|
|
 يا حليلك يالسودان
|
من المطار
قابلنى هذا العقد الفريد
دكتورة اميمة زالصادق شيخ الدين قامة الموسيقى العائد ودكتورة ونبراس وصهيب اولاد هشام شيخ الدين
الفاتح وديدى وناجى الملك وطلال عفيفى والطيب الصديق مراسل رويترز والمتعاون مع قناة النيل الازرق ..
وجئت انا بمعية محمد ويسرا وهم يرون السودان لاول مرة ..
كانت ملحمة دموع وضحك وعناق طويل ..
وفى تلاتة عربات شققت شوارع لم ارها لعشرين عاما كل شى غريب ومثير يذكرك ياشياء بعيدة وحنينة وجميلة كان انفعالى الطاغى يسبق كلماتى
ووصلنا البيت ...صار مختلفا وجميلا ...اميمة شقيقتى عادت لتبقى فيه بعد طول هجر ...لاحظت وجود اجهزة ضخمة تبدو الحياة بدونها مستحيلة :
المكيفات وخزانات الماء ...
اولادى لم يصدقوا ضخامة البيت وتعدد الغرف وامتداد الحوش ...والهواء المتعش ...طانوا متشككين فى هذه الزيارة وكانوا خائفين من حكاية "آفريكا" بعقولهم الامريكية ..
وجدت بقية الاسرة فى انتظارنا فى ذلك الصباح الرمضانى الجميل ...صباح باكر جدا ...ويبدو انهم كانوا يستعدون للذهاب للنوم لاول وهلة وبعضهم فى الاستعداد للذهاب لللعمل ..ايقاع مختلف
جو غريب ...جو الاهل ونسائم الصبح والعودة والفقد واللقاء ..والاجازة .. آه
كم افتقدكم الآن هنا ..والشقة الصغيرة التى نسكنها نستطيع ان نعبرها كلها بنظرة واحدة ...اصبحنا اليوم فى امريكا غرباء كما بدأنا
أولادى أسروا لى يوم الوداع ان باستطاعتهم العيش هنا "فى السودان" للأبد ... لو لم أكن فى التزام نحو تعليمكم يا احبتى لفرشت متاعى هناك وظللت بين أهلى للأبد
تم اللقاء بينى وبين معطم البورداب والاصدقاء المسرحيين ومحبى الثقافة والعاملين بها فى بيت الفنون ...سعدت بمشاهدة شول دينق ..قال عنى كلاما أبكانى وأفرحنى ...وايضا خطاب "تانى ما شفتو أصلو" كنت متوقعة ان نتبادل الزيارات المنزلية ..يا خطاب ..
زرت أهلى من جهة أمى وبكيت كثيرا بين يدى خالتى أمنة أمى الثاتية وملامحها وشلوخها هى ملامح وشلوخ أمى ...تبادلنا الشعر ...هى شاعرة تقول الشعر بعفوية ولكل المناسبات ..غنيت لها مدحتى الاخيرة وغنت لى مدحتها الاخيرة ..
وزرت اسرة خالى عبد الحفيظ وبنته مها التى اكرمت وفادتنا بطعامها الشهى وقلبها الكبير ...زرت اسره فاطمة محمد الطيب ...وبناتها المتميزات وزوجها الموسيقى على الضو ..وكان مساءا مرحا وسعيدا ...
وصلت رشا وابنتها بعد يومين ...نفس العناق وحرارة اللقيا ...والضحك المبتل بالدموع ...وواصلنا صلات القربى ...
