|
|
|
 Re: ناس الزقازيق ... أجدع ناس (4) .. (Re: محمد صديق)
|
بمناسبة جلا مافى زول يقربوا دى
يا ياسر نجيلة
انت عارف ليه ما يقربوهو
طيب اسمع الحكاية دى
أقراء واستمتع
شاب إنزعج من حبيبته من كثرة مطالبتها له بخاتم الزواج وتأجيله للموضوع
فأهداها دب فغضبت ورمت الدب في منتصف الطريق
وعندما جاء حبيبها ليلتقطه من الطريق فصدمته سيارة ومات
وفي عزائه كانت تمسك بالدب وتحضنه بشدة وتبكي
وفجأة تكلمت الآله الموجوده داخل الدب
تتزوجيني الخاتم موجود في جيبي
فقالت والدموع تسيل من عيونها: نعم أقبل
فرفع الكفن عن نفسه وقال : لها تو الناس ياشمعة الجلاس !!
فماتت البنت من الصدمه
ثم مات الشاب حزنا على حبيبته
ومآت المخرج
ومات واحد ماأعرفه
ومات مدير خدمات عملاء في Stc
ومات فزاع وأخذ جائزه أفضل ميت
وعينوا ناصر الجوهر بديلن لهم مؤقتاً
وتظل الشحرورة صباح صامدة
وكل هذا من ضمن الخطط المدروسه
التي ادت الى خروج حسني مبارك
مع تحيات محشش جرب الصنف اللي
يستخدمه القـذافي
هههههههههههههههههههههههه
| |
  
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
وطالما الكوتش قال ليكم , ما تقربوا جلا ده
فاوعاكم توقعوا كلام جنابوا ده واطة
والا فعليكم , ان لا تتعاملوا مع الجردقة , زى الكانها واطة برضو
ولو قلتوا انها فعلا واطة , منتظرين شنو طيب , ما تنزلوا تخموا
رباطابيات ... وكدة !
رباطاب عندهم بنطون عطلان وقاعدين طول النهار بيعافروا عشان يطلعو البنطون من البحرعشان يصلحوهو .. جا واحد جعلي قال ليهم: انتو البنطون دا مطلعنوا من البحر ليه؟
رد عليه واحد منهم: والله البحر ما نفع معاهو قلنا نجرب الظلط ..
----------------------------------------------------------------
رباطابي عسكري مرور .. بلغوه أنو في باص إنقلب .. مشى مكان الحادث لقى الناس كلها ميتين ماعدا واحد .. قال ليهو : أها يالصـــــندوق الأســـــود .. الحادث حصل كيف ..
------------------------------------------------------------------
رباطابي بتاع فرن جاءهو واحد قال ليهو العيش في النار .. رد ليهو لا يا اخوي في الجنة ..
------------------------------------------------------------------
رباطابي جاهو شايقي من السفر قال ليه ارح وريني قبر امي
الرباطابي مشى معاهو المقابر وقال للشايقي اها ده قبر امك
الشايقي قال ليه حددو لي بالضبط ياخي ده ولا ده؟؟
الرباطابي قال ليه يا زول شيل فاتحتك ساي ..اصلك انت داير تديها مصاريف؟؟
------------------------------------------------------------------
رباطابي راكب القطر بتاع الشمالية ...وعشان مافي نور عفص رجل واحد جنوبي ... الجنوبي بي زهج قال ليو : انت عميان ولا شنو؟ تطلع في كراع بتاع الناس، انت ما عارف زاتو ماشي وين ... الرباطابي رد عليهو : انا ماشي عند اهلي انت ماشى وين ..
------------------------------------------------------------------
رباطابي لابس جزمة قديمة أصابعينو الخمسة مارقين بره. مشى لي بتاع ورنيش مد ليهو كراعو.
بتاع الورنيش قال ليهو: أورنش ليك؟ قال ليهو: لا لا .. طقطقم لي!!
------------------------------------------------------------------
رباطابي جزار جاو واحد قال ليهو عايز راس نيفة بس صلحو كويس
قال ليه اصلحو كيف يعني البسو نضارة
------------------------------------------------------------------
رباطابي بتاع لبن .. عندو زبون محامي مرتو غالطت الرباطابي في حق يومين بحجة انو كان في مطرة والرباطابي مصر انو اداهم اللبن في اليوم البعدو .. جا زوجها المحامي وقال ليهو انحنا ماممكن تغالطنا ابدا .. الرباطابي قال ليه اغالطك كيف وانت الغلاط فاتح لو مكتب
------------------------------------------------------------------
رباطابي في عزومة عرس لاحظ انو في زول نائم نومة عميقة جدا ... بس في اللحظة الختو صينية الاكل عمك تترب صحي وابتداء يلقلق ... الرباطابي قال ليهم : انتو زولكم دا كنتو خاتنو في الشاحن ...
------------------------------------------------------------------
رباطابي مشى لواحد بعمل في لقيمات في المحطة، داك كلما يخت الصاج في الكانون الصاج يميل لي جمبه، الرباطابي قال ليهو بتظبت في الدش عايز تجيب ياتوا قناة فضائية؟
صاحبنا لمن رمى العجينة في الصاج والزيت كان سخن العجينة بعد ما نزلت في آخر الصاج عملت صوت (تششش) .. الرباطابي قال ليهو اكيد دي قناة الجزيرة زولنا طوالي طفى الصاج ومشى بيتهم.
------------------------------------------------------------------
رباطابية بتبيع زلابية وطعمية للركاب في محطة ابوحمد و الايام ديك شغلو القطر الاكسبرس وكان ما بيقيف في اي محطة .. المهم القطر جا ماشي فيها فووووو وماباعت اي حاجة وقامت رجعت البيت، قام راجلها قال ليها انشاء الله بعتي كويس الليلة؟؟
قالت ليهو- ابيع كيف والقطر جا ماشي فيني زي ترجمة الفلم الاجنبي
------------------------------------------------------------------
الرباطابي عمل ليهو محل فول في البلد ومشى معاهو كويس، قام وسع المحل وعمل قدرة ثانية وزاد عدد الكراسي وبعد فترة جاب ليه ست شاي في المحل .. جاهو صاحبو رباطابي قال ليهو يا دكتور عينت ليك (فحيص) معاك ولا شنو!!
-----------------------------------------------------------------
رباطابى عمل شكله بالليل واتفلق .. ابوهو وداهو للدكتور والدكتور كان طالع عاين للولد لقا الجرح كبير
قال لي ابوهو ولدك دا كان تجيبو بدري
ابو الولد قال ليهو بدرى كيف يعنى كان اجيبو ليك قبل مايفلقو
------------------------------------------------------------------
شايقية ورباطابية راكبات الحافلة ماشات بكا .. الشايقية طقطقت للكمساري ونزلت، الرباطابية اتأخرت.. الكمساري قال ليها: نازلة؟ قالت ليه : لا.. لا.. بدور اقدمها للباب!!
------------------------------------------------------------------
واحد رباطابي راكب القطر قاعد جنب الشباك ... فطلب منو الزول القاعد جنبو: ممكن اقعد جنب الشباك عشان انا بسف السـعوط وبتف ... الربطابي رد عليو: نان وانا بسف وببلعو؟؟ ..
------------------------------------------------------------------
رباطابى نزل ضيف عند جماعة وكان عندهم تيس فى الزريبة جنب الصالون عندو نزلة، الليل كلو يعطس ... الصباح بدرى سيد البيت جا وسأل الرباطابى" ان شاء الله نمت كويس؟؟ الرباطابى قال ليهو
انوم بى وين لى تيسك ده التقول مكوجى مقابل العيد
------------------------------------------------------------------
واحدة حنكوشة دخلت مطعم قراصة صاحبو رباطابى .. قالت ليه ياعمو عليك الله ادينى سندوتش
قاليها يابتى عندنا قراصة كان دايرة سندوتش جيبى ابرة وخيط
------------------------------------------------------------------
رباطابي شاف عتود اسود واضنينو بيض قال مالو دا عامل زي البنطلون القالبين جيوبو
------------------------------------------------------------------
الحاجة جات للدكتور الرباطابي في المركز الصحي وقالت ليهو
دايراك تحولني المستشفى عشان هناك بكشفو علي بالسماعة .
