بي كباد أماتنا والحبان مزمل بي حبال صبرن فقدنا زمان مضلل بي الدموع شرقان عجيب ياهودج الأحزان مواسم الهجرة ماحانت ولا زمن الرحيل قد حان نسافر ليك وزادنا الشربّه من بحر الحُزن والآها والحِرمان وداك اليوم كان وداع الهودج المتهادي جامع رجال الحضر والريف طيور السافل المحزونة جات بي ليله تاركا جناها للريح والمطر والزيف وروح ترهاقا والعباس وروح أبواتنا وريحة الماضي كلها جات
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
ومن ملوك شايق وقف شاويش مِنكّس لي حرابو واقف بي قفاهّو التابعو شايل سيف وبعد الليلة كل بنية تبلبس فوق صديرا إكليل يكون مزروع فيهو قلب الشهيد وأنتَ شهيدنا يا اسُماعين ياالله يالله ياالله بعدما شلتّه اسماعين وفات معاهو باقي كلام وباقي حنين ياالله بعد الفجعا نظل شاكرين نظل واقفين علي بابك ومعاي طلبين يكون عبود مع ودتوم كذا شاهدين قِدام قبر الولي اسماعين نظل واقفين ويوم الليلة والباكر إلى ماشئتَ ياالله إلى يوم الفصل والدين وداك اليوم يكون يومنا نقالد شيخنا اسماعين
يرحم الله اسماعين حسن رحمة واسعة واسكنه فسيح جناته
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نحن إن كان فرحنا فرحنّا كُتر وإن كان حزنا حزنا كُتر هاشم حسن الدابي يرثي عوض
ذاك الطفل الذي شب بين أهله درويش هائم في بلاد الله الواسعة لا هم له غير الضحك في وجه من يرتب كلمة طيبة كانت أو غير طيبة، يتيم الأبوبين شبّا وأشرفت على تربيته ورعايته خالته الحنون خرج في ليلة من ليالي تساب سنة 1988 وكت إجتاحت السيول وإنقدّت السماء مطرا وهاج البحر هيجة وثورة تجتاحه كل حزمة أعوام الماء من كل صوب فهو خير من رب كريم لطيف بعباده يرعى عيون بشره يواسي الدامعة منها ويحنو على البريئة ويرشد البصيرة فعينه لا تنام سبحانه.
قيل أن قصة عوض حقيقة حدثت وتناولها الشاعر الفذ حاتم حسن الدابي رثاء خلد فيه يوم فقدان عوض المسكين الهائم عليه ألف رحمة من الله تنزل عليه وهو راقد بين ابويه مفارق لهذه الدنيا الفانية واختار بدل عنها الآخرة دائمة النعيم.
في يوم البحر الجانا وتُسب وقام ما شفتا عوض يا ساري الليل يوم دخل الحلّه هدَّ بيوتا ترا وهدام صبحنا ضيوف ماخلا وراهو صلة أرحام يوم داكا عوض خلاها مرق في سفري طويلة مع الأيام يا ساري الليل
درويش من يادوبو سغير عشرة أعوام الزول زول الله من الصلاح الرفعت عنهم الاقلام دي تركتْ الرسل الداروا الآخرة ام خيراً دام التركوا نعيم الدنيا الدنيا الزايله للعبدوها ولي الحُكام
متجلبب بي تيبان الرحمة غُتا وهِندام ما شفتا عوض يا ساري الليل مِتنعلت بي أرض الله الواسعة خُطى الأقدام متزود شايل خير الزاد خطى وإلهام ما شوفتا عوض يا ساري الليل
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نتابـــع مع الدابي وساري الليل وما شفتو عوض تابع النجمات قام ماشي لي قدام يا ساري الليل
ياساري الليل ماشفتا جِناح جبريل غتاهو بقالّو مظلة جلوس وقيام يبقى لي نجع متوجه أرض الشام ما شفتو هناك إكون مندسي مع الخُدام
فتشنا سما وفتشنا أرض ما شفنا منام في التمر الشايل تكّا سبيطو مدلدل خام في الجرف الاخدر في لباهّو وفي النخام في جدول جاري تسرسر مويتو نعيماً دام