جاء فى المساء عدد من الشباب يحملون آلاتهم ...الموسيقية لعمل بروفات مع الصادق شيخ الدين وجاء ترحيل ليقل عفاف شيخ الدين الى بروفاتها لعمل سهرات فى النيل الازرق ... ولمدة ثلاثة ايام كانت البروفات وتصحبها فطورات رمضان ضخمة فى البيت وأهم من هذا كله كانت آمال النور ...وهى جاءت خصيصا لتدرت منى مجدى سليم على الاغنيات التى اختارها الصداق شيخ الدين ... وحسن مبارك ...أيام حلوة ومفرحة قضيناها بالمنزل حتى جاء موعد التسجيل
جاء الصحفيون واتصل التلفزيون والاذاعة
كنت فى البيت السودانى فى حوار على الهواء مع صديقتى الوفية ايمان محمد الحسن ..وحاورنا الشفيع المذيع المتميز ..
حاورنى عصام ابو القاسم النااقد المسرحى حوارا طويلا لم نخلص منه الا يوم السفر ...حاورتنى ايمان لبرنامج المرأة الحديقة ونجيب نورالدين لبرنامج نجوم بعيدة كلها برامج ستذاع فى العيد
قابلت اصدقائى وصديقاتى الاذاعيات واظن الدموع كانت هناك ايضا ...والذكريات أمطرت ...فى كل ركن وكل ستديو اذاعى ...كانت لنا أيام...
جاءنى الزميل عادل السعيد واتفق معى على تسجيل فيلمين للتلفزيون ...وجاءت كاميراته والطاقم التلفزيونى الى المنزل ومعه ممثلة شابة اسمها اخلاص وممثل اسمه الشاعر طفلة حلوة اسمها هند وفى خلال يوم كامل سجلنا كل المشاهد التى تخصنى ...وفطرنا فطور رمضان كبير
ركبنا رقشة بالنهار وزرنا اطثر من خمسطاشر بيت من لأهلى من جهة الاب ...تعازى على اشخاص أعزاء رحلوا فى غيابى ...
خابرنى السر السيد ويحى فضل الله ...ذهبت الى ست الشاى جنب المسرح وقابلت كثير من الممثلين الجد قلت لهم أريد لقاءا معهم ...رتبه سر السيد فيما بعد فى خيمة الصحفيين ...وقد كان
دعانى طلال عفيفى وأسرة معهد جوتة الى مشاهدة ستة افلام قصيرة أعدها طلبة الورشة السينمائية ...أفلام جميلة وعميقة ...كنت مزهوة بالاداء ...افلام سودانية متى شاهدنا أفلام سودانية بهذا العمق منذ أفلام شدشا والنجدى ومادى السينما سعدية عبد الرحيم عندما كانت الثقافة ثقافة ... قابلت التشكيليين وعلى رأسهم ابسفة وعصام عبد الحفيظ ...دعانى ابسفة لمرسمه وتناولت طعام الافطار مع طلاب الرسم فى المرسم وكان فطورا مرحا وجميلا وقضيت معهم وقتا طيبا ..
زرت مع أميمة ياسر عرمان وأهدانى مجموعة بوسترات للراحل جون قرنق ..وأكرم وفادتنا ,قابلت دكتور على عبد اللطيف حفيد الشهيد ...واتفقنا على عمل فنى ..."كتبت الكلام ده هنا عشان ما ينسى كلامو ده " ههه
منذ لحظة وصولنا للمطار والاستاذ الطيب الصديق يسجل كل حدث ...لتكلل هذه التسجيلات بلقاء مع مذيعة قناة النيل الناجحة نسرين النمر فى حوار لسهرة ستقدم فى العيد ...شاهدوها بالله وورونا انطباعكم ...
ركبنا رقشة بالنهار وتابعنا حكاية البكيات فى الثورات ...
قابلت اسرة الفنان المسرحى الراحل تورالجر وهى اسرة تمت لى بصلة الرحم ...وكانت زيارة مميزة ومشحونة بالعواطف الجميلة ...
سأواصل ....
ما أضيق الوقت هنا ....وما أكبر الحب هناك
|
|
 
|
|
|
|
|
|
|
|
Re: يا حليلك يالسودان (Re: Tumadir)
|
السلام عليكم
....
