|
Re: المغتربون والمهاجرون هم أكبر معول لتدمير الإقتصاد السوداني !!!.. (Re: Mohammed Ahmed Saeed)
|
صديقي العزيز منير
الف حمدا لله على السلامة و منور سودانيزاونلاين...
المغترب صاح ببيع في السوق الأسود ، لكن تصدق يا منير الحكومة أيام تدفق البترول رفضت تستلم من المغترب مبلغ 95 ريال سعودي بالعملة الاجنبية وهي قيمة المساهمة الوطنية المفروضة على المغتربين و أنا شخصيا وقفت في شباك بجهاز المغتربين و طلبت مني الموظفة قيمة المساهمة و قدمت لها مبلغ 100 ريال سعودي و رفضت الاستلام و قالت لي لازم تسددها بالجنيه السوداني و عندنا توجيهات مكتوبة تسدد بالجنيه السوداني!! البنوك عندما توفر النقد الاجنبي رفضت تسليم تحويلات المغتربين لذويهم بالعملة السودانية و اصرت تسلمها لهم بالعملات الاجنبية.
تخريمة: ادينا هلو مع تلفوناتكم شبه الملح دي (رغم انها بالعملة الصعبة) او skype
| |
|
|
|
|
|
|
Re: المغتربون والمهاجرون هم أكبر معول لتدمير الإقتصاد السوداني !!!.. (Re: الحاج حمد الحاج)
|
تحياتي منير والمتداخلين الكرام الرسالة ادناه من الاخ الصادق عبد الله وردت الى بريدي وطلب مني ان انشرها هنا
Quote: تحياتي لكم باشمهندس/ محمد .. وأعتذر عن التطفل على بريدكم.. وفقط لأنني لا أملك حساباً في الموقع، ولأنني أعاني مشاكل من خلال حاسبي في الفيسبوك، فإنني قد اخترتكم لأنقل من خلالكم المشاركة أدناه لإدراجها في بوست الأخ المهندس/ منير عبدالرحيم: (المغتربون والمهاجرون أكبر معول ....) أكون شاكراً لو تكرمتكم بقص المشاركة أدناه وإدراجها في بوست الأخ منير.. ولكم خالص الشكر والتحية.. ------------------------------------------ يحمد للسيدة (ماري انطوانيت) أنها لم تفعل مثلكم يا دكتور منير، ولم ترم اللوم على الشعب الفرنسي (مغتربين أو غير مغتربين) وإنما طلبت منهم فقط أن يستمتعوا بأكل الجاتوه الذي وفرته لهم حكومتها. و وأضح من خلال ردود الأخ منير أنه من المستحيل زحزحته عن قناعاته الصمدية، وعن ما أسماه "الحقيقة البديهية". وواضح أيضاً من تلك الردود أن نظرية (المغتربون والمهاجرون هم أكبر معول) لا تحتاج إلى أية إثباتات أو محاججات إضافية، فالأخ منير قرر بأن المغترب (معول) وانتهى البيان.. وأصبح الأمر لا يقبل أية "مغالطات" كشأن صاحبنا الذي قال إنها: (عنزة ولو طارت). الأخ المهندس الدكتور منير (أنار الله عقلنا وعقله) يقول أن رمي اللوم علي الحكومة لن يغير من تلك "الحقيقة البديهية" .. وهذه كلماته بين القوسين: (فلو الحكومة مقصرة فالمغترب زايد النار حطب). لكن المفارقة أن (أبو لهب) "الإنقاذ" يتم تبرئته ، وحتى مجرد اتهامه بالتقصير يبقى احتمالاً متأرجحاً وليس أمراً مؤكداً، بينما المغترب، وهو في هذه الحالة في وضع إمرأة (أبو لهب) تزيد النار حطباً ولكن تلحق بها وحدها كل الإدانة. فبحسب الأخ منير فإن المغترب (وحده ، لا شريك له) هو المعول وهو ، في نفس الوقت، المجرم الذي يحمل بيديه ذلك المعول ويُعمل في اقتصاد