و لمن يبدا الخليفة محجوب إنشاد البُراق الفيهو الشفاعة .. لمن يبدا يمسك اورادو الختمية في نص الليل .. و يوالينا بالحكي عن شارع الشوام .. عن عبد الرحمن الريح و نسيبو عبد العليم .. في تلك اللحظة يا ود عثمان و يا معاوية ، تشغلوا لينا كلام عبد الرحمن غنا ابراهيم عوض :
" .. نفسك ابية ، و روحك لطيفة و فيك جاذبية "
05-22-2008, 08:38 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
طلع ابراهيم عوض علي خشبة مسرح السينما الوطنية بامدرمان ناس د. الفاتح الطاهر كانوا حايمين وسط صفوف الحضور و بقولوا ليهم : الليلة حتسمعوا غناء جديد .. و فنان شكلوا جديد
جاء الفنان الذري .. شعرو السبيبي بتقاذفو هواء امدرمان و نسام عمر البنا .. بدلتو موضة و تسريحتو فلتة .. فكا المايك من عامود السيبا .. و رقص علي ضربة بنقز خميس مقدم اب ثلاثة عيون و قال ليهم :
" حبيبي جنني و غير حالي .. حير فكري ، دا الشغل بالي "
من يوما كسرة الكاشف العملا في قطر الحبيب وين ، بقت غنية كاملة .. عثمان حسين ، ابو داؤد ، و الواعي الهميم احمد المصطفي ، و اتحاد طلاب جامعة الخرطرطوم بتاع ناس الاحمدي و علي المك ، و علي نور الجليل ، و عبد المنعم خليفة .. كل الناس ديل و قفوا مع مشروعية الكسرة في تجديد الغناء
" كانت معركة بين القديم و الجديد "
05-29-2008, 08:24 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
زولا كريم الخصال .. امدرماني النكهة .. مقدام و شجاع .. اياديهو بيضا دون مّن او اذى .. و ماشي غريق في واقع حياة السودان .. و دنيا البسطاء و الغلابة .. و تقاسم مع صديق عمرو دي شايقي ( عبد الهادي و د الشايقي لاعب الهلال و المريخ معا ) ، اتقاسم معاهو ايام ورشة الحِدادة بخيرا و شرها ..
سيرة حياة الفنان الذري عند ملوك الرواية :
* صديق محمد فرح رمرم * دي شايقي ، اخو ابو الريف * الهادي الضلالي * محجوب خال العيال
اركان الحكي الاثير .. في فصول مدهشة .. من رواية الزمن السوداني الجميل
05-22-2008, 00:19 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
.. و ما إنفكت جزيرة توتي تقذف ساحة الفن بتلك الشُهب و النيازك :
* بر محمد نور .. رِقة المشاعر .. القوافي السندسية في تلك الرملة البيضا * ابراهيم خوجلي : اسمعني نشيدك وريني كمان في الفن تجديدك * حمد الريح : النوم فد ليلة في كل عام .. نوم اليقظة و الاحلام .. عذابات المُحب العاشق ..
في إنتظارك يا عمار محجوب زكي .. وافر سلامنا للاهل
05-22-2008, 00:22 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
ومن اجمل ما كتب الجاغريو .. غنا ود اختو احمد المصطفى بركات :
* طار قلبى مني * حبيبي انا فرحان * الفي العصر مرورو .. سمحة عند خلف الله حمد .. و كمان بالاوركسترا عند سميرة دنيا * و اسمر لونو فاتن جسمو .. يزدري البروق فر بسمو .. سمحة عند زول توتي : ابراهيم خوجلي * و البكائية الفانتازيا علي ذاك المنديل الضايع .. المنديل الندهو ليهو برير و النقر .. و ود عيسى الفي المسيد
05-22-2008, 00:24 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
بكرة يا قلبي الحزين تلقى السعادة و السرور يملاء حياتي و يبقى زادا
.. و لاتزال غنائية الجاغريو تلك ، تعانق افق الجمال السوداني:
" حبيبي ، انا فرحان .. يا ريت يدوم هنانا "
إنها مدرسة الغناء الاوركسترالي التانية .. تعددت فيها اللونيات و ضروب الشعر و النظم المُغنى .. الي ذاك المدى الذى اتانا فيه حمد الريح صادحا بتلك الاهزوجة البديعة :
الف مرحب مرحب بالأستاذ محجوب خال العيال وجه النيل المشرق والذى انهمر علينا فى بوست تاريخ الغناء فكانت السعادة بلا حدود .. مرحبتين . مراحب . مرحب بمحجوب وهو يحمل صناديق حلوى الأغانى ذكريات تلك الحناجر التى توقد فيها الحنيين والحب والجمال . مرحب .. تحياتى
05-22-2008, 04:30 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
الف شكر أخ معاويه .. الحسن . الحسن صاقعة النجم . مافى طريقة تعافر جاى وجاى مع الحسن . مافى كلام مع الصاقعة . مافى نفس للشهادة . الكترابه تقول لى هولوفيلد زى ناس هولوفيلد ومايك تايسون وجوفريزر ديل الحسن بسكهن بى العصايه ساكت . دى يا طراوة عضلات حقن ساكت . عضلات جداد وكتشب وبيرقر فالصو . الحسن يازول اسعل منو ودشيقوق .. تحياتى أخ معاويه .. ____ أخ محمد عثمان شنو؟ ارجو أن تكون عافيه 6 ارادب سلام
05-22-2008, 08:29 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
.. يا ود المنسي : الجاغريو شاف تحية كاريوكا في الفلم الشهير (لعبة الست ) .. قام زاد علي الاغنية:
يا قلبي السلوكا كتلوكا و احيوكا لو شفتو ناس آمنة ايه يعني كاريوكا؟ !