تحياتي تماضر وحمد لله على السلامة
أنا سعيد بأن أقرأ هذا البوح الجميل عن السودان
وأتمنى من كل المغتربين حينما يأتون للبلد أن يخلعوا نظارات مدنهم التي يعيشون فيها في المنافي
وما يجدونه من سهولة الحياة ليحاسبوا بها ما يفتقدونه في السودان
هذا ليس تعليلاً للفساد الضارب بأطنابه في البلد
وليس استسلاماً له ، فهو يجب أن يقتلع ويجب محاسبة كل من أجرم في حق هذا الأنسان السوداني الطيب
ولكننا يجب أن لا ننظرهم بعين اللوم على (حرهم) و(غبارهم) و(مدنهم ال######انة)
فهم يملكون الكثير من الحب والمشاعر والصدق الذي لا يتوفر للمدن النظيفة والحياة المنظمة السهلة التي تتوفر في المنافي.
ياخي يكفي أن تشعر أن هؤلاء هم أنت ,انت هم ...
ياخي ما أجمل الإنتماء وما أجمل الحب
....
| |
|
|
|
|
|
|
|
|
|
Re: يا حليلك يالسودان (Re: عوض عبدالله طه)
|
Quote: خابرنى السر السيد ويحى فضل الله ...ذهبت الى ست الشاى جنب المسرح وقابلت كثير من الممثلين الجد قلت لهم أريد لقاءا معهم ...رتبه سر السيد فيما بعد فى خيمة الصحفيين ...وقد كان
|
والله ياتمادور
موش الزول لما يكون بحكي في أكله الساعه ٦ قبل الفطور لي زول صايم وما إتسحر..موش اللسان والحلق بعملوا "برم جغم غغغ غيغ" كده؟
هسه انتي بتعملي في نفس الرقشه دي, اقصد الحركة دي,,
أحكي وحمدلله عل السلامه.
| |
|
|
|
|
|
|
|
|
|
Re: يا حليلك يالسودان (Re: Tumadir)
|
تماضر سلامات ورمضان كريم
اتمنى لك اقامة سعيدة فى البلد
وكمان اتمنى نشوف شغلك الجديد والقديم كمان
عما قريب, فانت قامة واحد اروع مبدعات بلادى
| |
|
|
|
|
|
|
|
|
|
Re: يا حليلك يالسودان (Re: M A Muhagir)
|
لؤلؤ وياسر بيناوى وعبد الاله زمراوى وعليش ومهاجر
كلكم أهلا بيكم ...انا غايتو فى البوست ده حأحاول الخص الرحلة والاحداث ...لكن فى كتابة تانية عن السودان ده حأكتبها براها ...يمكن هنا برضو ...
نواصل ...
عفاف الصادق: قالوا متألم شوية وياخى بعد الشر عليك ...عفاف وعركى حاولنا نتواصل اكتر لكن مرض عفاف وانشغالى ...
اول يوم قالوا نمشى سوا لى وردى فى المعمورة ونسهر معاه قبل يسافر ...نحن كلنا قالبين زمن وبننعس ...ماقدرت امشى معاهم تانى يوم قلنا يمشوا معاى دعوة السفير الالمانى فى بيتو ...وزوجته طالبة أميمة فى الاحفاد حب يكرمنى أنا ورشا أخوات أميمة ...عفاف كانت مرهقة شوية وأيمان محمد الحسن ما لبوا لى الدعوة دى ..
سوزوكى تمشى وتجى هى ومصطفى احمد الخليفة ، ما زرت بيتهم ولا شفت أولادهم لكن هم ما قصروا معاى ..
لاقيت محجوب شريف وزرتو فى بيتو بعد عودتو من ألمانيا...هو وأميرة ومى أكلنا وجبة خفيفة وظريفة معاهم ...يبدو بصحة جيدة ومتماسك وأميره ياها زاتا ..اديتها الخاتم الكنت لابساه ...تيمنا بمها الجزولى ومنى الجزولى
القصة الخرافية: لما مشيت عرض فى لندن ...مها الجزولى مرقت خاتمها من أصبعها ولبستنى ليهو ...بعد سنين مشيت عرض فى كندا ...منى الجزولى مرقت خاتمها من اصبعها ولبستنى ليه ...اها أنا لبست خاتمى لى أميرة تيمنا بهذه
الخوة الدافية الحنينة البعملنها أخواتها ...
