|
هل الأحوال في السودان هي السبب .... أم نحن أدمنــّا الغربة ؟ ..... أم ماذا ؟
|
إنتو ناويين تقعدوا في الغربة دي لمتين ؟ والله صحي البلد حالها ما بـِسُر لكن شوقنا ليكم هو البخلينا عاوزين رجعتكم ...
الكلام الفوق دة عبارة إعتدنا سماعها من أهلنا وأصحابنا في السودان ، في معظم الأحيان تكون إجاباتنا على شاكلة ( غايتو ربنا يهوّن ،،، والله الواحد مفكر جادّي يشوف ليه حاجة هنا لأنها الغربة زاتها بقت ما بتغتـّي ،،، نحن زاتنا ما عرفين حدها وين لكن قريب إن شاء الله ) وغالبا الواحد ما بتكون عندو إجابة وربما تفاجأ بالسؤال رغم أنو بيتكرر ليه دايماً . أما في أحايين أخرى نكون أكثر موضوعية (فقط للإستهلاك الجدلي في النقاش) وتكون الردود مستصحبة الواقع المعاش في بلاد الغربة مع نظرة واقعية للأحوال في السودان وتلقى الواحد يقول ليك ياخ بالله إنتو زاتكم لو لقيتو طريقة مخارجة يوم واحد ما بتقعدو مع الكهرباء والموية القاطعة دي سيبك من (الرفاهية من تعليم وعلاج وأساسيات الحياة التانية !!!) لاحظ أن التعليم والعلاج بقى رفاهية... وبعبارات أخرى : بالله دي بلد الواحد يرجع ليها، من دغش الرحمن الواحد ما يعرف يستحمّ ،،، ومما تمرق من البيت بتاع الحركة يعكِّـر ليك يومك بإيصال بتاع أخوان كدة ،،، ولو عندك كم حاجة عاوز تعملها ترجع آخر اليوم تسب وتلعن وما عملتا نصها .... يا زول أنسى قصة رجعتنا دي ... عليم الله نحن لو ما إنتو وباقي الناس ال هنا ما نفكر نجي حتى في الإجازة .
هناك جماعة من الناس بيتستروا وراء الهدف من الغربة ، نظام يقول ليك بس الواحد يعمل ليه واطة ، وبعدين الواطة بس نرمي ساسها ،، وبعدين نبقى في الزول لو قدر عمل ليه أوطتين خلف خلاف ،،، وشويتين كدة طالما ربنا هوّن لينا موضوع البناء دة الواحد يتعصر ليه سنتين تلاتة ويشطّـب بيتو يا زول العمر ما معروف !!!
|
|
|
|
|
|
|
|
|