تاني محمد احمد عوض ... شوفو الق التامبورين (الرق) شوفو رقة الالتياع و وهج الغنائية مثلث برمودا الخطير : محمد احمد عوض ، عزيز قسم الله و الطيب عبدو كلمات و الحان الكابلي : عشمتيني انا في حبك ليه رسلتا بت عكاشة .. هدية للخليفة محجوب خال العيال
05-22-2008, 11:23 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
يا أحمد، الواحد يباريك انت وأحمد التاني ينسى الفرض والنافله ، على كل، أنا ما دايرك تمر بغنوة أحمد المصطفى ساكت ، والله مغروض فيها لأسباب إنسانية بحته وربنا يجعلا ليك في ميزان حسناتك. معليش ، ممكن يكون معاويه جابا يوم وفاتت علي احتمال مروري بكوكب الزهايمر ، الدنيا أصلها كده.
ياريت يدوم هنانا.
05-23-2008, 03:14 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
الأستاذ محمد عثمان أحد مشايخ بوست تاريخ الغناء يتجدع فى أبوظبى . بختك بالتجدع . بختك وانت تستمع الى تلك الدفوف غناء صيد المحار فى الخليج غناء اهلى اجدادى بدوان الصحارى غناء حلم السفر الى بلاد النيل الافريقى الصيد الصيد يا محمد عثمان جلب لنا الغناء مثل ما جلب لنا نهر العطبراوى الصندل والشاف والكليت . عليك الله يا محمد جيب لى من سوق راشد معاك طاقيه يمكن حلال الشبك يحلها والواحد يجى . تحياتى ...
05-23-2008, 04:07 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
دكتور احمد طرواة وعثمان موسى ومعاوية يا له من ابداع... يا دكتور ياخى انا عندى شريط مبالغ لي عمنا مبارك حسن بركات ومعاه جمال فرفور بالعود شئ ما معقول ابدآ.... ففى اغنية الخوجلاب للعمدة عثمان وصف مبالغ وكأنى انا فى ذلك الفرح او العرس فى الخوجلاب بيقول فى الاغنية... ماكنت رايق وساكن فى صفا وتأمين... فى الخوجلاب يا قلبي مني شالك مين.... ديل البروق الشالن ام درر باسمين مابين ظل الايكى ونفحة الياسمين.... ام الشلوخ تلاتة وتحتو وسمين... بأسم روايح الوردي والذلال والتين... فوق الجمال الكنا ليه ملتفتين... بقى ديسك اطول منك.... انا شوقي دائمآ زائد ماشي فى تحسين... انا صبري قلى اشهد بأذاي حسين.....
تخريمة معاوية انا سوف اكون فى دينفر من يوم الاربعاء 28 الى الاحد مع طارق سيد ايوب اتمنى ان تتيح لي الظروف بلقياك
سيف
05-23-2008, 05:41 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
(ما زالت نواقيس القبور في الشمس تصرخ هاهنا موتي حدود توهمي شمس بعمق الجرح ترقص في عيون الحس تزحف تحت أنسجة الشعور)
يا وجعي عليك يا سند
رحل أهم ناسنا الذين بنوا أجسادنا الأثيرية خلية خلية،
بيني وبينك تستطيل حوائط .. ليل ... وينهض ألف باب بيني وبينك تستبين كهولتي وتذوب أقنعة الشباب ماذا يقول الناس إذ يتمايل النخل العجوز سفاهة ويعود للأرض الخراب.... شبق الجروف البكر للأمطار حين تصلّ في القيعان رقرقة السراب عبرت ملامحك النضيرة خاطري فهتفت ليتك لا تزال للريح خمرك للمساء وللظلال والبرق لي .. والرعد والسحب الخطاطيف الطوال تروى هجير النار تحت أضالعي الحرّى وتلحف في السؤال كيف ارتحالك في العشيِّ بلا حقائب أو لحاف ؟ ترتاد أقبية المكاتب والرفوف السود والصحف العجاف زمنا يمصّّ الضوء من عينيك يصلب وجهك المنسيّ في الدرج العتيق أثرا كومض شرارة تعبى على خشب الحريق كيف ارتحالك أيها المصلوب مثل شواهد الموتى بزاوية الطريق سكن السحاب ومرّ طيفك من جديد نثرته كفّ البرق حين تلاحق الإيماض وانعتقت شرارات الرعود أرخى وأزهر ثم طار زنابق كالفجر لامعة الخدود حلق المرايا رنّ كالناقوس وانفرطت ملايين العقود فإذا هممتُ توارت الألوان وانتصبت شبابيك الجليد أنا في الرياح مسافر يلقى على الأبواب جارحة الردود بيني وبينك تستبين مخالبي وتسيل من شدقي الدماء وحش أنا غول خرافيُّ العواء تحوى توابيتي دقيق الموت تزحف من سراديبي ثعابين الشتاء سبري: عجين السدر سن الحوت هيكل مومياء بيني وبينك ما يراه الناس سروة شاطىء ناء وزهرة كستناء تتلاصقان على الرمال فتذهل الدنيا وترتعش الحقول كيف التجاؤك للتماثيل التي أسنت على برك الوحول ؟ منك الشباب عصارة النبت الجديد ومهرجانات الفصول ونراك تحفل بالعواجيز العتاق صفائح الأيّام مقبرة الأفول بيني وبينك سكّة السفر الطويل من الربيع الي الخريف تعلو قصور الوهم أنت ومرقدي في الليل أتربة الرصيف هم ألبسوك دثار خزّ ناعم الأسلاك منغوم الحفيف ودعوك تاج العزّ فخر العزّ مجد العزّ شمس العزّ عزّ العزّ صبّوا في دماك عصارة الكذب المخيف وأنا الذي حرق الحشاشة في هواك ممزّق الأضلاع مطلول النـزيف بيني وبينك قصّة الشعراء صدر غمامة يلهو على الأفق الشفيف هذا أنا بحر بغير سواحل بحر هلامي عنيف لا بدء لي لا قاع لي لا عمر لي لكنني في الجوف ينبض قلبي النـزق اللهيف
