|
|
 Re: ما أجمل الوفاء (Re: Emad Ahmed)
|
Quote: يا سلام عليك يا عماد عثمان
كلام يخش في النخاشيش جوووووووة
الله يديك العافية انت والسني وشبيكة
ويرحم ابو دية رحمة واسعة |
ويديك العافية انت كمان ياوهبة .
| |
 
|
|
|
|
|
|
|
|
Re: ما أجمل الوفاء (Re: Emad Ahmed)
|
شمشي
حيا الله اصلك وذكرك في ملا خير من الذي ذكرتنا به
انتا نسيت اسم اخونا بشير الطاهر بشير الجعلي اخونا قبل ما يكون زوج اختنا منال ويا جماعة سعاتو بشير اديناهو من زمان الجنسية الشعباويه
ونسيت المحاميه حنان اختي وزوجها محمد بابكر صحبك
منى ساكنه الان في السامراب بنوا ليهم بيت ورحلت
بيت الصافيه باعوه ياشمشي تذكر كل مرة كنتوا بتقدمونا عشان نمشي الصافيه ايام يا شمسي
شكرا لانك ذكرتا الوالد ربنا يرحمه ويشهد الله طيلت ما كنا جيران انتو اقرب لينا من اهلنا وعمنا ساتي نحسوا اقرب لينا من اخوان ابوي الله يرحمه
رحم الله خالتي نبويه وربنا يقوم عمي ساتي بالسلامه ويطرح البركه فيكم وفي اولادكم
التحيه لكل اعمامي في الحله ولكل خالاتنا ناس مربوعنا الطيبين الله يديهم على قدر نيتهم البيضاء
روما
| |
|
|
|
|
|
|
|
|
|
Re: ما أجمل الوفاء (Re: عابدون محمد عابدون)
|
الحبيب الغالي / عادِل عُثمان ...
Quote: عزام حسن فرح
سلامات. ياخى قلنا ليك اكتب لينا عن والدك الراحل توثيقآ لحياة حافلة بالمواقف والقيم النبيلة. |
والله يا عادِل أكان تصدِق ، أنا عِرفت أبوي رحمة الله علَيِهِ في قطر بعد ما إغترب عام 1985م
في السودان كُنا بِنشوفو يا إما ماش المُعتقل ولا جاي مِنو ... لِدرجة إنو ماف زول مِن الشعبِية
كُلها بِعرِف عنو حاجة أبدًا أبدًا ... ما مشى عزاء ولا فرح ولا أي لمه وخصوصًا في الأعياد يازول
أي عيد إن شاءالله الكِريسماس أكان بِجو بِياخدوهو ... في ليدز (لندن) شُفتو كام مره كِده طوال
ثلاثة سنوات ... في فرنسا وألمانيا كُنت صغير ما بتذكرو ... في مِصر بتذكر حاجات بسيطة ..
في قطر عرفني ... كُل ما يِشوفني يِقول لي :
- إن شاءالله حافِظ جدَول الضرِب
- أنا في تلاتة ثانوي عالي يا بوي
- طَيِب أمشي جيب موية ... بطِل غلبه
والله يا عادِل حبيت البني آدم ده حُب ، لامِن قرب يِبقى حالة مرضِية عديل كِده ... كان عِندو مكتبة
أكان قُلت ليك فيها خمسة ألف كِتاب بِالإنكِليزِية والفِرنِسية والعربِية أكون قصرت ... ولامِن يِناضِم
بِالعربي بِتعرفو طوالي إنو رطاني ... قال لي مره إنو إتعلم العربي بعد ما أجاد الإنكِليزِية ...
أمي أكانت مُعلِمة (خريجة) في دلقو المحس ، قالت لي (الله يِطَوِل لينا عُمُرا) إنها كانت بِتقري العربي
بِالرُطانة ... لامِن جينا السودان درستني في البيت (مِن منازلهُم) لأنو مدارِس بحري قالو :
- الزول الدِلاها ده ، ما بنقدر نسجِلو في سنة أولى مع الشُفع الصُغار ... بِالله ناس بدرالدين ديل
مُمكِن يُعدوا شُفع في أي وقت مِن عُمرهُم ...
كان مشكِلتو مع الحُكم العسكري ... بداها مِن جامعة الأسكندرِية (جمال عبدالناصِر) ... عبود ...
نميري ... عُمر البشير ... لكِن ما كان بِشخصِن العداء ... بتذكر لامِن شاف صورتي مع نميري في
القاهِرة ، ما إتضايق ... قال كِلمة واحدة بس :
- حيوان
ما عِرفتو قاصِدني ولا قاصِد نميري ... ما سألتو ... ده بِسألو الله بس وحاتك
| |
|
|
|
|
|
|
|
|
|
Re: ما أجمل الوفاء (Re: عزام حسن فرح)
|
| Quote: ما عِرفتو قاصِدني ولا قاصِد نميري ... ما سألتو ... ده بِسألو الله بس وحاتك |
يمكن قاصد الإتنين الله يرحمو ويحسن إليه
ما لسانو محسى ما جمعكم
بس كان قاصد القائد الملهم بالأول
| |
|
|
|
|
|
|
|
|
|
Re: ما أجمل الوفاء (Re: شمس الدين ساتى)
|
| Quote: الزول دا قرأ الابتدائى فى 1953 |
كان إسمها الأولية زمن خشيتها إنتا
أنا دخلتها لما سماها نميرى الإبتدائية
يعنى بعد سنة سبعين لكن لسوء حظى لحقتك
وزاملتك فى مدرسة السحار الأميرية الثانوية العامة2
بس الله نجانى وطفشك لى الخرطوم ونحنا مشينا بحرى الحكومية
الما بتتعيب.. زمن ناس عبد الله حامد
وناس قمبور وعادل الطاهر وإنتا زاملتا حناكيش الخرتوم
| |
|
|
|
|
|
|
|
|
|
Re: ما أجمل الوفاء (Re: وليد عبد اللطيف)
|
Quote: الله يسلمك يا عمدة
لكن لسع للزنقة بقية ( يومين كدا )
خلاص يا عمدة اعمل لينا فسحة صغيرة
زي بتاعت المدارس ونحن راضين بالقليل
المثير الخطر
يا سلام على صورة بروفايلك جارنا العزيز
ابو عبدالعزيز الفنان المبدع
عبدالكريم الكابلي |
- الحبيب عمدة
صورة البروفايل تحت آمرك ياغالي في اي وقت
والتحية لك ولجارك الفنان المبدع عبد الكريم الكابلي .
- مشكور ياوليد عبد اللطيف على استراحة نصف الآسبوع والحمدلله
استجبت لطلب دكتور عماد الدين عبد الله .
- دكتورة مريم قاكهة البوست بحق وحقيقة
ربنايحفظك ويديك العافية انشاء الله .
| |
|
|
|
|
|
|
|
|
|
Re: ما أجمل الوفاء (Re: Emad Ahmed)
|
كتب عزام عن والده الراحل الاستاذ حسن فرح:
Quote: كان مشكِلتو مع الحُكم العسكري ... بداها مِن جامعة الأسكندرِية (جمال عبدالناصِر) ... عبود ...
نميري ... عُمر البشير ... لكِن ما كان بِشخصِن العداء ... بتذكر لامِن شاف صورتي مع نميري في
القاهِرة ، ما إتضايق ... قال كِلمة واحدة بس :
- حيوان
ما عِرفتو قاصِدني ولا قاصِد نميري ... ما سألتو ... ده بِسألو الله بس وحاتك |
هههههههه. رحم الله والدكم يا عزام.
| |
|
|
|
|
|
|
|
|
|
Re: ما أجمل الوفاء (Re: Adil Osman)
|
...
منذ يوميم إثنين تلقيت مكالمة هاتفية من قطر
حيث كان بالجانب الآخر (( الفنان هشام درماس ))
الذي أبدى إهتماما كبيرا بالتوثيق عبر البوست
وكانت له آراء مستنيرة حول مآلات البوست ,
هشام في معية شقيقة أحمد .. ورقم هاتفه هو 009746563163
ولديه رغبة قوية في أن ينال عضوية المنبر
ليسهم مع الآخرين في حركة التوثيق ..
