|
|
|
 Re: أغتيال دكتورة/ احلام حسب الرسول . (Re: shaheen shaheen)
|
(27)
(4) حكايات احلام حسب الرسول (احلام الصول)
- يلا يا جلكنة .. عشان مفروض القبطية ح تكون منتظرنا فى المستوصف الساعة خمسة .
تجلس على سجادة الصلاة .. تضع بين رجليها الكتاب الكريم , رفعت فى وجهى عينان مغرورقتان بالماء المالح
- ده شنو بتبكى ؟ .. يا بت يا عويرة .
- صدق الله العظيم .
رفعت يديها نحو السماء
- عشان بناتى يا رب , عشان حليمة وسعدية يا رب .. بس يتزوجوا ويستقروا .. عشانهم يا رب , انا ما عايزة حاجة من الدنيا وما بطلب كتير .. ما تخلينى اموت هسع .. يا رب , يا رب .
اجلس جوارها على الارض .. اضع راسها على صدرى
- انتى يا جلكنة زمان ايام الجامعة كنتى بتقولى لى انا زى امك .. وهسع انا بقيت امك يا بت يا جرسة .
- خايفة والله العظيم .. خايفة يا بت الصول على البنات , ابوهم انسان ما محترم طفشان فى ليبيا ما عارفين كان عايش ولا ميت .. ما عندهم زول غيرى , ما عندهم يا بت الصول .. والزمن قاسى ما بيرحم .
- ح تعيشى يا جلكنة .. والله العظيم ح تعيشى , وبكرة اذكرك ونحنا بنرقص عشرة بلدى فى عرس حليمة وسعدية .. ح تعيشى وتشوفى اولاد بناتك .. صدقينى .
- والحلم يا بت الصول ؟ .
اصبحت لا احلم .. استيقظ صباحا ولا اجد بقايا احلام فى الذاكرة الكسول .
- انتى انسانة متعلمة يا جلكنة , الوحيدة فينا العلمت نفسها بنفسها .. معقول استاذة تاريخ قدر الدنيا تكون مصدقة قصة الاحلام البتتحقق ؟ .. طيب الزولة الجاهلة تعمل شنو ؟ .
هذه هى اللحظة الفارقة , نقطة الضعف البشرية .. رغم كل الضجيج والشكوى اليومية والتذمر من الحياة , يبقى التشبث هو الشعور الطبيعى .. غريزة البقاء على قيد الحياة هى الاولى فوق كل الغرائز .. الخوف من ذلك العالم الاخر , حيث الظلام و (الديدان) والوحدة الخانقة .
- عملية بسيطة زى دى تخليك كده ؟ .. زى ما قالت ليك القبطية هى عملية اقل من ساعة , وبعد اسبوعين راحة فى السرير ح تبقى زى الحصان .
- عايزة اشوف منعم يا احلام .
- منعم منو ؟ .. الزول الزمان داك ؟ .
- الزول الحملتا منه بالحرام .
- جلكنة shut up .. يلا قومى , ميرفت ح تجينا من البنك , والبعثية ح تكون هسع مع القبطية فى المستوصف .
- اول مرة فى حياتى اعمل عملية .. اول مرة يا بت الصول .. انا الظاهر على كبرتا بالجد .
- انتى كبرتى يا بت من زمان .
- عايزة المصحف يكون معاى فى اوضة العملية .
- مافى مشكلة .. قبطية ح تعمل العملية , ومصحف تحت راس المريضة .. وحدة وطنية , هاهاهاها .
- توكلت عليك يا علام الغيوب .. توكلت عليك .. بسم الله الرحمن الرحيم .
ونحن ننهض سويا من سجادة الصلاة .. ادركت انها سوف تموت .
(اواصل)
......
شاهين.
| |
 
|
|
|
|
|
|
|
|
Re: أغتيال دكتورة/ احلام حسب الرسول . (Re: shaheen shaheen)
|
(28)
(1) حكايات بدرالدين العجب المحامى
- يعنى الا نحنا نسأل عنك يا شيخنا ؟ .
اعرف انهم لن يتركونى فى حالى .. انشبك سقف حلقى فى طرف حديد سنارتهم المدببة الحاد , اصبحت تحت رحمتهم تماما
- ما فى انتخابات محامين قريبة !! .
- هو انتا الا تخدم الجهاز فى انتخابات المحامين ؟ .
لعبت معهم اللعبة الاولى .. كان الافق مسدود فى وجهى انا ابن الطبقة الكادحة , اول انتخابات للمحامين فى عهدهم , اختارونى انا العبد الفقير لله , صديق الجبهة الديمقراطية القديم فى جامعة القاهرة فرع الخرطوم .. فقط الرصد , هم قالوا لى ذلك
- ارصد لينا بس الناس .. منو لسه شيوعى ؟ , ومنو زح من الشغلانة .. منو لسه متحمس ؟ ومنو رمى كلام السياسة وراء ضهرو ؟ .. يعنى انتا زول طموح يا بدرالدين واحنا ممكن نساعدك شديد , زول زيك لازم يكون عندو مكتب محاماة فى شارع محترم فى قلب الخرطوم مش مكتب كان اساسا دكان بقالة فى شارع واحد فى الحاج يوسف .
لعبت معهم لعبة الرصد الاولى والثانية .. والثمن مكتب صغير انيق فى شارع (الجمهورية) .. ثم ماذا بعد هذا ؟
هم من قالوا لى ان ابتعد
- ما عايزين تعمل اى علاقة شخصية مع اى كادر اسلامى من المحامين .. خليك كده فى الصورة بدرالدين العجب المحامى المشهور واليسارى المتمرد على الحكومة واحزاب المعارضة , كل فترة اكتب فى الجرايد اشتم فى الحكومة وطالب بالديمقراطية واهمية الليبرالية السياسية فى الساحة الداخلية والكلام الكبير كبير بتاع خولات المعارضة .. المهم ما تتحرق .. ما عايزين اى ريحة فى انو ليك علاقة بالجهاز , يمكن نحتاج نزرعك فى مكان مهم .
