|
|
 Re: مسودة كتاب الشعبية الباب الثامن: أدبيـــات (Re: ستنا خضر عبدالله)
|
مقال
للاستاذ جعفر عباس
الشعبية غطت على المغامرة
الصحفيون يبحثون دائما عن جنازة لـ»يشبعوا لطم» كما يقول المصريون، وأعتقد ان نصف الصحف العربية ستختفي من الوجود - غير مأسوف عليها - إذا قامت دولة فلسطينية، وفرملت الولايات المتحدة نفسها وتوقفت عن حشر أنفها القميء في شؤون الدول الأخرى.. بعبارة أخرى فإن البلاوي المتلتلة التي يعاني منها العرب والأفارقة - وقد ابتلانا الله بالانتماء الى الفريقين ولا اعتراض في حكمه - هذه البلاوي هي مصدر فرفشة ونعنشة الصحف.. وفي السودان (عيني باردة) لدينا مصائب بالكوم، حتى بات مقتل عشرين او ثلاثين شخصا في معارك قبلية أمراً لا يستحق أكثر من سطرين او ثلاثة في أية صحيفة.. ثم جاءت مغامرة حركة العدل والمساواة الأخيرة، فوجد الكتاب الصحفيون فيها مادة يلوكونها على مدى أشهر.. مقالات مستنسخة في معظمها لا تحتاج لقراءة أكثر من ثلاث منها.. كلام معاد ومكرور (recycled ) تستخدم فيه مدفعية الحيل البلاغية التي جعلت اللغة العربية مادة منفرة في المدارس.. وما يحزنني حقا هو أن يستغل البعض أحداثا مأساوية بشعة لتسويق الذات.. امتطاء صهوة عمود صحفي أمر سهل وهناك مئات الآلاف الذين يقدرون على الكتابة على نحو يفوق قدراتنا نحن أصحاب الأعمدة الناصية المزينة بصورنا المزورة، ولكن يمنعهم عن ممارستها الحياء او القرف أو لأنهم يتحلون بفضيلة التواضع التي تجعل المرء يحس - كلما قرأ واستوعب وتوسع أفقه - بأنه ما زال «جاهلا».. وبالمناسبة فإن مقالي الذي نشر هنا الأسبوع الماضي بعنوان «استقيل يا خليل» تعرض لتدخل من قبل جهة ما أضافت إليه فقرات في آخره!!!
المهم أن كثرة اللت والعجن الصحفي حول موضوع أحداث (10) مايو - دون أن تكون هناك أية إضافة الى ما هو متداول من معلومات عنها - جعلني أنا الذي أقرأ الصحف السودانية على الانترنت - اهرب منها الى منتديات الانترنت.. وهناك أيضا وجدت مواويل من كل نوع عن العدل والمساواة.. ولولا ان كمبيوتري جديد لضربت رأسي به حتى ينكسر الإثنان! وفجأة توقفت عند بوست للاستاذ حاج حمد عن حي الشعبية في الخرطوم بحري، واكتشفت ان هناك آلافاً مؤلفة مثلي تبحث عن مادة او كلام يريحها من سيرة 10 مايو و25 مايو.. حتى كتابة هذه السطور قرأ البوست (45) ألف شخص وقدم المئات مداخلات! وهو ما لم تحظ به عشرات البوستات عن تلك الأحداث مجتمعة،.. ما معنى هذا؟ معناه أن الناس تريد فض هذه السيرة.. ما حصل، حصل وانتهى وإذا لم يكن هناك معلومة جديدة فارحمونا.. ومعناه ان للشعبية «شعبية» واسعة.. توقفت عند كثير من المداخلات وتذكرت فترة جميلة من عمري عشتها في ذلك الحي .. الخرطوم بحري أحب مدن العاصمة المثلثة الى قلبي.. مدينة رايقة وحسنة التخطيط والأهم من كل ذلك أنها لم تكن قط مسرحا لأي قتال حول السلطة عبر تاريخ السودان المدون، وحتى وحدات الجيش الموجودة فيها تكنولوجية وغير قتالية (النقل والإشارة)
وكما جاء في بوست حاج حمد فحي الشعبية يشبه الولايات المتحدة لكونه القدر (الحَلَّة) الذي انصهرت فيه عناصر الطبخة السودانية (melting pot ) شايقية على محس على رباطاب على نوباويين
