|
|
|
 Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
إخوتي وأحبابي...
أهديكم بعد الغيبة الطويلة دي... قصة أخرى لصديقي اللدون الكاتب عبد العظيم الطاهر... من الله خلقني مكجِّن السفر بالعربيي!!!
من الله خلقني
من الله خلقني مكجِّن السفر بالعربيِّي ومكجِّن يومو ... إن بقيت ساااكت عِطِش تسوِّي النّاس في غلبة نامن يناولك الموية ... وإن بقيت خرمان دار تكرضم لك سفّه تشيل الهم لى مروقها .. وإن بقيت داير تنسيَّير عِلاّ يوقفوا لك العربيِّي وتزح من عيون النّاس لا غادي نامن نفسك ينقطع من المشي ... وده كلللو هيِّن ...النصيبة والهجِيمِي الكبيري إن بقيت دار تمرق لك هبوب وإنت مَشَكَّن وسط الخلق في العربيِّي .. تقعد تودِّي وتجيب .. وتبدأ وترايِي ..ياااربي أسويها ..؟ ولا لع ..؟ ياربي إن بقيت مرقتها بيعرفوني .. ؟ أهـا إن بقيت مرقتها .. إن مسك نخرتك براك كدي يااهن العرفوك .. وإن بقيت بلعت السيف متني وما إنزحزحت من مكانك .. تَشَكِكْ النّاس في بعضُن .. وينبادلوا الإتهامات بى عيونُن ..وإن بقى الزول القاعد جنبك ده , إتلفت وإبتسم لك سـااكت بى حسن نيّه تقول خلاس أنا إنكشَف ..فِشان كدي أنا مكجِّن سفر العربيات ده ..
أها ... جات الإجازي اللّتنا ..مشيت بِعت العربيِّي اللّتي القدِيمي وأخدت لِي ويحدتن جدِيدِي ماااهلِي كدي وسميحه .. جيباً سميييح كدي ...المرأة اللّتي قالت لي المرة دي نسافر بى عربيتنا للسودان ...تنفعنا هناك نحوم بها هِنِي وهِنِي بدل كل مرة نجري نكوس في الامجاد والركشات ...انا الفكرة وقعت لِي .. لكين هِي أتاريها فوق فهم ... على حِس العربيِّي الجديدي بقت تشيل وتردم لي في العفش ..وتسوِّي لِي ما دام العربيِّي أصلها ماشي أخير النشيل ده .. وأخير النَّسوِّي ده .. هِي تردُم ..وأنا أستف وأربِّط وأشيل وأعتِّل ..متل المُزَاورِي الفي الميناء ..أصلي ما هزّيت رويسي وقت لها لع ... بس أقول لها سمِح .. سمح .. نامن أكتافي ديل إترخَن لا تِحِت بتل العَرَّاقي المَعَلَّق في الحَبِل ومسكني وجع الفِقَرْ ... من كترت العفش سبت العربيِّي بقى مَتَندَل لا فوق بتل شافع العرب الحالقين لو رويسو بى تِحِت ومخلين باقي الشَّعَر الفوق ... حيلي ضمَّه إنهدَّا وأنا لى الليلي لا سافر ولا إتحركتَ من بكاني ... قُت لها عاد إن ما عجنتي لك دِلكِي وجبدتي لى أكتافي وكرعي ديل ..ياكي الماكي مسافري من هِنِي والعربيَّي أخليها واقفي في بكانها ده ..
إتوكلنا على رب العباد وركبنا الباخرة .. مرقنا بى غادي في سواكن لقينا البلد دي فايري ... جِنِس فَسَخيبة وجِنِس حَر .. تَخَت الكَفَتيره في الشمش وترمي فيها حَب الشاي ... وجِنٍس خلِق ودَفَسيبة اللّت ناس بس يوم القِيامِي .. الراكوبة اللّت القدوم ملاني .. والمظلات البرَّا ملانات .. وواحدين يجوك جارين بى هِنِي وديل يجوك جارين بى هِنِي ..وكل واحد فيهن شايل لو دفتر ويقول لك أدفع لنا كدي , وعليك كدي ..وأمشي الشبَّاك داااك آ بعرفو سَو أشنو ...قُت لهن تعالوا هِنِي .. إنتوا في زول موصيكن عَلَي ..؟ ماسكاكُن علي غبِينِي ..؟ في زول قال لكن أنا زارع لي حيضان اللاّت ريالات في الشرِق بى غادي ..؟ تريِّلُوا فوق صدوركُن .. أزحفوا من قَبَلِي ... قَبَّال يصقعنِي جِن أسع ده أقبِّل صاد بى باخرتي دي محل ما جيت ...دااابنا فتَّاح يا عليم رزاق يا كريم كُرَاعنا لى الليلي ما إتوهطت عديل وإنتوا جايين كابسِنِّي بتل نمل السُكَّر ... القريشات الجيت شايلِن معـاي قلت أقضي بِن إجازتي عليك أمان الله إتماصن بتل الظهرة الفي الطشِت ... كل مرة أمرِقِن أقرُطِ فيهِن .. نامن بقيت أدَّخِل إيدَي في جيوبي بتل البيفتش لو في عَقَاب جُرُم وأمرُقِن فاضات .. كان ما كُت مجكِّن لى شوية دولارات كدي داسَّهِن من الحيكومة اللَّتي كانوا نقروا طاري وشالوا حالي ... يشيل حالُن ... علا بقيت نجييض آ زول ..
ناس الجمارك ... الشنيطات اللاّتنـا بَحَّتُوهِن وشنتلوهِن لينا جنس شنتيلاً, باركين فيهن بى إيديهُن وكرعيهُن بس الجدادي البتبحَت في التَّرى تحت المنقايِّي .. نامن أنا شكَّيت في رقبتي , قُت يا ربي أنا جيت شايل لي معاي مخدرات وأنا ماني عارفها ..؟ من المغصة الصادتني عليهُن قرربت أصنقِر في الواطـا وأقعد أجعُر ... ربطَّنا عفيشنا من أول وجديد ومرقنا رقيباتنا من الميناء .. مرتي قالت لي نمشي نبيت في بورتسودان ونقوم باكر الصباح .. قت لها إنتي مغزلِنِي ...؟
ناس سواكن ما قصروا شي , فرضوا الحوض قبَّال يبقى للحش دايري البعوضة اللَّت بورسودان كمان تدُق النقاقير وتعرض الليلي فوقنا ...؟ أبقي عشرة على الدميمايِّي الجيتي بها دي .. الدَّرِب قدامنا لى اللَّيلي طويل ...
أول نقطة اللَّت تفتيش ونحنا مارقين من الميناء العسكري الواقف في الكُشُك وقفنا ... لى الليلي ما اتفكّينا ...قال لي: الأوراق هَقَك وين ... ؟ أدّيتو الورق ..دخل على كُشكُو وجاني مارق ... قال لي : رسوم الطريق تدينا ... رطنت معاهو قت لو ) نَاكَابْ هَرِّيوَا ..؟ ) يعني داير كم ...؟ قال لي : ( يَهَا .. برُوك بِدَاوييت ..؟) يعني إنت بجاوي ... ؟ قت لو .. لع .. ( شايقيبوا ) يعني انا شايقي إستغرب وعاين لي كدي وعاين لى مرتي وولادي .. عويناتو يقولِن ماهو مصدق ..قال لي : ( كرتوم إيبا تِنْدِيَا ..؟) يعني إنت ماشي الخرتوم ..؟ قت لو انا ماشي عطبره ... قال لي : ( تَامُنْ قال هَيمَا ) جيب حِداشر ألف ... قُت لو بركة البقن حداشر , أدَّيتو ياهِن ... كُت قايل رُطانتي بتسوي لها شي ... عِلِّي ما نفعت ...
مشينا بى عقاب يومنا داك ووقفنا في سنكات قلنا نشرب لنا شاي يا جبنة تنعوشنا شويِّي ... والطراوه الصاااقطِي اللَّت سنكات ديك ضربتنا بعَد الفسخيبة اللت سواكن الهرتنا ديك ... كان مو العفش المردوم معانا دا كنا بيّتنا قبلنا ... شفع العرب جوا إتكبسوا فوقنا الشايل لو مساويك والشايل لو فنادِك والشايل لو بسكويت .. واله يا أخوانا يحنِّنُوا الزول ... من شِدَّة ماهُن ضُعَاف ومَسُوَلِلين الواحد فيهن بتل العنقريب البلا بِرِش ... عِضيماتن ظاهراات يا حِليلُن ... جاني راجلاً عِجَيِّيز ضهيرو محني , وقف قَبَلَي وقال لي :- يَهَا ... ( إندَك مَأَجون ) عندك معجون ..؟ معجون الليل أسنان يعني ..عاينت لو كدي لقيت خشمُو جاما .. معلم الله من إسم السنينايِّي الواقفي .. بتل المحفضة اللّت حبوبتي الله يرحمها ..قَدُر ما قت لو تسوي بو شنو ..؟ أبى ما يحدسني ... في الآخر عرفت إنو يمشي يبيعو ويشيل قريشاتو ..غمَتَّ لو شي حِتَّن زَحَّ من قبلي ..
واصلنا رحلتنا نامن قلنا سلام يا درديب ... وإن بقيتوا دار تشوفوا الجدب والمحل البى الصِّح ..والنّاس المهمشين بالصح .. والمافي زول جايب خبرُن أها ياهن ديل من دريب وإنت ماشي لا كسلا ... صُوَرُن وهيئتهم تبقى مبارياك وما تمرق من عيونك نامن تقضي إجازتك وتجي صاد ... والله الموية البى نجلبغ فيها دي ماهن لاقينها .. وإن بقوا لقوها ..أها بس القطرة اللَّت العيون .. والطعميَّة الهيني دي .. يبقى لي إن لمُوا فيها الواحد فيهن يشيلها يشمِّها ويجكِّنَها تاني في جرابو متل فتيل الرِّيحِي ..يعني أفقر زول عايش في جوبا ولا ملكال بالنسبة ليهن زي واحداً من أولاد العمارات في الخرتوم ( عشان ما تقولوا لي بااالغت ) أكلُن وشرابن ياهو الجّبنة ... يعني الواحد منهن إن بقى عِرِق سااكت تشم ريحة عَرَقُو دي جبنة جبنة ..باقي لي إن مشي ينسيَّير يمرقو نِسكَافي صُرُف ...قَطِع شَك ... والجبنة الكتيري تصدم الزول من الأكل ... أسعلوني انا ... فشان كدي قللت منها ... بقيت أشربها يوم الجمعة بس وبعد الغَدِي ... (جيتي من الحج الفات دا ... مِي دَقيت الدَّلَجِي وكُت جاي ألحق الصِّح ...) أكَركِع في الجّبنة بالكُبَّايِّي أحَمَتنِي الأكل ضُمَّه0
نزلنا في درديب , العساكر قالوا لنا تبيتوا هِنِي , بالليل ده مافي سفر فشان الرَبَّاطِين بيلمُّوا فيكن يخلوا ريحتكُن طير طير ... أجَّرت لي عنيقريبات في أويضة كدي وإتكَمَدنا فيها انا ومرتي ووليداتي وعِنِيقريباتن بس الإسم عنيقريبات إن جيت دار تمد كرعيك يندَلدلِن من العنقريب في الواطا بتل الراكب لك دِحيشي من شِدَّة ماهِن قِصويرات وسُغَار ... صلينا المغرب والعِشِي ... الوليدات قالوا جعانين داي يتعشوا ... شِلت الهَم وأنا ماني جايب لي زوادة معاي ... قُت لهن يلاَّكُن ..مرقنا لقينا لنا مطيعِم كدي خَات لو طريبيزات برَّا ومَسَوِّي لو كَنَب الليل خَشَب قاطعات إسم الفوطة ولا المَشَمَّع المفرش فوقن ..إن قعدت فوقن بتل القاعد لك فوق ضِريسِي ... وإن جيت داي تقوم تنسرِح لك سَرِيحِي فوق صلبك تخليك تفنجط بتل الحمار الفوق ضهرو دَبَرَه ...علاَّ مشيت جبت المصلاية اللّتي فرشتها فوق الكنبة للوليدات ... ومشيت أطلب لهن العشِي ... أها عندك أشنو ..؟ قال لي عندنا فول وعدس ..قُت لو ما عندكُن لحيمايات مطقطقات كدي ولا جَنى جِداد ..؟ قال لي :- لَهَم ...؟ ( لَحَم ) لهم كان لِقِينا برانا ناكُل ... يعني اللَّحم إن لقوهوا ماهن جاي يبيعوهو شي ... ياكلوهو لى رَقَبتُن ... قت لو طيٍّب ... أدَّنا فول وعدس ... عامِنُّو العدس قاع يسوي لي الحيرقان والفول زااتـو عِلاَّ أشرب لي وراهو أندروس يا عطرون ... وفي النهاية أنا هيِّن الحديث في البطان الكَارَّهُن معاي ديل ... جبتو خَتيتوا قِدَامُن .. عاينوا لو وصَرصَرُوا وِشيَّاتُن ... عِرِفتَهُن ياااهن البايتين القوى ... بى فَدْ نَفَس .. قالوا لي : ده شنو يا أبوي ياخ ... ؟ قت لهن هوي ... هِنِي لا في ماكدونالد ولا في كنتاكي ... ده ياهو كنتاكي اللّيلُن يا تاكلوهو يا تخلوهو ...الكُبار غايتو خَتَّروا شويِّي مع أمّهُن لكين السُّغَار يعاينوا للصَّحَن تقول جِب لهُن فوقو قَعُويِّي ...علا طلبتلُن شاي بى لَبَن قَرَضوا معاهو الرَّغيف..
مشينا للنُّوم ...خليتُن هُن جوَّا وانا مَرَق عنيقريبي برّا جنب العربيِّي فشان أحرس العفش ... غلبني النوم ضُمَّة شايل اللَّيل نامن الواطا أصبحت ... البلد دي صِنِّي قاطعي إسم الحركة .. بلا صوت الجِّندِب والكلاب مرة مرة ياخدن لهن نبيحة آب تسمع شي ... والواطـا من شِدَّة ماهـا ضُلُمَّة كُبُس باقي لِي إن بقيت داي تَتْبِن رأسك عِلاَّ تولع لك بَطَّاريِّي , ليلي داك كلو انا موهدِب ..أرقد على ضهري أسمع حِس نَفَسِي بى وراي اقول بس في واحداً جاي يبعج لى بطني بى سكين ويشيل العفيش اللِّليل دا ... والبلد صِنِّي .. إتكفي على صَفِحتي اليمين يتخَيَّل لي في حِس نِعلين ماشات عَلَي .. أقوم أصنقِر إتلفَّت جاي وجاي وتاني أرقد ... زولاً يَشخُر جنبي ساكت فشان يطَمنِّي ماهو في ... حَسّيت من الصباح عيوني ديل حُمّمممر بتل زول المَرِيسي غالبني أفتِّحِن ... ما فَضل لي علا أرفع جُفُوني بى أصابعَي لا فوق فشان أفَتِّح .. صلاة الصبح صلّيتها يا الله يا الله .. لا أسّع ماني عارف نفسي صليتِن إتنين ولا تلاتي ..
