|
|
 مااااااااااااااا تغركم المظاهر !!!!
|
صباحكم مشرق وسعيد حيثما كنتم في الإقامة الجبرية داخل الوطن أو الهجرة القسرية خارج الوطن !!!
تصف الشعوب الأخرى الشعب السوداني رغم حماقته ورد فعله السريع على أنه شعب طيب ومسالم تخدعه
المظاهر ولا يغوص في أعماق الأشياء ويفلفلها كما تفعل الشعوب الأخرى المولودة بسنونها ,, يعني
باختصار ما بتقدر تخم ليك مصري و لا تتفهلو على لبناني ولا تنصب على إماراتي مثلما يفعل الآخرون لأن
أدوات النصب غير متوفرة لدينا وإذا حاول أحدنا أن ينصب على أحد يجد نفسه وقد رفعت عليه ألف قضية
نصب واحتيال وتم التشهير به في مشارق الأرض ومغاربها لأنها كما يقولون سالفة غير عادية لذلك تكون
فضيحته بجلاجل وتقوم الدنيا ولا تقعد عشان الناس مش متعودة إنه سوداني ينصب على أحد عموما يبدو إني
خرجت من الموضوع شوية زي ما قلت ليكم سابقا إنسانة إنصرافية يعني لو عايزة أمشي المستشفى بلقى
روحي في أبوظبي مول ولو عايزة أغني رجب حوش صاحبك عني أقوم أقول رمضان حوش ذو القعدة عني وهكذا
دواليك طبعا دواليك دي من الثانوي العام بسمعها لكن لحدي هسة ما عارفة دواليك يعني شنو مرات أقول
يمكن قاصدين دواليب المهم نحن كشعب فعلا طيب ويهتم بالمظهر دون الجوهر وعشان أأكد ليكم الكلام دة
حأوريكم جملة أمثال تدل على سطحيتنا وعدم مقدرتنا على التخلص منه هذه الظاهرة .
* واحد سوداني شين جدا لكنه قمة في الذكاء قال لازم أعرس واحدة حلوة جدا ولو غبية عشان تجيب بت
على سماحة أمها وذكاء أبوها وفعلا لقى واحدة آية في الجمال لكن ما عارفة كوعها من بوعها قدر ما
حاولو معاه أصر طالما هي جميلة خلاص الباقي كله هين أول ما ولدت تصورو جابت شنو ؟ بت شينة زي
أبوها وغبية زي أمها وغبية ,, وما تغركم المظاهر !!!
* واحدة سودانية معانا في أبوظبي زوجها شغال في الدفاع قاموا فنشوه أيام حرب الخليج لما دول
الخليج اتقلبت على دول الضد وهي التي وقفت ضد غزو دول التحالف لإخراج العراقيين من الكويت فسموها
دول الضد وهي السودان واليمن والأردن وفلسطين وموريتانيا طبعا الجماعةالخليجيين رد فعلهم سريع جدا
زي ما بطردوا ليك المدرب الأجنبي سواد ليل لو فريقهم انهزم , قاموا طردوا كل أبناء دول الضد من
الدفاع المهم زوجة صاحبنا لما فنشوه كانت عزاية نعاية وكل ما تزورها واحدة عشان تكفر ليها تقول
ليها أنا ندمانة ندم السواد والرماد عشان خليت الراجل المتعلم الجامعي وهسة بقى وزير وعندو تلاتة
بيوت وعرست الجاهل اليادوبك مخلص الإعدادية عشان مغترب وهسة فنشوه لا عندو بيت ولا حقوق عشان شايل
سلفية,,, وبرضه أرجع وأقول ما تغركم المظاهر!!!
