الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد...

Quote: بسم الله الرحمن الرحيم عزيزتي فدوه سلامات... الله يديك العافيه ويبارك فيك عوتينا علي الاخبار الحلوه ... تحياتي... حاتم هاشم.

Quote: للمرة الثانيه وفي العمود نفحات الريف تحت عنوان فارس الرمال المقصود بي فارس الرمال دي اخوكم ابو الحسين تناولت هذا الموضوع صحيفة الوان الصادرة يوم الاربعاء بتاريخ 21/2/2007 الذي يتعلق ببوست الشايقية هذا البوست الرائع الذي استطاع ان يعكس بحق وحقيقي تراث قبيلة الشايقية منذ اقدم الزمان وعكس كذلك قيم وعادات وتقاليد القبيله كما استطاع ان يغير بعض المفاهم او الفهم الخاطئ ان صح تعبيري عن ما يعتقده البعض في القبيله عموما الابداع لااستطيع ان اصفه بكلمات قد لاتفي بحقه وانا كذلك اعجز عن اصف هذا الابداع اللامتناعي من المبدع جمال ابريده او كماعرفناه بـ ابو الحسين ماعلينا الا ان نشكره الشكر الامتناهي ونتمني له مزيييييد من الابداع والي الامام دوما عزيزنا ابو الحسين والعقد الفريد ( د. ياسين والأُستاذ/ خالد المنسي... (الجعلي ـ الشايقي)... والخليفة حاتم هاشم...وكل من ساهم في اثراء هذا العمل الابداعي ولا ننسي ان نشكر كذلك المبدع الصحفي زاهر الكندري الذي اهتم بمثل هذ ه المواضيع واعطاها مساحة للنشر ربنا يديمكم جميعا ومزييييييييد من الابداع والتميز لك كل ودييي فدوى الشريف

Quote: بتنا أُستاذة فدوى الشريف... يا بشارة الخير... تغيبي وتأتينا بخبر مفرح... أولاً وعبرك أشكر الأخ الأُستاذ/ زاهر الكندري... الصحفي اللامع الذي تناول عدة مواضيع تهمنا وتراث المنطقة الثري الغني بجمالياته الماثلة والخالدة خلود البركل الراسخ مر الأزمان... ثانياً الفضل من بعد الله سبحانه وتعالى على نجاح هذا الحوش هو أنتم إخوتي الكرام الدكتور/ ياسين محمد ياسين الأساتذة/ موسى الحسين حاج موسى، خالد المنسي، الخليفة حاتم هاشم، الفاتح القرير، الكيك، فدوى الشريف وست البنات وبقية العقد الفريد المشارك في مواضيع البوست... وكل زوارنا الكرام الذين قرأوا وتاوقوا علينا حتى تعدت قراءاتنا هذا الرقم الكبير...

Quote: يا أبو الحسين سلام ياخي بفتش لى كلمات ( القدم كان ليهو رافع..) للأخ الشاعر السر عثمان الطيب ..كنت زمان حافظا.. بس نسيتا.. ممكن تفتش لى كلماتا.. صديق منصوري

Quote: أخواني ..أركان هذا البوست ..ود الحسين..ياسين..حاتم هاشم ...فدوى الشريف..وخالد محجوب ..أرجو أن لا يكون منسي! انسدال الكلام الجميل ..من أطراف أقلامكم ..هو الذي أعطى هذا البوست..الثبات.. وسط عواصف البورد العاتية..والتي أحيانا كثيرة ..تهب ..بما لا نشتهي..نحن أصحاب ..بحر المودة ...والمشتهنك...وأجمل الحلوين...والزول الوسيم ..وسوقني معاك يا الحمام..... التحية لك ..أخونا ود الحسين ..وأنت تتقدم الركب ..تزين أطراف الحديث ..بحلو الكلام ...وتربت بكلمات الرضاء على أكتاف ضيوفك وزوار هذا البوست .. ولم يكن القصد من عتابي ..الأ ..إسقاط ..الحجر في بحور أشعار ..حاتم هاشم وخالد محجوب..ليحرّك دكتور ياسين .." نغيمات النعام آدم ...ونجدّف ..نحو ماضي الذكريات..ويا له من زمن.. أخونا " ياسين " ..قبل شهر ونصف تقريبا ..كنت في معية شقيقي ..عوض ..نقدم واجب العزاء في وفاة والدة ..احمد حسون ..رحمها الله ..وتذكرناك...في أثناء لملمة ..بعض من أطراف ذكريات " مروي الثانوية"..وأين انتهى بكم ..وبنا ..وبهم ..المطاف..لك التحية... أبناء ..شايق..اغرفوا من بحر... هذا التراث العامر..تجلببوا باثواب أشعار الدابي ..عبد الله محمد خير..محمد سعيد دفع الله..إبراهيم ابن عوف..السر عثمان الطيب وكل شعراء المنطقة ..وتعمعموا ..بالحان النعام وود كرم الله ..عثمان اليمني ..وكل فناني الطنبور.. ولكم التحية جميعا... الفاتح عبد الله طه/القرير