ماذا يمكن أن أكتب الآن ومن يعيرني الكلمات؟
05-23-2008, 09:12 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
.. جاء الراحل حسن الزبير ، إمتدادا لعتيق و عبد الرحمن الريح مواصلا و مُعبرا عن تلك المرحلة الانتقالية ما بين شعر المدرسة الفنية الاولي ( الحقيبة ) ، و مدرسة الغناء الاوركسترالي التانية
.. وجاء فريدا و متميزا .. بارع في إختيار مفرداته و تعابيره الشعرية التي ظلت دائما ملامسة للوجدان العامي .. و ثيقة الصلة بثقافة الغزل السوداني - الشعبي الدراج
.. فقط ، يكفيه انه كتب لمحمد احمد عوض تلك الغنائية المؤثرة و الراشحة بجميل المعاني :
" انا فاكرك معايا "
.. الق التامبورين السوداني ( الرق المسودن ) .. في يد محمد احمد عوض
.. يوم ان تخطى عبد العزيز قسم الله حدود كونه ضارب للدمبا و شيال فقط .. الي كونه مغني كامل الحال و الصفات خلف صفيهو محمد احمد عوض
.. ارقد في عليين يا حسن يا رقيق المشاعر
.. يا ويح هذه الحكومات الغريب امرها ، إذ لم توفي عتيق ، و عبد الرحمن الريح ، وحسن الزبير حقهم .. فكانوا يلهثون في دروب الحياة اليومية تطاردهم المثغبة و يحاصرهم الهوان .. غير انهم في قلوبنا باقون .. و في ضمير كتاب تاريخ الادب و الثقافة اسمائهم مسجلة باحرف من نور
05-24-2008, 11:21 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
.. ابو صلاح يا سيف جبريل هو (وضاح اليمن) ماركة السودان ! بشوف حسناء السودان راقصة في سباتة في بيت اللعبة (العرس) ، مباشرة بتجري قريحتو موجات من الوصف البديع .. و الغزل الرشيق .. وضاح اليمن مات بسبب عدم قدرتو تمالك نفسو امام جمال زوجة الخليفة الأموي الوليد بن عبد الملك بن مروان (ام البنين) .. فقال فيها شعرا عجيبا سارت به الركبان .. فشنقوه ! قتلوه اعداء الشعر و الشعراء .. لكن شعر الغزل في السودان كان محمي و مصان بقوة النهضة الاجتماعية .. و الوعي ، وحقيقة انو حسان بلدنا كلهم كانن حليفات صون و دايم علاهن
حقا ابو صلاح هو ملك القوافي و فارس التفعيلة .. وعندو خط إتصال مباشر مفتوح 24 ساعة مع جِنان ذاك الوادي اللي اسمو (وادي عبقر) :
.. و بينما حفلة عمدة الخوجلاب عثمان المحجوب مستمرة : افراح .. و بهجة .. سمع .. و شوف ، و حسان عيونم قدر الفنجال .. وصل ابو صلاح لنص القصيدة .. وهبة كان بعمل في سولو بالاكورديون و كرومة بمارس في وهج التطريب شايل رق النقرزان :
فوق الجمال و قلنا و صابنا رمش العين شفنا السيوف تتجرد من عيون واسعين صاح وهبة فاقد عقلو و كم جريح و طعين الناس جروحم تسعة و انا لي جروح تسعين
" ونعود لقصة تسعة و تسعين العجيبة دي : التورية و الترميز في شعر وضاح اليمن السوداني ! "
05-25-2008, 06:15 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
ود المنسى سلام ياود المنسى دايرك تنكت صور عمك نكت . شاعر الدود قرقر عمنا عكير الدامر عكير المولود 1906 والمتوفى فى 1990 ... الا الطيب محمد الطيب قال عكير ده بكتب فى الغناء من سنة دو عكير ياهو الدود الذى قرقر وحبس الدرب .. عليك الشيخ نعيم ود بدر تنزل صور شيخنا عكير ... سلام .
05-25-2008, 06:06 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
.. تتواصل الاشراقات النورانية للخليفة الامدرماني محجوب خال العيال .. حكاوي اهل الدايرة الفي الكون اخبارم سايرة !
و رسل لينا الخليفة محجوب مجموعة من حكاوي مجتمع الغنا آناء ذاك العهد البديع .. ننشرها واحدة إثر واحدة .. قصة إثر قصة .. حكاوي ذاك الزمن الرايق و ساكن .. زمن الصفا و التأمين
.. و بت عكاشة بتهدي للخليفة محجوب خال العيال مرة تانية ضربة رق محمد احمد عوض .. تفانين الدمبا بتاعت عبد العزيز قسم الله .. ورقة التعابير الشعرية بتاعت حسن الزبير : أنا فاكرك معايا !