ــــــــــــــــــــــــــــ
وتعظيم سلام الأخ عبد العظيم ولك ولكل الإخوة القراء البيمروا من هنا كميات مودتي...
أبو الحســـــــــين...
| |
 
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: فدوى الشريف)
|
Quote: شنو يا ابو الحسين ولا اتوسطت ولا حاجه
خش واسطة خير يااخي
اختك مغروده في الاغنيه دي
خالص محبتي |
بتنا الغالية فدوى الشريف...
الواسطة موجودة... لكن طلبك دا إنتي من الأول كان تطلبيهو من د. ياسين.. أستاذنا/ حاتم هاشم دا أطلبي منه القصائد المكتوبة فقط... باقي عندو مكتبة شعرية ضخمة لشعراء بلادي...
أما المكتبة الصوتية متخصص فيها الدكتور/ ياسين... كدي حولي طلبك دا بدون واسطة لو بكرة ما نزلها ليك قولي أبو الحسين غشاني ...
كميات مودتي... وأبقي قريبة...
أبو الحســــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: Yasir Elsharif)
|
Quote: السادة أعمدة البوست أبو الحسين وياسيكو وخالد محجوب والجميع.. تحياتي وعاطر السلام
أتابع هذا البوست وما زلت في الصفحة الأولى، أرجع إليه عندما يسمح الوقت.. شكرا لكم لهذا الإمتاع والتوثيق لأدب الشايقية الغنائي والشعري وعيون الحكمة التي تظهر فيه.. ليت الإهتمام بالقبيلة دائما يكون هكذا..
ياسر
|
د. ياسر...
نهارك سعيد يا اخوي...
ويا أخي الكريم دي شهادة منك نعتز بيها جدا ونعدك والإخوة القراء الكرام... بالمواصلة على نفس النهج والمنوال... حتى ننشر تُراث وإرث هذه القبيلة والمنطقة بأكملها على أكبر عدد ممكن من سكان العالم والمهتمين بهذه الدراسات...
لك قواسيب مودتي... وإقامة طيبة ومتاوقة أطيب لحوش الشايقية...
أبو الحســـــــين...
| |
|
|
|
|
|
|
|
|
 Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: بتنا الغالية فدوى الشريف...
الواسطة موجودة... لكن طلبك دا إنتي من الأول كان تطلبيهو من د. ياسين.. أستاذنا/ حاتم هاشم دا أطلبي منه القصائد المكتوبة فقط... باقي عندو مكتبة شعرية ضخمة لشعراء بلادي...
أما المكتبة الصوتية متخصص فيها الدكتور/ ياسين... كدي حولي طلبك دا بدون واسطة لو بكرة ما نزلها ليك قولي أبو الحسين غشاني ...
كميات مودتي... وأبقي قريبة...
أبو الحســــــــين... |
ماقصرت معاي كلو كلو الغالي ابو الحسين
وبناءا علي توصيتك انا بوجه الطلب للدكتور ياسين
دكتور ياسين طلب خااااااص اغنية معزور وياريت تنزل من النوع البيتنسخ عشان اقدر انسخها وزي ماقلت لابو الحسين مغروده فيها بالحيل
واكون شاااااااااااااكره من هنا لي الشايقيه
معزتي وتقديري
فدوى
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: yasiko)
|
Quote: وربما تساعد الأستاذة ملكة سبأ في ايراد ما تريدين
لك الود
والآن اهديك وكل القراء وأعمدة البوست
كلمات الأستاذ ايوب محمد الحاج "مقاشي" آملاً التمعن في البلاغة
الواردة بالقصيدة والكيفية التي كرر فيها استخدام" حسن التعليل" في
اكثر من بيت لتعليل اوضاع هي عادية عند الناس
الدكتور ياسر الشريف
سلام
متابع كل حرف كتب هناك وان شاء الله تكون استمتع بالشريط
يا أخوانا وين الأستاذ موسى الحسين لعلو بخير
· · · أبحث |
والله صرحاه دكتور ياسين مالقيت كلام اقدر اشكرك بيهو
فقط يعجز لساني امامك حائرا
ويذهب في صمت وتنحي
عاجزا عن الشكر
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
عفوا
الفاتح إبراهيم بشير...
انا قلبى عشان ينساك دايرلو تانى زمن
عفوا حبيب قلبى ما انت لى وطن
***********
انا قلبى ذنبه شنو عودته انت عليك
علمته يبكى ينوح يوم ما يشوف عينيك
وكتين ملكته خلاص فريتها لجنحيك
خاطبته باستبداد قلت ليه اختار ليك
**********
هو الصبار المسكين راجى اليالى تروق
لا كل لا مل لا عاتب المعشوق
كل القدر قاله ياناس كتلنى الشوق
والضقته فى دنياى ما ضاقه قط مخلوق
********
انا يا خلائق اه ضقت العذاب اصناف
شلت الليالى سقد تشهد تبارك وقاف
جربت صبر ايوب كانت نهايته جفاف
والصابنى يالمريود بالعين محال ينشاف
*************
لو دار تعرف البى ارجوك مرة تعال
اقعد وعاين بس ما تسال اى سؤال
انا يا حليلى انا اصبح يمنى شمال
جوايا عشرة اشياء خلت حياتى محال
حظى التعيس الشوم الغيرة والعزال
ليل الضياع والخوف والحيرة والاهمال
انك تملى معاى و بيناتنا كم اميال
احساسى انى بسيط واحلامى واقفه جبال
صبر اً صبرتو عليك ذكرنى سيدنا بلال
حتى ان سكت انا تتكلم الاطلال
وآخر المطاف بالليل سافرت باستعجال
لا طلت بلح الشام ولا ضقت راحة البال
*******
برضك تقول لى اصبر اتحمل المكتوب
واتعوض الله خلاص انسانى يالمحبوب
خلتنى ذى عصفور هبت عليه هبوب
فنتله عشه شمال شالت صغاره جنوب
ــــــــــــــــــــــــــــــــ
يا اخواننا الأُستاذ/ خالد المنسي مسجل غياب ليهو يومييييييييين وأيضا أبو هاشم... عساهم بخير...
أشواق وكميات مودة ليهم وللجميع...
أبو الحســـــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
إخوتي الكرام...
صبحكم الله بالخير والرضا...
في ذكرى شهر مولده ربيع الخير والبركة... أهديكم اللوح السابع من مولد السادة الميرغنية... فيه يجسد يوم المولد في أبهى معانيه...
الفصل السابع :
وأما الذي جرى ليلة مولده صلى الله عليه وسلم من العجائب العجيبية ☼ فأمور دالة على عظيم مكانته من الحق والمكان ☼ كالارتجاج الواقع في إيوان كسرى ذي البناءات القوية ☼ المعروف بأَنُوشَرْوَانْ ☼ فذلك إذا تأمّلْتَه وكنت ذا نظرٍ وبصيرة بصيريّة ☼ ترى فيه أعظمَ البشائر بانهدام دعوة البُطلان ☼ وغيض البحيرة المعروفة بناحية الفرس بطبريّة ☼ فيه من الآيات الساطعة بالحق والبرهان ☼ وأَعجبُ من ذلك كله إذا دققت خمود النار الفارسية ☼ فيا عجبا ممن يسمع مثل هذا ويكذب فليس أقوى منه خُسران ☼ وكان لها على الصحيح ألف عامٍ لم تخمد لعبادتهم أوقدها الجاهلية ☼ وقد خمدت لظهوره صلى الله عليه وسلم تلك النيران ☼ وأصبحت الأصنام منَكّسَةٌ على رءوسها لبُدُوِّ الملة الحنيفية ☼ وبطلان عبادتها وعم ذلك في جميع المشرقان ☼ ثم أخذته الملائكة فطافت به جميعَ الأرضيّة ☼ وعمت بركتُه العظمى على أصناف الوديان ☼ وقيل دارت به في العوالم العُلوية لتنال ما نالته الارضون من الفُخْران ☼ وزُيِّنت السماء ليلة مولده وفَرَحت الخلائق الملكيّة ☼ فكيف لا ومن نوره خلقها الرحمن ☼ وعمت الأرض الزينة من غير شكٍ يا معشر الأمة التخصيصية ☼ ويحق لها إن كنت ذا فهم أن تزان ☼ وهو لما عمّ فيها من خيراتٍ تشرفت بها على جميع العوالم الأخروية ☼ فيالها من مفاخر ولا سيما للموضعان ☼ وذلك حيث ولد ونشأ وبدأه الوحي في الأرض المكية ☼ وحيث دفن فياليتني كنت تلك الأرض التي زادت الفَخْران ☼
ـــــــــــــــــــــــــــــــــ
اللهم صل وسلم على الذات المحمدية
واغفر لنا ما يكون وما قد كان
وكل عام وأعضاء الأون لاين وحوش الشايقية وزوارنا الكرام.. وكل الأُمة الإسلامية بألف خير وعافية...
وصلى اللهم وبارك على سيدنا محمد... وعلى آله وصحبه وسلم...
أبو الحســــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
إخوتي الكرام...
صبحكم الله بالخير والرضا...
شعراء الشايقية كتبو وأبدعوا في كل مجال وكل مناسبة...
كتبوا في مدح المصطفى صلى الله عليه وآله وسلم وكتبو للحنين للوطن وكتبوا في الحُب وكتبوا في المناسبات الخاصة كالفراق والرحيل والإبتعاد عن هذه الديار إلى دار الخلود... وها هو شاعرنا أحمد العوض (عيدابي) يكتب رسالة إلى أُمه أهديها لكل الإخوة الكرام بمناسبة عيد الأُم...
( رسالة إلى أمي )
***************************
وصتّك ليّ جات يا يمه.. وأحرف شوقك المنساب
ظنك زين وظني الدايرو..شايفو الليلي زي الخاب
*******
من ما فته منك يمه ..لا دي اللحظة شوق وعذاب
الشقا والضياع في الغربة..خاتراً ليّ تب ما طاب
*******
ظلام الليل مخيف في الغربة.. لا طنبور ولا أصحاب
لا أخو يستر المكشوفة..لا جاراً بشوش ِمطِياب
******
والشغل إنعدم يا يمه..اللقه شوفتي ليهو رهاب
الأمل القبيل كت عايشو..ليقتو بعد وصولي سراب
******
عمرك شفتي مويتاً صابي.. لا براق ولا سحاب
ديله دموعنا فطن الغربة..لكين الدمع شن جاب
******
الحزن إنتشر بيناتنا.. الفرح إندسر تب غاب
كيف نتهنى عاد يا يمه..كيف نرتاح ونحنا أغراب
******
والزمن العنيد زي عادتو.. للنوح والأنين جلاب
شن طعم القروش يا يمه..زول لا إلفه لا أحباب
******
راحت البال عدم يا يمه.. بي الّلقه ما أظن تنجاب
الشوق في بلاد الغربة .. زي جمراً مولقد هاب
******
وكيتاً لينا بيها رضينا.. نحنا الليها جينا قراب
يا ريت كل يوم يا يمه.. لو منك يجيني جواب
******
ده المقدور وقع يا يمه..ليهو أنا ما عملت حساب
واتوكرت كيف الشورة..الحل في دعاك إن صاب
******
صلواتك دغيشاً بدري .. لما يوشوش الهباب
بينك وبين رجاك في الله.. أوعك ما تتاقي الباب
******
دعواتك تفج الغمة .. تدحر عني كل صعاب
صلواتك تحل الكربة .. لي تيه الخلاص ديداب
******
بلغي للسلام لي أهلنا .. جميع جيرانا شيب وشباب
الكدنقاب واللزارقة أخوانا. .وناس ود بادي والعوضاب
******
السكوتاب والعكاشاب جملة..وناس ود شامي والناصراب
والتيجاني ليهو سلامي.. هو صِح ود العقاب للغاب
******
وأحمد بابكر لا تنسي .. عند الحارة مو هواب
كل أحبابي ليهم شوقي .. للبرضع صغير يا داب
******
تشتكي بلعليّ عيوني.. واشرب من دموعي شراب
متين أرجع وأجيكم تاني وأشدو بلحن زي زرياب
كميات مودتي... وتعظيم سلام أُستاذنا/ أحمد العوض (عيدابي)...
وأسأل الله أن يحفظ أمهاتنا ويرحم كل من سبقتنا إلى دارا لخلود...
أبو الحســـــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
أحبابي الكرام...
مساكم الله بالخير والرضا...
وفي وداع الأُم كتب أُستاذنا/ عمر عثمان (الزومة)...