على عبابدة.. فيه انتهت الولاءات الجهوية والقبلية وصار سكانه «شعبيون».. لعله الحي الوحيد في الخرطوم بحري الذي لم يشهد غزوا خارجيا بمعنى ان كل بيت يسكنه مالكوه الأصليون.. في البوست طرفة حلوة عن أخينا احمد وداعة مؤذن مسجد الختمية الذي كان يحب الفسيخ ويشتريه بكميات تجارية من إحدى السيدات، وبعد ان منعه الطبيب من الفسيخ لكثرة الملح فيه بعد إصابته بارتفاع ضغط الدم تضررت بائعة الفسيخ، وذات يوم قالت له: عندي فسيخ منزوع الملح، فرد عليها ببديهته الحاضرة دوما: الفسيخ كمان بقى فيهو دايت؟
الحاج حمد الحاج
الحفلات في الشعبية:
الحفلات في الشعبية لها طعم خاص فهي لمة و استمتاع بغناء و رقيص للكبار و الصغار..غالبا الصيوان من الصباح يتم تجهيزه..و العصرية يدوهو ليك رشة..و تراجع الكهرباء..ترص الكراسي..الكراسي في الأول كانت كراسي الحديد..و لازم تعمل حسابك و انت تجلس لانو الكراسي مرات بيكون فيها اطراف سنينة يا بطلونك مقدود يا تاخد ليك طعنة زي حقنة الملاريا...بعدين يتم مراجعة الكهرباء..و الكهربائي زاتو من الجيران..و يتم تركيب المايكرفون..و التجربة يمسك المايكرفون واحد من المسئولين عن التجهيز للحفل و ينفخ اول حاجة اووف اووف واحد..اتنين.تلاتة..اوووووف و الاولاد حولوا يصرخوا بصوت عالي في المايكرفون و جري...المغرب يظهر الشكل العام..و يجوا الجماعة المنظراتية..زحي الكرسي دا هناااك..يا ولد شيك حفاظة الموية دي وديها هناك..الكشافة دي لازم تزح شوية..و بعد العشاء يبدأ العجايز من الجامع للصيوان..لازم يتعشوا بدري و يتخارجوا يخلوا الباقي للشباب الا اذا كان واحد من العجايز الظرفاء الذين يستمتعون بالحفلة و يطلقون التعليقات الظريفة..الغريبة النسوان ما بشعروا نفس الشعور بتاع الرجال انهم كبروا على الحفلات..بقتلوا الحفلة من الاول لي رقيص العروس..العجايز بتعشوا بهدوء لانو العشاء بيكون بدا يا دوب و الوضع مطمئن..لانو المشكلة بتظهر بعد يبدا الناس في الحضور جماعات و المنظمين يمشوا لطباخ و يعاينوا في الحلل و يجوا جارين تاني الصيوان يلقوا في مجموعة كبيرة وصلت هنا بتبدا الجهجهة..و برجع ليكم
العشاء بدأ بالناس الكبار و ديل زي ما قلت من صلاة العشاء للعشاء و للنوم ، الاولاد الصغار من يبدأ العشاء كل واحد معاهو الشلة بلعب بخطة معيتة توفر العشاء ، الصغار خالص يستعينو بامهاتهم و الأم ما حنينة قبل تتعشى تلقاها شايلة صحن عشاء و تفتش في الاودها و لازم تطمئن انهم اكلوا قبلها..الاولاد الأكبر شوية ديل كل واحد و شفتنتو في واحد يا دوب يقدر يتعشى و واحد تاني لازم يدبل صحنين و واحد تاني يقول ليك ياخي الكوكتيل دا اقل من تلاتة ما بنشبع..و البعض يستخدن الذكاء و يقعد ليك وسط ناس كبار يا أدوهو صحن يا الناس الكبار حنوا عليهو و اتعشى معاهم..المهم في النهاية الاولاد الصغار ما عندهم مشكلة متعشين متعشين..و الحاجة الباردة دي بعملوا فيها جنس عمايل لازم الواحد يشرب ليهو كم قزازة بيبسي و لازم يتفاخر بعدد القزاز الشربو..و بجيكم راجع..