..
| |
|
|
|
|
|
|
|
|
|
Re: ما أجمل الوفاء (Re: صلاح شكوكو)
|
Quote: هشام في معية شقيقة أحمد .. ورقم هاتفه هو 009746563163
ولديه رغبة قوية في أن ينال عضوية المنبر
ليسهم مع الآخرين في حركة التوثيق .. |
شكوكو
الشاب هشام درماس
مشاركته معنا لابد منها
واكيد بكون اضافه حقيقة
ولاننسى عندما كان صغير وعامل مكتب صغير في نادي
الشعبية ويراسل مجلة ماجد للاطفال في ذلك الوقت
ويعتبر مشارك درجه اولى وحبوب
ومن اسرة فنية وطيبة
ويذكرنا ايضا عندما اشركناه في بداياته بالغناء في حنة اخونا وزميلنا خالد محمد سعيد (اولاد حلة الزهره )
لكي نساعد على ظهوره والان هو ماشاء الله مشرف ولا يحتاج لدعم اعلامي
-------------------
مشكور استاذ شكوكو وان شاء الله سوف اقوم بالاتصال به لكي نمهد له الطريق نحونا
| |
|
|
|
|
|
|
|
|
|
Re: ما أجمل الوفاء (Re: وليد عبد اللطيف)
|
وصل الى مدينة جدة غير في زيارة عمل الوجيه ورجل الأعمال الحارث علي صالح
وهو الأن محل ترحاب وحفاوة كل الشعباوية بمدينة جدة . . نزلت أهلا وحللت سهلا
الحارث علي صالح .
| |
|
|
|
|
|
|
|
|
|
Re: ما أجمل الوفاء (Re: Emad Ahmed)
|
| Quote: ياعمدة يعنى مافى زول بارك ليك قلبت الصفحة .. ومبروك ولو انها متأخرة .. |
الله يبارك فيك
تشكر أخي عابدون ياذوق
لاعدمناك .
راحت عليك ياوهبة . .
| |
|
|
|
|
|
|
|
|
|
Re: ما أجمل الوفاء (Re: صلاح شكوكو)
|
Quote: الكريم الأكبر كمال كرار صديق جارى ود موسى
عييييييييك دى صاح ..الكلام دا فى الستينيان من القرن الماضى
بس حبيت أشاغل صديقى عبدون..
|
سلام شمسي...
ود موسى ده من أصدقاء العمر... وكذلك دفع السيد جيب الله دفعة...
أما صلاح الزبير فكان الدفعة الورانا... صديق الذي ذكرته... هو دفعتنا أيضا...
Quote: خضورى .. وشقيقه بكرى كان دفعتى بالدناقلة شمال
|
خضوري كان بيلعب معانا في الفاروق...وهو شلالي من ساكني حي الدناقلة شمال
أخوه الكبير الدكتور/ علي يوسف....
Quote: عبد السلام محمد خير شقيق إستاذى وأستاذ كثير من زملائنا
وبرضو أخوهم صلاح محمد خير أستاذ... وهم جميعا في قمة الأخلاق...
وبيتهم في المزاد...
بالمنبر يوسف محمد خير |
| |
|
|
|
|
|
|
|
|
|
Re: ما أجمل الوفاء (Re: Kamal Karrar)
|
| Quote: شكرا لانك ذكرتا الوالد ربنا يرحمه ويشهد الله طيلت ما كنا جيران انتو اقرب لينا من اهلنا وعمنا ساتي نحسوا اقرب لينا من اخوان ابوي الله يرحمه |
اولا..... التحية للجميع دون فرز واحر التعازى لابن عمتى شمس الدين فى مصابنا الجلل رحم الله موتى بص الشمالية .
ثانيا ما دعانى للدخول هنا قلت اشوف اثر الكلام المنشور فى احد البوستات عن البوست الشهير ببوست الشعبية ذلك الحى والمطالبة برفعه للارشيف ولقيتكم ما جايبين خبر كبير للموضوع يعنى الكبير كبير والقافلة تسير وكدة.
وبعد دخولى للبوست لقيت مريم عبد الله او روما وعرفت من بعض المداخلات وخاصة بن عمتى شمسى بانها ابنة المرحوم عبد الله السيد ربنا يرحمه ويغفر ليه وبما انى قد سكنت فى بيت واحد مع اخوى شمسى ( الما كبير او قديم زى ما عابدون بيدعى ) فانى قد عرفت المرحوم عن قرب وكم كم تجاذبنااطراف الحديث فى ضل الضحى او بعد المقيل وكانى اسمعه الان وهو يردد عبارته المشهورة بين الحين والاخر ( تصدق او لا تصدق) العم عبد الله كان رجلا سمحا عفيف اللسان فالى جنات الخلد يا عبد الله السيد.
وبما انك اصغر بنات المرحوم يمكن ما اجى على بالك يا مريم لانى قد تركت الشعبية من بداية التمانينات وربما الاخ شمس الدين يذكرك ببعض الاشياء ويالها من ايام جميلة تلك الايام فى الشعبية.
التحية لعابدون ...قلت لى شنو شمس الدين يمكن من مقترحى اسم استاك ..ياخى ضحكتنى اضحك الله سنك
وفتكم بعافية يا ناس يا حلوين
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
Quote: اخوي حامد عبد لله حامد
|
وينك يا حامد ..كل سنة وإنتا طيب ياود الخال
ياروما حامد ود خالى الكبير المرحوم الحاج محمد حامد
والمرحوم عبد الله حامد عمه.. وكان معنا لفترة بالشعبية
وأسمهان بنت عمته يعنى بت خالتى هدى.. يمكن ما بتذكريه
لأنه الوقت داك كنتى صغيرة.. وهو متغرب من الثمانينات
وسكن بعائلته بالقاهرة
| |
|
|
|
|
|
|
|
|
|
Re: ما أجمل الوفاء (Re: شمس الدين ساتى)
|
شمسي
انا عشان عارفه مكانت المرحوم عبد الله حامد عندهم وعندكم كلكم عشان كدة قلتا ليهو والدك
كيف ما باتذكرهم واسمهان كانت صاحبتي لما جات وقعدت معاكم كل يوم معانا كانت
شفتا الاام الحلوة دي ربنا يعيدها يا شمشي
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
يا ناس البوست مبروك الصفحة الجديدة
واهلا ومرحبا بالراقي هشام درماس
ود الشعبيه فنانا الاول الرافع راسنا
نتمني قريبا ان يكون بيناتنا وبالجد ح يكون مكسب كبير للبوست
سلم على احمد يا هشام وعلى منى درماس وكل اخوانك
روما
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
ورد فى احدى المداخلات ان والد روما المرحوم عبد الله السيد لعب فى فريق التحرير البحراوى. وكما جاء فى مناكفات شمس الدين ساتى وعابدون محمد عابدون ان فريق التحرير البحراوى كان اسمه فريق استاك قبل الاستقلال. وسمى على السير لى استاك الحاكم العام على السودان وقائد الجيش المصرى الذى اغتيل فى القاهرة عام 1924. كما سمى المختبر الطبى المركزى فى الخرطوم باسمه ايضآ (معمل استاك).
السير لى استاك الحاكم العام على السودان
مشهد بريشة رسام يصور اغتيال السير لى استاك فى القاهرة عام 1924
http://weekly.ahram.org.eg/2000/503/chrncls.htm
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
عماد احمد
حياك الله اخوي وماشاء الله كل ما اقرا ليك توثيق انبهر بي الكم الهائل من المعلومات
واهلا بالوجيه الحارث وتصحبه السلامه في الحل والترحال
روما
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
بيبنا "العماد بن عمنا عبدالله"
سلام من الله تعالى عليكم ورحمات وبركات..في إنتظار الأخبار بدءآ بأخبارك واخبار آل خيري بمن فيهم الرجل الخلوق أستاذ خيري
ولك من الود أكمله
| |
|
|
|
|
|
|
|
|
|
Re: ما أجمل الوفاء (Re: الشيخ سيد أحمد)
|
Quote: بيبنا "العماد بن عمنا عبدالله"
سلام من الله تعالى عليكم ورحمات وبركات..في إنتظار الأخبار بدءآ بأخبارك واخبار آل خيري بمن فيهم الرجل الخلوق أستاذ خيري |
اخي العزيز الصغير عمرا الكبير مقاما الشيخ
لك كل الود والتحايا لاسرتك الكريمة ولحاجة صفية
ربنا يديها الصحة والعافية
اخبار ناس الشعبية وأل خيري سوف اسعفك بها لاحقا
دي طلة سريعة نمسي على الاحباب قبل ما ينوموا
نحنا باقي بنسد وردية الليل مع ساري الليل وليد
اكان ما يكون باعني وعمل نائم
تحياتي
| |
|
|
|
|
|
|
|
|
|
Re: ما أجمل الوفاء (Re: Munir)
|
عزاء واجب للاخوة يوسف و منعم وتيتو واهلهم وجيرانهم
الا رحم الله والدتهم وغفر لها ذنوبها وجعل الجنة مثواها
الاخ خالد درق
بالامس اتصلت بالاهل فى البيت و علمت منهم بما يدور من تكريم لفقيد الحى والشباب الاخ
عثمان سالم و كنت اسمع عبر الهاتف بعض من مايدور.