السودان هدماً وحرقاً، أي أنه فاعل ومفعول به، ومدان في الحالين. ويبدو أن حال المغترب أصبحت كحال ذلك الذي اُلـقـي في اليّــم مكتوفاً وقيل له إياك، إياك أن تبتل بالماء. بينما الحكومة (إن كانت ممثلة في قطبي أو عبدالرحيم أو حمدي أو المتعافي أو سواهم من أولئك "العباقرة") من تلك العقول التي "تخطط" السياسات ثم تنشب مخالبها وتنهش في قلب وكبد ذلك الاقتصاد ولنحو ربع قرن بريئة تماماً. بريئة حتى وإن فعلت ما يفعله الثور في مستودع الخزف، وبريئة حتى وإن هي دفعت وما تزال تدفع الآلاف من عمال وأطباء ومهندسين وخبراء للاغتراب وتصدرهم لأسواق النخاسة، بريئة حتى وإن كانت هي التي فرضت تلك السياسات الاقتصادية والنقدية الجائرة التي راكمت المليارات لدى حفنة من اللصوص وأبقت السواد الأعظم من الناس يتخبطون في دياجير الظلم والبؤس والفقر.. وبريئة إن أعدمت (مجدي محجوب) في حر ماله ، وعوّضت (قطبي المهدي) عن ما قام بنهبه من (سلة عملات) من حـر مال الشعب. وبريئة طالما قرر الأستاذ منير أن المغترب مسؤول، فالمفترض أن نؤمن وبلا جدال على كلامه ونردد وراءه بأن المغترب فعلاً مسؤول عن كل المحاق الاقتصادي والسياسي الذي حل بالسودان.. قد لا يصيبنا الاندهاش إن قرر هذا النظام المعصوم من الخطأ إعادة النظر في سياسة الاغتراب، وإن قرر غداً منع الاغتراب ومصادرة جوازات سفر هؤلاء المغتربين وإعادتهم جميعاً مع اسرهم ليغرفوا من النعيم الذي عممته لهم "الإنقاذ" في السودان. فحكومة ماري انطوانيت ترى ، ونحن لا نرى الوظائف المتوفرة ، والقضاء على البطالة.. وحكومة ماري انطوانيت السودان وفرت فرص التعليم المتميز والمجاني وأتاحته لجميع فئات الشعب.. وحكومة ماري انطوانيت أحدثت ثورة صحية في خدمات المستشفيات، وفي توفير الدواء الذي أصبح في متناول الجميع.. وحكومة ماري انطوانيت أطعمت الجميع من الجوع وأمنتهم من الخوف و وفرت لهم الجاتوه بمساحة مليون ميل مربع. ختاماً أخي منير: إن كنت تبحث عن المعاول: فإن ديوان المراجع العام،وهو جهاز حكومي، رصد في إحدى مراجعاته بأن ما تم نهبه خلال ثمانية شهور فقط يتجاوز نصف ما تم إنفاقه على سد مروى، (سد مروي نفسه شُــيّد بقرض ربوي وليس من أموال البترول)، كما أن "إنقاذيين" عديدين ممن أصابتهم صحوة ضمير مؤخراً من بعض كتبة الإنقاذ، وبعض مسئوليها وبعض الوزراء السابقين تحدثوا ونشروا في وسائل الإعلام المرئية، وفي صحف الشرق والغرب عن الدمار الذي أحدثته سياسات (حمدي) ، وما فعلته تلك المافايات الإنقاذية التي كانت وما تزال تواصل -باسم الدين- مص دماء الملايين من المغتربين خارج السودان، وكما تواصل مص ما تبقى من دماء أهلهم في الوطن من أولئك البؤساء الذي يقاسون من "الإنقاذ" وفحش سياساتها التي لم تعرفها أكثر الرأسماليات الغربية توحشاً. فالاقتصاد كما نفهمه بالتعريف البلدي البسيط: (هو إيجاد البدائل لإدارة الموارد قمة العيش لهؤلاء الملايين الذين جاءت الحكومة في مهمة "إنقاذ" لإدارة معيشتهم). فإن كانت الحكومة -وبعد نحو ربع قرن- ليس لديها من بدائل، بل هي عاجزة إلى هذا الحد عن إنقاذهم وإنقاذ نفسها أمام معاول و جبروت المغترب الذي ربما يفوق جبروت أمريكا وصناديق الغرب وما ندفعه لهم من ديون وفوائد مركبة، فلماذا لا تحمل "الإنقاذ" عصاها وتكتفي بما حققته من "إنقاذ" وترحل؟