* سوداني مغترب قال عايز يتزوج بت حلوة بشرط تكون بت عيلة وأبوها يشغل مركز مرموق وفعلا وصفوا ليه
واحد عميد كلية الهندسة في جامعة معروفة قال خلاص دة حيكون راجل فاهم جدا وسوف يقدر المشوار
الطويسل القطعتو من أبوظبي للخرطوم ومن أمبدة للمنشية عشان أخطب بته ,, أول سؤال سأله قال ليه
سعادتك بتشتغل وين وساكن وين ؟ قال ليه مغترب في أبو ظبي وساكن في أمبدة !!! رد عليه بازدراء
شديد مغترب وساكن في أمبدة ؟؟؟؟ ياخي أنا عربيتي ما بخليها تمشي أمبدة أديك بتي تسكنها في أم
بدة ياخي ما تمتد رجليك قدر لحافك ,, وما تغركم المظاهر !!!
* سودانية قالت ما بتعرس أبدا إلا إذا لقت واحد غنيان جدا عشان يعيشها في عالم تاني ويشيل كمان
أهلها معاها وفعلا قعدت وقعدت لامن لقت واحد عنده مال قارون ولكن !! كان بحاسبها على الهوا الطاير
والنفس الطالع ونازل لما احتجت على بخله قال ليها لو ما عملنا كدة كان لمينا القروش دي ؟؟ وبرضو
ما تغركم المظاهر !!
* حاشية : أنا غايتو عشان سودانية مية المية غرتني المظاهر واتخميت في زول خمة عدوكم بس ما
تسألوني هو منو عارفاكم شمشارين وبتحبو الشمار لكن من ستر مؤمنا ستره الله يوم القيامة وفتكم
بعافية ,,,
|
|
 
|
|
|
|
|
|
|
 Re: مااااااااااااااا تغركم المظاهر !!!! (Re: مجدي عبدالرحيم فضل)
|
Quote: أنا غايتو عشان سودانية مية المية غرتني المظاهر واتخميت في زول خمة عدوكم بس ما
تسألوني هو منو عارفاكم شمشارين وبتحبو الشمار لكن من ستر مؤمنا ستره الله يوم القيامة |
سلام عواطف..
لكن ختمتيها بي ضربة جزاء..
في داعي ترفع اسهم الشمار للدرجة دي..
غايتو لو كلمتيني ما بكلم زول..كويس؟؟
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: مجدي عبدالرحيم فضل)
|
الاخت عواطف ادريس
كل عام وانتى بخير
شوفى دا اول يوم فى حياتى ادخل معاك مداخله
رغم استمتاعى ببعض ما تكتبين .
موضوع المظاهر دا اولا منكم انتو البنات لكن حاقول
ليك عن زميله حفظها الله كانت من الجميلات بجد وقالوا
حتى الان تحتفظ بذاك الابداع والروح الحلوة رغم السن
قالت لينا نحنا البنات عند الزواج او التفكير فيه
عندنا اربعه رجال
واحد حلو نغيظ به الشابات فى مواقف المواصلات
والاخر حكاى لسان عشان الضحك والفرفشه وما كان
وواحد نص كم وكان عزمنى وخرجت معاه لايكون هجام
وواحد شين ومفتول عضلات دا عشان العمر والزمان
والاخير دا هو المرفود فى المقال وقدر ما صاحبتك
تنعتة امام الناس لكن فى القلب ليه مكان .
برجع ليك فى وقت اخر .
تحياتى
ســــيد
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: د.محمد حسن)
|
Quote: قال ليها
انا ما حاعمل زي صاحبي الغنيان اقول ليك حاشتري ليك شقة في القاهرة
وانزل ليك كورولا 2007
ولا شهر العسل حيكون في ديزني لاند
انا بقول ليك ببساطة
اني بحبك
قالت ليه لو بتحبني جد
عرفني على صاحبك ده
ههههههههههههههههههههههههههههههههههههههههههها |
غايتو محمد حسن دى بالغت فيها هو مالو جاب السيرة يستاهل برضو
| |
|
|
|
|
|
|
|
|
 Re: مااااااااااااااا تغركم المظاهر !!!! (Re: د.محمد حسن)
|
ها ها ها !!!