نسال الله الرحمة والمغفرة لفقيدكم وفقيد الحى عثمان سالم
شمس الدين
نشاطركم الاحزان ونسال المولى عز وجل الرحمة والمغفرة للجميع
وان شاء الله اخر الأحزان
| |
|
|
|
|
|
|
|
|
|
Re: ما أجمل الوفاء (Re: اسامة سعد)
|
الاخ شمس الدين ساتي
احسن الله عزاءكم.
اللهم اغفر لهم وارحمهم واغسلهم بالماء والثلج والبرد.
ونقهم من الخطايا كما ينقي الثوب الابيض من الدنس.
وانا لله وانا اليه راجعون ،،،
عزالدين عباس الفحل
ابـوظبــي
| |
|
|
|
|
|
|
|
|
|
Re: ما أجمل الوفاء (Re: عابدون محمد عابدون)
|
Quote:
الاخ / عابدون تحياتى
اهل الشعبية السلام وعليكم ورحمة الله وبركاتة
مبروك 78 وعقبال المزيد
الاخ / عماد احمد حمدلله على سلامة الاخ الحارث على صالح واقامة طيب بين الاخوان فى الارض المقدسة
ولكم الود
اخوكم خالد درق ... دبى
|
| |
|
|
|
|
|
|
|
|
|
Re: ما أجمل الوفاء (Re: ياسر نجيلة)
|
العزيزة د. روما
والله نسيت أعز عزيزة حنان وزوجها صديقى ودفعتى
ودالهجرة الجيولوجى محمد بابكر الرجل المهذب
ويا أخوانا حنان فى الترتيب هى الخامسة بعد المحامية
هويدا وتذكرت الرجل المهذب صديقنا ضابط الجمارك بشير
زوج أختى الفاضلة منال وربنا يتمم لإبنتهم بخير
| |
|
|
|
|
|
|
|
|
|
Re: ما أجمل الوفاء (Re: Emad Ahmed)
|
تشكر يا اخ وليد على ماقمت به نحو استمرارية هذه البوستات الثلاث ...
تشكر مرة اخري وان شاء الله في ميزان حسناتك ... لما تحملة هذا البوستات من تواصل
ترقي لمصاف اتصال الارحام ...
| |
|
|
|
|
|
|
|
|
|
Re: ما أجمل الوفاء (Re: ياسر نجيلة)
|
Quote: تشكر يا اخ وليد على ماقمت به نحو استمرارية هذه البوستات الثلاث ...
تشكر مرة اخري وان شاء الله في ميزان حسناتك ... لما تحملة هذا البوستات من تواصل
ترقي لمصاف اتصال الارحام ... |
مشكور اخ ياسر نجيله
وهذا ابسط شي نقدمه الى بوستاتنا امهاتنا
والشغله ليست ونسه وتزايد صفحات
عماد عثمان
مشكور ياصديقي على الدعم والتعقيب
| |
|
|
|
|
|
|
|
|
|
Re: ما أجمل الوفاء (Re: وليد عبد اللطيف)
|
مبدعات شابات من الشعبية :
المذيعة سارة جاد الله كرار
اليكم هذا الحوار مع المذيعة سارة جاد الله
حوار نشوى عبد الله :
سارة جاد الله كرار إحدى الوجوه الشابة في مجال الإعلام عملت بإذاعة القوات المسلحة ولا زالت تقديماً وإعداداً ثم قضت فترة بالإذاعة الرياضية.. وحالياً اتجهت للعمل الصحافي كصحافية رياضية التقيناها في المساحة التالية في دردشة رمضانية خفيفة معاً نتابع ماذا قالت سارة.
= ما اسمك؟
سارة جاد الله كرار محمد.
= بتعملي شنو في رمضان؟
معظم الوقت في رمضان يكون في الشغل وطبعاً الإفطارات كثيرة وأحرص دوماً على زيادة الجرعة الإيمانية بقراءة القرآن وأداء صلاة التراويح فهذا شهر المغفرة نسأل الله أن نكون وإياكم من عتقائه.
= أحكي لينا عن مواقفك مع اسم السبّاحة العالمية.
أولاً تحية كبيرة للسبّاحة العالمية سارة جاد الله جبارة وأهنيها بشهر التوبة والرحمة. طبعاً مواقفي كثيرة مع الناس أذكر أنني ذات يوم ذهبت إلى إحدى الشركات بغرض إجراء معاينة للعمل وإذا بأحد العاملين يسلم عليّ سلاماً حاراً جداً عندما تسلم أوراقي وقرأ الاسم طبعاً وفاجأني وهو يلوم نفسه على عدم عزائه لي في وفاة والدي وطبعاً قاصد والد السباحة المخرج جاد الله جبارة وأكد أنه سيأتي لزيارتنا بالمنزل وأضاف أن الراحل لم يكن بالرجل السهل.. ومثل هذه المواقف كثيرة خاصة عند إبراز بطاقتي الشخصية.
= هل مارست رياضة من قبل؟
نعم ففي مراحلي الدراسية المختلفة لعبت التنس الأرضي وكنت ضمن فريق الكرة الطائرة ولكن الآن اكتفي بالمشي فقط من فترة لأخرى ولدي فرصة للالتحاق بأحد المسابح وأتمنى أن يكون مسبحاً يخص السبّاحة العالمية سارة جاد الله.
= سارة حصل دخلتِ الإستاد؟
للأسف لم تسنح لي الفرصة للدخول لكن بحكم عملي في مجال الإعلام الرياضي فلدي الفرصة للدخول.
= حصل سافرت خارج السودان؟
لم أسافر خارج البلاد ولكل بإذن الله وإذا اكتملت الترتيبات فسأسافر إلى قاهرة المعز في دورة تدريبية ينظمها اتحاد الإعلاميين الشباب السودانيين. ولا أنسى هنا أن أقدم لهم التحية مشكورين على الجهود التي يبذلونها في الاتحاد.
= أين أنت الآن؟
أنا الآن متوفقة عن معانقة المايك لبعض الظروف، لكن كنت أقدم برامج منوعات وفترات مفتوحة وعلى حسب ميولي الرياضية اتجهت لتقديم وإعداد البرامج الرياضية بإذاعة القوات المسلحة.
< نعم أطمح لأن أكون إعلامية شاملة فأنا الآن أتلمس الخطى في مجال الصحافة. وأسال الله أن يوفقني.
< في واحد من أيام رمضان كان في غيمة في وقت الأصيل ومشى الزمن وبعدها جاء غبار كثيف والكهرباء قاطعة وبقينا نعاين في ساعة الموبايل ونتساءل مع بعض داخل المنزل الأذان. أذن؟ وبعد دقائق تلفون أخوي رنّ قلت ليه أسأل المتصل الأذان أذن؟
لم أدرس الإعلام ولكن في اعتقادي أن الإعلام موهبة تنتقل بالإطلاع وزيادة المعرفة. من حباه الله بنعمة القبول فسينجح بإذن الله في هذا المجال.
< الفضائيات هذه الأيام وفي شهر رمضان بالتحديد تعج بالمسلسلات. ولكن عموماً وعلى كثرتها لم تقدم شيئاً يذكر للمشاهد.
< أول يوم قررت أصومو كان عمري لا يتجاوز الحادية عشرة وكنت متحمسة لصيامي ولكن عند الساعة الثانية عشرة ظهراً جاء خالي الأكبر ربنا يديه العافية فعرف بصيامي فأجبرني على الفطور وقال لسه بدري عليك صومي نص يوم الليلة وتاني صومي نص يوم يبقى يوم.. حتى تتعودي على الصيام بعد داك جدولنا أن أصوم يوم بعد يوم.
= حاجات تزعلك في رمضان؟
الخلافات في الشارع العام والصراخ بصوت عالي وبألفاظ سيئة لا تليق بشهر الصيام.
= أجمل حاجة في رمضان؟
الحقيقة إن الإفطارات في الشوارع شيء جميل جداً وتدل على عظمة الشعب السوداني وهي أجر للقائمين عليها.