|
| |
|
|
|
|
|
|
Re: المغتربون والمهاجرون هم أكبر معول لتدمير الإقتصاد السوداني !!!.. (Re: محمد إبراهيم علي)
|
اخى منير لك التحية مرة اخرى كويس انك من ممن ركبو قطار المعاناة طيب خلينا ندع الاشياء الاشياء الشخصية جانيا و نناقش الموضوع بالطريقة الاخرى اخى منير مغروف ان المغتربين يمكن ان تكون تحويلاتهم اكثر من 4 مليار دولار كم اربعة مليارات جاءت من البترول كم اربعة مليارات نهبت من المغتربين كم اربعة مليارات جاءت من بيع اجزاء غاااالية من ارضنا الطيبة بدعوى الاستثمار ثم ماذا كانت المحصلة اين ذهبت هذه الاموال هل ذهبت الى التنمية هل استخدمت فى الارتقاء بالبلد و مؤسساته ام ذهبت الى فئة معينة من الناس؟ اخى منير للاسف ( وانت تعلم ذلك جيدا) قد دمرت كل المرافق الحيوية دمرت المشاريع الزراعية التى كنا نعلق عليها امال عراض لتكون لنا مخرجا قتل مشروع الجزيرة مع سبق الاصرار و الترصد قتل انسان الجزيرة دون ذنب جناه الا ليسعد السلطان لماذا تريد اخى منير ان يستمر المغترب فى ضخ الدولارات لتستمر سعادة الفئة المعينة و تزداد معاناة المواطن العادى اخى منير اسمع رايك و اعود ليك تانية ولك تحياتى
| |
|
|
|
|
|
|
Re: المغتربون والمهاجرون هم أكبر معول لتدمير الإقتصاد السوداني !!!.. (Re: محمد إبراهيم علي)
|
الأخ محمدابراهيم علي مرحباً بك ولك التحية وللأخ الصادق عبدالله الجاي مسخن معانا سخانة شديدة ..
والله يا عزيزنا الصادق مش لو سخنت، لو ولعت عديل الليلة لازم تقتنع بالفكرة الأنا عاوز أقولها .. يا جماعة إنتو أعمتكم حمية الدفاع عن النفس عن أن تنتبهوا الstatement البسيط الأنا طارحه هنا .. ياجماعة أفهمونا .. ال statement هو : أن هناك سوق أسود للعملات الصعبة وأن المورد الأساسي لغذاء هذا السوق هو تحويلات المغتربين .. يا جماعة الstatement ده فيه غلاط؟؟ أبسط رد علي هذه الحقيقة تقوموا تقولوا إنه فعلاً الكلام صاح لكين نحن المغتربين مثلاَ غصباً عنا نلجأ لهذا الأمر لأننا عاوزين نعوض تعبنا بسعر مجزي أو ما عندنا حسابات في البنوك السودانية أو مافي أي طريقة تانية أو..أو.. مليون مخرج غير مقنع من هذه الحقيقة البديهية السرمدية الصمدية ..
كنت أتوقع واحد فقط يدق صدره ويقول أن دعم السوق الأسود خطأ - وأن التجارة السوداء خطأ يضر الإقتصاد .. لكن هذا التعصب في محاولة التبرؤ من دعم السوق الأسود يوضح أن أي واحد لو ختوه في محل مسئولية سيكون نسخة مكررة من الحكومة يغلط ويغالط في إنه ما غلطان !!! .. فالحكومة تضر في البلد من موقع الظالم والمواطن يضر في البلد من موقع المظلوم .. وكل طرف رامي المسئولية علي التاني .. !!!! ....
