ساخر سبيل : الوصايا الإحدى عشر

مرحبا Guest
اخر زيارك لك: 03-29-2024, 02:36 PM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مكتبة الفاتح يوسف جبرا(الفاتح يوسف جبرا)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
06-20-2007, 06:45 AM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
ساخر سبيل : الوصايا الإحدى عشر

    صحيفة الرأى العام
    الأربعاء 20 يونيو 2007م
    موقع الكاتب www.alfatihgabra.com

    1- لا تندهش :
    كل ما يثير الدهشة لديك كمواطن قد حدث .. تانى المندهش ليها شنو؟ قالو (السلام) ح يجى وح تقيف منصرفات (الحرب) الكل يوم كم مليون (دولار) وإنت كمواطن ح (تنعنش) ..الحرب قامت وقفت و(لدهشتك) لقيت مصروفات (السلام) أكتر من (مصروفات الحرب) !! قالو (البترول) يطلع وحياتك ح تبقى آخر حلاوة ودخلك السنوى ح يزيد .. طلع البترول و(لدهشتك) زادت أسعار(البنزين) و(الجازولين) و(السكر) والسلع الضرورية .. إذن مفروض تكون إنت (كملت) دهشتك ومافى حاجه تانى تثير الدهشة فيك فلا تندهش !

    2- لا تتظاهر :
    أذا تظاهرت فلا أحد يضمن لك العودة إلى بيتك سالما ويمكن بكل بساطه أن تصبح (أسماء فى حياتنا) بغض النظر إن كنت تتظاهر فى ميدان (أب جنزير) أو (شارع الحرية) أو (الجمهورية) وبغض النظر إن كان موضوع التظاهر هو (زياده أسعار) السلع الضرورية أو (الماده 130) أو (اليوم الوطنى لبناء السدود) ولا تعتمد على إنك (بتتظاهر) بصورة (سلمية) معتمدا على (الدستور) الذى يكفل لك ذلك فالكفيل الله !!

    3- لا تأكل :
    لا تحاول أن تأكل (حق الناس) لأنو (الناس) ما عندها (حق من أصلو) بعدين حتى لو عندها حق فهنالك (هيئات) و(دواوين) و(محليات) تقوم بمهمة (أكل حقها) خير قيام .. إنت خليك بس فى (الفول) و(البوش) والطماطم بالدكوة إذا إستطعت إليها سبيلا أما باقى الأكل فهنالك عباد أختصهم الله بذلك .

    4- لا تضحك :
    الضاحك ليها شنو؟ أمشى كدى أول حاجه شوف (الجمرة) فاضل فيها كم؟ وأدى الأولاد الواقفين ديل حق الفطور والمواصلات وأدفع لبتاع النفايات ده قبلما يودوك (الحراسة) وجيب لى (أم العيال) الراقده (سلطه) دى دواء (الملاريا) لو فى حاجه تضحك عليها أضحك على روحك !!


    5- لا تتردد :
    لا تتردد فى قبول أى (عمل) تجده مهما كان متدنيا ولا يتناسب مع ما لديك من (شهادات) وخبرة وخلافه فوجود فرصة عمل (شريفه) مهما كانت أصبحت مستحيلة كما الغول والعنقاء والخل الوفى خاصة إذا لم يكن أحد أفراد (قبيلتك) أو (عائلتك) أو (جماعتك) يحتل أحد المراكز المرموقه .

    6- لا تلعب :
    لأنك ما ح تقدر تلعب مع (الكبار) و(الدوليين) ديل لأنو أصلا إنت ما عندك مساحه عشان تلعب فيها .. يبقى أحسن ما تلعب ؟؟ هو إنت عندك حيل تلعب بيهو (البوش والطماطم) ديل ما فيهم أى (سعرات حرارية) خلى (اللعب) لى ناس (الحليب البارد) و(تمر المدينه) وفواكه (لبنان) و(الخرفان المشوية) !! حريفين وبعرفو ليهو كويس .. ممكن غايتو تلعب ليك (عشرة طاولة) بس ما تدمن الشغلانه وتقعد كتير لأنو لو جاتك (بواسير) دى علاجا براهو عاوز ليهو (مليون) وشوية !!

