رحبوا معاي بي حنان بلو بلو في البورد!!

طلعت شمس الصباح بالليل .. ملطخة بالوهج بدرى .. وجيتك ياحلم بكرة بيوت شعرى وعشم ممدود .. كفاي شيل حال سنينك يابلد يانيل .. سكات خشمك من الحجوات ..... يشق بطن الامل بالخوف ..


وجع ياناس وجع ياناس .. طعم جيتك يغش حلق الامل خطوات .. محطاتك مرارة سكة الميعاد .. وهمس الشوق مرق حفيان فى شوك الليل .. بعد ماغرقت الانوار تجابد فى وحل صمتك وتشهد بى زفير الهم ...


صعيد الامنية الطاهر قطع صلواتنا ليك ياخوف بعد تكبيرة الاحرام .. وضوك بالنية دمعة شوق .. تسابيحك .. تشهد عبرة الغنوات وقولة آمين .. معاك مابنخشى .. جور الناس .. كلام الناس .. ولا الضالين ..

بسلم وابتديك نافلة عشان ما ابقى ناقص دين ..

غيابك يانشاف فكرى رحيلك فرت جناح الغيمة لى بلدا رذاذا كضب ..

بنده ليك

يامطيرة صبى لينا فى عينينا ..

( تحت خطين )
كمل صوتى وكان فى موية كان اتوضيت وصليت صلاة الاستسقاء .. بس الابريق وقع من ايد الشيخ .. الدنقر يلملم حبات السبحة بعد ماشال الريح مصلايتو ..

سعال ياناس ؟؟؟؟؟؟

احمد وينو من وجعة هجايم الليل ؟؟؟

احمد وينو من دفقة مجارى السيل ؟؟؟

جواب للبلد

احمد غايب مافى الركايب ..

احمد غايب فوق بلد المصايب ..

ولا جانا كلب سنونو صفر .. ولا حلب الناقة ..

ولا ده ولا ده ..

ولا اسمو حسنين ولا اسمو عمر ..

جانا خبر رحيلك من عرش السما السابع .. قالوا نجيمة حوامة غافلت المجرة ولفحت توبا .. ومرقت كايسة الضو .. لكن انا مصر اعرف النيزك المتهور ده قاصد انو يرجم نجيمتنا السمحة ويلحقا ( نجمات طه ) ؟؟ ولا القصة قضاء وقدر اسود ؟؟

وراجيك فى السما السابع .. فى سدرة نهاية العتمة والضلمات ..