اللت والعجن ده لو طار السماء لن يغير هذه الحقيقة الراسخة .. :)
| |
|
|
|
|
|
|
Re: المغتربون والمهاجرون هم أكبر معول لتدمير الإقتصاد السوداني !!!.. (Re: Munir)
|
Quote: الأخ معتز المقبول سلامات يا أخي .. حقيقة لم يتضح لي ما ذكرته .. نرجو أن تسهب في الموضوع وتزيد في الشرح.
|
الاخ منير سلامات انا ارسل كل شهر بانتظام الي السودان عن طريق wester n union u وبعد اتحصل علي اثبات الارسال من الويسترن ..ورقه منهم اني ارسلت الي السودان مبلغ يوازي كزا.. كل عام هنا في بلجيكا تستلم اقرار ضريبي من الحكومه البلجيكيه...belastingbrief.........يجب ان تكتب في هذا الاقرار دخلك ..............هم عارفين الدخل ليك كم ......وعندهم .. اها الخارج...وانت معلنوا باثبات.....مثلآ وسترن يونون..مبالغ مرسله للسودان..كانوا يخصموها من ال onderhoudgeld.....ضرائب في صالح المهاجر الي بلجيكا...وترجع لك منها مبالغ مقدره هنا.... اما الان الان....اذا ارسلت 100 يورو الي السودان تدفع فيها 25في المائه..عشان يعتمدوها في BELASTINGBRIEF...U......وتجربه شخصيه والله.. وده غير انو اهللك استلموا المبلغ من البنك بطريقه رسميه.....خسارات من هنا و هناك............لو ناطق فرنسي ترجم الهولندي.....جهتكم تختلف امكن من الفلام..تحياتي
| |
|
|
|
|
|
|
Re: المغتربون والمهاجرون هم أكبر معول لتدمير الإقتصاد السوداني !!!.. (Re: معتز مقبول)
|
رد لكل الكاتبين تحت بلجيكا من 2010 اي مقيم داخل الاراضي البلجيكيه يدفع 25في المائه من التحويل..الي خارج بلجيكا عشان يكون معتمد وداخل في الاقرار الضريبي داخل بلجيكا...دي للمقيمين هنا في بلجيكا ...والاخ منير نحن في انتظاره هنا ... الكلام ده للسفاره السودانيه...الجاليه السودانييه..والاخ منير لو ماعارف....واي جهه سودانيه هنا في بلجيكا.... وشكرآ منير
| |
|
|
|
|
|
|
Re: المغتربون والمهاجرون هم أكبر معول لتدمير الإقتصاد السوداني !!!.. (Re: Munir)
|
Quote: Mohamed Ali Eltahir · London, United Kingdom بنك السودان والبنوك التجارية الت تعمل في السودان محظور التعامل معها انا املك صرافة في بريطانيا وشركة خدمات مالية في السودان ،طلبنا من بنك السودان بتزويدنا بتفاصيل رقم حساب مع بنك مراسل في بريطانيا من قبل شهر وما زال البنك يتلفت! بنك السودان اصدر لجميع شركات الخدمات المالية توجيه بلتسلبم بلعملة الحرة واستلام المبالغ المحولة الى الخارج بلعملة الحرة!! رد · 1 · · السبت، الساعة 04:03 مساءً |
برضوا بنك السودان ما يفتح ليك حساب .......مالك تفضح نفسك هنا ..افهما ياخ.
| |
|
|
|
|
|
|
Re: المغتربون والمهاجرون هم أكبر معول لتدمير الإقتصاد السوداني !!!.. (Re: Munir)
|
أخوة الفيسبوك عمر علي وعبدالرحيم على طه .. آسف لم أذكركم في المداخلة السابقة لأنه أخونا AlSadeq Abdullah AlHassan قافل الصفحة ومغطي علي مشاركاتكم :) . قولوا ليهو خت الكورة واطة ياخ .. وخلونا ننظر لعوجة رقبتنا مرة واحدة ..