تسلم يا الفاتح يا جميل... على الكلمات المعبرة... التي هي مع أُخريات في النفس أملنا وزادنا لي باكر...

وأنا وأنت والجمع الجميل المشارك والقراء الكرام للأمام...

كميات مودتي... وكم أنا سعيد والحوش منور... بطلتك ومتاوقتك الجميلة...


أبو الحســـــــــين...

Quote: الأخت الفاضلة / فدوى الشريف بعد السلام عليك والرحمة والبركة من رب العرش العظيم لك مني كل الشكر على عكس جميل إبداع حبيننا وحبيب الكل تمساح المحبة أبوالحسين ... أخوة واخوات تعرف بهم في بوست أبوالحسين ( الشايقية ماضي وحاضر ومستقبل ... والشايقية ومفرقات الزمن الصعبة وهم مازالو لابسين توب المحبة والحنين وكل جميل ) كنت أحدث نفسي دماً أن من أسباب نجاح هذا البوست النية الصافية السليمة ( لصاحبه ) حبيبنا وحبيب الكل ابوالحسين الذي كان صادق مع نفسه أولاً ومع الأخرين في كل كلمة يكتبها تحس بها ليست كما جرت العادة في اغلب البوستات التي يكسوها دوماً عامل المجاملة .. جمعني هذا البوست بأخوة لم تلدهم أمي أفخر وأعتز بهم ابوالحسين والدكتور سنجك ميه واربعطاشر والجميل حاتم الفحل ود القرير وسيد أحمد الحسين وغيرهم من فاتني ذكرهم ( الكبر دخل ) وست الكل وروح البوست النابض الغائبة ست البنيات وفمها البنقط عسل .. نعم والله وبصدق أمني النفس بلقياهم حقيقة في سوداننا الحبيب العزيز علينا.. والشكر اولاً واخيراً لك ايتها الفاضلة فدوى والشكر عبرك لجمال أب ريده ولكم مني ابناء شايق من جم في كل بقاع الارض اجمل التحايا من قلب محب لكم خالد علي محجوب ... جعلي من شندي

تعظيم سلام ليك أخي أبو أحمد يا روح الحوش وجوهرته...



خمسة وردات حمراء أهديها لك وللغالي جداً الخليفة أبو هاشم... وأنتم تجسدون في هذا الحوش الوحدة والإلفة السودانية الأصيلة...

فيا أهلا بكم وأنتم ترسمون أسمى آيات الإخاء والمودة والمحبة الصااااااادقة بين أبناء السودان الوطن الواحد... فالحوش حوش الجميع من حلفا لي نمولي... من طوكر للجنينة... الكُل يعرض تراثه وثقافته...

وأنا وأنتم والجميع إلى حوش تسوده المحبة والمودة والصفاء والنقاء...

مع قواسيب مودتي...


أبو الحسين...

Quote: وياريت صديقنا د/ يس محمد يس من جرابه العامر يهدى الشاعر المسكون بحب البلد الساكن في قلوب الجميع السر عثمان اغنية المشتهنك تعبيراً عن وقوفنا معه وشوقنا إليه.