ساقنى ليهم نجيب نور الدين ..زمان كنا حالة واحدة نحن وناس نجيب ديل ..عبادى نور الدين كان صاحب الصادق ...وعلى طريقة الصادق الباقى كلو صاحب الباقى كلو ...ودانى نجيب لى محجوب وأميرة لأننا كلنا زمان كنا حالتنا واحدة
وطلبت منه أزور مركز عبد الكريم ميرغنى ...مع انه الزيارة ما كانت مرتبة لكن ياسلام عليهم ياخ...عملوا لى سياحة جوه المركز وأهدوا لى منظومة من منشوراتهم ...وقالوا لى ننشر ليك كتاباتك ...وقلت ليهم بجيب ليكم مكتبة أبوى بعد مشاورة الاشقاء وفرحوا جدا بالفكرة ...لكن بعد رجعت البيت عرفت انه مكتبة ابوى حتكون جزء من مكتبة جامعة الاحفاد العريقة ...
وبمناسبة الاحفاد كان قاسم بدرى وبلقيس بدرى بجلالة قدرهم بيسألوا أميمة منى ورتبت لينا لقاء ..من كترة تأخيرى فى بيت المسرحيين لمن ما لاقيت بلقيس ...لكن سعدت بملاقاة قاسم بدرى .الايقونة الاكاديمية المعروفة ...
| |
|
|
|
|
|
|
|
|
 Re: يا حليلك يالسودان (Re: Tumadir)
|
الغالية تماضر
عوداً حميداً، والسودان بزيارتك نور ولله نور وكلو زينة*
تعرفي يا تماضر إنت من الناس الحلوين اللي بتمنى إني
أقابلهم على الرغم من إني مابحب أقابل ناس المنتديات
وإن شاء الله بس ما تكوني إنتي أو الأولاد جاتكم نزلة معوية
من موية السودان، وأنا بتذكر إني مشيت السودان بعد طول
غياب، ومن أول يوم ودوني الحوادث (والله قلتا دا الموت زاتو)
بسبب الموية
تحياتي يا غالية ورمضانك كريم
----
* مع الإعتذار للأغنية
| |
|
|
|
|
|
|
|
|
|
Re: يا حليلك يالسودان (Re: Tumadir)
|
خدورى ليه ما غنيت لى مدحتى ؟؟
ممكن تجيبها هنا؟؟
وعن المدحة أحدثكم ...
كنت ما متأكده من السفر ...
ما عندى قروش كتيرة للتذاكر والقصة كلها ما اتخططت من بدرى لكن كنت حاسة بأهمية السفر خاصة واولادى الصغار الاتنين ديل بقوا كبار بدون ما يشوفوا بلدهم ..
قعدت أدعو بقلبى انه ربنا يهون السفر ..
كاتبت ناس وكالة سفر سودانية شفتها فى الانترنيت بتعمل اعلان فى سودانيز اون لاين قلت ابدا بيهم ..رسلت ليهم ايميل ..حكيت ليهم بموقفى ووريتهم اسمى ..
المفاجأة جات فى ردهم ..الردت على هى صديقة قديمة اسمها الهام عبد الرازق وصديق لاصدقاء مشتركين اسمو كمال طيفور ...وياريت لو شفتو الجمال اللاقونى بيهو ...وياريت لو حاضرين اللحطة الشفت ردهم
كلمت ناس الشغل ...قلت ليهم شوفوا الناس دى بتتعامل معاى زى الملكة كيف؟؟
ولسة اكنت بدعو ربنا ..يهون لى السفرة ...