اعرف انهم لن يتركونى فى حالى
يجلس امامى صاحب العيون الجاحظة والصوت الاجش , تتجسد فيه كل صفات رجل الامن الكلاسيكى بحذافيرها لم يبقى له الا الصحيفة اليومية المثقوبة ينظر فيها من خلال الثقب لمراقبة الناس
- انتا غيرتا السكرتيرة ؟ .
ابلع لعابى بصعوبة
- السكرتيرة الاولى سافرت مدنى .
- سافرت بعد ما حملت منك .. ولا قبل ما تحمل منك ؟ .
ابلع لعابى بصعوبة
ينشغل هو بتفحص نموذج تمثال (ابو الهول) النحاسى الموجود على سطح مكتبى
- ده شنو ؟ .
- تمثال ابو الهول .
- من هنا ولا من مصر ؟ .
- اشتريتو من مصر .. خان الخليلى .
- لما تمشى تانى جيب لى واحد زايو هدية .. عندى بت اختى بتدرس اثار فى جامعة الخرطوم .
ماذا يريد ؟
- ناس الجهاز زعلانين منك شديد يا بدرالدين .. يعنى قصة المحامى البيقوم يحمل سكرتيرتو دى حاجة ما مناسبة معاك , احنا عايزنك تكون اكبر من كده مش محامى شماسى زى السماسرة الحايمين فى السوق العربى .
- انا الموضوع ده ...
- الموضوع ده تانى ما يتكرر .. مليون الف مرة قلنا ليك عايزنك فى صورة ما مهزوزة , مناضل شريف متحمس بيحب القضية وقلبو على البلد .. عايزين صورة المحامى اليسارى الوطنى .. الموضوع ده تانى ما يتكرر مفهوم ؟ .
- مفهوم .
- لو داير تلعب خليك حريف .. ما تخلى المسألة تبقى فضيحة .
ماذا يريد ؟
- فى زولة يا بدرالدين اسمها احلام حسب الرسول عابدين , هى خريجة الفرع سنة 1988 من كلية اداب نفس السنة بتاعتك .. بتعرف الزولة دى ؟ .
- الفرع زمان كانت زى حوش البقر .. وما كان عندى علاقات صداقة مع ناس اداب الا ناس الجبهة الديمقراطية .
- المهم .. الزولة دى هسع محاضر فى جامعة النيلين , هى عندها دكتوراة فى التاريخ .
هناك مصيبة قادمة فى الطريق .. اعرف انهم لن يتركونى فى حالى
- ده كتاب اسمو (محمد احمد المحجوب سياسى ومثقف فاشل) من تأليف البت الدكتورة احلام .. عايزك تقرأ الكتاب ده , وخلال اسبوع تحفظو لى صم .
- ما فهمتا ! .
- ح تفهم .. شوية , شوية .. ما تستعجل , المهم خلال اسبوع تحفظ الكتاب وبعد كده ح نتناقش .. الناس زهجانة يا بدرالدين عايزة حاجة تشغلها .. عايزين action , موضوع غير موضوع دارفور واتفاقية السلام الشامل والغلاء والبطالة والكلام المسيخ ده .
ما الذى يحدث فى (خرطوم) الفيل القذرة ؟
- وبعدين عليك الله لما تسافر مصر جيب لى معاك تمثال زى ده .
(اواصل)
......
شاهين.
| |
|
|
|
|
|
|
|
|
|
Re: أغتيال دكتورة/ احلام حسب الرسول . (Re: shaheen shaheen)
|
(29)
(1) حكايات شاهندة
- الو .. اهلا مامى , انا كويسة انتى كيفك ؟ .
- معقول يا شاهى ؟ .. مليون الف مرة قلتا ليك ما تقفلى الموبايل بتاعك .
مذعورة , ومرعوبة .. خائفة من الذهاب للكشف الطبى , اتحدث مع امى وانا انظر فى زجاج (السنترال) المصقول , هالات سوداء رسمت شكل هلال داكن حول العينين .. هل اخبرها بالحقيقة ؟
- معليش مامى انا كنتا مشغولة شوية فى الجامعة والموبايل بتاعى كان فيهو مشكلة وما كنتا فاضية عشان اشترى جهاز جديد .
- انا قربتا اجن يا شاهى .. اسبوعين بحاول اتصل بيك وما قادرة , اتصلتا بيك فى التلفون الثابت بتاع شقة الزمالك مافى زول بيرفع السماعة .
- انا خليت شقة الزمالك .. وقاعدة هسع فى شقة فى منيل الروضة مع طالبة سودانية معاى فى business administration .
ماذا افعل الان ؟ .. احتجزوا (جونى) فى المستشفى , اكتشفوا اصابته (بالايدز) , وانا حامل منه فى شهرى الخامس .. ثلاثة منا اكتشفوا اصابتهم (بالايدز) , لم انم جيدا منذ اسبوعين
عناوين الصحف المصرية التى احتفظت بها , (القبض على شبكة عبدة الشيطان ) .. (طلاب فى الجامعة الامريكية , مصريين وعرب وافارقة يعبدون الشيطان) .. (طالب فى الجامعة الامريكية من السنغال يقوم بانشاء خلية لعبادة الشيطان) .. (علماء اجتماع واطباء نفسيين يحللون ظاهرة عبادة الشيطان بين قطاعات الشباب والمراهقين) .. (نيابة أمن الدولة العليا تواصل التحقيق مع الطالب السنغالى .. والكشف الطبى يثبت اصابته بمرض الايدز)
هربت من شقة (الزمالك) .. اعرف انهم يبحثون عنى الان , اغلقت هاتفى المحمول
- ما ح تجى مصر قريب يا ماما ؟ .. انا محتاجة ليك شديد .