    7- لا تحلم :
    الحلمان ليها شنو؟ هو فى زول (ميت) بيحلم؟ وأفرض حلمت غير ما تحلم بى إنك زائغ بالشوارع وواحد لابس (أبيض) بيطارد فيك وشايل ليهو دفتر (إيصالات) أو تحلم إنك عاوز تعمل (عملية) لى ولدك وما عندك (حقها) ح تحلم يعنى بشنو؟ .. من أجل صحتك وحيلك المهدود أصلا .. لا تحلم !! إذا أردت أن تحلم فنام فى سرير طفلك الصغير حتى تحلم (أحلام كرتونية) بعيدا عن واقعك المرير !!

    8- لا تتألم :
    بالرغم من إنو جلدك مفروض يكون (تخن) وما فيش حاجه فى الكون مفروض تألمك نسبة لما عانيته من آلام ومعاناة ومصائب أقلها أنك صابر على (مرتبك الشهرى) الذى يساوى بالتمام والكمال قيمة (إيجار المنزل) الذى تسكنه بالرغم من ده كلو فحاول الا تتألم لأنو إذا إتألمت أو ما إتألمت مش ح يحس بيك زول وإبتعد من الأشياء المؤلمة حقا كـ(التلفزيون) و(نشرات الأخبار) !!

    9- لا تقرأ :
    لا تقرأ لأنو القراية ذاتا بقت (مستحيلة) لو عاوز تشترى ليك كتاب إلا تدخل ليك (صندوق) ولو دخلت ليك صندوق الناس كلها لأنها متضايقه ح تقول عاوزة (الصرفة الأولى) وح يدوك (الصرفه الأخيرة) ولما تصرفها وتمشى تشترى (الكتاب) ح يلاقيك بتاع (النفايات) فى السكه يشيل منك (القروش) .. ريح دماغك وأبعد من (القرايه) بلا (قراية) بل غم ما من زمان وإنت قاعد تقرأ .. القراية عملت ليك شنو؟

    10- لا تستعجل :
    لا تستعجل فالعجله من الشيطان والمثل بيقول (تجرى جرى الوحوش غير رزقك ما تحوش) .. لكن هسع (رزقك زاتو) فى تلتله !!

    11 – إبتهج بالأعياد :
    حيث أن حياتك أصبحت ضنكا محضا فحاول أن تبتهج بالأعياد .. وأهو عندك عيد (الإنجاز) جاى بعد كم يوم فأخرج إلى السوق لتشترى لك (جلابية) و(عمة) وملابس جديده (للأولاد) وأم (العيال) لزوم العيدية و(الإنبساط) والإحتفال بهذه الذكرى المجيده !!
                  

06-20-2007, 08:25 AM

nazar hussien
<anazar hussien
تاريخ التسجيل: 09-04-2002
مجموع المشاركات: 10408

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ساخر سبيل : الوصايا الإحدى عشر (Re: الفاتح يوسف جبرا)

    12) لا تغترب: المغترب ليها شنو: تبيع طين اهلك...وعناقريبك...وتدفعهن تذاكر وتسافر لي بلدا
    طين اهلا تبيعوا عشان يرجعك ماتلقاهو..

    13) لا تبكي:البكاء ما بجيبو ليكا...وكان انفتحت بكاء ان كست لي البسكتك ما بتلقاهو...تبكي علي شنو وتخلي شنو؟

    14) لا تدخل اولادك في مدارس خاصة... لمجرد ان عندك حق القصد الاول وتفتكر موضوع التعليم اتحل وتلزم نفسك بي مصاريف لن تأتيك من الغيب...وتعقد ولدك من سندوتشات المارتديلا والهوت دوق -خلي ولدك يدافر مع الغلابة ...عشان تزيد كوم الموجوعين...