الله يرحمــك يـا أمــي
كـان يجــدي يا عـينـي البكـا .. ابكـن عيونـي وانزفــن
فكـّيهــو مخــزون الدمـوع خـليـهــا يـجـْرن ويـزرفـــن
صُـبـُّن مــن الصبــح البــِديـر طــول النهـار لا تـوْقـفـن
وواصليها مـن غـيـبة الشمس لامـن خلاص الليل يجـن
لايـهمكـن وجـع الجـفــون او ســيـلك الحـــار جـرّحــن
لايـهمكــن بـلل الرمــوش وشــفتيـهـا مــاش يـتحتحتـن
لو حتـى شـوفي صِبـح طشاش وعيـوني فـقـدن نظرتـن
وكان يجـدي يا صوتي النـواح إيه يعني جوّاي تـنسجـن
صَـيّـح وكـتـّر فـي الصيــاح .. قــلـّب قـوافـيــك نـوّعـِـن
ليـلك .. نهـارك .. والصبـاح .. طـفـلاً صِـغـيّـر مِتـمكـن
،،،،،،،، لا يـهمـك إتـلمّـــو الخـلــــوق ،،،،،،،،
،،،،،،،، أو حتي حلقـي صِبح شـقــوق ،،،،،،،،
لاتـهـــدأ أبـــداً لاتـــروق ... ذوِّب حـبـــالك وقـطـّعــــن
الله .. هو كان يجـدي البكا .الله هي كان تجـدي الدمـوع
الله .. هو كان يجـدي النـواح ويرجّــع المــابي الرجوع
كان (يمّــه) عــودنا الحـلوق لحظــة زمــن ما يـسْكـتـن
كان (يـمــه) عـوّدنا العيـــون ليـلـن ونهــارن يـَسـكبـن
لكـنـّـو لا بـكــا لادمــوع .. لاغـيــرو لـيـكـي يــرجّـعــن
والمــات خـلاص يا يـمــه راح
الليــل محــال يـصـبـح صـبـاح
والمـوت قــدر ويـاهــو المصـيــر
مكـتـوب عـلـي الجــنـا والكـبـيــر
مـقـســوم عـلـي الغـنـي والفـقــيـر
وايــامـنــا مهــمــا طـــوّلــن بـاكــر مصـيــرن يـكمـلـن
لكـن نـفـوسـنـا الباكيــة ميـن يهـدي ويـسكـّت لـوعـتـن
وكيـف القـلـوب تـلقـى الثـبـات حُــزنـاً ملاهــا وخفــّفـن
غالبني أوصف حزني كيف .. كلماتي عاجزات ينطـقـن
نـاراً تـحـرّق في الضـلوع آهـات في جُـوايْ يـصـرخـن
حُــزناً عميــق عـــمّ الديـــار
فـقــدك كتيــر يا يـمــه حــار
ونـحـن الكبـار .. شــايـفيـن نـفــسْـنـا بـلاك صغــار
يا دوب عصافيـر في العشيش راجات في عـزك يكبـرن
يا دوبـا ما عِـرْفـت تطيـر .. ميـن غـيـرك إنـتـي يدربـن
في صـدرك الدافي الحـنـون منـسـوجة عِـشـّـة مسكنـن
لا عـرفـن الحـر والهجـيــر جنحـيـكـي فـوقــن ضلـّـتـن
شــقيانـة فـي حــر النـهـار .. تعبانـة فـي دوب راحـتــن
سـلـواكـي بـاكــر يـكبــروا ويـقــْوِن يـواجـهـن دنـيـتــن
ومـن غـيـر مواعـيــد أو وداع قــدرك غـشاكي ويتـّمـن
سـبـتـيهـا للهــم والضـيـاع يـنـصـارخــن فـي عـشـّهــن
لِـسّـع هـي مـا عِــرفـت تـطيـر .. دابــن بــدن يـتـعـوّدن
والدنيـا مـاب تـرحـم صغـيـر صعبـات دروبا ومسـْلكـن
يا ربـي يقـدرو يصبرو .. ينسـن .. يـقـاومـن ويصمـدن
واللهْ المصيـر ياهـو المصيـر ماشـات علي درب أمهـن
الدنـيــا قــاســي بـلاكــي يــا ســت الحـبايـب وملـْكـتـن
وا حــســرة البـيـت الحـزيــن أركانــو كـلهــا يـنخـَجــن
في كـُـلْ شـِبر حرَكـة خطاك سـامعنهـن يـمشـن ويـجـن
فـي الصالـة والحـوش والتــُّكـُل صوتـك يجينـا ونتغـبـن
نلقاكـي جـمب البيـر هناك .. أيديكي في الدلـو يـنـْـشلـن
ومـن تـانـي في حـوش الغـنم سـاعـت مواعيـد حلـْبهـن
صورتــك معـانــا بلا انقطاع .. صوراً كتـار يـتـنوعـن
طـيـفــك يــزاول للعـيــون لهـفــانــة لـيـهــو يـتــاوِقــِن
وايـديـن تـشابـي علي الخـيـال .. لكـن خـيالك يخدعــن
ونـنـسـاكـي كيـف يـا يـمـه عــاد
جـرحــك كـبـيـر قــَسـَم الفــــؤاد
يا سـِر وجـودي في هـا الحيـاة .. وايامـي تبدا مسيرتـن
وانـساهـا كيف أجمل سـنيـن نسجـت في جـواي ذكرتـن
من دوبي مشيول في البطن .. وفوقـي الشهـور يتعاقبـن
وولدونـي فـي اليـوم السـعـيـد
وفـرحـانـة بـيّ فــرح شــديـد
وبـديـتـي فـي رحلـة عـذاب .. أيـام طفـولـتي شـقـاوتــن
كـم ليـل سهـرتـي معـايا كـم .. بي طولو ما ناملك جِـفن
شـفقانـة ديمة ملانة خـوف لو جسمي صلصل أو سِخـن
راواني بالحـب والحنان .. حاضناني في أرحـب حِضـن
وتـتـقـلـب الأيـــام تـمـــر
يا ما شـقيتي وضُقتي مُـر
علـّمتي ربيتي وصبرتي وكـُتي ام كل الفضايل جمعتـن
يـا امـي يـا أجـمــل إســـم نـغـمــاً حـنيـن جُــوايْ يــرن
مسـتودع أســراري الكبيـر .. هـدّاي مشاكلـي وحلــّهـن
سـاعة الفرح يوم ليـكي أعـود وامسـك إديـكي واقـبّـلـن
ويــوم الدمـوع ووجــع القـلـب يـومـي اللفـارق أودّعـن
كـان العــشـــم يــا يـمـــه أيــامـــك يـطـــوّل عـُمْـرهــن
والدنـيــا تـغـفـــل مـنـنــا .. واقــدر جـمـايـلك اردهــــن
لـكـنــّو يـمــه المـوت قــدر .. دايـمــاً يـجـيــنـا بـلا إذن
خـصـّـاكـي مـن بـيـنــّا وعــزل أحـلامـنـا شـتـتـا بــددن
خــلانــا فـــوق الصـبــر يـومــاتــي نـقـــرا ونـمـتـحــن
وان شـاء الله ننجح يـمـه عـاد ونـقـدر نفـوسنا نصبـّرن
مـوتـك فـجـع حـرَق النـفـوس .. فـتــّت قلـوبنا وقطـّعـن
مـوتـك تـركنـا بـلا دليــل خـطواتـنـا تـأيـهات يـدْقــشـن
فـتــَح شـبـابـيـك الهمـوم وميـن غـيـرك إنـتـي يـسدّهــن
أبكيـكـي يــا أم الجميــع وليـكـي الدمــوع انــا بــوهـبـن
أبكـي المحاسن الودعـت .. ووين تاني في زول يـتـلقـن
يـالطـيـْبة .. يـا أم قـلبـاً كبـيـر مليــان محـبـة وكلـو حِـن
ميـن ما بكاكي ومجّـدك .. ميـن ما انكسـر قلبـو وحِـزن
جـاراتـك المحــزونـة جــات بـكـَنْ المـأصّـلـة جــارتـن
بالعُـشـرة والطبـع السمــح .. بـالخــوّة ليـكي بـيـشهـدن
نـاس البلـد بـي جمْعهـن .. طِفِلـُن .. شـبابـن .. والمُسـن
يـتـبــاكـو نـعـشــك شـيّـعــو ..ليـهـو اللديــن يـتخـاتـفـن
جمعـاً غفير طب ما حصل صلى وحِضِر سـاعـة الدفـن
يـا أمـي يـا بـيـت الكــرم .. وايـديــكي فـيهـو بـيكـْرمـن
يـالديـمـة عـامـر بـالضيــوف نـيـرانـو يـومـي يـولــّعـن
الغـاشـي والجـايـبـو الدرب حـاجاتـو في الحال ينقضـن
حـتـى الطـويـرات الصغــار .. عِـرْفـن عليكـي يولـّـفـن
يـا أمـي يـا حـُـلـْـوَ الكـلام والحـكمـة والعـقــل الفــَطِــن
شـاكري الله ذاكراهـو ودوام بـي حمْـدو شـفتيك يلهجـن
مـا ظنـّي يـمـه أقـدر واقـول واحَـسِـب فضـايلك أعـدّدن
ليـكـي الوداع يـا أمـّـنـا .. ودعـواتـنـا لـيـكـي بـنـرفعــن
وان شـاء الله في قبـرًا فسيـح منــّو العطـور يـتـفـاوحـن
ويـديـكـي الله ويـكـْـرِمِـك .. يـمسـح ذنـوبـك ويـغـفـــرن
ودربـك عـلـي جـنـة عــدن .. أبــوابـا لـيــك يـتـفـتــّحِـن
تــَرْديـهـا يـمـه وتـدـْخـُلي .. وليـكـي الحـواري يونـّسـن
يــا ربــي تــرحــم أمـُـنــا ودعــواتــنـا مـنـنـا تــقــبـلــن
ويـا رب رضـاهـا وعـفـْـوَها يـبقالـنا فـي الميـزان وزن
ـــــــــــــــــــــــــــــــــــــــــ
نسأل الله يغفر لها ويرحمها صديقي عمر وأن يجمعنا وإياها في حضرة النبي صلى الله عليه وسلم في جنات الفردوس...
أبو الحســــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
الحبان كيف حالكم وعلكم طيبة
نأسف للغيبة والطلة علي داركم العامرة والله مشغوليات ... وبجي متأخر وفوق دا لما أخل علي النت ما ألقا لي وكت بعد ما امر علي بوست بكر ابوبكر الذي نزله لدكتور بركات الذي اهان نمر اهانة شديدة بالحيل ... نرجو المعذرة
يا ابوالحسين
Quote: كل ما أشوف الشايقية وغناء الشايقية
اتذكر الطنبور الحنيييين
تحياتي لك أبو الحسين ين اسعل منك الخير يا الضو ركازة القبيلة |
يا ابوالحسين الأخت سلمى صبحي .. دي بنت شندي لحم ودم بنت الاستاذ الدكتور الراحل حسن عباس صبحي يرحمه الله عجبتني بالحيل دخلتها علي أهلنا الشايقية
ابوالحسين حمد الله على سلامة الحنينة ست البنات وبركة الجمعت عافية وماعندها عوجي
خالد محجوب
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
Quote: يا ابوالحسين الأخت سلمى صبحي .. دي بنت شندي لحم ودم بنت الاستاذ الدكتور الراحل حسن عباس صبحي يرحمه الله عجبتني بالحيل دخلتها علي أهلنا الشايقية
|
حبيبنا ود المنسي... شكراً على التوضيحات بشأن المرحوم الدكتور/ حسن صبحي... نسأل الله يغفر له ويرحمه بقدر ما قدم للعلم والتعليم...
ثانياً.. حمداً على سلامة عودتك... ويا هلا بكل ضيوفنا وأحبابنا اللي يجونا في الحوش... يشرفوا بالحيييييييييل....
ويا هلا تاني وتالت بالأُستاذة/ سلمى...
وكميات مودتي...
أبو الحســـــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
| Quote: يا ابوالحسين الأخت سلمى صبحي .. دي بنت شندي لحم ودم بنت الاستاذ الدكتور الراحل حسن عباس صبحي يرحمه الله عجبتني بالحيل دخلتها علي أهلنا الشايقية |
الأستاذ خالد
سلام
مرحب بالطلة
الأستاذة سلمى لابد من الوقوف لها اجلالاً فهي بنت من علمني اشياء في كلية الآداب وكم حكى واسمعنا أشعار وضحوية وغيرها من الأشعار الجميلة والأدب الراقي(الشم خوخت بردن ليالي الحرة .... إلخ)، لقد كاد والدها ان يكون رسولا
له الرحمة ولها كل الاحترام
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
قبلة غُناي...
الفاتح إبراهيم بشير...
احترت كيفن اوصفك .. والله يا قبلة غناي
لو كان بحور الكون مداد بتجف قبل ما تنصفك
حاولت اكتب ليك واقول * واوصف ملامحك بالشعر
لكن حروفي تذوب عديل * قدام عيونك تنصهر
يا عايشة في دمي وغناي * يا ديدن الروح والفكر
خلدت اسمك بي حروف * قطرات دماي كانت حبر
يا غنوة في وتري الحزين * يا ضحكة في الزمن الصعب
يا واحة في عز الهجير * يا راحة من بعد التعب
يا نسمة هبت في الدغيش * عزفت علي وتر العصب
يا رحمة من رب العباد * مكبوبة فوق خلق الله كب
سافرت في عينيك سنين * زادي المعاي ابيات غنا
مكتوبة بي دمي الصبح * شلال من الهم والعنا
صورت احساسي الدفين * بي قافية ليك معنونة
بتقول بلا كلفة ورتوش * يا انتي يا الموت والفنا
احترت في وصفك انا * وحارت معاي كل الحروف
مرات بشوفك يا مناي * ياقوتة في قلبي الولوف
مرات بشوفك ضي امل * دبج خطاي رغم الظروف
مرات بشوفك جارية نيل * امواجو عانقت الجروف
ـــــــــــــــــــــــــــــــــــ
وما زلت أتساءل عن الخليفة أبو هاشم... ويييييييين ود أختك يا خالد المنسي... ليهو زمن غائب عساهو بخير وعافية...
كميات مودتي...
أبو الحســـــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
بسم الله الرحمن الرحيم
سلام ياهلنا...
Quote: وما زلت أتساءل عن الخليفة أبو هاشم... ويييييييين ود أختك يا خالد المنسي... ليهو زمن غائب عساهو بخير وعافية...
كميات مودتي...
أبو الحســـــــين... |
الغالي ابؤالحسين
تسال منك البركه والصحه والعافيه
عارف جري الدنيا دي كيف ياخوي...
اسعد لحظه واجمل ساعه
......................
أسعد لحظة وأجمل ساعة بين عاشقين
لما النظرة تلاقى النظرة
ولما العين تقع فى العين
يبقى يعيشو عوالم تانى
ويبى كلام الريده مباح
يصفى زمان اسمارن يحلو
تسمى ليالى وتبرا جراح
إلا الدنيا ياها الدنيا
زى الطير بيوالف الهجرة
ويفرد لى بلداتو جناح
بعد ما عاش فى أوكارو
أيام وشتت هم الفرقة وزاح
إلا الدنيا ياها الدنيا
زى الليل فار توب الستره
الفيهو خلايق الله ترتاح
ومهما طال هودبك مره
ونجموا يغيب ويطردو صباح
تبقي الذكرى ياها الذكرى
تحصد زرع المسره الواهى
لا محصول لا حتى أرباح
وتبقي تعيش فى شواطئ
أحزانك وكل أيامك تبقي نواح.
............................
تحياتي...
حاتم هاشم.
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
الحبيِّب الخليفة أبو هاشم...
حمداً لله على السلامة... ومنور الحوش يا اخوي...
إخوتي الكرام...
هذه دعوة للتعريف بمناطق الشايقية... الفكرة من منتديات البركل وسأقوم بنقل بعض التعريفات هناك إلى هنا لتعم الفائدة... ونعرف تلك المناطق عن قرب... وسأبداها لكم عن منطقتي المقل...
المقل:
تقع في الضفة الشرقية للنيل بين قريتي البخيت والحجير (وبالمناسبة دي قرية الحجير دي إمتداد للمقل وكانت كللللللها واحدة إسمها المقل وشيخها واحد وهو عبد الرحيم ود عبده كاشف ربنا يغفر له ويرحمه)... وتشتهر هذه القرية بكبر مساحتها من حيث الإمتداد على النيل،، وسوقها القديم الذي كان مضرباً للمثل في السابق حيث كان يفوق لكل الأسواق هناك وكانت به المحكمة والإدارة الأهلية (عمودية السورجاب ـ الله يرحمهم ويدي الصحة والعافية من بقي منهم).. ومن مشاهيرها الشاعرة بت نعمي وإبنها الأديب الباحث محجوب كرار رحمها الله والشاعر محمد أحمد الراوي (وإنشاء الله سوف نبحث في موضع قادم أشعارهما) والفنانين محمد جبارة ومعاوية المقل وجعفر المتوكل. ومن المداح فيها أولاد سوركتِّي وأولاد ود ابكروق وحاج أحمد أبو شوك وغيرهم...
