|
|
 التشكيليين سجمكم ...انا جيت
|
زمان لما كنت صغيرة
بلعب بالفن ..
كنت برسم وبغنى وامثل واعزف اكورديون وبضحك الناس ...
لما "اترعرعت" شوية ..بقى اعز اصدقائى ..عبد الله محمد الطيب "ابسفة" ..
وخلانى اكون بعرف اسرار الفن التشكيلى ..
لمن اترعرعت زيادة ..مشيت معهد الموسيقى والمسرح ودرسونا فى مادة "الديكور" تاريخ فن تشكيلى ..
لمن اترعرعت "شدييييييييد" ..بقيت اشتغل مع المتخلفين عقليا فى امريكا ..وعندهم مناشط منها رسم ..مديرة البرنامج قالت لى انتى بترسمى كويس ..فحقوا تدرسيهم رسم ..
اهو بعد داك ماشة مترعرعة ..والرسم بقى يجابد فينى من جديد ..
لما كمبيوترى باظ ..وغبت من البورد ..بقيت ارسم بالماوس..
انا اتدرب فى الرسم بالماوس ..بديت اورى اصحابى رسمى
يعنى لما اقول اصحابى بقصد ناس عصام عبد الحفيظ وناس الباقر موسى ..
وشعرت بأنى "ما بطالة ابدا" ..وممكن اوريكم ليه ..
اها الليلة قابلت لؤى فى المسينجر ..وحكيت ليه بالموضوع ..
قال نعمل البوست الليلة وحسة ...
لانو بيعرف يصغر وينزل الرسم ..انا وعدته اعمل ليكم المقدمة دى ..
وهو حيواصل ..
قلت ليه نزل صورتين برضو رسمهم محمد ولدى "عمرو اربعتاشر سنة..وهو مشهور بموهبته الفنية فى الموسيقى والرسم"
وقلت ليه نزل لى موسيقى بتاعة الوافر ..لانه بيعزف الآلتين العود والكمان ..لوحده فى هذه المقطوعة ..وهى المفضلة بالنسبة لى ..
اخليكم مع لؤلؤ ..وفنى التشكيلى ..ويالتشكيليين "سجمكم ..انا جيت"
مع خالص المودة ..والحب للجميع ولجميع التشكيليين والموسيقيين
بالمناسبة لما قابلت استاذ محجوب التيجانى فى مؤتمر الدراسات السودانية أدانى عوده
فيا الموسيقيين بلوا راسكم ..
يللا يا لؤلؤ...
|
|
 
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
| Quote: انقر ما خجلت وندمت حبة كده على العملة العملناها دى.؟؟ |
أعمل ليك نفسيات
في رسومات بالجد عجبتني شديد وفي رسومات ضاربه شديد
غايتو, انا زول لا أفقه شي في الفن "الرسومات" يعني ما من ناس الفكره
المنبثقه ولا الخيط المنبعج, لكن عارف ان الرسم بالماوس ما حاجه ساهله, زمان
بديت محاولات ضاربه و وقفت, لكن حسي بعد رسوماتك دي ححاول تاني
الله يسامحك ويغفر ليك
___________________________
البركه فيكم
معليش جات متأخره لبعدي عن المنبر الفتره الأخيره
لؤي التغيان
سمعت ولا جابو ليك
أنا مابفتر من الإنتظار ولسه عايش على أمل
شد حيلك مع تماضر
| |
|
|
|
|
|
|
|
|
 Re: التشكيليين سجمكم ...انا جيت (Re: Tumadir)
|
Tumadir, | Quote: انقر ما خجلت وندمت حبة كده على العملة العملناها دى.؟؟ |
.You are being very humble .Your paintings are very beautiful They deserve to be put in the special exhibitions at the Philadelphia Museum of Art Thanks to both of you Regards, Firdouse
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
تعرفي يا تمادر.. يبدو أن تعليقي الأول تزامن منع إنزال لؤي ل رسومات محــمد.. أنقلي له تحياتي.. خطوطه قوية وواثقة.. وذكرني بأول شخص شاهدته يرسم بالماوس على برنامج "Paint" وكان ذلك قبل حوالي الخمس سنوات في "كمبيوتري" الذي كان يجري على مشغل ويندوز 95، وقد دهشت للقدرة الفائقة على التعبير بالرسم في براعة وسهولة ويسر وسرعة وثقة.. وكان الفاعل شخصاً متعدد الأبعاد الإبداعية "مثلك تماماً" وأخاله قد وصـل شأواً بعيداً في ذلك المجال.. ذلكم هـو صديقنا المبدع الشاعر عبدالمنعم الجزولي "Gazloat"..