- فى شنو يا شاهندة ؟ .. صوتك تعبان حبيبتى .. انتى عيانة ؟ .
- انا فى مشكلة كبيرة يا ماما , مشكلة كبيرة .
- فى شنو يا شاهندة ؟ .. اتكلمى .
- ما ح اقدر اتكلم معاك هسع , بضرب ليك باليل , لا , لا , انا بتكلم معاك من السنترال , الموبايل بتاعى لسه بايظ .. ماما خلاص ارجوك , معليش , معليش .. انا اعصابى تعبانة من المذاكرة .
ظهيرة (القاهرة) خانقة , السيارات المتكدسة تنفس سمومها على وجهى .. اعرف انهم يبحثون عنى فى كل شبر , اعرف انهم ربما يرصدون مكالمتى مع امى فى (السودان) .
(نرجس) الخادمة الاولى , هى التى وفرت لى هذا الغرفة الصغيرة فى (بولاق الدكرور) .. الحمد لله اننى عاملتها جيدا ووقفت معها ماديا ومعنويا فى محنة مرضها قبل سنتين , وها هى ترد الجميل مثل اى فلاحة حرة واصيلة .
حديثى مع امى اراحنى نفسيا .. اريد ان امهد لها جبال المصائب , خطوة , خطوة .. اعرف انها قوية , امرأة خارقة , شعور داخلى عميق انها سوف تنقذنى من هذه المشكلة .
فكرة انتقال عدوى (الايدز) الى جسدى تقتلنى .. متاعب الحمل الصحية والنفسية , ومتاعب القلق من المرض اللعين , والخوف من القاء القبض على .. فقدت وزنى خلال ايام , اصبح (بنطلون الجينز) ينزلق من خصرى بكل سهولة .
عندما خرجت من (سنترال نص البلد) واجهتنى شمس قوية حارقة , ارتديت نظارتى السوداء المصنوعة فى (ايطاليا) , وتحركت بثقة بين كتل الزحام البشرية , صوت (احلام الطيب بانقا) سيدة الأعمال القوية اعاد الى دواخلى التوازن , مع وجودها فى الدنيا اعرف ان ليس هناك مشاكل بدون حل .
وقفت امام اول (كشك) صادفنى , نظرت لصاحبه فى تحدى
- علبة روثمان والنبى يا ريس .
- حاضر يا سمارة .. بس اعملى حسابك التدخين ضار جدا بالصحة .
- والنبى بلاش خفة دم .. انا مش نقصاك .
(اواصل)
......
شاهين.
| |
|
|
|
|
|
|
|
|
|
Re: أغتيال دكتورة/ احلام حسب الرسول . (Re: shaheen shaheen)
|
(30)
(1) حكايات الطاهر شقلا
- يعنى اعتبر انك مرسال من الجماعة ؟ .
- جماعة منو ؟ .. يا شيخ الطاهر انا تلميذك وبتكلم معاك عشان بحبك وبحترمك ؟ .
- لسه فى زول بيحب زول ويحترمو فى الحركة الاسلامية ؟ .
- السلطة غيرتنا يا شيخ .. دى غلطتكم انتم كرموز تاريخية للحركة , كان مفروض الرأى بتاع عدم الانقلاب واننا نلعب بالطريقة الديمقراطية زى التيار الاسلامى فى تركيا هو الينتصر .
- الحصل حصل .. وبعدين ما تحاكم التاريخ بالحاضر , الوقت داك كان لازم يحصل الانقلاب , تعرف زى الثورة البلشفية فى روسيا , وبعد كده اى اخطاء بتحصل خلال الحكم بتكون اخطاء الناس ومش نتيجة استلام السلطة .
- انا خايف عليك يا شيخ الطاهر .
- يا مهند يا ولدى .. انا من الستينات , من ما فرغت روحى وعقلى للحركة الاسلامية وانا بمشى على الاشواك .. مستعد لاى حاجة تحصل لى , انا ما بخاف .. الحركة الاسلامية جهاد مستمر ومش كراسى وثيرة ومكاتب مكندشة وعربات وفساد وحسابات فى بنوك سويسرا .. الاسلام مستهدف عالميا .
- لسه علاقتك كويسة مع شيخ حسن ؟ .
- انتا فى ياتو جهاز يا مهند ؟ .
- يا شيخ الطاهر دى اهانة انا ما بقبلها .. انا هسع ما عندى اى علاقة بالسلطة , متفرغ للمغلق بتاعى فى السجانة , ومحبط من الانقسام والكراهية والضرب تحت الحزام البيحصل لناس الحركة الاسلامية , لسه علاقتى كويسة مع الطرفين , الشباب بيثقوا فينى وطوالى بيتونسوا معاى , بسمع انهم ما مرتاحين منك .
- الما مرتاح منو ؟ .. ناس شيخ حسن ؟ .. ولا ناس شيخ على ؟ .
- الاتنين .
- خلاص اعتبرونى حركة اسلامية قطاع خاص .
- انا بتكلم بالجد يا شيخ الطاهر .. قالوا انتا ما مرن , وعندك علاقات خارجية ممكن تعمل ليهم مشاكل .
- علاقات خارجية مع منو ؟ .
- اتكلموا عن ايران .. واتكلموا عن اسامة بن لادن .