يا ساري الليل أنا داير أُصيك وأديك كلام الروح ان صعدت لي باريها وفي جنات الخُلد مقام لو لاقيتّو في اي مكان في اي زمان روح كلمو وقولّو الحلّه بكت من شوقا إليك تغريك سلام
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
زوبعـــة في ملاعب الخيـــــل من ديوان ريحة التراب للشاعر عليه الرحمة اسماعين حسن أمِسكي عليك عيونك ديل أمِسكِيهن وخليني اللَّروح انفَكَّ من شبكة عُيونك ديل دا شيتن أصلو ماشُفنا لاَ في الناس ولا في الريل دَا ماقدر الله جانا عديل
بِحار الشُّوق بلا ساحل ودَيْرات زي ملاعب الخيل أكون كَضَّاب إذا عِينَيَّه شابن لي عُيُونك ديل مراكبي ضعيفة ما بتقدر تلاوي الموجه عكس النيل
سألتك بالذي سواك تمسكي عليك عيونك ديل يَتاوقن لي زي شُباك منور في ظلام الليل
يكوركن لي نص الليل يشابن لي أنا الغرقان أنا الضهبان وزي القشّه ارجف في مهاوي السيل
عليك ذاتك تمسكي عليك عيونك ديل قليبي رهيف ومابقدر علي الهبباي في عز الصيف عليك دارجيهو في الحجرات بي جنب القيف
عيونك ديل عيونك ديل محيط الهول قصدني عديل منو البقدر علي العقبات زمان نحن جُمال الشيل
حليل الحيل زمان ماانْبَتَّه من صاقعة عيونك ديل
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
من ريحة التراب سماعين ودحسن وكأس المر
قَلبِي مشدُود فوق ضلوع الليل وتر غنىَّ للشوق من قديم ولِي الليلة أصلا ما فتر
جوَّاب دروب الكون بِكوس أرض الحنان حتى أن بقت فوق القمر
شايقني في دربو السهر الريد بزغرد في الدروب رُكانة شدت لِي السفر
يا حليل بريقن لاح بعيد شداني لي أرض الصعيد يا حليل هناك الصيد يصيدك وأنتَ مابتقدر تصيد
ماكلي ريد عطشان وبحلم بي المطر فُرقانة من أرض الدنادر غَرّبت حس القوافل في البعيد بتلوح ومرات مابتبين زي المراكب في الدميرة الكاسحا لجّت صَوبّت ياالله سترك ماخلاص لجّينا في جوف الخطر جيتك وقيع حفيان وضايع في الهوى أنا من رضيع شقيت بحور فوق التراب فوق كتفي يا حمل الدهور مربوط أناتل في الصخور شوف حالي من زمن الصغر الصيف يسلمني الربيع في ناري مشتاق للصقيع وما بستطيع أسكت علي هادا الوجع إن قلتَ شي قالوا لي شيشك دا القدر صابر وماعارف الصبر ياحبان قساي أنا عارفو مُر جربتَ من زمنن قديم حفيان وطيت فوق الحجر لكني خايف والله يا حباني خايف وخوفي ارضع من ضروع الغيب أَمَرْ
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
جواب بت ودخير لأبنها نعيم الليلة رسلتّه السلام السلام يغريكا انتَ ياالزين السلام لِيكا ولي الفي الأوضه معاكا قاعدين السلام يغري الطرابيش والقلاشين السلام من عين شمش لاحد فلسطين أنا مابوصفّك ياصباحي بخاف من العين وأت من عين الخُلوق وادعاك جبرين أنتَ بي العافي التختّك في المصارين تبقى لك هِدم ياسيدي سروال ونعلين الليلة أنتَ ياسيد الحصص وصمد النمرتين وأنتَ ياسيد الشتيل فكَ العراجين وأنتَ ياسيد الجزيرة تكاكّي وزين وأنتَ ياسيد البسوق أرقوق موازين أنتَ ماك عارف قليباً لي مجنين ومابترسل لي جواب فيهو سطرين ومابتقول لي نعيم صباح أمو اشتغل وين أنتَ ماك عارف جواب السلامي إجيني وأطول لي شبرين وإنبسط لي بساطه هي زايدي علي القوانين