شكراً لؤي..
عدلان.
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
| Quote: انقر ما خجلت وندمت حبة كده على العملة العملناها دى.؟؟ |
العزيزة تماضر
انا ما تشكيلية لكن برسم وبحب الرسم
واتعلمت ان الرسم ما بلتزم بتقنيات او قواعد معينة
لان الفن احساس قبل كل شيء
اذا كنتي قادرة تظهري احساسك في اللوحة اكيد حتكون جميلة
ولوحاتك جميلة
ولوحات محمد اكثر
ويا التشكيليين سجمكم
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
اللوحة دى بالذات انا عاينت ليها 100 مرة. وكل مرة تثير فينى مشاعر غامضة ومختلفة. ما لاقى كلام مناسب للتعبير عن هذه اللوحة. لوحة بديعة وصعبة ومعقدة جدآ. شكرآ يا تماضر على وجه اخر من وجوه وجودك الموهوب. وشكرآ لؤى على المساهمة الواضحة والمبدعة.
| |
|
|
|
|
|
|
|
|
|
Re: التشكيليين سجمكم ...انا جيت (Re: Adil Osman)
|
بالله شوف
انا قلت ارجع القى الصحفيين قافلين الشارع
والجمهور زحمة
والكاميرات تشلع براق
ورجال ونساء الاعمال متزاحمين وحجزوا اللوحات ومنتظرين الاتوغراف
اجى القى "نقاد" لسانهم طويل زى ناس abcde
البركة فى البنيات الرقيقات صاحباتى ناس نهال كرار وفيروز ..بالمناسبة
يا نهال كرار جيتك فرحتنى شديد ..لانو فى صديق مشترك بيننا فهمنى انك
زعلتى منى والحاجة دى كانت حازة فى نفسى شديد ..لكن بركة عليه ..خذلتيه
وفرحتينى ..لو كنت عارفة معرضى ده بجيبك لى ..وتقولى لى كلام حلو زى ده
كان رسمت من بدرى ..(قبل ما اترعرع وابقى قدر ده)
أما انتو يا عادل عثمان وعدلان ان شا الله لا تفوتوا لا تموتوا..وبالمناسبة
حقوا نفتح البوست ده لرسم "الماوس" ونخلى حكاية التشكيليين دى بجنبة..يعنى لو جبت لى جزلوت ده هنا وبدينا نتنافس يكون احسن ..
انا فى انتظارهم بالمناسبة وينهم هم التشكيليين ..ولا سوقهم برد..ولسانهم انقطع غلبهم يدخلوا البوست؟؟
اما اقتراح العزيز لؤلؤ بالبيع ..
اعتبرنى بايعة بايعة ..بس سلمنى المبلغ ..انا من انصار "الفن للمال" ...زى ما عارف
خاصة لمن يكون فن مقطع زى ده
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
سلام يا تماضر
اها اقوليك كلام انا كنت عارفة انك بترسمي وبترسمي كويس جدا..مرة في زول قالي تماضر دي كان ممكن تدرس اي تخصص في المعهد في القسمين وبرضو تجي الاولى...
اللوحة دي فيها كلام كثير جدا يا تماضر..
شجرة في زمن الايراق وامرأة برضو يبدو انها في زمن الايراق..
تعرفي اكثر حاجة كانت "بتفرفر" لي قلبي في امريكا الشجر البيكون
عيدان في الشتاء بعداك يورق من جديد في الربيع والسناجيب تجي تلعب فيه.
كنت بقيف ساعات في شباك انظر لشجرة في الصيف تداعب شباكنا..
بعاين ليها بتمعن واقسم انني ارى الاوراق تكبر.
المراة والشجرة حاجة واحدة في مواسم تسقط اوراقها ولكن لابد ان ياتي موسم تعيدها..
عجبتني شديد وما عارفة ليه ذكرتني مسرحية الطريق الى تار(لو ما خانتني الذاكرة)
فاكسير الحياة ما محتاجين نشق ليه الاهوال..هو في دواخلنا..
ولك التحية وانت تجربين كل الفنون,,
اللوحة التانية العجبتني لوحة الحفلة.. برجع ليك فيها "
انقدها" قبل مكنة الناقد التشكيلي تتلاشى..
