|
|
|
 Re: ناس الزقازيق ... أجدع ناس (4) .. (Re: أحمد إسماعيل)
|
غريبة والله !!!
امبارح ياسر نجيلة جانا وقال بكرة الخميس
افتكرتوا بيهظر ساى
الليلة فعلا طلع الخميس
ياسر نجيلة جانا تاااانى وقال الليلة الخميس
يا ياسر , انت مرفوع عنك الحجاب ولا شنو
غايتو
وكمان جانا الرشيد وادانا مداخلة الليلة سمبهارى
وقال محمد صديق حا يدينا مداخلة بى طايوق
ودعاء الريس الساعة عشرة
وانا زول حارة وعندى مداخلة شحمانة
آمنا بيك والله يا رشيد القوم
اعوع كمان تقول لى انتا الليلة فى العين , فى رحلة عمل
وبما انو دى الصفحة واحد وسبعين , والليلة الخميس
هاكم الشحم ده , والقحة دى من خشم محمد عبد الله الريح
لتفاصيل
نشر بتاريخ الأربعاء, 06 حزيران/يونيو 2012 07:02
السيد عبد الرحيم رجل صامت لا يتكلم كثيراً ويبدو أن نسبه يمتد الى عائلة الصامت بن كلام المنتهي الذي عاش في أحد العصور الماضية… والصمت الذي تميز به السيد عبد الرحيم لم يولد معه فقد كان يصرخ صراخاً شديداً عندما وُلد بل ويرفس بيديه ورجليه وقضى معظم سني دراسته وهو يتكلم في أي شيء. وكان يؤمن أن القحة ولا صمة الخشم. ولكن الصمت هو أحد الصفات التي اكتسبها أخيرًا بعد أن تزوج فأصبح صامتاً ومستمعاً لأي شيء الإذاعات المسموعة منها والمرئية والتلفونات والموبايلات وبالاختصار تحول إلى أحسن جهاز استقبال… وكل ذلك بفضل المرحلة الجديدة التي دخلها. فقد تزوج إثر علة لم تمهله طويلاً وكان من أحسن المتكلمين قبل الزواج وأحسن الناطقين بغير زواج ولكنه تحول الآن الى أحسن المستمعين وما يطلبه المستمعون.
تناول السيد عبد الرحيم سماعة التلفون الثابت وأدار رقم منزله ومن الناحية الأخرى تناولت زوجته السيدة مثال السماعة قائلة
أيوه … أهلاً يا عبد الرحيم
اسمعي يا مثال .. أنا الحقيقة مستعجل شوية وعايز أقول ليك.. وتقاطعه السيدة مثال انزلي يا هويدا من الشباك يا بت انزلي.. آنا قلت ليكي انزلي.. احسن ليك تسمعي الكلام يا أخواني شوفوا البت مقصوفة الرقبة دي … عايزة تقعي تكسري رقبتك.
وتضع السماعة على الطربيزة ثم تغيب فترة وتعود لتمسك بالسماعة:
بالله البت بقت شيطانة جنس شيطنة عايزة كمان تكسر رقبتها علينا.. اها يا عبد الرحيم قلت لي شنو
قلت ليكي أنا مستعجل وماشي دلوقت مع …
وتصيح السيدة مثال:
يا سنية .. ياسنية هوي كلمي الخدام دا قولي ليهو ما يمشي لو ما نفض الكراسي … يومداك مشى خلاهم ######انين ومغبرين قولي ليهو الليلة ما يمشي لحدي ما يتم النضافة …. اها يا عبد الرحيم قلت لي شنو
قلت ليكي أنا الجماعة منتظريني ومستعجل بس عايز أقول … وهنا يسمع صوت وقوع شيء فتصيح السيدة مثال:
سجمي الواقع دا شنو؟ … اقيف يا عبد الرحيم أشوف الحكاية دي… وتغيب مدة أخرى ومن بعيد يأتي ما تسرب من صياحها الذي اخترق سماعة التلفون الملقاة على الطربيزة ويظل السيد عبد الرحيم ممسكاً بالسماعة حتى تحضر السيدة مثال لتشرح الموضوع قائلة:
والله حمادة دا جنننا … يا أخي ما قلنا ليك سوقو معاك المكتب ولا وديهو لأي حتة … الولد زي التقول عنده عفريت في رأسه… جاب ليك عز الدين ود ناس عفاف… وطلعوا بالسلم لبيت الحمام قالوا عايزين يشوفوا البيض … وحمادة مسك الصفيحة رماها من فوق لحدي ما البيض كله أتكسر … غايتو ما عندك طريقة الا تسوقو تاني معاك… ولد شيطان زى دا أنا من ما الله خلقني ما شفتو … ياهو ولدك وياكا أنت أبوه … وأنت العلمتو الشيطنة … اها قلت لي شنو
ويتنهد السيد عبد الرحيم ليقول:
والله أنا زاتي الكلام طار لي من رأسي … كنت عايز أقول …
وتعترض السيدة مثال على الجملة الأولى لأنها في اعتقادها جملة في غير محلها.. فماذا فعلت حتى يطير الكلام من راس السيد عبد الرحيم:
الكلام طار ليك يعني شنو؟ مش من دوشة وليداتك … الواحد فيهم ما عايز يقعد بروقة … وهسع دي شايفة هويدا بتمعط في شعر أختها … يا بت … يا ملعونة… خلي شعر أختك … قلت ليكي فكيها … والله يا هويدا؟ … احسن ليكي تسمعي الكلام يا أخواني البت دي حرقت روحي.
وتترك سماعة التلفون هذه المرة تتدلى دون أن تضعها على الطربيزة، وتغيب لمدة أخرى وهي تدخل في عملية فك اشتباك بين هويدا وأختها الصغيرة… ويسمع عبد الرحيم صوت هويدا تصرخ وتبكي بأعلى صوتها.
