|
|
 الاسترالياب يناسبون الكنداب والعاقبة عندكم في المسرات
|
انتشر السودانين في اصقاع الارض انتشار النار في الهشيم , تزاوجوا وانجبوا واستقروا بالخارج واسسوا الاسر والابناء , بانتشارهم هذا وبعد عشرون الي ثلاثون عام مقبلة علي الاكثر سيكون الحال مختلف عما كان عليه ردحا طويلا في السابق لدي نظرة مستقبلية للامر تخيلتها في المشهد ادناه :
الاسرة مقيمة في استراليا , الولد يفاتح امه في امر زواجه , فتخبر اباه وينادي علي الابن :
اقعد يا جنا , يجلس الولد وهو مليئ بالحياء والخجل , ابوه , اها الناس ديل الداير تناسبهم قبيلتهم شنو ؟ الابن مقتضبا . كنداب, ومن ياتهم في الكنداب , الابن من الاونترياب , الاب مسترسلا , والله ما عندنا كلام في الكنداب لكن اتعرفت عليها وين البت دي , الابن , والله يا بابا عندي صحبي من اهلنا البوسطناب كان معاي في msn واتعرفت علي بت خالته في نفس المكان وحبينا بعض وكل الشات عارف قصتنا والان قررنا نتزوج , الاب طبعا انت عارف انا زول ديموقراطي في الحاجات دي لكن لازم تعرف اني كنت خاتي ليك بت عمك الفي سيدني غايتو انا خايف تحرجني مع اهلنا السيدناب ديل , تنط في اللحظة دي عمة الولد المتابعة للحوار قائلة : هم السدناب ديل ما كفاية عليهم عمهم من عرس بتهم تاني شفنا منه حاجة ؟
الاب علي بركة الله يا ولدي
يبدأ التجهيز لمراسم الخطبة ينادي الاب ابنه ويطلب منه ان يجهز اللاب توب ويشغل الوير لس بتاع النت من اجل اخبار كل الاهل , يدخل الاب الي النت ويكتب اميل لكل الاهل في سيدني ومولبورن والاخوات في جاكرتا والخيلان في داكوتا الشمالية وبرلين ولندن وبجانبه الام تتدخل وتقول له ما تنسي خالي كبير العائلة في الامارات وناس عمي في الخبر والطائف , يتم ارسال الاميل : الاهل والاحباب نرجو منكم الدخول الي النت الساعة السابعة والنصف بتوقيت قرينتش وذلك لاننا نقوم بعمل محادثة جماعية علي الماسنجر من اجل فتح الخشم لخطبة ابننا وجدي .
والعاقبة عندكم في المسرات
وفي تمام السابعة والنصف بتوقيت قرينتش يدخل الاب الي الماسنجر وييتحدث الي ابو البنت من انتاريو وخالها من فلادلفيا ويعمل اضافة الي اخوه من سيدني واخواته من جاكرتا واخوان زوجته من داكوتا الشمالية وبرلين ولندن وخال زوجته من الامارات واعمامها من الخبر والطائف , ويتقدمون بطلب يد ابنتهم ريم الي ولدهم وجدي وتتم الموافقة المبدئية ويتحدد مواعيد العقد يوم الجمعة 2/7/2028 الساعة الواحدة والنصف ظهرا بتوقيت مكة المكرمة علي موقع اسلام اون لاين .
وبعد اتمام العقد يتم موعد ليلة الزفاف في انتاريو ويقرروا ان يتم التجمع في مطار هيثرو والحجز علي رحلة الخطوط الكندية المتوجه الي انتاريو ويركبوا طيارة السيرة ومعهم الغناية وهي تردد :
ام العروس جايبنو ليك بالاير بص جايبنو ليك
عريسنا الراجل الزينة والانقذ ضحايا كاترينا
لا اتربط في غواتملا بالجنزيرولا عندو انفلونزا الخنازير
عريسنا الراجل الفاضل وابحثي عنو في قوقل
الفيس بوك يشهد سيرته والاي باي كلها خزينته
بالمقابل قام ابو العروس بطب دلفري بالتلفون من بيتزا هت لعشا الضيوف ودي قصة تانية لو جاني مزاج بتمها
الفكرة الرئيسية انه حتى اسماء القبائل ستصبح كنداب استرالياب امريكاب ولندناب وجيرمناب وبوسطناب وتكساساب وموديانا لي وين ؟
|
|
 
|
|
|
|
|
|
|
 Re: الاسترالياب يناسبون الكنداب والعاقبة عندكم في المسرات (Re: اساسي)
|
| Quote: اميل لكل الاهل في سيدني ومولبورن والاخوات في جاكرتا والخيلان في داكوتا الشمالية وبرلين ولندن وبجانبه الام تتدخل وتقول له ما تنسي خالي كبير العائلة في الامارات وناس عمي في الخبر والطائف |
والاجداد بحزيمة ومنصوركتي وكاب الجداد وأم كرشولا وقوز البيض ..
--------------
أساسي سلامات ..
| |
|
|
|
|
|
|
|
|
|
Re: الاسترالياب يناسبون الكنداب والعاقبة عندكم في المسرات (Re: Munir)
|
إنت يا أساسي بتضرب البتاعه...خيالك خصب ولذيذ.........لكن أنا عقدت لي بنتي الكندية لواحد قريبها في السودان,,والعقد تمّ عندنا هنا في مسقط....وأبو العريس جانا من دبي حيث يعمل....والمأذون-إمام المسجد- كان مصري
أها دي مش اللخبطة البتقول عليها...ولا سنة 2028 ولا حاجة...ووالله أنا والنادي السوداني في مسقط رسلنا الدعوات بال SMS بس الماسنجر ما قاعد أستعملو لأنو عندي ( سكري)
| |
|
|
|
|
|
|
|
|
|
Re: الاسترالياب يناسبون الكنداب والعاقبة عندكم في المسرات (Re: Osama Mirghani)
|
اسامة ميرغني
وين الحي بيك ياخ ؟ من زمن مكاجرني في البورد ما شفناك , ياخ لمن شفتك ظريف معاي اتذكرت ليك بيت الشعر بتاع المعارضة ,
الزمن انقلب شفنا المآسي عيان الزمن الردي ( صاحبنا) فيه الكيزان
لكن بتذكر انه في الايام الاخيرة الزمان هديت اللعب معاي
ــــــــــ
ياخي الزمن دا الخيال الواسع عايز ليهو كرتين ؟؟ انحنا اتولدنا في زمن مسطول خلقة ,
لكن والله قصتك تقريبا نفس البوست يعني انا قدمت لي عشرين سنة للواقع المعاش , تحياتي لكل المسقطاب والكنداب طرفك
| |
|
|
|
|
|
|
|
|
|
Re: الاسترالياب يناسبون الكنداب والعاقبة عندكم في المسرات (Re: اساسي)
|
| Quote: حتى اسماء القبائل ستصبح كنداب استرالياب امريكاب ولندناب وجيرمناب وبوسطناب وتكساساب وموديانا لي وين ؟ |
وطبعاًأنحنا ديل ،
الجداب ، والرياضاب ، والدوحاب ، والظبياب ، والباطناب (ناس حفر الباطن) والمشيطاب (ناس خميس مشيط)والمسقطاب ، والشروراب ،
أنحنا ديل لمن نجيكم، حتقولوا :
""أهل العوض ، جو؟؟ !!""
تحياتي
| |
|
|
|
|
|
|
| |
اساسي
Munir
Osama Mirghani
فيس بوك
تويتر
انستقرام
يوتيوب
بنتيريست