أما أهم المناطق في قرية المقـــــــل من ناحية البخيت نجد:
(1) (الحليلي) وأهم سكانها ناس ود محمود ومنهم الأُستاذ المربي خليفة علي محمود وناس ود العِبيد وجزء من ناس ود شبو والسنجك سيد الإسم وأولاد التوم وناس حُمَّد بخيت وناس ود الأرباب وعوض أبشيشة...
(2)(الطَرَفْ)... أو طرف ود شيخنا وأهم سكان الطرف ناس ود شبو وود يِمامة وناس ود شيخنا ود الزاكي وآل إبراهيم شيخنا وآل عبد الرازق وآل حُمَّد دين وآل ودجني وآل ساقة فضل الله ومنهم الأُستاذ المربي وقيع الله الخضر عبد الله ومنها شيخ المقل (محمد صالح ود جنِّي اللهم يرحمه) ومنها أولاد عبد الحي وأبنعوف وأولاد ود بابا ومنهم الأُستاذ المربي عمر عبد الله بابا... وآل سليمان ومنهم الأُستاذ المربي علي سليمان...
(3) حلة العطيَّاب... ومن سكانها آل عطية ومنهم زميلنا في منبر البركل الباشمهندس (حميد) وإشتهر آل العطياب بإمتلاكهم اللواري (منذ عهد بعييييييييد) وهم إلى عهد قريييييييييب كانو وسيلة النقل الوحيييييدة في المنطقة منننننننننننن المقل ليييييييييييي الأراك بجانب إشتهارهم بتجارة التمُر...
وأيضاً آل الرضي... وآل الرضي ديل أُسرة مشهورة ولهم جذور ضاربة في كورتي والأراك وإشتهروا بالتجارة وهم من رجال الإدارة الأهلية بالمنطقة وهذا من علاقة النسب التي تربطهم بالعُمد ناس ود سورج... ومنهم خليفة الختمية بالأُبيض عبد الوهاب الرضي (اللهم أرضى عنه وأرحمه ياااااااارب)... والرضي محمد الرضي الرجل البارز بمنطقة المقل... ومحجوب الرضي من الغيورين على تطوير المنطقة أمد الله في أيامه ومتعه بالصحة والعافية... ولهم فروع في منطقة الأراك وأمدرمان أبو روف...
ونجد آل ود البشير وهؤلاء مشهورون بزراعة النخيل والدراية التامة بهذه المهنة وأيضاً كانوا في السابق من المداح الماهرين في تلك المنطقة...
ونجد آل النقادي ومنهم الإداري الناجح في منطقة المقل الأخ عثمان النقادي أمد الله في أيامه وهو يعتبر من القياديين البارزين والغيورين على تطوير منطقة المقل... ومنها زميلنا في منبر البركل (صلاح النقادي)...
ــــــــــــــــــــــ وإلى أن ألقاكم لإكمال تعريف منطقة المقل...
أترككم في رعاية الله وحفظه...
كميات مودتي...
أبو الحســــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: حاتم هاشم)
|
الأخوة الأفاضل الشكر مقدم للدكتور ياسين جراب ( البوست العامر ) وعامر به.. أعجبتني جداً المقدمة المرتجلة التي ألقاها الفحل ود بادي مستهل بها .. ومقدم تعريف من هو ود الشايقي وماذا دار بينهم فكان مولد قصيدته الحلمنتيشية لذا وودت أن أبدأ بها
قال الفحل
القصيدة من الشعر الحلمنتيشي ... وهو عموماً من شعر المدن المفكفك .. اي لا يقوم على أعمدة قوية .. لكن نجد أن مدرسة الشعر الحلمنتيشي كانت لها أهدافها وطرقها الخاصة في معالجة الأمور الاجتماعية وهي أقرب للمتلقي ... ولكنه أُفسد عندما دخل في السياسة ...
كانا ايامها بالجامعة وقمنا بحملة بعنوان تنظيم الأسرة ......
نزلنا على دار شيخنا ود الشايقي وهو رجل علم ومتزوج أربعة نساء، وهي مسألة في هذا الزمن لها توابعها ولها ما بعدها وقليلون هم اللذين يتجرءون عليها ... وقليلون هم اللذين يخوضون بحارها.
شيخنا ودالشايقي متزوج بأربعة وعندما عرضنا عليه مسألة تنظيم الأسرة قال : هذه تشكك في التوكل على الله وتشكك في أن الله هو الرازق .. وقالها بالحرف الواحد ( الله ماشقا لو حنكاً ضيعّو ) وقال والله حبيباتكم الشايلنها دي لو نسواني بلعن منها أردب ... بلدن وبلدن اتنين اتنين.
فكان تحدي منه ... فدخلنا عليه من باب الهجاء وهو شاعر أيضاً .. وقد رد على هذه القصيدة وكان رده مقزعاً وليس مما يقال في الجلسات العامة ... ولكن ... ايضاً هذه القصيدة لاتخلو من بعض الاشارات .. لا أقول الخبيثة ولكنها إشارات غميصة
فأنا أخاطب نسوانه أولاُ وه له 30 طفل وكاد يأتي بالزوجة الخامسة لولا وقفت الشريعة بينه وبين مايشتهي ...
تغمص الفحل ودبادي شخص ودالشايقي ( في مخاطبة نسوان ودالشايقي ) فقال بلسان الزوج المغلوب على حاله ...
إجيك الحول وحول بي زول
والزول غول
ونحن تعابة نحن غلابة
لا نقداً ولا محصول
ها ياقشاره مامعقول
يافقاسه مامعقول
عليك عزينك المبهول
تضربي الجملة بالميت
قداحت فول
وعيشة تقول
ضنيب أم سيسي عرضي وطول
وجاز اللمبة في غلبه
حق الفطرة للطلبة
ركوب التكسي بي القلبه
حليل المنقا والعنبه
ولولا الروح بقت سلبه
نمص الصلصه من عِلبه
وكانت جانتنا في الرقبه
فكان ود الشايقي يقدم ليقضي وطره ويمتع نفسه وتبقى الندامة لامن تجي ايام الوحم ( أُخ وتًف أُخ وتُف ) اكشر من يومها اشيل هم السماية...عاد شن إسوو اربعة نسوان... قطع شك في كل ستة أشهر عندو وليد ولا بنية.. سأل صديق لي واحد من كبارهم وقال لي يا عم فلان ليه انتو زمان كنتو ولادين وشفعكم كُتار .. قال لي يا ولدي نحن عشنا في زمناً بعد مانرجع من تحت ( اي من الزراعة ) بنعشى ونسوي العشا حق الله وبعد داك لاكهربة ولا تلفزيون أها شن نسو ياهو برنامجنا
قد كان حال شيخنا ود الشايقي من باقي حال الناس المستورين لكن الشيخ زاد الطين بله بي كترت البطان ... عاد كيفن 30 طفل كان قلنا بس وجبة غداء ... الغداء (H2o) يعني تشّه ما فهمتو برضو يعني سخينة ... بصل وزيت وموية وبهارات ويفت الرغيف .. قطع شك ودالشايقي كان عايش علي السينات الميتة وهي سخينة وسليقة وسلج وسبروق وما شاف السينات القوية ناس سجك وسمك .. فكان مشهاده والشي الميقنو إيمانو في الله هو الرازق ولذ كان بفكر في الزوجة الخامسة
نواصل بإذن الله
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
Quote: قد كان حال شيخنا ود الشايقي من باقي حال الناس المستورين لكن الشيخ زاد الطين بله بي كترت البطان ... عاد كيفن 30 طفل كان قلنا بس وجبة غداء ... الغداء (H2o) يعني تشّه ما فهمتو برضو يعني سخينة ... بصل وزيت وموية وبهارات ويفت الرغيف .. قطع شك ودالشايقي كان عايش علي السينات الميتة وهي سخينة وسليقة وسلج وسبروق وما شاف السينات القوية ناس سجك وسمك .. فكان مشهاده والشي الميقنو إيمانو في الله هو الرازق ولذ كان بفكر في الزوجة الخامسة
نواصل بإذن الله
|
يعلم الله إني متكيف الإرتواء... ومتابع ومنتظر وراجي...
يسلم يَراعك ونضمك يا أبو أحمد...
كميات مودتي...
أبو الحســـــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: yasiko)
|
بسم الله الرحمن الرحيم
سلام ياهلنا...
ارحل ياحمام
..............
ارحل يا حمام شيل
اشواقي وارجوك لا تغيب
وصل كل مشاعري وريدي
لي دار الحبيب
ارحل يا حمام قول
ليهو اصبر يا جميل
لو مالت على الدنيا
عنك ما بميل
كيف انسى البلد
والخدرة والنيل والنخيل
والوجه السحرني
جمالو والطرف الكحيل
مشتاق لي نجيمة تضوي
لي قلبي الطريق
وللبسمة التفيض حنية
من ثغرو الرقيق
تهت انا في ديار
الغربة لا زاد لا رفيق
وما كان يا زمان
ترميني بي ما لا اطيق
ما فارقني طيفك
لحظة في ليلي البهيم
وياما الشوق برجع
سيدو لي دارو القديم
لا بد الزمان يجمعنا
والحال يستقيم
وانسى ايام شقاي
والقاك وارتع في النعيم.
..........................
تحياتي...
حاتم هاشم.
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
إخوتي الكرام رواد حوش الشايقية...
صبحكم الله بالخير والرضا...
أسمحوا لي أحبتي أن أضيف إلى قامات منطقتنا الغالية...
البروفيسور فاروق الطيب البشير، البروفيسور/ عبد الهادي تميم، البروفيسور/ محمد صالح محي الدين، البروفيسور/ محمد عثمان صالح، البروفيسور/ علي أحمد بابكر البروفيسور/ الشيخ محجوب جعفر، البروفيسور/ الزين كرار، البروفيسور/ حسين محمد أحمد، البروفيسور/ أنس عبد الحفيظ، الدكتور/ عوض الجاز، الدكتور/ توفيق الطيب البشير، الدكتور/ عبد المطلب الفحل، الدكتور/ حسن أحمد طه والدكتور/ ياسين محمد ياسين المحامي وآخرين لم يسعني المقام لذكر أسمائهم فهم كُثُر...
أسمحوا لي وشاركوني فرحتي بمقالي الآتي...
فرحة آل بــلال
إنه لمن دواعي سروري وفرحي أن أُهنئ نفسي وعموم أهلي البلالاب من حزيمة الأصل إلى الخرطوم إلى مكة المكرمة إلى الرياض إلى عاصمة الضباب لندن... بنيل إبن عمي معلِّم الأجيال الدكتور/ إبراهيم علي بلال درجة الدكتوراة بإمتياز في (القضية الفلسطينية في الشعر العربي الحديث) من جامعة أُمدرمان الإسلامية...
وما يزيدني فخراً وإعزازاً إخوتي الكرام... هو أن الدكتور/ إبراهيم معلم من الطراز الأول حيث عمل بالتدريس بالمرحلتين المتوسطة والثانوية منذسنة1965م وصال وجال في معظم مناطق السودان إبتداءاً بورتسودان مروراً بـأتْبَرا وحلفا الجديدة والدويم والقطينة وقد أُنتُدب أيضاً في الجماهيرية الليبية لمدة (5) سنوات، فنهل طلاب تلك المناطق من علمه الغزير وتشبعوا على يديه من ضياءات لغتهم العربية الأُم وآدابها... إلى أن تقاعد في العام 1999م.
وما يبهرني إخوتي الكرام وكل من عايش حياة الدكتور/ إبراهيم بلال هو إصابته بالفشل الكلوي في أواخر التسعينات وأُجريت له عملية زراعة للكلى في مدينة المصطفى صلى الله عليه وسلم كُلِّلَت بحمد الله وتوفيقه بالنجاح...
وهو في غياهب هذه المرحلة من حياته كان يُعِد في الماجستير في (حياة شُعراء الكتيبة في السودان) فكانت المسافة التي فصلت فرحة شفائه ونيله لدرجة الماجستير قصيرة جداً... فاتحاً الباب على مصراعيه لأبنائه وتلاميذه قائلاً لهم أن الإصرار والعزيمة والأمل هي مفتاح لكل طريق ونبراس لكل معرفة وتسهيل لكل عسير... ثم لم تلِن عزيمته وهو يصارع هذا الداء الغريب شاقاً طريقه رغم الصِّعَاب ملتحقاً بإحدى معاهد الخرطوم لتدريس العربية لغير الناطقين بها مواصلاً لطريقه الذي بدأه في العام 1965 معلماً ومدرساً وهادياً مهدياً...
ثم واصل دراسته العُليا مُستعيناً بالله تعالى وعزيمته التي لا تعرف المستحيل... سائراً على درب الشهادة العُليا وقمة الهرم الأكاديمي (الدكتوراة) إلى أن نالها بحمد الله وتوفيقه وناقشها وأشرف عليها البروفيسور فاروق الطيب البشير...
نقف تحية وإجلال... وفخر وإعزاز... وتعظيم سلام للدكتور/ إبراهيم بلال وهو يقدم لنا نموذجاً رائعاً يُنير لنا طريق العِلم والمعرفة ونبراساً يهدينا إلى الطريق القويم...
تهانينا القلبية لزوجته الفاضلة الأُستاذة/ أُم الخير محمد التي كان لها دوراً فاعلاً في الوقوف بجانبه وفتح باب الأمل على مصراعيه وهو يُعاني آلامه مع الكُلي... وتهانينا لأبنائه الكرام الأُستاذ/ أيمن إبراهيم والأُستاذ/ إيهاب إبراهيم وبناته الفضليات وأخيه الصحفي الأديب الشاعر سيد أحمد علي بلال وكل أبنائه الذين تخرجوا من بين يديه وأهله وأحبابه بالسودان وخارجه...
وفي الختام أتمثَّل بقول الإمام الشافعي (رضي الله عنه) الذي يحثنا على العلم والتعلم حيث يقول:
العلم مغرس كـل فخر فافتخـر ** واحذر يفوتك فخـر ذاك المغـرس
واعلم بأن العـلم ليس ينالـه ** من هـمـه في مطعــم أو ملبـس
إلا أخـو العلم الذي يُعنى بـه ** في حـالتيه عـاريـا أو مـكتـسي
فاجعل لنفسك منه حظا وافـرا ** واهجـر لـه طيب الرقــاد وعبّسِ
فلعل يوما إن حضرت بمجلس ** كنت أنت الرئيس وفخر ذاك المجلس
فحقاً لك يا دكتور إبراهيم أن تفتخر وأنت ترِث النبي صلى الله عليه وسلم... حيث لا يورِّث الأنبياء درهماً ولا ديناراً إلا العلم... وحقاً لك أن تفرح وتبتهج وقد أصبحت فخراً ورئيساً لمجلسنا الصباحي في منتداك العامر الجميل بصالون الأُستاذ/ سيد أحمد علي بلال...