يا عادل عثمان شوفتا كيف عجبتك نفس اللوحة العجبتني
يعني ممكن نتلاقى في حتة
موش؟
| |
|
|
|
|
|
|
|
|
|
Re: التشكيليين سجمكم ...انا جيت (Re: bayan)
|
الفنان الحقيقي
فنان في كل شئ
ومشروع الشجرة أمشي فيهو وحتصلي
صدقيني
في لوحات مدهشة
وفي كم لوحة عادية
لكن المدهش والرائع
جاي لي قدام
لأنو في مشروع واضح
الشجرة المرأة
المرأة الشجرة
ادقثي في الألوان
وارسمي
وصدقيني معرضك قرب
انت أساسا فنان
متجاوز
وبديع العطاء
محبتي ومودتي
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
يا فنانتنا,
يا تماضـرررر
ايه الجمال دا,؟
طبعاً أنا في الشركة الأن والفايار وولز بتمنع إظهار الصور لانه رموزها بتكون محملة من مواقع أخرى,
يعني توقيعي دا , توقيع على (بياض ) , مـش منك أكيد بيكون جميل,
ليكي التحيـة وللحاج لؤلـؤ,
لأنه في السعودية طبعاً
أحمـد الشايقي
| |
|
|
|
|
|
|
|
|
|
Re: التشكيليين سجمكم ...انا جيت (Re: أحمد الشايقي)
|
Quote: سلام يا تماضر
اها اقوليك كلام انا كنت عارفة انك بترسمي وبترسمي كويس جدا..مرة في زول قالي تماضر دي كان ممكن تدرس اي تخصص في المعهد في القسمين وبرضو تجي الاولى...
اللوحة دي فيها كلام كثير جدا يا تماضر..
شجرة في زمن الايراق وامرأة برضو يبدو انها في زمن الايراق.. |
معقول بس؟
بيان الشناااااااافة دى عجبها رسمى ؟
لا كان كدى التشكيليين سجمهم جد جد
اما والله حكاية الشجر العريان وضوء المغارب ..النعسان ..وضولوع الشجر واقفة
ضد الافق دى ..فخليها ساى ..انا بموت فى "العاب" السحاب ..والافق ..وضلوع الشجر
ربنا ده غايتو بالغ فى الدنيا دى ..كل يوم الضوء يتزاحح من "ضلامية لى استنارة" على
جسم شجرة ..والسحاب يتزاحح من كتل لى خيوط ..والافق يتبدل من رحابة لى عتمة ..وكتمة
وانا اقرب اصرخ ..شقتى الوان الشجر والافق والسحاب فى البلد الانا عايشة فيها دى
مهرجاااان ، مهرجان يومى ومجانى ..وسعادة لا توصف .."الا فليتفكر المتفكرون"..
يعنى انا الرسم الفى بطنى ده لو طلع كلو وقدرت انفذو ..حتتعبو يالنقاد .. مش التشكيليين براهم ..
الله يخليك يا صديقتى على رفع الروح المعدنية ..وسط هذه الوحشة اللعينة والاحزان الدفينة
| |
|
|
|
|
|
|
|
|
|
Re: التشكيليين سجمكم ...انا جيت (Re: Hussein Mallasi)
|
| Quote: فعلاً التشكيليين سجمهم جد جد. |
هوووووى يا ملاسى الدبلوماسى
التشكيليين
علمونى الفن والحياة والتفكير ..تابعت معارضهم ونقاشاتهم ورحلاتهم
ومداخلهم هى العلمتنى الجرأة فى فن التمثيل ..وهى الادتنى ثقة فى العالم
وتذوق قسوته وجماله وأدتنى طاقة عشان أحبة وأعيشه بسعة افق وأدراك فنى.
شكرا على دخولك.."وتسجيمهم" على كل حال...
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
Quote: الفنان الحقيقي
فنان في كل شئ
ومشروع الشجرة أمشي فيهو وحتصلي
صدقيني
في لوحات مدهشة
وفي كم لوحة عادية |
حقيقة يا السنى كلامك مطمئن ..
بقول ليك الحقيقة انه بعض الحاجات الاتعرضت هنا دى ..كانت محاولات اولى
فى التدرب على مسك الماوس والتحكم فى حركته ..