(الأستاذة سارة جاد الله تسكن مربع 4-5 جوار دكان جوبي )
منقول من صحيفة الرائد .
| |
|
|
|
|
|
|
|
|
|
Re: ما أجمل الوفاء (Re: عزالدين عباس الفحل)
|
قالت د. مريم (روما) إنها على وشك الانتهاء من الكتاب الذى تكتبه عن صراعها مع مرض السرطان.
| Quote: الكتاب في مراحله النهائيه ولقيت لي منظمه بتهتم بابحاث السرطان ح يساعدوني في نشره باذن الله |
بالتوفيق يا دكتورة. حيكون باللغة اليونانية؟ لو ترجموا الكتاب الى اللغة الانقليزية انا مستعد لترجمته الى اللغة العربية.
والدى العزيز المرحوم محمد عثمان الحاج رحمة كانت اجريت له عملية فى معدته لاستئصال ورم حميد
ونجحت العملية، ولكن اصابته جلطة بعدها بايام قليلة وفاضت روحه الى بارئها فجر 6 يونيو 1998.
اللهم ارحم احبابنا الذين رحلوا. واشفى المرضى، وزد للاصحاء فى صحتهم وعافيتهم.
إن الكتابة عن التجارب القاسية التى يمر بها الانسان من شأنها أن تخفف من ذكراها
وتساعد من يمرون بتجارب مشابهة فى فهم الحاصل، والاستفادة من تجارب الاخرين فى هزيمة المرض
واستلهام صمودهم وعزيمتهم وصبرهم.
لا اراكم الله مكروهآ فى عزيز لديكم.
| |
|
|
|
|
|
|
|
|
|
Re: ما أجمل الوفاء (Re: وليد عبد اللطيف)
|
Quote: ولكن اصابته جلطة بعدها بايام قليلة وفاضت روحه الى بارئها فجر 6 يونيو 1998.
اللهم ارحم احبابنا الذين رحلوا. واشفى المرضى، وزد للاصحاء فى صحتهم وعافيتهم. |
تخيل ياعادل
عجزت الوصف عن والدنا وعمنا المرحوم محمد عثمان
وليس لدينا شي غير الدعوات الصالحات
وان لله وان اليه راجعون
ورحمه الله رحمة واسعة واسكنه مع خيار الدار
تخيل قبل هذا التاريخ بكم يوم اتيت السعودية
وحكي لي اخي سيف عن اليوم الاسود بخبر وفاة والدكم ووصفوا لي
كيف كان حال اهل الشعبية وهذا هو حال الدنيايا عزيزي
ووالدكم رحمة الله علية كان علم من اعلام الشعبية ووالد الجميع
وفقدته الشعبية وبكت علية .
------------------
بالمناسبة ذهب ابن خالتي المهندس علاء الدين وطمننا عن عمر عثمان صديقي والان هو مدير مشروع كبير
ولكن كما تعلم يظهر تعود على راحات ابوظبي
| |
|
|
|
|
|
|
|
|
|
Re: ما أجمل الوفاء (Re: وليد عبد اللطيف)
|
الاخ العزيز الشيخ سيد احمد
تحياتي آسف امس بالليل ما دخلت البوست
عن اخبار آل خيري
الاخ الاستاذ محمد خيري بعد رجوعه من اليمن
شيد منزله بالحلفاية واستقر بها لكن كل
خميس بيجي الشعبية طبعا هو متزوج اخت مولانا
فتاح النور اما سمير خيري مستقر في السعودية
وامير ايضا بالسعودية وشغال في شركة ترحيلات
بين السعودية والامارات والبحرين اما وحيد كان
في السعودية ورجع السودان وياسر مستقر بالسودان
مع تحياتي واحترامي
| |
|
|
|
|
|
|
|
|
|
Re: ما أجمل الوفاء (Re: وليد عبد اللطيف)
|
Quote: تخيل بدل اسمك كتبت منير لان قصة ابنته وهي تتفرج في احلامها كل ما اتذكرها اضحك
وامكن عشان عندي معه ونسه كمية ولذيذه .. تحياتنا ليكم الاثنين |
وليد ياخ والله أنا متكيف منك كده لله في الله ـ رغم إنك زول وراءنا شديد وزمان كنا لمن نشوفكم جايين مقاطعين في شوارعنا وانتم في ريعان صباكم وبواكير شبابكم كنا نراكم جيل يصغرنا بكثير ـ وطبعآ لم يحدث أبدآ أن تكلمنا مع بعض في الشعبية ـ ولكن طبعآ أعرف أخوك سيف الرجل الباسم دائمآ والذي كنا حين نتلاقي أنا غايتو كنت بشعر كأنه الزول ده قريبي وكنت بحس إنه بيشبهني وكنا نتبادل التحية بود واحترام بتاع معرفة رغم إننا ما حصل وقفنا اتونسنا كده مع بعض وبرضو كنت بخلط بينه وبين ناس كمال الزبير وأخوانه ـ والسبب يا اخواننا طبعآ ملاح الخدرة الشديدة الداكنة والأنا زاتي بشترك فيها معاهم أنا وأخوي عماد عبدالله الطيب ده ..
أما يا وليد حكاية بأتفرج في أحلامي دي والتي قالتها مني بكل صدق فدي واحدة من طرائف كثيرة للأطفال دايرة ليها صفحة أو بوست براها .. وخاصة لأولادنا الإتولدوا بره وما اختلطوا بشقاوة اولاد البلد الفصيحين ..
وأديك طرفة تصبيرة لأحمد ولدي الذي سيتم عشرة سنوات في نهاية السنة دي .. فأحمد ده من النوع البيلطخ أي كلمة ويلصقها في أي جملة يا لفقت يا اخطأت .. وطبعآ المشكلة إنو مفرداتهم العربية بس ياها البيسمعوها مننا في البيت ـ ولذلك للأسف بقوا زي العجم مرات مرات .. فأمهم مجتهدة معاهم وبتدرسهم بعض القصص الدينية والسيرة وتدرسهم عربي و..و.و من ضمن السيرة حدثتهم عن سيدنا ابوبكر الصديق وعمر وعثمان وعلي و..و.. فولدنا أحمد مرة بتختبره فسألته عن من هو أول الخلفاء الراشدين فرد مباشرة زي الماحصل حاجة: أبوظبي . .
| |
|
|
|
|
|
|
|
|
|
Re: ما أجمل الوفاء (Re: Emad Ahmed)
|
| Quote: *** المبدع الاخ عماد عثمان يا رائع واصل بخطي ثابتة وخش لينا الي اولاد حاج الماحي والشيخ البرعي وبالتفصيل الممل. |
الأخ عز الدين عباس الفحل
سلمك الله وطلباتك أوامر انشاء الله .
| |
|
|
|
|
|
|
|
|
|
Re: ما أجمل الوفاء (Re: Munir)
|
يا أمير قناوي ياخي أخبار عصام شنو؟؟ .. الراجل ده يمكن آخر مرة قابلته فيها ـ وما متأكد بالضبط إن كان هو ذاك اليوم ـ كان زواج سيداحمد ودعمنا محمدصبير ، تعرفه طبعآ.. بيتهم فاتح في شارع المدارس بضهر شارعكم .. وعصام كان مع ناس عزالدين الفحل في فصل ب لكنه كان معانا في الاميرية2 في فصل جنوب وهو من أنصع الفترات الدراسية التي مررت بها .. حيث كان أكثر فصل مشاغب كما كنا أكثر فصل فخور بأساتذته وخاصة اللغة الانجليزية التي درسنا لها استاذنا الفاضل ابراهيم علي الذي علمنا متعة تعلم الانجليزية .. وقد لا أبالغ إن قلت لكم أن 80 في المية من الانجليزية البتكلمها الآن هي من مخلفات الانقليزي الدرسنا ليهو استاذ ابراهيم في سنة تالتة عام ..
وبمناسبة اللغة الانقليزية ياجماعة فأكثر طالب قالوا نبغ في اللغة الانجليزية في الثانوي العام كان في الدفعة القدامنا وهو كمال خضر ـ أخو عصام وأخوانه ـ وبيتهم فاتح علي شارع الشعبية قصاد ميدان الصداقة .. وكمال ده منذ امتحان الشهادة مرق للدراسة في اوروبا الشرقية تاني مارجع .. يمكن عادل عثمان يكون عارف اخباره ..
| |
|
|
|
|
|
|
|
|
|
Re: ما أجمل الوفاء (Re: Munir)
|
أحبــتى:
عجبت كـثيرا لـمـن يدعو لوقف الحوار ويريد أن يســـكت صـوت التـواصـل لـغرض لا أدرى ماذا يستفيد منه!