وتمسك السيدة مثال بسماعة التلفون وهي تقول:
يا بت بلشي الكواريك… أبوك عايز يتكلم ومستعجل خليني اسمع.. طيب يا حلوة خلاص بعد ما أبوك يتكلم أنا بديك جنيه عشان تشتري حلاوة قطن… يله أسكتي خلاص … خلي بابا يتكلم
ويبدو أن البنت دخلت في عزف منفرد واستهواها الإيقاع فظلت تبكي وازداد عياطها ..
وهنا قالت السيدة مثال:
يا عبد الرحيم … دقيقة … بس أدي البت دي جنيه عشان تشتري حلاوة قطن عشان تسكت.
ويسمع عبد الرحيم صوت هويدا يختفي تدريجياً حتى يتلاشى في أحد الغرف …
وبعد فترة تأتي السيدة مثال وتبدأ حديثها:
اها قول لي … قلت مستعجل والجماعة منتظرينك … يا أخوانا منو البدق في الباب يا سنية … يا بت …. امشي شوفي منو البخبط في الباب … اجري قوام افتحي الباب يا فالحة …
قلت شنو يا عبد الرحيم؟
طيب خلاص … قلت ليكي عايزك تكلمي…
وتصيح السيدة مثال:
هي … معقولة ؟ …. ديل ناس ريا … ازيك.. شديدة … الله يسلمك … يديكي العافية … والله شقة غريبة جداً … وازيك أنتي يعني الليلة نقول شرفتونا…؟
وظلت سماعة التلفون متدلية وظل عبد الرحيم صامتاً ومستمعاً وظلت السيدة مثال تحكي لناس ريا وتقول لهم:
والله هسع قبل شوية عبد الرحيم كان بتكلم معاي في موضوع مهم كدا … قبل ما انتو تجوا.
آخر الكلام:
دل على وعيك البيئي.. لا تقطع شجرة ولا تقبل ولا تشتر ولا تهد هدية مصنوعة من جلد النمر أو التمساح أو الورل أو الأصلة أو سن الفيل وليكن شعارك الحياة لنا ولسوانا. ولكي تحافظ على تلك الحياة الغالية لا تتكلم في الموبايل وأنت تقود السيارة أوتعبر الشارع. واغلقه في المسجد.
* اشحم من كده فى ؟؟؟!!!!
| |
  
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
Quote: أحمد اسماعيل لازم يرجع يوم الخميس ده بالتحديد..
|
حاضر يا سيد فعلا بغيابكم الدار بنكون خلا لكن
البركة في الريس والصديق ونجيلة لو الصيف ما جفف نجيلتو
قد غدونا مسلمين
ايا روح البطولة أيقظينا ؛؛؛ وهزّي نخوة الإسـلام فيـنا
أما آن الأوان لأن تفيـقي ؛؛؛ وتعلي الصوت صداحا مبينا
أما آن الأوان لكي تقولي: ؛؛؛ لقد نمتم عن الأمجاد حينا
ونصرخ عاليا في الكون أنا؛؛؛ سنبقى في الشدائد صامدينا
فبالإسـلام عـزّت كل نفـس ؛؛؛ وبالإسـلام إنا لن نلــينا
فيا إسـلام فلتشـهد علينا ؛؛؛ بأنا قـد غدونا مسلمينا
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
إلى نجيلة ومنص مع الحب:
شايقية جات الخرطوم ومشت مع ناس البيت متنزه المقرن العائلي ..
ولدها قال ليها: يمة لا تركبي اصلو الساقية دي الناس بشوفوا سروالك ..
مشي يجيبلو شيتا ياكلوهو جاء لقاها معنقله في الساقية
كورك ليها: يا نفيسي أنا قلتلك شنو؟؟؟
قالتلو: مو السروال .. ملصته يا عشاي
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
سلام سلام سلام لي كل احبابنا ناس الحوش
عودنا ليكم والعود احمد...
في البداية تعازينا لكل من فقد عزيز لديه في هذه الانقاعة...
وسلامة اخواننا العيانين وعلي راسهم اخونا عصام دهب ...الف سلامة
وتحايا لكل احبانا ناس الحوش باختلاف مواقعهم ومهاجرهم...
وانا آسف شديد لهذا الانقطاع الطويل الا اني كنت متابع من فترة لاخري اخبار الناس
عبر الريس ميسرة مشكورا...
السؤال يا اخوانا علي النضيف رجع من السودان ولا مازال بالسودان ؟؟؟؟
ياسر نجيلة...
طارق الشايقي...
منصور عبد الرزاق..
عمر مهدي...
ابو شنب ...سليل الاسرة الزناتية...
شوقنا بحححححححححححححححححححححححححححرررررررررررررررررررررررررررر
عثمان الجيلي
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
صباح الخير ،،، يا وجوه الخير
دعاء اليوم :
اللهم يا عزيز يا جبار
اجعل قلوبنا تخشع من تقواك
واجعل عيوننا تدمع من خشياك
واجعلنا يا رب من أهل التقوى وأهل المغفرة
================================
حمد لله على السلامة يا ناس العين
عودة عثمان الجيلي الجميلة دعوة للآخرين
هاتف عصام دهب :
00966503639124
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
صبحكم الله بالخير
مع الراحل عمر الطيب الدوش
ولا الحزن القديم
إنتِ
ولا لون الفرح
إنتِ
ولا الشوق المشيتْ بيهو
وغلبْنى أقيف
وما بِنْتِ
ولا التذكار ولا كُنْتِ
بتطْلَعِى إنتِ من غابات
ومن وديان...
ومنى أنا..
ومِن صحْيَة جروف النيل
مع الموجَهْ الصباحيَّه
ومن شهقَة زهورعطشانَهْ
فوق أحزانهْا
متْكَّيهْ
بتَطْلَعى إنتِ من صوت طِفلَهْ
وسط اللمَّهْ منْسيَّهْ
تَجينى
معاكْ يجينى زمن
أمتِّع نفسى بالدهشَهْ
طبول بتْدُق
وساحات لى فرح نَوّر
وجمّل للحُزن..ممْشى
وتمشي معاي
خُطانا الإلفَهْ والوحشَهْ
وتمشى معاي... وتْرُوحى
وتمشى معاي وسط روحى
ولا البلْقاهو بِعْرِفنى
ولا بعرِف معاكْ ..روحى
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
نكتة طارق جبرين ...