صادق دعواتي لك أن يصبغ الله عليك نعمة الصحة والعافية ويزيدك من علمه وفضله... وأن يجعل ما تقوم به في ميزان حسناتك... وأن يبوِّأك المقامات العليَّة في الدُّنيا... ويرزقك حسن الختام ويجاورك الفردوس بالمصطفى صلى الله عليه وسلم...
شاركوني فرحتي في نيل إبن عمي الدكتور/ إبراهيم علي بلال ...الدكتوراة بإمتياز...
أخوك/ جمال أحمد الحسن...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: yasiko)
|
ألف مبروك وإنه لكفاح يشرف كل السودان لا المنطقة فحسب، وهو بلا شك مصدر فخر لأبنائه ولنا جميعاً، تهانينا القلبية له ولك ولأسرته ولآل بلال ولحزيمة ولنا جميعاً.
الأخ أبو الحسين
واضح من السرد ان المحتفى به إبن عم لصديقي الراحل سمير عبدالله بلال الشمعة التي إنطفات مبكراً رحمه الله وهم من اسرة عرفت بالذكاء وحب العلم وعلو الهمة.
بارك الله في استاذنا الجليل الذي رفع رؤسنا ومتعه الله بالصحة .
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: موسى الحسين سيد أحمد)
|
كتب أُستاذ/ موسى الحسين حاج موسى...
Quote: ألف مبروك وإنه لكفاح يشرف كل السودان لا المنطقة فحسب، وهو بلا شك مصدر فخر لأبنائه ولنا جميعاً، تهانينا القلبية له ولك ولأسرته ولآل بلال ولحزيمة ولنا جميعاً.
|
تسلم أُستاذي/ موسى آل الحسين على هذه الكلمات المُضيئة في حق الدكتور/ إبراهيم بلال وأُسرة البلالاب عموم...
فلك التحية والتقدير والتجلة ولكل آل شيخنا ود حاج موسى...
Quote: الأخ أبو الحسين
واضح من السرد ان المحتفى به إبن عم لصديقي الراحل سمير عبدالله بلال الشمعة التي إنطفات مبكراً رحمه الله وهم من اسرة عرفت بالذكاء وحب العلم وعلو الهمة.
|
نعم أخي الكريم موسى هو كذلك... ونسأل الله عبرك الرحمة والمغفرة للمرحوم سمير عبد الله بلال ونسأل الله أن يجاوره الفردوس الأعلى بالمصطفى صلى الله عليه وسلم بقدر ما قدم وبذر من بذور الخير والعلم والمعرفة...
| Quote: بارك الله في استاذنا الجليل الذي رفع رؤسنا ومتعه الله بالصحة . |
آمييييييييييييييين...
ونفعنا الله والجميع بهذه الدعوات الصادقة التي خرجت من قلب صافي ولك مثلها أخي موسى وللجميع...
كميات مودتي...
أبو الحســــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
هل كان المرحوم الفنان سيف الأراك يدري أن أجله قد أصبح قاب
قوسين أو أدنى عندما ترنم بهذه الرمية؟
"دنيا صغيري يا عبد الرحمن غرارة"
"آخرا كوم تراب وتحتو الجسم بنضارى"
رحمه الله رحمة واسعة
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: والشدر القبلك متصبّر محّنتو صبر وضويتلو صباح
وشطّفتو نسايم غنواتك ونسّيتو زمانو الكتّاح
وعلمت عصافيرو تغني وكيف صبّت مطر الأفراح
|
الغالي جداً د. ياسين...
اللللللللله يديك العافية يا اخوي رجعتنا لأيام جميلة خلاااااااس... أيام التمانينات وأيام سيف الدين النواضر في ذلك الحين هو ومنافسه في الإبداع ـ الشريف ـ معاوية المقل...
وبالمناسبة يا د. ياسين أبوي بحكم إنو من أهل الأراك دايماً بيقول لينا أول من عزف الطنبور بعد ما جانا من بحري مع مراكب المحس هو ود قدقود جد سيف الدين الأراك... فما أدري صحة هذه المقولة... أرجو منكم التوضيح إن كان لهذه المقولة توثيق معتبر...
آلاف رحمة ونور تنزل عليك يا سيف الدين حسن قدقود...
وتشكرات للذين عبروا عن أحزانهم شعراً منظوماً في فقدنا الجلل للقامة سيف الدين الأراك... المتفرد جداً في كل شئ... فالرجل كان زاهداً في هذه الدنيا مُحباً للناس... مجاملاً بمعنى الكلمة... صاحب مشاعر رقيقة وكان عازفاً ماهراً قال عنه محمد جبارة سيكون خليفتي في الطنبور... لكن لم تمهله الأيام ليخلف ود جبارة... نسأل الله له الرحمة والمغفرة ولمبدعينا الحياة الطيبة الكريمة ياااااااااااارب...
ولك كميات مودتي د. ياسين... بس عاوزين منك طلب... رابط الحفظ...
تخريمة::
طلب خااااااااص... من الأُستاذ/ خالد المنسي دايرو يعصر أحاسيسو شدييييييييييييد في البيت المقتبس أعلاه للشاعر أسامة معاوية يورينا حا يطلع بي شنو...
أبو الحســــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: yasiko)
|
شوف كمان نجس الفصاحة
والفتاوي الماها صاح
نحن عافين الله اعظم
والرزق بنزل مقسّم
للبجاهد والمعسم
والله ما شقا لو حنكاً ضيعّو
والله ماسوا لو طفلّن
ما سقاهو ورضعو
ألا أسمعوا يا رفاقّه
الرضاعة خشُم بيوت
والرباية خشُم بيوت
والمعايش ماها توت
والمعذب أخير إموت
الوليد ان مبرجل
شن بسوي
زي كليب جربان يهوّي
إصبحِ والمصران مهوّي
وإمسى والمصران مهوّي
لا يبهرج لا يضوّي
الولد كان إربى قوّي
عملة استرليني سايرّه
إبقى صاروخ ارض جوّي
في مطلع القصيدة خاطب ود بادي نسوان ودالشايقي بلسان زوجهنّ ودالشايقي ثم عرج لانتقاد كلام ود الشايقي حين قدموا له الحبيبات ( لمنع الحِمل ) لتنظيم الأسرة وأستفزهم الشيخ الورع المزواج
كلام ود الشايقي شدة ما استفزّه الفحل خلا يبدا المقطع بذاك البيت الجميل
شوف كمان جنس الفصاحة
والفتاوي والماها صاح
الراجل باقي قال ليهم.... الله ما شقا لو حنكن ضيعّو فقعب ود بادي
ماسوا لو طفلن
ماسقاهو ورضعو
لكن ::: الرضاعة خشُم بيوت
والرباية خشُم بيوت
والمعايش مها توت
والمعذب أخير إموت
لكن عليكم الله آ جماعة ما صدق وديادي
ربنا قال وفصامه في عامين .. ونسوان ودالشايقي قاعدات أفطمن في شهرين .. عاد كيفن الواحده فيهن بتحمل قومتها من النفاس فينقع لبن الحمل الاول .ز زأنا ماراً على هذه الأبيات خطر لي أن نساء ود الشايقي ما صامن رمضان من ما لمن في تور البقر دا ( والفحل مو عواف ) البلقاها قدامو بنجمه .. ومسيكنات صلاتّن مقطّعه طول عُمرن ...
العايش ماها توت ..قد يمر الكثير على هذا البيت مرور الكرام ... يعني الفحل ودبادي أن المعيشه وتأمين حق العيش ماهو يانصيب ( توتوكورة )
فعلاً الجاهل المبرجل شن بسوي .. فطم في شهرين وسن سته انجدع الأم حملها دخل في الشهر الخامس والبطن تقلت والحركة قلت كان وقع ما بتقوم ترفعو وما بتسكت بتلحقّو دعوة قوم علي حيلك تقوم قومة ابوي داك السمح .. وان عطش تورك لي إخيتو الكبيرة تسقي وكان جاع يدافس مع فريق قومي لا يقهر وحقو رايح بيناتهم لقمة في الخشيم ولقمه في الواطه .. عاد شن فاضل يربى كيف وهو عايش في غاب بين فطاحلة وحقك ضراعك والمسكين مشلهت .ز ياها البرجله
مو زي داك وليد الأم العندها شئ اسمو ( قاب ) شغل الخوجات والنظام.. وليدن يقوم ماشاء الله مفرهد ومبهرج ... وحريم ودالشايقي ليهن الله وعيشة حمدالله
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: لكن ::: الرضاعة خشُم بيوت
والرباية خشُم بيوت
والمعايش مها توت
والمعذب أخير إموت
لكن عليكم الله آ جماعة ما صدق وديادي
ربنا قال وفصامه في عامين .. ونسوان ودالشايقي قاعدات
أفطمن في شهرين .. عاد كيفن الواحده فيهن بتحمل قومتها من
النفاس فينقع لبن الحمل الاول .ز زأنا ماراً على هذه الأبيات خطر لي
أن نساء ود الشايقي ما صامن رمضان من ما لمن في
تور البقر دا ( والفحل مو عواف ) البلقاها قدامو بنجمه .. ومسيكنات
صلاتّن مقطّعه طول عُمرن ... |
الأستاذ خالد
سلام
بالغت ......
حديثك دا خوفي يودي البوست دا الخور
تكرم على ايضاح هذه الصورة الغائبة
أكاد أجزم أنني استمعت لهذه القصيدة عشرات المرات وفي كل مرة استبين خفايا ولكن لم يخطر لي ما خطر ببالك هذا
لك الود
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: yasiko)
|
Quote: الأستاذ خالد
سلام
بالغت ......
حديثك دا خوفي يودي البوست دا الخور
تكرم على ايضاح هذه الصورة الغائبة
أكاد أجزم أنني استمعت لهذه القصيدة عشرات المرات وفي كل مرة استبين خفايا ولكن لم يخطر لي ما خطر ببالك هذا
لك الود |
دكتور ياسين مرحبتين حبابك
يا أخوي ود بادي ذاتو لامن ألقاها قال أن ودالشايقي رد على القصيدة بكلام من النوع الذي لا يمكن أن يقال في المناسبات العامة .. وأن القصيدة لا تخلو من الإشارات ليست الخبيثة ولكن إشارات غميصة
كان لابد من الغوص مع الفحل وديادي لكشف تلك الإشارات الغميصة .. وكلو في النهاية تأويل حملنا عليه حب تفسير الكلم وقد نكون مخطئين لكن حبينا أن نوضح الصورة كاملة دون أن ندفن رأسنا في الرمل وود الشايقي حاله وحال نسائه وبطانه مدرسة ووعظ للناوين ال.....في السنين المحل وفي القصيدة امور جد لو تعرضنا لها مش يمشي البوست الخور والله بكري اجر لي عُكاز مضبب وإجي لابوالحسين مخصوص
وربنا يستر
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
بسم الله الرحمن الرحيم
سلام ياهلنا...
الهديل
..........
الشاعر...محمد سعيد دفع الله
...............................
اداء المبدع ...محمد جبارة
...........................
ابديهو الهديل
كدى غنى لى ّ
حتى ان كان قليل
يبرد علىّ
يقيف دمعى البسيل
وتجف عينى
لا تبكى و تنوحى
كفاك انينى
تفتقى لى جروحى
مع حنينى
انا الفارقت روحى
قضيت سنينى
اريت ان كان مرادى
انا بى ايدى
اه قمريه
ماك شايفاهو حالى
حالى البى ّ
يغنيك عن سؤالى
زولا لى
طول شايفو سالى
زاد البي ْ بدّلْ
يرحم شويه
ماراعى النحول
الفى عضايا
اظن صدقلو
قول كذب هوايا
خلاص لمالو زول
تانى وسوايا
وانا البكا والذهول
صار لى ْسجيه
انا الختيتو
فى داخل فؤادى
انا الضاريتو
من كل الاعادى
انا الغذيتو
يشرب من ودادى
اه ياريتو خفف
لى الاذيه
اه اواه واه
قمريه غنى
معاكى قليبى تاه
بس لا تضنّى
انا القاسيت اذاه
اهديكى فنى
لا تزيديلى
جرحى على العلى.
.......................
تحياتي...
حاتم هاشم. ّ
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
| Quote: ولك كميات مودتي د. ياسين... بس عاوزين منك طلب... رابط الحفظ... |
Quote: د. ياسين...
الغبا اليغبى عدوك قول آمين...
الشئ دي نفس الأُغنية الفوق... شوف لينا الأُغنية المقصودة الله يرضى عليك... |
الحبيب الأستاذ ابوالحسين
سلام
فهمت ، ولازلت افهم ، من كلامك في الاقتباس الأول أعلاه انك تريد رابط أغنية
المرحوم سيف الأراك "رحمه الله رحمة واسعة"
وهو الرابط الذي قمت بوضعه ، ولكن كلامك الآن يشير إلى أغنية "المقصودة" ، ولا ادري
ما هي
عموماً أنت تأمر لكن المخ بقى تقيل عليك بالتوضيح
مع تحياتي
شكراً الأستاذ خالد على التعليق
لك الود
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: فاروق حامد محمد)
|
ابو الحسين
هاشم
دكتور يسن
الناس الهني كولهن
ازيكم ااحماعتالله
والله مشتهنكن فردا فردا
ومقصر انا معاكن لامن ماعندي الوشي البقابلكن بيهو
علي انا زاااااتو بيني وبينكن كدي
اابختالي من شويه طرطشه
الزمن كل يوم يجيني يزيدني غشغيش
بقيت في دربوزي طيرا ممعط وفاقد الريش
ودقات قلبي تملا حياتي طرطيش
المهم شكرا لي اي زول نشد مني ياني
طارق ود الديم عاشق الطرب زي ما قتو
والله عندي ليكن جديث كتير خلاس
ودار انزلكن اللات الهيلاهوب السويتن بالطنبور
علي انا ما بعرف النصايب دبل قعد تنزلوهن كيفن
لا تشوفو الصلعه الكبيري دي تتغشو قي سيدا تقولو صاحب مفهوميي
اي اها بوفففف
علكن الله ان لقيتو زول يعرف هني تخلو يجيني فسرع
اسع انا قاعد حم امي وحبوبه في الراكوبا الورانيي
وماسك لي جريدتن مسييييييخي
وراجي القراصه تمرق والويكي البيضا مااارقي
لكن امي ساوي الحجي هي وحبوبه
قالن الدقيق مخلوت
وماهو قمح اصلي
وسيد الطاحونه الجنبنا فرشو وغتو
ومملحلو مع الكلاب
غايتو ان بقت الحجي انتهت وانافطر
بجيكم صاد
وانشالله تاني ما يفرقنا علي الشديد القوي
محبتي وتحياتي
ويا دكتور يسن ايي ايي ياني انا زاتو
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: فاروق حامد محمد)
|
Quote: الحبيب أبوالحسين
بوستك حلو حلاوة أهلنا الشايقية ....