والله صعب ياخ الرسم بالماوس
يتخيل لى الرسم ده اصلا كان مفروض يكون بالاصابعين فى الحيطة او الارض
لكن الوسط والاداه جابتهم الحاجة للتوثيق وطول عمر اللوحة
والمهارة بتاعة الرسم بتتبع لمهارة الاستخدام للوسط والاداة ..
يعنى اللوحة العجبت الناس دى ..هى بعد تدريب كتير وصبر..
الاوائل كانوا تجريب و تدريب ....خصوصا حنة دى ..كنت دايرة اشوف
قدر شنو ممكن اعمل خطوط منحنية لمدة طويلة بدون ما افقد التحكم
واستعملت الالوان دى عشان التضاد عالى ..وحساس ..دايرة اشوف "نفس الماوس" بيكون
طويل قدر شنو فى يدى..
لسه بفتكر انه رسمى للانسان..اجمل بالقلم ..يعنى لسه ما عرفت دربة ارسم ملامح انسان
بالماوس ..بنفس طريقتى بالقلم ..ولسه شغالة فى الموضوع ده ..
بس حكاية الزول يرسم ..بعد خرف دى.. كتيرة ..فى زول اسمو عمر سعيد فى هولندا عمل معرض
قريب ده فى هولندا وحضرو العمدة ..الرجل ده صديقنا شدبد..وهو متخرج زراعة ..لكن واضح
انه الرسم كان واجعو زيى كده..وما قدر يخليه
عندك برضو بهنس ....وهو اتعرف بالغنا والدراما ..والشعر ..وفجأة وجعتو الكلوة التشكيلية ..ونفضها فى معرض الضوء الاتعمل فى باريس قريب ده ..
اها انا وجعتى لسه موجعانى ..وبنفض فيها حتة حتة ..
شكرا يالسنى على جميل لطفك.
| |
|
|
|
|
|
|
|
|
|
Re: التشكيليين سجمكم ...انا جيت (Re: عبد الله عقيد)
|
| Quote: بعدين لمن أترعرع ح اقول لي الجماعة دي صورتي ورسمتني تماضر |
انا قايلاك من النوع المرعرع اصلا..بالله انت لسه بتترعرع ؟؟
أما المبلغ فأرجو ارساله بالويسترن يونيون ..5000$ براس مالها ..والله بس عشان انت اخونا وكده ..
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
| Quote: انا قايلاك من النوع المرعرع اصلا..بالله انت لسه بتترعرع ؟؟ |
انا اصلي مرعرع احمد الله.. بس ما لِحقت ملحوق الصورة دي
ما مسعتي الغنية البتقول
المرعرع ضرِب مثل
ويكة معطونة في بصل.. ؟
| |
|
|
|
|
|
|
|
|
|
Re: التشكيليين سجمكم ...انا جيت (Re: أحمد الشايقي)
|
Quote: يعني توقيعي دا , توقيع على (بياض ) , مـش منك أكيد بيكون جميل,
|
المشاهدين بينقسموا الى (تلاتة قسمين) نقاد وحساد ومعجبين..
اها البوقعوا على بياضة ديل اسمهم (معجبين) .. كدا كويس؟؟ بتقبل لى نفسك كده؟
هههههههه
شكرا يا احمد الشايقى على "الثقة العمياء" دى ..ويشيلك راسى ..لو المعرض ابى.
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
good girl
لكن ما سجمنا ولا اي حاجة قولي فرحتنا بالاضافة الجديدة... دي نصوص مسرحية طلعت غصبا عنك والحمد للة انها طلعت.... الفن كدة...انفعال ويطلع باي شكل متاح
اللوحة دي فيها حاجة من رسوم الاطفال
ودي قريبة من الفن الصيني
| |
|
|
|
|
|
|
|
|
|
Re: التشكيليين سجمكم ...انا جيت (Re: ابراهيم برسي)
|
ابراهيم برسى
"التشكيليين جو...
ادخلن يا بنات لى جوة ..رصن الكسرة وقطعن السلطة ..وختن الغدا" او كما قالت سكينة زوجة خليل فى مسرحية (خطوبة سهير)
وكلامك كلو صاح!!!!!
فى الاولى عندى اوبسيشن بحكاية الملابس الملونة المشرورة فى عرض الفضاء والشمس شارقة
كتبت الحكاية دى قبل كده فى قصة- قصيدة هنا فى البورد اسمها: ابحث عن ابرة امل فى كوم السأم ..