حسن الزبير لمن كتب انا فاكرك معايا ن كان بفتح في درب جانبي اسمو الاغنية ذات الطابع الدرامي (الميلودراما) في غنائية اهل السودان الحديث ، سودان الوعي الانساني و تفتُح المشاعر ، فيما بعد نهضة الاستقلال الوطني
يا محجوب يا خليفة يا نوراني : شوف روعة الاداء بتاع زولكم محمد احمد عوض ، و جمال و قوة ضربة الرق بتاعو .. شوف عبد العزيز قسم الله ، و الطيب عبدو لمن يقولوا حبيبي ووووويييييييييييين .. فاكرك معايا ؟ دا ما شيل وبس ، دا غنا كامل ، دي لزمات موسيقية ، و تقاطعات مُكملة للميلودي النهائي
و لا تزال ضربة رق كرومة تجري مجرى الدم في عروق الغناء السوداني .. آه من رق كرومة كما قال الراحل علي المك
05-26-2008, 05:23 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
.. وتاني دا الخليفة الختمي النوراني محجوب خال العيال واحد من اعمدة الظُرف و الحكي الامدرماني .. واحد من قلائل هم حفظة تاريخ امدرمان الاجتماعي - الغنائي
.. بواصل الخليفة محجوب خال العيال قدلتو في الطريق الشاقيهو الترام .. حكاوي امدرمان تلك .. مهمة توصيل عمود الغداء للوالد في سوق امدرمان .. ممزوجة بمهمة توصيل العم الشاعر عمر البنا الي دكان محمود التنقاري .. حيث عتيق و ابو صلاح و عبد الرحمن الريح و عشة الفلاتية ومني الخير و الرحمة مكي ..
كلهم غيبهم الموت ! كلهم : عني مالم صدوا و إتوارو ؟ !
بقول الخليفة محجوب :
القصة اصلا في المسافة ما بين علايل ابوروف و سوق امدرمان القديم .. الشارع نفس الشارع .. يا هو شارع ابوروف ، الشارع ببدأ في البحر تحت بصناعة المراكب علي الشاطي ، و الدكاكين خاصة علي ما اذكر سيد الحلبي و حنكل العجلاتي ، و عمك ابراهيم جُزلان ، و السر بتاع الفول ، و آدم طُرشي ، وهذا الدكان كان يعُج باظرف ظرفاء ابو روف ( عبد الكريم الزبير ، و الفنان ود السواراب صلاح محمد عيسى .. آي كان بجي من ودنوباوي ، و بداية لفة شارع ابوروف مرسى معدية شمبات قبل ما يعملوا الكبري ، و كشك الفاضل ختر مواجه الجامع .. و بالمناسبة عتيق في نفس الشارع .. و كمان الفارس الاديب الطيب السراج راكب حصانو وسط امدرمان .. و الشارع من العلايل تحت بصل سوق الشجرة ، وهي عمرانة بزنك اللحم و الخضار ، و الخضرجية ناس دياب و رمضان مُركز .. و عمك عطا العجلاتي والد لاعب المريخ ابراهيم عطا و محسن عطا .. وهناك تلقى عمك الخراساني راكب عجلتو و بشرى الحلاق و عوض كرار
.. و لسه ما وصلنا ود أرو ( حقي ما تودرو ) ، ولم نصل مكي ود عروسة حيث صالون الفن بتاع الحلاق عنبر مهبط الفنانين و الشعراء ثم بنصل اخيرا لدكان الراجل العمرابي : علي محمود التنقاري و رائعته اغنية التجني ( يا حبيبي حرام التجني .. حرام غبت عني ) الحان عشة موسى و اختها جداوية موسى ..
و نواصل تحت ظلال كابلي و محمد احمد عوض ، نسمع الخليفة محجوب خال العيال .. اهل الدايرة و البركة السايرة
و منذ بداية اربعينات القرن الماضي كان ود حي المراسلات الخرطومي البالغ من العمر وقتها 16 ربيعا اخضرا ، كان بطور في غنائية و ميلودي السودان علي نحو خاص ، فريد و متميز عن لونية اسماعيل عبد المُعين و الحاج عبد الحميد يوسف اللي غنوا قبلو .. كان الامير ابو علي جرىء و المعي وعندو هِمة .. عمل فرقة موسيقية و وقف قداما بالعود وهو ابن ال 16 عاما ّ!! قصتو بديعة مع توظيف ايقاع التم تم و الرمبا علي ذلك النحو الذى احدث نقلة فعلية في الغناء و المزيكا السودانية
" تم تم بت العقاب المُعدل .. و رمبا الجاليات الاجنبية بالخرطوم في مزيج موازير السودان الخماسية "
مدرسة الغناء الاوركسترالي التانية المدى الزمني الغنائي 1940 --------- 1970 عبد الكريم الكابلي
05-27-2008, 08:11 PM
خدر خدر
تاريخ التسجيل: 02-07-2005
مجموع المشاركات: 13188
والله والله رويتو اليابس على المبلول، يا معاويه، شكرا على الهديه ، لي نيه في قمر السما دي من الأغنيات التي أوحت لوكالة الفضاء الأمريكية (بالكثير المثير الخطر) ولا أغالي، أما صديق مدثر (ابو اسامه) فقد تفوق على NASA و ناسا ببيت قرر بموجبه ان خيال الشعر يرتاد الثريا، صدقني إن المقولة المذكورة هي عين الحقيقة ، ولاأريد الدخول في شروحات الفيزياء النظرية لتفسير ذلك كي لانخرج عن الموضوع. الومضة التي عاش على إشراقها الشاعر هي نجمة في عتمة الليل نهتدي بها في صحراء العمر وطراوه يا معاويه من السراة وخبير بالسفر ليلا وسأنتظر هنا اشوف آخركم الذي سينتهي بي إلى ما لايحمد عقباه. إنتو زي سيرة الجان. والله حقو الزول يقاطعكم، إن استطاع لذلك سبيلا.
