|
|
|
 Re: أهو البزنس الناجح .. وأشياء أخرى.. (Re: محمد عبد الماجد الصايم)
|
ولا تنسى انك من بلاد أهلها : لو فرحوا و ضحكوا قالو استغفر الله،
و لو حزنوا و بكوا قالوا أيضاً استغفر الله
.. و جاء في الأثر : أن الفرح هو إخراج اللحظة، و أن الحزن هو استبطان اللحظة.
و الاستبطان نوع من الاستثمار
فرحت ود الصائم، فرحت كوستي و الجبلين، و كل من هم على قول شيخنا ود الرضي : دمعي للتياب بلا
المشكلة في صحائف الذمة المالية لهذا النوع من البرنس balance sheet and financial statement
حدثنا عن المنطقة الوسطى بين الوسواس و الإلهام : تلك المنطقة التى تتحرك فيها حاليا حركة الجماهير الشايلة
الضنى و الأسية
| |
 
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
لست بزبونٍ فحسب
بعد التحايا والتجلة والتقدير والمحبة والاحترام ووووووووووو
لشخصكم الكريم
مولانا وصاحب مقترح شركة الأسى
وإن كنت أميل إلى كونها
مدينة الأسى
فإن تسمحون لنا مولانا
بكشكٍ لبعض المرطبات الدسمة
فلدينا أطنان أشجان ذات شوكٍ خادشٍ
ولدينا أحاديث مع النجوم مبتورة
وأزهار أريجها شوك
ولدينا أشواق عمشاء عرجاء مما بها من أشواق
ولجميعها
ويضاف إليها
نرى أهليتنا بها لافتتاح كشك
بمدينتكم
فأذنوا لنا
...
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: بله محمد الفاضل)
|
أما من ناحية الحزن وحجز المقعد الاول في قلب صفه..
فإنني أكون الأولي بجدارة معروفة وبعضها غير معروف..
أما من حيث رجوعك الذي علي الرغم من أنه ليس هناك ضمان لإستمراره..
فإنني أيضا سعيدة فرفقة الحزن أيضا نبيلة ومريحة!
.......
.......
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: khaleel)
|
مولانا ود المرتضى حباب الرجعه للبيت القديم ...
ونعم الاستثمار فحياتنا ما بين صرخه البكاء الاولى وصرخه البكاء الاخير تسير على طريق طويل من الاحزان والاحتفاء به حتى اننى اشك اننا سنحزن لو اختفى الحزن من حياتنا ....
انظر يا رعاك الله لاغانينا تجدها عباره عن ملحمه من البكائيات المفعمه بالشجن الاليم والحزن النبيل وتفكر فى عاداتنا وتقاليدنا التى تختلط بالحزن فى اشد ساعات الفرح
| |
|
|
|
|
|
|
|
|
 Re: أهو البزنس الناجح .. وأشياء أخرى.. (Re: عمار عبدالله عبدالرحمن)
|
** مولانا ودحامد (محمد المُرتضى)..
** سلام ومساءك خير..
## حمداً لله على سلامة الطله ,, بالله كثر لينا من موسيقى الساكسفون فهى تُريح الأعصاب وتُعدل المزاج كطبيعة أرض هولاء العازفين المهره ..
## حكمة:- الله فاتح ليهم المُكيف ومدينا ضهرو ##
(ودام الود بيننا)
(ابو محمد فؤاد)
^
^
^
## كسره:- غايتو البوست دا حيجيب كل الناس البيحبو التنفس من الأماكن المُرتفعه عن سطح البحر ..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
[] عودتك الى الكتابة في المنبر أفرحت كل من يحب لجمال والأدب
يا مرتضى المقهى بتاعك دا ما بينجح الا تعمل على الجدران عزل للصوت
لانو بكاء السودانيين على شاكلة ...
ببكي وبنوح وبصيح ....
والمناديل لاتكفي لتجفيف الدموع فلا بد من ابتكار وسائل اخرى للتعامل مع الفيضانات الدمعية ...
مالو دمعي فاض شابه البحر
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: طارق جبريل)
|
Quote: فإن تسمحون لنا مولانا
بكشكٍ لبعض المرطبات الدسمة
فلدينا أطنان أشجان ذات شوكٍ خادشٍ
ولدينا أحاديث مع النجوم مبتورة
وأزهار أريجها شوك
ولدينا أشواق عمشاء عرجاء مما بها من أشواق
ولجميعها
ويضاف إليها
نرى أهليتنا بها لافتتاح كشك
بمدينتكم |
حبيبنا بله ،
حسبتك ضمن المدعوين للإفتتاح..
المضروبين جوّه القلب وفي البورصات ، النيرانم مبقبقه غض النظر عن البواعث ..
أهل الطموحات الخائبة والرجاءات السائلة المندلقة على الرمال..
رمال الذكرى يا كابتن.. من كلهاري للنهود وبالعكس.
أصحاب الأماني الخَّدرت والأكلا الطير بعد ما لَبَّنَت..
وباعتبارك بتحفظ العُشره فلك الكُشك والأشواق وعضوية دائمة مع discount لك ولصاحب /ة أعمق الآهات ..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: Ahmed al Qurashi)
|
الكلمات أفكار ولا يمكن التفكير بدونها
ولا كلمات هنا تقال عن صوت الساكس
وعلاقة " النغمة " الفيهو بالمكتوب
شي أقرب للجنون هذا الذي يفعله هذا " الأمهري "
تعيد ثم تعيد ثم تعيد فلا تجد في نفسكـ غير رغبة الإعادة وتكرار الإعادة
أي كلمات يمكنها صياغة إحساس السمع هنــا ؟
.....
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: saadeldin abdelrahman)
|
| Quote: ..باقي نحن أهل وجعة ولذلك أكيد سيطول بنا المقام.. |
حباب محمود،
هناك تطيب الزيارة يا أبا مآب لكن لمثلك نفرش بساطا أحمرا ننتظر قدومك شريكا لا أجيرا أو زائرا،
ولأنك خبير ، فلن أحذرك من بعض السيدات و الساسة فدموعهم بينها والتماسيح نسب قديم ..
لاتهتم بهم ، فقط إحذرهم. .
سيشوشون على سمعة المحل وصدقيته ومستوى العملاء والنادلين والنادلات والمنتحبين..
باختصار ، بطفشوا علينا الزباين الأصائل الممكونين جد جد والممكونات....
فشعار مقهانا قول مأثور (ليست النائحة الثكلى كالمستأجرة) شايف الأصاله كيف..
محمود ، حبابك تاني.