فطيتوها ليه ...
عشان فيها ... مرجيحة و ساقية ......
==================
الكنتكة بتاعتي يالرشيد ... جابت نكت ود عيد الحلوه ..
عجبتني بتاعة التلفزيون الملون ...
====================
اخيرا محمد صديق مناه تمني ...
ونزلو ليهو تلفون عصام دهب ...
مبرووووووك ....
====================
عثمان الجيلي الوجيه ...
ومبارك جادين ...
مافي شك ... زياراتكم بتبسطنا ...
====================
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
سلامات يا ناس
مرحباً باطلالة عثمان الجيلى ومبارك جادين
عقبال :
ودالمهدى وقدورة وموسى عيسى وسامى وجلال وحاتم جبارة
وبكرى حامد وعادل عبدالرحمن وعصام دهب وجمال فارح وكمال
الشادى .
اما الجنس اللطيف وزهير (فانقطع فيه العشم)
Quote: اخيرا محمد صديق مناه تمني ...
ونزلو ليهو تلفون عصام دهب ...
مبرووووووك .... |
شكرا يا ملك على الملاحظة.
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
أجدع ناس
السلام عليكم ورحمة الله وبركاته
لا عذر لي في التقصير في حق من أحببنا...
ويا محمد صديق حقكم علينا
ونسأل الله أن يديم المحبة بيننا
وأرجو من الله أن يكون الجميع بخير... ودائما متلمين ومتواصلين
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: سامي عبد الوهاب إدريس)
|
سلامات يا ناس
Quote:
أجدع ناس
السلام عليكم ورحمة الله وبركاته
لا عذر لي في التقصير في حق من أحببنا...
ويا محمد صديق حقكم علينا
ونسأل الله أن يديم المحبة بيننا
وأرجو من الله أن يكون الجميع بخير... ودائما متلمين ومتواصلين |
قول واحد:
بداية العودة الطوعية.
+++++++++++++++++++++++++++=
أهلاً يا سمسم....تعال ومعك آخرون.
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: سامي عبد الوهاب إدريس)
|
أزيكم...
الصيف شكله كده أثر عليكم...
كلكم طايوقكم(جمع طايوق شنو) سايح و ما قادرين تحددوا هل هو ربع و لا نص...
أنا زيكم كده برضو مع شوية زحمة شغل...
أنا كان نفسي أكون بتكلم زي سبعة لغات كده...
مع العربية و الانجليزية زي خمسة لغات تاني...
و كنت بفتكر انو أول لغة مفروض أضيفها لي رصيدي...
هي اللغة الفرنسية بحكم اننا درسناها لمدة سنتين بالثانوي...
زمان كنت و أنا طالع الأسانسير للمكتب بلاقي فرنسين...
و بشفافية أكتر واحدة فرنسية...
عرفتها كيف فرنسية؟؟ مش ده سؤالكم
لأنها كانتت بتتكلم مع ابنهاالصغير بالفرنسي...
فبقيت كل ما ألاقيها أشبكه ليك سافا و هي ترد علي سافا...
مرة قلت ليها سافا ردت علي بسافا و عرجت على حاجات تانيه حامياني...
فما عرفت أقول ليها غير (موا جي ني باغل لفرنسي)...
أي انني لا أتحدث الفرنسية فضحكت كثيرا و ردت على ما انت رديت بالفرنسية...
لو كنت طورت الفرنسية بتاعتي كان قضيت يومي كلو في الأسانسير...
الحمد لله كانت فرنسيتي على قدر الطابقين البوصلوني المكتب...
كان لي صديق ياباني فحبيت أعمل ليهو مفاجأة...
اتصل بي مرة فأجبته بي كونيتشوا ..بمعنى كيف حالك...
ففرح كثيرا لأنني خاطبته باليابانية و هو ما عارف اني ما بعرف فيها الياباني...
و فرح أكتر لما ودعته قائلا سايونارا...
و هكذا الحال معي أحب أن أتعلم لغات جديدة و لكني لا أعمل لذلك..
غير تلك المحاولات الخجولة...
شلاقتي و حبي لتعلم اللغات خلاني كلما يجو صاحبات الشغالة بتاعتنا..
أشبكهم ليك اندمناش و هم يقوموا يقولوا لي دناني...
و كان ممكن أتعلم أكتر في الأمهرية و لا التكرنجه دي...
لأن الأستاذ متوفر و ما فيها دفع رسوم...
لكن كلما أتخفف و أقول اندمناش..قبل الدناني.. تجيني حدرات ست بيتي...
و التي أتخيل انها ما عندها أي مانع أتعلم كل لغات الأرض الا الأمهرية دي....
أها يا جماعة....
تشاو...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عمر المهدى)
|
سلامات يا ناس
Quote: اجدع ناس تحيات واعتذارات طولنا طول يعلم الله ما بالنيه
وقد تنكر العين ضوء الشمس من رمد وينكر الفم طعم الماء من سقم
امنياتنا لكم بالخير بلا انقطاع والتحيه خاصه للكوتش الطارينا وماناسي |
قول اتنين عودة طوعية...
مرحب يا أخ...تعال بى واحد جامد.
الرشيد جايييك.
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
سلامات يا ناس
Quote: و كنت بفتكر انو أول لغة مفروض أضيفها لي رصيدي...
هي اللغة الفرنسية بحكم اننا درسناها لمدة سنتين بالثانوي...
زمان كنت و أنا طالع الأسانسير للمكتب بلاقي فرنسين...
و بشفافية أكتر واحدة فرنسية...
عرفتها كيف فرنسية؟؟ مش ده سؤالكم
لأنها كانتت بتتكلم مع ابنهاالصغير بالفرنسي...
