|
|
 نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة .. الجزء الثاني.
|
أخوتي عزاب المنبر قالو بتحبو .... قلنا ليهم مالو ؟ أتمنى أن تحققو أحلامكم وكلو عاشق عقبالو
لكن بشرط لا تعرسو :
الزهجانة ولا الحردانة.
الزهجانة دي ديمة صارة وشهيها ... لا تقدر تعاين ليها ولا تمشي تخليها ... لا بتعرف الريد لا كلمة
حبيبي في خشيمة تجيها... كلامة حار وزي النار لا بتعرف الجد من الهظار ... لو قلت نكتة أو هاظرتها
على طول ضرب نار ... لا ليها دعوة بيك ولا حتى بي أقرب جار ... دي منها قول يا لطيف .. يا ستار ..
ويا سلالالالالالالالام .
أما الحردانة دي حال ما حال ... لو قلت ليها فت كلمة طلعت من الأوضة ومشت نامت وسط العيال .. وخلتك
تزازي في الكوريدور شوف بشاتن الحال ... لو قلت ليها الليلة نطلع برة نفسح العيال قعدت تدخل وتمرق
وتمرق وتدخل وما تغلط تقوليها ليها إتأخرتي على طول تقول ليك خلاص ماالمشي دة خليته ... ياولية
حيرتيني و ما تقولي لي إنت كمان أحترتي ... ويا سلالالالالالام .
الدلوعة والمخلوعة
الدلوعة دي دايما بتوجع القلب ... قالت ما بتعرف الكديسة من الكلب .. لا غسلت يوم عدة لا قشت حوش
لا أكلت فول لا سمعت بي ناس ست النفر وعشوش ... صاحباتها ناس ميمي وزوزو وريري ..لا بتعرف كر علي
ولا وا شريري لو قلت ليها عايز كباية شاى تقول بليز هيلب يور سيلف أنا زوجة مش خدامة شايفني في
بيتناكيف دلوعة وكيف نوامة .. أبوي لو سمعك قلت لي أعمل شاي البحصلليك ما حتعرفه بس إنطم و أسكت
ساي .... ويا سلالالالالالام.
المخلوعة دي كلما شافت حاجة اتهجمت وترجمت كأنها جات من الضهاري ... تحرجك قدام ضيوفك تخليك تشيل
نفس وتخت نفس أتقول جاي من الكلاكلة كداري ... ولو جيت بالغلط ماشي جنب داماس .. طيرت عيونها وقالت
يا راجل يا سجمان ما شايف النسوان شاريات الدهب كيمان .. وإنت يا مايل الرجال الديمة حالك حال
لا سوار ... لا خاتم .. لا خلخال ... و يا سلالالالالالالام .
المجنونة والشعنونة :
المجنونة دي كل يوم بتوري فنونة ... يوم شكلة جاهزة مع جيرانها ويوم تتمارض وتقول معيونة ...
ويوم تلقاها زي الشيطان ويوم تكون طيبة حنونة ... ويوم تشك في سلوكك وتقعد تكورك فيك تقول طاحونة
ولو سمعت خبير عنك بالغلط تسكه وتلقاها جات في المكتب .. تسوفك قاعد براك ولا مع الزميلات تكبكب
مرات تلقاها راجياك بالورد ومرات ترجاك بالشبشب ومرات كمان بالكركب و ياسلالالالالالام ..
الشعنونة هي زي المجنونة لكن لا بتكتب لا بتقرا وكله فلوسك كاباها هناك في الفقرا .. عايزة تروضك
تخليك نعجة أو بقرة ... ومرات تقول يمكن عايز يعرس أخلي الفكي يديه أخر درس .. لا يعرف شمال لا يمين
لا شوكة لا سكين .. لا أمه لا أخواته .. لا خالاته لا عماته .. أنا وبس ويا سلالالالالالام .
السواطة واللخباتة
دي أخطر النسوان لا بتخاف من الله لا الأخوان ... و حالتها ما حالة .. يا جايبة خبر يا ساكة ليها قوالة
ناس فلان ختوه قرط وناس علان رافعين مناخيرهم و بيتم من زبالة.. وفلانة راجلها دقاها وربطها ورماها
بي شوالة... وبت فلان المطلوقة الديمة مكشوف حالة ... وراجلي أريته راجل التابة لا بجيب شمار لا
لا فاكهة لا خضار لا خبرا يسر البال اريته راجل اليابة و يا فلانة أوعك من ود الخال.. ويا سلالالالالام .
|
|
 
|
|
|
|
|
|
|
|
Re: نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة .. الجزء الث (Re: Moawia Mohammed)
|
عواطف
تحياتي
صديقي جاوز السابعة والثلاثون (حسب زعمه) , رغم أن بعض زملائنا ممن عرفوه في وقت مبكر , يدعون أنها
سبع وخمسون , وبعضهم يراها وستون .