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: كمال سالم)
|
اغالب دمعي واتصبر .. واقول يا الله صبرني
على فراقك ياغلى الناس .... سواد حظي الملازمني
زمااان قالو الغرام قسمة.... حقيقة القسمة بالايد
مصيرو الحى يعود تانى.... ويهل فى سمانا اجمل عيد
_____________
ياسلام ياسلام يامولانا وقت تهل وتطل علينا هنا
حتى بتجيب معاك احلى البشر طراوه ودكتور القريش والكلمه الحلوه
بالمره كمان بالله شوفو لينا شيقا وين
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
يا مولانا حبيب الكل..
ياخ أمبارح ساهر بي مقطوع الطاري القاوت..
والليلة جد جد كاسر كرونة...الذهاب إلى الحمام هو أكبر همومي التي أنجزها بمشقة لا تقل عن مشقة تسلق قمة إيفرست...
للدرجة دي ..تصدق؟؟
الظاهر علينا اتملينا في الشية والمرارة بتاعة كرامة العودة..
غايتو.. الله غالب..
الـ Foundation والـ Setup والــ Layout كلها ما شاء الله تم تنفيذها بخبرات حزن السنين
عيني باردة وكدي....
قال فقيد الوطن "حميد"..
"يا نفس فجر القصايد...ما ضِهِبْ في بعدي عنك..
أصلي متغرب عشانك...راضي بالجاييني منك..
(ما شكيت) شُحْ الليالي...
(ولا بكيت) نُحْ شلتوا حالي..
رغم إنه الحال بيفضح..
إلا كُتْ في الحارة بصرخ:
يا وطن عز الشدايد...
=============
إن شاء الله يا مولانا القاوت دا يخليني أقدر على التعاطي مع حكاية الكونسيبت ديك...
..
والمحبة شديدة..
..
.
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: ABUHUSSEIN)
|
..
يعني يا مولانـا خليتنا ندحرج التحايا بي هناك وانت منداح بي هنـا ..؟
نورت يا مولانـا ..
نحن لما نجيك خاشين بنجيك مدلدلين يدينا وكاشفين صدورنـا
اما ما باليد من ضيف ذات اليد .. يعني في شنو حاجة سمحه ما مسختها ..؟
وما في القلـب .. في القلــب يا مولانـا
| |
|
|
|
|
|
|
|
|
 Re: أهو البزنس الناجح .. وأشياء أخرى.. (Re: محمد المرتضى حامد)
|
وليييييييييه ليه ياع عصافير ليه الأسى,,
غايتو لا أملك إلا أن أقول لك بعد الترحيب ,,,
كامل تضامنى معاك يا مولانا فى ورطتك الأسفورية دا,,
السرايا الصفراء دى باقى لى بقت زى ضرس العقل,,
يتاورك من حين لآخر دون إستئذان ويجوط حاجاتك
ويلخبت كيمان الأشياء لديك.
ياخ إنت حارم وصلنا مالك,,
وبعدها,, التحايا ذوات اللون الأخدر والبنفسكج زاتو ..
غايتو أعفى لى ضحكى رغم البزنس الناجح بتاعكم دا,,
آى والله ضحكت فيك ضحك شديد..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
مريح الشويه دي؟
بس كل على ليلاه ،
أطهره على ما اجترحنا من ذنوب وأقساه على وطن لم يعد له مساحة إلا في الذاكرة،
عارف يا حمد ، الشعب دا شقي ،
قيل أتعس الناس من كان بذاكرة قوية وماض أليم ، لكن نحن تعاستنا أننا بماض جميل وحاضر براك شايفو..
ثم ذاكرة تتأرجح بين الخدَر والغيبوبة.. ;hx
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
| Quote: حمد الله بالسلامة محمد وطراوة |
حبيبنا شمس الدين،
طراوه رفيق زمن طفلين كنا لاشايلين هم لاعارفين بكرا الجايينا،
حفيانين حالقين في الطريق الشاقي الترام،
و (الجايينا) دا يا ود ساتي هذا البوست بعض نتائجه،
طراوه يتمم كيف كل رفاق الأيام الجميله قبل أن تشتتنا المنافي على الأطلس،
بالله بس شوال عيش وانشرط من لوري جاري..
قلت ليك الوطن الإنسان والزمان والمكان تاني إلا في الجنه،
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: maia)
|
انت ليك يومين هنا .. وانا ماجايب خبر ..
هذا وحده سبب كاف للبكاء بلا توقف .. ما يفوت من السعادة يحزن ..
كنا حزاني لغيابك .. وها هي دموعنا تفيض اذ تعود ونلتقي ..
عجبت لدموع الفرح مثل دموع الحزن ترطب القلب .. وتغسل ادرانه وما علق به ..
قال لنا الاهل .. الضحك بلا سبب قلة ادب .. والبكا بلا سبب شناة طبع .. اي هذين جائز هنا .. والموقف مفرح حد البكاء ..
اقترح ان تضيفوا لاواني المقهي قوارير تصرف للرواد مثل قوارير دموع نيرون .. تجمع فيها كل قطرة دمع يذرفها الباكي
ويسلمها عند خروجه .. ف(نقوم) بتصديرها للقاسية قلوبهم .. و(نقوم) .. لكوني منكم .. وعندي من (الاسية) ما اسد به حاجة
المقهي اذا تغيب البكاؤون ..
وشعارنا معا نبكي .. حزنا وفرحا
وبركه الجيت ..
عمر علي حسن
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: عمران حسن صالح)
|
المترع روعة وجمالا حد الاكتفاء
الزول السمح الفات كل الناس رمانة هذا المنبر وكل المنابر
شلالات الفرح التى عمت القرى والحضر لم تدع لنا ما نقوله وان كنا اكثر الناس سعادة بعودة الالق وتفتح البنفسج
ياخ شايف طلتك عملت فى الناس شنو ؟ معاك شفنا طراوة الجميل وقرشى وعرفنا اخبار شيقوق فرفقا بنا ما تطول الغيبه
ونحن نلقاها من وين ولا من وين الاسية من الحاصل علينا ولا من غيابك
أعترف لك أستاذى مرتضى انك واحد من قلائل أشعرتونا ان سودانيز اونلاين دى بيتنا فحرام ان نهجر من بيتنا مرتين
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: اسماعيل يوسف محمد)
|
| Quote: انظر يا رعاك الله لاغانينا تجدها عباره عن ملحمه من البكائيات المفعمه بالشجن الاليم والحزن النبيل وتفكر فى عاداتنا وتقاليدنا التى تختلط بالحزن فى اشد ساعات الفرح |
يا سامي ،
الدكتور أحمد القرشي له سِفر في شأن البكا والحزن في الأغنية يضاهي Gray's Anatomy في مرجعيته ،
بوست كنا نسميه الأنتونوف 225 ماريا ، قدم فيه بمعية عماليق الحقيبة ناس ودالموج وطراوه
والسمار والغاوين والصِيِّع ومن لف لفهم من رواد الفضاء ألعابا بهلوانية تشيل منام العين حتى لكأني
بالجقر وعوض بابكر خاتين الخمسه في اللتنين ، ياخ الشباب ديل أظنهم اخترعوا الكحل قبل
أن يولد ال (رشا) زاتو ، صدقني كان عملا تفوق على ملحمة جلجامش ، دموع حتى خشيت على القراء
من الكَتَراكت والكيراتايتس ، بكا ما خمج ، ياخ لامن بكري أبوبكر دق سدرو وحلف يطبع البوست
على نفقتو ليبقى مرجعا للحيارى وتراتيلا في محراب ناس ليلى ..