إن خيار الكتابة والقراءة فى المـواقع قـرار شـخـصى لمـن يريد أولايريــد.
فلو كان صــاحب البورد بأريحيتة وفطنتـه يرى أن شــتات قوم لم يتأتى لهم طوال عشـرات الســنين أن يتواصـلوا ويجــددوا ذكرياتهم ويشتركوا فى تـحليل أوضاع مناطقهم ليستنبطوا الـحلول لمـشاكلهم ويرفعوا عن كاهل أهـلهم هموم المعاناة والأذى فى أســلوب حضارى ديمقراطى راق؛ لو كان هذا الرجل النبيــل يرى جدوى كل ذلك فلماذا يــسـعى إنســان لتكمــيـم الأفواه وتحـطيم عـمل لايجنى منه أصـحابه إلا الرضا وجبر الخواطر.
أن هذه العـقلية التحـطيمية من دون تقـديم البـديل قد إنداحت لتشــمل كل شــى فى حــياتنا حـتى صـرنا كما قال أحـد الأخــوان نعيش التطـور ســلبا من الماضى بتدهور مأســاوى مســتمـر فى الحاضر.
يا إخـوتى أعملوا لكم بوســتات ومـداخلات إيجابية تفيدنا وتفيدكم، وتشــعل آمالنا وأمال أولادنا حتى يأخذوا منا القدوة بدل أن نشـــيع فيهم ثقافة الهدم وعادة التحطيم.
أمــلى أن أرى إســـهاماتكم المفــيدة وسأكون أول قارئ لـها مــســاهم فيـها، ولن أتوقف من قراءة والإســهام فيما أختاره؛ فهو خيارى ولن أســمح لأى إنســان من منعى من ممارسة هذه الحــرية التى مـهما صــغرت فإنهـا الأسـاس الذى تنبنى عليه كل الخيارات فى الممارسة الحياتية.
ولكــم كــل الـحب والأمــــل
| |
|
|
|
|
|
|
|
|
|
Re: ما أجمل الوفاء (Re: عبدالرحمن إبراهيم محمد)
|
اشار:الاخ عبد الرحمن ابراهيم
Quote: فلو كان صــاحب البورد بأريحيتة وفطنتـه يرى أن شــتات قوم لم يتأتى لهم طوال عشـرات الســنين أن يتواصـلوا ويجــددوا ذكرياتهم ويشتركوا فى تـحليل أوضاع مناطقهم ليستنبطوا الـحلول لمـشاكلهم ويرفعوا عن كاهل أهـلهم هموم المعاناة والأذى فى أســلوب حضارى ديمقراطى راق؛ لو كان هذا الرجل النبيــل يرى جدوى كل ذلك فلماذا يــسـعى إنســان لتكمــيـم الأفواه وتحـطيم عـمل لايجنى منه أصـحابه إلا الرضا وجبر الخواطر.
|
تسلم،عبد الرحمن وتشكر علي كلماتك الدرر،في البوست،ونيابة علي كل الناس الحلويين الفوق ديل
نقدر ونثمن حديثك الطيب،وهذا يدل علي اصالة معدنك وفهمك الراقي للوشائج الاجتماعيه الانسانيه
وذاك رهان لا اظنك قد تخسر فيه بالمره.
وازيدك،بان اعضاء البوست،لا تجمعهم قبيله اثنيه،او ايدلوجيه سياسيه،او مصالح ماديه.
فكل الذي يجعنا هذا الحيز المكاني الشعبيه،لكل منا ذكرياته وطفولته ومراتع الصبا
واصدقك قولا،بان بعض اعضائه لم يلتقوا في الحياة،او بالشعبيه،وذلك لتباعد الفئات
العمريه او الاغتراب بل حتي جغرافية الشعبية نفسها واتساعها.
لكن كلا ينثر درره وخواطره ثم يذهب سبيلا،ولا يريد جزاء او شكورا.
اما صاحب البوست ذاك،لعله كان ينشدا ا شهارا،و سمعة،لكنه مسكين
فالفطاحلة هنا مستوي وعيهم وذكائهم الاجتماعي رائحته فواحة.
تسلم صديقي عبدالرحمن. والدار دارك.
مودتي
| |
|
|
|
|
|
|
|
|
|
Re: ما أجمل الوفاء (Re: الفاضل يسن عثمان)
|
أمير قناوى
وليد عبد اللطيف
كلماتكما واستنى، وعاضدتنى. فأنا من تصاريف القدر لم أر الوالد مرّة ثانية بعد مغادرتى السودان عام 1994. وأول شئ عملته بعد عودتى فى 2005 الذهاب الى قبره فى حلة خوجلى والترحم عليه، وعلى قبر الوالدة العزيزة حرم على موسى التى رحلت فى 23 مايو 1989.
آباؤنا، هذا الرعيل الاول من العمال الكادحين، ما قصروا فى شئ. وفروا لنا حياة يسّرت لنا التفرغ للتحصيل الأكاديمى، والحظوة بتعليم لم يتح لهم، وإن كانوا من اذكى وأحنّ البشر. رحمهم الله واجزل ثوابهم.
عماد احمد
شكرآ على هذه الصور النابضة بالحياة. هذا الشارع مشينا عليه اطفالآ يفعآ، وصبية، وشباب، واكتهلنا وهو ما زال صامدآ. وميدان الرابطة أكاد اسمع هتافات المشجعين وتعليقاتهم وحسراتهم على ضياع الاهداف او ارتطام الكرة بخشبة المرمى، وفرحهم الطاغى بولوج المستديرة شباك أمهر الحراس.
منير
كمال خضر اظنه ذهب للدراسة فى احدى الجامعات المجرية بعد أن فصل من جامعة الخرطوم. ولا بد انه اكمل دراسته الجامعية وعاد الى السودان من زمان. والله اعلم. على كل حال كان موجودآ فى مأتم والده ووالدته عندما عزيناهم بالتلفون الذى نشر هنا قبل اشهر قليلة.
| |
|
|
|
|
|
|
|
|
|
Re: ما أجمل الوفاء (Re: Adil Osman)
|
Quote: اعضاء البوست،لا تجمعهم قبيله اثنيه،او ايدلوجيه سياسيه،او مصالح ماديه.
فكل الذي يجعنا هذا الحيز المكاني الشعبيه،لكل منا ذكرياته وطفولته ومراتع الصبا
واصدقك قولا،بان بعض اعضائه لم يلتقوا في الحياة،او بالشعبيه،وذلك لتباعد الفئات
العمريه او الاغتراب بل حتي جغرافية الشعبية نفسها واتساعها.
لكن كلا ينثر درره وخواطره ثم يذهب سبيلا،ولا يريد جزاء او شكورا.. |
أخى الفاضل تحياتى وشكرى
أنا أعرف الغـربة بعد أن غبت عن بحرى ثلاثون عاما، إلا لماما. ومن قبلها أبتليت بإغتراب إخوة أعـــزا ولكن نحن أهل بــحرى ناس أصلا ولوفين صدوقين
وســـأعيد مداخلتى من ست الهوى والطراوة حول حـديثى مع الكابتن عوض كوكا لأثبت ذلك.
أدام الله مودته علينا.
| |
|
|
|
|
|
|
|
|
|
Re: ما أجمل الوفاء (Re: عبدالرحمن إبراهيم محمد)
|
بحري طراوة... ويا ناس بحري .. قالوا بتحبوا يلا حبونا..
ألأخ عادل:
كتر الله ألف خيرك وشكرا على تلفون الأخ عوض كوكا والذى تسلمته فى أيميلك قبل حوالى ساعة من موعد بدء محاضرتى فآثرت أن أتصل به. والحمد لله سعدت جدا انى خابرته فقد وجدته صلدا مؤمنا مسلما بقدره غير مستسلم وفى روح معنوية عالية. نفس التصميم والشموخ والإصرار الذى عهدناه منه فى الملاعب؛ فله التجلة.
تحدثنا طويلا لاأدرى كم من الزمن، ولكن حينما وصلت الى قاعة المحاضرات كنت متأخرا ثلاثة عشرة دقيقة وكان أحد الزملاء الثلاثة الذى يدرسون معى الكورس كان قد بدأ فى تقديم موضوعه. ولما دخلت الفصل كنت متهلل الأسارير فعلق أحدهم: "لم كل هذه السعادة؟" فـقلت له أننى عائد للتو من ماضى الصبا والشباب؛ فقد تحدثت مع صديق لم أره منذ عام 1973 أو 74. فاستغرب وقال لى هل بعد كل هذه المدة كان بينك وبينه موضوع للكلام؟ فأخبرته بأننا تكلمنا بلا إنقطاع نسأل عن أخبار الأهل والأصدقاء: من إغترب وطالت غربته، ومن رحل عن هذه الدنيا، ومن غير نمط حياته. تحدثنا وكأننا لم نفترق سوى بضعة أيام فالود والصدق وحرارة اللقاء هل شيمة أهل السودان وأهل مدينتا الخرطوم بحرى بالذات. فضرب كفا بكف وقال لى هنيئا لكم هذه النفوس الإنسانية الفريدة.