قال ليها نان الشايفاها مدروعة في رقبتي دي قايلاها نبلة؟؟
------------------------------------------------------------------
رباطابي جارو عندو غنماية عايز يبيعا
بعدين في السوق الغنماية قربت تزوووغ قام رفع ليها ولدا عشان تشوفو .. جات راجعه،
والرباطابي مصور الموقف كلو قام قال ليهو
اسمع ياصاحبي جبتها بالريمووووووت؟؟
------------------------------------------------------------------
شايقي جاء لرباطابي قال ليهو انا بقيت شاعر وقام قرأ ليهو
ما بين الشتاء والفواصل حبك سكن المفاصل .. الرباطابي قال ليهو
انت ما شاعر انت عندك رطوبة امشى اكشف
------------------------------------------------------------------
رباطابي مره بي جماعه من اهلنا الهدندوة بشربو في قهوة
وكانوا لابسين لبستم المعروفة الواحد يكون لابس سروال طويل
وباقي جسمو عريان ورابط العمه خلف خلاف
.. الرباطابي قال ليهم يا اخوانا داير لي فنجان جبنة
نط واحد من الهدندوة قاليهو ياخي انتو سحارين ما بنديك
الرباطابي قاليهو عليك الله انت هسي يسحرو ليك شنو زي الفانوس القزازتو مكسرة
------------------------------------------------------------------
في واحد رباطابي جـنو شراب .. وجارو أنصار سنة ... مشى ليهو ينصحوا وشبكو ليك: الخمرة دي بتودر العقل .. الخمرة دي بتعمل ليك تليف في الكبد يعني بالعربي كدا الخمره دي (موت بطيييييء) ..
الرباطابي اتلفت وقال ليهو: (أنا زاتي ما مستعجل) !!!!!
------------------------------------------------------------------
قالوا رباطابي قاعد في مطعم وجنبو زول احوص، الرباطابي طالب كباب والجنبو طالب فول .. اها قام الجنبو كل شوية ياكل من الكباب بتاعو "نظام احوص وكدة". الرباطابي اتغاظ شديد قام قال ليهو : عرفناك ما بتشوف .. ما بتضوق؟؟؟؟
------------------------------------------------------------------
واحد قال لرباطابى انتوا عليكم الله عندكم موية؟ ...
الرباطابى قال ليهو طيب الشجر العندنا داااك قام بالتيمم؟؟ ...
------------------------------------------------------------------
رباطابى في قرية .. جارهم تعب شايلنوا مودينو المستشفى ركب معاهم فى العربية، الرباطابي ساكت ساى يعاين للمريض والمريض ماعاوز يدى اى اقوال ولا كلمة .. اول ماجاء في شارع المطار قامت العربية دقدقت قام المريض قال نحنا وين؟؟ الرباطابي قال ليهم
( زولكم يادوب خش الشبكة )
-----------------------------
شافع رباطابي شايلو جردقة في صينية بيعرضها للبيع عند محطة قطار أبوحمد ، شايقية راكبة القطر مدت راسا قالت ليهو ها جني الجردقه بي كم ، الشافع رفع راسو وقال بالفين ، ردت الشايقة كيفن بالفين مي واطاا ، رد الشافع تطي العقرب وكت واطا ما تنزلي تخمي.
* النكات واردة من الزميلة الصديقة حنان عبد الرازق الخطيب
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
Quote: سنو آفيه
تاهى تاهو تموت ترنق Inaza chee ياسر نجيله
|
موسي ياراجل ...
جهازك ضربو فايروس ...
ولا دخلو تكروني ....
موسي ياعيسي ...
وعليك الله وساطة عند ولدنا ده ... لطباعة الترجمة على الشريط .....
========================================
جنابو العزيز ود صديق
خلاص توبه ... جلا ده مابنقربو ... امرك ياحلو ...
حتي لو ماجا عرس باقي اخواني الاتنين ...
لكن البقنع هناي داااااك منو ....
حريش بالايميل .... والتلفون ...
================================================
منصور ده متجلع براهو في الصفحة مالو ...
ادوهو اجازة ولا علاوة .....
ولا حاتم جبارة وافق على خطوبة بنتو العسل رانية على ولدو الرشيق بتاع الجم أحمد ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
بعض النكات رغم انه الزول سمعها الا انه ضحك شديد ... قلنا نسمع نكات يمكن الضغط يقل
قالوا الضحك بيرفعه .... ضغط الجن ده كل شئ ترفعه طيب بالنزله شنو .؟ ما علينا حاولت
اختار احلي نكتة ما قدرت .... الا يمين بتاعت ترجمة الفيلم الاجنبي دي قوية ....
نجيلة اعمل ساتر انت وصاحبك بتاع الرياض جلا بقي تحت الحماية المسلحة ...
نيران حية ... وضرب في المليان ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
صبحكم الله بالخير
منصور أعذرني ما عرفت الكورال بتاع المدرسة ده عشان شنو...
تأملت في الأولاد المتنكرين في شكل بن لادن ديل بحثا عن حجازي فما استطعت...
أخرجت نضارتي من مخبأها لتوضيح الرؤيا و لم أستطع أيضا...
نفيت نفيا جازما انك تريد فقط اثبات قدرتك على تنزيل الفيديو...
قلت منصور ده حاشاهاو البوبار..و بعدين وقت يتبوبر..يتبوبر ليهو بي فيديو...
يبدو انه قد آن الأوان لاستبدال شاشة الكمبيوتر بأخرى 32 بوصة..
ياسر نجيلة...وينك ياخي...طولنا منك...
نفسي و الله آخد لي اجازة يومين أجي اتجدع فيها في دبي...
زي جديع منصور في البوست ده و كمان نحظى بزيارتكم ان شاء الله..
كنت عايز أقول الله يقطع السلع و يقطع يومه...
لكن تاني قلت يقطعها أكتر من كده كيف...
لنا لقاء ان شاء الله...
موسى...سنو كدي...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
كل ما فى الأمر
يا رشا يا كحيل
انو مجتبى استلمنا ليك امبارح
قال اخد المركز الأول فى الألقاء الشعرى
فى منافسة مدرسية , ضمت العديد من المدارس الأبتدائية فى منطقة الرياض
حتى قال لى لو ما مصدق , تعال نعمل سيرش فى اليوتيوب , لنو نزلوها الليلة
عملت نائم ونعسان و ابى يخلينى
جاتنى ايثار جارية صحتنى للمرة التانية
اجرى يا بابا تعال شوف مجتبى جايبنو فى اليوتيوب
قربت اقول ليهم وانا نصف صاحى
اليوتيوب ده رقمه كم فى الرسيفر
رسيفر شنو يا بابا , قوم انت تعال وانا اوريك
اها , انا ذاتى ما عرفته وهو متنكر ولابس الجلابية والغترة السعودية (اللى هى من شروط الأشتراك فى منافسة الألقاء الشعرى ---تتصور ؟؟!!!)
بينى وبينك , اتكيفت منو , وانا بين نايم وصاحى
واتذكرت انا مرة زمااااان فزت بى نفس الجائزة فى مدرسة الصحافة المتوسطة
سنة كم ؟؟؟ وانتو مالكم يا ثقلاء , قال سنة كم قال
لكن بتذكر المسرحية الشعرية كانت عن عنترة بن شداد
انا كنت عنترة طبعا , والله ما عشان اللون بس
عشان اللون , وحاجات تانية حاميانى
بتذكر كنت شايل لى سيف , عاوز ليهو عتالى عديييل
لكن لمن كنت اتجدع كده واقول
راسى ورأسك فى الميزان قد وضعا وحكم سيفك او سيفى هو الجارى
والمسرح ده يقعد يصفق لى
كنت بقعد الاوى فى السيف , عشان لا يقع منى , ولا اقع منو
اها مجتبى هو المتحدث الثالث عند بداية الشريط , من ضمن المتحدثين الأربعة الأساسيين
لأنى انا ذاااتى ما عرفتو , الا لمن شرحوا لى
* اها يا حاتم , ده سبب اضافى للأتفاق على الصفقة الكبرى , احمد وسارة , ومجتبى مع الصغيرونة ام نضارات دى
على الأقل مجتبى ده , يجضمهم ليك عربى من بتاع ناس عنترة داك , لامن تآمنو زاتو
اها قلت شنو ؟؟ الواد ده ضربت شهرته اليوتيوبات , ما قاعد ليكم طوالى يا معلم
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
حبيبنا الرشيد
والله مكانك محفوظ ... وشوقنا ليك بالكوم
ومنتظرين زيارتك لينا ولي دبي ...
بس انت اخلص النية ... للحج و ..... زيارتنا ...
===================================
ود الزناتي ...
حماية الكمندان لجلا ... ما بناباها ...
ولكن حضورم لعرس موسي عيسي ... في سقط لقط
وطنيشم لي ... حارقني لي هسع ....
وتتخيل من يوم مانويت اضرب ليك ...
والله مسكتني نزلة من النوع ابو كديس ... ولي هسع ...
حتي أسأل ولدنا موسي عيسي ...
اتفكرني مغير صوتي عشان هربان من زول ...
لكن حاضرب ليك ولو بصوت ..... متنكر
====================================
| Quote: ( سنو مادلا ، وإنا زاكا) |
| Quote: باني هكا ، باني هكا ، باني هكا |
اعلان هام ...
التداخل في هذه الصفحة ...
لحملة اللغات فقط .....
في الصفحة السابقة ...