ترانيما يصفها الحكماء لكل من باتت شكواه مويه في غربال ..
الحزن فى الاغنية السودانية -الجزء الاول - الدموع ا...يبة وتطفئ نار العشاق
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
| Quote: مشاركة في البزنس ,, |
يا عمار ، (الناي) دا مقبول وحانعتبرو مساهمة عينية وسندرجه في البالانص شيت القال عليها طراوه..
الناي يا ودعبدالله إكتشاف أسطوري لايقل وفاءا للخاطر عن الساكسفون ويتميز عليه في التخصص ..
أظنك تدرك أن صولو الناي ليلا يعيد للخلايا نشاط نموها ويصححها رغم إنو بيشمِّت في المستمع العواذل..
آلة مُخلِصة ووفية جَد..
تسلم يا عزيز
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
| Quote: بالله كثر لينا من موسيقى الساكسفون فهى تُريح الأعصاب وتُعدل المزاج كطبيعة أرض هولاء العازفين المهره .. |
دي حقيقة،
المرحوم فوستو بابيتي ملك الألتو ساكس كان بيكتبوهو روشتة لمن أزرى بهم الدهر ،
يعني بدل الصيدلية تمشي أقرب محل أسطوانات تشيل واحد سي دي تسمع منو مقطوعه عند اللزوم،
بالطبع الإستماع لكامل الألبوم في يوم واحد عندو نتائج عكسية، فوستو زول خطير ، Kenny G بالنسبه ليهو دافوري ساي..
دي كلها منتجات الحزن الجميل الأصيل يا مولاي..
شكرا سيدي عبدالكريم..
| |
|
|
|
|
|
|
|
|
 Re: أهو البزنس الناجح .. وأشياء أخرى.. (Re: محمد المرتضى حامد)
|
يا ودحلتنا ازيك يا اخي
ماداير - اممدر البوست - عشان مانحكي حزن ناس امدر
قلنا نخليه حزن عام لكل العامه
مشكلتنا في العرس بنبكي
وفي الفراش بنبكي
وفي الوداع بنبكي
وفي الجيه بنبكي
وفي النجاح بنبكي
وفي الفشل بنبكي
وفي الكشتينه بنبكي
ياربي مويت النيل دي فيها سر البكاء دهـ ولا فهمونا السبب
ناس دمعة في طرف عينه
كسره - يا ابوعلي:
هسع بيت البكاء بقوا يأجروا ليهو بكايات - عشنا وشفنا
خليك قريب ما تبتعد
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: علوبه)
|
Quote: يا مرتضى المقهى بتاعك دا ما بينجح الا تعمل على الجدران عزل للصوت
لانو بكاء السودانيين على شاكلة ...
ببكي وبنوح وبصيح ....
والمناديل لاتكفي لتجفيف الدموع فلا بد من ابتكار وسائل اخرى للتعامل مع الفيضانات الدمعية ...
مالو دمعي فاض شابه البحر |
يا ودالقرشي،
السودانيين في جوه الجوه صادقين ، عدا من اتسعت بقعة "وكر الشيطان" في أدمغتهم، لذا تجد أغلبهم
صادقين في بكاهم، وزي ما قال د. علوبه أعلاه نحن أي موقف بيبكينا، ياخ لو إتنين إتصالحوا بعد قطيعة
أمامنا لانملك سوى التجاوب بدمع لايمسكه التصنقع.. نبكي لتلاوة عوض عمر وأغاني ودالرضي وسيرة
الرسول ولامن فريقنا القومي يشيل كاس وأيضا لأم ضاع طفلها في الزحام ومع محمد الأمين وهو يقدم
التماسه الشهير : تعال فرح ليالينا،
لعلك تذكر ذلك اللاعب في كاس العالم الذي إغرورقت عيناه بالدمع حين عزف النشيد
الوطني لبلاده فأدمعنا معه..
الحزن أصيل يا أحمد لذا تطول إقامته في النفس خلافا لكل العواطف ياخ..
ما بيطلع بالساهل
تعتقد أنه قد ولى لكنه يعود ولو بعد ألف عام ..
ديتول القلوب..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
| Quote: أيكون الفرح في الحُزن إنطوى ؟؟؟ |
بالحيل،
أليس يتوج كل منهما بالدموع،
معاوية المدير العام للود..
شكرا على المناغمة السابقة ولكن القلم ليهو رافع،
يعني إنت وطارق وسعد الدين وآخرين شغالين لَز لامن نوم عيني بقا لي سهر..
دي حركه عملوها أحبابنا شمس الدين السنوسي وياسر طيفور في ال CN Tower الإنت عارفو ، كلما أتذكرها
حيلي يموت .. خدعوني وأوقفوني على زجاج يرتفع عن الأرض 600 متر..
ياخ الشلل أسبابو كتيره..
المنبر دا يا مولاي يتطلب حالة نفسية عصية وعزيزة ولا أظنها ستتوفر قريبا أو تأتي،
لك حب مُصفَّى يا مدير..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
| Quote: البزنس ده خلينا ليكم إنت ود جبرين ,, نحن كتر لينا من الأشياء الأخرى دى . |
يا كمال ،
الأشياء الأخرى دي قررت أعمل بيها بوست مختلف، ودالبشرى وودالصائم وأبوحسين غيروا رأيي ،
يبدو أن خطوط الضغط العالي لن تتحمل المزيد..