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصــــل مع بت ودخير الله إن خلاني طيرة وأحصلّو الحين وألقا في القهوة قبل الرسمي جالس في الدرابزين وينسر بالي بيكم ياالحنيّن بعد الحال معك إن شاءالله جالسين يابا نتلاقى أنتَ طيب نحن طيبين الليلة دايرا أحكيّ لو العذر وصمد النمرتين وقول لو من قِبل الملمات مانا فايقين منطبقات عليا تلاتي واتنين وخَتّي ربع جنيه وبعضاً تلاتين وقالن ما بنقبل عُذر تدونا في الحين وإن قلتا المقد ماجاب لو مدين والعيش ريف مبوّص مامرق هين أصلو لا تمراً مرق ولانا سايقين أنا طلبتّك بالله ترسل لي جنهين أنا طلبتّك بالله ترسل لي جنهين الليلة لا تقول الجواب دا أنا جاني من وين الكلام نظم ام نعيم مو دايري تلقين الكاتبو وراق حسن أسطى في الطاحونة تاجر في الدكاكين وأنتَ في تلاتة سنة مابدوك سبوعين شكرك عندي راقد بالجرانين إلا الجواب ياخيري إتملى بالصفحتين
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
رد اسماعين ودحسن لبت ودخير ( ام نعيم )
الليلة في درب البنات يا يمّا أنا إتبشتنتا وإتبهدلتّا وإتغربتّا دابي وأنا إتوكرتّا في بلدن بتاته بلا الخيول الجامحة فوق الريح تشابي وجوهن يمّا كان شفتي القمر لجلج يضاحك في الروابي عيونن يمّا زي بحر المحيط والموج يولول والعرق لافحني فايت وا خرابي سنيناتن بلا شُخب الحليب الصافي يرهج في الكبابي وريقن يمّا زي خمر التمور المن زمان طامرنّو في جوف المخابي وراقبن يمّا وين رقاب الريل على الحدب البعيد شرفن علي هوّهيو كلابي وعويدين يمّا متل الخِيزران فدعوهو لي وجعي وعذابي
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصــــــــــل
العرجون يصارع في السبيط مندلّي من قلب الجريد والتان ينقط في العسل يا ريت شرابي ولونن يمّا زي لون القمح شوف ضراني كيف الله يضاريك يا الضرضر صوابي ودروبن يمّا عُقاب التيه ومافي خبير بشق التيه علي بلد الدوابي مهورن غالي ومابقدر عليهن وحاتك ضُمّه مابقدر عليهن وكمان شوفو المصيبة نفيستي فيهن ومنو البقدر إمد إيدي علي كيس المرابي دحين يا يمّا راجع لي دريبك وأنا الغرقان وفي الموجات أشابي أصارع في الهلاك يا يمّا قاسي وبعد قربتا لي قيف الشرق تلفحني شيما كاسحا مغربا بي
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الرَحّــــــــول عز العرب لمناهضي عروبة أهل السودان مايقصد به هنا العرب هم كل من سكن خارج المدن في القرى والبادية
إذا ضاقت الحال بالبشر في مقامه، فأن أول فكرة تطفو على سطح تفكيره هي الهجرة .. النجعة.. الهجّة يقفّي يسافر طلب للرزق وتحسين الوضع الاجتماعي ويقال في السودان أن أول من عرفو الهجرة في السودان هم أبناء الشمال من الدناقلة والمحس ومن بعدهم الشايقة وكان بينهم تمايز في تحمل البعد عن الدار والأهل فصمد أمامها بني دنقل ( سئل الدنقلاوي هل القربة حارة رد قائلا : والله المشكلة في العشرة سنين الأولى ) .. أما الشايقي فكان فجاء عدم تحمله للهجرة من الدار والأهل شعراً تشدو به الركبان. كانت الهجرة في الماضي لمناطق الوسط والغرب والجنوب والشرق وقد يمم الشايقية صوب أين توجد أراضي صالحة للزراعة ( ومثل يقال الشايقي كان نجح لي العسكرية وكان فشل للطورية ) في حين ركز الدناقلة والمحس في التجارة.. وأول من عبرو البحار هم الدناقلة ثم عقبهم المحس.