ولمن اكتملت الاغنية غنيتها ليهم ولى على السقيد ولى نعمان ولى ناس خالدة الجنيد ولى عبد الله ولى الصادق فى السودان ولى خدورى ونشرتها هنا ...
مستنياك ياخدورى تغنيها بصوتك
فى خيمة الصحفيين غنيتها وفى النيل الازرق غنيتها وفى المرأة الحديقة غنيتها وكل ما أغنيها ما بقدر اتمها خصوصا لمن أجى للمحلة الفيها امى وابوى ، قالى عصام عبد الحفيظ عجبت كمال الجزولى الكان بين الحضور فى خيمة الصحفيين
عجبت اهلى كلهم ...
غنيها ليهم يا خدورى عشان يسمعوها
| |
|
|
|
|
|
|
|
|
|
Re: يا حليلك يالسودان (Re: Tumadir)
|
Quote: وإن شاء الله بس ما تكوني إنتي أو الأولاد جاتكم نزلة معوية
من موية السودان، وأنا بتذكر إني مشيت السودان بعد طول
غياب، ومن أول يوم ودوني الحوادث (والله قلتا دا الموت زاتو)
بسبب الموية
تحياتي يا غالية ورمضانك كريم |
جاتنا ...
ماكنت دايرة أفتح الموضوع ده مع العزيز القارىء لكن طالما انت جبتو ....جاتنا
فى داعى للتفاصيل؟؟ ههههههههه
| |
|
|
|
|
|
|
|
|
|
Re: يا حليلك يالسودان (Re: محمد فرح)
|
Quote: وفى تلاتة عربات شققت شوارع لم ارها لعشرين عاما كل شى غريب ومثير يذكرك ياشياء بعيدة وحنينة وجميلة كان انفعالى الطاغى يسبق كلماتى
|
سلامات
بختك وبخت السودان بيك..
اكيد في صور...
تحياتي
| |
|
|
|
|
|
|
|
|
|
Re: يا حليلك يالسودان (Re: Elawad)
|
| Quote: غنيت لها مدحتى الاخيرة وغنت لى مدحتها الاخيرة |
تمادر حمدلله علي السلامة ورمضان كريم ليك و ضيوفك
عجبتني الكوت الفوق ده , و زعلت من مرضتي الاخيرة انها ما مكنتني
اسجل المدحة الجميلة , و دخلت اسه عشان اوعد اني حا افتح بوست منفصل للمدحة
بعد تسجيلها و نتشارك كلنا بالمديح
إعتذاري من جديد للضيوف
| |
|
|
|
|
|
|
|
|
|
Re: يا حليلك يالسودان (Re: Elawad)
|
| Quote: وبدأت فكرة عرائس النيل بتدريب بعض البنات الامريكيات على رقصات سودانية كوسيلة للتعريف بالثقافة السودانية |
أها دي واحدة من الأمريكيات يا تماضر
| |
|
|
|
|
|
|
|
|
|
Re: يا حليلك يالسودان (Re: Ashraf el-Halabi)
|
شكرا لكل المتداخلين
اعود للتداعى
زرت الاستاذ التحانى الطيب فى منزله العامر برفقة ابنته الصديقة عزة التجانى وابنتها النبيهة سارة طالبة طب الاحفاد
واتبرعت بالطباخ فى حفل وداعى الذى بدأ قصى مجدى سليم فى توصيفه فى البوست الخاص بذلك ثم زاغ
كان الحفل قد بدأ بعد ان اكملت لقائى مع عصام ابو القاسم الناقد المسرحى المعروف ولقاء هام مع ناس بيت المسرحيين وزيارة خاطفة لجامعة الاحفاد ولقاء آخر مع الآنسة نسرين النمر من قناة النيل الازرق ، واللقاء كان آخر حلقة من حلقات تغطية للزيارة قام بها الابن الفنان الطيب الصديق وقد اضاف اليه حفل المنزل وبيت الفنون وخيمة الصحفيين
