المسترجلات والسير في الاتجاه العاكس !!!!
تحية شوق ومحبة نابعة من القلب يا أمة الأمجاد والماضي العريق و كلو جمعة وانتو طيبين وسالمين ! يا جماعة الخير في موضوع محيرني شديد بحليل وقدر ما قلت أمسك خشمي عندي وأسكت ما قدرت طبعا إنتو عارفين شمشرة الصحفيين وبالذات لما يشوفوا الحال المايل ما بسكتو مع إنو شمشرتم دي مرات قاعد توديهم في ستين داهية يعني كلو يوم والتاني مرفوعة عليهم قضية لمن بقوا مرتادين شرط ومحاكم أكتر من المجرمبن المحترفين وبعدين كمان الله لا يوريكم لمن تعمل ليك تحقيق مع واحد ويكون الموضوع حساس ويقوم يبلع كلامو ويرفع عليك دعوى بتاعة تعويض أنا غايتو حصلت علي مرة واحدة في حياتي والغريب في الأمر من واحدة سودانية كان الموضوع لو خيرتك زوجتك وقالت ليك ياأناياأمك حتختار منو؟ في سوداني نط طوالي قال لي أمي طبعا ولمن طلعت المجلة صاحبات مرتو الشمشارات ضربن ليها تلفون وقالن ليها راجلك بيفضل أمو عليك وتعال شوف البكا والجرسة وستيف العفش واتصلت بمدير تحريرنا قالت ليه عندك محررة سودانية كضابة وستين كضابة أنا راجلي بحبني وما ممكن يقول كلام زي دة ولازم تنفوه في العدد الجاي المهم قصة طويلة وعريضة لكن دة ما موضوعي طبعا قبلي كدة أن نبهتكم وقلت ليكم إني إنسانة إنصرافية مرات أكون عايزة أمشي المستشفى ألقى روحي في نص السوق ولا عايزة أمشي بيت عزا أدخل لي بيت صبحية حتى لو ما بعرف ناس العرس أعمل ليهم حنان لبط بس ما علينا,, الموضوع يا جماعة إنو ربنا سبحانه وتعالى لماخلق الأنثى وضع فيها أجمل أسراره الرقة ,, الجمال ,, الحكمة ,, المودة ,, الصبر ,, الحياء ,, العفة ,, ومنحها أروعة غريزة وهي الأمومة وأكبر قدر عندما قال الجنة تحت أقدام الأمهات ورغم كل هذه المزايا الجميلة هناك نساء يرفضن هذه المكانة المميزة ويتشبهن بالرجال شكلا وموضوعا لا مكياج , لا كحل , لا كريم , لا حنة, لا هذا ولا ذاك ,, طبعا حتنط لي واحدةبعد شوية وتقول لي دي قرارت شخصية ومش لازم أعمل كدة عشان أثبت أنوثني ,, معاكي حق و إنت حرة يا أختي لكن أقنعيني لماواحدة تحاكي الرجال في طريقة لبسهم ومشيتهم وكلامهم المعاه حليفة طلاق كمان والبتستخدم ألفاظ نابية لأنها بتعتقد إنهابتساوي ستين راجل والراجل طبعا يحق له ما لايحق لغيره دي مالهايا ربي ؟ هل هي إنسانة طبيعية مية في المية ولا مهبوشة شوية ؟ وليه الواحدة بترفض الانتماء لجنسها وتحتمي بالجنس الآخر؟ وبعدين كمان الرجال البتزوجو نسوان زي النعمة بت وراق ديل هل هم أيضا رجال طبيعيين وما عندهم أي مشكلة مع روحهم ولا شنو؟ والله الأسئلة دي محيراني من زمان وكل ما اتذكر خالتو خديجة بت علي اللي اتقمصت شخصية الرجل وبقت تجلس مع الرجال في مجالسهم , تشرب السجاير وتسف الصعوت وتدق مركوبها بالعصاية وفي الآخر بقت تضبح خروفها حق الضحية براها والبسألها عاد ألله قال بي قولو تسمعو كلام يخليكم تدخلوا في أضافركم وما تمرقو منها ليوم القيامة أها يا جماعة قبال ما أفوتكم عايزة مداخلات علمية ونفسية واجتماعية ونماذج مشابهة لهذه الظاهرة العجيبة وفتكم بي عافية !

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]