فبقيت كل ما ألاقيها أشبكه ليك سافا و هي ترد علي سافا... |
يا حبيب وين ناس بونجور ؟؟
زمان فى الثانوى اخوك كان ضمن احسن سبعة بيعرفو فرنسى
وكانوا بيدرسونا فى فصل برانا حاجة غير البدرسوها للناس التانيين
بس بعد الثانوى ما اشتغلنا بيها...ودى من الحاجات البتحسر عليها
لحدى هسة.
بونجور مسيو
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
و الله أول مره أظلمك يا كوتش...
يعني جيت...
Quote:
يا حبيب وين ناس بونجور ؟؟
زمان فى الثانوى اخوك كان ضمن احسن سبعة بيعرفو فرنسى
وكانوا بيدرسونا فى فصل برانا حاجة غير البدرسوها للناس التانيين
بس بعد الثانوى ما اشتغلنا بيها...ودى من الحاجات البتحسر عليها
لحدى هسة.
|
فصل خاص و ما وصلتو سافا دي يا كوتش...
و الله كانوا غاشنكم ساكت الناس ديل...
ياخي لما تكون عامل فيها بتجضم الفرنسي تمام...
بتقول سافا...
بنجور دي خلوها زمان...
أسأل جبريلا...كان بيعرف فرنسي...
الجنى ده غير الكاويق ما ظنيتو بيعرف حاجه تاني...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
التحية لجميع المتداخلين
دخلت لقيت الحصة فرنسي
والكوتش والرشيد يتبارون في تعاطي الفرنسية
من بنجور الي سافا وبالعكس
عموما عيني بارده عليكم يا هؤلاء الفرنساويين
وسافا عليكم ورحمة الله وبركاته
شدتني قصيدة الدوش التي تفضل بها الرشيد
وتذكرت الراحل مصطفى سيد احمد
وكيف انه اعترف بان الدوش ووردي كانا
من اول الناس اهتماما بعبقريته
وان الراحل محمد عثمان وردي كان يحضر اليه
بعد انتهاؤه من المعهدلبذهبا سوبا الي التدريب
على الغناء
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
Quote:
اما الجنس اللطيف وزهير (فانقطع فيه العشم) |
شوية فاتن حمامه .....
هســــه يا كوتش زهير ده دخلتو مع الجنس اللطيف ليه ..؟؟
Quote:
لو كنت طورت الفرنسية بتاعتي كان قضيت يومي كلو في الأسانسير...
الحمد لله كانت فرنسيتي على قدر الطابقين البوصلوني المكتب...
|
يا صديقى العزيز .. والله انا لو فى محل بت حوفى اعطل ليك كل الاسانسيرات
كان فى البيت ولا فى الشغل ... واخليك بس .... ناااااااازل السلالم يا ما سما عليك ... !!!
****
تعلم اللغات شىء جميل ... وحأحكى حكاية اظن انى حكيتها هنا بل كده مره واحده ( بس مش 514 مره )
بعد التخرج واثناء سنة العطالة تجمعنا كالعاده فى حوش وزارة الزراعة تحت الشجرة اياها
وفكرنا كيف نقاوم هذه العطالة ... منصور قرر انو يدخل كورس كمبيوتر
انا وعبده مضوى وعبد الحليم عباس مشينا معهد جوته وسجلنا كورس لغة المانية ...
وفى المحاضرة الاولى طلب المحاضر من كل واحد التعريف بنفسه ولماذا اختار دراسة الالمانية ...
من ضمن الحضور تواجد رجل كبير فى حوالى الستين من عمره ،
ولما جاءه الدور ذكر بأنه بدأ دراسة الالمانية قبل ثلاثين سنة ولكنه لم يتم الكورس ...
والآن اصبح فى المعاش ولا شىء لديه فقرر معاودة دراسة اللغة التى أحبها ...
ساعتها ضحكنا وحشينا فى الراجل وقلنا ده زول موهوم وفاضى ساكت ... قراية شنو الراجع ليها بعد 30 سنة ..؟
المهم داومنا على الدراسة وكانت جميلة واللغة الالمانية سهلة ومحببة وسلسة ولكن تعلمها يستوجب
المتابعة والحضور المتواصل دون انقطاع ...
ولكن بعد 3-4 اسابيع بدأنا فى التساقط واحدا تلو الآخر حتى خرجنا ثلاثتنا من السباق ...
واحتفظ حتى اليوم بالكتب والشرائط الخاصة بالكورس واحيانا اخرجها واحاول اعادة قراءتها من شدة حبى لها
عموما بعد سنوات قليلة .. اعتقد اننى ربما أعيد سيرة ذلك الرجل الذى ضحكنا عليه قبل 25 عاما ...!!!!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
سلامات يا ناس
وصباحات التفاؤل
إهداء صباحى من فرحات عباس:
حرف إستجداء
* * *
توسلت بشيئ في عينيك
حدق هوناً .... شوقاً ... فيًّ وفات
تذرعت بأني ميت فيك ..
وبأني سعياً .. سأعود إليك حياة
أخبرت بذلك .. أول خفقة قلب حين رأيت
وأول شوق حيث دُعيت
فأخبرني عشقي الليمون بلونك..
ونهانه قمريات يبكين
وسحابات جئن يعزين
فبكت عماتي النخلات ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
صبحكم الله بالخير
التهنئة الحارة لابنتي دعاء محمد عيد و ابني أحمد منصور...
و لأمهاتهم الذين حين تكلمت معهم مساء البارحة كانوا في غاية الفرح...
التحية لأم أحمد و أم دعاء و تستاهلوا النتائج الباهرة الجميلة دي...
و التهنئة للحبايب منصور و محمد عيد...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
أمبارح غياب قسري...
كان من المفروض أن نقوم بزيارة أحد المشاتل في الشارقة..
هذا المشتل مسئول عن توريد النباتات التي ستزرع بالحديقة تحت الانشاء...
و نحن كاستشاري علينا أن نوافق على جودة المواد...
فطلب مننا المقاول أن نزور المشتل لاعتماد المواد جملة...
تحركنا عند التاسعة صباحا و تزودنا بالوقود و الطعام...