. ويا Salah Ibrahim قلت لي ما عندي موضوع؟؟ ياخوي إنت الظاهر عليه بره الشبكة وما فاهم الموضوع زاتو ..
| |
|
|
|
|
|
|
Re: المغتربون والمهاجرون هم أكبر معول لتدمير الإقتصاد السوداني !!!.. (Re: Munir)
|
Quote: يا أخي العزيز ود بحري معتز مقبول سلامات أنا في بلجيكا كنت لغاية بداية السنة دي expat وفي ال non-resident status .. وكانت الشركة التي أعمل بها تقوم بكل إجراءات الضرائب بتاعتي، ولذلك خبرتي بفايلات الضرائب ما كبيرة .. ولذلك أنا ذاتي عندي دفعيات مفروض ترجع لي من مصلحة الضرائب ، ولكني بتروح علي لأني في فواتير بدفعها و بيفوت علي أني ارفقها لمسئولي الضرائب في شركتنا وبذلك بتروح علي ..
وبأمانة أنا زاتو ما عارف البلد دي الحاكمها منو والحكومة زاتها كونوها متين .. كنت سمعت قبل فترة أنهم ليهم ستة شهور ما قادرين يكونوا حكومة زاتو :) .. وطول قعادي في البلد دي مافي بلجيكي قال لي الحكومة دي بيضاء واللا سوداء أو قال لي الأسعار غالية واللا رخيصة .. كلام في السياسة نهي :)
أما بخصوص التحويلات أنا ماعارف نظام ال 25 في المئة ده شنو؟ حقيقة ما عندي فكرة .. وبالنسبة للويسترن يونيون ده كمان أخير تمشي للتجار السودانيين طالما ما بتحول بالبنك .. منها علي الأقل قروشك تمشي لسودانيين وثانياً توفر رسوم تحويلهم العالية .. طبعاً من المشاكل الرئيسية أن السودان محاصر إقتصادياَ ولذلك التعامل مع البنوك عليه تضييق شديد..
(عدل بواسطة Munir on 20-02-2013, 00:39 AM) الحبيب منير انت من خارج البلد وده اكيد..ماكانت سته شهور كانت سنه واكتر تحياتي ....وسلام ..لكن انت من وين بلجيكا اكيد لا انا متاكد...معتز مقببول بلجيكا
| |
|
|
|
|
|
|
Re: المغتربون والمهاجرون هم أكبر معول لتدمير الإقتصاد السوداني !!!.. (Re: معتز مقبول)
|
Quote: يا أخي العزيز ود بحري معتز مقبول سلامات أنا في بلجيكا كنت لغاية بداية السنة دي expat وفي ال non-resident status .. وكانت الشركة التي أعمل بها تقوم بكل إجراءات الضرائب بتاعتي، ولذلك خبرتي بفايلات الضرائب ما كبيرة .. ولذلك أنا ذاتي عندي دفعيات مفروض ترجع لي من مصلحة الضرائب ، ولكني بتروح علي لأني في فواتير بدفعها و بيفوت علي أني ارفقها لمسئولي الضرائب في شركتنا وبذلك بتروح علي ..
وبأمانة أنا زاتو ما عارف البلد دي الحاكمها منو والحكومة زاتها كونوها متين .. كنت سمعت قبل فترة أنهم ليهم ستة شهور ما قادرين يكونوا حكومة زاتو :) .. وطول قعادي في البلد دي مافي بلجيكي قال لي الحكومة دي بيضاء واللا سوداء أو قال لي الأسعار غالية واللا رخيصة .. كلام في السياسة نهي :)
أما بخصوص التحويلات أنا ماعارف نظام ال 25 في المئة ده شنو؟ حقيقة ما عندي فكرة .. وبالنسبة للويسترن يونياون ده كمان أخير تمشي للتجار السودانيين طالما ما بتحول بالبنك .. منها علي الأقل قروشك تمشي لسودانيين وثانياً توفر رسوم تحويلهم العالية .. طبعاً من المشاكل الرئيسية أن السودان محاصر إقتصادياَ ولذلك التعامل مع البنوك عليه تضييق شديد..