الناس ديل قالوا الفيهم مكفيهم وأنا أتفق معهم،
تسلم يا ابن خالتي..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: أبوبكر أبوالقاسم)
|
Quote: غايتو لو كان طولت زيادة
كنا حندبل ليك الجرعة مع ود جبرين
نقلقلك انت و البحبوك قلقلة ًشديدة
كفى الله المؤمنين شر القلقلة
ام كراعا بره :) |
المنبر دا يا سعد (بياكل) ليهو ساعه من يومك إذا نشطت فيه وهذا يتعارض مع
التزامات لاتنتهي، عشان كده لامن القماش يقصِّر بتبدا ترقع من هنا وتلتِّق من هناك وتتبدل
الأولويات واللغه والحروف زي ما قال د. شادول وتبدأ عملية التضحية بعدة حاجات جميله للأسف ،
سيما أن هذا المنبر غنى له فضل الله محمد في ستينيات القرن المنصرم (الغريبه الساعه جمبك تبدو)
وأنت أدرى بما كان عليه الحال في الستة شهور الأخيرة التي استعار فيها ودالرضي لساني قائلا
(لا أعي إقبالي صرت من البَي شخصي كاد يغبالي) .. لكن لا أخفيك عندما يمر المنبر بموسم التحاريق
ويختفي زملاء الطرابيزه والناس البيقُصُو في ويست البوست بتمانيه وتهاجر القماري ، بنمشي البحر،
حتى مرات يكون في كلام دايرين نقولـوا نقوم نقطِّعوا في مصارينا بين الساحل والصحراء..
عموما يا سعد، السوق جد كعب.
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
| Quote: مصيرو الحى يعود تانى.... ويهل فى سمانا اجمل عيد |
شكرا على المجاملة ياود عبداللطيف،
كما أشرت أعلاه ، إضافة إلى الأسباب الأخرى إلا أنك أحيانا إذا ما اخترت الإستماع فقط
برضو ستعرف أن من يستمع الآن يجد له شهابا رصدا.Quote: حتى بتجيب معاك احلى البشر طراوه ودكتور القريش والكلمه الحلوه
بالمره كمان بالله شوفو لينا شيقا وين |
يا الوليد زولك دا كأنه يتنصت لأخبار المنبر فقد إتصل من أحد صالات الترانزيت
ليتابع مجريات الأمور في سودانيزأونلاين ، يعني عايزني ألخص ليهو ما جرى أثناء خلوته المجيدة
في قريته البردانة بالدندر قبل أن يصل مسقط،
بالله الطيب دا مش متفائل؟
على الرغم من أنه غادرنا برتبة ملازم حزين لقضاء عطلة في البلد لكنه سيصل اليوم بحمولة حزن تؤهله
للترقي لرتبة فريق ولاتسلني ياتو فريق أو ياتو غريق ،
الرجل في رحلته من الدندر مرورا بالخرطوم سيأتينا بذخيرة من مواضيع على طبيعتها لم تعدل وراثيا ..
فترقبوه..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
Quote: "يا نفس فجر القصايد...ما ضِهِبْ في بعدي عنك..
أصلي متغرب عشانك...راضي بالجاييني منك..
(ما شكيت) شُحْ الليالي...
(ولا بكيت) نُحْ شلتوا حالي..
رغم إنه الحال بيفضح..
إلا كُتْ في الحارة بصرخ:
يا وطن عز الشدايد...
|
يا محمود يقال أن كل الأشياء في هذه الحياة عبارة عن صورة متخيلة مترجمة في المخ،
الحاجات كلها ذبذبات ، خيرها وشرها ،
اللون والمشاعر والصوت والرائحة والطعم، وحتى الخلايا بالطبع..
وهذا ما دعا كاتب لأن يقول أن الإنسان المكون من ذرات ماهو إلا mad dance of electrons
وأن هذه الذبذبات لاتفنى وتسافر في الكون الفسيح على موجات مختلفة الطول، بعضهم يسميها الأرواح،
ونحن يا جيِّد نعزي النفس بأن حميد وأمثاله قاعدين ولانحسبهم أمواتا بل أحياء في فضائهم مسافرون...
الموت ليس نهاية للإنسان كما تعرف.. لكن لقلة علمنا وضعفنا نجزع لفراق من كانوا معنا،
عشان كدا حزننا على انعتاق أرواح المجيدين والأحباب من أجسادهم يجب أن يكون فرصة للتأمل
وليس طريقا لبلوغ جرف الوجع أوشفير الكمد..
هات غنيه لسياد البلد..
يا حليلم..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: Ahmed al Qurashi)
|
Quote: البعض فتح ليك بوستات حدادي مدادي
و البعض الآخر قامو الليل و دعوا في الثلث الأخير منه لي عودتك
و إنت جايي ليهم بالحزن ......!!!!! |
ABUHUSSEIN
طبعا،
جئتهم بالأصالة المستدامة بعيدا عن الفرح الزائف المؤقت،
أولئك الأحباب لايستأهلوا كل أصيل يا عزيز،
لاتنتظر أن أغني (الليله جيت شايل الفرح) ..
هسه خليك مني أنا ، إنت مستوى الحزن في صدرك كم درجه ؟
حكِّم ضميرك ..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: سيف الدولة كامل)
|
Quote: نحن لما نجيك خاشين بنجيك مدلدلين يدينا وكاشفين صدورنـا
اما ما باليد من ضيف ذات اليد .. يعني في شنو حاجة سمحه ما مسختها ..؟
وما في القلـب .. في القلــب يا مولانـا |
بالعكس يا تمبس
ما قاعد تجي (مدلدل يديك ) نحن بنشوف المشاعر وهي الأبقى
نعم ، مافي القلب في القلب
إكتفيت بالمشاركة الهاتفية في فقدكم الجلل وسعدت كثيرا بتجاوزكم والعزيزة داليا الحزن
نسأل المولى أن يبدلكم خيرا وعوضا وأن يتقبل دعاء كل من رفعوا أكفهم للسماء
تسلم يا علاء
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
Quote: ياهلا ومسهلا بمولانا
نزلت اهلا وحللت سهلا |
وداللمين كيفك يا سيدي وشكرا على الترحيب،
والله يا محمد كنت – وما زلت – على قناعة أن المقهى عمل ناجح بكل المقاييس، هل
حدث وأغمضت عينيك وقمت ب (رص) أحلامك عن الوطن وإمكانية تحقق 10% منها بوضعها في المتاح من مربعات الواقع؟
هذا حال معظم المهاجرين ، ولم يبق في العمر الكثير،
أما أهل الداخل فأحلامهم تتبخر أمام أعينهم،
لذا رأيت أن جميعنا يحتاج المحل المقترح أثناء تلك الإغماضة،
لكن برضو، عملناالمقهى ولا ما عملناهو الله في..
