|
|
 نافذه عبر الواقع
|
نافذه عبر الواقع
يحي ابن عوف
يجرجر ذاته لى يتهئ لأستقبال يوم جديد يتلفت حوله سهم شارد يعبر مابين ذكرايته شريط طويل من الذكريات للأصدقاء محمد أحمد. ود عبد الرحيم.وحاج عكود. ودحمد. ركب طويل من الأصدقاء هجروا البلد منهم من إستقر بالخرطوم ومنهم من هجر الوطن . نظر إلى زوجته ست الدار وابنه الصغير وهو يتأمل مستقبله المظلم
ست الدار : صباح الخير ياود على مالك سارح وحالك ما عجبنى اليومين ديل
ود على : صباح النور ياست الدار الحال بقى صعب والناس هجرت البلد
ست الدار: نسوى شنو الزرع مات من قلت المويه قالوالبترول طلع ياربى الجاز ده بيودو وين ؟
ود على : أنا بصراحه قررت السفر للخرطوم
ست الدار: تسوى شنو فى الخرطوم الحال كله ما بقى زى بعضه
ود على : أشوف لى أى شغل أشتغله طالمه البترول طلع والشغل كتر فى الخرطوم
ما بين اليوم واليوم الثانى قرر السفر ململم ذاته عسى أن يجد بريق أمل لحياه أفضل وصل منزل عمه الذى كان يسكن بحى العمارات يطرق جرس الباب ثم تفتح الباب الخادمة
ود على : سلام هوى ياجوه
زوجة عمه : آهلآ منو
أنا ود على
زوجة عمه : آهلآ حبابك عمك مشى يجيب ليه زول يصلح لينا الآيركونديشآ ما عارفه الحصل ليه شنو الليله إيتعطل عمك ما حيتأخر مشى بعربيته المرسيدس وبيجى هسا
يدخل فى هذه اللحظة العم أحمد
العم أحمد : آهلآ يا ود على حياك الله وآبغاك جيت ميتين وكييف البلد
ود على : أنا جيت قبل شويه البلد تعبت والتمر ما زى زمان والزراعة ماتت من قلت المويه والناس عايشين على البضائع المهربة من مصر كأنه الشمالية ديه ما تابعه للسودان
حاج أحمد : كديه خلى الكلام الفارغ ده وورينا أنت جاى تسوى شنو فى الخرطوم
ود على: أنا جاى عشان تشوف ليا شغل طبعآ أنت زول كبير فى الحكومة ديه
حاج أحمد: طبعآ أنت رجل مسلم والبلد ديه بتهمك
ود على: آفوه يا عمى البلد ديه أغلى من جننا
حاج أحمد : أنا حا أوديك الجيش عشان تمشى تجاهد فى العبيد والكفره فى الجنوب
ود على: عبيد وكفره هو لسه فى عبيد وكفره ولسه فى ناس بتبيع ناس فى السودان ؟؟؟؟
فى هذه اللحظة يسأل هيثم ابن العم أحمد يعنى شنو يا بابا عبيد؟
حاج أحمد: اسكت يا ولد ياقليل الآدب
ود على: يا حاج أحمد هو أى زول أسود عبد
حاج أحمد:طبعآ العبد عبد والسيد سيد
ود على: حسن ود عمى قال نحن لمن نمشى أى دولة من الدول العربية بيقولوا علينا عبيد
للمرة الثانية يسأل هيثم يعن ايه يا بابا عبيد؟؟؟؟
حاج أحمد: اسكت يا ولد يا قليل الآدب
وأنت يا ود على باين عليك من كلامك ده إنك بقيت زول كافر
ود على: يا عمى ما تقول الكلام ده هو المايمشى يقاتل فى الجنوب يبقى كافر الجنوب ده ما فيه مسلمين ؟؟
فى هذه اللحظة يسأل هيثم للمرة الثالثة يعنى ايه يا بابا عبيد ؟؟؟؟
حاج أحمد: اسكت يا ولد يا قليل الآدب
أسمع يا ود على الما يمشى يقاتل فى الجنوب ملحد وكافر
ود على : طيب يا عم أحمد أنت ما مشيت تقاتل ليه؟؟؟؟؟؟
حاج أحمد: يا كفره يا ملحدين لمن نحن نمشى نقاتل البيلم ليكم خير البلد ديه منو .
|
|
 
|
|
|
|
يحي ابن عوف
فيس بوك
تويتر
انستقرام
يوتيوب
بنتيريست