نكات التكارنة .... وقصيدة شنقراي ....طنشتوها ليه ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
يا منصور كده العروسة حتطير من يدكم
الفيديو اعلاه لا يصلح كواسطة تعارف ( ده طبعا" بعد ما اقول مبروك لولدنا على شجاعتك الادبية )
قول لى ليه
اولا" لا انت عرفتو ولا انا و لا الرشيد
ولبس البدو ده حيخيل للعروسة اول ما تجى حيلبسوها العباية والبرقع والخمار من فوق لتحت ( مخمخمة )
انا اتخيل لى لو ركزتو على صور ماليزيا يكون احسن وبتقدرو تاكلو راســـــــا
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
النضيف انا مش قلت ليك حسادتك دي البتولدك البنات
ياخي ماتخليني ننافس شوية ... صور ماليزيا بتقصينا
بالضربة القاضية .... بعدين احمد وباركنا ليهو ...
اها حجازي ده ما عنده طريقة معانا ... نبارك ليهو
الشجاعة الادبية ... ويا ريت منصور كمان ينزل لينا
صورته بسيف عنترة عشان حاتم ذاتو يقوم جاري ....
يا نجيلة يا حبيب ان تاتي متاخراً خيرا من الا تاتي
ويا حبيب والله تلفونك ده زي الضربته ... لكن برضو
ما عافينك منه ... ياخي مشتهين نسمع صوتك ....
قلت قصيدة شنقراي مالها ... انا غايتو الشعر
ده ما عندي ليهو رقبة ... بس صراحة القصيدة سمحه
وتستحق الناس يقيفوا فيها شوية ... والموضوع محول
لمحمد صديق ومن لف لفه من الشعراء ناس الرشيد وعيد ومنصور
وبقية العقد النضيد (لكن عليك الله في ذمتك النضيد دي براها
ما عايزه ليها بوست منفصل يمين لمن كتبتها لمن حسيت الضغط
ارتفع ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
يها القوم.....أيها القوم
أهو أهو أهو
أحم أحم أحم
مالي أرى النضيف محتجاً في ما تناولتوه عني
فأنا لا أريد أقترن بتلكم الخيارات المتاحة
فإن البدوي يا هؤلاء
متى طلب الثريا نالها
عليه:
فمدحشر بين الشاحرين مشحرف
وشاحر المشحور قد شح حراشفو
موسيقى تصويرية:
من ليس معي فهو ضدي
شكراً جنابو على الدعم و المساندة
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد آدم النور)
|
دعم منو ومساندة شنو يا اخوى ؟؟؟
انت راكب من وين ؟؟؟
كدى اول شى نقعد النضيف ده فى علبه
نحن يا حبيى , ما قاعدين نستخدم الأسلحة التقليدية
الجماعة ديل عندهم مشكلة لغات
وريناهم زولنا مجتبى ده , بيجضم ليهم العربى التقول عنتر بن شداد
والأنجليزى , بيقعدوا ليهم فى واطات الله دى , من از لى دظ لغاية الغتاتة والمين واللماضة والدغالة
ما تنسى عندك كمان الجم
عارف الخطوة الجاية شنو
كاس العالم بتاع الفين واربعتاشر , مش فى البرازيل
والبرازيل دى , مش جنب الدومنيكان ؟؟؟
مجتبى زاتو من امبارح , قلب وبقى يشجع (تشيلسى )
وفى الدنيا دى ما بنكره حاجة زى ما بنكره ماتنشستر يونايتد
شفت اسلحتنا متنوعة كيف
ياااااى , تراديشنال خااااالس
* وعندنا كمان مخلاية وخرتاية زى حقات طارق جبريل ,
وبنفطر بالروب لآمن يتدفق ويتلخبط مع الجلسرين
وبرضو تقول لى ماليزيا !!!!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
حبيبنا نجيلة والطلعة البهية
البهية دي هنا على وزن نضيد يازهير
يانجيلة كيف فارسكم أكيد عيونه حمر وحكيم
مش حكاية شيلان سيوف وخلاص
جلا مالو هاج وماج وكمان يورور
مرة أطلعوا معاي الخلا ، ومرة ماعايز كلام مع أي زول أنا ما فاضي
وآخرها الحصانة الدبلوماسية ، قايتو الملف الأخدو جلال عثمان
زنقة زنقة ممكن يعمل حاجة من قبل قوات الحماية تحس
يانجيلة النكات إستمتعنا بها وقصيد شنقراوي
حلاوتها كلمات قليلة وسهلة ومعبرة خالص
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
الواحد يغيب ليهو يومين..
يجى يلقى البنات عرسوهن..
منص.. ذكرتنا المرحوم فريد شوقي..
قام بدور عنتره في أكتر من فلم..
وشاركتو الفنانه كوكا بدور عبله..
أتذكر مشهد مربطينو بجنازير في الحيطه..
وعبله بتنادي فوقو.. عنتره.. عنتره..
يقوم يقاوم في السلاسل وهو بيقول..
عبله تناديني والحديد يقاويني..
ويقلع الجنازير من الحيطه..
أبو الريده زاتو..
نجيله.. حليلك يا ودأمي..
إنت البيزود عنك منو..
والبيحضر عرس أخوك منو..
إنت منو البيجيك في القريب وبيمشي البعيد..
حليلك إنت..
عليك الله ما رهيب? في فاتن حمامه زيي?
ياحلوين.. شكرا لي دعواتكم لي رانيا..
والله محتاجينها..
شكرا على القصيده الرايعه يا رش..
نحن ما مدرستنا المتوسطه واحده..
لكن مادام تميت الخمسين..
معناها أنا وراك كان عشره كان عشرين..
موسى عيسى.. كلام زي الورد..
ما تدي منه البينك وبينو مسافه بنطون..
عشان نقدر نفهم بيقول في شنو..
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: Hatim Gubara)
|
"شكرا أنصار السنه اللابسه جونتي أسود.."
ونسه الخميس دايما دقااااقه..
أمبارح.. ساره بتي رسلت لي رساله..
Daddy, we have soccer practice today at school..
بافهم من كدا انو أمشي ليهم متأخر ساعتين أسوقهم من المدرسه..
وصلت جنب المدرسه.. لقيت فاضل نص ساعه لي مواعيدهم..
شغلت لي شريط قديم لعقد الجلاد وقدت أسمع..
"أحتاج دوزنه.. نفسا جديدا.."
إتذكرت حفله عقد الجلاد في الزقازيق..
شويه كدا وسرحت..
فكرت أنا الوداني الزقازيق شنو..
إتذكرت إنو في تانيه عالي كان عندنا أستاذ فيزياء ثقيل ثقاله..
ممل ملل ما عادي..
والله حصتو لو الأولى.. بنوم زي الماخد فاليوم..
"حاتم جباره.. أطلع بره أمشي تم نومتك.."
بقيت لا بعرف إستاتيكا من ديناميكا ولا شيكابيكا زاتو..
وكرهت حاجه إسمها فيزياء..
لمن إمتحنت شهاده.. ناس التصحيح ما قصروا معاي..
أدوني على أسمي وكم تعريف وكم مسأله من المسائل البيسخنو بيها ديك..
جبت فرت خمسين.. 50 فقط..
طبعا 50 فقط دي ما بتأكل عيش لو ممتحن أحياء وداير تخش طب..
وحقيقه كنت لعبنجي.. والبوكسينج مرضخ..
قامت في راسي قلت ماشي رومانيا أقرا طب..
الحاج والحاجه أدوني راسي..
يازول رومانيا شنو.. حتمشى تضيع سنه لغه..
وإنت عمرك لسع صغير.. ممكن تمتحن تاني..
بس خلي الصياعه واللعب..و..و..و..
"يا وله إهمد شويه ومتبقاش صايع.."
خلاص أمتحن من منازلهم..
"منازلهم إيه ياروح أمك.. أبوك حيرجعك المدرسه تاني.."
يازوله ناظر الجديده ما بخلي زول يعيد..
"بس.. مالكش دعوه.. أبوك بيعرفه"
وقد كان..
مرت الأيام.. قلت أساعد نفسي شويه..
مادام أنا باقي المواد لو إنكربت ممكن أجيب نمر عاليه..
أما هذه الفيزياء.. لازم أخش ليها كورس..
فعلا خشيت كورس مع مجموعه من أولاد حلتنا..
في مركز والا نادي ما متذكر.. المهم ما موضوعنا..
تشاء الظروف.. إنو الكورس مختلط..
زمن السودان بي خيره..
معانا كان بت.. أقول ليكم شنو..
حلاه قاطعه.. علي القمره زي ما واحد أخونا بيقول..
وأنا ما داير لزه.. غاااصب نفسي علي الفهم..
مره من شده سرحت وقهيت.. البت ضحكت وهزت لي راسها..
نظام أهلا بي لطافه كدا..
أها الليل كلو أنا ما نمت..