إنه نعم المولى ونعم النصير
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
Quote: غايتو لا أملك إلا أن أقول لك بعد الترحيب ,,,
كامل تضامنى معاك يا مولانا فى ورطتك الأسفورية دا,, |
يا أيمن ،
تضامنك خليهو معاك،
عارفك محشور في زمرة الشامتين،
إنت بالذات ومعك ودجبرين وسعد ومحمود والمدير،| Quote: ياخ إنت حارم وصلنا مالك,, |
إذا كان الواحد طريقك دايمن فارشو ورد وطريقي مدني - الخرطوم فلا بد من تفاديك،
الحال في حالو يا ود الطيب لم يتغير ، غيب وتعال تلقانا..
وبمناسبة غيب دي يا أيمن هاشم ميرغني – له الفردوس – فنان سوداني أصيل،
مافي غيرو بيناسب هذا الشعب،
ياخ الزول دا كان مفروض أي من أغانيه تكون النشيد الوطني بدلا عن سالفة جند الله جند الوطن ..
بالذات البقول فيها ( هسه خايف) ..
عارف يا أيمن ، أذكر جيدا كيف شغلت أغاني (حان الزفاف) و (في الليله ديك) و ( بخاف) و ( الطيف) الشعب السوداني
لدرجة أن الإذاعة كانت تبث تلك الأغاني في نشرة الأخبار زاتا مع أخبار الفياتكونغ في سايغون والأوبك في فيينا ،
والنميري في كركوج وودنوباوي وحتى ضمن أخبار الطقس وحار جاف حزنا وشتاءا ورياح ناس ليلى التجارية..
بالنسبة لنا كانت تلك الخوالد أهم من الجمعيه الأدبية..
الغريبه كنا نعتقد أننا وحدنا زبائن للحزن ونتبناه نيابة عن الغير لكني لحظت أن الكبار كانوا يفوقونا ارتفاعا على خطوط اللوعة.. | Quote: آى والله ضحكت فيك ضحك شديد.. |
والله عارفك..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
| Quote: ولو لا مشروع البزنس الجبتو ده كان عملنا Bankruptcy |
حوِّل..
ول أقول ليك يا عثمان ،
إنت ما شبه الدموع وانت ما شبه العذاب ..
انت ما جار شاكيرا ولاعب وسط الماديسون اسكوير.. 
البكا والنحيب وبف نفس القطار دا خليهو لينا نحن كتجارة لاتبور..
تسلم يا ملك السهل الممتنع..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
Quote: البزنس ده ممكن ينجح بنظام سوداني وخليك سوداني
حائط مبكى بطول البلاد من حلفا لنمولي والجعير ما يديك الدرب وكل على ليلاه
والغاوي ينقط بدموعه |
الموقع المقترح هو السودان يا مايا،
أي بقعة عشوائية في المليون ميل موجَّع (سابقا)،
(نمولي) دي كانت زمان قبل أن يصبح الألم 9000 فهرنهايت ..
أما بالنسبة لحائط المبكى فابشرك بأنه في تقاصر مطرد ،
كان بطول النيل لكن مع الشايفو دا سيصبح بطول شارع النيل..
ربنا يحفظ ما تبقى من النيل،
ويحفظك..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
Quote: اقترح ان تضيفوا لاواني المقهي قوارير تصرف للرواد مثل قوارير دموع نيرون .. تجمع فيها كل قطرة دمع يذرفها الباكي
ويسلمها عند خروجه .. ف(نقوم) بتصديرها للقاسية قلوبهم .. و(نقوم) .. لكوني منكم .. وعندي من (الاسية) ما اسد به حاجة
المقهي اذا تغيب البكاؤون .. |
يا سعادتك ،
وفقا لمعلوماتي المتواضعة أن أهل روما كانوا ينعمون بعافية بدنية على الأقل،
حتى مع نيرون والحريق الشافوهو ناس إسبرطة، لكن زبائننا ديل يعوزهم إسعافا مجهزا
يرابط عند الباب ، الجلوكوز والصوديوم كلورايد ضرورية وبالجردل كمان تحسبا لاحتمالات الجفاف،
المحاليل مهمة يا أبا أمير، سي سي في سي سي في الوريد الرئيسي أو كما تغنى أحد (مطربي) الزمن الخائب،
تذكرتك جيدا وأنا أعالج موسيقى Yared Tefera لتنزيلها في الصفحة هذه وهي مقطوعة لأغنية بيزونيش بيكيلي
كنت أطرب لها كثيرا في الطفولة عندما يعزفها عبدالله دينق عازف الساكس بفرقة جاز المدرعات بعنوان (المانسونا) ،
كان زمنا سمحا..
هسه جاز للفانوس مافي والمدرعات بقت مكنات لحام..
يا سعادتك ما زلنا ننتظر بوست وعدتنا به عن الهضبة..
أرحنا به قبل السنين الممحوقه تجري ..
..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
Quote: يعوزهم إسعافا مجهزا
يرابط عند الباب ، الجلوكوز والصوديوم كلورايد ضرورية وبالجردل كمان تحسبا لاحتمالات الجفاف، |
استاذي الحبيب
ارثي لحالك .. وانت تفكر في الاسعاف والجلوكوز والصوديوم .. اذن فانت تحتاج لدراسة جدوي جديده .. قد لا تدفعك لتبدل
موقفك وتتخلي عن فكرة المقهي .. ولكنها ستدفعك للتفكير في حجم الامكانات ومقدار الانفاق الذي يجب توفيره لتقديم الحد الاقل
مما ذكرت ..
فمقهاك هذا لن تقل مساحته عن 700 الف كيلو متر مربع .. بعد (التخفيض) الذي منحك اياه ربك الكريم في 9 يوليو 2011
واقتطع معه عشرة ملايين بكّاء كانوا سيقطمون وسطك بمزيد من الاحتياجات ادناها انهم لن يستطيعوا الحضور للمقهي للبكاء
وسيطلبون ان يحضر المقهي اليهم ..
مقهي بهذه المساحة وبالعدد المتوقع من الرواد لا يصلح ان يزود بسيارات الاسعاف ولا بالمحاليل .. وسيكون افضل لحسن
ادارته ان يترك لكل شاة ان تعلق نفسها من عصباتها ....... ويمكنك ان تاخذ الحكمة من ادارة المقهي الحالية فهي متمرسة
وتسندها خبرة 24 عاما الا ستة وتسعين يوما ..