والحفل قد ضم نخبة ممتازة من الصديقات الممثلات آمنة أمين ونادية أحمد يايكر والهام بابكر وايمان محمد الحسن الصديقة من الاذاعة والصحفية ليمياء الجيلى ونسرين النورانى ونجلاء سيد احمد قرفنا وممثلين جدد وناس الجريفاوى ووديدى والفنان الموهوب عاطف وبنات الاهل الفنانات ربا ب وليلى وآمال وعبير حفيظ واحمد حفيظ وناصر حفيظ وعصام عبد الحفيظ وناس نجيب نور الدين وناس طلال عفيفى وصديقات لاميمة من الاحفاد واهل بالكوم والردوم ...كانت ليلة جميلة
استلهمت فيها الاغانى القديمة التى كنا نغنيها مع بنات الاهل فى الماضى ... وتجلت فيها الهام بابكر بالرقص القديم زمن الهورس والتويستى ومن ارض المحنة وكل العباطات التى كنا نرتكبها فى شبابنا وأميمة لم تتوقف من الرقص والضحك كان متواصلا ... ههه يوم حلوياخ
| |
|
|
|
|
|
|
|
|
|
Re: يا حليلك يالسودان (Re: jini)
|
Quote: نسيتى تمشى مكتبة الاذاعة تساليهم عن اللقاء الاذاعى اللى اتكلم فيهو دكتور جلال الدقير عن مربى الاجيال شيخ الدين جبريل عليه رحمة الله!
ما تتخيلى كلام تلميذ متفوق زى جلال عن قامة سامقة زى العم شيخ الدين بكون كيف!
الله يخليكم دائما بيت خلية نحل لا يكف عن انتاج العسل! |
يا سلام عليك أنت يا جنى
وعلى الاشارة الجميلة الأشرت ليها
وأنا حأسعى من خلال أصدقائى هناك أتحصل على الكلام ده
قبل كده لقيت شيخ قاسم بدرى كاتب كلام جميل عن المرحوم أبوى وعن أثره عليه كتلميذ فى المدرسة ..وكان حكيا جميلا...حا حاول أجيبو ليك قريب لو اتحصلت كمان على اللقاء ده ...وتكون احياء لذكراه الغالية ...شكرا ليك
وكل عام وانت وأسرتك البهية بألف خير
(متأخرة مش؟؟ ههه ...والله مشغولة)
| |
|
|
|
|
|
|
|
|
|
Re: يا حليلك يالسودان (Re: تيسير عووضة)
|
قابلك أهلك وأصدقاؤك بالحب فأنسوك السودان الآخر .أكدوا لك أن حياتك كان ويظل لها معنى.
مثل هذه الزيارات ترد الروح يا تماضر التحية لك ولهم.العاقبة لطارق (خدر) فانتم أهل الفن
تسيرون حين تصلون إلى السودان بسبب الشهرة في كوريدور من التحيات والسلام السوداني
الأليف الذي يترك آثاره في الضلوع والقلوب.ما أكثر الانطباعات , انطباعاتك يا تماضر.
| |
|
|
|
|
|
|
|
|
|
Re: يا حليلك يالسودان (Re: Bushra Elfadil)
|
الأستاذه تماضر .. سلامات .. كيفك وكيف الاولاد .. اتمني أن تكونوا بخير .. شكرا علي الايام الجميله والوقت الجميل .. تستحقين التكريم والتقدير الذي احاطك به محبيك وأصدقائك ونشكرك ان اتحتي لنا فرصة التعرف بكي وبمواهبك وقدراتك التي كونتها تجربه طويله اوجدت لنا فنانه بجمالك وانسانيتك ولطفك .. أتمني أن تتحقق ونستنا في سوق امدرمان وتعودي للبلد وللناس البحبوك .. عاطر التحايا لمحمد ويسري ..