فنحن حـقا أمة فريدة بكل ماتعنى هذه الكلمة.
آخ،،، لو وظفنا هذه الروح لجمع الشمل وإنقاذ سوداننا، الذى يغوص فى الوحل. ننقذه حتى تدوم لنا هذه المودة والحرارة الأنسانية قبل أن يضيع معشوقنا السودان إلى الأبد. لقد آن لنا أن نفكر فى كيف يمكن أن نرفض الخاطئ والمستهجن من العمل والقول من دون أن نحطم رابطة الدم والمودة. ولنعلم أننا لسنا "تيوسا" نكابر حتى يقضى بعضنا على الإخرين الذين يخالفوننا القول والرؤيا؛ ولن يمكن أن يحدث ذلك مهما أعتركنا وتقاتلنا أو حطمنا مؤسسات البلاد بعبثية مايسمى بالتطهير فكل ما تحطم كانت المرافق التخطيطية والخدمية؛ وأجهضت الكفاءات التى صرف عليها الشعب الملايين ليؤهلها. ولكن ذلك المنحى السلمى لايعنى عفى الله عما سلف!
من أجل السودان يجب أن نحاسب من أساء الى السودان من دون أن نحطم بيتنا السودان.
لفد تطرقنا عوض كوكا وأنا فى حديثنا الى الماضى وكيف كان "النفير" وكم بنينا من مساكن للإصدقاء وكيف تم بناء نادى التحربر والإتحاد والكوكب والأمير، وووو، ومدرسة العزبة ومدرسة وووووو
الآن، لماذا لايجتمع أهل كل حى وشبابه لينظفوا حيهم كل أسبوع أو أن يحفروا مصارف للمياه، أو يصلحوا المنهارمن البيوت. فأقل ما فى ذلك أنه يقوى رابطة المودة والتعاون والإحساس بالمصير المشترك والمحافطة على الحى! ويتبع ذلك أنهم إذا ماأخذوا أقدارهم فى أيديهم ليحلوا مشاكلهم بأنفسهم، سحبو بساط الشرعية ممن لايستحقونها وبدأوا مرحلة تجاوز الواقع المأسوى الذى شرد آلافا منا وعصف بتاريخنا وصار يتهدد مستقبلنا. تلك كانت الإستراتيجية التى أطاحت بالطغمة الفاسدة فى فنزويلا وبوليفيا فى أمريكا اللاتينية وأتت بنظم تتحترم شعوبها لأن شعوبهم أحترمت نفسها وأخذت مصيرها فى أيديها بمشاريع صغيرة بنت الإيمان والثقة بالنفس حتى حققت تغييرا جذريا فى واقعها.
أحبتى، لكم تتداعينا فى بحرى لنبنى بيتا لأخ أو مدرسة لصغارنا أو ناديا لرياضيينا. فلماذا لانعود سيرتنا الأولى لتكون بحرى نموذجا يعم السودان من أجل غد طيب لبقية أيامنا فى هذه الدنيا ومستقبل مشرق لأبنائنا. هذا أقل مايمكن أن نقدمه إعترافا بأفضال رجال أكارم بذلوا النفس والنفيس من أجل هذه الأرض الطيبة
أهل بحـرى الأصلاء الطيبون، أنت جديرون بأن تكونوا القدوة للتغيير الحقيقى وسيتبعكم الجميع بلاشك؛ ولكم العهد بأن أبناء بحرى المغتربين سيمدون لكم كل الدعم لو نهجتم نهج الإعتماد على النفس؛ بل أكاد أجزم بأن بعضنا سيعود ليحمل المعاول معكم عودا حميدا مستطاب..
ودمتم ذخـــرا للمودة والإخاء والصدق والأمــــــــل
| |
|
|
|
|
|
|
|
|
|
Re: ما أجمل الوفاء (Re: عبدالرحمن إبراهيم محمد)
|
أخي العماد بن عمنا"عبدالله
سلام من الله تعالى عليكم ورحمات وبركات
أفيدك عزيزي بأن الوالده الحاجه"صفيه" في أتم صحه ولله تعالى الحمد والشكر هذا وقد أطلقنا عليها لقب المستشارة الأسرية وذلك لأنها تجدها فترة مع إبنتها الصغرى ثم تارة مع الكبرى ثم تارة مع أولادها وذلك الفضل من الله تعالى..نسأل الله تعالى أن يديم عليها وعلى أمهاتنا جميعآ نعمة الصحة والعافية.
بالنسبة لبقية أفراد الأسرة فإن آخر العنقود "علاء" إنضم إلى سلك المهندسين عبر بوابة جامعة السودان وأعقب ذلك تأهله إلى دوري المجموعات بزواجه من إحدى زميلاته نسأل الله تعالى أن يبارك زواجه وزواج كل المسلمين وان يرزقه وإيانا وإياكم الذرية الطيبة الصالحة المعافاة.
أما الأخ الأوسط "نزار" فقد رفض رفضآ باتآ مواصلة الدراسة وإتجه إلى عالم التجارة بمجرد حصوله على الشهادة الثانوية.. وقد كانت فلسفته ان عالم التجارة هو الذي يتناسب معه.ولا زال في الدوري التأهيلي في قائمة الإنتظار يترقب اللحاق بركب المتزوجين,, نسأله تعالى أن يوفقه ويوفقنا جميعآ لما فيه الخير.
ولك من الود أكمله
| |
|
|
|
|
|
|
|
|
|
Re: ما أجمل الوفاء (Re: الشيخ سيد أحمد)
|
الاخوة الاعــــــزاء
منيـــــر عبدالرحيم
عـــادل عثــمان
ذكرتم اسم الاخ ( كمال خضر ) انه كان نابغة في اللغة الانجليزية ، بس عايز اعرف من هو كمال خضر ، هل هو ذلك الراجل الخطيب البارع
الذي كان يخطب في طابور مدرسة الاميرية 2 ودائما يبدا الخطبة بعبارة ( فيـــــكم الطيبــة ) هل هو ذلك الرجل .
اذا كان هو اظن الراجل ده كان معي في ابوظبي وكانت تربطني به علاقة ود متينة في ابوظبي . وهو علي درجة عالية من الثقافة والوعي والخلق
ارجو الافادة .
مع خالص الود
عزالدين عباس الفحل
ابــــوظبي
| |
|
|
|
|
|
|
|
|
|
Re: ما أجمل الوفاء (Re: الشيخ سيد أحمد)
|
الاخ العزيز منيــــــر عبدالرحيـــم
ارجو ارسال ابنك احمد الي ابوظبي ، ضحكت كثيرا لبراءته وسرعة رده ، والاطفال رياحين الجنة،
وعندي بنتي ( علا ) دائما تقول لي ( يابابا انا ماشي معاك العمرة ) ونركب السيارة ونلف في كورنيش ابوظبي وفجاءة تقول
( انا ما عايزة كورنيش ابوظبي انا عايزة العمــرة ، العمرة ماما قالت في السعودية ).
ويا ربي ما تحـــرم بيت من الاطفـال .
مع خالص الود
عزالدين عباس الفحل
ابــــوظبي
| |
|
|
|
|
|
|
|
|
|
Re: ما أجمل الوفاء (Re: الشيخ سيد أحمد)
|
هذه الأيام لا أجد من الوقت إلا القليل لزيارة الشعبية الإسفيرية،
فدخلتُ هذه المرة فرأيت آثار حزن وشجن تخيّم على البوست،
من ذكرى وفاة عمنا ووالد أخينا عادل!
نسأل الله أن يرحمه ويسكب على قبره شآبيب الرحمة والرضوان!
ويرحم جميع آبائنا وأعمامنا وأمهاتنا وعماتنا!
ويحفظ من بقي منهم، ويُسبل عليه ثوب الصحة والعافية!
آاااامين!
عز الدين عباس الفحل، والله عندي نفس شعور أمير وخشيته بأن تتوقف
يوماً عن سلسلة مدرسة الشعبية جنوب الاتبدائية، وكذلك خطر لي أن
أذكرك ببعض الأحداث، لكي تعيد لنا صياغتها وعرضها في مشهد .... "
ما لاقي كلمة أوصفو"!