والله ياحمادة ضحكتني جدا ,,, قالو في واحد موظف على قدر حالو قال لواحدة أنا إنسان بسيط وما
عندي حاجة لكن بالحب نقدر نبني بيتنا قشة قشة نطت قالت ليه إنت من زمن بيوت القش ؟؟؟ طبعا شاكوش
مافيش منه ,,,
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: abubakr)
|
ماجدة عوض خوجلي :
| Quote: اخى العزيز ابوجهينه ممكن سؤال عايز التلفون ليه داير تمشى امبدة ؟! |
داير أسلم عليهو ساكت ..
| Quote: والله شمار مغربل كمان ,,, أبو جهينة شكلو عايز يمشي القماير !!! |
قماير شنو يا عواطف ..
أنا طموحي في الفلل الرئاسية
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: abubakr)
|
باجماعة ما تقولو الزولة كلام ما قالتو
قالت اتخمت في زول
وما حددت الزول ده منو!
المهم انك رايعةوعملتي الما بعملوه
ناس النكت البايخين
النكته عندك بادية بي كان في سوداني
واول بذور الفتنه قادوها ناس النكت
بعد انتهينا من عربي وحلبي وازرقاني
وكان في جعلي وزاندي
وادروب وغرباوي
جو احكو نكت عن القبايل كانو في ناس وناس
مع انو الضحك واحد
شكرا ليك
وماتنتظري مني نكته
مابعرف للنكت
وما بحفظه
وما تغركم المظاهر
| |
|
|
|
|
|
|
|
|
 Re: مااااااااااااااا تغركم المظاهر !!!! (Re: محمد سنى دفع الله)
|
حمودي أيها الإنسان الرائع روعة حضورك في البوست !!!
شكرا لك على هذا المرور الأنيق ونحن في السودان نهوى أوطانا وإن رحلنا بعيد نطرى خلانا ,, طبعا كلنا
سودانيين بصرف النظر عن الجهة والقبيلة يجب أن يندحر هذا التمييز الأحمف ,,, وما تغركم المظاهر .
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: abubakr)
|
Quote: أول ما ولدت تصورو جابت شنو ؟ بت شينة زي
أبوها وغبية زي أمها وغبية ,, |
والله عوجة
كيفك يا عواطف .. المسكوت عنه كتيييير .
والمغتربين البببهلوها من المطار .. عايشين كيف الغربة ؟؟!| Quote: وما تغركم المظاهر !!! |
مودتى
| |
|
|
|
|
|
|
|
|
 Re: مااااااااااااااا تغركم المظاهر !!!! (Re: رأفت ميلاد)
|
أأأأأأأأأأه يا ريري ضربت الوتر الحساس !!!!
عايشين على السلفيات والماستر كارد والنسوان عايزات دهب هبر هبر وتياب ما أنزل الله بها من سلطان
لزوم الإجازة وغيظ النسابة طبعا زي ما بقولو البوبار الفوق بيت الإيجار !!! شكرا على الطلة الأنيقة .
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: عواطف ادريس اسماعيل)
|
عطووووووفة !!!!
تاني بقول ليك
اسف زغللت عيونك بس دي شوية حركات علمنا ليها بكري ابوبكر
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: عواطف ادريس اسماعيل)
|
الحبيبة عطوفة
كل سنة و انتى طيبة و مشتاقين كتير ولله -
فعلا مشكلة المظاهر دى اصبحت متفشية جدا فى مجتمعاتنا و خلقت مشاكل كتيرة و بالذات بينا نحن البنات يعنى الواحدة ما بتتزوج بناء على شخصية الرجل بل بناء على مظاهر معينة لازم تكون متوفرة عشان كدة معدلات الطلاق فى مجتمعنا ماشة فى زيادة مخيفة و برضو مشكلة العنوسة انا فى رايى الشخصى انو المظاهر سبب رئيسى و رئيسى جدا فيها لانو قليل جدا البوافقوا بالبسيط و ده قطعا ما فى كل البنات و لكن نسبة ليست بالبسيطة -عموما نتمنى انو كلنا نعاين لى جوهر الانسان و نخلى المظاهر دى على جنب و مشاكل كتيرة فى مجتمعنا حتنتهى انشاء الله
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: نهلة عمر)
|
نهولة ,,, يا أحلى زولة !!!