وصلنا الشارقة و أخذ مرافقنا يسأل عبر التلفون عن المكان...
فدلوه عليه و انطلقنا لنجد أنفسنا خارج الشارقة...
ثم اتصل مرة أخرى ليقودوه الى مكان بالفجيرة...
ثم خارج الفجيرة التقانا أحد موظفي المشتل...
و طلب منا السير وراءة...
طوال الوقت كان زميلي عبد المنعم السوداني يسألهم...
انتو يا جماعة الـبنقو بتاعكم ده وين...
كررها كثيرا فسألته انت شنو حكاية البنقو دي...
قال لي دي قصة واحد قبضوهو بيدخن في سيجارة بـنقو...
قام قال للجماعة خلوني أكمل سيجارتي دي و حأوريكم مكان الـبنقو...
قالو ليهو اتفقنا...كمل السيجارة و ركب معاهم...
من الخرطوم عبر سوبا الى مدني ..
و كل مره يقولوا ليهو انت يا زول الـبنقو بتاعك ده وين..
يقول ليهم أصبروا...
وصولوا سنار يا زول وين الـبنقو...
في الاخر زهجوا منو شديد قالوا ليهو لو ما وريتنا ماشين وين ما حنتحرك...
قال ليهم انتو ما عندكم صبر ساكت ياخي الـبنقو في واو...
أخذنا نسير خلف قائدنا لمسافة زادت عن السبعين كيلو...
حتى توقفنا أمام أحد المشاتل...
سألناه نحن وين يا زول...
قال لينا نحن في راس الخيمة و وراء الجبل ده سلطنة عمان...
عبد المنعم قال ليهو...
و الله دي واو زاتها....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
صباح الخير يا وجوه الخير
أصبحنا وأصبح الملك لله وحده ،،،
حكمة اليوم :
يظل الانسان في هذه الحياة مثل قلم الرصاص!
تبريه الأيام ليكتب بخط أجمل.
وهكذا حتى يفنى القلم فلا يبقى له إلا جميل ما كتب.
اكتبوا إخوتي فإن كتابكم يظل منثور إلى يوم القيامة
الله أرزقنا الدارين،،،،،
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
أصالتنا تمثل هويتنا التي تميزنا عن من سوانا وهي تقوم مقام البصمة من الإنسان
لذا يجب علينا أن نحرص على ارتباطنا باصولنا وجذورنا لكي نتواصل مع الآخرين أدبا وثقافة
لذلك يجب أن يكون هناك توازن بأن نثق في تراثنا ونتواصل بالأخذ من الآخرين بتريث بدون
إنبهار فائت حدهـ لأن الإنبهار الفائت الحد يؤدي إلى تدمير التراث والموت البطيء للأصالة
وهوية الشعب
لللأسف الشديد حالة الشعب السوداني وحكومته الإنبهار بالآخرين والجديد وعدم الإهتمام بالتراث والهوية
بل أصبح الكثير منا يبخس تاريخ وبطولات الأجداد والرموز الوطنية والثقافة السودانية الأصيلة
وهذا يعتبر إجتثاث للجذور مما أدى إلى الإنهيار في كل شيء في الجنيه و الأسعار والإقتصاد والأخلاق --الخ
والأخطر من ذلك بدأنا نقسم الوطن ونبيع أجزائه التي لها قيمة ومردود عسى ولعلها تعمل مسكن لحين ( حبة عند اللزوم)
على العموم ( من اتكل على زاد غيرهـ طال جوعه )
نسأل الله أن يرحم أهل السودان ويبعد عنهم شرارهم ويولي على السودان المصلحين المخلصين من أبنائه
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
حمد الله على سلامة عبد الدائم النضيف
تحية عطرة لك والأسرة
ــــــــــــــــــ
ألف مبروك لمنصور ومحمد عيد النجاح الباهر
لأحمد منصور
ودعاء محمد عيد
ـــــــــــــــــــــــ
إبني عمر النور نجح بنسبة 92% وكانت حكمته
من أجاد الكفر ظفر --- ومن سارعلى العلم وصل
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
Quote: إبني عمر النور نجح بنسبة 92% وكانت حكمته
من أجاد الكفر ظفر --- ومن سارعلى العلم وصل |
أجمل التهاني و التبريكات لابننا عمر...
و لأم عمر و أبو عمر...
و كل الأمنيات الطيبه له بدخول الكلية التي يتمناها....
و يبدو ان عمر ود الوز......عوام...
حكيم ابن حكيم....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
أصبحنا وأصبح الملك لله الواحد الأحد
الله يبارك فيك أخي الرشيد ويبارك في مهند وأمنية
وغدا إنشاء الله يحققان النجاح الباهر
الحكمة
لا تسأل بني آدم وسل الذي أبوابه لا تحجب
الله يغضب إن تركت سؤاله وبني آدم حين يسأل يغضب
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
أبو عمر ....
ألف مبروك على النور عمر ...
عقبال الشهادات العليا ...
ومبروك للجميع ...
=============================
عمر نملوز ...
انت ماقلت الناس ديل ... انصار سنة
الرجال بي باب ... والنسوان بالباب التاني ...
في الصورة الاولي ... الجارية وراك دي منو ...
غايتو بتشبه لي الفرنسية بتاعت اسانسير أبوظبي ... ...
عموما بكرة الخميس ......
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
الخميس ما الخميس
المهم المشوار يبدا من جوبا
ومن جوبا اجمل النبريكات والتهاني بالنجاح
للابنة دعاء محمد عيد ولابوها وامها
وللابن احمد منصور عبد الرازق ولابوه وامه
وللابن عمر النور احمد اسماعيل ولابوه وامه.
