مصابيح السما التامنة وطشيش
مصابيح السما التامنة وطشيش محمد الحسن سالم حُمـّيد تظل نبع المياه والضو قمحنا .. كسانا .. عافي .. سكن وين ما نسكتك نسمع عصيفير الحكاوي رطن متين ما نفقدك نلقاك تحانن بالغناوي وطن مع انو حباكا ميتة الغربة واستكتر عليك كفن قدر وطنك مع الاوطان إذا ما كان سحايبو ابّن يمرقن قش من الوديان عشان تدي السعية لبن قدر وطنك إذا هلكان قدر يلغى القرف دركان قدر يقسى ويخيب ظن حبيبو الطيب الانسان يطفر روحو روح الفن وطن لكنو ماهولك ولا الزول القبيل بي خيرو بات زولك وطن محتل .. وطن مختل بي شوق مختل ..رؤى ووجدان . خيال مكسور .. وشن جابرو ينوم والجنة في خاطرو صلب غلمان .. بنيات حور.. خمور وقصور يشق منتل بخور تيمان بلا رحمة وبلا رحمان يقع يابس على دابرو.. يرجع شهوتو الشيطان الى الدنيا ويقوم مبتل وطن .. منهولو ما هولك ولا كا الهولو من هولك فما معنى الارض بالضبط او بالربط شن قولك حين تكد حولك تباصر الموية بالسرقة غرامة ودردة وعلقة يصادر الوالي محصولك يلف ضل المقيل تعبك ينصل من جلد قصبك .. يهزلك راسو دلودولك ولادة التابا ما بتابا … تحت باطك تجر الريح بدل مسادر ورتابا .. وطن ماليك فيهو وطن .. بحر لي جرفو يتغابا لوما ترمي فطنو حجر تكجاي درابة لو ما هبا ريح الشين .. وريح الشيني هبابة تقول مرسوم او انو الغيم ملقى عليهو رقابة بحر ياخي .. خسارة اصي عوارضو الجني .. يحندك فينا بالمي الني يملينا الشراب الجن نصاقر لامتين الصي والعالم صحاري سّقن شن عبّاك وقالك غن ..او غباك وقالك عن وطن خلوهو للاقدار .. فتن ما خلو فيهو خدار خلاف الطرف طرف اغن وطن وما خلو فيهو وطن معلق بين لهات عربيهو والزول الحبيلو رطن ولكنك تغني وطن بعد دا وطن .. بي ده وطن ياي ده وطن لا كلت مزاميرك ولا ضرب الربابة وهن عشان تتفتح الابواب .. تغني حقيقي مو هواب تغني صواب ..تغني وشن .. قيا دخلت حبيبة الرحمة يا مرق الحبيب إذن تغني تغني ما تيقنّ ..تغني الطليق كما الطالق تبشر في التقانتو بكن ..يكون المدفع الخازوق مكانو مكن بدل ها الدم من الامات رضيعاتنا اللبن مكّن ومن بعد المناحة الضيق زغاريد الفرج طقّن نقاقيرون يسون : دن …….. اطمن في المرق وحيدو لا خوفًا عليك لا حزن تغني من التعب لامن كلكب دمن ولا شكرًا رجيت لا من فهل يعني النهاية الموت !!؟؟ وينبعزق غناك سدن املنا الغيم ح ينسابق على الارض العزيزة فدًا وطنا حبيبنا رغم البين هي الاشواق حنينا اليك زين يا زين يظل دفاق ما حوجتنا ونديك .. ورناعليك دوا وساساق يلاقي البينا بين واديك اناقي غزيرة ما ها فراق نحبك من طرف ننجم برغم قطايع الاملاق مابتزم علاقة دم وفا وتاريخ على الإطلاق إذا ما الغربة لمتنا على ذات الخلق واخلاق وطن وين كان في زمتنا فكيف يبقى الزمن فراق هي الاشواق وما بين السما والارض مد اشواق وما طال المطر بيصب طبيعي انو الارض ما راق كما انو العكار من طين كمان من طين بجي الرواق صحيح انو المطر رايق ولكن السحاب قد ضاق خبارو الريح بشن سايق وكت كبد التراب مشتاق إذا ما العشق منصابق ومنطابق على الاعماق كذلك حضرة العشاق مع غيبوبة الاشواق يامسكون هيام وقيام مع ليل الحنين الطاق قسمتك من شتا الايام تضوق قدر الوطن ما ضاق تضوق زي الوطن ما ضاق وطن ساكت .. وطن نضّام وطن ما فيهو اي كلام وطن صابر .. وطن علاّم وطن آخر .. وطن قدام . وطن ساهل ولا بينحام وطن ماهل .. وطن قوام .. فرق واحد على الاقوام وطن خالد على الايام وطن ساكت وطنا وبس في جوفنا اندس .. الف ميم لام متين ينبث يلم قدام رمز لي مجدو صانو تمام .. نحوت العزة ما ها صنام مسيحتو وسماحة اسلام .. تقول للفوق هويتو سلام بطن بطرانة يا مريام ويا مريوم هي الارحام ويا ادروب وتية امام وطنا نيتو بيضا تمام اذا انهبشت هويتو حرام عندها بندقيتو كلام وطن لا جوع وطن آآمن تبس في الصحرا لا الغام مصابيح السما التامن تغيب في الغابة غيم وانغام ونواصل (عدل بواسطة bunbun on 02-16-2002, 10:30 AM)

العنوان	الكاتب	Date
مصابيح السما التامنة وطشيش	bunbun	02-16-02, 09:43 AM
Re: مصابيح السما التامنة وطشيش	suna	02-16-02, 10:14 AM
Re: مصابيح السما التامنة وطشيش	bunbun	02-16-02, 10:20 AM
Re: مصابيح السما التامنة وطشيش	suna	02-16-02, 10:25 AM
Re: مصابيح السما التامنة وطشيش	bunbun	02-16-02, 10:43 AM
Re: مصابيح السما التامنة وطشيش	Elsadiq	02-18-02, 02:21 AM
Re: مصابيح السما التامنة وطشيش	bunbun	02-18-02, 04:58 AM
Re: مصابيح السما التامنة وطشيش	bunbun	03-06-02, 11:33 PM
Re: مصابيح السما التامنة وطشيش	MXB6N	03-06-02, 11:48 PM
Re: مصابيح السما التامنة وطشيش	yasiko	03-07-02, 05:27 AM
Re: مصابيح السما التامنة وطشيش	bunbun	03-07-02, 06:39 PM

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]