واعزيك في المشروع العظيم .. وابكيييييييييييي انا .. كل ما ذكرت جماله ..
عمر علي حسن
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: عمر علي حسن)
|
Quote: عدت على مراكب الحزن
بحروف تسعد القلب الحزين |
أستاذنا الجيِّد الشامي المفيد ودعبدالوهاب ..
لم أعد على مركب حزن ، هذا المركب – كبعض الفيتناميين ولاجئي القوارب – أقيم فيه
بشكل مستدام جزاءا وفاقا على تبني قائمة الرجاءات المستحيلة، ولا ألوم أحدا ،
أعرف أسباب تلك الٌإقامة وأعيها جيدا ، فأنا من نفر أدمنوا الحلم بجنات من أعناب
أُبدِلت بأخرى ذوات أكل خمط وأثل وشيء من سدر قليل وحتى السدر غادر الخلاء وسوق
المَلَجه وأصبح في السوق الأسود ، نستاهل يا عزيز، فالواحد منا بسط الأماني كل البسط
وقعد ملوما محسورا ، أكثرنا الجدال والمراء ثم التفتنا فوجدنا المساء قد ولى ومعه
الصباح فقدمنا عرضحالا يتململ منه إنشتاين في قبره ختمناه بطلب نسج على
نولِ إبراهيم الرشيد يقول: يا زمن وقِّف شويه..
وهيهات ..
الشامي ..
برضي ليك المولى الموالي
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
Mayada Yousif
شكرا على الترحيب يا مياده، لكن هنا في ناس كتابتهم بطعم نعناع صديق للبيئة
والشعب الهوائية ، تفتح ممرات الرئة وتزيل مخلفات الكتاتيح وترتق الأوزون..
-
Aiman Awad
لا أغالي يا سيدي إن قلت لك أني سعيد بأن أعرف أنك من المتابعين لهذياني هنا،
سبق أن قرأت لك كلاما على ذات النسق في بوست آخر أطلقته من منصة الفيسبوك،
هذه المداخلات من الفيسبوك فكرة عبقرية لأنها بوصلة تعين الأعضاء في إبحارهم
الليلي وتجنبهم الشعب المرجانية وتقودهم إما إلى موانئ السلامة أو تسليم شارة الكابتنية والتنحي ..
-
Albasha Telmeiz
والله كان رجعت الفيسبوك حاتكون إنت السبب..
تسلم يا أمير..
-
Nazar Alhassan
| Quote: مولانا بقيت زي السمسارة لو شكرو ليك الموووت تشتهي هسي انت خليتنا نمشي نحزن ونبكئ ونتنخج :) |
دي ما سبقك عليها كاتب يا نزار،
-
محمد عبدالقادر ضرار
يا رجل هذه حاتمية منك تفوق ما أقدمه هنا ، لكن يا محمد زي الكلام دا
يرهقني ، يجعلني أرجع البصر كرتين قبل البث ..
محبتي.
-
Balal Balal
ناس أمدرمان جوَّه الجوه،
بالله استوديو الوادي؟
وعلي يسراك الطيب سيد مكي وأمامك الشيخ أحمد الشيخ،
هل ابتعت أيام الثانوي العام رِداء (شورت) كاكي استاكبورد من سانتي الهندي؟
هل مررت بحلويات الدانوب؟
مكي باي نايت؟
كان لاقيت الخرده كوستاوي،
شارع الفيل؟
ياخ والله إنت بكلامك دا ..
غايتو..
لكن البكا كلو هناك ..
في تلك البقاع..
كانت كاتيوشا وأصبحت سكود..
أين من عيني هاتيك المنصات
بلال زورني مره ..تانيه
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
| Quote: ونحن نلقاها من وين ولا من وين الاسية من الحاصل علينا ولا من غيابك |
طابت أيامك يا اسماعيل
يا سيدي ستعرف بعد قليل أن الأمر يتطلب (مداراة) وأنه لابد من حالة هروب كامل لإنجاز
مسائل لامجال فيها للتأجيل أو المجاملة..
هذا المنبر جمعنا بأناس ستعرفهم وستسعد بهم وهم من يدفعك للبقاء ويعملون كحوائط صد
ضد الزحف الصحرواي ونكوص النفس والإحباط ، ستعرف أن ما يجري من عمل خير بعيدا عن الأعين
في هذا الموقع ربما يفوق ما يراه العامة..
يا عزيز.. أشكر لك الكلام السمـح وأتمنى لك رحلة طويلة ممتعة مع سفريات سودانيز المشرقة..
Welcome aboard يا بركه..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
Quote: وهو ذات الشيء الذي أكّده صهيل السكسفون في المقدمة إذ فعل بالوجدان ما يفعله الطل حين يدغدغ ذرات الثرى العطشى فيرحل الدعاش مبشراً ببدء دورة جديدة من الحياة..
أسعدتني يا صديقي بهذا الحزن النبيل...
أما فيما يتعلق بالبزنس بتاعك وشريكك ود جبرين فلنا أجر المناولة .. بجيب ليكم كترة زبائن عييييييك..وأنا أولهم ...وإذا لقينا الحكاية ماشة نرفع معاكم شعار "الدمعة" بجنيه...يفهموها بطريقتم بعدما يخشو.. |
الكتابه عقب مداخلاتك صعبة يا الزاكي،
مِحنَه عديل،
يا الباهي، كلامنا الدراش بنحاول نجمله بموسيقى وكلمات الآخرين ،
الساكسفون محفِّز لغدد الكلام وبقدرما هو مطرب لكنه جارُ للحزن والشجن الحيطه بالحيطه..
رأيت إقبالا على (مشروعي) حتى قبل اكتمال الفكرة ، كنت أظن أن الرهق حالة خاصة ويبدو
أن الكل في نصب معتق ولغوب مزمن ، وسعيد بأن (أضمن) مشاركتك المبكرة وأثق أنك لن تضن
علينا بنصحك وإرشاداتك ..
شعار (الدمعة) جد مبتكَر، هم (سيفهموها بطريقتم بعدما يخشو) لكن بعد ما يخلصوا حايقولوا عايزين (إنسانية)..
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: طارق جبريل)
|
| Quote: مرحباً مولانا والعود أحمد وأنت تمتهن بزنساً لا تبور تجارته فى بلدى.... |
مولانا أبوبكر،
ربما عدت للكتابة المتواضعة التي ترى لكنني كنت أشارك بالقراءة في الشهور الست الأخيرة
التي لم أكتب فيها لأسباب ذكرتها أعلاه وغيرها من الأسباب التي أنت أدرى بها باعتبارك
من قبيلة القانونيين وتدرك ضيق ذات (الوقت) وقلة مايُمكِّن من المشاركة المفيدة هنا،
مقهانا يا مولانا كان خِتا التتار بيقفِّل ويتعرض للتصفية ولكن نحن ماشين في الخطوة نمد
كل منا يدندن: ما بخاف من شئ برضي خابر المقدر لا بد يكون ، شايف كيف !