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الشاعر السر عثمان الطيب
وا مغصتي رَحّلْ تلوت الليل وا شقاوتي رَحّلْ تلوت الليل مسالكي ضُلمة ما بتنشق سكت روّحْ نويرة الفرقه جوه الجوف تسوي البق مشيت لا زاد أشيلو معاي ولا زولاً معا إترفّق ولما خلاص بقيت مارق نجيم الليل مشى إتفرّق بكيت وبكيت طريف العين متمسح وبالدموع رقرق عشان مظلوم زماني الفايت والليلي شتت ولي الشمل فرق بسوي الوووب نحاس أحزاني جوه قليبي ينقر دق يوهوّد بي يلوعني وأخاف من المصير وأشفق أوادعْ الناس وأفوت مجبور إجيني نغيم من الطمبور أشوف لي جني وقف صفق ينط لا فوق يطير وإندق وأطير وإندق أدنقر فوق تراب بلدي وأخم بي إيدي في رحلي
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصل مع وا مغصتي رَحّلْ تلوت الليل
وأقول يا ليل وأفارق الدار وأجر فوق الوداع مسدار أنوني أنوني شاقي الواح محال أرتاح ادخّل إيدي في رحلي تراباً فيهو يسوا الكون تراب بلدي أشيل منّو وشم أرتاح أشم ريحة طيبة أهلي منو تفوح ترد الروح عِويناتّن تلوح وتلوح عراريقُّن طواقيهم طواريهم سواقيهم أنين الساقية لما تنوح حسيس البربخ المفتوح وأعاين في تراب أهلي أشوف فيك صورة ما بنشاف وأشم ريحة الكليت والشاف بنات بلدي بنات بلدي طريحاتّن مناديلّن رِقيصاتّن شبابيلّن حليلي حليلي يا حليلي أشيل من زادي وإتكرّف أشوف فيك يا تراب بلدي الحنين الما بيتوصّف سماح ناساً حلاة ناساً بلا السكر طعم قراصّي في قدحاً من الدبكّر كواريك شفع المغرب يقلبّو في الجمر قنقّر ولاد بلدي نقاقيرّم طنابيرّم جبابيدّم سنانيرّم وأفوت يا ناسي في دربي وأقول يا أهلي وا غُلبي خلاس ريدكم ملك قلبي ومنو الغيركم بشيل حبي تراب بلدي بنات بلدي ولاد بلدي
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم سلام ...
Quote: تحية خاصة للأخ / حاتم هاشم واصل لينا في دربك دا . |
الاخت سميه الظاهر اغاني الحقيبه دي بتختك في فوق قلايا نارا تلهلب ذي ابؤاحمد واغاني الحماس .
قال عمر البناء :
زيدني في هجراني .........................
زيدني في هجراني وفي هواك يا جميل العذاب سراني على عفافك دوم سيبني في نيراني لمتين تطراني أنظرك في النوم جوز نواعسك راني طرفي قصدو يراك و ما قصدت تراني ما بسيب حبك و الله لو ضراني يا نعيم أزماني يا حياة روحي و بهجة أمدرماني في الحياة غيرك مافي زول هماني و في بعادك أزاي و في وصالك أماني بلبل الأغصان غنى بي ذكراك و بالنويح أوصاني الجمال خصاك و العذاب خصاني و الدلال أوصاك علي دوام تعصاني يا درر ألحاني يا أزاي و دواي يا راحي يا ريحاني إنت نايم و أنا ألم البعاد صحاني حن عليّ بغرامك و الله كان يمحاني مال فريعك باني فيه بدر و ظلمه و فيه ردفا" باني حين نسيم الليل بي روايحك أتاني زاد عليّ الشوق و دمعي سال هتاني و على عفافك دوم زيدني في هجراني
تحياتي ...
حاتم هاشم .
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
موية السكر نجح فعلها وجابت حاتم,, كدي النشتت حب عيش عسى ولعل يجيب الريحان.. طالتالغيبة والطلّه ..لا تقولي كترة الطلّه بتمسخ خلق الله .. والله وماك رايداني حليفة طلتك لو تكون كل ساعة طاعمة وحلوة .. تكوني معذروة لو قلتي مشغولية الوليدات والبيت .. لكن لو عمل ما بحلك مننا كلنا شغالين ونحصل ناخد نضمة مع الحبان بي نص عين ... النشوف شركنا نقجّو ونتظر ريحانة البطانة
الزول البدور من البوادي ضريبة يبقى موارك الغربة ويبعد الريبة مابتدبّى لي الهاملة البشوفا غريبة ألا السيدا في الدندر مسيلها زريبة
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بــــــــــــــــــلادي
سُماعين ودحسن
بلادي أنا بلاد ناساً في أول شئ مواريثم كتاب الله حصان مسروج وسيف مسنون حِداهو درع كتاتيبم تسرج الليل مع الحيــــــران وشيخاً في الخلاوي ورع وكم نخلات تهبهب في جروف الساقية وبقرحلوبة تتضرع وليها ضرع بلادي أنا تشيل الناس كل الناس وساع بي حيلا ليله يسع وتتدفق مياه النيل علي الوديان بياض الفضة في وهج الهجير بِيشع بلادي سهول بلادي حقول بلادي الجنة لي العاشوها أو لي البره بيها سمع بلادي بلاد ناساً تكرم الضيف وحتى الطير يجيها جعان من أطراف تِقيها شبع بلادي بلاد الصفقة والطمبور وجاراتّن تنق بالليل وبنوتّن تحاكي الخيل يشابن زي جدي الريل