Quote: وسلام لكل من دخل البوست وكان بى فحمى ولا قلم سجللو حريف ! وبنعذرلكون فيحال اناخر وطوول ما جيتكون عيللى وحات الختم سببا قاسى - وباكر -باكر بنجضو ليكون - وليى هينى يبقالى أخير اقيف ! وسلام للويليد السوغوير وليد خالد ود عمى محجوب - ويا خالد قولو ست البنات ليقت المجوز الراح منها - وجايبالك التيميرات والمقطف ! وكمان يا خالد باقى نضمك فوق جدى قريتو ووصلنى ! ونان بس اصبرلى لامن افضالك باقى انا مشغوووولة . ست البنات .

Quote: محل ما اقبل ألقى أحبابى شايقية ياناس حكايتكن شنو ؟؟؟ والله التراب البمشى عليهو حاج الماحى نحنا بنحبو أبو الحسين شيشك على الورود دى ما توزع بالجملة كدى إمكن تجينا مناسبة ونحتاج ليها سلام وتحايا وإحترام مع مليون وردة وخزام

طلتك دي لينا يا بت شيوخ العرب أعظم مناسبة...

ونهديكم ورود ساقية ود منصوري كلللللللها...



مع كميات مودتي... وإقامة طيبة في ديار أهلك وأحبابك...

وعلي ذكر شيخنا حاج الماحي... أهديك هذه المدحة... إله العرش صلي علي نبينا كاتبها شخصي الضعيف (جمال أبريدة)...

إله العرش صلي علي نبينا...
أبي الزَّهَراء البتول جد الحسينا...

شرع بسم الله بي ربي المعينا
رازق الحوت وفي الرِّحِم الجنينا
تبلغنا مقام الصالحينا
نكون في الآخرة من الفائزينا

ثنيت بالمصطفى الصادق أمينا
شفيع الناس يومت واقفينا
جهنم تزفر الغُل والغبينا
شفاعتوا الكبرى بيها مُبشرينا

في يوم ميلادو حضروا الشاهدينا
وأقسموا ما رأوهُ حلف يمينا
سجد لله رب العالمينا
وسطع نور لا بلاد الرافدينا

سليل آبائه الأكرمينا
بنو هاشم فخار العزة فينا
في يوم الحبشة اتوهُم غاصبينا
حمتهم جند ربك مصبحينا

في يوم مبعثه فاض الخير علينا
فك قيود ظلام الجهل فينا
أتتنا الدنيا ترتع بين ايدينا
لتنهل من زلال صافي المعينا

سعادة من تسمَّوا مسلمينا
وشقاوة من عداهو المشركينا
أبو جهل السجم مطرود لعينا
تبوأ مقعدوا في النار حزينا

نبياً كان علينا رؤوف حنينا
سطع كبالبدر بين الكوكبينا
خطَّالنا طريق المحسنينا
ومسَّكنا في حبل الله المتينا

نبياً كان أمان للخائفينا
وبسمة تطل في وجه العابسينا
كسته الهيبة بين الجالسينا
تشوفوا قمر يسر الناظرينا

من آياته الواضحة المبينا
إجابته سؤال المرجفينا
بيت المقدسِ من فلسطينا
أتاه بقدرة الله المعينا

نعمة أصحابو همَّ الفايزينا
أبوبكر المنزه من ضغينة
في يوم الناس أتوهو مكذبينا
قالُّوا صدقت قولك حق يمينا

فاورق يا أمير المؤمنينا
رعيت الله وقاك حصن حصينا
حكمت عدلت نمت قرير عينا
شهادة الروم عداك الكافرينا

عثمان سيَّدي يا ذونُّورينا
شهيد الأمة غدروا الخاينينا
العادوك هم الغاصبينا
شقاوتهم مسطرة في الجبينا

نعمة الليث أي الحسن وحسينا
فرتاك الصفوف شايل السنينا
بدرِ وأحدِ تشهدلوا وحنينا
كم شرَّد إسود بشتن عرينا

شقاوتك يا ابن ملجم يا اللعينا
قتل خير البرية بعد نبينا
وليَّ الله على الناس أجمعينا
محبته الوصيِّ فرض علينا

أنصار سادتي أهل المدينة
باعوا النفس سامو الروح رهينة
تقول أنصار يأتوك مسرعينا
جنوداً بالسلاح مدججينا