قلت لازم بكره أمشي أتعرف..
تب تب تب.. جيت خاشي المركز ولا أبو الجراءه..
لقيتها واقفه جمب باب الفصل ومعاها تلاته من صاحباتها قاعدين في كنبه..
"إزاي الحال.." الخفه كاتلاني..
"أهلا وسهلا.." الصوت جاييني زي المزيكا..
"ديل صاحباتي.." نظام سلم عليهم برضو..
"أهلا وسهلا.. إتشرفنا.." سلمت علي الأولى في يدها..
"أهلا.. أهلا.." نمره إتنين برضو..
لمن جيت لي التالته لاحظتها محجبه ولابسه جونتي أسود..
والحكايه ماشيه سريع..
ومع خفتي مديت ليها يدي.. "أهلا.."
"سوري.. ما باصافح.."
"شنو?"
"آسفه.. ما باصافح.."
حسيت بي سخانه شديده.. والعرق دا تقول نافوره..
في بالي قلت.. وطيب لابسه جونتي ليه لو ما دايره تصافحي..
وخلاص يعني ترجمتي لي سوري..
وأنا الجابرني شنو زاتو أجي الحته دي.. فيزياء وما بعرف..
طوالي خلف در.. والباب الجابني مرقت بيهو..
وتاني ما عتبت الكورس..
أولاد الحله جوني.. يازول تعال أخير ليك..
والله البت تسأل منك وقالت ليك عادي ما تاخد فيها..
أصلو أبيت أمشي..
ومن اليوم داك لو كتلوني ما أمد لي بت يدي لو ما مدت هي أول..
عدت إمتحانات الشهاده.. وحققت نتائج عاليه في كل المواد..
ما عدا الفيزياء.. جبت 51..
سنه كاااامله.. في درجه واحده..
طبعا ما أكلت عيش برضو.. فقدمت مصر..
وكتبت جواب مع الورق طلبت يوزعوني الزقازيق عشان عندي قريبي فوقها..
وحصل.. جيت عشان أكون وسط ناسي وأهلي..
فشكرا للفيزياء.. وأستاذ الفيزياء..
وشكرا للبت أنصار السنه اللابسه جونتي أسود..
الما بتصافح..
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: Hatim Gubara)
|
يا سلام يا حبارة يمين بالله في مرتبة واحدة مع منصور والرشيد ... كتابة سمحة طيب مالو لو كل زول جا كتب لينا زي حاتم قصته مع الزقازيق ... اكيد حا نطلع بحكاوي كتيرة .... او كمان يحكي لينا قصته مع انصار السنة ,... اكيد في ناس كتار مروا بنفس الموقف في مرات كتيرة كان اولاد كان بنات .... في زوله كان في الزقازيق بتسلم تحت التوب ... مرة عبد الله شمس الدين العربي صاحب بودي وماجد ... جا يسلم عليها غطت يدها بالتوب ... رفع بيده الشمال التوب ... وباليمين سلم عليها .... من اليوم داك بقت ما بتسلم عليهو
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
ياوله مالك مساهر للوقت دا..
ياخي معقول.. الرشيد ومنص حته واحده..
لو بيكتبوا زيي والله حظهم..
واحد بيشجع الأرسنال وجكيك..
والتاني ساكن السلع..
خساره الموتر..
عليك الله في زول ممتحن أدبي وما بيعرف تاريخ..
دي زي الممتحن اضافيه وما بيعرف رياضيات..
تعرف.. أنا جيت ملحق واحد في سنين الجامعه..
قديت ليك فيزياء بي مزاج في سنه أولى..
أصلها ورايا ورايا..
الوله الرائع محجوب منقه..
يتخطى في الجرح يطيب..
حبيت أبوجبيهه عشانو من غير أشوفها..
تحياتي ليهو.. هو قريب منك..
بس هو الدفعه الوراي..
وعارفك داير تصغر نفسك..
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: Hatim Gubara)
|
Quote: وحصل.. جيت عشان أكون وسط ناسي وأهلي..
فشكرا للفيزياء.. وأستاذ الفيزياء..
وشكرا للبت أنصار السنه اللابسه جونتي أسود..
الما بتصافح.. |
يا حاتم ونستك الدقاقة بتاعت يوم الخميس لذيذة بالجد...
وكتابتك لأنها من القلب و الى القلب ما بتتلحق...
لازم الواحد بعد كده يمشي يشحذ أدواته عشان يلحقك...
بس أول مرة أعرف ان خفتك هي الجابتك الزقازيق...
و يا ريت لو استفدت من الدرس...
لا خليت الخفة و لا الشلاقة...
بالله انت قريت في مدرسة العمارات...
سنة كم عشان أقول ليك الفرق بيناتنا كم...
و ممكن كمان أقول ليك دفعتك منو...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
| Quote: اول ما وصلت الموقف ... نزلت لقيت استاذ حسن مديرنا في الابتدائي .... وصاحب ابوي .. اول من شافني قام من كرسيه وشال معاي الفاتحة .... بعد ما نزلنا الفاتحه سالته قلت ليهو المات منو .؟ نطط عيونه كبار وقال لي انت ما عارف انه ابوك مات ليهو قريب الاثنين وعشرين يوم ... قلت ليهو لا والله .... للاسف لم يراني في الجامعة كما كان يحب ... له الرحمة |
يا أبو الزوز ألف رحمة و نور على الزناتي الكبير...
نسٍال الله أن يجعل قبره روضة من رياض الجنة...
وجدت في قرار نفيك الى أبو جبيهة قرارا حكيما جدا يا أبو الزوز...
و ان دل هذا على شيء يدل على بعد النظر و الحكمة التي تمتع بها المرحوم والدكم...
و رغم أنه لم ينتظر حتى يري نتاج حسن عمله و تقديره...
الا أنه لا شك كسب ابنا ناجحا صالحا مثلك يدعو له...
وكسبنا نحن و كل الزقازيقيون شخصا بقامتك...
حاجه حارقاني:
في زول يعمل سبوتنغ في التاريخ؟؟
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
يا رشدي سلامات انا جني وجن الزول الما عارف حاجة يفتي فيها ... انت زول علمي مالك ومال تاريخنا
ياخي في اساتذة بتوعين تاريخ يختو ليك عشرة مقالات بس كلها تجي في الامتحان ... انت قايل التاريخ
ده ساهل زي الكيمياء ولا زي الفيزياء المعذبه حاتم جبارة دي ... ديل كتابين في عين العدو ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
Quote:
Quote:
ومن اليوم داك لو كتلوني ما أمد لي بت يدي لو ما مدت هي أول..
يا سلام يا حبارة يمين بالله في مرتبة واحدة مع منصور والرشيد ... كتابة سمحة طيب مالو لو كل زول جا كتب لينا زي حاتم قصته مع الزقازيق ... اكيد حا نطلع بحكاوي كتيرة .... او كمان يحكي لينا قصته مع انصار السنة ,...
|
|
يعنى انت ذاتك قلبت انصار ســنة يا ود مدرسة العمارات والسان فرانسيس ..؟؟!
ابو الزوز ... رحم الله والدكم وجعل الجنة مثواه واكيد ارضاءك له وصله حيا ومميتا ...
عارف زى قصة ود جباره دى فعلا حصلت اكثر من مرة فى الزقازيق ..
وبدون ما أذكر أســـماء ..
كان معانا فى الكلية واحد انصار ســنة من اولاد الجزيره .. ومعروف انو كان بيتجنب مصافحة الزميلات .. بل وحتى الحديث معهن ...
ولما كان مربع كاى هو المتكأ اليومى لناس زراعة ... يبتدءون به يومهم فى الصباح بالتسامر ، ويعودون اليه فى البريكات
كان كل قادم الى داخل الكلية يلزم عليه المرور بمربع كاى وتحية ومصافحة الموجودين .. حتى وان كان قابلهم فى نفس اليوم
الشــاهد ان هناك احدى البرومات الجدد وكانت فى غاية اللطافة والظرافة وكانت مشدوده ومعجبه بشكل الحياة الاجتماعية
التى وجدتها فى الكلية والتى كانت لها بلسما لـ آلام الغربة وهى فى مقتبل ايامها بيننا ...
وكان ان دلفت الى مربع كاى تلك الزميلة هاشة باشة فى وجوه الموجودين وبدأت فى مصافحتهم كما اعتادت
وكان بيننا ذلك الاخ ( انصار السنة ) ولم تكن تعرفه ..
وعندما مدت اليه يدها بالسلام .. انتفض بشكل هستيرى فى وجهها وصاح ..
انا ما باسلم على البنات ... انتى ما كلموكى ؟؟
وكان الموقف محرجا ومدهشا لنا .. وانفجرت تلك الزميلة فى بكاء وتشنج أدى الى تجمع كل من كان بحوش الكلية فى ذلك الوقت ..!