وهى فعلا فكرة بكرة وطفولية ..مناديل ملونة معلقة فى عرض الافق..
...ابحث عن ابرة امل فى كوم السأم
أما الفن الصينى فهو صدفة ..ان تشابهنا ..لكن اعرف ان تركيبة الالوان دى والتفاصيل الشديدة ..هى من ملامح الفن الصينى .."أطنى صينية بى جوة وما عارفة...صينية غدا"
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
الأعزاء بيان وعادل عثمان
انا كمان مُعجبة بنفس اللوحة !
التشكلية " المُترعرعة " تماضر
انا فكرتي انو الفن كتلة واحده مرنة ممكن تتشكل لعدة اشكال
وبتحدد التشكل دا عوامل مُختلفة
لذا لم يفاجأني رسمك
وانا صاحبة المقولة
" الالوان جواي اتقلبت لي حروف ! "
الوانك حلوة وبريئة وجديدة
سالي
" الحتشتري اللوحة tree بعد إذن بيان وعادل "
سلامي
| |
|
|
|
|
|
|
|
|
|
Re: التشكيليين سجمكم ...انا جيت (Re: خدر)
|
سالى الجميلة شرفت المعرض؟
يللا يا ولاد قوموا لموا الكرور ده ونضفوا الحيطة من اللوحات الشينات ديل
وفرشوا الملايات ..سالى السمحة جات...
مش لما فى السودان لما يجوا ضيوف مهمين الناس بلملموا الكرور؟ انا امسح ليك
لوحة حنة ..والفستان الاحمر زى الهوا..ياااااا
Quote: سالي
" الحتشتري اللوحة tree بعد إذن بيان وعادل " |
وما فى مشكلة اللوحة ممكن تعملوا ليها كوبى آند بيست ..كلكم وتشتروها
المهم القروش ترسلوها على عنوانى ده: فنان طلع جديد دوت كوم.
fannan-tala3-jadeed.com
او:
فنان نجاض تدوه كم
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
خدورى ..
رايك شنو فى الفنان بالله ..مش طلع "دحاض"؟
دحض ليك عناصر النقد الضلامى فى دقيقة ..
انا من ماشفت موت المؤلف عرفت فى كاسورى جايى ..قلت احسن بس ادحض
ولعى اللمبة النقدية واقعى منهج الاستنارة
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
طم طم ..
سلام يا ( فردة ) ..
- فردة دي ترقيدة -
ملافاة لشر لُبَطِك و مضايقتك لينا في أكل عيشنا
بعدين لو PARTY دي رسمتيها إنتي ..
يكون سجم خشمنا جد جد .
تماضر لو سمحتي ( إترعرعي ) بعيد بعيد بالله .
| |
|
|
|
|
|
|
|
|
|
Re: التشكيليين سجمكم ...انا جيت (Re: Emad Abdulla)
|
Quote: بعدين لو PARTY دي رسمتيها إنتي ..
يكون سجم خشمنا جد جد .
تماضر لو سمحتي ( إترعرعي ) بعيد بعيد بالله . |
لا مش حروح ياخويا ..وحترعرع هنا ..انت تطلع أمى ولا تطلع ابويا ...؟
"عجين الفلاحة .."
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
فنانتنا,
Quote: اها البوقعوا على بياضة ديل اسمهم (معجبين) .. كدا كويس؟؟ بتقبل لى نفسك كده؟
هههههههه
شكرا يا احمد الشايقى على "الثقة العمياء" دى ..ويشيلك راسى ..لو المعرض ابى. |
ياخ أنا معجب من زمان,
بـس شكلكم ما مسجلني في سجل المعجبين..
تسلمي وتعيشي يا ذوق,
أحمـد الشايقي
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
الفنانة /تماضر
مأأجملك ..
إن الأنامل التى ترسم .. توهب الحياة عبر اللوحة .
لوحة البودى شاهدتها فشاهدت طفولتى مرة واحدة كانت فى بيتنا بانة كانت تشبه فى تناغجها لوحتك كنت طفلا أتسلقها فتحتوينى وتمنحنى الدفءالأنسانى اللازم لاستمرار أحلامى اليقظة عن العالم وعندما كبرت لم أتنازل عن أحلامى فأحتوتنى بانة أخرى لم استطع أن أهديها سوى قليل من الشعر واليوم أحتفينا بلوحتك تحت ضوء الشموع والليل والغربة والحنين وكانت روحك ترفرف حول اللوحة فلم نستطع مغادرة الزمن خوف أن نذوب فى المكان . القاضى.
| |
|
|
|
|
|
|
|
|
|
Re: التشكيليين سجمكم ...انا جيت (Re: لؤى)
|
لؤلؤ..