و(عبدالمنعم شجرابي) تحديداً يدعي أنه رآه في صور رفع العلم يوم الإستقلال ( وراء أزهري مباشرة ) .
هذا الصديق ..
لم يتزوج بعد ..
يدعي أنه يبحث عن بت الحلال ..
رافقته في عدة مناسبات خطبة ..
آخراها كانت الآنسة : (سلوى) من الكلاكلة ..
بعد أن أكل وشرب وخرجنا متوجهيين نحو الخرطوم ..
سألته: رأيك شنو , ؟؟
أجاب مسرعاً : سلوى ظريفة , لكن الكلاكلة بعيدة !!
وعلى ذلك قس ,
....
...
جيرة ..
أمبدة ..
بحري ..
هاتفني هذا الصديق وهو صحافي معروف , يكره كلمة مخضرم لأنها تدل على الكبر ويفضلها صحافي شهير
, هاتفني فرحاً , فقد قام بطباعة البوست (بتاعك ), ليكون نبراسه ودليله في رحلة البحث عن شريكة
حياته .
منذ يومين سألته عن عروس جديدة , قاطعني قائلاً :
عواطف قالت , ثم يخرج أوراقه ...
كل من يحدثه عن الزواج , يباغته قائلاً :
لكن , عواطف قالت ..
ثم يخرج أوراقه ..
ويبدأ في قراءة مواصفات الزوجة حسب مقاييس عواطف ..!!!
؟؟
(عدل بواسطة كمال علي الزين on 02-25-2007, 01:58 PM)
| |
|
|
|
|
|
|
|
|
|
Re: نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة .. الجزء الث (Re: Mustafa Mahmoud)
|
عواطف
دبايتو
| Quote: نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة |
دايرانا نعرس الرايقة ام لسان طويل وتقابل زى المصيبة تعدد ليك انت نسيت وماجبت وناس فلان حصلت ليهم شنو يلاك نمشى حسى تغدى بعدين وبعدين الزهاجة مالها التنتظرك تقلب كل المحطات ولا الحردانة المادايرة ليه توب ولا مصاريف ولا الدلوعة ديمة تقول ليها ماعندك مشكلة بكرة بجيب ليك كدا وكدا ولا المخلوعة التبحلق فى سماء الرحمن . وانت مالك عايز الناس ينفروا من بنات بلدى.
| |
|
|
|
|
|
|
|
|
 Re: نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة .. الجزء الث (Re: sudania2000)
|
سودانية سنة ألفين ...
يا أجمل الحلوين ..
تحردي لينا البورد..
وتمشي مننا وين؟؟
عاد نحنا من غيرك ..
حزانى ومساكين ...
ولو عايزاني أسحب بوستي ..
على الراس والعين ...
وما تخافي العزابة حنينين...
لو حبو واحدة إنشاء الله زي الطين ..
ما عندهم مشكلة بكرة حالها بتعدل ...
ويبقى سمح وزين ...
والعاملين مجانين ديل مادايرين عرس..
قالو أخير نكون صايعين ...
نباري في الحفلات .. نسك السمح والشين ..
بكرة بندمو لمن يشوفو أولادكم الحلوين ...
كبروا وبقوا دكاترة و مهندسين ...
| |
|
|
|
|
|
|
|
|
|
Re: نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة .. الجزء الث (Re: عواطف ادريس اسماعيل)
|
تعرفي يا عواطف الواحد يمشي يعرّسن أربعة ..
واحدة .. زهجانة
التانية .. مخلوعة
التالتة .. مجنونة
الرابعة .. لخباتة
ويجيبن يفكهن ليك في المكتب واقول ليهن
دي البتحرّض عليكن الرجال ما يعرسوكن ،عشان
ينتفن ليك الزهرة صفقة صفقة والخليج
ده يشربنك ليهو يخلن سمكو يبلبط ..
وطبعاً انا اصلاً بكون واقف في الاشارات وريالتي سايلة
ونخريني ماشات .. وعيوني بي قضاهن ..
وطبعاً بعد زيارتن ليك دي بحجز ليك مكان جنبي .