ولم يخف تشنجها وبكاءها الا بعد مجهودات كبيرة .. كان من أهمها غرامة اكثر من 20 حاجة باردة فى الكافتريا لتلك الجموع التى
كانت تحاول تهدئتها ..!
ولكن النقطة المهمة .. ان تلك الزميلة ومنذ تلك الحادثة .. انقلبت 180 درجة .. واصبحت منطوية بشكل كبير بل اصبحت تتحاشى
كافة تجمعات السودانيين فى الكلية او فى الاتحاد ... !!!
تلييشة :
الرشيد ومنصور ... ما تتشيطنوا وتحاولوا تعرفوا الاسماء .. لانو ده حصل بعد ما اتخرجتوا من الكلية بى زمن طوييييييل ..!!
( والمعنى فى بطن الشاعر ..! )
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: معتصم جعفر)
|
صباح الخير ،،، يا زقازيق الخير
إنتقل إلى رحمة الله يوم أمس بالقاهرة
والد الأخت / حسناء زوجة كمال الشادي
تغمد الله الفقيد بواسع رحمته وجعله من أهل الجنة
وأصبغ على أهله وذويه الصبر والسلوان ،،،،،،،،
والعزاء موصول لكل أفراد الأسرة.
الأخ/ كمال الشادي يخطط للسفر إلى القاهرة
بعد الإمتحانات الحالية والتي سوف تنتهي يوم
الإثنين القادم حيث تبدأ إجازة الربيع ،،،،
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
نبدأ بى تعزية كمال الشادى وحسناء
ولا ننتهى بيهم ؟؟؟
نشوف انصار السنة الغيرت مسار حياة حاتم جبارة ؟؟
ولا نقرأ ما بين سطور عملية نفى احمد عرابى الجديد
الى ابو جبيهة ست المنقا , بدلا من سمرقند الجزيرة !!!
ولا اقول ليكم
البركة فيكم يا كمال وحسناء
وده ما سلامك , يا زولة يا القطعت قلب الزول الرقيق الأسمه حاتم جبارة ده
ويا زهير الزناتى , احمد عرابى عاد بعد النفى , قائدا لثورة
اما انت , فقد عدت يا حبيبى ,كما يعود عيد (زيدان ابراهيم )
بدون زهور , وين قمرنا ؟؟وين البدور , الغابوا عنى
فلا انت فزت بالموتر سيكل
ولا انت قفلت التاريخ
وفوق لى دا كله , رجعت لقيت الوالد قد انتقل الى رحمة الله
وما بين كل ذلك يا اخوانى واحبابى
اسالكم بالله , ان تدعو فى صلواتكم , ان يشفى الله اخانا امير الجمرى
الراقد فى مستشفى الحبيب بالرياض
وقد يكون الفاصل بين سقمه وشفائه
ان يستجيب الله لدعوة (احدكم ) , فخصصوا له دعواتكم ليل اليوم وفجر الغد
اللهم اشف امير الجمرى , ياعزيز يا جبار يا متكبر
يا من بيدك مقاليد كل الأمور
ان امير الجمرى عبدك الضعيف , بلغه شفائك يا كريم , واسبغ عليه من ثياب صحكتك وعنفوانك
ما يبلغه الشفاء الذى لا يغادر سقما , برحمتك يا حنان يا منان
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
انتو لمن تقوموا للكتابة
بتجننوا حروف اللغة , وتهزوها هز السنين
وتقلعوا المعانى الحلوة , وتفكوها من اسرها
فتخرج الى العلن , وكأنها (مانديلا )
المعانى المأسورة والمحدد اقامتها , عندما تخرج الى الفضاء الفسيح
تفعل الأفاعيل العجاب , وترن فى الخواطر والأفئدة , رنة (جرس ) جديد لنج
بمجرد ضغطة زر عليه , فان الفاصل بين اذنك والصمم ( قيد شعرة ومقدار خفقة )
قاسم الكتابة عنكم , ان صدقها يمشى برجلين قويتين , ويضرب بلسان (عربى مبين )
انا شخصيا , اجزم اننى اعرف انصار السنة تلك , ذات الشرابات السوداء
لو كانت تدرى , ان حاتما ما مد يده اليها ليصافحها , الا لمعانى (اكمال الصورة ) عند الرقيقين امثاله
لعرفت ان يدها (البضة تلك ) , ما عادت (عورة ) ساعتها
هى مجرد التقاء يد بيد , وهو الى ( الآلية والميكانيكية ) اقرب
لا فيه لا شعور , ولا هو مغلف بأحساس
فحاتم عندها , كان قد تحول الى (كتلة احساس ) ملكتها ابتسامة
والأبتسامة هنا , احسن مثال , لكون ان ابتسامتك فى وجه اخيك صدقة
وعكسها تماما , ان تضن اخرى عليه بملامسة يد (ميكانيكية ) , لا تسمن ولا تغنى من جوع
لكن تعرف يا حاتم , انت رباطة جاشك , اتاريها كلها راحت مع (شعرك )
لمن كنت عندك باندا , فانك بدلا من الحلاق , ذهبت الى معهد التقوية داك , فحلقوا ليك مرتين
مرة بمكنة الأبتسامة , والتانية , بمكنة , انا لا اصافح الرجال
والأتنين , امواس حلاقتهم سنينة خلاس
راح الشعر , وضاعت الفيزياء
ولكن حاتما بقى منتظرا على قارعة الطريق , منتظرا (سارة ورانيا )
قلت لى سوكر عديييل ؟؟؟
يا زول حسابك ما تقل معانا
بيناتنا ابتسامة , ويد لا تصافح , وسارة , ورانيا , وتمرين سوكر
وفريق ما قادر يغلب ستوك ستى
* انت مالك ومال بلاكبيرن ؟؟يمين بالله امبارح ارسن فينجر ده , شفتوا اقرب ما يكون شبها , بتلك التى لا تصافح , رجلا رقيقا مثلك
ارسنال -ارسن فينجر يساوى
حاتم جبارة - الفيزياء
وكلا عمليتى الطرح يعطيك ناتجا عالى الجودة
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عمر المهدى)
|
عمر ود المهدى ازيك يا جميل
الفرق شنو تعتقدوا , بين منحك لمن يليك ابتسامة
او منعك له , مصافحة يدين ؟؟؟
فى البص , فى الحافلة , فى اشارة المرور
الذى يوزع الأبتسامات , على المارة اللذين لا يعرفهم حتى
بنى آدم , يحمل فى تقاسيم وجهه المبتسم
خارطة طريق , تختصر المسافات , وتطويها , وتفعل بها , سواة العاصفة بى ساق الشتيل النى
ولا غرو انها , تقوم مقام التسونامى اليابانى الحديث
لأن المبتسم فى اشارة المرور مثلا , لو تعطلت سيارته وهو فى عنفوان توزيع الأبتسامات واوكازيونها الخالى من الغرض
لوجد ان من ابتسم فى وجههم , يتمنون لو يحملونه من على الأرض حملا
ان مساحة المشاركة , فى هذه الدنيا الواسعة , هى فرصة اثبات آدميتنا الوحيدة
والمشاركة قد تبدأ بابتسامة , وقد تنتهى بها , وان فعلت هكذا فقد فعلت كل شىء
وعكسها تماما , وضع الفواصل المفتعلة بين الآدميين , ورص المحاذير المانعة من الأقتراب والتصوير
كما يرص رجال الأمن حواجزهم الأسمنتية , ويتخيرون لذلك , اثقل الأوزان واقلها عرضة (للزحزحة والتحريك )
فيتفأجاوون - ذات صباح او فى لمحة ظلام - ان مثل هذه الحواجز , لا تمنع ولا تقى , الا كما (يمنع الحذر القدر )
هكذا ارى انا تلك الأبتسامة , وهكذا اتخيل منع اليد من مجرد المصافحة
فلو اضمر الآدمى سوءا وشرا , فانه لا يحتاج (لمواصلات ) ولو كان المقصود بهذا الشر المضمر (خلف بروج مشيدة )
تواصل الآدميين , كالموت - لا راد له ولا مانع , الا بمقدار الأستجابة وعدمها
وهو يبدأ متعادلا فى الشعور والأحساس -بطبيعته وطبيعة الأشياء
وهو قابل للتطور فى الأتجاهين
فان خير وايجابية , فخير وايجابية
وان شر وسلبية , فشر وسلبية
وان احتفظ بطبيعته عند نقطة التعادل التى بدأ بها , فله ان يبقى كذلك
ولكن ان تقطعه من الدابر , من لغاليغه كما يقولون , فان هذا عندى , ضد طبيعة الأشياء
والحجة دائما , قائمة على فروق البيولوجيا , التى تبقى مجرد فروق بيولوجيا
هى ليست الا مجرد مكون واحد , من مجموعة مكونات انسانية عديدة بين الآدميين
اما التقت وتوافقت , او ايضا التقت وتنافرت , والنتيجة التى نطلق عليها توافقا او اختلافا
مرهونة , بالألتقاء , ومرتبطة بنتائجه
وفروقات البيولوجيا تلك , تتراجع الى حجمها الطبيعى , كلما كان الألتقاء طبيعيا ومحكوما بموضوع ما
ولكنها تتضخم ووتورم اخذة مساحة غير طبيعية , كلما كان اللقاء مفتعلا ومحكوما (باللا موضوع )
ونية عدم السلام اساسا , هى مقدمة غير موضوعية , تفترض ان اختلاف البيولوجيا هو الموضوع الأساس !!!!!