رضي الله عنهم أجمعينا
أسسوا دولة الحق المبينا
سجلو أروع الأمثال لينا
وسادوا الدنيا لا ورا لي أثينا

حذارى الدنيا ما يغُرك معينا
تقول أسكت أخوض كالخايضينا
أنظر للملوك في الأولينا
صاروا قصص عِبر تُروى علينا

تواضَع ذلها النفس اللعينة
وترفع عن نقايِص وكل شينا
يكسِّيكا الإله وقار سكينة
وتنال الدرجة منَّ الناجحينا

عليك يا الله وجهتنا ومشينا
طالبين لي رضاك في كل حينا
تسبغ عافيتك لي والدينا
ومن الظلمات تحلحل كل سجينا

سلام يا مكة ليك في العالمينا
بيت اللهِ كاسيك حُلة زينة
صلاةٌ فيكي ما ليها وزينا
ومقامٌ فيكْ مُنى للعاشقين

نعمة العباَّ زادو علي المدينة
وقف في الروضة صلى علي نبينا
رأى الأخيار في حرموا مجاورينا
بكى الشوق والهيام فش الغبينا

يقول أبريدة يا رب يا معينا
تقوِّم حالتي وتستر علينا
تسلكنا طريق الصالحينا
نفوز بالجنة خير وقصور وعينا

صلاة الله على الهادي الأمينا
كذا التسليم على مر السنينا
عدد علم الله رب العالمينا
توافي الغالي قنديل المدينة..

ــــــــــــــــــــــــــــــ

وأهديها لكل الذين زارونا وشرفونا بالمتاوقة وللخليفة أبو هاشم...


أبو الحســــــــين...

Quote: سمية الحسن طلحة وعلي ذكر شيخنا حاج الماحي... أهديك هذه المدحة... إله العرش صلي علي نبينا كاتبها شخصي الضعيف (جمال أبريدة)...

Quote: الحبيب الأستاذ جمال سلام Quote: سمية الحسن طلحة وعلي ذكر شيخنا حاج الماحي... أهديك هذه المدحة... إله العرش صلي علي نبينا كاتبها شخصي الضعيف (جمال أبريدة)... هذا الإهداء جعلني أتذكر قول راشد "في قصيدة راشد والتومات للأستاذ حميد" عندما أرادو أن يطهروه وقالوا له "حا نجيب المداحين ، طنطن وقال أنا جاي من الحج؟؟!" "غايتو الأخت سمية ما بتقدر تقول شي في المديح لكن الفيك عرفتا"

الغالي د. ياسين...

الله يجازي محنك خليتني أضحك متل الماني طيبي براي...

يا اخوي أُستاذة/ سمية دي أنا عارفها وعارف هواها شرقي (على وزن الفي الشروق ساكن أي الحبيب صلى الله عليه وسلم) وعندي معاها مداخلات ومداخلات في الحُب النبوي الشريف... عشان كدي تلقاها هسع هي طبقت قصيدتي دي وإن كان ما أقول ليك كِضِب تكون هسع في المخيخ الجوااااااااني إتحفظت...

لكن إنت يا سليل الفُقَراء (الختمية) الفيك إتعرفت... بس خلني لامِن ألاقي شيخنا الخليفة محمد ود ياسين!!!


كميات مودتي...


أبو الحســــــين...

Quote: الغالي د. ياسين... الله يجازي محنك خليتني أضحك متل الماني طيبي براي... يا اخوي أُستاذة/ سمية دي أنا عارفها وعارف هواها شرقي (على وزن الفي الشروق ساكن أي الحبيب صلى الله عليه وسلم) وعندي معاها مداخلات ومداخلات في الحُب النبوي الشريف... عشان كدي تلقاها هسع هي طبقت قصيدتي دي وإن كان ما أقول ليك كِضِب تكون هسع في المخيخ الجوااااااااني إتحفظت... لكن إنت يا سليل الفُقَراء (الختمية) الفيك إتعرفت... بس خلني لامِن ألاقي شيخنا الخليفة محمد ود ياسين!!!