|
اشك انك من المملكه...يا حبيب...معتز مقبول الصديق من بلجيكا..
| |
|
|
|
|
|
|
Re: المغتربون والمهاجرون هم أكبر معول لتدمير الإقتصاد السوداني !!!.. (Re: Kamal Elmahi)
|
يا أخي Kamal Elmahi يا عزيز كلامك ده مليان ثقوب .. وفيه كثير من التحامل وعدم الإنصاف .. ياخي شوف رغم أني لست منتمياَ لهذه الجماعة لكن لن يجرمني شنئان قوم علي أن لا أكون منصفاَ .. ياخ ناس سوداتل ديل لمن بدأوا يحفروا في العاصمة ليرموا كوابل الإتصالات دي كان الزمن داك تلفونات السودان عبارة عن قطع أثرية .. وكان في حلة كاملة تلقي العندهم تلفون بيت أو بيتين - الكلام ده لغاية قريب نهاية التسعينات - فجأة أي أسرة بقي عندها تلفون وبعد يومين أختفت التلفونات الأرضية وقفز الناس للموبايلات ومنها للإسكايب والفيسبوك بسرعة مليون !!.. يعني هناك كوادر حكومية مقتدرة أستطاعت أن تجعل السودان رائداَ في هذا المجال .. قلت أن نميري أنجز أكتر من هذه الحكومة - ياخوي قول كلام تاني .. أمَّال الناس إنتفضت علي شنو؟؟ .. نميري كان عايش علي المعونة الأمريكية والمساعدات العربية .. وأهو عندك شارع مدني ده من زمن نميري إسمه شارع الموت، لماذا لم يوسعه ليواكب المواصفات العالمية؟؟ .. بعدين إنت مستهون بمصنع الفلنكات ده؟؟ تعرف فلنكات خرصانة معناها شنو مقارنة بالخشب .. أمشي شوف ميزة الشغل ده شنو؟ عشان كده قلت ليك أن الكيزان الصناديد ديل حيدخلوا السودان عصر الhigh speed train طوالي دون مروراً بالمرحلة الوسطي ..
الشئ التاني إنت برضو ليه بتستهون بالطرق والجسور والسدود؟؟ خليك منصف ومحايد مرة واحدة .. ياخي أنا آخر مرة سافرت بلدنا في الشمالية بنيسان مزدحم تحت وفوق سنة 88 وقطعنا هذا المشوار في 20 ساعة بالتمام والكمال مع الرمال والخيران ورجعت الخرطوم أيام السيول ديك بالقطر في أسبوع .. تقول لي شوية طرق وجسور .. !! .. دي عصبية عجيبة منك ياخي ..
ثم عاوز تقول لي الكيزان ديل ناس دنيا .. أيوة عارفهم ناس دنيا وأتفق معاك إنهم ناس دنياَ.. بس وريني هل أعداؤهم ناس آخرة ؟؟ هل الليبراليين العاوزين يبيحوا اللواط ناس آخرة ؟؟ هل الشيوعيين ناس آخرة.. ؟؟ هل الحركة الشعبية وأذيالها ناس آخرة ؟؟ .. هل تجار السوق الأسود ناس آخرة ؟؟ !!!