شكرا على مداخلتك اللطيفة وفعلا العنوسة أصبحت من المشاكل التي تؤرق المجتمع والسبب في ذلك المظاهر
من شيلة وقيدومة ودخلة وصبحية إلخ والطلاق برضو بتلعب المظاهر دور كبير في حدوثه عموما أشكرك يا
ست البنات على مرورك الرقيق ....
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: عواطف ادريس اسماعيل)
|
Quote: حاشية : أنا غايتو عشان سودانية مية المية غرتني المظاهر واتخميت في زول خمة عدوكم بس ما
تسألوني هو منو عارفاكم شمشارين وبتحبو الشمار لكن من ستر مؤمنا ستره الله يوم القيامة وفتكم
بعافية ,,, |
العزيزة عواطف
خلينى فى الحاشية دى
فانا من قام بخم أخريات
وقايلين القبه جواها فكى
وحاتك لقو جواها سفيه حق السفه ما عندو
وبرضو ما تغركم المظاهر
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: عواطف ادريس اسماعيل)
|
تسألوني هو منو عارفاكم شمشارين وبتحبو الشمار لكن من ستر مؤمنا ستره الله يوم القيامة وفتكم
عواطف سلامات وليك وحشة
انت جايبا شمار الدنيا كلوا وبعد دة كلوا نحنا شمشارين
غايتوا الذول المستور دة اتخايل لي هو الاتخمة ههههههههههههههههههههههههههههههههههههها ي
لك الود
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: بدرالدين كاجوري)
|
| Quote: أدوات النصب غير متوفرة لدينا وإذا حاول أحدنا أن ينصب على أحد يجد نفسه وقد رفعت عليه ألف قضية نصب واحتيال وتم التشهير به في مشارق الأرض ومغاربها لأنها كما يقولون سالفة غير عادية لذلك تكون فضيحته بجلاجل وتقوم الدنيا ولا تقعد عشان الناس مش متعودة إنه سوداني ينصب على أحد |
عطوووووفة ... كل عام وأنتم بخير
الكلام دا كان زمان ...
واحد جارنا ( نصاب مشهور ) في السودان قال لي ياخي عايز لي فيزا للسعودية .. قلت ليهو: تعمل بيها شنو الحكاية ما خلاص مولد وانتهى .. قال لي : انتهى !!! إنت بس جيب لي الفيزا وأديني ستة شهور بس وشوفني لو ما جيت راجع السودان وجبت ليكم الكينج معاي في الشنطة 
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: بدرالدين كاجوري)
|
الأخت العزيزة عواطفِ
ليه يا عواطف تفتحي الجروح .. والله أنا شفت حاجات هنا تخلي الواحد يفقد صوابو .. حضرت قصة واحدة خريجة قانون أتزوجت خريج وسطى لأنو مغترب لأنو جاهم لابس زي ما بقولو بنطلون صوف وساعة وتربروف .. وسوى ليها ولي أهلها البحر طحينة .. ووراهم إنو هو نص أمير وعايش عيشة خرافية.. ووعدهم بحفلة زفاف تحكي بيها العاصمة وضواحيها والله وكيلك لما بقوا في الجد اتهرب وقال بجيب أولاد حاج الماحي يِسفِّنوا عشان هو (مسلم ملتزم).. تصوري مشينا نهز في العريس فكانت ريحة العرقي ضاربة منو بالإضافة إلى عرقو ومغطية على كل الرواح الجميلة بما فيها ريحة العروس حتى نحن قربنا نسكر على الريحة .. المهم هي بهناك وهو بي هنا ويا فرحة ما تمت ، ولما أخيراً أهل العروس رسلوا لبعض معارفهم في دولة المهجر حيث يغترب أخونا الملتزم عشان على الأقل يعوفوا الأسباب الخلّت العريس النفض الكيس ما يرسل ياخد العروس وقالوا ربما المانع خير ، الرسول إكتشف إنو العريس شغال في مطعم مغلق خشب .. تخيلي يكون شغال في محل زي ده شنو؟ علماً بأن صاحب المغلق قاعد متحكر في الصندوق ..!! بالمناسبة يا عواطف أنا حضرت قصص طويلة زي دي .. والله قلة من المغتربين مصايب عديل كده .. والشين ما خلى للزين سمعة يعيش بيها !!