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نغوص بين طيات حروف الجميل سماعين ودحسن
بلادي أمان بلادي حنان وناسا حُنان يكفكفو دمعة المفجوع يبدّو الغير علي ذاتم يقسمّو اللقمة بيناتم ويدّو الزاد وحتى أن كان مصيرم جوع يحبو الجار يموتّو عشان حقوق الجار يخوضو النار شان فد دمعة وكيف الحال لو شافوها سايله دموع ديل أهلي والله ديل أهلي أقيف في الدارّا وسط الدارا وأتنبّر وأقول للدنيا كل الدنيا ديل أهلي عرب ممزوجة بي دم الزنوج الحار ديل أهلي ديلا قبيلتي لما أدور أفصل للبدور فصلي ديل أهلي أقول بعضي وألاقيهم تسربّو في مسارب الروح بقوا كلي أسياد قلبي والإحساس وسافر في بحار شوقّم زمان عقلي أنا محل قبلّتا ألقاهم معايا معايا زي ضلّي أنا لو ماجيتا من زي ديلا وا أسفاي وا مأساتي وا زلي تصوّر كيف يكون الحال لو ماكنتا سوداني وأهل الحارة ما أهلي تصوّر ؟
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الإخوة الكرام / حاتم هاشم وخالد علي محجوب تحية وإحترام زدني في هجراني أغنية محببة لنفسي كثيراً نسبة لمجاراة إحدي مدائح الوالد في مدح المصطفى عليه وآله وصحبه أفضل الصلاة وأتم التسليم لهذا اللحن :ـ
طيبة النوراني فيك آمالي بغيتي وأماني الصفي المعصوم إبتديت بياني بالكريم الحي باري الثقلان جل حي قيوم هاك خذ أوزاني ردد النغمات رتل الألحان على أبي أم كلثوم فوق شفيع الجاني قل ثناياً عاطر طيباً يالساني لاتخف من لوم مدحه الديان بصريح القول في محكم التبيان وأعطاه الشفاعة عموم هاك بغير بهتان آي نبيك يازيد خذها غير توانٍ لاتكن محروم الفسيح متداني والقمر إنشق حين أمر تصفان على الجبل مفهوم حين وُضع في الآن طيبه عم الكون بشذى الريحان الند والقيثوم النور ملأ الأكوان شافه من في مكة بصرة والكنعان أقصى أرض الروم جات بغير قدمان أيكة الفلوات تسعى للعدنان لرضاه تروم الصخر طاع لانِ والرمال مندلجة والبعير الحانِ والعضو المسموم الفُرس والنيران إنطفت يوم وضعه وسعدت الداران بشفيع اليوم الملك والتيجان وبحيرة ساوة حالهم في هوان والقصر مهدوم بدعاء العدنان ساح سحاب الجو صب دور هتان غير هبوب وسموم من عنا وشنآن بيهو طبنا وطاب كوننا من خسران به زال الشؤم آية القرانِ أعظم الآيات وأوضح التبيان تاني مافي لزوم قف أدب يالساني يكفي أن تتبرك غاية الإمكان مدحه يمحى اللوم صحبه الشجعان الكرام الغر وضّحوا البرهان فضلهم معلوم رب في كل آن عنهم أرضى وبارك ثم زد إحسان عنا رضاك يدوم البريق ناجاني في السحر بنسيمه وهيج الأشجان مني طار النوم عددت حالي ماني في عداد الأحياء ولست ميت فاني صرت كالمسموم مابرى الرحمن من خلق ورمال ومن حيتان الصلاة كل يوم تغشى سيد حسانِ بها ودطلحة آله والجيران في حماه يقوم
الحسن محمد طلحة
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
Quote: الإخوة الكرام / حاتم هاشم وخالد علي محجوب تحية وإحترام زدني في هجراني أغنية محببة لنفسي كثيراً نسبة لمجاراة إحدي مدائح الوالد في مدح المصطفى عليه وآله وصحبه أفضل الصلاة وأتم التسليم لهذا اللحن :ـ |
في هواك يا جميل العذاب سراني زيدني في هجراني
طرفي قصدو يراك وماقصدته تراني ومابسيب حبك ولا لو ضراني
طلبك أكيد مجاب يا ريحانة الجنى ود هاشم قطع شك ببحت جرابو بطلع هذه الكلمات الجميلة
تحياتي ومودتي لك لحاتم
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
Quote: طلبك أكيد مجاب يا ريحانة الجنى ود هاشم قطع شك ببحت جرابو بطلع هذه الكلمات الجميلة
|
خالد ياود أمي صلي علي نبيك بالك رايح وين !؟ في شندي أكيد الزول جاب القصيدة ورديت و كان ردي على ضوئها الشاغل بالك يتهنابو إنشاء الله
هسع مالك بتدور تجيب لنا ودشيقوق مِتلِب من الدندر ؟؟؟ الزول البدور من البوادي ضريبة يبقى موارك الغربة ويبعد الريبة مابتدبّى لي الهاملة البشوفا غريبة ألا السيدا في الدندر مسيلها زريبة
ولك السلام والإحترام ولهاشم وأطلب منه أغنية/ ياقائد الإسطول / وشكراً جزيلاً .