اتخيلي يا عواطف لو لخبتنا موضوع البوست حقك مع مداخلة عادل جبارة
وعرسنا الالم هو للقلتيهن انتي .. وختيناهم في بلد واحدة البحصل شنو ؟!؟!
مواضيعك لذييذة جداً وانت الذّ ..
| |
|
|
|
|
|
|
|
|
|
Re: نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة .. الجزء الث (Re: عواطف ادريس اسماعيل)
|
الحبيبة عطوفة الولوفة .. الهاشة الباشة الماها دايشة ..
الظريفة اللطيفة وما ها خفيفة...
السكر العسل المخاصم الملح والبصل ...
تعرفي لمن اكون زهجانة شديد وقافلة معاي للاخر .. باجري افتش بوستاتك اللذيذة ..
باقرا بتمعن ... باضحك لمن ابكي ...
يا زولة انتي عندك مقدرة غريبة تقولي اصعب الحاجات بابسط طريقة ...
لكن المشكلة يا عواطف انو كل امراة في الدنيا بتحمل جزء من خصلة من الحاجات المذكورة اعلاه ...
عاد خلاص خلي العزابة يواصلوا مشوار العزوبية .. عرس ( نهي ) ...
تخريمة صغيرة شديد ..
لمن جاني صوتك الحنين في التلفون وانا باكتب في الرد اندهشت شديد ...
تسلمي على المكالمة .. اتمنى نلتقي قريب ...
| |
|
|
|
|
|
|
|
|
 Re: نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة .. الجزء الث (Re: maia)
|
حبيبة القسا !!!
إنت عاقلة أكثر مما يجب عشان كدة حتتعبي مع ناس كشا مشا ديل شديد عموما يكملك بعقلك ويديك الفي
مرادك .. مرة عملت لقاء مع السفير المغربي قال هو إتزوج زواج تقليدي يعني ما شاف عروسه إلا يوم
الزواج قلت ليه ليه ؟؟ قال خايف من التمثيل والحركات وقال الواحدة يوم يكون عندها موعد مع جكسها
تقوم تستعير بلوزة واسكيرت وطرحة وجزمة وعطر من الجيران وتظهر بمظهر غير حقيقي والشاب نفس الشي
يكون مفلس وحالته حالة ويتدين عشان يعزمها سينما وهاك يا تمثيل وحب وبعد العرس تروح السكرة وتجي
الفكرة ...
| |
|
|
|
|
|
|
|
|
|
Re: نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة .. الجزء الث (Re: عواطف ادريس اسماعيل)
|
..
.
Quote: الدلوعة دي دايما بتوجع القلب ... قالت ما بتعرف الكديسة من الكلب ..
لا غسلت يوم عدة لا قشت حوش
لا أكلت فول لا سمعت بي ناس ست النفر وعشوش ...
صاحباتها ناس ميمي وزوزو وريري ..لا بتعرف كر علي
ولا وا شريري لو قلت ليها عايز كباية شاى تقول بليز
هيلب يور سيلف أنا زوجة مش خدامة شايفني في
بيتناكيف دلوعة وكيف نوامة ..
أبوي لو سمعك قلت لي أعمل شاي البحصلليك ما حتعرفه بس إنطم و أسكت
ساي .... وياسلالالالالالام. |
Quote: في ملاحظة انه الكتير جدا من البنات السودانيات في الخرطوم
او السودان عموماوبره السودان داخلين في دور البنت المدلعة
شديد اللي بتجي بالتاكيد مع طريقة الكلام المدلع لما مدفق بهناك
لا اقصد بالدلع الرقة المعهودة في الانثى ، بل ذلك النوع من الدلع البيغيظ
لكن بتحسي انه المسالة زايدة جكين وكوز في حكاية الدلع وبقا نوع من الاستايل
الطارح نفسه بقوة |
دا النوع العامل لينا مشكلة
وبفقع المرارة .. كل شئ زايدنو حبتن عند اللزوم
وما تجيب سيرة ام رقيقة والطبايخ ولا المحشى
ناس بتزا .. ودلفرى ودونات وما عارف ايه
وميوعة وعجين ما طبيعى ..
كدى يا عواطف ومايا ركزوا لينا فى تصليح ديل ..
الباقي من زهج وحرده وجنونه دا انحنا بنقدر عليهو ..
لكن الدلع دا شغلة امهات !!