    15) ما تقيف في صف الحج كان ماك دافع الضرائب والعوائد ورسوم المحليات والنفايات ورسوم العبور والمخالفات وعندك مونة تلاتة سنين وحق ضحيتين.

    16) ما تلبس برنيطة لبنية ولا لبس لبني كامل وتحوم في السوق بي كرعيك.

    17) ما تشيل معاك اي قرش في جيبك.
                  

06-20-2007, 09:33 AM

فاروق حامد محمد
<aفاروق حامد محمد
تاريخ التسجيل: 08-07-2006
مجموع المشاركات: 4648

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ساخر سبيل : الوصايا الإحدى عشر (Re: nazar hussien)

    لا تكتب ...

    لأنه حيجيك واحد من "قوم" (عمال يشتغلون)

    يقول ليك " ده هجص وليس شيئا جادا "

    أكتب يا شيخ الفاتح عن "رضاعة الكبير"

    ومتى يفطم ؟!!!!!!!!!!!
                  

06-20-2007, 10:32 AM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ساخر سبيل : الوصايا الإحدى عشر (Re: فاروق حامد محمد)

    لا تنام :

    النايم ليها شنو ؟ عشان تصحى تلقى الأسعار اضاعفت وصاحب البيت واقف ليك برة عشان يقول ليك أطلع لي

    من بيتي أنا لقيت مؤجر بدفع لي قدر قروشك دي مرتين يلا يلا أديني عرض اكتافك .

    لا تدخل مستشفى :

    حتى لو عايز تعمل عملية أحسن تعملها في البيت عشان المستشفى الحكومي بقى زي بيوت الأشباح وغرفة

    العمليات ما معقمة والدكاترة زهجانين ودمهم فاير حيفشو خلقهم فيك ويعدموك القلب و المصران

    والكلوة أما المستشفى الخاص فدة شعر ما عندك ليه رقبة إذا دخلتو اطلب سلفية من البنك الدولي

    وجدول الدين على مدى 500 سنة يعني دين طويل الأجل حتي يقضي الله الأجل و يسقط بذلك الدين عنك .

    الفاتح !!!

    بوست راائع الله يسعدك ,,,
                  

06-20-2007, 02:59 PM

almulaomar
<aalmulaomar
تاريخ التسجيل: 07-08-2002
مجموع المشاركات: 6485

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ساخر سبيل : الوصايا الإحدى عشر (Re: الفاتح يوسف جبرا)