طبعا موضوع العشاء دا بجر جر شديد يعني ما بنتهي و لو أصحاب المناسبة عملوا عشاء يكفي 3 الف برضو في ناس ح يكونوا ما اتعشوا لانو انت اذا عزمت 500 نفر معروف في السودان كلو واحد بجي معاهو صاحبو و صاحبو زاتو بجيب معاهو صاحب صاحبو و اهل الجيران بجو و جيران الاصحاب بجو و دا السودان الناس ما بينها حواجز و صاحب صاحبك صاحبك ، و اصحاب المناسبة لما يلقوا الحكاية جارة و ما عندها نهاية بجهزوا لبداية الحفلة ، و طبعا الفنانين بيكون قاعدين في بيت الجيران و بيكون في زول بجري بين البيت الفيهو الطباخ و البيت الفيهو الفنان و يقوم بتجهيز طلبات الفنانين و اذا الفنان من اصحاب الكأس بيكون من الأول جهزوا ليهم شرابهم و زمان ايام طفولتنا كان الفنان 99.9% بيشرب ، و اذكر طرفة كان في مناسبة عند جيراننا و معاي الشلة واحد قال لينا الفنانين ديل خاتين ليهم حاجة في براد لكن ما شاي ، حب الاستطلاع مشينا كبينا ليك الحاجة الفي البراد و اول واحد رفع الكباية و شرب جغمة من العرقي قال : اخخخخخخخخخي و رمى الكباية و جري و نحن وراهو جري...برجع ليكم
قبل بداية الحفلة بجو الأطفال يقعدوا و آخر شكلة في الكراسي و عادة بيكون في 500 كرسي لكن برضو تلقى تلاتة يجوا جارين شديد و يركزوا علي كرسي واحد و زي لعبة الكراسي تلقاهم التلاتة (وردولوب) على الكرسي و تستمر اللعبة و بعد شوية يجوا النسوان الكبار و شوية شوية الى أن يجي دور جميلات الحفلة و ديل يبدوا في الوصول مع بداية الأغنية الأولى و ما بعيد تلقى واحدة ماشة تتبختر و تعاين بزهو و تكون عاوزة تشوف ردود الفعل لدخول الحسناء..و عادة مع الأغنية الأولى بيكون الناس كاشين شوية وما في زول ينزل يرقص الا واحد عامل سنة و ضارب ليهو كاس كاسين يجي داخل يرقص براااهو..و لما تبدا الأغنية التانية يظهروا الاولاد و البنات الصغار و شوية شوية الحكاية تسخن و ينزلوا البنات الكبار هنا الحكاية خلاص بتكون شخنت و الاولاد بيكون كل شلة اتجمعوا في ركن و يرقصوا و بيكون في واحد من الشلة بكشف في نص الشلة و الباقين ملتفين حولو و يكون في واحد خاتي ليهو يدو في نص راسو و صاحبك منتشي و بيدور...و تلقى شلة طالعين في الكراسي من بعييد و يكوركو و يعلقوا و في الوقت الشباب يبدوا يزحفو شوية شوية و فجأة تلقى الرقيص دا بقى مختلط و الحركة تزيد و كل شلة ترقص في جانب و الحفلة زادت سخانة..و تنتهي الاغنية بعد الجوطة يجي واحد يمسك المايكرفون : يا جماعة عشان الحفلة تستمر الناس لازم تنظم نفسها لانو ما ممكن نستمر بالطريقة دي...و بجيكم راجع
|
|
 
|
|
|
|
|
| العنوان |
الكاتب |
Date |
| مسودة كتاب الشعبية الباب الثامن: أدبيـــات | أمير قناوي | 12-25-09, 08:41 PM |
| Re: مسودة كتاب الشعبية الباب الثامن: أدبيـــات | أمير قناوي | 12-26-09, 09:46 PM |
| Re: مسودة كتاب الشعبية الباب الثامن: أدبيـــات | أمير قناوي | 12-26-09, 09:49 PM |
| Re: مسودة كتاب الشعبية الباب الثامن: أدبيـــات | أمير قناوي | 12-27-09, 10:07 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-28-09, 06:51 AM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-28-09, 08:07 AM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-28-09, 09:25 AM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-28-09, 12:42 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-28-09, 03:29 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-30-09, 04:26 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-30-09, 08:37 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-31-09, 12:02 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 12-31-09, 12:21 PM |
| Re: مسودة كتاب الشعبية الباب الثامن: أدبيـــات | أمير قناوي | 01-01-10, 09:54 AM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 01-04-10, 06:33 AM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 01-04-10, 07:33 AM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 01-06-10, 12:20 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 01-06-10, 09:51 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 01-10-10, 06:54 PM |
| Re: مسودة كتاب الشعبية الباب الثامن: أدبيـــات | ستنا خضر عبدالله | 01-11-10, 09:16 PM |
|
| |
فيس بوك
تويتر
انستقرام
يوتيوب
بنتيريست