بجيكم صااادى؛
| |
|
|
|
|
|
|
|
|
|
Re: نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة .. الجزء الث (Re: Tabaldina)
|
اخت عواطف تحية ووصية حلوة مقبلوه منك
لكن قليبي حنه ورنه وفقد المحنه
شالتو واحده لا دلوعه ولا مخلوع ولا حردنانه ولا زهجانه
شالتو واحده شفقانه بالتلفون غشانه كل دقيقه بالموبايل سامعانه
تشيل وبالنقه حرقان لحدي ما قدت اضانه
ام اخوي صالح انا عارف بيعجبو شنو
ده النوع البيعجب تبلدينا
Quote: الدلوعة دي دايما بتوجع القلب ... قالت ما بتعرف الكديسة من الكلب ..
لا غسلت يوم عدة لا قشت حوش
لا أكلت فول لا سمعت بي ناس ست النفر وعشوش ...
صاحباتها ناس ميمي وزوزو وريري ..لا بتعرف كر علي
ولا وا شريري لو قلت ليها عايز كباية شاى تقول بليز
هيلب يور سيلف أنا زوجة مش خدامة شايفني في
بيتناكيف دلوعة وكيف نوامة ..
أبوي لو سمعك قلت لي أعمل شاي البحصلليك ما حتعرفه بس إنطم و أسكت
ساي .... وياسلالالالالالام. |
| |
|
|
|
|
|
|
|
|
|
Re: نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة .. الجزء الث (Re: othman mohmmadien)
|
أختنا الفاضلة عواطف
مساك الله بالخير - وأنا أخط كلماتي هذه والساعة الآن تشير للتاسعة والنصف
مالك قايمة علي نون النسوة فيكفي ما يحملنه من كدر تجاه النظرة التقليدية نحوهن بإن المرة لو بقت فأس ما بتكسر الرأس - وكأنك تشيرين لقول الشيخ فرح ودتكتوك
النساء فيهن حريم .... فيهن رميم.... فيهن ذهب مصقول قديم .... فيهن عقارب ساكنات الهشيم... فيهم كفوت ... فيهن هفوت ... فيهن لفوت .... أنت تجي من الخلا هي تجي من البيوت..... لا تديك موية ولا قوت ولا تخلي كلمة تفوت - تبلعك ليها طب،،،،
أها وصف الشيخ فرح ده ما كافئ و بيشمل جماعتك ديل
أها أنا بخاف والله من البتسفرك من الآخرة ... تفسحك بلغة الجيش.. وطريقتهم صعبة .... زيت بيغلي ... ولا سكين وأنت نايم ... أو جردل موية سخنة يا كافئ البلا.... دي ياتها فيهن عشان نختاها ... خاصة هذه الظاهر لاحت في أفق كل الدول ولم يخلو منها حتى الشعب السوداني الطيب ...
بعدين مايمكن الضد بالضد يعدل المسألة خاصة نحن الما عرسنا لسع ...
يعني زهجانةنخلطها بهادئة...
وحردانة نخلطلها طايعة....
ودلوعة بواحدة جادة.....
ومخلوعة ... مش عارف دي ضدها شنو ... شجاعة حسب فهمي حيث المخلوعة تنخلع من الخوف والا شيتاً تاني
علي الأقل نحل لينا مشكلةنؤجر عليها....
غايتو أنا ما بشجع على الاثنين ولا الذكرتيهن ديل
وأليك بعض شواهد من سبقونا برغم بساطة الحياة التي كانت لديهم
فقد ورد في كتاب "الأمالي" لأبي علي القالي شعر مشهور لأعرابي تزوج اثنتين، فقال عن تجربته:
تزوجتُ اثنتن لفُرط جهلي
بما يشقي به زوج الاثنتين
فقلت أصير بينهما خروفاً
يُنَعَّمُ بين أكرم نعجتين
فصرتُ كنعجةٍ تُضحي وتمسي
تُدَاولُ بين أخبثِ ذئبتين
رضا هذي يُهَيِّجُ سَخط هذي
فما أعرى من إحدى السخطتين
والقى في المعيشة كلَّ ضُر
كذاك الضرُّ، بين الضرتين
لهذي ليلةٌ ولتلك أخرى
عتابٌ دائمٌ في الليلتين
فإن أحببت أن تبقى كريماً
من الخيرات مملوء اليدين
فعش عذبا كريما
| |
|
|
|
|
|
|
|
|
|
Re: نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة .. الجزء الث (Re: عواطف ادريس اسماعيل)
|
الحفيده/ عواطف......