05-28-2008, 03:12 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
.. و بواصل الخليفة محجوب خال العيال الحكي و بقول ليكم قولة ابو صلاح في اغنية تلودي المرفوعة فوق دي :
" طبي يحرم و الموت حلال مين يصدق دي و يعقلا ؟ ! "
.. و بزيدكم الخليفة محجوب في الغنا بيتين :
رغم بُعدي برسل سلامي .. شعر زول حي العرب القديمة ( سيف الدسوقي ) ورق محمد احمد عوض الناهض بضربة نقرزان كرومة ..
و بواصل الحكي عن قصة الطريق الشاقيهو الترام :
في سوق الشجرة ونحنا ماشين من بحر ابوروف للسوق بنلقى الفنان محجوب عثمان بقول (مالو قلبي الاسروهو ) .. و عازف الايقاع الماهر سيد احمد ود نفر ، و ناس حسن ضرس ، و حاج الشيخ ، ودياب الخضرجي ، و تندل و عمنا شيخ الجزارين ، شيخ الذاكرين ، و حبيب الله و كمان حبيب الشيخ قريب الله : عمنا بابكر الطاهر ، و السر ود بشرية التقي الورع ، و عمنا ابو الصوفية عبد الرحمن باظروطة و ما انسى قرصة عمنا اسكندراني في الاضان ، وهم من كبار طاقم الترماي . و انا في هذه اللحظة في ود البنا بين شارع علي نقد الله ، ودكان النعيم بكراوي و مقابل الاقرع .. و اضاني في عمود الكهربا بتحسس حركة و مكان الطرماج و شايل عمود الغدا للوالد في السوق ، و بسمع خلاص الطرماج خشا ود البنا ، و الساعة بقت تلاتة و لازم اسوق معاي عمنا عمر البنا عشان اسلموا لصالون الاديب الاريب محمود التنقاري العمرابي في السوق شارع الشوام
05-28-2008, 08:19 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
عزيزي خدر : خلينا عبر كرومة نفهم قصة تراجع غنا النقرزان امام زحف التم تم .. قصة إنو كيف غنائية السودان شالت كل تراث كرومة ( جُملتو ، و لزماتو ، و تفانينو) و تجاوزت نقرزانو .. و مشت للامام .. عبر جدل إنتقال خفي و صريح ، معقد ، و بسيط و في اساسو جميل و مدهش
كرومة ود مستورة بت عرضو ، المُغنية الامدرمانية الرائدة ، وهي ضمن اللذين حملوا رسالة حفظ و تطوير ميلودي السودان القديم المُعاد انتاجو علي قاعدة ضرب ايقاع الدلوكة المُتعدد التراكيب
مستورة ، هي احد عوامل تربع كرومة ملكا علي دولة غناء النقرزان التقيل و الخفيف آناء تلك الثلاثينات و حتى منتصف الاربعينات من القرن الماضي
في تلك الثلاثينات من القرن الماضي ، كان اسمعيل عبد المعين قد التقى بالطالب السوداني الاجيء سياسيا لمصر بعد احداث ثورة 1924 ، بشير عبد الرحمن جدي ، في شقة بميدان التحرير عبد المعين لحن قصيدة بشير (جبال التاكا) بجملة لحنية جديدة ، لحنو علي ذلك الايقاع الجديد الغريب الزاحف من غرب افريقيا ، و غرب السودان الي الوسط النيلي ( ايقاع التم تم )
و في ذات الوقت كان زنقار بطرح لونية غنا التم تم الجديد علي مدي جماهيري واسع و مؤثر .. زنقار كان وثيق الصلة برابحة التم تم ، (ربوحة) مثلت احد اهم مداخل و تسلل التم تم الي حصون دولة النقرزان الامدرمانية
سحر القواعد الشعبية ، إنقلب علي ساحر الغناء الحديث عند محور مدرسة الغناء الاوركسترالي التانية ، انقلب السحر علي عبد الرحمن الريح و حسن عطية !
حسن عطية في كل اغاني عبد الرحمن الريح الاولى كان بوطن في جملتو اللحنية الجديدة علي هوى ايقاع التم تم .. دخول التم تم اسوار مدرسة الغناء الاوركسترالي فتح الباب للرمبا و العشرة بلدي و باقي اشتقاقات ايقاع الدلوكة .. لذا فإن التم تم كان ثورة و ألق إنتقال
.. حينها ، لقد تاكد تماما ان فولكانو القواعد الشعبية ( التم تم ) بتاع طلائع النساء : ربوحة ، و بت العقاب ، و العزوهات ، وزهرة بت نجدي ، قد تمكن من دك حصون استقراطية ايقاع النقرزان ، لم يعد نقرزان سرور و كرومة ماركة العم مرجان ، لم يعد قادرا علي تقديم الوعاء الايقاعي القادر علي احتواء الجملة اللحنية الجديدة و تلك التفعيلة الجديدة !
.. و لكن ما حدث من تحول و إنتقال لا يمكن تفسيره و فهمه علي هذا النحو فقط !
