لقراء وقارئات المنبر العام غير الأعضاء ...... معرفة رأيكم تهمنا

Quote: نازر الخليفة سلامات بالاشارة الي موضوعكم في سودانيز اون لاين بخصوص راي القراء من خارج المنبر حقو تقبلو مشاركتي دي ولو نشرتوها جضومي حايتنفخو بالفرحة اصلهم منفخين طبعا انا من القراء المداومين جدا ومتابعكم متابعة شديدة .. والحقيقة اتمنيت كتير جدا انو يكون عندي باس ويرد ومرة حاولت اراسل بكري وبعد داك اكتشفت انو المسالة دي صعبة ومحتاجة دعم كبير من ناس البورد فاااااا قلت اتحمل العيين بي خرم الشباك افضل واشرف .. من اكتر المرات الاتحسرت فيها اني ماعندي باس ويرد لما قريت النداء الاخير بتاع دكين بالجد ضحكت واتبسطت ورغبت اشاركو في المناحة بتاعتو دي شديد وخاصة لما القي بوست فيهو دكين وعزاز متناقرين في حاجة بالجد كده بكون مبسوط لابعد حد .. وده كوم وبت قضيم كوم تاني يعني ماتتخيل المتعة الانا بقرا ليها بيها تقريبا قريت كل كتاباتها حتي الردود علي الناس دي زولة كلمة مبدعة عليها شوية الغريبة مرات بحس انو الناس مامدنها حقها في الاعجاب كده يعني المفروض يعملو ليها تمثال ولا اي حاجة كده وبرضو لاحظت انها ماعندها مكتبة ما عارف لييه بالظبط يعني ... قريت لي ناس كتيرين وقريت بوستات كتيرة لكن وقفت بالجد في كتابات دكتورة اشراقة الاخيرة دي بالزات ... كتيت عن الديامي الوسيم حتي حسدتهو علي حاله ووصلت مرحلة متقدمة من الاعجاب بيها هي نفسها وبعد داك قريت ردودها للناس في نفس البوست ولما خلصت البوست كنت خلاص وقعت في حبها فعلا ... وطوالي البروفايل فتشت ايميل .. لقيتو وطوالي كتبت رسالة غالبا مابتكون قرتها لكن يسرني اني ماكتمت شعوري جواي كالعادة ... وبعد داك كتبت عن تمبس لما اتمنيت اكون هو رغم اني في الحقيقة ما معجب بيهو شديد لكن خلتني بالجد احس تجاهو احساس تاني وكتبت عن وهبة .. وكتبت كتير واعجابي بيها كل يوم بيزيد كتير .. احترامي العميق دكين .... احترامي العميق بت قضيم ... احترامي العميق دكتورة اشراقة ... احترامي العميق عزاز ... احترامي العميق الغجرية ازابيلا ... احترمي لكم جميعا .. شكرا جزيلا بقدر ما امتعتمونا .. بقدر ما افرحتمونا .. وبقدر ما حركتم مشاعرنا تجاهكم شكرا لكم جميعا السادة البورداب لكم جميعا احترامي اللامحدود خالد غالي ابوظبي