وهاك هذه أولاً: هل تذكر يوم وقفت أنت في الفصل لتغنّي؟!
هل تذكر؟
يلا كمل الباقي!
أما عن طلبك فحجتي الآن إني: "والله ما بعرف بنزل صور!"
| |
|
|
|
|
|
|
|
|
|
Re: ما أجمل الوفاء (Re: شمس الدين ساتى)
|
البروفسير عبد الرحمن ابراهيم محمد
هامتكم العاليه ومقامكم الكريم شرف البوست
مرحبا بكم مرات ومرات يا بروفسير ومتى سمح لكم وقتكم الغالي
نحن عطشى لقراءة ما سيجود به قلمكم
روما
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
عادل عثمان
رحم الله والدكم ووالدتكم واسكنهم فسيح جناته وطرح البركه في اولادهم واحفادهم
بالنسبه للكتاب هو بالغه اليونانيه انا قربت اخلص منه والفكرة جات من عدة ندوات قمت بها اثناء فترة المرض وبعد الشفاء
كنت ضمن حمله توعيه ومواساه للمرضى وكان الاسلوب لقا قبول واستحسان فشجعوني اني ممكن اكتب الكلام دا في كتاب
وبديت وح يكون عدة ابواب منها نشاتي في السودان وفكرة الناس هناك عن المرض ومنها مجيئي لليونان وهل دراستي وتخصصي في علم
النفس اثر في رحلتي مع المرض وفي باب تاني لما اكتشفت المرض وكيف تلقيت الخبر و دبايات العلاج وكيف كنتا باكون قبل كل عمليه
وبعدها وفي باب عن الاعمال الربنا وفقني وقمتا بيها اثناء فترة المرض وفي قصص انا شاهدتها في المستشفى طبعا اخدتا الاذن من اهالي
المرضي المتوفين واذن الاحياء منهم برضو متطرقه لي اسلوب المعالجين سواء اطباء او ممرضات وفي جزء عن تاثير الادويه والعلاج على وعلى حالتي العامه
وبالمناسبه فيه جزء عن رجوعي لبلدي اول ما تلقيت خبر اني خفيت وما حدث لي هناك برضو في جزء عن نظرة الناس لي وانا مريضه وكيف كنتا باشوف
نفسي بعد ما تساقط شعري من الكيماوي ونقصان الوزن الكبير وكيف كنتا باتغلب على الاحباط كل ما الاورام تنشتر في مكان جديد
وفي جزء عن مرحله ما بعد الشفاء كيف بديت من جديد في عملي وحياتي ونظرتي للحياة
باكتب فيه باليوناني وفي وعد من الجمعيه دي لو الكتاب حقق رواج في ترجمه ح تكون باللغه الانجليزيه
وشكرا ليك يا عادل عثمان ربنا احميك انتا وكل المسلمين من مرض الكانسار وما يضوقوا لي اي زول
روما
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
الدكتور قناوي
ربنا يديك الفي مرادك يا دكتور وذكرك الله بالشهادة
بالله عليك نحنا في انتظار كتباتك عن المرحوم والدكم حاول متى ما كنت مستعد
وتاكد اننا منتظرين الخطوة دي عشان نشاركك في ذكرياتك وشهادتك عن انسان
خلوق وعلم من الاعلام
تياتي لي اسرتك وربنا يغتي عليكم
روما
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
اخوي منير
ربنا يخلف عليك في الصورة ما مشكله نقول في اطار حمله انقاص حجم الصورة للمحافظة على رشاقه المنبر
ربنا يخلي ليك منى واحفظها ليك ويخلي ليك احمد ويبلغك فيهم واكيد الله يخلي ليكم ام احمد ومنى ست البيت وست العيله كلها
روما
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
اخوي واستاذي عماد احمد
ربنا يحقق ليك كل ما تتمناه بحق ما اسعدتنا بالصور الجميلة
رجعتا لينا الروح برؤية شارع الشعبيه والميادين والشوارع
بحق ما ادخلتا السرور لي انفسنا ربنا يفرح قلبك
روما
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
اخوي عزام
ماشاء الله على الوالد النادر الوجود علم وثقافه واب كريم وانسان يشار له بالبنان وصاحب مبدا
ربنا يبارك ليكم في احفاده وهنيئا لكم تشرفكم بانكم ابنائه وراجين تكلمنا عنه اكتر
مشكور على صورة المستشار حسن طه وهو فعلا فخر لنا
روما
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
اختي دكتورة ستنا خدر
الجاتك في كنبوترك سامحتك حسا انتو راقدين في ياتو عنبر عشان نجي نعمل الواجب
ح اجيك ومعاي كيس فيه برامج وانتي فايروس
اشتقنا لي كتاباتك يا ستووو سلام لاسرتك كلها المعاك والفي الشعبية
روما
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
اخوي عماد عبد الله
ان شاء الله المشغوليات خفت شويه
سؤال منو الولد الشاب الفي الصورة دا ولدك
ربنا يخلي ليك اسرتك ويطرح ليك البركه فيهم
روما
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
الدكتورة مريم عبدالله
حياك الله
بصدق انا اقرا كل حرف منك ، بس ما بلقي الوقت للمداخله ، والابتلاءات تزيدالمؤمن قرب من الله رافع السموات بلا عمد وتمحو الخطايا، والله علي كل شي قدير ، والله رحيم ، والله كريم ،والوهاب والرزاق هو الله ، ودعاء سيدنا يونس ( لا اله الا انت اني كنت من الظالمين ) ، وسيدنا موسي عليه السلام فلق البحر بقدرة الله ، واحتمي المصطفي عليه افضل السلام في الغار وجاء الحمام والعنكبوت بقدرة الله ، والشافي هوالله ،
وما دام الامور كذلك علينا ان نتعلق بحبل الله المتين ،،،
مع خالص الود
عزالدين عباس الفحل
ابــوظبـي
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
البروفيسير عبدالرحمن ابراهيم محمد
حياك الله
ومرحب بيك بين عشيرتك واهلك عبر الاثير ، جمعنا حوش الحاج حمد ونحن في بقاع الله الواسعة من المانيا وايطاليا وامريكا واليابان واستراليا وقطر والسعودية والامارات وكندا واليونان وانجلترا ، جمعتنا الشعبية الحبيبة علي القلب ، واهلا وسهلا بيك يا بروفيسير
عبدالرحمن ابراهيم محمد ، وسطنا .
مع فائق الاحترام والتقدير
عزالدين عباس الفحل
ابــوظبــي
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
الاخ الفاضل صلاح عباس فقير
حياك الله
من طرائف المواقف وانا في المدينة المنورة في رمضان الماضي كان معي ابني ايهاب ، وكل مرة ننزل من الفندق وبعد الانتهاء من الصلوات
اسوق ابني ايهاب صوب باب السلام في المسجد النبوي الشريف ، و نفتش بين الوجوه لرفيق الدرب صلاح عباس فقير، فجاءة سالني ابني ( انت عارف شكله يا بابا ) ارد عليه افترقنا قبل ان ندخل الجامعة ، فيندهش الابن ايهاب من طول المدة ، وارد علي دهشته بالوفاء والعرفان
لصداقة حسمها الاثير بالمس كولات والايميلات والعولمة الجارفة وهي سنة الحياة اجتماع وافتراق ..