" هنالك عوامل عديدة ، و متعلقات و تقاطعات ثقافية و تاريخية و شخصيات و رموز كلها ذات صلة بالامر "
الي كل ذلك نعود : لفهم كيف و لماذا و متي تفجرت ثورة التم تم ذات الاثر العميق بعيد المدى في غنائية السودان
ديل فتحوا دروب الغنا الجديد بشير لمن عمل جبال التاكا وبت النيل و خلي عبد المعين يسطر ملحمة غنا التمتم و برضو لمن عمل بت النيل لاحمد المصطفى
.. الحلنقي في كل طيف غناهو ذو الشاعرية و الرقة العالية .. قيل ان شعر الحلنقي خلى الغنا السوداني يمشى علي رجلينو طربان و فرحان و بتراقص في شوارع الفن الجديد
05-29-2008, 00:59 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
مجاهدات شق العتامير .. و جر النم مع الحردلو في الدوباي .. تلك بعض من المسارات التاريخية لغناء السودان
الشم خوخت و بردن ليالي الحرة و البراق برق من مِنا جاب القِرة شوف عيني الصقير بجناحو كفت الفِرة تلقاها ام خدود الليلة مرقت برة
دوباي بلاد فارس .. البقي في السودان مربوعة و مسدار ! دوباي حسان الحرك ، و غناء علي ود محلق و شعر ود الفراش و مرابيع الحردلو .. كلها بقت في بوابة ام درمان القديمة رميات الطنابرة و غناء محمد ود الفكي .. دا كلو الجاب سرور و كرومة و الامير ابو علي بعودو و جملتو اللحنية الفريدة
حقا برز نور الشروق في الكون .. وياهو دا الجنن عبد القادر مضوي زول العيلفون ، و منسوب محلات قرنفلي بالسوق الافرنجي .. عند تلك الخرطوم القديمة
05-29-2008, 01:39 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
نفس صورة الجمل الختاو بحيرى م بنك السودان فوق الجنيه حقنا زمن كان الجنيه جنيه . قبل ما يتماص الجنيه وتحاك عليه البلاوى . عليك الله شوف الزول الفوق الجمل ده . ولا ساعل حتى فى حلف الاطلسى زاتو . الزول ده ماشى يغنى . والسماء التنقد . .... الف شكر أخى الفنان خدر أبوعبيدة الف شكر على الدخول الكريم ونحنا يا خدر فى الدرب الدايرو ماشيين تحياتى
05-29-2008, 09:04 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
يا الساكن جبال التاكا كتبا بشير عبد الرحمن في شقتو بميدان التحرير بالقاهرة آناء تلك الثلاثينات من القرن الماضى .. اصلا اسمعيل عبد المعين كان بتردد كثيرا علي بشير في تلك الشقة ، وهو طالب بمعهد فؤاد العالي للمزيكا بشير مولود في كسلا 1903 ، و كان عنصر وطني سوداني اصيل في حركة 1924 المعادية للاستعمار .. بعد فشل الانتفاضة العسكرية سافر لمصر مع الدرديري احمد اسماعيل و توفيق البكري .. و كلهم رعاهم الامير المصري / عمر طوسون اللي كان شديد التعاطف مع شعب السودان في نضالوا ضد الاستعمار ، ومع طلاب السودان الهاربين من الاستعمار و الوافدين للدراسة بمصر
الاغنية لحنا عبد المعين في 1938 ، و نزلت كاسطوانة حركت آسن الغناء ، لانها طرحت لونية جديدة ، جملة موسيقية غير معهودة ، و مختلفة عن غنا سرور ، ايقاع التم تم دخل مع لحن عبد المعين و عودو المدوزن خماسيا و اعلن انبثاق فجر مرحلة الغناء الاوركسترالي السوداني الجديد .. دا كان خط انتصار التم تم .. و ثورة التم تم الغنائية ..
بتقول الاغنية المستلهِمة ذكريات كسلا و طبيعتا الخلابة و ذكرى المحبوب الاول
مين متلك في علاكا .. يا الساكن جبال التاكا سنا البدر من سناكا .. و جنا النحل من لِماكا جالس مليك في عروشو .. هزمتني ياخي جيوشو القمر في جبينو .. السلاح رموشو
الاسطوانة حققت اكبر توزيع عُرف في تاريخ السودان و للاسف ( الاسطوانة تكاد تكون معدومة حاليا)
05-29-2008, 10:55 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
Quote: ذبُلت عيناها شاخت نضارتها جف ماء وجهها أحقا يبقى الشعر و تفنى المُلهمات ! ؟
أحمد ، في بوست (تستاهلي) عن (مريا) طرح علىّ أستاذنا عبدالمنعم ذات السؤال وإليك ما كتب:
Quote: العزيز الاستاذ محمد المرتضى وبقية العقد الفريد
طبعاً مع كل انبهاركم (وانبراشكم) ناسين أن مرية التي كانت في العشرينات من عمرها في منتصف الخمسينات ، هي الآن تقارب الثمانين !! آسف لهذه الصدمة !! وأعلم أن هذه المفاجأة ستجلب علي غضب الكثيرين ممن لا يودون أن يستفيقوا من الحلم !! لهذا رأيت أن أهديكم هذه القصيدة للشاعر" ثوماس مور" التي قمت بترجمتها من اللغة الإنجليزية ؛ وذلك حيث أن التوهج وسمو الروح اللذين تستأثر بهما مرية لا يعرفان فقط عندما تمتلك الجاذبية الساحرة والصبا ! محبتي عبد المنعم خليفة
الحسن الندي الأثير ثوماس مور ترجمة : عبد المنعم خليفة خوجلي *******
صدقيني .. إن كان لهذا الحسن الندي الأثير الذي أحدق فيه الآن بكل هذا الانبهار أن يذبل غداً .. ويتلاشى بين ذراعي ويبهت مثل هالة أسطورية .. فإنك تظلين عشقي .. وعندما يتوارى الحسن – كما هو مآله – سوف أجدل أمنيات قلبي ضفائر خضراء ******* التوهج وسمو الروح اللذين تستأثرين بهما لا يعرفان فقط عندما تمتلكين الجاذبية الساحرة والصبا أو عندما تنساب دمعة بجلال فوق خديك .. وذلك لأن الزمن هو مستودع النفائس ولأن القلب الذي يعرف الحب حقا لا يسلو أبداً .. بل يزداد عشقاً ودنواً مثل زهرة عباد الشمس التي تنظر لإلاهها وهو يأفل نفس نظرة التوق له حين الإشراق ..