وما طالبني حليفي لكني والله أماني يا أولاد عمنا
ما بتتحبو ... الشايقيي أدب وفن وكرم وأصالة .. |
الحِبيِّب فاروق...
يا اخوي ألف مرحب بيك في حوش أبناء عمومتك بل حوش السودان جميع...
وأشكرك جميل الشكر على كلماتك الرائعةالمضيئة في حقنا... وحقيقة الجميل يرى الدنيا كلها جمال...
يا هلا بيك شرفت ونورت... وتفضل لا داخُل... ومعانا بإذن الله تعالى ما ترى إلا الجمال والروعة...
قواسيب مودتي...
أبو الحســـــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: yasiko)
|
كتب د. ياسين...
Quote: الحبيب الأستاذ طارق الأمين
كيفك واحوالك وكل الأهل
شكراً لتوضيحك بنفسك لانو ابوالحسين اب يبردلي وقت نشدت منك
|
وداااااااااكْتَ النهار كتب أبو الحسين....
Quote: د. ياسين... وأُستاذ/ هاشم...
سلامات... وتسأل منكم العافية...
طارق الأمين ـ المحامي دا ياهو ذاااااااااتو طارق ود أختي (طارق الهيلاهوب)... وود أخت الأُستاذ/ السيد العوض المحامي... له وعبره لمولانا سيد سلامات سلامات...
ونقول لي طارق واصل معانا إبداع... وبالأخص القصص الهيلاهوبية ـ الشايقية... فهي تعالج قضايا مهمة جداً...
كميات مودتي... وأبقى قريب آ طارق لا تبعد شئ...
أبو الحســــــــين...
|
كميات مودتي د. ياسين... وربنا يديم اللمَّة الحلوة دي في حضرتكم البهية...
ويا هلا بالجميل طارق الأمين... شرفت ونورت الحوش بي أركانو... بس داير منك طلب... تختِف كراعك الجمعة الجايي علي أُمبدة.. تعمل لقاء زي لقاءاتك الجميلة ديك مع أُستاذي/ ود حُمد إحمد... تجيب لينا منو أي حاجة...
وسلامااااااااااااااات...
أبو الحســـــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: مجدي عبدالرحيم فضل)
|
بسم الله الرحمن الرحيم
سلام ياهلنا...
مالكن على
.................
شيخ العاشقين ...عبدالله محمد خير
....................................
مالكن على
وليه يا نهيدات الجدى
سويتا العجب العجيب
فى قلبى بهدلتنو لى
نوسرتن الجرح القديم
الكان مسهد لى عينى
ومـن شفتكن
ما شفتن الحاصل على
ما شفتن القرن
القبيل كت قايلو مات
تاريهـو حـى
تاريهو زى ما كان زمان
ينبض شباب وشجون وغى
ليه يا نهيدات الجدى
يا برتكانات استون
فوق عودن اللدن الطرى
مضمور محل متبور محل
نجضان ونى
لين هنا ونديان
هناك وسط قوى
بس عندو سيد مرات
عنيد مرات هدى
ليه يا نهيدات الجدى
واقفات بلا قببا
فقيرن ديمه شالع فوقو ضى
ينشاف قريب وينشاف بعيد
بتق فى احساس جديد
ينتر شديد
لا عرفتو ريد
لا عرفتو جن دايرلو قيد
وقفت حدود معرفتى
فوق حلما صبى
يرجف يغازل النسمه
كان هبهب هوى
مالك على
آ بنى هوى مالك على
وانا عمرى ما اتحدث
مع زولا اسمو مـىّ
بس قولى شن قارنى
فيك لاك عارفى هوىّ
لاك عارفىهيى
لاك عارفى هىّ
وللشىء البعجبك
ما بتعرفى تقولى سىّ
يا بت عليك
زاد الشجون
وبوب مارلى
والحزن القديم
اتمهلى لا تستهزى بىّ
عمك انا وجدك كمان
لكن مصيبتى على العلى ّ
بهوى الجمال
وبهوى السبيب
كلما هو طال
وبهوى الصدير كل
ما حضن رمان وشال
وبهوى البنات كلما
بقن شبه الغزال
وما فيش بلا
الهوى بين ايدى ّ
وانا من زمن
بارى السراب
سارح معاهو
ودىّ ودىّ
كل ما اقول
بى داك عمار
ادنالو القى
هويد وصىّ
ليه يا نهيدات الجدى
يالزى نواطير الترك
فى العالى ما طلاها رىّ
يا الزيكن ما شفنا زى ّ
طماع انا ومابرضى
بى شيتن شوىّ
وما بيسعد المكتوبلو
فى المحفوظ شقىّ
..................
تحياتي...
حاتم هاشم.
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: وكانوا بقولوا أهلنا زمان ( كان جنى فراق ) ...لما يكون الجنى
سمح الكلام سمح الفعل سمح الخصال والطبع خلوق متدين ورع .. قدامي في الحاره
متاقل أجرجر عند القسمة ... تابي حفيان عندما يصيح الكبير يشهل
وإمهل قومابي يتناول التقيل من الصغير رحمة ومن الكبير توقير واحترام مسند
ضهر الراحلين في قفاهم الأعوج وما مشهل... وقد نعى نفراً كُثر أنفسهم
قولاً وشعراً قبل مماتهم |
والله كأنك رايته ، فهو زميل دراستي وعُرف بكل ما ذكرت وأكثر ، ولكن .......
لا حول ولا قوة إلا بالله
Quote: لقد حزنت كثير بعد مقدمة حبيبنا الدكتور وبعد سماع الرباعية
حزن حُزني الدفين وأزداد القلب أسى ولوعة لأخ ما عرفته
ولم أتلتقيه يوماً ... نسأل الله الكريم منزل القرآن الحكيم
بكل اسم سمى به نفسه أو أستأثره عنده في علم الغيب او علمه
أحداً من خلقه أن يسكن الفقيد سيف الأراك جنانه العُلى
ويتغمده برحمته الواسعة |
اللهم آمين
Quote: يتجلى ردع الشاعر لنفسه الآمارة بالسوء
ويذكر نفسه ورفيقه عبدالرحمن
ان الدنيا قيدها قصير نرحل منها وتنقطع عنا خُباره
وكتين يواري جسمنا الثرى |
Quote: وقالوا كُبارنا الليل بستر الجُبال .. والليل رفيق
عاشق بحسب ويعد نجمو .. الليل مسافات ريد تنقضي في سراع في حضور
الحبايب ونجر متاكسلة في غيابهم ... والليل
حضور وشعور وتأمل .. وقد قيل في الليل الكثير |
أحسِن به من كاتم سر!!
يا سلام وسلام عليك يا أستاذي خالد
ليت لي نفَس خيل خيالك والمقدرة على التنقل بين مكامن الجمال ونبشها
ومشاهدتها تسير على قدم وساق كما تفعل انت
لله درك
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: موسى الحسين سيد أحمد)
|
بسم الله الرحمن الرحيم
سلام ياهلتا...
مسخت عوم البترطن في جروفه
..............................
للرائع... حسن الدابي
.........................
اه يا خلايه فجولي اللشوفه
الصدير رجفاته سبب لي خوفه
خام ثمار ال الله قال دانيت قطوفا
الرقيبه قزازة الروم في وقوفا
جرعتني العلاقم بي صنوفه
بروقيها الداره لخبطي لي صفوفا
خلي حسادك عديل تخضع انوفا
ديسه شوف عيني من شكت كتوفا
الا دايما نافره يا ناس ما ولوفا
صممن جاراتا قال لي عطوفه
ملا شوفته لي تشهر لي سيوفا
العلي والبي كلو سبب عزوفا
لو تحلو رموز اصابع اليد حروفا
اه يا خلايا.
..............................
تحياتي...
حاتم هاشم.
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: تأمل الشطرة الاخيرة من هذا البيت وهي رائعة جداً (لو ملتق) وهنا
شكرت الشاعرة نفسها ووصفت نفسها بأنها تجديد نظم الشعر والقوافي
وكلامها فيه غير ملتق ( ولو لفايق) وهنا شكرت الممدوح بأن ما
تقوله فيه حقائق غير ملفقه. |
| Quote: الأخ يس رجاء توثيق مثل هذا التراث من الأهمية بمكان بل هو واجب . |
أستاذي موسى الحسين
لك السلام
نعم نضم يصعب الخوض في تفسيره ، إنه السهل الممتنع
وبإذن الله أنا وإياكم نبذل ما بالإمكان لحفظ هذا التراث
التحية لأبي الحسين وللأستاذ بكري أبوبكر
الأستاذ حاتم هاشم
شكراً لإتيانك بالنص
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
كتب د. ياسين محمد ياسين...
Quote: أستاذي موسى الحسين
لك السلام
نعم نضم يصعب الخوض في تفسيره ، إنه السهل الممتنع
وبإذن الله أنا وإياكم نبذل ما بالإمكان لحفظ هذا التراث
التحية لأبي الحسين وللأستاذ بكري أبوبكر
|
الغالين أُستاذ/ موسى ود. ياسين، أُستاذ/ خالد والخليفة أبو هاشم... والقُراء الكِرام...
نعم لمناشدتكم حفظ تراثيات السيرة وأهديكم أحبتي بلاص مرة تانية...
بلاَّل يا بلاَّل يا اب ذوق عشا اْمُّو المنفَّل خالو بين الناس وعمو...
بلال يا بلال أب ذوق عشا امو... المنفل خالو بين الناس وعمو...
جزايرك بي تحت وزينا رزَّم... وعطف فوق القيوف نخلك مردَّم...
تكبر يا عشانا ولينا تسلم... وتصول فوق حقَّك الصح مُو ملمْلَم...
تسافر برة للتعليم تحصل... وتجينا نجحت في ساحاتنا تقدل...
تعود للحوبة للوسخان تغسل... وتزور حلتنا للفتران تنشِّل...
تقدل يا خزينا مع رباعتك... يا مُقنع قفانا وضو جماعتك...
خايلي القدلة فيك مع شداعتك... وتضوي بلا القمر يا خيري ساحتك...
إن بقى في الحرابات يبقى صايل... وان بقى في العلم يفتي ويجادل...
وان بقى في المحاكم ماهُو مايل... وان بقى في التجار ميزانو عادل...
مناي تكبر تزيد يا السمحي ذاتك... واخواتك يقولِن لك وحاتك...
أشوفك جرتَقُوك وياااااااحلاتك... ونَسِل فوقك سيوف خالك واْباتك...
شحدت الله الكريم المال يلِمو... يواصل أهلو والناقص يتمو...
واشوف أنا حيَّة ياخُد بت اعمو... ويبكر بي وليد وانا اشيلو اشِمو...
وِكْت الحارة والفراس يقلو... قرقَر خجَّة دالاتُو اب كَبَلو...
يَبَردِح سيفو فوق العُوق يسلو... يغنِنْلُو البنات ويزَغْرِتِلُّو...
ــــــــــــــــــــــــــــــــــــــــــــ
مع كميات مودتي...
أبو الحســـــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: حاتم هاشم)
|
Quote: اه يا خلايه فجولي اللشوفه
الصدير رجفاته سبب لي خوفه
خام ثمار ال الله قال دانيت قطوفا
الرقيبه قزازة الروم في وقوفا
جرعتني العلاقم بي صنوفه
بروقيها الداره لخبطي لي صفوفا
خلي حسادك عديل تخضع انوفا
ديسه شوف عيني من شكت كتوفا
الا دايما نافره يا ناس ما ولوفا
صممن جاراتا قال لي عطوفه
ملا شوفته لي تشهر لي سيوفا
العلي والبي كلو سبب عزوفا
لو تحلو رموز اصابع اليد حروفا
اه يا خلايا. |
إجتمع الحنين والمحنة .. شن نسو غير مانجن ونقول هوووو ( شعر درر سبحة تبرق في ظلام ليل الخمسة الأوئل من الشهر الهجري لحسن الدابي عليه رحمة الله رحمة واسعة... والصوت الدافي كأنه ينسال عليك غطاءً مُدثر يقي شر برد قارس في ليالي شتاء جاء على غفلة للفنان القامة آمد الله في أيامه محمد كرمالله والطمبور الحنين بطبعه ومآخد من حنين صانعيه خلسة وعلنا
فكانت تلك الرروعة والصورة الفاتنة... وتشهد الله أنك ترى تلك الفتاة وهي كمهرة جامحة تبروّق في الدارة تحاكي صِوبْعات الرمالي وهو يشخبط بكلام يفهمو الناس الكُتر ويصعب على جليسه متابعة أصبعه وهو يرسم على الأرض ... لإزاحة الستار عن غيب السماوات الذي لم يكشفه الإله لغير ( كذب المنجمون ولو صدقوا ).. أنا قلنا تلخبط الداره ما بندي المفرده حقها وأن قلنا تسوط الداره بنكون قصرنا في الوصف وان قلنا تجوط الدارة الشليق ممكن يجوط الداره فخطرت لودالدابي مفردة ( بروقيها ) وفكانت وصف لخلط مع مزج ومع جوطه مع إزاحة واحلال ...
المهرة الجامحة خامه ثمار فوق صديرها قادر الخالقوا وسمو وصلو علي الحبيب ... والرقيبة زجاجة روم .. جمال .. طويلة.. ومبروم .. محزحزه .. كان ذاك شكل زجاج الروم اي الزجاج الذي كان يأتي لبلادنا معبأ بالباطل ويا للروعة ناس ام أحمد بعد فض السم الفيه يستخدمنه في حفظ العطور البلدية وناس ودالدابي يشبهة به حنناً
الشعر أقدامها دثره فكشت من حمله الكتوف .. تودي يمين وتدوي شمال وقلوب خلق الله وراها ومبحلقّه كرعين يشكلّن وتاله اليدين في أطراف بنانهم سواد ليك حالك ويا الخصر الشويه تقول مديّن .. وكانو بناغموها زمان ويقولو ليها ( كفلك عطلك أمشي البنات فاتنّك )
لم يذكر ذلك ودالدابي لكنه قال انها خامه ثمار وتبروق في الدار البروقه تحتاج لخفة ومدام خفيفة يعني غير ممتلئة والصدر الكبير مع اعتدال في الحجم يحتاج لي مساناد فكان الكفل وأذا أجنمع الاثنين في الجسم المعتدل انشق بينهما وادي ابو زمام ( وهو ذاك الخصر الشوية تقول مدين )
هيجت مشاعرنا لصور رائعة يا دكتور يا سين جزاك الله عنا كل خير وما عدمنا من إبداعك تغص وتقلع معاك لوجة جمال فنانة
لك الشكر والقدير
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: خالد علي محجوب المنسي)
|
Quote: لم يذكر ذلك ودالدابي لكنه قال انها خامه ثمار وتبروق في الدار البروقه تحتاج لخفة ومدام خفيفة يعني غير ممتلئة والصدر الكبير مع اعتدال في الحجم يحتاج لي مساناد فكان الكفل وأذا أجنمع الاثنين في الجسم المعتدل انشق بينهما وادي ابو زمام ( وهو ذاك الخصر الشوية تقول مدين )
هيجت مشاعرنا لصور رائعة يا دكتور يا سين جزاك الله عنا كل خير وما عدمنا من إبداعك تغص وتقلع معاك لوجة جمال فنانة
لك الشكر والقدير |
لووووووووووووووووووووووول!!!