مع فائق الاحترام والتقدير
عزالدين عباس الفحل
ابــوظبــي
| |
|
|
|
|
|
|
|
|
|
Re: ما أجمل الوفاء (Re: مريم عبد الله)
|
| Quote: صورة مُشرِفة لِمولانا (المُستشار) / حسن طه وهو في المنصة مع الناس الكُبار ... جاءت في صدر صحيفة العرب القطرِية وعِدة صُحُف أُخرى عربِية وإنكِليزِية ... قبل إسبوع ، في حفل توقيع مشروع عِقاري ضخم جِدًا |
عزام فرح كيفنك
المستشار حسن طه مشرفنا من زمان ودي دعوات حجة نفيسة والدته (امنا الطيبه )
وبمناسبة حجه نفيسة
مره المستشار حسن طه كان ساعي ليهو مكتب فخم في السودان
فقام اخد والدته نفيسة في مشوار وعرج بها الى مكتبة
فعجبها مكتب حسن طه والحال السمح
فرجعت الحله وتحت شجرة بيتهم لقت عماد طه والشباب كشاتين
وجوطه فنزلت من العربة وقدمت محاضرة
وقالت : اولاد مافيكن فايده بالله مشيت مع حسن طه مكتبو
كرررررررن جيب مويه
كرررررررن جيب شاي
فضحك الشباب وتوقف اللعب
--------
ياعزام فرح
كلام ححجه نفيسة ده كلو باللهجة الدنقلاوية
والله طيبه طيبة وفي نفس الوقت دمها خفيف لذلك كنت
دايما احرص لالتقاط كلماتها التي تتوسطها الحكم والموعظة
------------------
وصورة المستشار للمره التانية بهديها للحاجة نفيسة بالدمام (المنطقة الشرقية )
وربنا يديها العافية ... (يامغيرة قوم بالواجب )
| |
|
|
|
|
|
|
|
|
|
Re: ما أجمل الوفاء (Re: عزام حسن فرح)
|
| Quote: والله بِتبالِغ عديل كِده! في زول بِستأذن في حقو كمان؟ أي شئ لي مُشاع لِناس بحري والشعبِية ... ديل في راسي مِن فوق |
تسلم ياراقي . .
| |
|
|
|
|
|
|
|
|
|
Re: ما أجمل الوفاء (Re: عزام حسن فرح)
|
| Quote: والله بِتبالِغ عديل كِده! في زول بِستأذن في حقو كمان؟ أي شئ لي مُشاع لِناس بحري والشعبِية ... ديل في راسي مِن فوق |
عماد عثمان احمد
ياخي عزام ده اعمل حسابك بعدين بطلعك لائيم وماعندك ادب وعينك قوية
زي ما عمل معي قبل كده لما كنت برسل ايميلات عن طريقة
شوف
هو زي المواعيد دي عزام مابشوف انت بس نزلها زي ما انا عملت في مكان تاني
واعمل نايم . واي حاجة بعد سته مساء ماتنزلها
| |
|
|
|
|
|
|
|
|
|
Re: ما أجمل الوفاء (Re: وليد عبد اللطيف)
|
أحـبتى كل من كتب مـرحبا أو شــارك فى هذا التواصل الجميل النبيل
الأخ عادل أحمـد الموثق الأول
وأختى الدكتورة مريم عبدالله الصادقة الصدوقة
وأخى الفاضل يسن عثمان
وأخى وليد عبد اللطيف المجتهد دوما فى كل المداخلات
وأخى شمس الدين ســاتى
وأخى عزالدين عباس الفحل
لكم الود والتجـلة على إسهاماتكم الرائعة لأن تحفظوا لنا أجمـل مافى الوجـود: إنسانيتنا
فلكم الحب والشــكر موصـول
| |
|
|
|
|
|
|
|
|
|
Re: ما أجمل الوفاء (Re: عبدالرحمن إبراهيم محمد)
|
كلّ آيات المودة والتقدير نزجيها للبروفسير عبد الرحمن إبراهيم،
مرحبين به في الشعبية الإسفيريّة!
وحقيقةً، طلتك يا دكتور تشجعنا كثيراً على الإطلال عبر نافذة بحري
وتذكرنا بأنّنا جزء من ذلك الكل!
وأؤمن على دعوتك للتّفكر في أسباب تواصلنا وتعاطفنا، رغم اختلاف
مشاربنا، عسى أن يكون في دراسة هذه التجربة ما ينتفع به الوطن
الكبير!
| |
|
|
|
|
|
|
|
|
|
Re: ما أجمل الوفاء (Re: صلاح عباس فقير)
|
عز الدين،
السلام عليكم
إنت تدور بباب السلام،
وأنا أدور بباب الملك فهد!
ما كان عندك رقمي؟
يلا، المهم المرة الجاية بإذن الله!
يلا في انتظار الحلقة الجديدة من مسلسل:
مدرسة الشعبية جنوب الابتدائية
أها، ماذا قلت لي!
هل تذكرت يوم وقفت من أجل أن تغني؟
بس طبعاً بدون ذكر اسم المدرس!
| |
|
|
|
|
|
|
|
|
|
Re: ما أجمل الوفاء (Re: عماد الدين عبدالله)
|
| Quote: والسبب يا اخواننا طبعآ ملاح الخدرة الشديدة الداكنة والأنا زاتي بشترك فيها معاهم أنا وأخوي عماد عبدالله الطيب ده .. |
الاخ الرائع منير
اخوك عماد عبداللة خدرتو ما داكنة محرقة عديل
لكن طبعا جنب نادر اخوي انا حلبي
| |
|
|
|
|
|
|
|
|
|
Re: ما أجمل الوفاء (Re: عماد الدين عبدالله)
|
| Quote: *** الدكتور عماد الطيب انا متابعك في كل حرف عن ذكرياتك بس كلها من الجنس اللطيف ، واصل يارائع يا جميل . |
الاخ العزيز عزالدين لك كل الحب والتقدير
واشكرك على المتابعة وطبعا الجنس اللطيف
هو القاسم المشترك في كل شئ سواء في السودان
او في روسيا او في المانيا او في غيرها
تحياتي للاسرة ولمحمد والزين
| |
|
|
|
|
|
|
|
|
|
Re: ما أجمل الوفاء (Re: عماد الدين عبدالله)
|
الف رحمة للوالد محمد عثمان
اللهم ابدله دارا خيرا من داره واهلا خيرا من اهله وادخله الجنة واعذه من عذاب القبر ومن عذاب النار .
اللـهـم عاملة بما انت اهله ولا تعامله بما هو اهله .
اللـهـم اجزه عن الاحسان إحسانا وعن الأساءة عفواً وغفراناً.
اللـهـم إن كان محسناً فزد من حسناته , وإن كان مسيئاً فتجاوز عن سيئاته .
اللـهـم ادخله الجنة من غير مناقشة حساب ولا سابقة عذاب .
اللـهـم اّنسه في وحدته وفي وحشته وفي غربته.
اللـهـم انزله منزلاً مباركا وانت خير المنزلين .
| |
|
|
|
|
|
|
|
|
|
Re: ما أجمل الوفاء (Re: عماد الدين عبدالله)
|
Quote: أخي عماد الطيب
ذكرياتك مع الروس تعيد ذاكرتي لأيام الدراسة وذكرياتي عن أول عهدي بألمانيا . نفس النظرة العنصرية ونفس المفهوم عن السود . ولي من التجارب في هذا المجال ما تنؤ بثقله القراطيس ’ كما تعبت بحمله الصدور . لعلي أتشجع يوماً لأكتب عن تلك الأيام بنفس عفويتك رغم اختلاف الظروف وتباين الأحوال ’ فأنا مازلت أرزح في قيود الغربة في بلاد لا تشبه بلدي شكلاً ولا محتوى ’ وقد طال المنفى حتى أوشك الأمل أن يتلاشى. |
الاخ الامير ابن الامير
لك كل الود والتحايا فعلا الدراسة في الدول الاوربية لها طعم خاص
بما تحويه من طرائف ومآسي اتمنى ان تسمح لك الظروف للتتحفنا
ببعض منها
تحياتي
| |
|
|
|
|
|
|
|
|
|
Re: ما أجمل الوفاء (Re: Adil Osman)
|
Quote: أخي العماد بن عمنا"عبدالله
سلام من الله تعالى عليكم ورحمات وبركات
أفيدك عزيزي بأن الوالده الحاجه"صفيه" في أتم صحه ولله تعالى الحمد والشكر هذا وقد أطلقنا عليها لقب المستشارة الأسرية وذلك لأنها تجدها فترة مع إبنتها الصغرى ثم تارة مع الكبرى ثم تارة مع أولادها وذلك الفضل من الله تعالى..نسأل الله تعالى أن يديم عليها وعلى أمهاتنا جميعآ نعمة الصحة والعافية. |
تحياتي اخي الشيخ
والله الواحد دائما يتذكر الحاجة صفية
ربنا يديها الصحة والعافية
ونزار راجي شنو ولا لسع القسمة ما اختارت
تحياتي
| |
|
|
|
|
|
|
| |
Emad Ahmed
مريم عبد الله
عزام حسن فرح
شمس الدين ساتى
وليد عبد اللطيف
Adil Osman
عابدون محمد عابدون
صلاح شكوكو
Kamal Karrar
الشيخ سيد أحمد
عماد الدين عبدالله
Munir
عزالدين عباس الفحل
ياسر نجيلة
أمير قناوي
عبدالرحمن إبراهيم محمد
الفاضل يسن عثمان
فيس بوك
تويتر
انستقرام
يوتيوب
بنتيريست