*******
وفي رأيي هناك:
Quote: لم نرها في أي من أحوالها ولكننا أحسسناها وبقيت ك (فكرة) غير قابلة للتعديل ، فكرة و (حالة) إسمها مريا، عصية على التغيير يمكنك أن تسمي ذلك (مكابرة) للنفس وهروب من واقع البيولوجيا وقوانين الطبيعة التي أغرقت حتى أتلانتيس ، مريا يا أستاذنا الجليل ، وأنت أعلم مني في هذا الشأن، ظلت تكبر في الخاطر بثبات وتتعتق فيه كخمر باخوس أو آثار جبل الأولمبيا نفسها، تزداد قيمة ورفعة بمرور الأيام. مريا فكرة معتقة إستنادا إلى قول توماس مور ذاته: وذلك لأن الزمن هو مستودع النفائس ولأن القلب الذي يعرف الحب حقا لا يسلو أبداً .. بل يزداد عشقاً ودنواً
إنت ماشي بينا وين يا مزيج برنت ؟ المهم أمسك لي في ظبية المسالمه دي (جنب ناس حكيم شنوده) لما أجيك راجع. سألتك بالله ما تغيرا.
05-30-2008, 00:17 AM
Imad Khalifa Imad Khalifa
تاريخ التسجيل: 11-26-2004
مجموع المشاركات: 4394
العزيز د. طراوة تعرف كل يوم تقريبا بفتح هذا البوست الرائع وبستمتع بالكلام والحكى الجديد الفيهو وبمرق وانا شبعان ومنتشي وطربان حتي الثمالة. هذا الكلام غير مكتوب وانت يا طراوة ربنا يديك العافية قاعد تسجل وتوثق وتحلل فيهو ليتعرف هذا الجيل والاجيال القادمة على هذا التراث العظيم. انا حافظو عندي هو وبوست الدكتور أحمد القرشي آمل ان يتكرم السيد أمين الموقع م. بكري ابوبكر بعمل مكتبات ليكم انت وودالقرشي أو بالعدم يخصص مكان لحفظ هذه الُدرر والتى تعتبر (مادة خام) يمكن الاعتماد عليها تماما في أي مشروع يتناول تاريخ الغناء في السودان وتطوره. الصورة الفي البروفايل بتاعي بها شباب مؤتمر الطلاب المستقلين والحركة الشعبية والكانو متهمين بمقتل طالب من جامعة النيلين تم اعتقالهم لأكثر من عام دون ذنب جنوه سوى حلمهم ببناء وطن معاف يسع الجميع. تم اطلاق سراحهم جميعا وشُطبت جميع التهم الملفقة في حقهم. ارجو التكرم باهدائهم لحنا يعبر عن المناسبة. ارجو ان تسمح لي بتحية السيد محجوب خال العيال شقيق نسيبنا علي خال العيال لمساهماته في اثراء هذا البوست الدسم.
لك ولزوارك الكرام التحايا والود
05-30-2008, 02:48 AM
Imad Khalifa Imad Khalifa
تاريخ التسجيل: 11-26-2004
مجموع المشاركات: 4394
يا عماد : هم إحدى عشر كوكبا في البروفايل بتاعك و في ضمير امة السودان .. هم علي ذات خط الصراع الطويل صراع الحق في مواجهة الباطل .. صراع أزلي .. بنرصدو في تلك الوقائع :
.. لمن المستعمر الانجليزي حاكم عبيد حاج النور و علي عبد اللطيف لمن المستعمر الانجليزي اصدر حكم السجن علي الشفيع احمد الشيخ لمن ابو القاسم و زين العابدين حاكموا احمد السيد حمد لمن نميري حاكم عبد الخالق محجوب و محمود محمد طه لمن عمر البشير حاكم كرار ، و بلول و اكرم ودفنم احياء
.. انا لست رعديدا تُكبلُ خطاهو ثقل الحديد .. لن احيد !
محي الدين فارس : شعر الواقعية الجديدة .. واقعية الوطن و الثورة إشراقات الرجل الكادح ذو النكهة العمالية : العطبراوي
الاهداء لكل من :
* ين ماثيو * حسين الشيخ * فكتور لاكو * يعقوب زكريا * عبد الرحمن ابراهيم * خميس شول * عثمان اسماعيل * احمد محمد الحاج * ابوبكر يوسف .. وكل طلاب السودان الاماجد .. كتيبة الصدام الامامية في معركة التحول الديمقراطي ، و بناء السودان الجديد
05-30-2008, 11:07 AM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
ما تزال نصيحة و محاذير مهندس المساحة العاشق الرقيق ( مهدي فرح ) .. صريع حِسان مروي (بنات شايق ) ، لا تزال تتسم بالاهمية و الدلالات .. وتجري بين ركبان الغرام :
" في رمال الصيف بلاقيك .. و بيعزمك و يعتلق فيك .. قولو حالف ما بباريك .. و ما بدليها التهمة فيك .. القمر بوبا عليك تقيل .. "
عبد الكريم عبد العزيز الكابلي :
مدرسة الغناء الاوركسترالي التانية .. المدي الزمني - الغنائي :
1940 ---------------1970
05-30-2008, 03:15 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
الامير عمر طوسون ، المصري - النبيل جابت لينا صورتو (بت عكاشة) .. في كامل الإسناد لبوست تاريخ الغنا من خلف الكواليس
كان طوسون بحب السودانيين بصدق و من جوة القلب .. بحبهم بعيدا عن التصور الخديوي للسودان القائم علي ( الإلحاق و الضم ) وفكرة الحديقة الخلفية .. كان قريب من الطلاب السودانيين بمصر .. و في التلاتينات ، المؤرخ محمد عبد الرحيم في كتابو الهام (نفثات اليراع) كتب كلام جميل عن الامير طوسون .. اثناء زيارتو للسودان مع الوفد الاقتصادي المصري 1936 اللي كان فيهو فاطمة رشدي و رهط بديع من الفنانين المصريين
.. سيد عبد العزيز عمل قصيدتو في وصف الجمال المصري وقال : مصرية في السودان بحبي ليكي ابوح .. يا عنب جناين النيل .. اتمنى منو صبوح ..
