وما أحلى إنجمامّتنا .. نظل واقفين إلى يوم الفصل والدين .. وتبقى هي كلمة طيبة نغرسها

Quote: شيقوق في صورة تاني يا ودابوالقاسم حليل شيقوق كان زولاً بشد الحيل كلامو لذيذ يونسنا وعديل بالحيل كتير الناس تقول مجنون ومامجنون في شيتن في قليبو يازاول لي حامي النوم يبرم في سبيب راسو يساهر لي هوايد الليل حليل شيقوق يقوم من نومو ضرب الديك يفوت بي ريقو زي الضيف يفارق الحلة مستعجل مع هبة نسايم الصيف حفيان ساهي يباري القيف يخت محجانو في كتفو يطب مخلايتو في أباطو ويضرب الغابة وإتوكر يحت السعفة والعليف يهز شدرن فروعو حديد ولما العين تكون شافت قريب وبعيد وبهايم الحلة تتوجه عشان ما تأكل المحتوت شيقوق يعاين ليها ويتبسم وما بحميها وأمشي يفوت حليل شيقوق كان زولاً يحب الجوطة والحفلات محل مايسمع النقرة يخت طاقيتو في راسو ويشيل طمبورو في يدو ويقج حفيان بلا نعلات دلا ليك العرس داقات وريحة المحلب المخلوط مع الصندل وحنة مخلوطة في طاسات وضريرة ماليا خشم الحُق وأمالعروس مشغولة بي الدخلة والمرقا وبنات عم العريس واقفات يسالمن ديل يعزمن ديك يجاملن ديل شايلات جرتق مو غش خرز منضوم باللولي وهلال زي هلال شوال عريس بالفرحة داير إنشق محصن نفسو بي ياسين وجايبين ليهو عضم الحوت ومالي ضرعو بي الحِجبات حِجاب قلاد أحمر حِجاب جلاد ودفراج وهاك يا زيطة وجوطة وناس داخلين وناس مارقين وضيف جا وضيف فات وشيقوق منسي في طرف الصريف لا زولاً يقول ليهو أمشي لا زولاً يقول ليهو تعال

(عدل بواسطة الطيب شيقوق on 06-15-2008, 08:04 AM)