التحية اخي عمر وانت تواثل المشوار لتحطيم الرقم
واود هنا ايضا على اتصالك الدائم علي كلما سمعت اخبار
عن جوبا او جمهورية حنوب السودان
ومن جوبا قنبوا طولا تماشبا مع شعار احمد اسماعيل
اه يا جلا وصلت جوبا ترجعا كيف؟؟؟؟؟؟؟؟؟؟؟؟؟؟؟؟؟؟؟؟؟
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: مبارك جادين)
|
ومليون مبروك لى عمر النور
يا ابو عمر احمد اسماعيل
ربنا يحفظه ويبلغه اعلى درجات النجاح
قبل ما اجى البوست , اتوقعت جية نملوز دى
اصلو الليلة قاعد اجازة فى البيت , وماسك ناس الطيب واخوانه
فى الجو السمح داك
* ادونى جوكم داك , وانا بمسكم كل يوم يا نملة
* ياسر نجيلة , وين احلام زلوط , ولا زلوط صحى من نومو ؟؟
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: جلال عثمان)
|
يا سلام عليك يا نملوز
وأنت تمارس هذا السباق وتحسسنا
بأيام الشباب وعيني عليك باردة
الكرش بتاعة ناس هناي ديك ما فيش
والشبل الجاري في السباق ده ولدك
والله حاجة جميلة وتفرح النفس
واصل وخلي ولدك يورث هذا الجمال منكم
====================
شكراً جلال عثمان على المتاوقة السريعة
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: مشاعر بدوي)
|
الف مبروك للابن عمر النور النجاح الباهر ومزيدا من التوفيق
والتهنئة موصولة للاخ احمد اسماعيل و لـ ام عمر وعقبال اخوانه انشاء الله
* وتحية جميلة وتهنئة بالتوفيق للعزيز نملوز على النجاخات الرياضسة
وانا غايتو بتساءل مع ود نجيلة ... الماراثون المختلط ده ما كلمت بيهو جلا ليه ؟؟
* ود جادين .. ياخى والله انت تستاهل نيشان حقيقى بحرصك على التواصل من خارج الحدود
وياخى الحدود دى زمان كنا بنقول انها وهمية ... هسه بنقول انها الوهم ذاتو ...
انا غايتو ما ممكن اتخيل ام درمان بدون معاوية وعبده مضوى وود الحورى وود جادين ....!!!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عمر نملة)
|
عمر نملوز ...
انت ماقلت الناس ديل ... انصار سنة
الرجال بي باب ... والنسوان بالباب التاني ...
في الصورة الاولي ... الجارية وراك دي منو ...
غايتو بتشبه لي الفرنسية بتاعت اسانسير أبوظبي ...
ابو عمار
والله السباق دا كان السنه الفاتت في رمضان وكان سباق الساحل
في اوستندا والفي الصوره دي صاحبة المركز الاول لناس السنه
راجع الايميل
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عمر نملة)
|
التحية اخي عمر وانت تواثل المشوار لتحطيم الرقم
واود هنا ايضا على اتصالك الدائم علي كلما سمعت اخبار
عن جوبا او جمهورية حنوب السودان
سلام ليك ولكل الجنوب يابركه وربنا يوقف الحرب اللعينه
ويصفي النفوس
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عمر نملة)
|
على طريقة ياسر نجيلة .... الليلة الخميس ...
وانا اتصفح فى النت .. لاقتنى بعضا من النكات الباااايخة التى من شدة بوخها
تفطس من الضحك ..
على طول اتذكرت محمد المرتضى وعاطف القوز لمن كانوا يتلموا ويقولوا الليلة السهرة
مع النكت البايخة .. ويقـدّوووووونا للصباح ...
أها انا الليلة داير أقـــدّكم ....
* جملة مالها معنى ،،،،،، "وينك شايفك مختفي الأيام دي؟!"
* مسطول تمتام شاف بتاع جرايد قال عايز يشتغل معاهو
مشى قال لي: داداداداداد داير
أششش أشتغل مممم ماماما معاك
بتاع الجرايد قال لي بطريقتك دي مافي زول بيشتري منك...
المسطول قال ليهو :
ع ع ع ع ع ع ع عليك الله
بتاع الجرايد قال لي خلاص هاك الجرايد دي أنا ماشي وجاي بعد شوية...
مشى وجا لقى المسطول باع كل الجرايد
قال لي عملتها كيف دي
المسطول قال ليهو :
ببببببببببب بمشي لييييي الزول ببببببببببب بقول ليييييي تتتتتت تشتري
منننننننني الجريدة ولا أققققققققق أقراها ليك...!
وهاكم دى
* عزيزي صاحب المطعم البتبيع لحم كلاب في السوق العربي
طبعا إنت عارف إني اكلت منك الاسبوع الفات
كوني بقيت لما أتشاكل مع زول بعضيهو قلنا ما مشكله
كوني بقيت لما نجي نتغدا بشيل عضم و بجرى باكلو تحت الشجره ما مشكله
كوني بقيت بسك كدايس الحله ما مشكله
لكن،:
-
-
-
-
-
- حكايه احك أضاني بكراعي دي قوويه ...!!!
كفاكم كده لى باكر
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
ود عيد ... والله بسمة وضحكة ... مدنكلة
خليت اسهلاليتنا للخميس .... ع ع ع ع س س س سل ..... ع ع ع ع د د ديل ..... ك ك ك ك كده ...
والله طلتكم اسعدتنا كان .... من سنار ..... ولامن جوبا ....
=================================================
Quote: والله السباق دا كان السنه الفاتت في رمضان وكان سباق الساحل
في اوستندا والفي الصوره دي صاحبة المركز الاول لناس السنه
راجع الايميل |
ده حالتو في رمضان ... ...
ومال لو جيناكم في الصيف ...
منصور ليهو حق ... كان كل سنة ... ناطي ليكم ...
الايميل فاضي ...
رسل تاني ...
[email protected]
[email protected]
===========================================
عموما الليلة ...................................... الخميس
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
سلامات يا ناس
Quote: دا الكلام البخلينا نواصل تحدي العمر ونثبت انه العمر ماليه دخل
بالاصرار والصمود وزرع الثقه في النفس. مازلت بتذكر اول ايام بديت
التدريبات كان وزني تقريبا 80 كج مع الكرش وملحقاتها وضيق النفس
وسرعة ضربات القلب عند بذل اقل مجهود. والحمد لله الان وصلت المستوى
الثالث
|
تحياتى نملوز ...