وهو كما ترون لقاء ابتدأ (بهواجس ) صورتها عدم نية مصافحة مفتعلة افلحت فى ان تجعل عدم المصافحة
يبدو كجبل , بينما ابتسامة وضحكة , تحولت الى مجرد (حفنة تراب )
عندما يتغلب الأفتعال على التلقائية , فان الجوانتيات السوداء تتحول للحظة وتبدو وكأنها (لوالب ) مانعة للحمل
الذى يبدو بعيدا على رؤؤس اصابع اليد الممتدة للسلام
فهل هذا تصوير صحيح ؟؟؟!!!!
هذا مع احترامى لخيارات كل الناس , من اعرف ومن لا اعرف
ولكنها مجرد تداعيات خواطر , لم تبنى على (حرمان حاتم من دروس الفيزياء الأضافية )
وان كانت سببا فى استدعائها من مكان ما
من (تراكمات ذاكرتى ) القريبة البعيدة
عليكم الله كان ما استدعيتوها زى ما سويت انا
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
Quote:
Quote: : الحب هو الألفة ورفع الكُلفة
الحب هو أن تجد نفسك فى غير حاجة للكذب
أن تصمتا أنتما الإثنان فيحلو الصمت
ويتكلم أحدكما فيحلو الإصغاء
الكلام الفوق دة عايز محاضرات وشرح وافي ، وكمان (درس عصر) |
طلب أحمد إسماعيل وكمان جلا يحول إلى سيد الكلمة منصور عبدالرازق
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
ياسلام نيالا توأم كسلا
إقتربت من الأخ شاويش، أياميها تأخرنا لدور نوفمبر في مادتي
( بحوث العمليات ونظم المعلومات) للدكتور فخري مكي فوجدت أوجه
شبه كثيرة بيني وبين الأخ / عبد الرحمن محمد إسماعيل شاويش
وأحمد محمد إسماعيل النور
والده مساعد طبي بمستشفى كسلا وأنا والدي م. طبي بمستشفى نيالا الملكي
وهناك اوجه شبه أخرى مافي داعي لذكرها
الآن حكاية النفي الذي حصل لاخونا زهير من والده بسبب التعليم حصل لنا
من والدنا بس هناك إختلاف شقاوة زهير بعد المتوسطة ويمكن ذلك لتوفر فرص
التعليم في (دار صباح) ، شقاوتنا تبدأ قبيل المتوسطة ، وذلك لأن المتوسطة
عندنا غير ( الواحد خلاص راجل + التحول من لبس الجلابية المعهودة إلى اللبس
الأفرنجي /قميص ورداء / وأهم من كل دة الساعة هدية الدخول للمتوسط لذلك عندنا
يبدأ التميّز من هنا ، أما الآن رغم كثرة المدارس إلا أن الفاقد التربوي أكثر
فمن أمثلة النفى أرسل الوالد الأخ صديق الأمين العام الحالي لحزب الأمة للدراسة
في منطقةحسكنيتة شرق دارفور وأيضا أرسل الأخ آدم الهلباوي لرهيد البردي ، أما
أنا الحمد نفيت داخل نيالا بس جنوب الوادي بحي كوريا
فسبحان الله كثير ممن عاش معنا في نيالا ويعرف كسلا يقول: مافي بلد تشبه نيالا زي كسلا
يازهير ربنا يغفر للوالد ويرحمه رحمة واسعة ويدخله الفردوس الأعلى مع المفلحين والصالحين
و حسن اولئك رفيقا
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
أنا همي ما في الزولة اللابسة جونتي أسود
ولا في الزول الودوهو المنفا
عشان يلقط المنقة بتاعت أبوجبيهة
ولا كلام الريس ميسرة عن الحب و الأمكنة
و لا في الزول البجيك راصي الكلمات زي لوري البطيخ
أنا همي في اللتل ومان المنشرة لي حس
و بتكون لعبت أو شاهدت ال soccer بتاعها في المدرسة من زومااااااااااااااان
و أبوها الجا الزقازيق نتيجة فشلو في إحراز نتيجة كويسة في الفيزياء
إنشاء الله يا بتي أبوك يقوم من رقدتو دي و يكون رجعك البيت
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
احر التعازى للاخ كمال الشادى وزوجته على فقدهم الجلل
اللَّهُمَّ اغْفِرْ لَه وَارْحَمْه ، وَاعْفُ عَنْه وَعَافِه ، وَأَكْرِمْ نُزُلَه ، وَوَسِّعْ مُدْخَلَه ، وَاغْسِلْه بِمَاءٍ ، وَثَلْجٍ ، وَبَرَدٍ ، وَنَقِّه مِنْ الْخَطَايَا كَمَا يُنَقَّى الثَّوْبُ الْأَبْيَضُ مِنْ الدَّنَسِ ، وَأَبْدِلْه دَارًا خَيْرًا مِنْ دَارِه ، وَأَهْلًا خَيْرًا مِنْ أَهْلِه، وَقِه فِتْنَةَ الْقَبْرِ ، وَعَذَابَ الْقَبْرِ وَعَذَابَ النَّارِ
نسال الله له الرحمة ولذويه الصبر
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
Quote: زول كان بلقط المنقة فى ابو جبيهه وعايد فى سنة سادسة
جاى يعمل لينا فيها بتاع بارتيهات وهابى بيرث داى
هو التورتة زاتو ياكلوها مع ياتو شـــــنب |
ينصر دينك يا هلييييييفة
قال أنا ودوني أبو جبيهة مخصوص عشان أمشي الزقازيق
لا بالله!!!!!
أعمل حسابك المنظراتية حيجو و يقول ليك
دا ما مبرر إنو نمع الناس ما تحتفل بهذا اليوم العظيم
يا كمساااري هوووي
بالله نزلني المحطة الجاية
و أديني الباقي حقي
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: موسي عيسي)
|
Quote:
ينصر دينك يا هلييييييفة |
عندنا واحد مسافر في قطار نيالا وماعنده حجز ، قام نام في الممر
بتاع الشاي حلفاوي ولا هدندوي ماشي في الممر وماشاف الزول وعفصو على رأسه
قام الراجل مخلوع وقال : ياخي كتلتنا ، بتاع الشاي قال:
دينك ياشيخ ، أنت للآن حي تتكلم معانا
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
ياشباب روقو المنقة ...
بالله عيد ميلاد ود الزناتي ماتضيعوهو بين الرجلين ...
ولدنا ده انا حاسب ليهو كويس ...
السنة الفاتت كمل 25 سنة ...
هسع بكون 24 سنة بالتمام والكمال ,,,
وبت شيخو 21 سنة ....
ألف مبروووووك .... وتتربي في عزك سنين حياتك البهيه .....
تسلمو كلكم وعقبالكم .........
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
Quote: أعمل حسابك المنظراتية حيجو و يقول ليك
دا ما مبرر إنو نمنع الناس ما تحتفل بهذا اليوم العظيم |
أها يا أبو الزوز حطلعنا من الناس الحاقدين و المندسين مش كدا؟؟؟
و يا بتاع الفتوشوب إنشاء الله يضوي ليك
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
صبحكم الله بالخير
جيت أهني الزول الجميل أبو الزوز لبلوغه الرابعة و العشرون..
و ذلك حسب حسابات ياسر نجيلة...
و ان كنت أشك في ان نجيلة أكل الزول ده في سنة..
و للمرجفين الذين يقولون ان شنب أبو الزوز بس عمره 24 سنه...
بقول ليهم أرجعوا الى الصور القديمة و الوثائق لتعرفوا ان عمر الشنب 20 سنة...
حيث انها كانت احدى الظواهر التي تحدث عنها الناس كثيرا في ذلك الوقت...
عندما نما للطفل زهير شنب و هو في عمر الرابعة...
فأهدته والدته مكنة حلاقة و هو في عمر الخامسة...
و امتحن لرخصة القيادة و هو في عمر الثامنة و تحصل عليها...
و كاد أن يصبح سواق قطر و هو في عمر السابعة عشر...
لولا أن والده رحمة الله عليه نفاه الى أبو جبيهة...