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: عواطف ادريس اسماعيل)
|
واحدة سودانية اتزوجت سوداني شغال في شركة بترول في أبوظبي أهلها فرحوا فرح شديد جدا لأنهم عارفين
رواتب البترول شنو ورواتب الدفاع شنو المهم جات وسكنها معاه في الجزيرة محل شغلو لكن كان حارمه
من أي شيء باعتبار أنه في جزيرة والمسطينة مصدقة لما يشتري الخضار يشتريه بمعرفتو ويدخلو التلاجة
بمعرفتو ولما يشتري اللحم يحسب عدد القطع بمعرفتو ويدخلهم التلاجة أيضا بمعرفتو المهم يوم شافت
أولاد الألمان جيرانهم شايلين عنب وتفاح لما سألته ديل جابوه من وين قال ليها من ألمانيا المهم ربك
رب الخير صاحبتنا أول ما عرفت و اتنورت لجأت للسفارة وحكت ليهم حكاية الجفاف والتصحر وغز الكوع
الفي الجوع وكان الأيام ديك الوزير المفوض أخونا الراجل الكلس علي حمد إبراهيم قام طوالي سفرها
لأهلها زي ما بعمل كل مرة لما تجيه واحدة ملهاش حل ,, يا حليلك يا علي الدنيا وراك خربت !!!
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: عواطف ادريس اسماعيل)
|
العزيزة عواطف
غايتو السودانيين عندهم مرات ابداعات بيعرفوها براهم
ظهرت موضة العروس البتمشي الصين عشان تجهز عفش بيت الزوجية
ثم تعرج على دبي عشان تشتري هدوم الشيلة
ثم تغشى وين ما عارفة عشان تشتري شنو كدا برضو ما عارفة
يعني ما تفهمي ده عرس ولا مفاوضات سلام
وفي الاخر هي كلها لحظات وينتهي البرنامج وده كلو عشان الناس
وتنسى الواحدة انه البتطلع في ميتين جيبه ده حيبقا زوجها وشريك حياتها واللي مفروض تبقا ليهو سكن ومودة
وتضيع البساطة ثم البساطة شمار في مظاهر كذابة ساكت
| |
|
|
|
|
|
|
|
|
 Re: مااااااااااااااا تغركم المظاهر !!!! (Re: maia)
|
ميوية الحلوة !!!
ما أجمل طلتك وما أسعدني بك أيتها الراسية الرزينة ,,,
كل ما ذكرتيه صحيح الأيامات دي في الإمارات طالعة موضة البنات البجن يشترن شيلتن تعالي شوفي
المبالغات والحركات والمظاهر غايتو ربنا يستر ويكون في العون الأهل إتغيرو تماما زمان ما كان
بسمحو لبناتن يسافرن لوحدهن دلوقت مشن لغاية جزر الواغ واغ دة كله بسبب المظاهر ..
| |
|
|
|
|
|
|
|
|
 Re: مااااااااااااااا تغركم المظاهر !!!! (Re: Adil Osman)
|
عدولي !!!
يسعد صباحك بتوقيت لندن ,,,
ومساك الله بالخير بتوقيت أبوظبي ,,,
حي المظاهر ذاتو بقى يتوارى خجلا من مظاهر الأحياء التانية ياعادل في واحدة سودانية كانت في أبوظبي
ورجعت السودان زفت بتها في الهودج جابت أربعة رجال طوال وعراض شالوها في الهودج لغاية الكوشة
أيه رأيك؟
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: عواطف ادريس اسماعيل)
|
Quote: أول ما ولدت تصورو جابت شنو ؟ بت شينة زي
أبوها وغبية زي أمها وغبية ,, وما تغركم المظاهر !!! |
ده طوالي كان يشيل طوريتو وكوريكو ويلف عمامته ويقول انا ذاهب الى يثرب يا امرأة
وانت ايتها الطفلة لك الوأد ولأمك الطلاق
عواطف مشتاقين وراجعليك واحدة واحدة
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: عواطف ادريس اسماعيل)
|
الحبيبة عطوفة..