- ده كلام فارغ .. يعنى لازم امشى اصلى فى البيت الابيض عشان ابقى سياسى اسلامى عصرى زيهم ؟ .
- هم قالوا شيخ الطاهر شقلا لسه ما عارف الفرق بين التكتيك السياسى والثورية الضارة .
- هاهاهاها .. والله العظيم دى مشكلة .. خلاص عليك الله قول ليهم يفتحوا لى مدرسة خاصة اتعلم فيها .
- عندى شعور انهم ما مرتاحين منك عشان انتا ما فاسد .
- الفساد ده كسر عين يا مهند .. وانا داير اعاين فى وش اى زول بعيون ما مكسورة .
- فى زول اتكلم معاى امبارح وقال انتا واحد من الناس المرصودين على مدار 24 ساعة يوميا .
- انا عارف .. انا عارف يا مهند , عارف تلفونى مرصود , عارف انو بيتى مراقب .. لكن مافى زول بيقدر على .
- خلى بالك من روحك .. الناس ديل زى الاسد المجروح .
- اى زول يفتح خشمو ويتكلم عن علاقتى مع شيخ اسامة قول ليهو قروش اسامة مشت وين .. الناس ديل يا مهند سرقوا القروش الدخلت معاهو السودان , سرقوا منه مشاريعو , ودى ما دخلت فى ميزانية الدولة , يعنى مشت وين ؟ .
- ما عايزين نخسرك فى حادث حركة يا شيخ الطاهر .
- هاهاهاها .. جزاك الله خير يا مهند يا ولدى .. انا بعرف اسوق كويس جدا .
(اواصل)
......
شاهين.
| |
|
|
|
|
|
|
|
|
|
Re: أغتيال دكتورة/ احلام حسب الرسول . (Re: shaheen shaheen)
|
(31)
(4) حكايات احلام الحاج (احلام البعثية)
غفوت على مقعد صالة الانتظار فى المستوصف الخاص .. غفوت و (بت الصول) تتحدث معى , من المرات النادرة التى انام فيها فى مكان عام .. المرة الاولى كانت فى مبانى جهاز الامن فى واحدة من الاعتقالات المهينة , استيقظت فيها على صفة قوية فى مقدمة راسى
- كمان نايمة يا شكشوكة ! .. لو عايزة اوضة نوم عندنا هنا جوه .
- اوعك تضربنى او تتكلم معاى باللهجة دى .. انا انسانة محترمة .
- يعنى زولة راجلها عيالتى , ح تكون محترمة كيف ؟ .. ما لازم تكون شكشوكة .
غفوت ورأيت (النذير) فى المنام , لم اشعر اطلاقا انه (مثلى) .. قال لى خلال النوم المتقطع انها (نزوة) , تحدثنا بعصبية حول من يحمل اسمه الى الابد
- رامى النذير جلال الدين .
- احلام .. احلام .. لو تعبانة ممكن تمشى البيت .
استيقظت على رائحة (تبغ) قوية , و (احلام الصول) تضع يدها على كتفى
- انتى بتدخنى يا بت الصول ؟ .
- مرة , مرة .. خاصة لما اكون قلقانة شديد .
- غريبة اول مرة اعرف المعلومة دى ! .
ادهشتنى المعلومة .. هى مثل جبل الثلج , اغوص فى مياه محيطها واكتشف اشياء جديدة لا تبدو على السطح
لم تتحدث معى اطلاقا عن انها نشرت كتاب من تأليفها .. وجدته صدفة عند بائع للصحف اليومية , (محمد احمد المحجوب سياسى ومثقف فاشل) كان اسمها بخط كبير على الجانب الايمن للكتاب (د/ احلام حسب الرسول عابدين) .. صدمنى الكتاب , صدمنى الحل المقترح لفشل النخب من طلائع (البرجوازية) السودانية الداعرة , عودة (الاستعمار) من جديد .. كانت اثار الهجمة الهمجية على (العراق) طرية فى قلبى , ذهبت اليها فى الجامعة واشتبكنا فى نقاش مرير , اشتبكنا لفظيا حول مفهوم (الامبريالية) ومعنى (العولمة) , لم اشعر بنفسى الا وانا اقذف الكتاب فى وجهها
- ده كلام فارغ , لعب عيال .. عارفة يا بت الصول مشكلة الناس الاكاديمين لما يخشوا المجال السياسى انهم بيفتكروا انو شهادات الدكتوراة دى جواز مرور عشان يفهموا الناس الاغبياء الطريق الصحيح .. والغريب انو الاكاديمين هم ذاتم ما عارفين الطريق الصحيح .
- بعد اذنك يا احلام الحاج .. ممكن تتفضلى بره عشان عندى محاضرة .
- بتطردينى من مكتبك يا بت الصول ؟ .
وانا اخرج , عرفت ان الصداقة بيننا قد انتهت .. وفى مساء نفس اليوم وجدتها بين احضانى فى منزل ابى , بكينا وتبادلنا قبلات واعتذارات راقية رقيقة , ولم نتحدث بعدها فى السياسة مطلقا
- ممكن تمشى البيت .
- لا ما مشكلة , بنتظر معاك عشان جلكنة ما تزعل .
- انا خايفة عليها يا احلام .. جلكنة دى احسن واحدة فينا .. عارفة , الذ حاجة فيها انها انسانة واقعية , ما عندها اسئلة او طلبات كتيرة فى الدنيا .
- مرات يا بت الصول الاسئلة بتبقى عبء .. انا بحسد الناس الماشية فى الشارع , مرات كده بكون راكبة فى المواصلات واعاين للناس واقول فى سرى يا ربى ديل مرة واحدة فى حياتم فكروا فى قضية فلسفية مهمة .
- رامى كيف ؟ .