كثير من الأحداث مرت في الفترة المعنية يا أبا بكر وكثير من السمحين قضوا وتركونا
لهذه الفانية ولولا إيمان بالله وخشية من إثم سب الدهر لردَّدنا مع المتنبئ:
قبحا لوجهك يا زمان فإنه وجه له من كل قبح برقع.(ليك نسايم الشوق دوام رسلى)
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
شاه
سلام من صبا بردا
يازول انت كت غاطس وين
( خوفي ان تكون قد التهمتك بنات آوي)
وبما انني من قبيلة البهجة والسرور العظمة
فدخولي للاطمئنان على البزبس البكائي
حارفدك قريبا بما كتبته في زمن سابق عن بكائية السوداني
هسة دخلت اطايبك
اخونا الزمان احمد طراوة .. اجمل من لعب تنس طاولة .. ياخ مشتاقين
Quote: ولا تنسى انك من بلاد أهلها : لو فرحوا و ضحكوا قالو استغفر الله،
و لو حزنوا و بكوا قالوا أيضاً استغفر الله
.. و جاء في الأثر : أن الفرح هو إخراج اللحظة، و أن الحزن هو استبطان اللحظة.
و الاستبطان نوع من الاستثمار
فرحت ود الصائم، فرحت كوستي و الجبلين، و كل من هم على قول شيخنا ود الرضي : دمعي للتياب بلا
المشكلة في صحائف الذمة المالية لهذا النوع من البرنس balance sheet and financial statement
حدثنا عن المنطقة الوسطى بين الوسواس و الإلهام : تلك المنطقة التى تتحرك فيها حاليا حركة الجماهير الشايلة
الضنى و الأسية |
عجبتني فتواك
واكثر ما ريحني فيها
الوسوسة
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: محمد المرتضى حامد)
|
إلهي .. و سيدي يا محمد ..
مرتضى .. جيت ؟؟ .. يا سلام ياخي .. دايرك أنا في شي بيخصك .
قدورة " قِده " في مرة جاني و جاب آخرو :
قده : عملت دراسن جدون عند أستازه نعمات المحامية بت ناس عمك عبدالمنعم .. كلمتها بموضوع كده ، قامت كتر خيرا عملت لي الحاجة دي .. مجان و الله . هسه خلاس بقيت عليهو .. لاكين قت في اللول نشاور اللخوان .. وللا شنو ؟؟ ما خابا مين اشتشار .
أنا : أها
قده : فضلة خيرك دايرين نعمل مخبازة و كده !!
فتحت خشمي و رجيت تمامة الكلام لهذه دراسن جدون " دراسة الجدوي " ..
أنا : أها !!
قده : مخبااااازه قت ليك .. مخبازه .
أنا : مخبازه دي أكلة يا قدد .. ما مشروع .
قده : أيوه أكلة أصلية بتدي طاخات كويسه و نظامات .. فيها اي شي محتاجو اللنسان .. ربنا اداها للمساكين تعويض .. إنت قايل شنو ؟
أنا : يعني ح تعمل دكان متخصص مخبازه ؟؟ .. طبلية مثلاً ؟.. طربيزة ؟؟ .. شنو بالظبط ؟
قده : لا لا .. نظام غنا حبش نضيف .
أنا : ......... !!!
قده : شوف ، نأجر بيت .. نجيب حبش سمحين كده و عندهم ركايز و نظامات . ديوان كبير كده و نفرشو سجاجات و تكايات تراخيم .. كويس معاك ؟ .. و الود سامي جلوطه كويس في نظام الدلوكة و البونقوز . كويس معاك ؟ .. نجيبو نديهو حرباشات تفتوفه كده و حنك سنين .. ح يوافق .
شفت شنو .. نقوم نقول للحبش ديل يغنو و يرقصوا لكن بالهداوة عشان ناس الكبسونة ما يفرنبوا علينا .. كويس معاك ؟ .. لو فرنبو زاتو ما مشكلة .. طه أخو ناس فوزي اب شعر شغال بومبه .. بندخلو في القصة دي . كويس معاك ؟ .. إنت زاتك تشتغل معانا .
أنا : أشتغل معاكم شنو أنا ؟؟ .. رنت و منو ؟؟
قده : أنا و سامي و الحبش و طه البومبه . إنت بس تعمل لينا المخبازه . مش إنت كنت في بورسودان مدة كده ؟؟
أنا : أعمل المخبازه وين أنا ؟؟ وين أعملا ؟؟
قده : في بيت الحبش ده .. لكن بره من الديوان . نعمل ليك نظامات بره في الشارع و لمبه و نجيب عبدو قريب ناس منعم السر . يغسل الكواري .. الود ده كويس ، ما تشوفو مكبس كده .. شاطر .
أنا : أيوااااااا .. أها و منو الزباين ؟
قده : الزباين هم اللخوان البجو للبشكة بتاعت الرقيص و الغنا دي .. أصحابنا الزمان ناس السيلما و ناس الليق ، و برضو اللخوان الكانو بيقعدو جنب الساحة الشعبية و عيادة فاروغ و ناس عباس في ميدان البقر .. هسه طبعن الحاجات دي كلها قفلت . ديل زباين كدددده .. صدقني مكسب تقيل و ح نغندل .. شفت شنو . ح يعرفو موضوعنا ده و يتكبو يجو يعبو بطارياتهم عندك و يدخلو يرقصو .. شفت شنو . و ديل ضمان ح يدخلوا و يجوك طالعين تاني .. تديهم مخبازه ، يدخلو تاني و يجو طالعين، تديهم تاني .. تاني يدخلو .. نظام زي ده . لغاية الساعة حداشر بيكون خلاص .. شطبنا و غلتنا معانا . اشيل انا نص الستة و إنت و سامي و الحبش و طه البومبه و عبدو تخشو قسمة لباقي الأووله . نجي تاني يوم كده برضو .
أنا : أيواااااا .