وحقيقى نشعر بالفخر وأنت تحقق هذه النجاحات
والحاجة التانية ما شاء الله عليك حافظت على
قوامك وده بيخلى ناس تانيين زى ما قال الريس
يسعوا الى اكتساب قوام رياضى . وأنا بقترح تبدا
لينا بدروس عصر وأول دارس يكون الرشيد.
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
صباح الخير ....
وتحية هذا الصباح اسمحوا لي ان اوجهها للاخ نملوز ....
حقيقي مجهود رائع ومقدر واثني اقتراح الكوتش في ان يقوم عمر بتقديم بعض الدروس والنصائح
من واقع تجربته حتى "ينصلح" حال كروشنا ...
ودعوة هذا الصباح "ما عندها اي علاقة بدعاء الصباح ... اقول دعوة هذا الصباح ان قوموا الى كروشكم اصلحوها يرحمكم الله
------
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: جلال عثمان)
|
صبحكم الله بالخير
بالله هو الليلة الخميس...
و الله الواحد بقى ما يعرف الخميس من الجمعة الا بصلاة الجمعة...
Quote: والله السباق دا كان السنه الفاتت في رمضان وكان سباق الساحل
في اوستندا والفي الصوره دي صاحبة المركز الاول لناس السنه
|
يا سلام على أنصار سنة أوستندا...
يا عمر كيف يمكن الانتساب للجماعة ديل...
لكن يا عمر ما كملت من لحم الدنيا بالجري ده....
كل يوم شايفك ماشي نازل...
و الله نفسي في جكة زي حقتكم تنزلني زي نزولك ده...
بس بدون مطاعنات زي دي...
Quote: وده بيخلى ناس تانيين زى ما قال الريس
يسعوا الى اكتساب قوام رياضى . وأنا بقترح تبدا
لينا بدروس عصر وأول دارس يكون الرشيد
|
أنا الكرش دي عامله مخصوص يا كوتش...
عشان بت الشيخ ما تقول لي قاعد تتخفف و تصغر لي في نفسك...
لي كم يوم كده ما قادر أحك أضاني بي كراعي...
وروني محل المطعم ده يا حماده ينوبك ثواب...
سعيد بعودة جلال عثمان...
حمد لله على السلامة يا جلجل...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
ايها الاصدقاء
اليوم الخميس
تماشيا مع شعار ياسر نجيلة
ودا يا ياسر كلام تقولوا
للناس البخافوا الخميس (طبعا انا ما منهم وهم عارفين نفسهم )
والخميس يشبه تهمة العنصرية التي قال عنها الاستاذ فضيلي جماع
انها اصبحت لا تخيف احد؟؟؟؟؟
اخي نملوز
الى الامام
يا كوتش صباح الخير
يا جلال مشتاقين
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
| Quote: أنا الكرش دي عامله مخصوص يا كوتش... |
سلمك الله يا حبيب ... لكن اسبابك بتاعت الكرش دي غير مقنعة بتاتاً ... فا شنو تعال نتضامن انا وانت
ونشوف لينا كورسات تساعدنا في التخلص من هذه "الكروش"
وبالعدم شوف لينا جلا دا يشوف لينا فكي كارب
-----
يا بركة والله الشوق بحور ما ليها حد ...
غايتو ياحبيب ما لنا الا ان ندعوا ان ربنا يعجل برحيل من جعلونا نستخدم جوازات السفر في ترحالنا داخل وطننا الواحد
الجو كيف هناك الايام دي لعلوا مو حر يفسخ ذي العندنا دا.
----
ياكوتش ياخ ازاي السعادة.
زعلان منك عشان ما ضميتني لبرنامج العودة الطوعية ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
Quote: سلمك الله يا حبيب ... لكن اسبابك بتاعت الكرش دي غير مقنعة بتاتاً ... فا شنو تعال نتضامن انا وانت
ونشوف لينا كورسات تساعدنا في التخلص من هذه "الكروش"
وبالعدم شوف لينا جلا دا يشوف لينا فكي كارب |
و الله يا جلجل الليلة يوم تاريخي بحضورك الزاهي البهي....
لكن خليني أكلمك شوية عن موضوع الكرش ده...
واحد صاحبنا جدا و معانا هنا في البوست ده أداني وصفه...
قال لي كل يوم من الصباخ دغش تقوم تشرب ليك جك موية حااارة نار...
و أعمل ليك فيها ليمون بس بدون سكر...
حتروح ليك الكرش بسرعة شديدة...
وانت عارف ايماني ده مرات بوديني التوج..بتعرف التوج...
المهم بقيت أقوم كل يوم من الصباح أشرب ليك الموية الحاره بالليمون...
من ناحية الكرش خفت فهي خفت...
لكن أنا لي تلاته يوم ما قادر أبلع لي حاجة...
حرقان مستمر يا صاحبي...
أصلي ما خطر على بالي انو ممكن يكون من موية الليمون الحاره...
أشيل و أجغم ليك فيها كل صباح...
بقيت كل يوم أقول للشغالة بتاعتنا..أسمعي كدي وقفي لينا أي نوع ملاح...
وقفت الملاح و النيران مولعة بي جوه...
كدي وقفي لينا السكر...نفس الحكاية....
أسمعي وقفي لينا العيش ..ما عايز عيش...
و الحكاية زي ما هي...
مره زهجت ضربت ليها تلفون قلت ليها أسمعي أنا تاني ما عايز غداء...
أنا ما قاعد أتعشى...بقيت عايش على الزبادي يا حبيب...
لحقت حبوبتي حاجه أمونه رحمة الله عليها...
و حاجه أمون كانت عايشه على الزبادي...
مره قالت لي محمد أخوي..اتعشيت يا حبيب سهري...
قال ليها ما اتعشيت يا حاجه...
أديك ساندوتش...
قال ليها و الله ما بطال...
مشت عملت ليهو ساندوتش زبادي...