- تمام .. رامى ده معنى حياتى , لو ما هو انا من زمان كنتا انتحرتا .
- عارفة , كنتا اتمنى يكون عندى ولد وبت , واحدة من احلامى القديمة المنسية , انسان يحبنى واسرة صغيرة نقعد قدام التليفزيون ونتفرج على المسلسل ونحنا بنشرب الشاى .
- اى حاجة ممكن تتحقق .. انشاء الله .
- too late يا بعثية .. too late .
- يا بت بلا too late معاك .
من بعيد كانت (احلام القبطية) تلوح لنا , ترتدى زى العمليات (الاخضر)
رفعت اصبع يدها علامة ok
اتجهنا نحوها فى تهليل
- العملية نجحت ؟ .
- يا بنات يا مطرطشات .. مع دكتورة احلام تادرس ميخائيل ما تقولوا العملية نجحت ؟ .. قولوا العملية انتهت ؟ .
اخذنا نصفق لها فى فرح مثل اطفال يلعبون فى طين الخريف
- احلام القبطية مغرورة .. مغرورة .. مغرورة .
- يا بنات عيب , احنا فى مستوصف محترم .
من نهاية الممر الطويل , شاهدت (ميرفت) شقيقة (بت الصول) تمشى مثل الانسان الالى .. ليست (ميرفت) القديمة الحلوة طالبة (اقتصاد جامعة الخرطوم) , (ميرفت) التى كانت تنظر لنا باستعلاء نحن حثالة (الفرع) , (ميرفت) التى كانت تتحدث معنا باللغة الانجليزية بعنجهية واصرار , نحن غير الناطقين بها
- ميرفت .. العملية نجحت .
تحمل بين يديها كياس (فاكهة) كبير , وعلبة (حلوى) فاخرة
- الف مبروك .. جلكنة زولة تستحق كل خير .
عندها برود (انجليزى) سخيف .. منذ ان تركها من تحب بشكل جارح , وهى قد اسدلت ستار كثيف بينها وبين الاخرين , تزوجت وانجبت ولديها وظيفة مرموقة فى بنك كبير , ورغم ذلك يبدو اثر الجرح فى نغمات صوتها وطريقة مشيتها التى تشبه الانسان الالى
صحت فيهم دون اى مناسبة بحكمتى الخالدة
- تلقى الزمن غير ملامحنا
واحنا بقينا ما احنا .
نظرت لى (ميرفت) فى اندهاش
- سبحان الله .. انا هسع كنتا بسمع فى الاغنية دى وانا سايقة العربية .
فى هذه اللحظة رن هاتفى المحمول , نظرت لشاشته , وكما توقعت كان اسم (عزت طريفى) يتصدر الشاشة الصغيرة الملونة , دق قلبى بشدة .
(اواصل)
......
شاهين.
(عدل بواسطة shaheen shaheen on 07-20-2008, 12:19 PM)
| |
|
|
|
|
|
|
|
|
|
Re: أغتيال دكتورة/ احلام حسب الرسول . (Re: shaheen shaheen)
|
(ورقة من اوراق دكتورة/ احلام حسب الرسول كتبتها فى مصحة للامراض النفسية والعصبية قبل مقتلها فى ظروف غامضة)
الحرية .. الحرية .
هذه هى الكلمة السحرية , الحرية الشخصية فى ان تخرج الى الشارع - او لا تخرج - , تتحدث مع من تريد او - لا تتحدث - .
عند احتجازى السياسى هنا داخل الاسوار العالية , عرفت معنى الحرية .
كانت بالنسبة لى كلمة مُبهمة .
كلمة مثل كلمة (حُب) , ماذا تعنى بالتحديد ؟ .. ايام دراستى الجامعية , كان هناك (خالد) شاب رقيق انيق تفوح من امتار بعيدة روائح عطره الرجالى الفاخر , اهتم بى فقط لمدة اسابيع معدودة وبعد ذلك تركنى .. هكذا بكل بساطة , ضجر منى .
الطالبة الجامعية قوية البنية التى اغتصبتنى فى دورة مياه الجامعة , وضعت كلمة (الحرية) فى امتحان حقيقى .. الحرية فى ان اصرخ واحطم وضعى الاجتماعى والاكاديمى , والحرية فى ان اقاوم بعنف .
كانت رغبة الاستسلام للاغتصاب هى التى قتلتنى , رغبتى وحزمة محظوراتى الاخلاقية .
عندى من الفراغ العريض - هنا داخل المصحة - ما يكفى لان اضع نفسى على طاولة التشريح , اُفكر فى نفسى من خلال عيون الاخرين , واٌفكر فى الاخرين من خلال عيونى .
ما الذى حطم احلام حسب الرسول تحديدا قبل دخول المصحة
1/ الاستسلام للاغتصاب المهين ؟ .
2/ وفاة احلام الجاك بسرطان الرحم ؟ .
تشخيص الحالة اكتئاب حاد .. هكذا قالوا , بتلك الالية الطبية الميكانيكية
- الحالة عندها اعراض اكتئاب .
حالة !!
اصبحت مجرد حالة واسم فى ملف طبى بغيض
طلبت منهم مرآة
- عايزة مرآية .
- اى حاجة فيها قزاز هنا ممنوعة .. عشان حالات الانتحار يا دكتورة .
المح وجهى احيانا فى الزجاج الخشن لغرف الاطباء .. تغيرت
المح فى الخيال وجه (احلام الحاج) , اسمع صوتها
- لعبوا بيك يا بت الصول .. لعبوا بيك زى كرة الشراب .
اخاف ان استيقظ فى الصباح ولا اجد وجهى
- يا جماعة عايزة مرآية .. والله العظيم ما دايرة انتحر .. بس اشوف وشى .