.. أنة المجروح : بين نقرزان سرور اللحنا في خمسة موازير و زخم مزيكة عبد العزيز المبارك الشال لحن سرور ختاهو في الريقي الافريقي - اشتقاق ضرب الدلوكة متعدد الايقاعات
05-30-2008, 10:50 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
نمشى نمشى النيل بين رمال ونخيل .. نمشى مع بوست تاريخ الغناء الكل يسير الكل يحمل جريد النخل بأتجاه النيل ومن المنبع حتى المصب نتابع كل من كتب كل من تغنى لتلك الجنات ..
05-30-2008, 11:24 PM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
آنة المجروح - عبد العزيز المبارك كلمات : سيد عبد العزيز
Quote: كان طوسون بحب السودانيين بصدق و من جوة القلب .. بحبهم بعيدا عن التصور الخديوي للسودان القائم علي ( الإلحاق و الضم ) وفكرة الحديقة الخلفية .. كان قريب من الطلاب السودانيين بمصر .. و في التلاتينات ، المؤرخ محمد عبد الرحيم في كتابو الهام (نفثات اليراع) كتب كلام جميل عن الامير طوسون .. اثناء زيارتو للسودان مع الوفد الاقتصادي المصري 1936 اللي كان فيهو فاطمة رشدي و رهط بديع من الفنانين المصريين
نهديها لروح الأمير المصري الراحل عمر طوسون
05-31-2008, 10:41 AM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
في يوم السبت 18 نوفمبر 1954 بدأ الاستاذ / صلاح احمد محمد صالح ذلك البرنامج الاذاعي الفني - الغنائي الذي عبر عن نباهة و روح اهل السودان ، بل و عبقرية طلائع الثقافة الوطنية في الاحتفاظ ، و الولاء ثم الاحتفاء بجماليات تراث غنائهم الاصيل
يومها توجه صلاح لجمهور المستمعين بذلك القول الاثير الذى تم بثه علي الهواء مباشرة ، القول الذي اعقب صرير صوت حقيبة الحديد تلك لحظة فتحها !
صوت تلك الحقيبة المميز ، الخالد الراسخ في وجدان اجيال ابناء السودان عبر الازمنة قال صلاح في ذاك اليوم المشهود لاعلان بدء برنامج من حقيبة الفن :
" اليوم انفض الغبار عن تراث الاغنية السودانية الاصيلة .. "
خالص العرفان و المحبة لكل من ارتبط بتقديم برنامج حقيبة الفن ، وتجشم عناء صون تراث غناء المدرسة الفنية الاولي :
* الاستاذ المبارك ابراهيم * الاستاذ علي شمو * الشاعر الرقيق مبارك المغربي * الاستاذ السر محمد عوض * ثم النحرير ، الوراق الذاكر / عوض بابكر
يا معاوية سمعنا شعر صلاح المُغنى : - نابك ايه - يا عيوني اسكبي دمع الحنين
05-31-2008, 07:34 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
يا عيوني ابكي دم شوقا لهم و اعلمي ان هنايا عندهم .. !
للحق ومنذ تلك الاوقات البعيدة ، كان صلاح احمد محمد صالح ، وحسين بآزعة في كآمل الإئتلاف و التوافق الفني مع عبقري الالحان و رائد مقام (فا) السوداني عثمان حسين .. كانوا ثلاثتهم يعلنون صعود ذلك الدوى الهائل لثورة الرومانس و العاطفة في داخل حركة الغناء السوداني
.. كان بآزرعة يسابق الصبر ليصل لنهاية عطلة الاسبوع و يحلق طائرا من ثانوية وادي سيدنا ليصل لمنزل توأم روحه علي صعيد الشعر و الانسانية و الثقافة .. كان منزل ناس صلاح احمد محمد صالح (أبن عضو مجلس السيادة لاحقا) .. كان منزلا حفيا كريما .. و لكن الاهم من ذلك ان المنزل كان يقع في قلب مثلث الابداع الامدرماني الدامي .. مثلث :
* قهاوي سوق امدرمان حيث فونوغرافات الطرب * بيت ناس سرور ، و كرومة بحي ود أرو * و ضلع ثالث يوجد في خطه بيت العبادى ، و عمر البنا
.. تلك امدرمان المُصاغة وجدأ بشعر رصين ، و المتمايلة طربا في ليالي سرور و كرومة .. امدرمان الفتى صلاح احمد محمد صالح قبل سفره منتدبا للعمل بهيئة الاذاعة البريطانية
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أحمد طراوه
Moawia Mohammed
Osman Musa
خالد علي محجوب المنسي
محمد المرتضى حامد
Saifeldin Gibreel
خدر
Imad Khalifa
فيس بوك
تويتر
انستقرام
يوتيوب
بنتيريست