فأنا يا حبيب نصيحة صاحبنا ده بقتني زي حاجه أمونة...
فطور زبادي..غداء زبادي..عشا زبادي...
الشاي زاتو بقينا نشربو بالزبادي...قايلني ببالغ صاح...
طبعا صاحبنا حيقول لي كرشك نزلت من الوصفة بتاعتي...
بتاعت موية الليمون الحاااااااااره دي...
لكن وحات خوتك النزول ده من الزبادي الباكل فيهو لي شهر ده...
أكلم ليك صاحبي ده يديك وصفه..و لا ما عايز...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
Quote: يا جورج ما تخليني انفتح فيك
من الصباح بفتش لي علي زول ارشه
محمد كرم الله مات ووردي مات وابوي مات
يعني اخلاقي قاعدة في بوزي |
و أنا أقول الزول ده مادي قدومو كده مالو...
و الله يا جبريلا بقيت متلقي حجج...
بقيت زي الكديسه الفي نص البحر قالت للفار بتكتح مالك...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
سلامات يا ناس
Quote: يا جورج ما تخليني انفتح فيك
من الصباح بفتش لي علي زول ارشه
محمد كرم الله مات ووردي مات وابوي مات
يعني اخلاقي قاعدة في بوزي |
ياحبيب انا زول مسكين.....
عليك الله ما دام اخلاقك فى بوزك ...ما ترش لينا حاتم جبارة
وينوبك ثواب.
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
سلامات يا ناس
Quote: لكن خليني أكلمك شوية عن موضوع الكرش ده...
واحد صاحبنا جدا و معانا هنا في البوست ده أداني وصفه...
قال لي كل يوم من الصباخ دغش تقوم تشرب ليك جك موية حااارة نار...
و أعمل ليك فيها ليمون بس بدون سكر...
حتروح ليك الكرش بسرعة شديدة...
|
يا حبيب انا عرفت القصة :
صاحبك ده بيكون قال ليك موية دافية ما حااااااارة
لكن يعملوا ليكم شنو ما انتوا اتخصصتوا فى لفحى الكلام.
(enjoy your belly
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
هوي يالرشيد الله بيني وبين زباديك دا ياخ .... انت قايل البودي التوج شنو ... عليك نور ...
اها للمرة 514 خليني احكي ليك قصة العربي ....
قال ليك الحاج دا جا "سادر"* وكان متعود ان يمر على صديقه في اطراف المدينة
المهم الوقت كان مواعيد عشا ....
والرجال ما عندو غير سلطة المهم كتر ليك الطماطم والعجور وكمية من الجرجير ... وعزم ليك الحاج
مرت الايام والعربي جا ماري تاني يسأل من صديقو .... اها الجماعة قالوا ليه وين يازول البركة فيك زولك ما مات
فقال لهم " والله من لقيتو يأكل في قش غنمو عرفتو ما بيحيي
دحين هوي يا عربي  هوي زح مني بالله
* سادر و مدلي ديل اسأل منهن طارق دا وبالعدم كمال الشادي
----
جبرييلا ... احسن الله عزاكم ياخ في محمد كرم الله رحمة الله عليه (2012 دي حكايتا شنو)
-----
ياكوتش قلتلي ما اصدقوا .... ياخ صاحبى دا زول حنين ما تعصر عليه
بقول يبكي
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: جلال عثمان)
|
سلامات يا ناس
Quote: فقال لهم " والله من لقيتو يأكل في قش غنمو عرفتو ما بيحيي
دحين هوي يا عربي هوي زح مني بالله
|
انا دى لاول مرة اسمعا ...وعشرة على عشرة.
نصيحة : أعَصِرْ على الموية الداااااااافية وما تكتِّر الليمون.
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
| Quote: و الله يا جبريلا بقيت متلقي حجج... |
متلقي حجج في دارفور نقول ملقِط حجج
هسي يجي نجيلة يقول ليك السودان كله بقول متلقي حجج ماتجيب ليك كلام من رأسك ساكت
| Quote: بقيت زي الكديسه الفي نص البحر قالت للفار بتكتح مالك... |
ولا قصة الحمل والمرفعين
المرفعين أعلى التل عند ينبوع الماء والحمل في المنخفض يعني الماء يأتي
من الينبوع إلى منطقة الحمل
المرفعين قال للحمل ماتعكر علي الماء السنة الفاتت برضو عكرت علي الماء
الحمل قال للمرفعين : انا السنة الفاتت ماوِلدوني ولا عكرت عليك الماء
المرفعين قال : يكون أخوك الأكبر منك وكمان تقول ما عكرت الماء
دة طول ألسنتكم البخلينا نأكلكم وهجم عليه
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
أصبحنا وأصبح الملك لله العزيز الغفار
أ جمل التهاني و التبريكات للعزيز ديدو.
كل سنة و انت طيب...عمر مديد مع وافر الصحة و العافية والتوفيق
الحكمة
( الإستقامة مفتاح السلامة ) نسأل الله لنا الإستقامة والسلامة
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
طيب يا الرشيد .... المسألة ما كده واضحة لفحت الكلام وما تميته ... أساساً الوصفة كده كان قالوا ليك أكل زبادي طوالي ما حا تاكل عشان كده عملوا ليك الكمين بالموية الحارة والليمون وبكده اكلت نيم أقصد زبادي .... وخفت الكرش وهو المطلوب إثباته ....
وين الكوتش يا ناس ....
اها يا كوتش أنا جيت بقي شوف بنات الشبخ وين ....
قول يا جامع
| |
|
|
|
|
|
|
| |
ياسر نجيلة
أحمد إسماعيل
منصور عبد الرازق
محمد صديق
طارق جبريل
الرشيد بابكر
ميسرة سيد أحمد
محمد عيد
سامي عبد الوهاب إدريس
عمر المهدى
Dr.Elsadig Abdalla
زهير الزناتي
محمد آدم النور
عمر نملة
جلال عثمان
مشاعر بدوي
فيس بوك
تويتر
انستقرام
يوتيوب
بنتيريست