مشتاقين و الله....و طلٌتك علينا حللللللللللللللللوة.
أنا يا ستي كنتَ بفتكر قصة المظاهر خدٌاعة و التباهى و التفاخر في المناسبات دي..حكراً علينا نحن السودانيين خاصةً...و شعوب العالم الثالث..عامةً..
لكن قبل فترة شُفت حلقة جميلة من (( أوبرا )) بتتكلم فيها عن نفس المشكلة دي عندهم..و قالت كلام أنا بفتكر نحن كلنا مفروض ننتبه ليهو.
قالت- ما معناهو - إننا بنهتم بتفاصيل الزواج..حفلاته..الأكل..الشراب..مدعويه..فستان الزفاف..بدلة العريس..شهر العسل...بيت الزوجية..العفش..الستاير..إلخ..
و ننسى ما بعد كل الهُليلة دي!
قالت في عروسات..بيتصدموا في حياتهن الزوجية لأنهن غير مستعدات لتحمل المسئولية و لم يضعن أي صورة - قاتمة كانت أم مُشرقة - لما قد يحدث بعد شهر العسل..لمن تبتدي الحياة الواقعية البعيدة عن الشكليات و المظاهر..
و إنو في عرسان..بيتصدموا كذلك من المسئولية..و الفواتير..و الحياة المُشتركة..و بيلقوا نفسهم صرفوا تحويشة العمر في تفاصيل صغيرة , لجعل ليلة العرس و شهر العسل..something special .ليبدأوا بعد شهر العسل رحلة تسديد الفواتير و الديون مما يصيبهم بحالة إحباط و أحياناً إكتئاب.
يعني - بالمختصر المفيد -
نحن - رجال على نسوان-...غارانا المظاهر .
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: mamkouna)
|
العزيزه عواطف
شكرا لك وانت تهبشي كل البلاوي الفي مجتمعنا.
مصداقا لقصتك هذه:
Quote:
* واحدة سودانية معانا في أبوظبي زوجها شغال في الدفاع قاموا فنشوه أيام حرب الخليج لما دول
الخليج اتقلبت على دول الضد وهي التي وقفت ضد غزو دول التحالف لإخراج العراقيين من الكويت فسموها
دول الضد وهي السودان واليمن والأردن وفلسطين وموريتانيا طبعا الجماعةالخليجيين رد فعلهم سريع جدا
زي ما بطردوا ليك المدرب الأجنبي سواد ليل لو فريقهم انهزم , قاموا طردوا كل أبناء دول الضد من
الدفاع المهم زوجة صاحبنا لما فنشوه كانت عزاية نعاية وكل ما تزورها واحدة عشان تكفر ليها تقول
ليها أنا ندمانة ندم السواد والرماد عشان خليت الراجل المتعلم الجامعي وهسة بقى وزير وعندو تلاتة
بيوت وعرست الجاهل اليادوبك مخلص الإعدادية عشان مغترب وهسة فنشوه لا عندو بيت ولا حقوق عشان شايل
سلفية,,, وبرضه أرجع وأقول ما تغركم المظاهر!!!
|
اذكر ايضا ارتفاع معدلات الطلاق وسط العائدين من الكويت
وكانت احزان خرافيه,وشكلات لرب السماء في اقتسام التعويضات
لانه لما وصلت التعويضات كانت الاسر اتفركشت وبقت الناسء تطالب بحقوقها
من التعويضات!!
المحزن انه السبب انه اغلب هذه الزيجات كامت على وظيفة الزوج كونه مغترب!!
وعندما انتهى الاغتراب..انتهى...معه اسباب قيام الزوجيه.
صدقيني لازالت لا الوم البنات وانما الوم منيختار بهذه الطريقه.
