بوست لتوثيق غرائب وعجائب الأسئلة التي تطرحها لجان الانترفيو والمعاينة بالسودان!!!

Quote: كانو ثلاثة رجال(ابونضاره ,ابوصلعه ,والضعيف ) و امرأة جيت داخل و قعدت في الكرسي المخصص للجلوس قال لي لحدهم :اسمك بالكامل - محمد احمد علي صالح _طيب اتكلم لينا عن مشروعك بالانجليزي بديت اتكلم كده وبعد دقيقه قاطعني واحد منهم وسألني - ؟؟من وين انت يامحمد اجبت :من مروي لكن مستقر في الخرطوم قال لي :قدمت للسد ولا لا ؟؟ قلت :قدمت للسد لكن ماشالوني قال :غرييبه انك شايقي ومن مروي و مايشيلوك قلت ليهو :انا اصلا الحته البسألو الناس فيها ,انتو من وين دي ماوصلتها اصلا ..... المرأة :يامحمد !ماعندك اي هوايات كده ,بتلعب كوره ؟بتسبح ؟اي حاجه زي كده رديت :انا ولا فخر لعاب جدا في الكوره ,واتعلمت السباحه في مروي قالت لي طيب بتلعب شطرنج ؟ قلت لييها :اكييييييييييد ابو صلعه :يعني هسي لو جبناك تلعب شطرنج مع واحد من ناس اللجنه ديل بتغلبو ؟ قلت ليهو :اكييييد بغلبو المرأة :شكلك كده بتلعب من الثانوي ,واثق كده قلت :لالا بلعب من الابتدائي ماتمينا كلامنا زي الناس ابو نضاره خش بسؤال " ابونضاره :جيب جمله اسميه قلت :الجو جميل ....مثلا يعني ابونضاره :مثلا!!يعني مامتاكد من الجمله ؟ قلت :لالا انا متاكد من الجمله لكن مامتاكد من الجو ... الضعيف :اذكر منابع النيل ؟ قلت :ينبع النيل الازرق من بحيره تانا في اثيوبيا ,والنيل الابيض من بحيره فكتوريا بين تنزانيا ويوغندا المراة :نهر القاش وين ؟ قلت :في كسلا قالت :ماهو مصدر مياه نهرالقاش جاوبت :الامطار ابونضاره :ادينا اسامي اتنين من اصحاب المعلقات ؟ قلت :انا عارف السؤال البعد ده حيكون قول لينا بيتين شعر لواحد فيهم ,عشان كده حاقول ليك اسامي اتنين انا حافظ ليهم الحارث بن حلزه وعمرو بن كلثوم قال لي انت كاشف المعاينه دي ولا شنو ؟ قلت :ههههه ,والله سمعت من الناس القدامي ابونضاره :يلا طيب ادينا البيتين قلت : الا هبي بصحنك فاصبحينا *ولا تبقي خمور الاندرينا مشعشعة كان الحص فيها *اذا ما الماء خالطها سخينا قال لي طيب في الختام كده اقرا لينا بما يتيسر معك من القرءان بديت اقرا ليهو في سورة النور فجاة كده وقفني في حته كده وقال لي :هنا في الحته دي حكم التجويد شنو ؟؟ "انا طبعا الحاجه الوحيده البعرفها في التجويد الادغام " طوااااالي قلت ليهو :الحكم الادغام عاين لي كداااا ,و قال لي :لالا خطأ قلت :اي غلط ,لانو الادغام ده كدا كدا كدا ,وقعدت اشرح ليهو في الادغام عشان اعمل فيها بعرف تجويد و انسيهو السؤال بتاعو لكن للاسف مانسى ,وعاد لي السؤال تاني قلت ليهو الله اعلم ابوصلعه :بعد ده ممكن تتفضل تمشي قلت شكرا