يا اما ترسل لى ايميلك يا اما تعلمنى اصغر الصور دى كيف عشان عندى "اعمال جديدة"
هههه شفت اعمال دى كيف؟
هى ما جديدة لكن كانت بتستحق تتشاف ..اكتر من محاولات كتيرة هنا طابعها تجريب ..وبداية ما اكتر..
لكن قلبك الناصع ..اضفى على الرسومات ..بعد روحى جدير بالاشادة والتقدير ..لك محبتى غير منقوصة.
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
العزيزة تماضر
تحياتي
ياريتك يا تماضر لو تعرفي علاقتي الشديدة بي التشكيليين
كنت ساكن معهم في ( الكنيسة ) والكنيسة دي الداخلية الفي المقرن
المهم الناس ديل هادين فيني
لمن ناس كتار قايلين انا تشكيلي
سعدت جدا بي معرضك وموسيقى الوافر
وحا احكي ليك حاجة خاصة حصلت لي لمن كنت ساكن معاهم في الداخلية
راجعي الماسنجر
لكن ليست للنشر
والى لقاء
| |
|
|
|
|
|
|
|
|
|
Re: التشكيليين سجمكم ...انا جيت (Re: عصام عبد الحفيظ)
|
Quote: خدورى ..
رايك شنو فى الفنان بالله ..مش طلع "دحاض"؟
دحض ليك عناصر النقد الضلامى فى دقيقة ..
انا من ماشفت موت المؤلف عرفت فى كاسورى جايى ..قلت احسن بس ادحض
ولعى اللمبة النقدية واقعى منهج الاستنارة |
دحاض الهينة دي كما زمزاغ وجرسة..
اها كتبت ليك ضلومية نقد بس اتمسح..
طبعا انا كناقدة (الزول لم يتعلم سواقة العجلة في عجلة رالي بعداك بيسوق اي عجلة موش؟)
اها انا كناقدة تشكيلية بعد طلقت الادب.. وجيت لحبايبي التشكيلين.
من اجل الاولد ديز سيك..
اسع انا فرحانة لانه لوحة الحفلة عجبت عماد وعصام. النعمنو عيني نجيضة للفن وكدا..
بعد كل هذه الولوة خوفا وخشية من مولانا خدر.
لوحة البارتي لوحة رائعة جدا..والدحاضة رسمتها بصورة بسيطة ومرمزة..
وبما ان الفنان الدحاض اتي من بيئة تختلف فيها رمزية الحفلة المرسومة..
مثلا لسوداني اذا قلت حفلة سيتسدعي ارثه من ذاكرته المحلية. فربما رسم رجل يبشر او امرأة ترقص رقبة
او حق او هلال.. من مخزونات الدحاض الاصلية..
ولكن اللوحة يمكن ان يرسمها فنان من نيويورك اذ ان الموديل تلبس فستان سواريه
وتحمل كاس كوكتيل..وهذا هو (امج) الحفلة في الغرب..
وهنا نصل الى ان الفنان الدحاض قد استلف ذاكرة اخرى وتبناها في رسمه..
فصارت لوحته معولمة...
الناقدة المستلامية بيان..
| |
|
|
|
|
|
|
|
|
|
Re: التشكيليين سجمكم ...انا جيت (Re: bayan)
|
طيب يا بيان (الناغدة) الظلامية
الناس دى كلها عارفة انه انا "لسه" ما تشكيلية ..وانك انتى ما اتعاملتى
مع "النغدى" التشكيلى ..تجى من اول ضربة تقولى كل واحد يرسم ناس حلتو؟
طيب الفنان ده ما زمزغة منه لكن لى حسة ماحضر "بارتى" فى نيويوكيكى دى
وفى السودان شاف فستان سواريه فى الحقيقة البارطيهات الشافا فى السودان لى يوم الليلة ما شافا فى امريكا ..النعمنو فى امريكا شغال "يخدم الدفرة"
اها جنس ده ..يسوى شنو؟؟ تطير عيشتو..