د/ احلام حسب الرسول عابدين .
(اواصل)
......
شاهين.
(عدل بواسطة shaheen shaheen on 07-29-2008, 05:34 PM)
(عدل بواسطة shaheen shaheen on 09-04-2008, 09:54 AM)
| |
|
|
|
|
|
|
|
|
|
Re: أغتيال دكتورة/ احلام حسب الرسول . (Re: shaheen shaheen)
|
(32)
- الو .. اهلا عزت .
- اسف على الازعاج .. الوقت متأخر ؟ .
- لا , لا .. الساعة يادوب تسعة الا ربع .
- أأأ .. معليش احلام , ما عارف من اول مرة شوفتك فيها شعرت انى محتاج اتكلم معاك باستمرار , خايف انك ح تفهمينى غلط , او انك ممكن تتضايقى .
- لا , مافى اى مضايقة .. بالمناسبة انا لو ما دايرة اتكلم مع زول ما بتحرج , بقول ليهو تانى ما تضرب لى .. انا عندى شخصية قوية .
- اعتبر ده غرور ؟ .
- هاهاهاها .. لا , بس دى الحقيقة .. انا برضو محتاجة صديق اتكلم معهو .. صديق يا عزت .
- متخافى يا احلام انا ما ح اتجاوز حدود الصداقة .. انا برضو زيك كده بالظبط محتاج صديقة .
- تعرف يا عزت فى مشكلة فى العقلية الشرقية المسلمة , اقصد من ناحية العلاقة بين الراجل والمرأة , العقلية دى بترسم اطار صارم يعنى يا تكون حب او جنس او استعداد لطلب زواج , مافى صداقة حقيقية , ودى مشكلة .
- قبل ما اضرب ليك هسع كنتا قاعد قدام الكمبيوتر لى اكتر من خمسة ساعات بقرأ العمود بتاعك فى الجريدة رجعت للارشيف وتابعتا تقريبا اى حاجة انتى كتبتيها خلال السنة دى .
- اى حاجة ؟ .. يا ساتر يا رب , وما جاك صداع ؟ .
- انتى انسانة عندك قلم بديع .. انا بحب الزول البيخلط فى الكتابة بين السياسة والاسلوب الادبى .
- احم , احم .. كده انا ح اكون مغرورة بالجد .
- صوتك تعبان .. بالجد اوعا اكون صحيتك من النوم ؟ .
- لا .. انا لسه بره البيت , قاعدة هسع فى مستوصف , عندنا زميلة عندها عملية بتاعت ازالة ورم فى الرحم , واحدة من عصابة الاحلامات .. احلام جلكنة .
- ياااه .. كفارة ليها , واضح انها زولة طيبة شديد .
- بشكل ما تتخيلو دى احسن واحدة فينا يا عزت , انسانة نادرة .. ما عندها الحقد والحسد الممكن تلقاهم فى اى انسان .
- احلام زوجتى عارفة موضوع العملية دى ؟ .
- يعنى .. احنا بس ما حبينا نزعج الناس , هى عملية بسيطة , عشان الخدمات الصحية هنا احسن من الدلنج اصرينا عليها انها تعملها هنا .
- زوجتى ما بتشبهمك يا احلام .. على الاقل ما بتشبهك انتى , لا من ناحية الثقافة , لا حتى فى طريقة التفكير والكلام .
- عزت .. احسن ما نتكلم فى الموضوع ده , ممكن ؟ .
- هى هسع كويسة ؟ .
- الحمدلله .. بس منتظرين تفوق من البنج .
- انتى بتصلى يا احلام ؟ .
- سؤال غريب ! .
- معليش بس عشان فى عمود كنتى كتبتى فيهو كلام عن الفرق بين حب الله والخوف منه .
- انا دايما بفرق بين الحب والخوف .. الحب هو الاسمى , والخوف ده ضعف وانتهازية , مش بس مع الرب حتى مع زوجك مع استاذك مع مديرك فى العمل .. الزول البيخاف من ربنا بدون حب حقيقى ده انسان جبان .
- بتصلى ؟ .
- هاهاهاها .. اصرار عجيب على سؤال غريب .
- بعتذر ليك , عارف انو سؤال شخصى .. بس عايز اعرف تفاصيل صغيرة عن حياتك كصديق عزيز .
- حاضر يا صديق يا عزيز .. بصراحة مرات , مرات .. لما اكون محتاجة اصلى بصلى , ما منتظمة فى الصلاة .. ما شيخة وما ملحدة , حاجة فى النص .
- عارفة دى المرة التالتة نتكلم مع بعض .. عندى شعور انى بعرفك من سنين طويلة .
- اخبار الحزب بتاعك شنو ؟ .
- هاهاهاها .. حزب الروعة والجمال .. ده حزب كان فيهو اتنين انا والهام .. تتخيلى انسان فى مظاهرة سياسية يغنى اغنية حقيبة .
- الذ حاجة فى الدنيا الجنون يا عزت , العقل لعنة .. هم مش بيقولوا الفنون جنون , والانسان المبدع لازم يكون عندو صامولة مفكوكة فى راسو .
- يعنى انسان شغال مخرج نشرات اخبار وبرامج talk show سياسية فى التليفزيون يكون مبدع كيف يا احلام ؟ .
- تانى رجعنا للاحباط ؟ .
- انا انتهيت كمبدع من زمان يا احلام .. عندى سيناريو بكتب فيهو لى 18 سنة .. تتخيلى ؟ .. بقول يا ود يا عزت يوم من الايام ح ترجع وتعمل فيلم سودانى عظيم .. 18 سنة يا احلام بكتب .. صحيت من النوم لقيت عمرى بقى 46 سنة .