الناس عاوزة تجر لينا العداد للزيرو عشان تجينا عصابات من نوع جديد to start everything over -
بعدين ياخي إنت طالما مقتنع بأن تجار السوق الأسود هم الكيزان زاتهم بيشتروا العملة ويحولوها بره تحسباَ ليوم الهروب الكبير، طيب بتساعدهم ليه؟؟ بتبيع ليهم ليه؟؟ .. قول كلام منطقي ياخ .. لكين أقول ليك كلام ؟ الكيزان ديل نوعين .. فيهم الفرة الذي ممكن يهرب كما هرب الذين من قبلهم ولكن الأغلبية قاعدين وقابضين سلاحهم ومستعدين للحرب للطيش !!! ..
| |
|
|
|
|
|
|
Re: المغتربون والمهاجرون هم أكبر معول لتدمير الإقتصاد السوداني !!!.. (Re: Munir)
|
Quote: [يامنير حكومتنا الرشيدة هي من تخلق السوق الاسود بتحكمها في خلق اللة....تذكر في الالفين وسبعة اختفي السوق الاسوق لان الحكومة رفعت سعر الصرف بما يناسب وقدرتها من العملة الصعبة ..والان حين فقدتها تحاول ان تحارب التضخم بالطعن في ظل الفيل لا في جسمة المترهل والذي يمص دماء الغلابا بالضرائب والجبايات ...انظر الي الصرف الحكومي ومخصصات كبار رؤوس الدولة ..الولاة ونوابهم الوزراء والاف الدولارات التي تخرج من ميزانية الدولة دون رقيب ...المغتربون هم من يساهمون في بقاء الانقاذ ..لان مصلحة اهليهم واسرهم لديهم اكبر واعظم اهمية من بقاء الانقاذ او زوالها ...ولولا تكافل السودانين سوا في الخارج او الداخل واساهمهم في تحسين اوضاع الاخرين المعدومين لانفرط الامن وساد الجوع كل بلادي ...وسقطت الانقاذ رغم انفها ..............] |
أولا عنوان البوست مستفز جدا لشريحة هامة فى المجتمع السوداني ولها إسهامات في كل المجالات لا تخطئها الا عين جاهلة. المغترب السوداني مصدر من المصادر الرئيسية للعملة الصعبة للسودان، وكلمة السودان دى نخت تحتها خط، يعني قروش المغترب جايه السودان جايه بغض النظر عن الطريق والوسيلة والوجهة، وكونها تصب في البنوك او غيرها ده يبقى شغل الحكومة وهى الفى إيدها القلم والقرار وإدارة المال الإقتصاد بوضع السياسات الصحيحة البتخلىها تتحكم في هذه الاموال دون المساس بحقوق اصحابها بجعلها تصب فى االقنوات الاساسية الرسمية من مصارف وغيرها وتكون جزءا لا يتجزء من من الكتلة النقدية التى تتحكم في الافتصاد.
فبل الإنفصال، قالو انهم متحسبون لذلك ووعملو الاحتياطات اللازمة لتجاوز الاثار المترتبة علي خروج عائد النفط من الموازنة والواقع كذب ذلك وما شفنا حاجة، ثم بعدها قالو الذهب والمعادن حيسدو الفجوة في النقد الاجنبي ولكن زادت الفجوة، وثالثا قالو ان ترتيب واعادة هيكلة الحكومة هو الحل وبرضو ما لفقت، ورابعا قالو فى اموال ضخمة بالدولار آتية من دولة صديقة لخلق توازن بين العرض والطلب للنقد الاجنبى وما زال الحال فى حالو ،وآخرها لمو تجار العملة و لا زالت استضافتهمجارية في المعتقلات وبرضو الحال من بعضو، وفوق ده كله في حرب في النيل الازرق وجنوب كردفان ومناطق اخرى تستنزف مقدرة وامكانيات الدولة المالية وغير المالية. فضلا عن مسألة العلاقة مع جنوب دولة جنوب السودان باسقاطاتها الاقتصادية والملية المهمة، غذ ان هذا الامر الهام الا ينتظر وحله غير منظور فى القريب العاجل رغم المفاوضات المكوكية التي ما فتئت تزيد المسألة