والله ما أروعك إنت يا أُستاذ/ خالد... فقد رسمت لوحة جميلة جداً وحلَّلْت تحليل من حضر الحفلة ومشدوه فاتح فاه... إن بقى ما جدع العمة ولولح إيديهو قدامو وهَبَر علي الدارة!! ...
كميات مودتي...
أبو الحســـــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: أنا قلنا تلخبط الداره ما بندي المفرده حقها وأن قلنا تسوط
الداره بنكون قصرنا في الوصف وان قلنا تجوط الدارة الشليق ممكن يجوط
الداره فخطرت لودالدابي مفردة ( بروقيها ) وفكانت
وصف لخلط مع مزج ومع جوطه مع إزاحة واحلال ... |
| Quote: ( كفلك عطلك أمشي البنات فاتنّك ) |
Quote: وأذا أجنمع الاثنين في الجسم المعتدل انشق بينهما وادي
ابو زمام ( وهو ذاك الخصر الشوية تقول مدين ) |
تسلم يا أستاذ خالد
أنا عارف الحديث دا بيختك "كدَّاد ومديدة"
ما أجمل "بروقتك"؟ تاتي بـ"بروقة" لصور الجمال وحدود الخيال عندنا
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: من الله خلقني ـ الجزء الأول
من الله خلقني مكجِّن السفر بالعربيِّي ومكجِّن يومو ... إن بقيت ساااكت عِطِش تسوِّي النّاس في غلبة نامن يناولك الموية ... وإن بقيت خرمان دار تكرضم لك سفّه تشيل الهم لى مروقها .. وإن بقيت داير تنسيَّير عِلاّ يوقفوا لك العربيِّي وتزح من عيون النّاس لا غادي نامن نفسك ينقطع من المشي ... وده كلللو هيِّن ...النصيبة والهجِيمِي الكبيري إن بقيت دار تمرق لك هبوب وإنت مَشَكَّن وسط الخلق في العربيِّي .. تقعد تودِّي وتجيب .. وتبدأ وترايِي ..ياااربي أسويها ..؟ ولا لع ..؟ ياربي إن بقيت مرقتها بيعرفوني .. ؟ أهـا إن بقيت مرقتها .. إن مسك نخرتك براك كدي يااهن العرفوك .. وإن بقيت بلعت السيف متني وما إنزحزحت من مكانك .. تَشَكِكْ النّاس في بعضُن .. وينبادلوا الإتهامات بى عيونُن ..وإن بقى الزول القاعد جنبك ده , إتلفت وإبتسم لك سـااكت بى حسن نيّه تقول خلاس أنا إنكشَف ..فِشان كدي أنا مكجِّن سفر العربيات ده ..
أها ... جات الإجازي اللّتنا ..مشيت بِعت العربيِّي اللّتي القدِيمي وأخدت لِي ويحدتن جدِيدِي ماااهلِي كدي وسميحه .. جيباً سميييح كدي ...المرأة اللّتي قالت لي المرة دي نسافر بى عربيتنا للسودان ...تنفعنا هناك نحوم بها هِنِي وهِنِي بدل كل مرة نجري نكوس في الامجاد والركشات ...انا الفكرة وقعت لِي .. لكين هِي أتاريها فوق فهم ... على حِس العربيِّي الجديدي بقت تشيل وتردم لي في العفش ..وتسوِّي لِي ما دام العربيِّي أصلها ماشي أخير النشيل ده .. وأخير النَّسوِّي ده .. هِي تردُم ..وأنا أستف وأربِّط وأشيل وأعتِّل ..متل المُزَاورِي الفي الميناء ..أصلي ما هزّيت رويسي وقت لها لع ... بس أقول لها سمِح .. سمح .. نامن أكتافي ديل إترخَن لا تِحِت بتل العَرَّاقي المَعَلَّق في الحَبِل ومسكني وجع الفِقَرْ ... من كترت العفش سبت العربيِّي بقى مَتَندَل لا فوق بتل شافع العرب الحالقين لو رويسو بى تِحِت ومخلين باقي الشَّعَر الفوق ... حيلي ضمَّه إنهدَّا وأنا لى الليلي لا سافر ولا إتحركتَ من بكاني ... قُت لها عاد إن ما عجنتي لك دِلكِي وجبدتي لى أكتافي وكرعي ديل ..ياكي الماكي مسافري من هِنِي والعربيَّي أخليها واقفي في بكانها ده ..
إتوكلنا على رب العباد وركبنا الباخرة .. مرقنا بى غادي في سواكن لقينا البلد دي فايري ... جِنِس فَسَخيبة وجِنِس حَر .. تَخَت الكَفَتيره في الشمش وترمي فيها حَب الشاي ... وجِنٍس خلِق ودَفَسيبة اللّت ناس بس يوم القِيامِي .. الراكوبة اللّت القدوم ملاني .. والمظلات البرَّا ملانات .. وواحدين يجوك جارين بى هِنِي وديل يجوك جارين بى هِنِي ..وكل واحد فيهن شايل لو دفتر ويقول لك أدفع لنا كدي , وعليك كدي ..وأمشي الشبَّاك داااك آ بعرفو سَو أشنو ...قُت لهن تعالوا هِنِي .. إنتوا في زول موصيكن عَلَي ..؟ ماسكاكُن علي غبِينِي ..؟ في زول قال لكن أنا زارع لي حيضان اللاّت ريالات في الشرِق بى غادي ..؟ تريِّلُوا فوق صدوركُن .. أزحفوا من قَبَلِي ... قَبَّال يصقعنِي جِن أسع ده أقبِّل صاد بى باخرتي دي محل ما جيت ...دااابنا فتَّاح يا عليم رزاق يا كريم كُرَاعنا لى الليلي ما إتوهطت عديل وإنتوا جايين كابسِنِّي بتل نمل السُكَّر ... القريشات الجيت شايلِن معـاي قلت أقضي بِن إجازتي عليك أمان الله إتماصن بتل الظهرة الفي الطشِت ... كل مرة أمرِقِن أقرُطِ فيهِن .. نامن بقيت أدَّخِل إيدَي في جيوبي بتل البيفتش لو في عَقَاب جُرُم وأمرُقِن فاضات .. كان ما كُت مجكِّن لى شوية دولارات كدي داسَّهِن من الحيكومة اللَّتي كانوا نقروا طاري وشالوا حالي ... يشيل حالُن ... علا بقيت نجييض آ زول ..
ناس الجمارك ... الشنيطات اللاّتنـا بَحَّتُوهِن وشنتلوهِن لينا جنس شنتيلاً, باركين فيهن بى إيديهُن وكرعيهُن بس الجدادي البتبحَت في التَّرى تحت المنقايِّي .. نامن أنا شكَّيت في رقبتي , قُت يا ربي أنا جيت شايل لي معاي مخدرات وأنا ماني عارفها ..؟ من المغصة الصادتني عليهُن قرربت أصنقِر في الواطـا وأقعد أجعُر ... ربطَّنا عفيشنا من أول وجديد ومرقنا رقيباتنا من الميناء .. مرتي قالت لي نمشي نبيت في بورتسودان ونقوم باكر الصباح .. قت لها إنتي مغزلِنِي ...؟
ناس سواكن ما قصروا شي , فرضوا الحوض قبَّال يبقى للحش دايري البعوضة اللَّت بورسودان كمان تدُق النقاقير وتعرض الليلي فوقنا ...؟ أبقي عشرة على الدميمايِّي الجيتي بها دي .. الدَّرِب قدامنا لى اللَّيلي طويل ...
أول نقطة اللَّت تفتيش ونحنا مارقين من الميناء العسكري الواقف في الكُشُك وقفنا ... لى الليلي ما اتفكّينا ...قال لي: الأوراق هَقَك وين ... ؟ أدّيتو الورق ..دخل على كُشكُو وجاني مارق ... قال لي : رسوم الطريق تدينا ... رطنت معاهو قت لو ) نَاكَابْ هَرِّيوَا ..؟ ) يعني داير كم ...؟ قال لي : ( يَهَا .. برُوك بِدَاوييت ..؟) يعني إنت بجاوي ... ؟ قت لو .. لع .. ( شايقيبوا ) يعني انا شايقي إستغرب وعاين لي كدي وعاين لى مرتي وولادي .. عويناتو يقولِن ماهو مصدق ..قال لي : ( كرتوم إيبا تِنْدِيَا ..؟) يعني إنت ماشي الخرتوم ..؟ قت لو انا ماشي عطبره ... قال لي : ( تَامُنْ قال هَيمَا ) جيب حِداشر ألف ... قُت لو بركة البقن حداشر , أدَّيتو ياهِن ... كُت قايل رُطانتي بتسوي لها شي ... عِلِّي ما نفعت ...
مشينا بى عقاب يومنا داك ووقفنا في سنكات قلنا نشرب لنا شاي يا جبنة تنعوشنا شويِّي ... والطراوه الصاااقطِي اللَّت سنكات ديك ضربتنا بعَد الفسخيبة اللت سواكن الهرتنا ديك ... كان مو العفش المردوم معانا دا كنا بيّتنا قبلنا ... شفع العرب جوا إتكبسوا فوقنا الشايل لو مساويك والشايل لو فنادِك والشايل لو بسكويت .. واله يا أخوانا يحنِّنُوا الزول ... من شِدَّة ماهُن ضُعَاف ومَسُوَلِلين الواحد فيهن بتل العنقريب البلا بِرِش ... عِضيماتن ظاهراات يا حِليلُن ... جاني راجلاً عِجَيِّيز ضهيرو محني , وقف قَبَلَي وقال لي :- يَهَا ... ( إندَك مَأَجون ) عندك معجون ..؟ معجون الليل أسنان يعني ..عاينت لو كدي لقيت خشمُو جاما .. معلم الله من إسم السنينايِّي الواقفي .. بتل المحفضة اللّت حبوبتي الله يرحمها ..قَدُر ما قت لو تسوي بو شنو ..؟ أبى ما يحدسني ... في الآخر عرفت إنو يمشي يبيعو ويشيل قريشاتو ..غمَتَّ لو شي حِتَّن زَحَّ من قبلي ..
واصلنا رحلتنا نامن قلنا سلام يا درديب ... وإن بقيتوا دار تشوفوا الجدب والمحل البى الصِّح ..والنّاس المهمشين بالصح .. والمافي زول جايب خبرُن أها ياهن ديل من دريب وإنت ماشي لا كسلا ... صُوَرُن وهيئتهم تبقى مبارياك وما تمرق من عيونك نامن تقضي إجازتك وتجي صاد ... والله الموية البى نجلبغ فيها دي ماهن لاقينها .. وإن بقوا لقوها ..أها بس القطرة اللَّت العيون .. والطعميَّة الهيني دي .. يبقى لي إن لمُوا فيها الواحد فيهن يشيلها يشمِّها ويجكِّنَها تاني في جرابو متل فتيل الرِّيحِي ..يعني أفقر زول عايش في جوبا ولا ملكال بالنسبة ليهن زي واحداً من أولاد العمارات في الخرتوم ( عشان ما تقولوا لي بااالغت ) أكلُن وشرابن ياهو الجّبنة ... يعني الواحد منهن إن بقى عِرِق سااكت تشم ريحة عَرَقُو دي جبنة جبنة ..باقي لي إن مشي ينسيَّير يمرقو نِسكَافي صُرُف ...قَطِع شَك ... والجبنة الكتيري تصدم الزول من الأكل ... أسعلوني انا ... فشان كدي قللت منها ... بقيت أشربها يوم الجمعة بس وبعد الغَدِي ... (جيتي من الحج الفات دا ... مِي دَقيت الدَّلَجِي وكُت جاي ألحق الصِّح ...) أكَركِع في الجّبنة بالكُبَّايِّي أحَمَتنِي الأكل ضُمَّه0
نزلنا في درديب , العساكر قالوا لنا تبيتوا هِنِي , بالليل ده مافي سفر فشان الرَبَّاطِين بيلمُّوا فيكن يخلوا ريحتكُن طير طير ... أجَّرت لي عنيقريبات في أويضة كدي وإتكَمَدنا فيها انا ومرتي ووليداتي وعِنِيقريباتن بس الإسم عنيقريبات إن جيت دار تمد كرعيك يندَلدلِن من العنقريب في الواطا بتل الراكب لك دِحيشي من شِدَّة ماهِن قِصويرات وسُغَار ... صلينا المغرب والعِشِي ... الوليدات قالوا جعانين داي يتعشوا ... شِلت الهَم وأنا ماني جايب لي زوادة معاي ... قُت لهن يلاَّكُن ..مرقنا لقينا لنا مطيعِم كدي خَات لو طريبيزات برَّا ومَسَوِّي لو كَنَب الليل خَشَب قاطعات إسم الفوطة ولا المَشَمَّع المفرش فوقن ..إن قعدت فوقن بتل القاعد لك فوق ضِريسِي ... وإن جيت داي تقوم تنسرِح لك سَرِيحِي فوق صلبك تخليك تفنجط بتل الحمار الفوق ضهرو دَبَرَه ...علاَّ مشيت جبت المصلاية اللّتي فرشتها فوق الكنبة للوليدات ... ومشيت أطلب لهن العشِي ... أها عندك أشنو ..؟ قال لي عندنا فول وعدس ..قُت لو ما عندكُن لحيمايات مطقطقات كدي ولا جَنى جِداد ..؟ قال لي :- لَهَم ...؟ ( لَحَم ) لهم كان لِقِينا برانا ناكُل ... يعني اللَّحم إن لقوهوا ماهن جاي يبيعوهو شي ... ياكلوهو لى رَقَبتُن ... قت لو طيٍّب ... أدَّنا فول وعدس ... عامِنُّو العدس قاع يسوي لي الحيرقان والفول زااتـو عِلاَّ أشرب لي وراهو أندروس يا عطرون ... وفي النهاية أنا هيِّن الحديث في البطان الكَارَّهُن معاي ديل ... جبتو خَتيتوا قِدَامُن .. عاينوا لو وصَرصَرُوا وِشيَّاتُن ... عِرِفتَهُن ياااهن البايتين القوى ... بى فَدْ نَفَس .. قالوا لي : ده شنو يا أبوي ياخ ... ؟ قت لهن هوي ... هِنِي لا في ماكدونالد ولا في كنتاكي ... ده ياهو كنتاكي اللّيلُن يا تاكلوهو يا تخلوهو ...الكُبار غايتو خَتَّروا شويِّي مع أمّهُن لكين السُّغَار يعاينوا للصَّحَن تقول جِب لهُن فوقو قَعُويِّي ...علا طلبتلُن شاي بى لَبَن قَرَضوا معاهو الرَّغيف..