- عارف صحبتنا دكتورة احلام القبطية عندها رواية اسمها زقاق صليب اظن بتكتب فيها اكتر من 20 سنة ! .. هاهاهاها .. هى المشكلة فينا يا عزت كجيل ؟ ولا المشكلة فى البلد الما بتحترم الابداع ؟ ولا المشكلة فى المبدع السودانى العارف انو الابداع ده كلام فارغ بدون اى تأثير ؟ .. فى المكالمة الفاتت انتا عملتا مقارنة حلوة بين سندوتش الطعمية ومسرح الاراجوز للتلميذ السودانى الفقير , ياتو فيهم الاهم ؟ .
- انا سعيد جدا انك لسه بتكتبى يا احلام .
- بالمناسبة انا زيك يا عزت .. بعمل حاجة ما مقتنعة بيها , تقدر تقول اكل عيش والسلام , عندى خطوط حمراء كتيرة ما بقدر اتجاوزها فى الصحافة .. والصحافة اساسا هى مهنة تجاوز اى خطوط حمراء .. مرات كتيرة بشعر انى بخون الناس يا عزت وبساهم فى لعبة اسمها ديكور الديمقراطية الزاهى , حاجة كده عشان الناس تقتنع انو فى حرية رأى فى البلد وانو الصحافة هى السلطة الرابعة , رغم انو البلد دى فيها سلطة واحدة ووحيدة .
- كل مرة بكتشف حاجة مشتركة بتجمعنا يا احلام .
- بس المكالمة الجاية اوعا تكتشف الذرة .. احنا ما ناقصين حصار دولى .
- هاهاهاها .
اجسامنا ليه جسمين ؟
روحنا واحدة .. وكيف , اتقسمت قسمين ؟
شى عجيب فى غرامك يا فريع ياسمين
يا من اسرت فؤادى
ملكتُ فى اليدين
يا ملفت الانظار , يا ناير الخدين
تبقى الصداقة قرابة ونكسب الودين
شى عجيب فى غرامك يا فريع ياسمين
(اواصل)
......
شاهين.
| |
|
|
|
|
|
|
|
|
|
Re: أغتيال دكتورة/ احلام حسب الرسول . (Re: shaheen shaheen)
|
المبدع شاهين
اعذرني على الحضور ...المتأخر....
كتابات جيده....وجميله....وحكي حقيقي...رائع بسيط وحميم.
شكرا لك واصل التدفق....
اعجبتني جدا هذه العباره...للدكتوره احلام حسب الرسول....
Quote: * تطالبين يا دكتورة بعودة الاستعمار الى بلادك هل هذا حديث انسان عاقل ؟ .
- وهل ما حدث فى هذا البلد منذ الاستقلال حتى الان هو من فعل انسان عاقل ؟ |
يعلم الله انها اعقل العاقلين.....
| |
|
|
|
|
|
|
|
|
|
Re: أغتيال دكتورة/ احلام حسب الرسول . (Re: shaheen shaheen)
|
(33)
(4) حكايات احلام الجاك (احلام جلكنة)
لو يعود (منعم) .. كان فى طرف اللسان .. لو يعود مثل (مهدى) الشيعة المنتظر .
- انا وين ؟ .
يخرج صوتى بصعوبة عبر الحلق الجاف , او ربما هو لا يخرج على الاطلاق
اثار زوال المخدر من اجزاء الجسم المختلفة , ينسحب فى هدواء .. وجوه تلتف حول سريرى , اسمع عبارات ضاحكة , اصوات سمعتها من قبل
- جلكنة يا فردة , حمدالله على السلامة .
- يا جرسة .
اللسان ثقيل , انظر لهم عبر اضاءة مهتزة , الم خفيف يبداء فى التصاعد من الجهة السفلى .. يد دافئة فوق جبهتى
- انا احلام الصول يا جلكنة , العملية خلاص انتهت .
اهز راسى
(معتصم) الاخ غير الشقيق , سندى وعكازة الطريق , كان رجل البيت , فعلت معه المستحيل من اجل ان يواصل فى التعليم تسرب منذ مرحلة (الثانوى العام) .. فعلت معه المستحيل ليبقى بيننا فى (الدلنج) وحاجة (كلتوم) تعيش ايامها الاخيرة
- عايز تسافر عشان تهبب شنو يا معتصم .
- يا زولة البلد دى ما بلد مستقبل .
- يعنى داير تمشى كده طرزان , ما عندك اى مؤهل اكاديمى , ح تشتغل شنو بره ؟ .. وبعدين امك دى بتموت , دايرنى اقيف براى فى بكاء امنا يا معتصم .
جمع نقود بطريقة بهلوانية , وضع بوصلة مستقبله فى بلاد موجودة على (الاطلس)
- انا مرقتا الجواز خلاص يا احلام .
اغالب دموع , وصوت يريد الارتعاش
- انتا بالظبط داير تسافر وين , ما معقول الكلام ده يا معتصم .
- انا ماشى مع اصحابى يا احلام , الاول ح نمشى مصر وبعد كده جزيرة مالطا , ونقد من هناك اوروبا .
- طيب هى الحكاية لو ساهلة كده ما اى زول يقد اوروبا .
لديه نفس العيون التى احملها فى وجهى , عيون تنطلق منها شرارة الاصرار
دارت الساقية ولا عودة .. وضعت بين يديها كل ما املك , حتى خاتمى الذهبى الذى كنت اعتز به
فى ليلة باردة من شتاء 1989 انحنى على سرير امى الراقدة
- اعفى لى يمة .. اعفى لى , شدى حيلك .
