|
|
 ابدكي كيف - 1- هدية لي نادية عثمان وست البنات
|
الاخوات العزيزات ست البنات ونادية اها يلا دي فتح خشم ورونا درركم
الطاهر 2 انحنا برضو راجنك جيب عدتك وتعال
لكم مودتي وهاو دعوة لكل الحبان للتواصل وبناء دوحة نستظل بها وهي مرسى لكل شوق ضال وانا مستنيكم .
لكم الحب والتحايا بروق
عبدالله
الناس الحراز
يا احلى من كل الرذاذ
وندية زي ناسي العزاز
لو غبتا منك ببقى فيك
بس انتي خليكي الحراز
مغروسى في نفسي البقت
تقراكي في همس المجاز
تتماشى بيك جوة الفرح
وتعطر الناس اللذاذ
|
|
 
|
|
|
|
|
|
|
|
Re: ابدكي كيف - 1- هدية لي نادية عثمان وست البنات (Re: عبدالله وداعه الامين)
|
عبد الله وداعة الامين
تسلم ياغالى وهدية من ايدك مقبوووووووووووووولة ومعناها انى على بالك !!
والله مشغولة شوية فى حوار لوزير الخارجية .. لكن بجيكم
بس عليك الله ياعبد الله ساعدنى فى نكت البوستات التلاتة بتاعة ابداكى لانو قصائدى الفيها كانت محفوظة فى كمبيوترى قبل مايبوظ وطاااااااااارت بعد التصليح وكمان عشان نكمل غنانا الفيها
سمح ؟!!
| |
|
|
|
|
|
|
|
|
|
Re: ابدكي كيف - 1- هدية لي نادية عثمان وست البنات (Re: ست البنات)
|
Quote: ببقى الأمل ليك والعزاز
تتشابا كل سحابة
تشرب من نداى
ولو جاء المحل
أروى الحراز
من الدموغ البنزفا
فرح اللقا
شوق السنين الما انطفأ
ساعات رضانا والصفا
تمسح ألم كل البعاد
وعنا الجفا
*******
وشكرا على الهدية ،
ست البنات . |
يا عازة بي املك سماي
ريحة نداك كيف نوصفة؟
نتهجى حرف الذكرى كيف
لو كان حروفك هي الصفا
وانتي القمر جوه القلوب
مالكنا ضوك ما انطفى
يابنية من وهج الشمس
ممهورة بي طيب الوفاء
مكسية من نور الفرح
ونديه تدينا الشفى
شكرا ست البنات ولكي ودي
عبدالله
| |
|
|
|
|
|
|
|
|
|
Re: ابدكي كيف - 1- هدية لي نادية عثمان وست البنات (Re: عبدالله وداعه الامين)
|
جيب الحروف
خلينى انظم لك كلام
زى الزمرد فى البهاء
كلمات بسيطة مموسقة
روعة نشوق فى البادية
وفرح اياب الغائبين
لما الزمن يدى الوفاء
تضحك وجوه ناسنا الغبش
والعيشة تبقى مسهلة
ونقدر نقول
يحيا الوطن
عاش الوطن
لا لون يفرق
بين شعوب
لا زول يتوه
فيك يا دروب
لا لكنة تصبح معضلة
لا جواز مرور
لا مساءلات
سودانى بس
تكفيك صعاب
سودانى تفتح ألف باب
جوه الوطن
نقعد ملوك
ملعونة سيرة الأغتراب
ست البنات .
| |
|
|
|
|
|
|
|
|
|
Re: ابدكي كيف - 1- هدية لي نادية عثمان وست البنات (Re: نادية عثمان)
|
Quote: واحشنى ياناسا عزاز
جيتونى فى زمن الوجع
بيكم بشوف الدنيا حب
طيرا حنون فى الليل سجع
بيكم بشوف المغترب
فى هدأة الاحداق هجع
الغربة نار بيكم تهون
وبيكم غريب الدار رجع !!! |
واحشانا ياام طبعا سمح
يا زارعة رسمك في الوجع
يا فاردة بينات النجوم
الالفة والذوق الهجع
واتلفحك وسط الغيوم
واداكي من لونو النقع
الفرحة يا ام قلبا وفي
ونديهة زي وقع النقع
| |
|
|
|
|
|
|
|
|
|
Re: ابدكي كيف - 1- هدية لي نادية عثمان وست البنات (Re: عبدالله وداعه الامين)
|
شوق للوطن وناسنا الهناك
شوق للدروب والأبتهاج
نيمنا وقرضنا وأرضنا
شوق لى نخيلنا وترمسا
ريحة التراب
لما المطيرة تبللها
وشاى المغيرب والصفا
ترمة كسيرة مملحة
موية كبيقنا الصافية
وقعدت عصير فى الهمبريب
والضحكة طالعة مجلجلة
وخاترا رضى
وزولا وفى
وناسا يرجبوا للوجيع
لا محزنة ولا عكننة
شوق للبحر
نيلنا السدر
شوق للضريسا وللعصار
شوق للكتاتيح الصباح
فجخيبة الطين
والرتيلا
صوت البهم
ريحة القشوش
شوق للوطن
شوق للغبش
فى كل فج
متغربين
واللاجئن
وداخل البلد
---
ست البنات .