مشينا للنُّوم ...خليتُن هُن جوَّا وانا مَرَق عنيقريبي برّا جنب العربيِّي فشان أحرس العفش ... غلبني النوم ضُمَّة شايل اللَّيل نامن الواطا أصبحت ... البلد دي صِنِّي قاطعي إسم الحركة .. بلا صوت الجِّندِب والكلاب مرة مرة ياخدن لهن نبيحة آب تسمع شي ... والواطـا من شِدَّة ماهـا ضُلُمَّة كُبُس باقي لِي إن بقيت داي تَتْبِن رأسك عِلاَّ تولع لك بَطَّاريِّي , ليلي داك كلو انا موهدِب ..أرقد على ضهري أسمع حِس نَفَسِي بى وراي اقول بس في واحداً جاي يبعج لى بطني بى سكين ويشيل العفيش اللِّليل دا ... والبلد صِنِّي .. إتكفي على صَفِحتي اليمين يتخَيَّل لي في حِس نِعلين ماشات عَلَي .. أقوم أصنقِر إتلفَّت جاي وجاي وتاني أرقد ... زولاً يَشخُر جنبي ساكت فشان يطَمنِّي ماهو في ... حَسّيت من الصباح عيوني ديل حُمّمممر بتل زول المَرِيسي غالبني أفتِّحِن ... ما فَضل لي علا أرفع جُفُوني بى أصابعَي لا فوق فشان أفَتِّح .. صلاة الصبح صلّيتها يا الله يا الله .. لا أسّع ماني عارف نفسي صليتِن إتنين ولا تلاتي ..
|
الحِبان الكرام...
أهديكم الجزء الثاني من قصة الكاتب عبد العظيم الطاهر (نوري) من الله خلقني مكجِّن السفر بالعربيي!!
الجزء الثاني ـ من الله خلقني مكجِّن السفر بالعربيي...
..مشيت على العربيِّي دار أدورها وأنا إترنح من شدَّة النعاس .. متل الطرفايِّي الفي وسط البحر ..دخلتنا في العربيِّي شفع العرب جوا مبنقرين مارقين من وين آ بعرفن ..( يَهَا أليك الله تدينا شَرِيت ) .. بالله تدينا شريت حق قرآن ... شريط الليل قرآن ..برضي إتمحنت في الحكايِّي دي ..إشمعنا شريط قرآن ...؟ ياربي البطان ديل طالعين مولانات من أسع ..؟مالن ماهن دايرين شريط الغُنِي ..؟ طلعوا زي الرويجل العجيِّيز السعلني من المعجون داك ... حتى هُن يمشوا يبيعوهو ... دورنا ومرقنا من درديب وركبنا الزّلَط .. وأريتو الزَّلَط هو زلط الحاجي .. من درديب ولا كسلا مافي زلط شي ... الاسم زلط ... كلللووو إتزلَّط عِدِم الحبايِّي .. الحُفَر الفيهو يمُرقِن البترول عديل كدي ..العربيِّي تَغَتِس وتقلع .. بس الكرّوقه المطفحي فوق وشي الموية ...مرات أخلي الزلط أنزل بالواطا ضمّه .. ومرات تلقى الشاحنات ديل مرصرصات قدامك متل الجعارين , إن قلت تِتعدَّاهِن يقابلنَّك واحدات جايات من غادي ..قطر كريمي راسو عديل .. تقيف تحَرِسِن نامن يفوتن , النّاس يصلوا الضهر والعصُر وإنت واقف ...
وصلنا كسلا دي , أنا عيوني محوصات ضمّه , الناس أشوف وِشياتن إتنين إتنين ..قُت للمرأة أنا جِسمِي روطَل .. خلاس .. بلابيطي وَقَّعَن .. كان ما أخدت لِي جَمَّه .. كُرَاعِي ماني قالعها من هِنِي .. وقفنا جنب مطعم كدي الطراوه فيهو صاااقطِي .. قَعَدّت المرأة والبطان وفطرنا فطوراً معلوم بالصِّحْ .. أها قُم مشيت كُست لي مُستراح آ زول إنجمّيت فيهو زييين وجيت مارق .. فرشت لي فرشه في البرندة اللّت المطعم وأخدت لي نويمه خلتني أشيل حيلي شويه ..
واصلنا رحلتنا ... والطريق من كسلا ولا قِدام سمح بالحيل .. والواطا دي ما شاء الله تقول فارشين لهن فوقها قطيفة ... مخدِّرِي وخدارها ده يتراقص , الزول يقول أسع أمشي إندردق فيها متل الافلام الهنديه .. يا أنزل أدُق لِي خيمه هني وأقعد قبَلِي .. وماشين ... جينا بى فوق القضارف لقينا أباريق السماء دي كابِّي ... المطر يجيك نازل لُكَد .. لُكَد .. بالجمله .. شَوووووو ... والرَّعَدِي دي تفرطق تصُم الإضنين ... ولادي كَرَسوا فَد كَرسَه .. ومطيرين عِويناتن .. أول مرة يشوفوا لن مطره ورعدِي زي دي .. في جدة ما عندنا مطر شي ... فَنِّي في الدَهَر تجينا بتل الزول البيمصمص في خشمو وتاني ما نشوفها علا السَّنِي الجايه .. البطان كانوا جاي يِنزَوزَوا من الرَّعَدِي .. علاّ بقيت أقرالُن في ياسن .. بيني بينكن انا زاتي كُت ملاوذ .. بى نضاراتي ومَشَغِّل المَنَشّات وبرضي ماني شايف الدرب سمح .. تقول في زول قاع يغرف بى صفيحة اللّت جوز ويلشغ في قزاز العربيِّي بى قِدَام .. المنشات شغالات في الفاضي ساكت .. الله يكفينا شر التعب البلا عَوَض ... مشينا لا قدام لقيت لي عربيتين منطقشات .. شاحنتين .. والسّواقين الإتنين واقفين تحت في المطر ديك مبلبلين يقُطرُوا .. ويهرجوا مع بعضن ... مِتفَدغين .. واحد مَنَفِّخ شلاضيمو ورافع أصبعو في وَشِي التاني ...والتاني يعضعِض في سنونو ويلز في داك من قبلو ... وأنا قافل القزاز ماني سامِعُن قاع يقولوا في شنو ..؟ الشمار كاتلنا عِلا مافي طريقة نقيف لهن .. تجي عربيِّي تَكفُتنا حتى نحنا إن بقينا وقفنا .. مشيت لا قِدام لقيت شارع الزلط ده بقى خور عديل كدي .. المرأة قالت لِي درب السلامِي للحول قريب .. وَقِّف العربيِّي نامن المطر تقيف .. قُت لها السماء دا بتل القُطُن المنفوش مااا أظنها تقيف أسع ...أخير نتاتي شويِّي شويِّي نقرب المسافة ..أنا إن بقيت قعدتي طالت في السواقه دي بعدين علا تنزلوني من العربيِّي طَب العَصَب .. ربك رب الخير نحنا في زَحِيحنَا داك .. المطر كَرَسَت شويِّي , عامنو السماء متقايطِي ما إتفشت شي .. نزلنا في الفاو .. قلنا نَطَلِّق كرعينا , لقينا لنا واحد في قهوه .. مَفَوِّر لو لبن في حلةً قدر اللَّيلِي وباكِر .. الجَّمُوده اللَّتُو سادِّي بى فوق بييييضاء بس قماش اللّيل بوبلين تبارك الله , قُت للبطان تعالوا .. تعالوا شوفوا النَّعِيم ده .. تشربوا لِي في اللبن البتل السَّفُوفه داك لا فيهو فايدي ولا شي .. ولدي السَّغيِّير قال لي رِيحتُو مالها كدي ...؟ مصرصِر وشيهو .. قُت لو الرِّيحه دي نحنا نخرم لها آ ولدي .. وَزَقنا منو بُطُونَّا نامن إندشّينا وحمدنا الله وواصلنا رحلتنا ..
ــــــــــــــــــــــــــ
تعظيم سلام أُستاذ/ عبد العظيم... وأوعدكم إنشاء الله بالجزء التالت قريباً...
كميات مودتي...
أبو الحســــــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
بسم الله الرحمن الرحيم
سلام ياهلنا...
ده الشمال يالداير تشوفو
..............................
احدي روائع...الفاتح ابراهيم بشير
.....................................
شوف شمال اهلي الافاضل
ليل نهار في العزة رافل
فيه مطبوع سر الاهي
بدري كان تحلمبو بابل
حاضنو هو النيل بي محنه
وبس عشانو هو جانا مايل
وانحنى وغير مسارو
ولفة ابو حمد الدلايل
كل منابع الطيبه فيه
نالبهن اعلى المنازل
وبي شعر محفوظ مخلد
في دواوين الاوائل
دا اليطوف هيبة ربوعو
يستفيد لو يبقى ماهل
يا يشملو نسمه عابري
ماخده ريقه من الخمايل
ويا ملك وجدانو منظر
يقتل الهم والبهادل
والرسول قال في حديثو
ومافي اصدق منو قايل
الخدار والمويه جمبو
بلثم الهم والمشاكل
يا سمعلو قصيده صادقي
ترسل الاشواق قوافل
يا نغم طمبور حنين
يستقر جوه الدواخل
ويا قمريتا تقوقي فوق
تميره صبطه شايل
يا قعد بي ايدينو يشرب
مويه صافي من الجداول
ويا يشوفلو كمان مزارع
شايل الطوريه نازل
بي نشاط قاصد زراعتو
والصعب بيشوفو ساهل
ويا كمان متع عيونو
بي حسان زي الارايل
زوق وطيبه ادب خيالي
في عفاف ما منو مايل
ويا كمان لاقوهو اهلنا
بي كرم من غير مقابل
وروهو انو الدنيا لسع
فيها خير وانبل خصايل
يكرموك لو جيته فوقم
يجبروك لو ماكا نازل
ده الشمال يالداير تشوفو
بالنهار الفيهو حاصل
اما في وقت الاماسي
ليلو ضمه جميل وحافل
نتفق من بدري شله
ونطلع القيزان قوافل
فيها يجمع شملنا في
رباط زي العوائل
ونبدا نسأ ل عن بعضنا
يا محمد وينو عادل
وشوفو يا ناس وين سيد احمد
اصلو زولا ديمه ماهل
ونمسك الطمبور ننقرش
لحن تنهاربو المفاصل
ونحن في عزت قعادنا
يبدا واحد داير يجادل
وبي محنه نقولو ياخي
يا فلان خليك عاقل
خلنا النسمع معاكا
اشتهيت بس اسي كامل
ويا فلان قلك قصيده
تروي ايا منا القواحل
جايه من وجدان وصادقي
ليها تهتز الجنادل
وفي الختام نطرب نغني
وما بنعرف قيل وقايل
ده الشمال يالداير تشوفو
رغم وصفي انا ماهو كامل
ده الكمال لله وحدو
لا بينوم لا بتلقى قافل.
.....................
تحياتي...
حاتم هاشم.
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: ست البنات)
|
Quote: يا خلاى فجولى الأشوفا !
سلام كتير من دار خالد ود العبيد ورقية العبيد فى سيدنى ولا عندكم جميع !
وسلام خاس لأخوى خالد ود عمى محجوب - وللخزين أبو الحسين - ولكل الداخلين للدار العامرى دى .
ست البنات . |
ست البنات لا حدهِن...
يا مرااااااااااااااحب بي عودتك الجميلة...
شرفتي ونورتي... والله سألنا عليك جنس سؤال... وأحمد ولد خالد كرعينو حِفَن في تشاشق بي غادي (بلاد العم سام) دي يفتش عليك...
ألف حمداً لله على السلامة... وإنشاء الله تاني فد حكيرة وآسف لترحيبي المتأخر لأني اليومين أسأل الله السلامة... زنقة عدووووووووووك...
لك كميات مودتي...
أبو الحســــــــين...
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: أبو الحسين)
|
Quote: يا خلاى فجولى الأشوفا !
سلام كتير من دار خالد ود العبيد ورقية العبيد فى سيدنى ولا عندكم جميع !
وسلام خاس لأخوى خالد ود عمى محجوب - وللخزين أبو الحسين - ولكل الداخلين للدار العامرى دى .
ست البنات . |
ست البنات سلام وعلك عافي
بنسبق كلامنا بذكر الله وماشاءالله ودقرته عيني
سلام يا الملكة المأصله وست الجيل
سلام يا بت الرجال أهل الدرق والخيل
تغطسي وتقلعي زي السمك في النيل
أطري ليك حبان أهجدي خلي السفر دا عديل
خالد محجوب
| |
|
|
|
|
|
|
|
|
|
Re: الشـــــــــــــايقية... ماضيهم المُشرق... حاضِرهم الأخضر... ومستقبلهم الواعد... (Re: yasiko)
|
بسم الله الرحمن الرحيم
سلام ياهلنا...
زهرة اللاقحوان
......................
تنفح اريج تعبق شذى
فتح زهور الاقحوان
دوبني من خاطرك غنى
وسدني من قلبك حنان
نسيني حتى الداير
يكون قبل الكان
وانا من عيون الليل بجيك
نتباهى فوق سرج الزمان
نجمة الضيفان تراي
كبّن حواويرك لقيت
انقر اقيف الدغ امش
كل ما محل دقيتلي بيت
دنقرت اغرف من هواك
بالهم شبعت بالخوف رويت
قايل آ بخاف الدردة
لكني في الواقع جبان
لو في مساحات الشجن
جواك اتلاشى المنى
فتق بكاك عمق الجراح
النازفة من كمين سنة
امسح دموع لا تنوح اصبر
على الشوق والضنى
كان انت بكاك العلي
مين تاني بديني الامان
في الهجعة بعد الناس تنوم
وتبين نجيمات الصباح
بحضن ربابتي واغني ليك
الحاني من نبض الجراح
ياحليلي ابو التيتي وراي
سهران يردد في النواع
يعقبني كل ما قلت آه
وانا في صداهو صداي زاد
ما انت غنوة عزي في
الليل الطلق درعاتو لي
وانت الملاذ الما بيضن
وقت الظروف تضحك علي
دايرك وقت ناعي اليصيح
تصرخ تقول جواي حي
وتقلب موازين الحياة
الصلى في محرابا جان .
......................
تحياتي...
حاتم هاشم.
| |
|
|
|
|
|
|
| |
yasiko
أبو الحسين
مجدي عبدالرحيم فضل
فدوى الشريف
Yasir Elsharif
salma subhi
خالد علي محجوب المنسي
حاتم هاشم
فاروق حامد محمد
هاشم الحسن
.jpg)
.jpg)
فيصل محمد خليل
ست البنات
فيس بوك
تويتر
انستقرام
يوتيوب
بنتيريست