لم ينظر لى وهو يخرج .. خاف ان يبكى بين احضانى , صغيرى الذى اكمل بالكاد عامه العشرين
- انتظر يا معتصم اديك شال عشان الدنيا برد , ولما تصلوا الخرطوم انزولوا مع ناس نجوى فى الحاج يوسف , لحدى ما تسافروا مصر .
عندما خرجت من غرفتى احمل بين يدى (الشال) الصوفى الملون , كان هو قد خرج , لا يريد ان يبكى
هرولت حافية القدمين وانا اصرخ فى صباح (الدلنج) الباكر
- الشال يا معتصم , معتصم الشال .
كان هناك بعيدا
- معتصم دقيقة .
- يا احلام ارجعى البيت , فى شنو ؟ .
امسكته بقوة , وضعت (الشال) على كتفيه
- ده عشان تتذكرنى .
بكينا , انهار جبل الرجولة بين احضانى , سقطت صخور الذكورة على كتفى
- انتظرنى امشى معاك المحطة .
- ارجعى يا احلام .. ابقى عشرة على حاجة كلتوم , انتى زولة بمية راجل .
من الاشياء التى ندمت عليها فى حياتى , اننى لم اذهب معه الى (المحطة) .. غادر وحيدا
كل الذين احبهم رحلوا عن طريقى .. (معتصم) و (منعم)
- انا وين ؟ .
يخرج صوتى بصعوبة عبر الحلق الجاف , او ربما هو لا يخرج على الاطلاق
روائح طبية قوية تتسلل لانفى .. غرفة بيضاء اللون , نظيفة .. انا الموعودة بالرحيل الابدى
- المُصحف بتاعى وين ؟
- تحت المخدة يا جلكنة .
(اواصل)
......
شاهين.
.
| |
|
|
|
|
|
|
|
|
|
Re: أغتيال دكتورة/ احلام حسب الرسول . (Re: shaheen shaheen)
|
(ورقة من اوراق دكتورة/ احلام حسب الرسول كتبتها فى مصحة للامراض النفسية والعصبية قبل مقتلها فى ظروف غامضة)
الاستقلال كان لعنة .. كان خطاءً .. كان كارثة
كل الذين بكوا فى ذلك اليوم فرحاً , يبكون الان ندماً - من ظل منهم على قيد الحياة -
تحاورت ذات يوم مع شيخ فى منتصف سبعينيات عمره , هو استاذ جامعى متقاعد , قال لى بالحرف الواحد
- انا ما شعرت بالفخر فى البلد دى الا فى زمن الانجليز .. الانجليز ديل يا بتى ناس كانوا بيحترموا الناس .
- وهسع رأيك شنو فى الحكم الوطنى ؟ .
- ناس الحكم الوطنى ديل لا بيحترموا الناس , لا بيحترموا نفسهم .
كنت اتابع انتخابات الطلبة فى الجامعة التى اعمل بها , وفى الجامعات الاخرى عبر الصحف .. دائما كانت المشاركين متدنية قياسا للعدد الكلى , هذا هو المؤشر الواضح للرفض السلبى لكل انواع الحركات السياسية الوطنية من اليمين والوسط واليسار , دليل على الضجر .
كان يجب البحث عن تغيير جذرى .. تنظيم سياسى جديد يضع يده على الجُرح مباشرة , تنظيم ينقل ما يدور همساً فى (الونسات) الخاصة للسادة المثقفين – واحياناً خجلاً - , الى ساحات العلن
نحنا شعب فاشل فى ادارة دولة
الاستعمار هو ازهى مرحلة مرت فى كل تاريخنا
والنتيجة كانت تأسيس حركة (حمد) .. حركة سياسية وفكرية تطالب بوضع كامل التراب السودانى تحت سلطة انتداب عالمى .. اشراف عالمى تام على ادارة الموارد المتنوعة , ونشر ثقافة الحياة الكريمة العصرية لكل فرد فيه .
انا فقط نقلت رغبة الناس على الورق .
الناس – باستثناء النخبة العفنة - , لا يهمها غير رغيف الخبز , رغيف الخبز يا سادة وليس الطنطنة غير المفهمومة عن السيادة الوطنية والدستور .
الناس تريد كل ما كان ايام الاستعمار .. وترفض كل ما كان منذ اوائل الحكم الوطنى حتى الان .
والنتيجة المنطقية هى عودة الاستعمار مرة اخرى – هكذا بكل بساطة - .
انا فقط نقلت رغبة الناس على الورق .
د/ احلام حسب الرسول عابدين .
(اواصل)
......
شاهين.
| |
|
|
|
|
|
|
|
|
|
Re: أغتيال دكتورة/ احلام حسب الرسول . (Re: shaheen shaheen)
|
الاستاذ/ ياسر الامير
| Quote: شكرا ،،، شاهين شاهين |
شكرا ليك على المداخلة وعلى الكلام الجميل .
العزيزة والصديقة/ ريهان الريح
Quote: روحي اتسلت
اها يا شاهين
نوسط عزة يعني ؟؟؟ |
اعتذر على الانقطاع , واحدة من عيوبى الكثيرة اننى مزاجى فى الكتابة - سوف اتخلص من هذا العيب - , وعد ان اوصل بانتظام فى الرواية .
استاذة/ محسية
| Quote: نتداخل كفواصل الإعلانات المقيتة في ذروة المشاهدة |
العفو يا سيدتى , بالعكس , المداخلات شرف كبير لى , وانا سعيد بها , وسعيد ان ما اكتب يُسعد انسان اخر
كل التحايا .
| |
|
|
|
|
|
|
| |
saif basheer
رانيا قاسم
shaheen shaheen
WAD ELGAALI#4
Tragie Mustafa
ياسر الامير ابوجكة
ريهان الريح الشاذلي
محسية
فيس بوك
تويتر
انستقرام
يوتيوب
بنتيريست