قده : اها .. كيف معاك ؟؟
أنا : إنت بتعرف محمد المرتضى ؟؟
قده : أيوه .. مش بتاع مغلغ التضامون ؟
أنا : هو عندو مغلق ؟؟
قده : كيف ما عندو ؟ .. مغلغ بابين في سوق السجانة . زول طويل كده و صلعه و كاضم طوااااالي .. صاح ؟ .. خال ناس المرحوم نصر الدين عابدين الله يرحمو .. بعرفو كويس ، مالو ؟
أنا : مافي شي .. أديني منفاخ العجل بتاع الشفع ديل لو صلحتو . ماشي أنفخ .
| |
|
|
|
|
|
|
|
|
|
Re: أهو البزنس الناجح .. وأشياء أخرى.. (Re: Emad Abdulla)
|
Quote: إلهي .. و سيدي يا محمد ..
مرتضى .. جيت ؟؟ .. يا سلام ياخي .. دايرك أنا في شي بيخصك .
قدورة " قِده " في مرة جاني و جاب آخرو :
قده : عملت دراسن جدون عند أستازه نعمات المحامية بت ناس عمك عبدالمنعم .. كلمتها بموضوع كده ، قامت كتر خيرا عملت لي الحاجة دي .. مجان و الله . هسه خلاس بقيت عليهو .. لاكين قت في اللول نشاور اللخوان .. وللا شنو ؟؟ ما خابا مين اشتشار .
أنا : أها
قده : فضلة خيرك دايرين نعمل مخبازة و كده !!
فتحت خشمي و رجيت تمامة الكلام لهذه دراسن جدون " دراسة الجدوي " ..
أنا : أها !!
قده : مخبااااازه قت ليك .. مخبازه .
أنا : مخبازه دي أكلة يا قدد .. ما مشروع .
قده : أيوه أكلة أصلية بتدي طاخات كويسه و نظامات .. فيها اي شي محتاجو اللنسان .. ربنا اداها للمساكين تعويض .. إنت قايل شنو ؟
أنا : يعني ح تعمل دكان متخصص مخبازه ؟؟ .. طبلية مثلاً ؟.. طربيزة ؟؟ .. شنو بالظبط ؟
قده : لا لا .. نظام غنا حبش نضيف .
أنا : ......... !!!
قده : شوف ، نأجر بيت .. نجيب حبش سمحين كده و عندهم ركايز و نظامات . ديوان كبير كده و نفرشو سجاجات و تكايات تراخيم .. كويس معاك ؟ .. و الود سامي جلوطه كويس في نظام الدلوكة و البونقوز . كويس معاك ؟ .. نجيبو نديهو حرباشات تفتوفه كده و حنك سنين .. ح يوافق .
شفت شنو .. نقوم نقول للحبش ديل يغنو و يرقصوا لكن بالهداوة عشان ناس الكبسونة ما يفرنبوا علينا .. كويس معاك ؟ .. لو فرنبو زاتو ما مشكلة .. طه أخو ناس فوزي اب شعر شغال بومبه .. بندخلو في القصة دي . كويس معاك ؟ .. إنت زاتك تشتغل معانا .
أنا : أشتغل معاكم شنو أنا ؟؟ .. رنت و منو ؟؟
قده : أنا و سامي و الحبش و طه البومبه . إنت بس تعمل لينا المخبازه . مش إنت كنت في بورسودان مدة كده ؟؟
أنا : أعمل المخبازه وين أنا ؟؟ وين أعملا ؟؟
قده : في بيت الحبش ده .. لكن بره من الديوان . نعمل ليك نظامات بره في الشارع و لمبه و نجيب عبدو قريب ناس منعم السر . يغسل الكواري .. الود ده كويس ، ما تشوفو مكبس كده .. شاطر .
أنا : أيوااااااا .. أها و منو الزباين ؟
قده : الزباين هم اللخوان البجو للبشكة بتاعت الرقيص و الغنا دي .. أصحابنا الزمان ناس السيلما و ناس الليق ، و برضو اللخوان الكانو بيقعدو جنب الساحة الشعبية و عيادة فاروغ و ناس عباس في ميدان البقر .. هسه طبعن الحاجات دي كلها قفلت . ديل زباين كدددده .. صدقني مكسب تقيل و ح نغندل .. شفت شنو . ح يعرفو موضوعنا ده و يتكبو يجو يعبو بطارياتهم عندك و يدخلو يرقصو .. شفت شنو . و ديل ضمان ح يدخلوا و يجوك طالعين تاني .. تديهم مخبازه ، يدخلو تاني و يجو طالعين، تديهم تاني .. تاني يدخلو .. نظام زي ده . لغاية الساعة حداشر بيكون خلاص .. شطبنا و غلتنا معانا . اشيل انا نص الستة و إنت و سامي و الحبش و طه البومبه و عبدو تخشو قسمة لباقي الأووله . نجي تاني يوم كده برضو .
أنا : أيواااااا .
قده : اها .. كيف معاك ؟؟
أنا : إنت بتعرف محمد المرتضى ؟؟
قده : أيوه .. مش بتاع مغلغ التضامون ؟
أنا : هو عندو مغلق ؟؟
قده : كيف ما عندو ؟ .. مغلغ بابين في سوق السجانة . زول طويل كده و صلعه و كاضم طوااااالي .. صاح ؟ .. خال ناس المرحوم نصر الدين عابدين الله يرحمو .. بعرفو كويس ، مالو ؟
أنا : مافي شي .. أديني منفاخ العجل بتاع الشفع ديل لو صلحتو . ماشي أنفخ . |
الله يجازي محنك يا عماد كتلتنا بالضحك يا مسنووووووووووووووووح
| |
|
|
|
|
|
|
| |
محمد المرتضى حامد
محمد عبد الماجد الصايم
أحمد طراوه
محمد البشرى الخضر
بله محمد الفاضل
Mahmoud Mustafa Mahmoud
Muna Khugali
وضاحة
سليمان القرشي
حمد عبد الغفار عمر
شمس الدين ساتى
khaleel
سامى عبد المطلب
طارق جبريل
يحي قباني
عمار عبدالله عبدالرحمن
عمران حسن صالح
عبدالكريم أحمد الامين
Ahmed al Qurashi
معاوية المدير
الشامي الحبر عبدالوهاب
كمال سالم
Balla Musa
محمد سنى دفع الله
ناصر احمد الامين
saadeldin abdelrahman
وليد عبد اللطيف
ABUHUSSEIN
tmbis
أيمن الطيب
Osman Musa
الزاكى عبد الحميد
علوبه
Yassir Tayfour
أبوبكر أبوالقاسم
سيف الدولة كامل
الطيب شيقوق
د.محمد حسن
Emad Abdulla
فيس بوك
تويتر
انستقرام
يوتيوب
بنتيريست