يا رائعة ألمنبر أو كما سماك الحبيب الظريف أمير الجمرى زهرة الخليج.
يارائعه فى الرد والخطاب
يابسمه للناس الغلابه
ويا مفرحة كل الصحاب
البورد من غيرك عدم
ذى زرعة ألأرض اليباب .
تأخرتى فى ألجزء الثانى لعل المانع خير..
وألأيام الفاتت صرنا مدمنى حب مع هاشم .مره بشتهيك ومره عتاب. لحدى ما وقفنا مع عادل جباره جنب الباب.وهاك يا فلسفه يا عادل نكت لينا للمحجوب دره الله أديه العافيه صحا مشاعر ناس كانت نايمه وهايمه.
فى الحقيقه كلامك جميل بس للناس العايزين يعرسوا فيه المستحيل.
خلينا مع الناس الظراف ولطاف.
والرايقه والمجيهة.والما بتقول لا أدينى لا وتودينى. تتخيلى فى النوع ده ولسه ما أنقرض .حقوا نحافظ عليهوا وونميه عشان ما يزول.
كلامك ظريف وحكم. سلام
اسماعيل محمد أحمد عباس
| |
|
|
|
|
|
|
|
|
|
Re: نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة .. الجزء الث (Re: ismeil abbas)
|
ود عباس يا سيد الناس !
لووووووووووول يا سمح القول ,,, أشكرك كتير ما شوية بالصباح ومرات عشية ومن أبوظبي برسل ليك وردة
جهنمية عارف هاشم خلف الله لقى الحكاية بايظة والناس من كتر الكلام في السياسة حتى المشاعر اتيست يعني لو عايز تحب واحدة لازم توريها لونك السياسي وتثبت ليها إنك ما مؤتمر وطني ولا 14 آذار أما
ود جيارة والله عفيت منو فعلا خلى مشاعر الناس جداول عاد ما نجيض , شديد ولضيض وعارف من أين تؤكل الكتف و زي ما قلت لسة في الهدية الرضية اللي ما بتقول عايزة ألف ولا خمسمية!!! تسلم يالحبيب.
| |
|
|
|
|
|
|
|
|
|
Re: نصيحة لوجه الله .. لا تعرسو الزهجانة.. لا الحردانة .. لا الدلوعة ..لا المخلوعة .. الجزء الث (Re: othman mohmmadien)
|
| Quote: أماود جيارة والله عفيت منو فعلا خلى مشاعر الناس جداول عاد ما نجيض , شديد ولضيض وعارف من أين تؤكل الكتف |
عواطف
عفوك وصلني تب .. إنشاء الله يعفو ليك زنوبك يوم الحساب يارب ..
عليك الله تقولي الكلام دا لي هاشم ود خلف الله وأمير ود الجمري والأسموا ما عارف داك كمان حبيب نورة .. ياخي ديل منجضيني نجاض .. واحد ما عارف يقول ليك عتاب .. ومشتهيك ! .. والتاني يظهر عليهو بتاع سيجارة ( بس حمرا ) !! والتالت عندوا قاوت .. ؟؟
ولا أخفي عليك أختي عواطف من خلال هذا الطرح الذي تناولته مستصحبا قصائد شاعرنا العملاق محمد أحمد محجوب قد قصدت أن أتناول موضوعا إجتماعيا بحتا يتعلق بما يسمى بالرومانسيات في حياتنا .. فنحن شعب يستعمل ما يقارب ال 60% منه تلك المادة اللعينة المسماة بالسعوط !! .. عساك أن تكوني قد تفهمتي ما أقصده وأطلب منك المساعدة بكتاباتك الأجتماعية المتخصصة وإيضاح رأي النصف الآخر فيما يتعلق بسلوكيات هامة ومؤثرة تمس صلب الحياة ..
دمتي مع خالص تحياتي ،،
| |
|
|
|
|
|
|
| |
عواطف ادريس اسماعيل
elhilayla
Moawia Mohammed
هاشم أحمد خلف الله
كمال علي الزين
فدوى الشريف
محمد أبوالعزائم أبوالريش
Mustafa Mahmoud
هاشم نوريت
EMU إيمو
امير عوض الجمري
Nader Abu Kadouk
salma subhi
الطيب شيقوق
على احمد النعيم
د.محمد حسن
خالدة البدوي
othman mohmmadien
ismeil abbas
سامي عبد الوهاب إدريس
فيس بوك
تويتر
انستقرام
يوتيوب
بنتيريست