| |
|
|
|
|
|
|
|
|
|
Re: ابدكي كيف - 1- هدية لي نادية عثمان وست البنات (Re: نادية عثمان)
|
وفاح الأريج من عبقكم*
أصلو الجمال من حسنكم*
والدنيا زاهية منورة*
بى ضيكم*
الاحبه والله الصبر غلبني عديل كده.. بس قلت اديكم طله واقول ليكم
ربنا يحفظكم ويمدد في ايامكم ويلبسكم توب العافيه.
واسف لو قطعت العقد المنضوم من الجواهر..
واصلوا.....................................
| |
|
|
|
|
|
|
|
|
|
Re: ابدكي كيف - 1- هدية لي نادية عثمان وست البنات (Re: عماد شمت)
|
الاكرم عماد شمت
Quote: الاحبه والله الصبر غلبني عديل كده.. بس قلت اديكم طله واقول ليكم
ربنا يحفظكم ويمدد في ايامكم ويلبسكم توب العافيه.
واسف لو قطعت العقد المنضوم من الجواهر..
واصلوا..................................... |
تسلم على المرور الحلو يارائع
واكيد حانواصل لو بقيت انت متابع ياعماد
وتسلم يارب
| |
|
|
|
|
|
|
|
|
|
Re: ابدكي كيف - 1- هدية لي نادية عثمان وست البنات (Re: عبدالله وداعه الامين)
|
أبدانى من وعر المسافات
المشيناها سوا
من صوت طفل جيعان
وفاقد المقدرة
لا شاف فرح
لا ضاق فواكه
لا مرة داعب للدمى
الحمى ساكناه دهور
وأوصاله دائبة مهددة
لا ضاق عصير البرتكان
لا عاش حنان
تفاح شنو ? !!
وأعناب شنو ?!!
يقراها ساى فى المدرسة !
ويرجع يعود
اخر النهار
بى موية أو
من غير ملاح
أبدانى من شيخنا
الكبير
الباع شبابيك البنا
وباع البناء
وحقب ايديه وكتفها
وشخت شخيت فوق الأرض
قش الدموع بالملفحة !!
حيران يكوس فى مخرجة
أبدانى من صبابة كابة
فى الخريف
وقطية واقعة مسدرة
وصريف حينيين اتكأ
ولموا العناقريب
والجهال
والعدة يابا مبعثرة
والدولة تحلف بالطلاق
الشعب شبعان واكتفى
أبدانى من ألام كتيرة
موهطة
أبدانى من حزن الغبش
أبدانى بلقاك بفرح
رغم الأسى
ورغم المحن
نقدر نقول وا سعدنا !!
ست البنات .
| |
|
|
|
|
|
|
|
|
|
Re: ابدكي كيف - 1- هدية لي نادية عثمان وست البنات (Re: ست البنات)
|
Quote: وفاح الأريج من عبقكم*
أصلو الجمال من حسنكم*
والدنيا زاهية منورة*
بى ضيكم*
الاحبه والله الصبر غلبني عديل كده.. بس قلت اديكم طله واقول ليكم
ربنا يحفظكم ويمدد في ايامكم ويلبسكم توب العافيه.
واسف لو قطعت العقد المنضوم من الجواهر..
واصلوا..................................... |
الحبيب عماد شمت
والله الشوق ليك يا سيد الناس والذوق
جد مشتاق ليك وواحشانا طلتك
شكرا ليك حبيبنا وسعيدين دايما بيك وبي جيتك ماتغيب عليك الله
ربنا يحفظك انتا كمان
يا اغلى من كل الغنى
واحنّه من شوق العمر
يالديمة شايل همنا
شايلنا فوق عز النجوم
بالبهجة شاتل دربنا
لك تحياتي وكل الود
خليك معانا وادينا من سحرك نشيد
ودي وحبي
عبدالله
| |
|
|
|
|
|
|
| |
ست البنات
عماد شمت
فيس بوك
تويتر
انستقرام
يوتيوب
بنتيريست