تعقيدا بل دفعها للحلحلة. وهنالك اشياء كثيره جدا افاض المتداخلون فى الاشارة اليها وأزيد عليها واحده اخيره وهى ان السودان محاصر اقتصاديا لاسباب متعلقة بالحكومة وسياساتها وهى عارفه كده كويس، واديك معلومة امكن ما عارفها وهى انه حتى البنوك فى الخارج - اذا اراد المغترب التحويل عبر القنوات الرسمية لا تتتعامل مع التحويلات للسودان الا فى نطاق محدود جدا وان فعلت فالمبالغ المسموح بها لا تتجاوز سقفا متواضعا. فقط للتوضيح، اعرف من حول مبلغا معتبرا عن طريق البنك وفي اليوم التالى افاده البنك ان يأتى لاستعادة ماله لان التحويل للسودان غير ممكن.`اليوم الناس فى السودان بحوزتهم بلايين الدولارات في بيوتهم كحرز امين لثرواتهم لان سياسات الدولة المالية متخبطة وممكن تتغير في اليوم الواحد، مثلا عندما ساوت الحكومة السعر الرسمي بالموازي اي زول عنده مدخرات بالعملة الوطنية بقرار من البنك المركزي فقد نصف قيمتها وده احد الاسباب الجعلت يزداد الطلب على النقد الاجنبي مش عشان استيراد سلع ولكن من اجل الدولار نفسه. . اقول لصاحب البوست ما دخل المغترب او المهاجر فى كل ما ورد اعلا اذ ان كل ما ورد اسهم في تدمير الاقتصاد السوداني مع اشياء كثيره معروفة للقاصي والداني. وبعدين، قد يبدو ظاهريا ان المغترب مستفيد من تدهور الدولار والكلام ده ما بقولو الا زول ما بفهم ابجديات الاقتصاد لان الطرف التاني من المعادلة وهي السلع نجد ان اسعارها تزداد في توال هندسى مخيف وبالتالى الزيادة في سعر الدولار او العملة الصعبة عموما تحصيل حاصل وما في اى زول مستفيد والكل خسران.صحيح ربما تستفيد فئة محدودة من المضاربات آنيا ولكن ده كله ظاهرى ويتلاشى عندما تريد تحويل النقد لسلعهنا المحك إذ هنا فقط تعرف قيمة قروشك والعبرة ليست معاك كم بل كم تقدر تشتري بالقروش العندك..
الاقتباس اعلاه وهو مداخلة احد الاخوان، بلخص كل الانشا العملتها انا هنا ،واعتقد ان كلام الراجل ده هو مربط الفرس وفيه رد قاطع لدحض الكلام لما سوقت من اتهام جائر يفقد المصداقية ويجافي الواقع.المغترب المسكين لا دخل له فى كل ما يحدث له مشاكله التي يابه بها احد وكل مغترب يكافح من اجل عيش كريم استحال في رحاب الوطن وبين الأهل.ومع احتراحي لوجهة نظر صاحب البوست، لكنني اري انه مدين بالاعتذر لجموع السودانيين المغتربين والمهاجرين لانه تجني عليهم. واذا هم كما يعتقد انهم معول الهدم لاقتصاد البلد فهل اذا توقفو عن تحويل أموالهم للسودان سينعدل الحال!؟ لو كان هذا البوست للونسة لوجدت لك عذرا ولكن... فلنترك المغترب والمهاجر في حاله ويكفيه اللفيه.....
| |
|
|
|
|
|
|
Re: المغتربون والمهاجرون هم أكبر معول لتدمير الإقتصاد السوداني !!!.. (Re: النعمة عبدالرحمن)
|
لصاحبة المداخلة أعلاه.. مع إحترامي لغضبتك لكني أقول ليك إنو كلامي الكتير الدلقته في البوست ده بالنسبة ليك كأنه ما اتكتب - وما ظنيتك طلعتي منه بفائدة .. وحقيقة أنا فترت من الشرح والتكرار لفكرة بسيطة ما دايرة ليها درس عصر عشان الواحد يستوعبها ..
ويبدو لي أني مهما كررت وكررت ما حيجيب نتيجة .. ولذلك يا أخوانا أعفونا من الردود و أخليكم في رعاية الله ..
| |
|
|
|
|
|
|
| |