كل الأمنيات الطيبات لأبو ميار...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
(اولاضمى ) وابوى كمان , ازيكم وعمتم صباحا
عمتم صباحا دى , تمشى تترجمها طوالى يا حاتم , لى رانيا وسارة , وليلى زااااتا
وترجع تورينا ترجمتها كيف ؟؟؟ عشان مجتبى ولدى يصحح ليك الترجمة
وكان قدرت كمان تترجم معاها ولضمى واولاضمى ,يكون كتر خيرك
بس صحى القالوا عنك ده , لغاية هسى واقف منتظر
هو قيم السوكر بتاعم ده كم شوط ؟؟؟
لقيتو واقف منتظر تشتاق عيونو لى روعته
نفس الملامح والشبه والوقفة زااتا وقدلتو
اقول ليك حاجة -----
نجيب ليك مجتبى ينتظر بدلك شوية ؟؟؟
وبالمرة زااااتو نخلص من الموضوع ده
مع انو انحنا ولا خايفين من المنافسة ولا شيتين
المنافسنا , زماااان نفوهو ياكل منقة
انا مستعد انفيهو ليكم السلع زاتا
بس خلو عيد ميلاده السبعين ده يخلص
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: موسي عيسي)
|
أب شنب.. قالو عيدميلادك ال24..
عقبال ميه تانيين فوق ل24 الحقيقيه..
جلا.. زمان يدقونا دق العيش في الكوره..
هسي بقينا نشيل ونوصل للتمرين..
وكمان بنات..
إن شاءالله ولدكم مجتبى حريف..
يارش.. شاحذه ليها شنو أدواتك..
داير تضبحنا أكتر من كده..
والله أي زول عرفتو من نيالا حلو..
أمسك عندك أحمد اسماعيل..
وأولاد بيطره.. محمد بكري ومحمد البشير..
مويتكم مويه سكر والا شنو يابوحميد..
نجيله.. حسابك زي فيزيتنا..
جبريلا.. بطريقتك دي خليه البوست..
إنت ذاتك بيودوك الخور بعد دا..
مالك مال الموضه ومال الأزياء..
شن فهمك إنت..
تكتبوا عن الحب زي الريس ما طلب..
والا أقوم أنجلخ ليكم أنا..
دا تحذير نهائي..
أفقدوا جلال ياخوانا..
تخريمه: جالك كلامي يا منص?
أها الحكم ما غلط المره دي.. يبقى المشكله وين?
هذا هو الفرق بين الأبطال والمنظراتيه..
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
| Quote: أفقدوا جلال ياخوانا.. |
الزول دا مابستحمل يعاين للشيكولاتة و ما ياخد منها حتة
عشاان كدا ما تفقدوهو هس
خلو أب شنب دا يجي و يطفي الدنميت بتاعتو دا
و أكلو شكولاتاتكم و أمسحو خشومكم يرحمكم الله
بعدين أفقدو الطاعم
تحلية قبل التورتة:
يا المنظراتية السلام عليكم
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد آدم النور)
|
يا جماعة والله الواحد خجلان مرتين ... مرة عشان زول كبير كده ويحتفلوا ليهو بعيد ميلاده ...
الواحد ما احتفل بعيد ميلاده الا بعد ما كبر وجاب اولاد ... وبقت دي ثقافتهم .... زمان
الواحد ما يتذكر حتي يوم ميلاده .... نحن اناس في طبعهم كثير من البداوة والريفية ...
حتي يوم ميلادي تذكرته احدي القريبات وهو علي عهدتها .... ولدت عن طريق قابلة لم تهتم
حتي باستخراج سجل رسمي من مواليد السودان ... رغم انه كان مجاني .... اكدت قريبتي انه
يوم مولدي هو الرابع من ابريل ... لا احد يستطيع ان يختلف معها ... فهو تاريخ جميل
ولذيذ ويرضي كل الاطراف .... من الاشياء التي عضدت هذا التاريخ ان هنالك صورة عائلية
وجدت في ارشيف العائلة .... اكد بعض الشهود بانها اخذت يوم مولدي .... لذا الاحتفال
به ما هو الا نزولا لرغبة الاولاد والاخ الفيس بوك ... وخجلان مرة تانية لهذا التداعي الحميم
من كل الاصدقاء لمشاركتي هذه الفرحة ... مثلنا لا يمثل لهم عيد الميلاد الا يوم عادي مثل
غيره من الايام ... من الصعب ان نكتسب ثقافة جديدة لم نعتاد عليها ... فقط يسعدنا
حب من حولنا .... شكري للجميع .....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
احمد اسماعيل .... سلامات ... من محاسن الصدف ان يكون لدي اصدقاء كثر من نيالا ... ما يجمع اهل نيالا الادب الجم والتحدث بصوت خفيض ... لا ادري لماذا ...اعرف آل مفضل تربطني بهم علاقة ود مقيم ...عن طريق الاخ علي مفضل ... لعلك تعلم ان اخيه الاكبر احمد مفضل خريج تجارة الزقازيق ... 1983م وهو شخص ودود وغاية في التهذيب والادب ...وهو الآن مدير الامن الاقتصادي ... وكذلك اخيه ابراهيم خريج كلية الهندية - شبرا وكانت تتبع في ذلك الوقت لجامعة الزقازيق ... اما صديقي جلال كردمان فهو من الطف الذين يمكن ان تلتقيهم في هذه الحياة .... علي ذكر رهيد البردي ..... التقيت الكترونياً قبل ايام مع صديقي محمد عيسي وهو من ابناء رهيد البردي ... درس بجامعة اسيوط ... طافت بنا الذكريات والاحاديث لمواضيع شتي ... سالته عن احوال رهيد البردي ... فقال لي لا زالت هي رهيد البردي ولا زلت الشيوعي الوحيد بها .... تطول قائمة اصدقائي من نيالا ومنهم ما هو علني وما هو سري ... الا يقولون بان الصلاة بها العلن والسر .... احب نيالا التي تشبه كسلا حتي بواديها العظيم وجبالها الشامخة ... احب انسان نيالا الجميل ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عمر المهدى)
|
كل سنة وانت طيب يا ابوالزوز
ونأسف للانتقطاع لظروف تقنية بحتة ...
ويسأل منك الخير ياحاتم جبارة ....
وبركة بالشوفة ياجلا ياخ ... عادت للبوست نكهة الريحان والله
---------
ونعزي الاخ كمال الشادي وزوجته في فقدهم الاليم
ونسأل الله الرحمة والمغفرة للفقيد وان يتقبله الله القبول الحسن
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عمر المهدى)
|
ولضمي الزيناتي أنت ما قتلت الدجاجة وخميت بيضها
آل مفضل أبناء عمومتنا
أخوهم الأكبر / محمد إبراهيم علي مفضل متزوج شقيقتي
نعم أحمد إبراهيم خريج تجارة الزقازيق وكان ملحق عسكري في تشاد
أيضا الأخ حسن إبراهيم خريج زراعة مشتهر كانت تابعة لجامعة الزقازيق
وأخوهم المهندس آدم إبراهيم والضابط علي وأخوهم الصغيرمفضل بامريكا
اما آل كردمان مشهورين في نيالا ، أخوهم الكبير كان لاعب محترم في هلال نيالا
وأخوه معتصم كردمان درسنا في مدرسة الثورة التوسطة
شفت كيف يا أبو الزوز نحن الزقازيقاب محل ما نلتفت بنلقى زيادة إلفة
سبحان الله مقدر الظروف والأحوال
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
صباح الخير ،،، يا وجوه الخير
أصبحنا وأصبح الملك لله وحده،،،
اللهم صلي وسلم على سيدنا محمد وعلى آل محمد –
بعدد رحمة الله ،
بعدد فضل الله بعدد خلق الله ،
بعدد مافي علم الله ، بعدد كلمات الله ،
بعدد كرم الله ، بعدد حروف كلام الله بعدد قطر الأمطار ،
بعدد ورق الأشجار ،بعدد رمل القفار ،
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
احمد رجب ومصطفى حسين الكاريكاتيرست الشهير
كان لهم سلسلة مقروءة ومتابعة من العديدين فى جريدة الأخبار المصرية
مقالات من احمد رجب خفيفة , ومعاهو صلاح السعدنى كمان
وكاريكاتير يومى من مصطفى حسين
وكلو تحت العنوان , الحب هو
الريس ميسرة عرف الحب , تعريفين مرتبطين بالسكوت , والنضم
فى حضرة الصمت , وفى حضرة النقاش والنقة ,
يفرض الحب طريقة صمت تخصه
كما ان النقاش والنقار والنقة , يفرق بين ان يكون نقاش محبين من غيره
وعلى منوال التعريف هذا , فان الحب هو
ان تحتفل بعيد ميلادك الأربعة وعشرين
بالرغم من انك و لا عارف , لا عاوز
احمد رجب ولا ما احمد رجب
* يمين جنس تنظير يا حاتم , خصوصا فى كورة بلاكبيرن دى
معقولة يا ارسين فينغر , قدام بلاكبيرن تلعب سبعين دقيقة بى مهاجم واحد بس
ووين , فى ستاد الأمارات
بس انتو الله يحلكم من ناس السير ديل بكرة
انشلوتى زااااتو باين قنع من خيرا فيكم
يعنى توريس ده , لازم يلعب يعنى
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
ماذا قيل عن الحب :
عنـد الحب كل شيء ,,,
وبعـد الحب شيء ,,,
الحب :فرصة ليصبح الإنسان أفضل وأجمـل وأرقـى ,,,
الحب ليس عاطفــةً ووجدانــاً فقط إنما هو طاقة ـ وإنتــاج ,,,
الحب : هو أعظم مدرسةٍ يتعلم كل عاشقٍ فيها لغةٌ لا تشبهُها لغةٌ أخرى ,,,
الحب : تجربة وجودية عميقة تنتزع الإنسان من وحدته القاسية الباردة
لكي تقدم له حرارة الحياة المشتركة الدافئة ,,,
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
كويس حصلتني وكتبت عن الحب..