Quote: قمت للتو بالإتصال بالأستاذ السر عثمان الطيب والحمد لله تماثل للشفاء الكامل وهو الآن يجري تمارين رياضية بعد إجراء العملية الجراحية وهو في صحة جيدة وسوف يصل مطار الخرطوم يوم الجمعة الموافق 9 فبراير

Quote: يا خالد وليد عمى محجوب - يسعلنى الله حد ما اقرالكون كلمى بشوفا مارقى من تلافيف القلب - وتنقط صدق ! وينسر خاترى فيحال الزول بيفرح وينبسط وكت الخوة تبقى صح صح وماها كضب !

Quote: أخي الفاضل أبوالحسين الطيب خليط من الجعليين والشايقية، وربما يعجب هذا القول الأخ خالد المنسي، لكنه عاش نسيج وحده، لأنه كان قومياً لكل أهل السودان، ومات بعد أن وثق طرفاً مهماً من تراث بلدهم وميلونه المربع، لذا فقد أحبه الناس وكل الناس، وحزنوا لفقده الذي كان فقداً للجميع

Quote: الا أيها الركب اليمانى عرجوا فقد أضحى هوانا يمانيا وأنا أقول :ـ فقد أضحى هوانا شايقيا ومحل مايهب مركبنا تميل معاه ان كان مشرقى ولا مغربى ( وانت يابو الحسين عرفت من أين يؤكل كتفى)

Quote: و كمان يا ابو الحسن تقولي شنو و تقولي شنو انا وحاتك كت خايف من لوي الحنيك ز ندهت شيخنا كندمر طلعت يده طويلة و لحقني الكلام ده ادفنو قبلو

الحِبيِّب حسين الطيب...

صباحك زين... إنت في لوْيَة الحِنِيك الهيني دي... أكنَّك شوف طَمْسة الجنا الجابو ختاهو يرفرِف بي عويناتو كيفِن طفَّش علينا البلوم من البوست!!!

Quote: ابو الحسين تحية طيبة شكرا على البوست انا من المعجبين بتراث الشايقية بالرغم من البعد الجغرافي من مناطقهم، دائماً بتاوق من بره لكن قلنا ندخل نسلم عليك ونسعل منك ،الأسبوع الفات مسجل غياب انشاء الله المانع خير. كسرة: شايفك غيرت الوردة،طبعاً في مداخلات المناسابات مرات الواحد قاعد يستلفهاسامحنا يا اخي كميات مودتي(الحقوق محفوظة)

Quote: حيدر كان..أحسن تسف @@ الفأر ده فأر جرِف مبارى دربك وليه يكرف@@ قرّف البنسون تقرّف يطوطو ضنبو وفوقه يخلف@@ واظنو " للخدرا" قعد يلف

والله يا القرير يا اخوي...

كلمة قَرَّف البنسون تِقِرِّف دي عجبتني عجب شديد خلاااااااااااس... دحين يا أهل اللغة ما فيها جناس تام!!!

وشوف قلة أدب الفار... يطوطِو ضنبو وفوقو يخلِف!!! وختام القصيدة دي يبقى لي بالجد قاعد يعملها فار السجم دا...

كميات مودتي... وأنا داير متاوقتك تاني تبقى بي عديلها ما تجي وتخفس ساكت... ورحم الله شاعرنا المبدع دوماً والخالد في نفوسنا حسن الدابي...


أبو الحســـــــــين...

Quote: أبو الحسين .. وأهلنا الشايقية الحنان طوَّلنا منكم قلنا نزوركم الليلة .. وأهدي ليكم رائعة تاج السر عثمان الطيب شوفي الزمن يايُمه ساقني بعيد خلاص دردني واتغربت واتبهدلت ورِّيني الخلاص ساقني القدر منِّك بعيد .. لأذايا كاس .. جرعني كاس يايمة يافيض الحنان الماكمل يايمة يابدري البشع دايما يهِل يايمه يانور الباح وكتين يطل واشري يازينوبة ولدك في دروب الشوق كتل محروم من الحب والمحنة وراك همِل

Quote: يلة يكون د. ياسين ما قصر كان ترجع الأُغنية دي بصوت الرائع دوماً محمد جبارة... طال غيابك يا د. ياسين والطلبات نازلي فوقك مطر... وأيضاً الأخ خالد المنسي ليهو مدة ما ظهر... عساك بخير أبو أحمد...