فبعض هؤلاء المغتربين بينزلوا السودان كأنهم ماشين السوق وبيفتشوا في بضاعه
كل ههم تكون صفراء وملظلظه(لحد ما علموا البنات حبوب المسيقور عشان اللظلظه )
اذن هو يختار شريكة العمر بمواصفات السلعه يبقى عايز من السلعه وفاء ليه؟؟؟
وربك يعين.
| |
|
|
|
|
|
|
|
|
 Re: مااااااااااااااا تغركم المظاهر !!!! (Re: Tragie Mustafa)
|
الغالية تراجي !!!
مساك الله بالخير ,,,
شكرا على مرورك الجميل وفعلا زي ما ذكرتي هنا برضو أول ما الراجل يتفنش تقوم الفالحة تفكوا عكس
الهوا ولو مات لا سامح الله تصر على القعاد في أبوظبي حتى لو ما كانت شغالة وبعدين هاك شحدة وجري
ورا الشغل بدون خبرة و طبعا هنا في الخليج الناس بتتعاطف مع الأرامل لذلك يتم استغلال هذا الموقف
بصورة بشعة جدا عموما شكرا على المرور ,,,
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: mamkouna)
|
الحبيبة الحنونة ممكونة !!!
يسعد صباحك ,,,
شكرا على طلتك البهية ومداخلتك التي أثرت البوست وهذا ما عهدناه منك ,, ربنا يحفظك ويجعلك في كل
خطوة سلامة ,,, المظاهر في أبوظبي بقت حاجة ما معقولة الناس بقت تدي مكاتب إقامة الحفلات حق عمل
أي شيء خاص بالفرح حتى المذيع اللي بيقدم الحفل يعني الفرح سوداني والمذيع لبناني وتعالي شوفي
الحفلة والليذر يقول يا غربتي والناس تتعرك و تتفرك والبنات باك ليس والذي منه واحدات من غير
هدوم ما عارفة طلعن كيف من بيوتن آآآآآآآآآآخ يا ممكونة الوجع كتير وربنا يستر ,, الآباء والأمهات
بقوازي قلهن ماعندهم SAY والله غالب يا ست الحبايب ,,,
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: عواطف ادريس اسماعيل)
|
الأخت عواطف
سلامات
موضوع ظريف وخفيف
على طاري الشنا، كان عندنا دكتور في الجامعة شين جنس شنا، مكمل الشنا، ورغم شناته المرة دي كان فصيح وطويل لسان، وكان مصاحب ليهو طالب مسكين وشين، لكن شناتو معقولة وبالنسبة للدكتور ينشاف "هندي". يوم قام الدكتور زعل من صاحبو نبزو وقال ليهو " بالله شوف الشين دا!!" صاحبو إتغاظ منو وقام قال ليهو:صحي " الجمل ما بشوف عوجة رقبتو" " وأبوسن يضحك على أبوسنين"، قام الدكتور قال ليهو: " صاح أنا شين وشناتي مرة وما ناكرة بس أنا دكتور وعندي عربية مرسيدس وعندي بيت طابقين ورصيدي كبير في البنك ومرتي قمر 14، أها إنت شناتك فوق شنو يا شين؟ قعد صاحبو يضحك ويضحك لامن دموع جرن وقام قال ليهو: " صدقت يا دكتور وشنا لشنا تفرق والشنا خشم بيوت" وما تغركم المظاهر
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: إسحاق بله الأمين)
|
ود بلة يا حلو الطلة !!!
أسعدت صباحا يا سيدي ,,,
بمناسبة الشنا في واحد شين جدا وأسود زي الفحم عرس ليه واحدة سمحة و بيضا في يوم من الأيام مشو
السوبر ماركت اشتروا حاجات قامت نست الكيس وما كانت عارفة أنه زوجها شالو رجعت لبتاع السوبر
ماركت تسأل عن الكيس قال ليها شالو الخدام يقصد( زوجها ) !!!!!!!!!!!!