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
Quote: خالد ياود أمي صلي علي نبيك بالك رايح وين !؟ في شندي أكيد الزول جاب القصيدة ورديت و كان ردي على ضوئها الشاغل بالك يتهنابو إنشاء الله |
أشهد الله العظيم قبل أن أرد عليك كنت اتصلت اربعة مرات بأحمد وأمه في المجر ... يضرب الجرس لحدي ما يقطع مايرفع زول فعلاً كان بالي مشغول ... وأنا دوماً وبالذات في أحمد بنشغل بالي شديد كان طلبتي مني لحظتها 1000000 دولار كنت فتحت جزلاني ومديتها ليك دون شعور عذراً ريحانة البطانة ومن هنا عهداً علي لا أرد على مداخلاتك أنت بالذات يا ست اللهج السليم ألا لما يكون بالي رايق لك التحية والمودة والاحترام
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصـــــــل مع الدابي
الكَاتمّا في جُواي كتير إتملك الجوف والعصب ما كنتا دايرا أقولو ليك لكن لسان الحال غلب مابنسى يوم ودعتّنا وسافرتا في غُرة رجب خليت وراك الدار حزين إتباكا والدمع إنسكب أعذرني والله العظيم لولا الضرورة أنا ماكتب وأنا خايفا في بعدك إكون الضاحي بحصل مكتسب اليومو داك نا البلد هنوني شايقية وعرب قالو لي خير وجاك إكتب سلامتو الإغترب قالوا لي دوب نجم السعد طلاك من بعد إحتجب يا دوبو بالك إستريح وتنسي العذابات والتعب فضلتا أحسب في الشهور قاعدا لي فوق نيران لهب صابرا وحريصا علي الولاد ما يبقو لي الريح في المهب سديتا خانك من مشيت قايمابو واجبي كأم واب والأسرة يضنيها المسير تتهاوى لو مافيها رب
| |
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم سلام ... ابؤاحمد و ريحانة البطانه و الزوار الافاضل ... حياكم الله .
قال سيد عبد العزيز :
قائد الأسطول ....................... يا قائد الأسطول تخضع لك الفرسان ياذو الفخار والطول أرحم بنى الإنسان مين لسماك يطول ما يطولك اللمسان معناك شرحه يطول والله يا إنسان أصدق كفانا مطول ياذو الحسن إحسان أنا عقلى بيك مختول والناس عقول ولسان ما بنكر المعقول آمنت بالأيمان بالطلسم المصقول بدل لخوفى أمان بالنور سحرت عقول كانت صميمة زمان يا من تحق القول قتل النفوس حرمان وما الجندى والمكتول و طالب الغفران من أيده راح منتول واتوهد النيران فاقد الصواب مبتول مما رأى حيران أصبح زهر مشتول وفاح ملا الجيران يا علة المعلول كم أومى ليك بنان كم من أٍسير مغلول مالاقى فى لحظة حنان يرى وعدك المحلول زى حجة الوسنان والكان سكونه تلول ما ببدلهم بجنان يا حبيبي كون ممهول وليكون ماكان الفى غد مجهول والماضى أسمه الكان نفديك شباب وكهول ونبقى ليك أركان فى حبك المأهول ونخدم السكان يالفى سماك مفصول تنشاف عيان وبيان ما عرفنا ليك وصول وما دنيت أحيان إنت الخطاك أصول يعلم الديان مثلت فينا فصول ما بدرسها النسيان . .....................................................
تحياتي ... حاتم هاشم .
| |
|
|
|
|
|
|
|