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
ت| Quote: جى من اول ضربة تقولى كل واحد يرسم ناس حلتو؟ |
يازولة ما تزمزغي بتواضع انت فنانة تشكيلية ونص. بالجد عجبتني رسوماتك
خاصة المشار اليها بهذا النغد المستلامي...
الفي فنايين من اعظم الفنايين قالو خترية
الفنانين صغارا وكبارا قالو سمحة
اسع انا اتنازلت لبتنا سالي على شرط تتمعنها وترسمها بالكلمات
اها يا تماضر كان ما رسمتي ناس حلتك البريسموم منو؟
انت عايزة النغاد البجد يجو يقولو انك عندك غربة في المخيلة الفنية حقتك
الشر برة وبعيد..امشي من دربك شيلي البت دلوكة
او لبسيها خاتم جنيه او برش.. ان شاء الله كان قلة..
لازمن البت دي تكون من حلتنا..
لسع ما جيت للوحة الهدوم المشرورات ديلاك ونغدهم نغد ضلامي صرف
كدي النشنفهن اول
يادي ان هدومكن مالن قصار ومجقمصات كدي حدست دي ( لحست اصبعها وغزته في الواط..ة جنبها)؟
الشنافة التشكيلية الجديدة بيان
نؤمن على حفلات الخرطوم النيويوركية...
| |
|
|
|
|
|
|
|
|
|
Re: التشكيليين سجمكم ...انا جيت (Re: عصام عبد الحفيظ)
|
عصام عبد الحفيظ:
طبعا نحن التشكيليين الحداثيين الماوسيين ديل ..بنعتبر تلاحمنا مع التشكيليين
التقليديين زيكم ديل ضرورة فنية ..وحتمية تاريخية ...الخ
وههههههه الف مرة ..لانه لما قريت انه فى "اعجاب شديد جدا جدا" ...ناديت اسماعيل فرح
"تشكيلى الاسرة" وقلت ليه اقرا الكلام ده ..وهو طبعا من "المشركين" ...
شكرا الليلة النوم ما بجينى للصباح.
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
| Quote: لما "اترعرعت" شوية ..بقى اعز اصدقائى ..عبد الله محمد الطيب "ابسفة" |
آبسفه شديد
آبسفين والله آب سوري ما قصدنا نحرف موضوع البوست , الرسمات جميلة وانتي اصلاً
فنانة لكن اسي اثبتي انك فنانة "ورصامة" ذاتو , لكن انا برضو متكيف من الزول
اب سفة دا .
| |
|
|
|
|
|
|
|
|
|
Re: عبد الله محمد الطيب "اب سفة".. (Re: Tumadir)
|
**"... لما كمبيوترى باظ ..وغبت من البورد ..بقيت ارسم بالماوس.."..
يعني "بوظة" الكمبيوتر الجاية وغيبة من البورد معرض طوالي؟؟؟!!!!!!!!
-------------------
عاطف بحر (له التحية أينما كان)..واحد من الدراميين العندهم تجربة مع رسم الكاريكاتيرات ..وكمان جاء عمل معرض في نجيلة نحت بكلية الفنون وبدعوة من جمعية الرسم ..
الكلام دا في بداية التسعينات..
المهم يا تماضر في النهاية كلو ضد القُبح ..
وبرضو المســرح أبُو ..
ولا بديل للسكة حديد إلا السكة حديد ..
| |
|
|
|
|
|
|
|
|
|
Re: التشكيليين سجمكم ...انا جيت (Re: Tumadir)
|
انا دايما تماضر بتفطني في الردود ... لكن أحسن لي تماضر تفطني مية مرة ولا يتذكرني عبد الرازق الطالب مرة ...
كثييييييييييييييف ودي يا تماضر
وخالص تحياتي يا لؤلؤ ... (لقيت المقاطع يا لؤي مشكور جداً يا فنان) ...
| |
|
|
|
|
|
|
| |
Tumadir
لؤى
abcde
Adil Osman
bayan
محمد سنى دفع الله
أحمد الشايقي
Hussein Mallasi
عبد الله عقيد
ابراهيم برسي
خدر
fohamer
Emad Abdulla
Soumeta
بدرالدين شنا
حاتم الياس
Ibrahim Algrefwi
يازولyazoalيازول
خالد العبيد
عصام عبد الحفيظ
Khalid Kodi
Marouf Sanad
doma
nadus2000
gessan
Elmosley
فيس بوك
تويتر
انستقرام
يوتيوب
بنتيريست