| |
|
|
|
|
|
|
|
|
|
Re: يا حليلك يالسودان (Re: الطيب صديق محمد)
|
| Quote: الأستاذه تماضر .. سلامات .. كيفك وكيف الاولاد .. اتمني أن تكونوا بخير .. شكرا علي الايام الجميله والوقت الجميل .. تستحقين التكريم والتقدير الذي احاطك به محبيك وأصدقائك ونشكرك ان اتحتي لنا فرصة التعرف بكي وبمواهبك وقدراتك التي كونتها تجربه طويله اوجدت لنا فنانه بجمالك وانسانيتك ولطفك .. أتمني أن تتحقق ونستنا في سوق امدرمان وتعودي للبلد وللناس البحبوك .. عاطر التحايا لمحمد ويسري |
عريس العايلة: هههه
والله شكرا ليك يالطيب على فيضك الجميل ...والمنتوج الفنى والتصوير ( ما سمعنا منكم تانى الحصل شنو؟؟)
وأنا برضو كانت لى فرصة عظيمة أعرفك فيها وأعرف نبلك ...وكرمك
المهم الموضوع اتشعب وبقت فى أكتر من فكرة ياريت تدينى ايميلك عشان نتناقش ...شلت تلفونك من الصادق لكن اتلحس
تحيات محمد ويسرا ...وتحياتى انا لكم جميعا
ونشوف وشك بخير ...
نأسف للتأخير
ياخى جينا بدينا الجك "ما جك الموية، الجك داك جمع جرى داك" ههه
| |
|
|
|
|
|
|
|
|
|
Re: يا حليلك يالسودان (Re: Tumadir)
|
Quote: قابلك أهلك وأصدقاؤك بالحب فأنسوك السودان الآخر .أكدوا لك أن حياتك كان ويظل لها معنى.
مثل هذه الزيارات ترد الروح يا تماضر التحية لك ولهم.العاقبة لطارق (خدر) فانتم أهل الفن
تسيرون حين تصلون إلى السودان بسبب الشهرة في كوريدور من التحيات والسلام السوداني
الأليف الذي يترك آثاره في الضلوع والقلوب.ما أكثر الانطباعات , انطباعاتك يا تماضر. |
دايما ألقى روحى متلومة معاك يا بشرى الفاضل
ياخى فى بوست كده ..انت دخلت لى فيهو يوم تلاتا (هههه) فى ايام كده الردود حقها بروح
وبعد داك ألقى المداخلات كترت ...
أفتر
ياخى المعذرة بالله
وشكرا على كلماتك الطيبات
مع انك قلت THE F WORD
فنانين
الكلمة دى قلتها على أى أساس؟؟ ههههه
يا مراحب بيك
وان شا الله تزور كدى وتشوف أهلك ويفرحوا بيك الاصحاب ...يارب
| |
|
|
|
|
|
|
|
|
|
Re: يا حليلك يالسودان (Re: Tumadir)
|
تحية...نوستالجيا الحنين الي النبع هي التي تمطر مطر الشوق...اسماعين ولد حد الزين قال ..زالحنين والغربة ديل سووني راوي...نعم كل منا له قصته التي يرويهاعندما اصبح الاغتراب قدرا ومصيرا...يتلون الواقع بالرؤي التي يحملها الرواة ...منها تفتح النوافذ لاضواء جديدة وبها يتشكل الوعي الجديد....
ومعك نقول حليلك يا بلدنا ...
| |
|
|
|
|
|
|
| |
Tumadir
لؤى
ياسر بيناوي
عوض عبدالله طه
عليش
M A Muhagir
النذير حجازي
فيصل محمد خليل
محمد فرح
Abdlaziz Eisa
Elawad
خدر
Kostawi
الملك
Ashraf el-Halabi
تيسير عووضة
jini
Bushra Elfadil
الطيب صديق محمد
انعام حيمورة
معاذ حسن
معاوية المدير
حبيب نورة
فيس بوك
تويتر
انستقرام
يوتيوب
بنتيريست