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: salma subhi)
|
الخداع الأخلاقي زي ما قلت با عواطف أسوأ بكتير من الخداع المادي
البينخدع physically بالشكل و الماده دا زول داقس ساي لأنو في أدوات و (تقارير) ممكن توري الحاصل شنو
لكن في حاجات تانيه
ما بيحلك منها (الله يجازي اللي كان السبب)
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: عواطف ادريس اسماعيل)
|
الأستاذه عواطف
تذكرت الآن قصة مؤلمة لخداع المظهر
تابعت برنامجا وثائقيا في إحدي القنوات عن ملجأ اجتماعي اقيم في أحد دول شرق آسيا للمصابين بالأيدز حمانا الله و إياكم جميعا
عقدو لقاء مع أسرة تكونت في داخل الملجأ بين مصاب و مصابه أنجبوا خلال وجودهم طفلة مصابة أيضا
كان الجل يحكي عن ظروف إصابته
قال الرجل: (كانت نظيفة جدا وتظه بمظهر الصحة و العافية التامتين. أنا هنا نتيجة فهمي ذلك. أنصح كل الشباب الأ ينخدعوا بالمظاهر ففيروس الأيدز لا يرى حتى بالمجاهر العادية)
حفظنا الله و إياكم من خداع المظاهر
فمعظم النار من مستصغر الشرر
| |
|
|
|
|
|
|
|
|
 Re: مااااااااااااااا تغركم المظاهر !!!! (Re: malik_aljack)
|
الأخ الحبيب مالك !!!
ودي وتقديري لمرورك الجميل ,,,
واحد سوداني منتحل شخصية طبيب مشى السودان خم ليك واحدة واتزوجها على أساس أنه دكتور في أبوظبي
لما جا راجع ألقى القبض عليه وحوكم بالسجن عشرة سنوات قضى منهم تلاتة في أبوظبي وبعدين رحلوه سجن
السودان ,,, عجبي !!!
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: عواطف ادريس اسماعيل)
|
ياعطوفة اذيك وحشتيني
انا اليوم فقط بتصفح في المواضيع ولما لقيتك طوش دخلتها ماعرفت الموضع جديد وله قديم
بس ياعطوفة وصلتيني في اللحم الحي(قال ليه مغترب وساكن امبده) لكن نعمل شنو حبنا ليك يخلينا نعمل عماياونشوف شغلك لي امبده شكر عديل بس امبده دي خليها ساكت وله شنو يا كتاب فجراوي وياامبدويات
ماسمعتو غناء اولاد امبده .
نحن اولاد وبنات امبده
لابنفطر ولابنتغداء
بنستحما بموية العده
نحنا بنطلع العمارة نهداها
نحنا نشوت الكوره نقدها.
اها ناس واضحين في مظهرهم تفتكري بدقسو ديل يدقسو بلد بي حاله
| |
|
|
|
|
|
|
|
|
|
Re: مااااااااااااااا تغركم المظاهر !!!! (Re: ناهد علي)
|
العزيزة ناهد !!!
يسعد مساك ,,,
شكرا على المداخلة اللطيفة جدا والشكر موصول لناس أمبدة وقولي ليهم الدكاترة بقولو الفطور مهم
عشان كدة أحسن يفطروا وما يتغدوا ولا شنو رأيك يا حبيبة القسا ؟؟ آسفة للتأخير والله لم أشاهد
المداخلة سوى اليوم ,,,
| |
|
|
|
|
|
|
| |
عواطف ادريس اسماعيل
ابو جهينة
مجدي عبدالرحيم فضل
mohmed khalail
سيد محمد احمد سيدنا
ماجدة عوض خوجلى
د.محمد حسن
abubakr
محمد سنى دفع الله
رأفت ميلاد
هاشم أحمد خلف الله
نهلة عمر
محمد على طه الملك
قرشـــو
بدرالدين كاجوري
Adil Osman
امير عوض الجمري
mamkouna
Tragie Mustafa
إسحاق بله الأمين
salma subhi
malik_aljack
ناهد علي
فيس بوك
تويتر
انستقرام
يوتيوب
بنتيريست