عشان الإنجلاخه ما تحصل..
يازول نحن المانيو بنغلبهم وبيغلبونا..
بنعرف ليهم كويس.. الله يحلهم هم..
شفت لكن الصبي المكسيكي.. موبااالغه..
أما صاحبنا أبراموفيتش شكلو شروه الترماج..
زي لمن أصر يشتري شفشينكو وفرضو على مورينهو..
الشي المحيرني أنو لاعب زي توريس يفقد الثقه بالطريقه دي..
حتى لمستو للكوره ما ياها..
بيني وبينك كان إنت دفعت 50 مليون إسترليني في لاعب..
يقوم يجي المدرب مايلعبو? والله إلا كان تدقو..
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
زهيــر ... بالله أكتب لينا هنـــا الوصفة العلاجية الأدوك ليها للارتفاع الشديد بتاع الضغط ..!! .. آآآآآآآه يا بلــد
شترى على كرتي- وزير الخارجية – فندق قصر الصداقة ببحري بمبلغ (85) مليون دولار ، دفع منها نقداً (55) مليون دولار ، على ان تقسط بقية المبلغ (30) مليون دولار على مدى ستة أشهر فقط . والفندق من أملاك المحتال السعودي جمعة الجمعة المسجون في السعودية حالياً بعد ادانته بالنصب والاحتيال ، وقد جذبه للاستثمار في السودان – هو والنصاب الآخر بن خرباش ، من الامارات العربية المتحدة ، والمسجون ايضاً الآن بتهم الاختلاس – مناخ الفوضى وغياب سيادة حكم القانون في السودان ، واستقطبهما بصورة مباشرة عبد الله حسن احمد البشير – أخ المشير البشير – كما اعترف بذلك في حواره مع صحيفة (السوداني) . وكان وزير شؤون مجلس الوزراء السابق الجنرال صلاح احمد محمد صالح يتابع اجراءات جمعة الجمعة وكأنه سكرتير خاص له ، وحين خرج من الوزارة تحول الى العمل علناً في استثمارات جمعة الجمعة . وبعد سجنه في السعودية عجز جمعة الجمعة عن سداد ما عليه من التزامات مالية للبنك العقاري السوداني ، وامهل فترة محددة لتوفيق أوضاعه ، وعندما أوشكت الفترة على الانتهاء عرض مدير أعمال الجمعة الفندق للبيع ، وتفاجأ حضورالحفل الفخيم الذي اقيم للصفقة ، بوزير الخارجية علي كرتي الذي دفع (55) مليون دولار لحظة توقيع عقد البيع ، وقسط (30) مليون اخرى لمدة ستة أشهر فقط. وشرع المالك الجديد كرتي في عمل اصلاحات فورية بالفندق لتدشين العمل به . وفي غياب الديمقراطية ، حيث لا يمكن فحص ادعاءات الحكام عن انفسهم ، وحيث لا مراقبة ولا مساءلة لهم ، لا يمكن سؤال كرتي من اين له بـ (85) مليون دولار يدفعها لقاء استثمار واحد من استثماراته !
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
والله يا محمد عيد انا شايل هم الزول ده ... مفروض كان يقسطوا ليهو المبلغ ده شوية كده كمان سنة سنتين يعني الدنيا دي طايرة ... مش يراعوا ظروفه ياخي الراجل موظف في الحكومة ويا دوبك المرتب علي قدر حاله ... يجيب ليهم تلاتين مليون دولار في ستة شهور من وين ... غايتو اقترح نرفع التماس للجهة البائعة بعمل تسهيلات للاخ علي ...وتخفيض المبلغ شوية ... واذا ما كان في طريقة طريقة ... تقوم الحكومة تدعمه شوية كده وتدفع ليهو 29 مليون دولار ... الراجل ما قصر معاها قاد ليها قوات الدفاع الشعبي دي فترة ما هينة .... والباقي مافي مشكلة نتموا ليهو نحن من صندوق التكافل بتاع ناس الزقازيق ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
Quote:
الراجل ما قصر معاها قاد ليها قوات الدفاع الشعبي دي فترة ما هينة .... والباقي مافي مشكلة نتموا ليهو نحن من صندوق التكافل بتاع ناس الزقازيق .... |
ســـعادتك .. وانا كمان متبرع ليهو بتصماميم الحملة الاعلانية واللوحات واعلانات الميديا .. ياخى قائد الدبابين ما هين .!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
كرتى ولا كرتك انت
لا هذا ولا ذاك , ده طلع (كرت ) الناس كلهم
هسى انتو عاملين ليكم شركة طوييييلة عريييضة
وعاوزين تشتروا ليكم اراضى فى سقط لقط , بى مبلغ وقدره
ما شايفين قصر الصداقة المعروض للبيع ده
وبى جنس التسهيلات دى !!!
الزول ده , ما بيرضى ياخد ليهو كم سهم مننا كده يا تبلدينا ؟؟؟
* استمتعوا اليوم بأثارة الكرة الأنجليزية فى لقاء مان يونايتد وتشيلسى
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
صبحكم الله بالخير
رحم الله ياسر الشفيع و جعل مثواه الجنة...
أبو الزوز يسأل منك الخير...
ما زال النت عندنا بطيئا ...
مداخلة واحدة تستوجب كثير من الصبر و حتى الايمان...
فأصبح عمل مداخلة أخير منها تتفرج في مباراة في الدوري السوداني...
و تكون بتتفرج فيها في قناة قون و يكون الرشيد بدوي عبيد بيقدم الاستوديو التحليلي...
بالاضافة الى انني مشغووووول جدا هذه الأيام...
عجبني أمبارح كلامكم عن نيالا...
و لأني عشت فترة من حياتي في جنوب كردفان ذكرني كلامكم بتلك الفترة...
وقتها كان هنالك ارتباط تجاري قوي بين كردفان و دارفور و حتى أواسط السودان...
فعبر مليط كانت تجارة الحدود مزدهرة و كانت تعبر الكثير من البضائع الى السودان...
و أذكر أن العطور و الأقمشة الفخمة و الأجهزة الكهربائية و الالكترونية و غيرها...
وكانت نيالا تقوم بدور التوزيع لكل تلك البضائع الى باقي المدن و الأقاليم عبر خط السكة حديد أو عبر النقل البري ....
كانت أسواق المدن الكبيرة في دارفور و كردفان أكثر عمارا من أسواق مدن أواسط و شمال السودان...
لم أقم بزيارة نيالا...و لكني رأيتها من خلالكثير من اللوحات التي يقوم برسمها فنانيها...
فكان فناني نيالا يعرضون لوحات يرسمون فيها ملامح من مدينتهم و منطقتهم...
كانت لوحات جميلة قادرة على نقلك الى نيالا و مناطق جبال مرة الجميلة...
لقد كانت حركة الفنون أيضا مزدهرة جدا في تلك الفترة....
أمشي ليكم على بابنوسة و لا تقولوا الروووووووووب....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
والله يا ابو الرشد كلام زي السكر ، سلامات يا كوتش الكلام سمح
عن نيالا ، بس ناقصه كروراك
لكن ما يخالف نديكم رأينا في نيالا من قول الأستاذ/عثمان عبد الله محمود
تربية الزقازيق
نيالا العز نيالا الهنـا ×××× نيالا جـمالك عنـدنا
| |
|
|
|
|
|
|
| |
محمد صديق
منصور عبد الرازق
ياسر نجيلة
زهير الزناتي
أحمد إسماعيل
الرشيد بابكر
عبد الدائم سيد أحمد
محمد آدم النور
Hatim Gubara
محمد عيد
معتصم جعفر
ميسرة سيد أحمد
عمر المهدى
طارق جبريل
سامي عبد الوهاب إدريس
موسي عيسي
جلال عثمان
فيس بوك
تويتر
انستقرام
يوتيوب
بنتيريست