    أستاذ الفاتح يوسف جبرا
    بهذا الكلام المليان يبدو أننا أصبحنا في موقف أكثر من حرج بل فاق وقوف حمار الشيخ في الممنوع ولأن الحمار حمار شيخ كان لابد أن يكون شأنه أعلى وأرفع من حمير السابله والدهماء ولأن الشيخ شيخ قبيله تداوس شيوخها أم تصالحوا أو ختو رجل فوق رجل ووقفوا على الحياد كان لابد من أن يكون كل ما ينسب إليهم من بغال وتيوس وحمير صاحبة حظوة لا يحق محاكمتها أو تجريمها والحال كذلك فإن وقوف حمار الشيخ في العقبه وما أدراك ما العقبة لا يعتبر جرماً ليس لتواضع الموقف بل لعظمة ومكانة الحمار ، لأن الحمار واصل وعنده ضهر وفي ضهره بردعة وفوق البردعة سرج وبالتالي فهو مسنود.
    وسبب موقفنا هذا أننا بعد قرأة موضوعك أصبحنا لا نفرق بين لا النهاية ولا النافيه وكلاهما تمارسه السلطة معنا فتنهينا عن خلق وتأتي بأبشع منه كما أوضحت وتنفينا بالقدر الذي أصبحنا معه نشبه النفايات النووية فلا مهجر ولا معبر ولا مطار أو سي بورت يقبل بنا.
    أنا كعاقل أكره كراهية التحريم كل جملة تبدأ بحرف لا الناهية إعتقاداً مني أنني صاحب عقل وصاحب العقل يجب أن يترك له الخيرة من أمره في الإختيار فالله سبحانه وتعالي خالق الكون جعل لنا حرية الإختيار فقد قال في محكم تنزيله وهديناه النجدين إما شاكراً وإما كفوراً يعني ده الشارع البوديك كوبر وده الشارع البوديك طوكر يعني على كيفنا بعيداً عن النتائج المترتبة على ذلك الإختيار.
    لكين برضو نرجع ونقول إنه أى شئ في حياتنا كان له الآثر الواضح في تكوين مثل هذه الشخصية بدء من التربية والتنشئة والتعليم الولد يكون دكتور أو مهندس وحتى إختيار شريكة العمر في عهود قد خلت بأنه يجب الإقتران ببنت العم – فلسفة الزول بغطي قدحو -
    الموضوع يا الفاتح بنقاطه الأحد عشر مثير وأحسب أنه قد نقاش الفكرة حتى لم يبقى للآخرين مجال للإضافة ، وهكذا لم يتبقي لنا من الأمر غير أن نمتع أنفسنا بالدهشة.
                  

06-21-2007, 00:10 AM

Ashraf el-Halabi
<aAshraf el-Halabi
تاريخ التسجيل: 10-08-2006
مجموع المشاركات: 5508

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ساخر سبيل : الوصايا الإحدى عشر (Re: الفاتح يوسف جبرا)

    جبرا
    وصاياك الحداشر (عشرة على عشرة)
                  

06-21-2007, 00:27 AM

ود محجوب
<aود محجوب
تاريخ التسجيل: 04-22-2003
مجموع المشاركات: 7643

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ساخر سبيل : الوصايا الإحدى عشر (Re: Ashraf el-Halabi)

    الأخ الفاتح جبرا

    وصايا غالية تشكر عليها


    وهذه وصية ليك كصحفى


    لا تكتب فى صحيفة سودانية

    فإذا قلت الحقيقة اعتقلك وزير العدل
    واذا كذبت شتمك الناس
                  

06-21-2007, 02:22 AM

abdalla elshaikh
<aabdalla elshaikh
تاريخ التسجيل: 03-29-2006
مجموع المشاركات: 4001

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ساخر سبيل : الوصايا الإحدى عشر (Re: ود محجوب)

    لامن تكون جوعان أوعاك تحلم

    لأنو حلـم الجوعان عيش...

    والخوف يجي واحد يصادر العيش
                  

06-21-2007, 03:50 AM

سيف الدين حسن العوض
<aسيف الدين حسن العوض
تاريخ التسجيل: 02-13-2007
مجموع المشاركات: 3403

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ساخر سبيل : الوصايا الإحدى عشر (Re: abdalla elshaikh)

    شكرا جزيلا لك الاخ جبرا
    ومعك نتابع هذه السخرية
                  

06-21-2007, 05:09 PM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ساخر سبيل : الوصايا الإحدى عشر (Re: الفاتح يوسف جبرا)


    يا جماعة أيها الإعزاء الذين كم كم أسعد بمداخلاتهم وحديثهم إذرونى إن كنت لا أستطيع الرد عليكم فردا فردا فالصحة ليست كما ينبغى ... أحبكم جدا
                  

06-21-2007, 06:30 PM

فاروق حامد محمد
<aفاروق حامد محمد
تاريخ التسجيل: 08-07-2006
مجموع المشاركات: 4648

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ساخر سبيل : الوصايا الإحدى عشر (Re: الفاتح يوسف جبرا)

    ألف سلامة ليك ... يا عمي الفاتح ..

    مالك ؟؟؟ اوع تكون كترت من الطماطم بالدكوة!!؟
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de